ဇွန်လ ၂ ရက်နေ့

တစ်ကိုယ်လုံးကျန်းမာခြင်း အကြောင်း

( သုတ္တံကျမ်းမှ အနာငြိမ်းခြင်း )

“အ​ကြောင်း​မူ​ကား၊ ထို​တ​ရား​စ​ကား​ကို တွေ့​ရ​သော​သူ​တို့​သည် အ​သက်​ရှင်​ခြင်း၊ တစ်​ကိုယ်​လုံး​ကျန်း​မာ​ခြင်း​အ​ကြောင်း​ကို တွေ့​ရ​ပြီ။” သုတ္တံ ၄:၂၂

ကိုယ်ခန္ဓာရဲ့ အစိတ်အပိုင်း အားလုံး ကျန်းမာဖို့ ကျန်းမာစေတဲ့ ဆေးရှိသလား? ဆေးဝါးတချို့က တစ်ခုအတွက်ကောင်းရင်တောင် တစ်ခုအတွက် ဆိုးကျိုးဖြစ်စေတယ်။ တခုအတွက် အသုံးဝင်ရင်တောင် နောက်တစ်ခုအတွက် ဘေးဖြစ်စေတဲ့အရာတွေအများကြီးရှိတယ်။ တစ်ခုချင်းဆီတိုင်းအတွက် ဘေးမဖြစ်ပဲ ကျန်းမာခြင်းဖြစ်ဖို့က ဘုရားရဲ့စကားကို ဘဝမှာ တွေ့ရှိခြင်းဖြစ်တယ်။ ဒီဘုရားစကားကို ရရှိတဲ့အခါမှာ သင့်ရဲ့ တစ်ကိုယ်လုံးမှာ ရှိတဲ့အစိတ်အပိုင်း တိုင်းအတွက် ဘေးမဖြစ်ပဲ ဆေးဖြစ်ပြီးတော့ ကျန်းမာစေလိမ့်မယ်လို့ ဘုရားက ကတိပေးထားတယ်။

ဇွန်လ ၁ ရက်နေ့

ဆေးဝါးကောင်း

“ဝမ်းမြောက်​သော​စိတ်နှလုံး​သည် ဆေး​ကောင်း​တစ်​လက်​ဖြစ်​၏​။ စိတ်​ထိခိုက်​နာကျင်​ခြင်း​မူကား အရိုး​ကို​ခြောက်သွေ့​စေ​တတ်​၏​။” သုတ္တံကျမ်း ၁၇:၂၂

ဘယ်လို အခြေအနေ မျိုးမှာမဆို ဝမ်းမြောက်စွာ ဖြတ်သန်းဖို့ ရွေးချယ်ပါ။ စိတ်ညစ်နေလို့၊ စိတ်ထိခိုက်ခံစားလို့ အခက်အခဲပြဿနာက ပြေလည်သွားမှာ မဟုတ်ဘူး။ ပိုလို့တောင်ဆိုးလာအုံးမယ်။ စိတ်ပျက် ဝမ်းနည်းဖို့ရွေးချယ်တဲ့အခါမှာ ရှိပြီးသား ပြဿနာ ထဲကိုနောက်ထပ် ပြဿနာ အသစ်ကို ထပ်တိုးဖို့ရွေးချယ်လိုက်တယ်။ နှုတ်ကပတ်တော်က ပြောတယ် စိတ်ထိခိုက်ခံစားခြင်းက အရိုးတွေကိုသွေ့ခြောက်စေတယ်။ ရောဂါဖြစ်ဖို့ တံခါး ဖွင့်ပေးလိုက်တယ်။ ရှိပြီးသား ပြဿနာ ထဲကို နောက်ထပ်ပြဿနာ အသစ်တိုးတာကို ခွင့်မပြုနဲ့။ ဝမ်းမြောက်စွာနဲ့ တုန့်ပြန်တဲ့အခါမှာ အကောင်းဆုံး ဆေးဝါးကို သုံးဆောင်သလို ဖြစ်စေပြီးတော့ ရှိပြီးသား ပြဿနာကို ကုသပေးရုံသာမက ဖြစ်လာမယ့်ရောဂါအတွက်ပါ ကြိုတင်ကာကွယ်ထားပြီးသားဖြစ်စေတယ်။

မေလ ၃၀ ရက်နေ​့

အစာရှောင် ဆုတောင်းပြီးတဲ့နောက်မှာ

“ရှုရှန်​မြို့​တွင် ရှိသမျှ​သော​ဂျူး​လူမျိုး​တို့​ကို သွား​၍​စုစည်း​ပြီး နေ့​ရော​ည​ပါ သုံး​ရက်​ပတ်လုံး မ​စား​မ​သောက်​ဘဲ အကျွန်ုပ်​အတွက် အစာရှောင်​ဆုတောင်း​ကြ​ပါ​။ အကျွန်ုပ်​နှင့် အစေခံ​မိန်းကလေး​များ​သည်​လည်း ထိုနည်းတူ အစာရှောင်​ဆုတောင်း​ကြ​ပါ​မည်​။ ထို့နောက် ဥပဒေ​နှင့်​ဆန့်ကျင်​သော်လည်း ရှင်ဘုရင်​ထံ​အခစား​ဝင်​မည်​။ သေ​ရ​မည်​ဆိုလျှင်​လည်း အသေ​ခံ​ပါ​မည်​”​ဟု ပြန်ပြော​လိုက်​၏​။” ဧသတာဝတ္ထု ၄:၁၆

အစာရှောင်ခြင်း၊ ဆုတောင်းခြင်းက ဘာမှ မလုပ်ခင်မှာ အရင်ဆုံးလုပ်သင့်တဲ့အရေးကြီးဆုံးအရာဖြစ်တယ်။ တချို့က အားလုံးလုပ်ပြီး အဆင်မပြေမှပဲ အစာရှောင်ဖို့ ဆုတောင်းဖို့စဉ်းစားကြတယ်။ တကယ်တော့ လွဲနေတယ်။ ဘာမှ မလုပ်ခင် မဆုံးဖြတ်ခင်မှာအရင်ဆုံး လုပ်ရမယ့်အရာဖြစ်တယ်။ အစာရှောင်ခြင်းဆုတောင်းပြီးသွားတဲ့အခါမှာတော့ ဘုရားထံကို အပ်နှံပြီး စိတ်ချစွာနဲ့ ဘယ်လို အရာတွေကို ကြုံတွေ့ရပါစေ မကြောက်ပဲနဲ့ ရင်ဆိုင် ပါ။ ဧသတာရဲ့ ပြဿနာအပေါ် ရင်ဆိုင်ဖြေရှင်းခြင်းက တကယ့်ကို တန်ခိုးပါတယ်။ အစာရှောင် ပြီးပြီ ဆုတောင်းပြီး ဘာမှ မဖြစ်လာဘူးလို့ တချို့က ဆိုတတ်တယ်။ တကယ်တော့ အစာရှောင်ဆုတောင်းပြီး ဒီအတိုင်း ထိုင်ဆိုင်ရမှာ မဟုတ်ဘူး။ဘယ်လို အရာတွေက အတားအဆီး ဆန့်ကြင်ဘက် ဖြစ်နေပါစေ အစာရှောင် ဆုတောင်းပြီးတဲ့ နောက်မှာ အကောင်းဆုံး လုပ်ဆောင်ဖို့ပါပဲ။

မေလ ၂၉ ရက်နေ့

ပြဿနာကို ဖြေရှင်းဖို့ ပေးထားတဲ့ကောင်းကြီး 

ယ​ခု​အ​မှု​ကို​ဆောင်​ဖို့​ရာ သင်​သည် မိ​ဖု​ရား​အ​ရာ​ကို​ရ​သည်​ဟု ထင်​စ​ရာ​ရှိ​သည်​မ​ဟုတ်​လော​ဟု ဧ​သ​တာ​အား ပြန်​ပြော​စေ​ခြင်း​ငှာ မှာ​လိုက်၏။” ဧသတာ ၄:၁၄

    ဂျူးတွေကို အကြီးကျယ် မုန်းတီးနေတဲ့ခေါင်းဆောင်ရှိနေတဲ့ခေတ်မှာ ဂျူးတစ်ယောက်က ချီးမြှောက်ခံနေရတယ်ဆိုတာ ဘုရားမလုပ်ရင် ဘယ်သူများလုပ်မလဲ? ဘုရားက ပြဿနာ မလာခင်ကတည်း ဖြေရှင်းဖို့အတွက် ကောင်းကြီးဖြစ်တဲ့ ဧသတာကို အရင်ဆုံး ကောင်းကြီးပေးချီးမြှောက်ထားတယ်။ ကောင်းကြီးခံစားရတဲ့အခါမှာ သိထားဖို့က ပြဿနာတွေကို ဖြေရှင်းဖို့ ဘုရားက ကြိုတင်အလုပ်လုပ်ထားတယ်ဆိုတာပါပဲ။ ဒီကာလ ရဲ့ ပြဿနာတွေကို ဖြေရှင်းနိုင်ဖို့ ဘုရားက သင့်ကိုကောင်းကြီးပေးထားတယ်။

မေလ ၂၈ ရက်နေ့

ဘိုးဘေးများ၏နားမထောင်ခြင်းရလဒ်

“ထို​အ​မှု​ရှိ​သ​မျှ​ကို မော်​ဒ​ကဲ​သိ​သော​အ​ခါ၊ မိ​မိ အ​ဝတ်​ကို ဆုတ်၍ ပြာ​နှင့်​လူး​လျက်၊ လျှော်​တေ​အ​ဝတ်​ကို ဝတ်​လျက်၊ မြို့​အ​လယ်​သို့​သွား၍ ကြီး​ကျယ်​သော​အ​သံ​နှင့် ငို​ကြွေး​လေ၏။” ဧသတာ ၄:၁

ဘုရားက အာမလက် လူတွေကို ပြတ်ပြတ်သားသားကိုင်တွယ်ဖို့ ရှောလုကိုမှာတယ်။ ရှောလုရဲ့ နားမထောင်ခြင်းက သူ့ကိုပဲ ဘုရင်ရာထူးကနေ ဖယ်ရှားလိုက်တာ မဟုတ်ဘူး။နောက်မျိုးဆက်ဖြစ်တဲ့ သူတွေကို အကြီးအကျယ် သက်ရောက်မှုရှိတယ်။ ဧသတာ ရဲ့ခေတ်မှာ အာမလက်အမျိုးထဲက ဟာမန်က ဣသရေလ တစ်မျိုးလုံးကို ရှင်းပစ်ဖို့ ကြိုးစားတယ်။ ဘိုးဘေးတွေရဲ့ နာမခံခြင်းက နောက်မျိုးဆက်ကို အကြီးအကျယ်သက်ရောက်မူရှိစေတယ်။ ဧသတာရဲ့နာခံခြင်းကတော့ ဘိုးဘေးတွေ လက်ဆင့်ကမ်းပေးလိုက်တဲ့ ဆိုးတဲ့အမွေတွေကြောင့် ကြုံရတဲ့ ပြဿနာတွေမှ လွတ်မြောက်ဖို့ဖြစ်လာစေတယ်။

မေလ ၂၇ ရက်နေ့

ဝှက်ထားရမယ့်အရာကို မပြမိစေနဲ့

“ဧ​သ​တာ​သည် မိ​မိ​အ​မျိုး​နှင့် မိ​မိ​ဆွေ​ညာ​တ​ကာ​ကို မ​ဖော်​မ​ပြ​မည်​အ​ကြောင်း၊ မော်​ဒ​ကဲ သ​တိ​ပေး​သည်​အ​တိုင်း မ​ဖော်​မ​ပြ​ဘဲ နေ၏။” ဧသတာ ၂:၁၀

ဧသတာဟာ နန်းတွင်းထဲမှာနေတဲ့ကာလအတွင်းမှာ သူ့ရဲ့လူမျိုးနှင့် ဘဝအဖြစ်မှန်ကို ဘယ်သူမှ မသိခဲ့ဘူး။ တကယ်ဆိုရင် ဘုရင့်အနားကို ရောက်လာတဲ့ ဘယ်သူမဆို နောက်ခံအကြောင်းကိုတော့ သေချာအောင်စစ်ဆေး ကြစမြဲပါ။ ဉီးလေး မော်ဒကဲရဲ့ သွန်သင်မှုနဲ့အတူ မိမိရဲ့အဖြစ်မှန်ကို မပြောပဲ ဧသတာဟာ ဝှက်ထားခဲ့တယ်။ လိမ်ညာချင်လို့ မပြောပဲ နေတာ မဟုတ်ပဲ မလိုအပ်လို့ မပြောခြင်းသာဖြစ်တယ်။ ဒီဝှက်ထားတဲ့အရာက တချိန်မှာ အောင်မြင်ဖို့၊ ကောင်းစားဖို့နဲ့ ရန်သူကို တုန့်ပြန်ဖို့ အကောင်းဆုံးဖြစ်ခဲ့တယ်။ ဘဝမှာ တချို့သောအရာတွေကို ဘုရားက အားလုံး ချမပြခိုင်းတာက အကြံအစည်ရှိတယ်။ တနေ့ ဒီအရာတွေကိုဖေါ်ထုတ်ပြီးတော့ ဘုရား လုပ်ဆောင်မယ့်အရာကို မြင်တွေ့ရဖို့ဖြစ်လာစေမယ် မဟုတ်လား?

မေလ ၂၆ ရက်နေ့

ယခုကာလ အတွက်

ယ​ခု​အ​မှု​ကို​ဆောင်​ဖို့​ရာ သင်​သည် မိ​ဖု​ရား​အ​ရာ​ကို​ရ​သည်​ဟု ထင်​စ​ရာ​ရှိ​သည်​မ​ဟုတ်​လော​ဟု ဧ​သ​တာ​အား ပြန်​ပြော​စေ​ခြင်း​ငှာ မှာ​လိုက်၏။” ဧသတာ ၄:၁၄

အခက်အခဲကြားထဲမှာ ဘယ်ကများ အကူအညီတွေထွက်ပေါ်လာမလဲ​လို့ လူတိုင်းက ရှာဖွေတတ်ကြတယ်။ ဧသတာလဲ လူမျိုးစုတစ်ခုလုံးအပေါ်မှာ သက်ရောက်တဲ့ အခက်အခဲပြဿနာအတွက် ထွက်မြောက်ရာကိုရှာဖွေခဲ့တယ်။ မော်ဒကဲရဲ့စကား က အဲ့ဒီပြဿနာရဲ့အဖြေကို သူ့ကို မီးမောင်းထိုးပြလိုက်တယ်။ ပြဿနာရဲ့အဖြေက အခြားသူမဟုတ်ပဲ ဒီကာလအတွက် ကိုယ်ကိုယ်တိုင် ဖြစ်နေတယ်။ ဘုရားက သင့်ကို ဒီကာလမှာ မွေးဖွားစေတာ၊ ကောင်းကြီးပေးထားတာက များစွာသော သူတွေရဲ့ မျက်ရည်နဲ့ ပြဿနာတွေကို ဖြေရှင်းပေးဖို့ဆိုတာ လူများစွာ မေ့နေတတ်တယ်။ တကယ်တော့ ပြဿနာရဲ့အဖြေက သင်ကိုယ်တိုင်ပါပဲ။ မော်ဒကဲ ပြောတဲ့အတိုင်းလဲ ပြဿနာကို ဘုရားနည်းလမ်းနဲ့ဖြေရှင်း ခဲ့တဲ့သူက ကိုယ်ဟာကိုယ်တောင် မထင်ထားတဲ့ ဧသတာ ဖြစ်နေခဲ့တယ်မဟုတ်လား။

မေလ ၂၅ ရက်နေ့

ဖြေရှင်းပေးတဲ့ဘုရား

“အကယ်စင်စစ် ကိုယ်တော်​သည် အကျွန်ုပ်​၏​ခြေလှမ်း​တို့​ကို ရေတွက်​တော်မူ​သော်လည်း အကျွန်ုပ်​၏​အပြစ်​ကို မှတ်​တော်​မ​မူ​ပါ​။ အကျွန်ုပ်​ကျူးလွန်​မိ​သော​အပြစ်​ကို အိတ်​ထဲ၌​ချိပ်ပိတ်​ထား​၍ အကျွန်ုပ်​၏​ဒုစရိုက်​ကို ဖုံးကွယ်​ထား​တော်မူ​ပါ​၏​။” ယောဘဝတ္ထု ၁၄:၁၆-၁၇

ယောဘရဲ့ မိတ်ဆွေ သူငယ်ချင်းတွေက ယောဘရဲ့ ပြဿနာတွေ၊ အနာရောဂါတွေက အပြစ်ကြောင့်လို့ အခိုင်အမာ စွပ်စွဲကြတယ်။ သူ့ရဲ့အပြစ်က ယောဘကို ဆိုးရွားတဲ့ဘဝမျိုး ရောက်စေတယ်လို့ အခိုင်အမာ ယုံကြည်ကြတယ်။ ယောဘရဲ့ယုံကြည်ခြင်းကတော့ ဘုရားက အသေးစိပ်သိနေပေမဲ့ မကောင်းတဲ့အရာတွေကို မှတ်ထားတဲ့ ဘုရားမဟုတ်ဘူး။ လွန်ကျူးမိတဲ့အပြစ်တွေကို စီရင်တာထက် အပြစ်ကနေ လွတ်မြောက်အောင် ကူညီဖြေရှင်းပေးတဲ့ ဘုရားဖြစ်တယ်။ ဒီယုံကြည်ခြင်းက လူတိုင်း မရနိုင်ဘူး။ ဘုရားက အပြစ် ကိုမှတ်ထားပြီးတော့ တရားစီရင်တဲ့သူလို့ပဲ ထင်မှတ်နေတယ်။

မေလ ၂၃ ရက်နေ့

ကိုယ့်ကိုယ်ကိုယ် အပြစ်မတင်ရအောင်

“ဖြောင့်မတ်​ခြင်း​ကို လက်​မ​လွှတ်​ဘဲ စွဲကိုင်​ထား​မည်​။ ငါ​အသက်ရှင်​သမျှ​ကာလ​ပတ်လုံး ကိုယ့်ကိုယ်ကိုယ် အပြစ်​မ​တင်​ရ​အောင် နေ​မည်​။” ယောဘဝတ္ထု ၂၇:၆

အခြားသူတွေအပြစ်တင်တာ၊ အပြစ်မြင်တာထက် ကိုယ့်ကိုယ်ကိုယ် အပြစ်တင်တာ၊ အပြစ်စီရင်တာ ပိုဆိုးပါတယ်။ တချိန်လုံး အပြစ်တင်တတ်တဲ့စိတ်ဟာ ပြဿနာကို ဖြေရှင်းပေးတာ ထက်ပိုဆိုးသွားအောင်ပဲလုပ်ပေးတယ်။ ယောဘ ကြီးမားတဲ့စုံစမ်းခြင်းထဲကနေ ကျော်လွန် လွတ်မြောက်စေတဲ့အထဲမှာ ဒီအချက်လဲ တစ်ခုအပါအဝင်ဖြစ်တယ်။ ဘုရားပေးတဲ့ဖြောင့်မတ်ခြင်းကိုပဲ စွဲကိုင်ထားပြီးတော့ ဘုရားမြင်သလို ကိုယ့်ကိုယ်ကိုယ်မြင်ခြင်းက ပြဿနာပေါင်း များစွာကိုဖြေရှင်းပေးနိုင်တဲ့ အဖြေဖြစ်တယ်။

မေလ ၂၂ ရက်နေ့

သစ်ငုတ်မှ အတက်ပေါက်မယ်

“သစ်​ပင်​ကို​ခုတ်​သော်​လည်း၊ အ​ငုတ်​အ​ချည်း​စည်း​မ​ရှိ​ဘဲ အ​တက်​ပေါက်​လေ​ဦး​မည်​ဟု မျှော်​လင့်​စ​ရာ​ရှိ၏။ မြေ​ထဲ​မှာ အ​မြစ်​ဟောင်း၍၊ မြေ​ပေါ်​မှာ အ​ငုတ်​သေ​သော်​လည်း၊ ရေ​ငွေ့​ကြောင့် အ​တက်​ပေါက်၍၊ ပျိုး​ပင်​ကဲ့​သို့ အ​ညွန့်​တို့​နှင့် ပြည့်​စုံ​လိမ့်​မည်။” ယောဘ ၁၄:၇-၉

ဘဝတစ်ခုလုံး ရစရာမရှိအောင် ဆုတ်ပြတ်သတ် ပြီးတော့ အခက်အခဲတွေ ဝိုင်းရံခံရပေမဲ့ ယောဘ နက်နက်ရှိုင်းရှိုင်း ယုံကြည်တာ ရှိပါတယ်။ ဘယ်လောက်ပဲ အတတ်တွေ၊ အခက်တွေ ကိုခုတ်ပစ်ပါစေ ကျန်နေသေးတဲ့အငုတ်ဟာ ရေငွေ့ ကြောင့် အတတ်ပြန်ပေါက်ပြီးတော့ ပြန်လည်ရှင်သန်မယ်ဆိုတာပါပဲ။ ကျွန်တော်တို့အသက်တာမှာလဲ ဒီအတိုင်းပါပဲ ဘယ်လောက်ပဲ အခက်အခဲတွေ စိန်ခေါ်မူတွေနဲ့ ဖိအားတွေရင်ဆိုင်နေရပေမဲ့ ဘုရားသခင်ရဲ့ကျေးဇူးတော်က ပြန်လည် ရှင်သန်ဖို့အတွက် လုပ်ဆောင်ပေးမယ်။ ဒီယုံကြည်ခြင်းကပဲ ယောဘကို သစ်ငုတ်တိုဘဝကနေ သစ်တောအုပ်ကြီးဘဝကိုပြန်ပို့ပေးတယ်လို့ ဆိုရမယ်။

မေလ ၂၁ ရက်နေ့

အလွန်ကြီးသော အမူ ပြုတဲ့သူ

“စစ်၍​မ​သိ​နိုင်​အောင် အ​လွန်​ကြီး​သော​အ​မှု၊ မ​ရေ​တွက်​နိုင်​အောင်​များ၍ အံ့​ဖွယ်​သော​အ​မှု​တို့​ကို ပြု​တော်​မူ၏။” ယောဘ ၉:၁၀

ပြဿနာက ဘယ်လောက်ကြီးကြီး ဘုရား လောက်တော့ မကြီးတာ သေချာပါတယ်။ လူတွေက ပြဿနာဘယ်လောက်ကြီးတဲ့ အကြောင်းပဲ ပြောနေကြတယ်။ တကယ်တော့ ပြဿနာထက် အလွန်ကြီးမြတ်တဲ့ ဘုရားအကြောင်းကိုတော့ မပြောသလောက်ပဲ။ ဘုရားကို သင့်ပြဿနာ ဘယ်လောက်ကြီးသလဲ ပြောတာထက် သင့်ပြဿနာကို ဘုရားဘယ်လောက်လောက်ကြီးသလဲဆိုတာကို ပြောရမယ့်အချိန်ရောက်ပြီ။ ယောဘက ကောင်းကောင်းသိတယ် သူ့ကြုံရတဲ့ ပြဿနာထက် ဘုရားကပိုကြီးမြတ်ပြီးတော့ အံ့ဖွယ်သောအမှုတွေကို ပြုနိုင်တယ်ဆိုတာ။ ဒါကြောင့် ပြဿနာတွေဘယ်လောက်ပဲ ကြုံရကြုံရ နောက်ဆုံးတော့ ကြီးမြတ်တဲ့ဘုရားပြုတဲ့အမှုကပဲ သူ့ဘဝကို အနိုင်ယူသွားတာပါပဲ။

မေလ ၂၀ ရက်နေ့

ဘုရားကိုမြင်ရမယ်

“ငါ့​အရေပြား​များ ပျက်စီး​သွား​သော်လည်း ဤ​ကိုယ်ခန္ဓာ​ဖြင့် ဘုရားသခင်​အား ဖူးမြင်​ရ​မည်​ကို ငါ​သိ​၏​။” ယောဘဝတ္ထု ၁၉:၂၆

ဖြစ်ပျက်နေတဲ့ အရာတွေထဲမှာ ဘုရား အတူပါရှိတယ်၊ ဘုရားလုပ်ဆောင်မှုကို မြင်ရမယ်လို့ ယုံနိုင်ပါသလား? ကောင်းစားနေတဲ့အချိန်တွေမှာတော့ ဘုရားပါရှိတယ်၊ ကောင်းမြတ်တယ်လို့မြင်နိုင်ပေမဲ့၊ အခက်အခဲတွေ၊ ပြဿနာတွေ ကြုံရတဲ့အချိန်မှာ တော့ ဘုရားအတူပါရှိတယ်။ ဘုရားကိုမြင်ရမယ်လို့ ယုံနိုင်တဲ့သူက အရမ်းကို ရှားပါတယ်။ ယောဘအသက်တာမှာ ကြုံရတဲ့ မုန်တိုင်းတွေထဲမှာ အောင်မြင်စွာ ကျော်လွှားပြီးတော့ နှစ်ဆသောကောင်းကြီးကို ရစေခဲ့တာက ဒီယုံကြည် ခံယူချက်ကြောင့်လဲပါတယ်။

မေလ ၁၉ ရက်နေ့

ရွှေကဲ့သို့ပေါ်လာမယ်

“သို့သော် ကိုယ်တော်​သည် ငါ​သွား​ရာ​လမ်း​ကို သိ​တော်မူ​၏​။ ကိုယ်တော်​သည် ငါ့​ကို စစ်ဆေး​တော်မူ​ပြီးမှ ငါ​သည် ရွှေ​ကဲ့သို့ ပေါ်လာ​လိမ့်မည်​။” ယောဘဝတ္ထု ၂၃:၁၀

ပြဿနာအခက်အခဲကြားမှာ ပျောက်ကွယ်မသွားပဲ​နှစ်ဆသော ကောင်းကြီးမင်္ဂလာနဲ့ အဆုံးသတ်တဲ့ယောဘ အကြောင်းကို သိပြီးသားဖြစ်မှာပါ။ ဒီလောက်ဆိုးတဲ့ အခြေအနေတွေ ကြုံတွေ့ရပေမဲ့ အဆိုးတွေကို အောင်မြင်ပြီးတော့ အကောင်းဆုံးတွေနဲဲ့ အဆုံးသတ်ခဲ့ရတာက

သူ့ရဲ့ ယုံကြည်ခံယူချက်ကြောင့်လို့ပြောရင် မှားမယ်မထင်ဘူး။ သာမန်လူတွေသာ ဒီလောက် ကြုံတွေ့ရရင် စိတ်ပျက်ပြီးတော့ လက်လျော့အရူံးပေးသွားမယ်။ ပြဿနာတွေကြားထဲမှာ ပြာမဖြစ်သွား ရွှေဖြစ်လာမယ်လို့ သူက အခိုင်အမာယုံကြည်ခဲ့တယ်။ ပြဿနာမီးက သူ့ကို ပိုပြီးတောက်ပစေပြီးတော့ တန်ဖိုးတတ်လာစေမယ်လို့ သူက ယုံတယ်။

မေလ ၁၈ ရက်နေ့

ပြောင်းပြန်လှန်နိုင်တဲ့ယုံကြည်ခြင်း

“ကိုယ်တော်​သည် အရာခပ်သိမ်း​ကို​တတ်နိုင်​တော်မူ​၍ ကိုယ်တော်​၏​အကြံအစည်​ကို မည်သူ​မျှ မ​ဆီးတား​နိုင်​ကြောင်း​ကို အကျွန်ုပ်​သိ​ပါ​၏​။” ယောဘဝတ္ထု ၄၂:၂

စုံစမ်းခြင်းတွေနဲ့ စာတန်မာရ်နတ်ရဲ့ ထိုးနှက်မှုတွေ ကြားထဲမှာ စီးပွါးရေး သာမကပဲ မိသားစုတစ်ခုလုံး ရစရာမရှိအောင် ကြုံတွေ့ရတဲ့ဘဝကနေ အရာခပ်သိမ်း နှစ်ဆပြန်လည် ကောင်းကြီးရပြီးတော့၊ အပြစ်တင်စွပ်စွဲတဲ့ သူတွေက ပြန်လည်တောင်းပန်ရတဲ့အထိ ဘဝကို ဘုရားက ပြောင်းပြန်လှန် ခဲ့တယ်။ ဒီလို ဖြစ်စေခဲ့တာ ယောဘရဲ့ ဘုရားအပေါ်ထားတဲ့ ယုံကြည်ခြင်း ကြောင့်လို့ပြောရမယ်။ သူဘုရားကိုယုံတာ အင်မတန်အားကြီးတယ် ။ ဘုရားက အရာခပ်သိမ်းတတ်နိုင်တယ်။ ဘုရားရဲ့အကြံအစည်ကို ဘယ်သူမှ ဘယ်လိုမှ မဆီးတားနိုင်ဘူး။ဒီယုံကြည်ခြင်းက မကောင်းတဲ့အရာတွေကို အားလုံးကို ပြောင်းပြန်လှန်ပစ်လိုက်တယ်။

မေလ ၁၆ ရက်နေ့

တန်ခိုးတော်ကြောင့် (၂)

“ဤသည်ကား သင်​တို့​၏​ယုံကြည်​ခြင်း​သည် လူ​တို့​၏​ဉာဏ်ပညာ​၌​မ​တည်​ဘဲ ဘုရားသခင်​၏​တန်ခိုး​တော်​၌​တည်​မည့်​အကြောင်း​တည်း။” ၁ ကော၂:၅‭

ဘာသာရေးသမားတွေက ယုံကြည်ခြင်းကို ဘယ်ကလာသလဲလို့မေးရင် ကြားနာခြင်းကနေ လာတယ်လို့ပဲ ဖြေလိမ့်မယ်။ မှားလားဆိုတော့မမှားပေမဲ့ မပြည့်စုံပါဘူး။ယုံကြည်ခြင်းက ကြားနာခြင်းကနေပဲ မလာပါဘူး။ ယုံကြည်ခြင်းကို ဖြစ်ပေါ်စေတဲ့ နည်းလမ်း အများကြီးရှိတယ်။ ယုံကြည်ခြင်းက ကြားနာခြင်းကနေ လာနိုင်သလို ဘုရားရဲ့တန်ခိုးတော်ကို ထိတွေ့ခံစားပြီးတော့လဲ ယုံကြည်ခြင်း ဖြစ်ပေါ်လာစေနိုင်တယ်။ တမန်တော်ကြီးရှင်ပေါလုက လူ့ရဲ့ ပညာအားဖြင့် ယုံကြည်ခြင်းမတည်ဖို့အတွက် ဘုရားရဲ့တန်ခိုးတော်ကနေလာတဲ့ ယုံကြည်ခြင်းနဲ့ မိတ်ဆက်ပေးခဲ့တယ်။ ဘဝမှာ ဘုရားရဲ့တန်ခိုးတော်ကနေလဲ ယုံကြည်ခြင်းဖြစ်ပေါ်စေနိုင်တယ်။

မေလ ၁၅ ရက်နေ့

တန်ခိုးတော်ကြောင့်

“ထို့ပြင်သင်​တို့​သည် ကိုယ်တော်​၏​ဘုန်း​အသရေ​နှင့်​ပြည့်စုံ​သော တန်ခိုး​အရှိန်အဝါ​နှင့်အညီ တန်ခိုး​တော်​ရှိသမျှ​တို့​ဖြင့် အားဖြည့်​ခြင်း​ကို​ခံရ​လျက် သည်းခံ​ခြင်း​နှင့်​စိတ်ရှည်​ခြင်း​အပြည့်အဝ​ရှိ​သဖြင့်” ကောလောသဲဩဝါဒစာ ၁:၁၁

ဘုရားရဲ့တန်ခိုးတော် အသက်တာမှာ ရောက်လာရင် ဘာတွေဖြစ်လာသလဲ? ပထမဆုံး လိုအပ်တဲ့ အားအင်ကို ဖြည့်ပေးပါတယ်။ တန်ခိုးတော်ကို မသိတဲ့သူတွေကသာ အမြဲတမ်း အားနည်းတဲ့ ဘဝအဖြစ် ဝန်ခံပြောဆိုတတ်ပေမဲ့၊ တန်ခိုးတော်ကို နားလည်တဲ့သူတွေကတော့ အမြဲတမ်း တန်ခိုးတော်ကြောင့် အားပြည့်လျှက်ရှိပါတယ်။ တန်ခိုးတော် ရဲ့အားဖြည့်ပေးခြင်းခံရတဲ့အခါမှာ သည်းခံခြင်း နှင့်စိတ်ရှည်ခြင်း နှင့်ပြည့်ဝနေပြီးတော့ ဘုရားပေးတဲ့ ကတိတော် ပိုင်ဆိုင်တဲ့အထိ အရာရာကို အကောင်းဆုံး ရင်ဆိုင်နိုင်ပါတယ်။

မေလ ၁၄ ရက်နေ့

ဘုရားတန်ခိုးတော်ကို သိတဲ့သူဖြစ်ပါ

“ကိုယ်တော်​၏​အစွမ်းသတ္တိ​နှင့်​ပြည့်စုံ​သော တန်ခိုး​အရှိန်အဝါ​၏​လုပ်ဆောင်​မှု​အားဖြင့် ယုံကြည်​သော​ငါ​တို့​အပေါ်​သက်ရောက်​သည့် ကိုယ်တော်​၏​တန်ခိုး​သည် မည်မျှ​ထူးကဲ​ကြီးမား​သည်​ကို​လည်းကောင်း သင်​တို့​အား​သိ​စေ​မည့်​အကြောင်း တောင်းလျှောက်​၏။” ဧဖက်ဩဝါဒစာ ၁:၁၉

တန်ခိုးကြီးတဲ့ ဘုရားကို ယုံပြီးတော့ တန််ခိုးနိမိတ်လက္ခဏာကို မယုံတာ ဘယ်လောက်ဆိုးတဲ့ ဘဝလဲ​? ဘုရားကို ယုံရင် ဘုရားမှာရှိတဲ့ တန်ခိုးကိုလဲ​ယုံနိုင်ဖို့လိုတယ်။ ဘုရားက သူ့ရဲ့အစွမ်းသတ္တိနဲ့ပြည့်စုံတဲ့ တန််ခိုးအရှိန်အားဖြင့် ယုံကြည်သူ တွေရဲ့ဘဝမှာ အမြဲတမ်း အလုပ်လုပ်ပေးတယ်။ ဒီတန်ခိုးက သေးသေးလေး မဟုတ်ဘူး။ ယုံကြည်သူတွေ ဆုံးရှုံးရတဲ့အထဲမှာ တန်ခိုးကြီးတဲ့ ဘုရားကို ယုံပြီး အဲ့ဒီတန်ခိုးက ကိုယ့်အသက်တာမှာ အလုပ်လုပ်နေတယ်၊ ကြီးမားစွာ အမှုပြုနေတယ်ဆိုတာကိုမယုံနိုင်တာပါပဲ။ ဒါကြောင့်ရှင်ပေါလုက ဒီကြီးမားတဲ့ ဘုရားတန်ခိုး အသက်တာမှာ အလုပ်လုပ်တာကို ယုံကြည်သူတွေ သိလာဖို့ ဆုတောင်းပေးခဲ့တယ်။

မေလ ၁၃ ရက်နေ့

အားနည်းခြင်းထဲမှာ ကိန်းဝပ်တဲ့တန်ခိုး

“ငါ့​ကျေး​ဇူး​သည် သင့်​အ​ဖို့​လောက်​ပေ၏။ ငါ့​တန်​ခိုး​သည် အား​နည်း​ခြင်း​အ​ဖြစ်၌ စုံ​လင်​တတ်​သည်​ဟု မိန့်​တော်​မူ၏။ ထို​ကြောင့် ခ​ရစ်​တော်၏ တန်​ခိုး​သည် ငါ့​အ​ပေါ်၌ ကျိန်း​ဝပ်​မည်​အ​ကြောင်း ငါ့​ကိုယ်၌ အား​နည်း​ခြင်း​အ​ဖြစ်​ကို ဝမ်း​မြောက်​သော​စိတ်​နှင့် ဝါ​ကြွား​ခြင်း​ငှာ သာ၍ ငါ​အ​လို​ရှိ၏။-” ၂ ကောရိန္သု ၁၂:၉

ဘုရားရဲ့တန်ခိုးတော်က ပြည့်ပုံတဲ့အခါမှာမှ လာနေရာယူတာမဟုတ်ဘူး။ အားနည်းချက်တွေမရှိမှပဲ ဘုရားတန််ခိုးတော်က ရောက်လာတာမဟုတ်ရပါဘူး။ ဘုရားရဲ့တန်ခိုးတော်က အား အနည်းဆုံးအချိန်မှာ အသက်တာမှာ နေရာယူလာတယ်။ တချို့သောအားနည်းချက်တွေ၊ အားအနည်းဆုံး အချိန်တွေက ဘုရားရဲ့တန်ခိုးတော် ဘဝအသက်တာမှာ နေရာယူဖို့အတွက် အကောင်းဆုံး အချိန်ဖြစ်တယ်။ ဘုရားရဲ့တန်ခိုးတော် အသက်တာမှာ နေရာယူလာပြီဆိုရင် သေချာတယ် မဖြစ်

နိုင်တာတွေ ဖြစ်လာတော့မှာပါ။

မေလ ၁၂ ရက်နေ့

အထဲမှာ တန်ခိုးနှင့် ပြည့်စုံစေသူ

ကိုယ်တော်​သည် သင်​တို့​တွင်​အားနည်း​တော်​မ​မူ။ သင်​တို့​အထဲ၌ တန်ခိုး​နှင့်​ပြည့်စုံ​တော်မူ​၏။” ၂ကော ၁၃:၃

ကိုယ့်ရဲ့အားနည်းချက်တွေကို ကြည့်ပြီးတော့စိတ်ပျက်နေသလား? ကိုယ့်ကိုကိုယ်ကြည့်ရင် အားသာချက်တွေမြင်တဲ့အခါမှာ မာနကြီးခြင်းဖြစ်ပေါ်လာစေပြီးတော့၊ အားနည်းချက်တွေကို မြင်တဲ့အခါမှာ စိတ်ပျက်အားလျော့ခြင်းဖြစ်လာစေတယ်။ တကယ်တော့ အထဲမှာရှိတဲ့ သခင်ယေရှုကိုပဲ​ကြည့်တတ်ဖို့လိုတယ်။ အထဲမှာရှိတဲ့ တန်ခိုးနဲ့ ကိန်းဝပ်တဲ့ သခင်ယေရှုကို မြင်တတ်မယ်ဆိုရင် စိတ်ပျက် အားလျော့ခြင်း ရှိလာမှာမဟုတ်သလို၊ ကိုယ် အရည်ချင်းကြောင့် မဟုတ်လို့ မာန်မာနကြီးစရာလဲ မလိုပါ။ အထဲမှာ ရှိတဲ့ သခင်ယေရှုရဲ့တန်ခိုးတော်ကြောင့် ဘယ်တော့မှ အားနည်းခြင်းထဲမှာ ကျဆုံးသွားမှာ မဟုတ်ပါဘူး။

မေလ ၁၁ ရက်နေ့

မတတ်နိုင်တာ ဘာများရှိအုံးမလဲ

“အို အ​ရှင်​ထာ​ဝ​ရ​ဘု​ရား၊ ကိုယ်​တော်​သည် မ​ဟာ​တန်​ခိုး​နှင့် လက်​ရုံး​တော်​ကို​ဆန့်၍၊ ကောင်း​ကင်​နှင့် မြေ​ကြီး​ကို ဖန်​ဆင်း​တော်​မူ​ပြီ။ ကိုယ်​တော် မ​တတ်​နိုင်​သော​အ​ရာ တစ်​စုံ​တစ်​ခု​မျှ မ​ရှိ​ပါ။” ယေရမိ ၃၂:၁၇

ဘုရားက အရာအားလုံးကို ဖန်ဆင်းတဲ့သူပါ။သူ့ရဲ့ ဖန်ဆင်းခြင်းနဲ့ လွတ်တဲ့အရာ တခုမှ မရှိဘူး။ ပြီးပြည့်စုံအောင် အရာခပ်သိမ်း ဖန်ဆင်းပြီးမှ လူကို ဖန်ဆင်းတယ် ။ သူဟာ အရာခပ်သိမ်းကို ပြည့်စုံအောင် ဖန်ဆင်းနိုင်တဲ့ တန်ခိုးရှင်ပါ။ ဘဝ မှာဘာပဲလိုလို စိတ် ပျက်နေမယ့်အစား ဖန်ဆင်းရှင် ကိုယ့်အနားမှာ ရှိ တာပဲ ဘာလို့ စိတ်ပျက် နေမှာလဲ။ သူ့ကို အားကိုးမယ် ယုံမယ်ဆိုရင် သင့်ဘဝရဲ့ လိုအပ်သမျှကို သူ ဖန်ဆင်းပေးမယ် လို့ ယုံစေခြင်တယ်။ အကန့်အသတ်မဲ့တန်ခိုးရှင်နဲ့ အသက်ရှင်မှ တော့ လိုအပ်တာ ဘာများ ရှိနေအုံးမလဲ ။

မေလ ၉ ရက်နေ့

သခင်လို့ ခေါ်ဖို့တောင်

ထို့အတူ သန့်ရှင်း​သော​ဝိညာဉ်​တော်​အားဖြင့်​မ​ဟုတ်​လျှင် မည်သူ​က​မျှ “ယေရှု​သည် သခင်​ဖြစ်​တော်မူ​၏”​ဟူ၍ မ​ပြောဆို​နိုင်​ပေ။” ၁ကော၁၂:၃

သခင်ယေရှုကို ကယ်တင်ရှင်အဖြစ် ယုံကြည်လက်ခံဖို့ လွယ်သလားလို့ မေးရင် မလွယ်ပါဘူး။ လူတချို့က သခင်ယေရှုလုပ်ဆောင်ပေးတဲ့အရာတွေကိုသိပေမဲ့ ယုံကြည်လက်ခံဖို့ မပြောနဲ့ နှုတ်ကနေတောင် ပြောထုတ်ဖို့ ခက်ခဲနေကြတဲ့သူတွေ အများကြီးရှိတယ်။ သခင်ယေရှုကယ်တင်ရှင်လို့ နှုတ်ကနေ ပြောထုတ်ဝန်ခံဖို့ဆိုတာတောင်မှ သန့်ရှင်းသောဝိညာဉ်တော်ရဲ့ လုပ်ဆောင်ပေးခြင်းကြောင့်ဖြစ်တယ်။ သန့်ရှင်းသောဝိညာဉ်တော်ဘဝမှာမပါရင် ဘာတစ်ခုမှ လုပ်နိုင်ဖို့ မပြောနဲ့ ပါးစပ်ကနေတောင် ပြောနိုင်ဖို့တောင် မလွယ်ဘူး။ နေ့စဉ် ပြောနေတဲ့ ယုံကြည်ခြင်း စကားတွေ၊ ပြောထုတ်ဝန်ခံချက်တွေအားလုံး ပြောထုတ်နိုင်တယ်ဆိုတာက သန့်ရှင်းသောဝိညာဉ်တော် မစခြင်းကြောင့်သာဖြစ်တယ်။ သန့်ရှင်းသောဝိညာဉ်တော်မပါပဲ ယုံကြည်သူတစ်ယောက် ရှင်သန်ဖို့ဆိုတာ ဘယ်လိုမှ မဖြစ်နိုင်ပါဘူး။

မေလ ၇ ရက်နေ့

အလိုတော်နှင့်ညီသောဆုတောင်း

“စိတ်​နှ​လုံး​ကို စစ်​တော်​မူ​သော​သူ​သည်​လည်း ဝိ​ညာဉ်​တော်၏ စိတ်​သ​ဘော​ကို သိ​တော်​မူ၏။ အ​ကြောင်း​မူ​ကား ဝိ​ညာဉ်​တော်​သည် သန့်​ရှင်း​သူ​တို့၏ ဆု​တောင်း​ခြင်း​အ​မှု​ကို ဘု​ရား​သ​ခင်၏​အ​လို​တော်​နှင့်​အ​ညီ စောင့်​မ​တော်​မူ၏။” ရောမ ၈:၂၇

သန့်ရှင်းသောဝိညာဉ်တော် ကိုသိချင်ရင် စိတ်နှလုံးကို စစ်ဆေးတတ်ဖို့လိုတယ်။ မှန်ကန်တဲ့ စိတ်သဘော နှင့် မှန်ကန်တဲ့ဆုတောင်းခြင်းကို သန့်ရှင်းသောဝိညာဉ်တော်က သင့်ရဲ့ဘဝမှာ ယူဆောင်လာ ပေးနိုင်တယ်။ လူတချို့က ဘုရားရဲ့အလိုတော်နှင့်အညီ အသက်ရှင်ချင်တယ်၊ ဆုတောင်းချင်ကြတယ်။ ပြဿနာကသန့်ရှင်းသောဝိညာဉ်တော်ရဲ့ဉီးဆောင်မှုနောက်လိုက်ဖို့ အားနည်းကြတယ်။ သန့်ရှင်းသောဝိညာဉ်တော်ဉီးဆောင်မှုနောက်ကို လိုက်တတ်ရင် သေချာတယ် ဘယ်တော့မှ ဘုရားအလိုတော်ထဲကနေ ဝေးသွားမှာမဟုတ်ဘူး။ နေ့စဉ် ဘုရားအလိုတော်ထဲမှာပဲ ကြီးထွားလိမ့်မယ်။

မေလ ၆ ရက်နေ့

ဘုရားရဲ့စိတ်တော်ကိုသိခွင့်

“အကြောင်းမူကား မည်သူ​သည် ထာဝရ​ဘုရား​၏​စိတ်​တော်​ကို​သိ​၍ သူ့​ကို​သွန်သင်​လိမ့်​မည်နည်း။ ငါ​တို့​၌​မူကား ခရစ်တော်​၏​စိတ်​ရှိ​၏။” ၁ကော၂:၁၆

သန့်ရှင်းသောဝိညာဉ်တော်ကိုအသက်တာမှာ လက်ခံရရှိခြင်းက တန်ဖိုးဖြတ်လို့မရတဲ့ ကြီးမားတဲ့ မင်္ဂလာပါ။ ဘုရားရဲ့ စိတ်သဘောကိုသိဖို့ ဘယ်သူကမှ သင်ပေးလို့မရနိုင်ဘူး။

ဘုရားရဲ့ အလိုတော်ကို သိစေနိုင်တဲ့ တစ်ခုတည်းသောအရာက သန့်ရှင်းသောဝိညာဉ်တော်၏သွန်သင်ပေးခြင်းအားဖြင့်သာရနိုင်တယ်။ လူတိုင်းက ဘုရားရဲ့နှလုံးသား၊ ဘုရားအလိုတော်ကို သိခွင့်ရခြင်ပေမယ့် သန့်ရှင်းသောဝိညာဉ်တော်ကိုတော့ အားမကိုးကြဘူး။ သန့်ရှင်းသောဝိဉာဉ်ကသာ တစ်ခုတည်းသော ဘုရားစိတ်တော်ကို သိတဲ့သူဖြစ်သလို၊ သိနိုင်ဖို့လဲ ကူညီပေးနိုင်သူဖြစ်တယ်။ ဘုရားရဲ့စိတ်သဘောကို သိစေရုံပဲ မဟုတ်ဘူး။ ခရစ်တော်ရဲ့ စိတ်နှလုံးအတိုင်း ရှိစေသူပါ။ သန့်ရှင်းသောဝိညာဉ်တော်ကိုရတာ ဘယ်လောက်များ အဖိုးထိုက်သလဲ။

မေလ ၅ ရက်နေ့

ဘုရားနှင့် ရင်းနှီးကျွမ်းဝင်မူရှိသော ဝိညာဉ်တော်

“ထိုသို့ သင်​တို့​သည် သား​သမီး​များ​ဖြစ်​ကြ​သောကြောင့် ဘုရားသခင်​သည် “အဗ္ဗ၊ အဖ”​ဟု ခေါ်​တတ်​သော မိမိ​သား​တော်​၏​ဝိညာဉ်​တော်​ကို ငါ​တို့​၏​စိတ်နှလုံး​ထဲသို့ စေလွှတ်​တော်မူ​၏။” ဂလာတိဩဝါဒစာ ၄:၆

လူတိုင်းကောင်းကင်ဖခင်နှင့်ရင်းနှီးမူရချင်ကြတယ်။ ဘုရားနဲ့ရင်းနှီးမှုက လူ့ရဲ့ကြိုးစားမှုနဲ့တည်ဆောက်လို့မရဘူးဆိုတာ လူအနည်းငယ်ကပဲ​သဘောပေါက်တယ်။ လူ့ရဲ့ကောင်းမှု၊ ကုသိုလ်နဲ့ အကျင့်က ဘုရားနဲ့ရင်းနှီးဖို့ မလုံလောက်ဘူး။ ဘုရားနဲ့သားအဖ လိုရင်းနှီးမှုရစေဖို့အတွက် ဘုရားက သူ့ရဲ့သန့်ရှင်းသောဝိညာဉ်တော်ကို သင့်အထဲမှာ ထည့်ပေးထားတာပါ။ ဒါကြောင့်သန့်ရှင်းသောဝိညာဉ်တော် ရဲ့ဉီးဆောင်မှုနဲ့အသက်ရှင်တဲ့သူအတွက် နေ့စဉ် ဘုရားနဲ့ရင်းနှီးဖို့ဆိုတာ မခက်တော့ဘူး။

မေလ ၄ ရက်နေ့

ဘယ်ဝိညာဉ်ရဲ့ ထိန်းချုပ်မူအောက်ရောက်နေသလဲ ?

“အကြောင်းမူကား ဘုရားသခင်​သည် ငါ​တို့​အား ကြောက်​တတ်​သော​ဝိညာဉ်​ကို ပေး​တော်မူ​သည်​မ​ဟုတ်​ဘဲ တန်ခိုး၊ ချစ်​ခြင်း​မေတ္တာ၊ မိမိ​ကိုယ်​ကို​ချုပ်တည်း​ခြင်း​တို့​နှင့်ဆိုင်သော​ဝိညာဉ်​ကို ပေး​တော်မူ​၏။” တိမောသေဩဝါဒစာဒုတိယစောင် ၁:၇

ဘုရားသားသမီးလို့ ကိုယ်ဟာကိုယ်ပြောတယ်၊ ဘုရားကိုယုံတယ်လို့ ဆိုပေမဲ့ ဘုရားဆီကမဟုတ်တဲ့ ဝိညာဉ်ရဲ့ထိန်းချုပ်မှုကို ခံနေရတဲ့သူတွေအများကြီးရှိတယ်။ ဘုရားထံက မဟုတ်တဲ့ ကြောက်ရွံ့ခြင်း ဝိညာဉ် အသက်တာကို ဉီးဆောင်နေတယ်ဆိုရင် မှန်ကန်တဲ့ဝိညာဉ်သဘော မဟုတ်သေးဘူး။ ဘုရားထံကလာတဲ့ သန့်ရှင်းသောဝိညာဉ်တော် သင့်ကိုဉီးဆောင်နေတယ်ဆိုရင် သေချာတယ် ကြောက်ရွံ့ခြင်းက သင့်ကိို ထိန်းချုပ်လို့ရမှာ မဟုတ်ဘူး။ ဘုရားရဲ့တန်ခိုး၊ ဘုရားရဲ့ မေတ္တာ နှင့် ကိုယ်ကိုကိုယ် ချုပ်တီးနိုင်ခြင်း အသက်တာမှာ နေရာယူ လာတယ်ဆိုတာက သန့်ရှင်းသောဝိညာဉ်တော်က အသက်တာကို နေရာယူလာလို့ဖြစ်တယ်။ သင့်ရဲ့ဘဝအသက် တာကို သန့်ရှင်းသောဝိညာဉ်တော် ဉီးဆောင်နေတာ သေချာပါစေ။

မေလ ၂ ရက်နေ့

ချီးမွမ်းခြင်းယဇ်

“ထို့ကြောင့် ငါ​တို့​သည် နာမ​တော်​ကို​ဝန်ခံ​သော​နှုတ်​၏​အသီးအပွင့်​တည်းဟူသော ချီးမွမ်း​ခြင်း​ယဇ်​ကို ကိုယ်တော်​အားဖြင့် ဘုရားသခင်​အား အစဉ်မပြတ်​ပူဇော်​ကြ​ကုန်စို့။”ဟေဗြဲဩဝါဒစာ ၁၃:၁၅

ဓမ္မဟောင်းကျမ်းမှာ ဘုရားကို ကိုးကွယ်ဖို့ သိုး၊နွားတွေနဲ့ယဇ်ပူဇော်ပြီး ဘုရားနှင့် မိတ်ဿဟာရ ဖွဲ့ရတယ်။ ယဇ်ပူဇော် ခြင်းက ဘုရားနှင့် ကြားမှာ ဆက်သွယ်ဖို့အတွက် နည်းလမ်းတစ်ခုဖြစ်ခဲ့တယ်။ သခင်ယေရှုကားတိုင်ပေါ်မှာ အသေခံပြီးကျေးဇူးတော်ကာလမှာ သိုး၊ နွားတွေနဲ့ ယဇ်ပူဇော်ခြင်းနှင့် ချဉ်းကပ်ဖို့ မလိုအပ်တော့ပေ။ ဘုရားထံကို ချဉ်းကပ်ဖို့ အတွက် နှုတ်ခမ်း၏ ချီးမွမ်းခြင်းအားဖြင့် ပူဇော်တဲ့ ယဇ်ကိုသာ ဘုရား ကတောင်းဆိုတယ်။ ဘုရားနှင့် နက်ရိူင်းစွာ တိုးဝင်ချဉ်းကပ်ဖို့ အတွက် နှုတ်ခမ်းအားဖြင့် ချီးမွမ်းခြင်းက အရေးကြီးဆုံးပါပဲ။

မေလ ၁ ရက်နေ့

အခြေအနေတွေကိုပြောင်းလဲစေတဲ့ချီးမွမ်းခြင်း

“သဖန်းပင် မ​ပွင့်​၊ စပျစ်ပင် မ​သီး​၊ သံလွင်ပင်​လည်း မ​ဖြစ်ထွန်း​၊ လယ်ယာ​သီးနှံ​လည်း မ​ထွက်​၊ သိုး​ခြံ​မှ သိုး​ပြတ်​၍ တင်းကုပ်​များ​၌ နွား​တစ်​ကောင်​မျှ​မ​ရှိ​သော်လည်း ငါ​သည် ထာဝရဘုရား​၌ ဝမ်းမြောက်​မည်​။ ငါ့​ကို​ကယ်တင်​တော်မူ​သော​ဘုရားသခင်​၌ ရွှင်လန်း​မည်​။” ဟာဗက္ကုတ်အနာဂတ္တိကျမ်း ၃:၁၇-၁၈

အခြေအနေတွေက သင့်ကို ပြောင်းလဲဖို့ခွင့်မပြုနဲ့။ သင်ကသာ အခြေအနေတွေကို ပြောင်းလဲစေပါ။ မကြိုက်တဲ့ အခြေအနေတွေကို ဘယ်လို ပြောင်းလဲစေမလဲ။ ဘုရားကို နှလုံးသားအကြွင်းမဲ့ ချီးမွမ်းခြင်းက သင့်ဘဝရဲ့ မကြုံချင်တဲ့ အခြေအနေတွေကို ပြောင်းလဲစေနိုင်တယ်။ ပရောဖက် ဟာဗက္ကုတ် ရင်ဆိုင်နေရတဲ့ လက်ရှိအခြေအနေတွေက စိတ်ပျက်စရာတွေဖြစ်ပေမဲ့ သူက ဘုရားထံမှာ အားယူပြီးတော့ ဝမ်းမြောက်စွာနဲ့ တုန့်ပြန်ခဲ့တယ်။ အခြေနေတွေက သူ့ကို ပြောင်းလဲဖို့ ခွင့်မပြုခဲ့ဘူး။ အခြေအနေတွေကိုပဲ ပြောင်းလဲပစ်ဖို့ ဘုရားထံမှာ အားယူခဲ့တယ်။ သင့်ဘဝရဲ့ မကြုံချင်တဲ့ အခြေအနေတွေကို ပြောင်းလဲပစ်ဖို့ သင့်မှာ တာဝန်ရှိတယ်။

ဧပြီလ ၃၀ ရက်နေ့

လွတ်မြောက်ခြင်းကို ယူဆောင်လာတဲ့ ချီးမွမ်းခြင်း

“သန်းခေါင်​အချိန်​ခန့်​တွင် ပေါလု​နှင့်​သိလ​တို့​သည် ဘုရားသခင်​ထံ​ဆုတောင်း​လျက် ချီးမွမ်း​သီချင်း​သီဆို​နေ​ကြ​၏။ အကျဉ်းသား​များ​သည်​လည်း သူ​တို့​ကို​နားထောင်​နေ​ကြ​၏။ ထိုအခါ ရုတ်တရက် ငလျင်​ပြင်းထန်​စွာ​လှုပ်​သဖြင့် ထောင်​၏​အုတ်မြစ်​သည် တုန်ခါ​၍ တံခါး​ရှိသမျှ​သည် ချက်ချင်း​ပွင့်​သွား​ကာ အကျဉ်းသား​အားလုံး​၏​သံကြိုး​များ​သည် ပြုတ်​သွား​လေ​၏။” တမန်တော်ဝတ္ထု ၁၆:၂၅-၂၆

အခြေအနေပေါ်မှာပဲ​ကြည့်ပြီး ချီးမွမ်းနေဆဲလား?

ခံစားချက် ကောင်းမှ ချီးမွမ်းမှာလား?

ချီးမွမ်းခြင်းဆိုတာ အခြေအနေနဲ့ မဆိုင်သလို၊ ခံစားချက်အပေါ်လဲ​မမူတည်ပါဘူး။

ပေါလုနဲ့ သိလရဲ့ ချီးမွမ်းခြင်းကိုကြည့်ရင် ဘုရားကို ချီးမွမ်းချင်စရာ တစ်ကွတ်မှမရှိပေမဲ့၊ ချီးမွမ်းခဲ့ကြတယ်။ ဒါကြောင့် ပြင်းထန်တဲ့ ရိုက်ခတ်မှုဟာ သူတို့ကိုချုပ်နှောင်ထားတဲ့ ထောင်အပေါ်မှာ ရိုက်ခတ်ခဲ့တယ်။ ဘယ်လောက်တောင် ပြင်းထန်သလဲ​ဆိုရင် ချီးမွမ်းတဲ့သူတို့ကိုပဲ​မဟုတ်ဘူး၊ နားထောင်နေတဲ့ ထောင်သားတွေအပေါ်မှာပါ လွတ်မြောက်ခြင်း သက်ရောက်လာတယ်။ အခိုင်အခံ့ဆုံး သံကြိုးတွေက အပ်ချည်ကြိုးလေးတွေလို ပြတ်ထွက် ကုန်တယ်။ ချီးမွမ်းခြင်းက တားဆီးပိတ်ဆို့ထားတဲ့ အချုပ်အနှောင်တွေအားလုံးကနေ လွတ်မြောက်စေတဲ့ လက်နက်။

ဧပြီလ ၂၉ ရက်နေ့

အရှိန် ပြင်းပြင်း ခရီးဆက်ချင်တယ်ဆိုရင်

“အရာရာ​၌ ကျေးဇူး​တော်​ချီးမွမ်း​ကြ​လော့​။ အကြောင်းမူကား သင်​တို့​သည် ထိုသို့​ပြု​ကြ​ရန် ခရစ်တော်​ယေရှု​၌ ဘုရားသခင်​အလို​ရှိ​တော်မူ​၏​။ ဝိညာဉ်​တော်​၏​အရှိန်​ကို မ​ငြိမ်း​စေ​ကြ​နှင့်။” သက်သာလောနိတ်ဩဝါဒစာပထမစောင် ၅:၁၈-၁၉

အရာရာ မြန်မြန်ဆန်ဆန် တိုးတက်နေတဲ့ ခေတ်ကြီးထဲမှာ ဝိညာဉ်ရေးရာမှာလဲ အရှိန်က ကြာလေပိုပြီး မြင့်လာဖို့ လိုတယ်။ အထူးသဖြင့် သန့်ရှင်းသောဝိညာဉ်တော်ရဲ့ အရှိန်ဖြစ်တယ်။ ဒီအရှိန်က မကျသွားဖို့ ဂရုမစိုက်မိရင် အရာရာမှာ နှေးကွေးသွားလိမ့်မယ်။ သန့်ရှင်းသောဝိညာဉ်တော်ရဲ့ အရှိန်ကို ငြိမ်းစေတဲ့အကြီးဆုံးအချက်က ဘာလဲ? တွေ့ကြုံသမျှမှာ ကျေးဇူးတော်မချီးမွမ်းပဲ အပြစ်တင်တတ်ခြင်းဖြစ်တယ်။ ဘုရားရဲ့အလိုတော်က အရာရာ တိုင်းမှာ ကျေးဇူးတော် ချီးမွမ်းခြင်းနဲ့ ဖြတ်သန်းဖို့ပါ။ အခြေအနေတိုင်း အကောင်းဆုံး မဖြစ်ရင်တောင် အကောင်းဆုံး ကျေးဇူးတော် ချီးမွမ်းခြင်းနဲ့ တုန့်ပြန်တတ်တဲ့သူက ဘယ်တော့မှ သန့်ရှင်းသောဝိညာဉ်တော်ရဲ့ အရှိန်ငြိမ်းသွားမှာမဟုတ် ဘူး။

ဧပြီလ ၂၈ ရက်နေ့

ယုဒအရင် ချီတက်ရမည်

“ထာဝရဘုရား​က “​ယုဒ​အမျိုး ချီတက်​ရ​မည်​။ ကြည့်ရှု​လော့​။ ဤ​ပြည်​ကို သူ​တို့​လက်​သို့ ငါ​အပ်​ပြီ​”​ဟု မိန့်​တော်မူ​၏​။” တရားသူကြီးမှတ်စာ ၁:၂

ယုဒဆိုတဲ့နာမည် အဓိပ္ပာယ်က ချီးမွမ်းခြင်းဖြစ်တယ်။ သူ့မိခင်က ခင်ပွန်းသည်ရဲ့ အချစ်ကို မရပေမဲ့ လူဆီကနေ မမျှော်လင့်တော့ပဲ အခြေနေတိုင်းမှာ ဘုရားကို ချီးမွမ်းဖို့ဆုံးဖြတ်ခဲ့တယ်။ ယုဒသည် ယာကုပ်ရဲ့ ၄ ယောက်မြောက်သားဖြစ်ပြီး နံပတ် ၄ ရဲ့အဓိပ္ပါယ်က ချိန်းချက်တဲ့အချိန်၊ တံခါးလို့ အဓိပ္ပာယ်ရတယ်။ ဘုရားကိုချီးမွမ်းခြင်း သင့်ဘဝရဲ့ အရေးကြီးတဲ့ ချိန်းချက်တဲ့အချိန် ဖြစ်စေပြီးတော့ ပွင့်ဖို့လိုအပ်တဲ့တံခါးတွေကို ပွင့်စေလိမ့်မယ်။ ဒါကြောင့် ဘုရားက ချီးမွမ်းခြင်းလို့အဓိပ္ပါယ်ရတဲ့ ယုဒကို ခါနာန်ပြည်ကိုသိမ်းဖို့သွားတဲ့အခါမှာ ရှေ့ဆုံးမှာ ချီတက်စေတယ်။

ဧပြီလ ၂၇ ရက်နေ့

ဘုရားရဲ့ လိပ်စာ

“သို့သော် ကိုယ်တော်​သည် သန့်ရှင်း​သော​အရှင်​ဖြစ်​တော်မူ​ပြီး အစ္စရေး​လူမျိုး​၏​ချီးမွမ်း​ခြင်း​၌ စိုးစံ​တော်မူ​၏​။” ဆာလံကျမ်း‬ ‭၂၂:၃

ကောင်းကင်ဘုံမှာ ဘုရားကိန်းဝပ်တာ လူတိုင်းသိပြီးသားပါ။ ဒါပေမဲ့ မြေကြီးပေါ်မှာ ဘယ်နေရာမှာ ဘုရားနေရာယူပြီး စိုးစံသလဲ? ဘုရားက အဆောက်အအုံကောင်းတဲ့နေရာမှာ သူနေရာယူ စိုးစံဖို့ထက် နှလုံးသားနဲ့ သူ့ကို ချီးမွမ်းတဲ့အရပ်မှာ ကိန်းဝပ်ချင်တဲ့သူပါ။ ချီးမွမ်းခြင်းက ဘုရားနေရာယူ စိုးစံလာဖို့အတွက် အကောင်းဆုံး နေရာပေးခြင်းဖြစ်တယ်။ ကျန်တဲ့အရာတွေ ဘာတွေပဲရှိရှိ နှလုံးသားနဲ့ ချီးမွမ်းခြင်း မရှိတဲ့အရပ်မှာ ဘုရား ဘယ်တော့မှ နေရာယူ စိုးစံလာမှာမဟုတ်ဘူး။ ချီမွမ်းခြင်းအားဖြင့် ဘုရားကိန်းဝပ်တဲ့ပလ္လင်ပြင်ဆင်ပေးတဲ့ သူတွေ ဖြစ်ပါ။

ဧပြီလ ၂၅ ရက်နေ့

ဘာကြောင့် မကျော်လွန်နိုင်သေးတာလဲ?

“သို့​သော်​လည်း ဆု​တောင်း​ခြင်း၊ အ​စာ​ရှောင်​ခြင်း​မှ​တစ်​ပါး အ​ဘယ်​သို့​သော​အား​ဖြင့်၊ ထို​အ​မျိုး​သည် မ​ထွက်​တတ်​ဟု မိန့်​တော်​မူ၏။” ရှင်မဿဲ‬ ‭၁၇:၂၁

ကိုယ့်ဘဝရဲ့ လမ်းခရီးအတွက် နတ်ဆိုးက နှောင့်ယှက်တယ်လို့ ခံစားနေရသလား? ပန်းတိုင်ရောက်ဖို့ ကန့်သတ်ခြင်း ခံထားရပြီး ဘယ်လိုမှ မောင်းထုတ်ဖယ်ရှား မရဘူးဖြစ်နေတယ်ဆိုရင် သခင်ယေရှုက အဖြေပေးထားတယ်။ အချို့သော နတ်ဆိုးတွေက အမိန့်ပေးရုံနဲ့ အသာတကြည်ထွက်ခွါမသွားတာဟာ မောင်းထုတ်တဲ့သူ ကိုယ်တိုင် ဘုရားနဲ့ ရင်းနှီးကျွမ်းဝင်ခြင်း အားနည်းနေသေးလို့ပါ။ အားကြီးတဲ့ နတ်ဆိုးတွေနဲ့ရင်ဆိုင်တဲ့အခါမှာ အားကြီးတဲ့ ဆက်ကပ်ခြင်း အထူးလိုအပ်တယ်။ ပုံမှန် အသက်တာနဲ့တော့ အားကြီးတဲ့ အဆီးတားတွေကို ဖယ်ရှားနိုင်မှာ မဟုတ်ဘူး။ ပုံမှန် ဆက်ကပ်တဲ့သူဖြစ်မှပဲ ဘယ်လောက်ကြီးတဲ့အဆီးအတားကိုမဆို ဖယ်ရှားနိုင်လိမ့်မယ်။

ဧပြီလ ၂၄ ရက်နေ့

လွတ်မြောက် ပြီးတဲ့ သက်သေ

“ကိုယ်​တော်​သည် အ​ခွင့်​မ​ပေး။ သင်​သည် ကိုယ်​အိမ်​သို့​သွား​လော့။ ထာ​ဝ​ရ​ဘု​ရား​သည် သ​နား​ခြင်း​စိတ်​တော်​နှင့် သင်၌ အ​ဘယ်​မျှ​လောက် ကျေး​ဇူး​ပြု​တော်​မူ​သည်​ကို သင်၏​အ​ဆွေ​အ​မျိုး​တို့​အား ပြန်​ကြား​လော့​ဟု မိန့်​တော်​မူ​လျှင်၊-” ရှင်မာကု ၅:၁၉

နတ်ဆိုးလက်က လွတ်ပြီးတဲ့သူကို သခင်ယေရှုက ပြောခိုင်းတဲ့အရာ တစ်ခုရှိတယ်။ အနာရောဂါငြိမ်းတာတောင် သခင်ယေရှုက ဘယ်သူ့ကိုမှ မပြောခိုင်းဘူး။ နတ်ဆိုးလက်က လွတ်ပြီးတဲ့အခါမှာတော့ ဘုရားက ဘယ်လောက် တောင် ကျေးဇူးပြုသလဲဆိုတာကို လူတိုင်းကို ပြောခိုင်းတယ်။ လူတစ်ယောက် နတ်ဆိုးလက်က လွတ်မြောက်တဲ့သူ တစ်ယောက် ပြောရမယ့် စကားက ခံစားချက်တွေ၊ မကျေနပ်ချက်တွေ အကြောင်းမဟုတ်ဘူး။ လူတွေရဲ့ မကောင်းကြောင်းတွေ၊ ခံစားချက်တွေကို ပြောနေသရွေ့သေချာတယ်။ လွတ်မြောက်ခြင်းတကယ်မရသေးဘူး။ လွတ်မြောက်တဲ့သူထံမှာပြောစရာ ဘုရားဘယ်လောက် ကျေးဇူးပြုသလဲဆိုတာပဲရှိတယ်။

ဧပြီလ ၂၃ ရက်နေ့

သင်ပေးလို့ မတတ်နိုင်တဲ့သူ

“ခြေ​ချင်း၊ သံ​ကြိုး​နှင့် အ​ဖန်​များ​စွာ ချည်​စမ်း​သော်​လည်း၊ သံ​ကြိုး​ကို​ဆွဲ​ဖြတ်၍ ခြေ​ချင်း​ကို ဖြဲ​တတ်၏။ သူ့​ကို​ယဉ်​စေ​ခြင်း​ငှာ အ​ဘယ်​သူ​မျှ မ​တတ်​နိုင်။-”ရှင်မာကု ၅:၄

ဘုရားက လူကိုဖန်ဆင်းကတည်း သင်ကြားတတ်မြောက်နိုင်တဲ့ အစွမ်းကို အထဲမှာ ထည့်ပေးပြီးသားပါ။ ဒါဆိုရင် ဘာလို့များ သင်ပေးလို့မတတ်နိုင်ရသလဲ​လို့ သင်မေးကောင်းမေးမယ်။ လေဂေါင်နတ်ဆိုးနဲ့ပတ်သက်ပြီး မှတ်ချက် ရေးထားတဲ့အရာကို ကြည့်တဲ့အခါမှာ ထူခြားတဲ့အချက်က သူ့ကို ဘယ်သူကမှ သင်ပေးလို့မရဘူးဆိုတဲ့အချက်ပါတယ်။ လူ့တွေနဲ့ အတူတူ နေထိုင်ဖို့အတွက် သင်ကြားပေးသမျှကို လက်မခံနိုင်ခြင်းက နတ်ဆိုးဆွဲတဲ့ လက္ခဏာတွေထဲက တစ်ခုဖြစ်တယ်။ သန့်ရှင်းသောဝိညာဉ်တော်ရှိတဲ့သူက သင်ကြားပေးတာကို တတ်မြောက်နိုင်ရုံမကဘူး မသင်ရတဲ့အရာတွေပါ တတ်မြောက်နိုင်ပေမဲ့ နတ်ဆိုးရှိတဲ့သူကတော့ ဘယ်လိုမှ သင်ပေးလို့မရဘူး။

ဧပြီလ ၂၂ ရက်နေ့

ဘုရားသခင်ကို အမှီပြု ပြီး

“အ​မြင့်​ဆုံး​သော ဘု​ရား​သ​ခင်၏ သား​တော်​ယေ​ရှု၊ ကိုယ်​တော်​သည် အ​ကျွန်ုပ်​နှင့်​အ​ဘယ်​သို့ ဆိုင်​သ​နည်း။ အ​ကျွန်ုပ်​ကို ညှဉ်း​ဆဲ​တော်​မ​မူ​မည်​အ​ကြောင်း ဘု​ရား​သ​ခင်​ကို အ​မှီ​ပြု၍ အ​ကျွန်ုပ် တောင်း​ပန်​ပါ​သည်​ဟု ကြီး​သော​အ​သံ​နှင့် အော်​ဟစ်၍ လျှောက်​လေ၏။-” ရှင်မာကု ၅:၇

နတ်ဆိုးစွဲတဲ့ လေဂေါင်နှင့် သခင်ယေရှုတွေ့တဲ့အခါမှာ နတ်ဆိုးက ဘုရားသားမှန်းသိတယ်။ သူ့ကို မညှင်းဆဲဖို့ တောင်းပန်တယ်။ ဒီလိုတောင်းပန်တာတောင်မှ ဘုရားနာမကို ကိုင်ဆွဲပြီးတော့ တောင်းပန်တာ။ သူက အချိန်ကာလကိုလဲ​သိတယ်။ ဒီကာလက သူညှင်းဆဲခံရဖို့ အချိန်မဟုတ်သေးဘူးဆိုတာ ကောင်းကောင်းသိတယ်။ ဘုရားနာမကို ကိုင်ဆွဲပြီး တောင်းပန်တဲ့အခါမှာ သူတောင်းဆိုတဲ့အတိုင်း အခြားအရပ်ကို မနှင်ပဲ သူတောင်းဆိုတဲ့ ဝက်ထဲကို ဝင်ဖို့ ခွင့်ပြုပေးတယ်။ ဘုရားကို ပုန်ကန်ပြီး အမြဲတမ်း ရန်လုပ်တဲ့ နတ်ဆိုးတောင်မှ ဘုရားနာမကို အသုံးပြုပြီးတော့ ညှင်းဆဲခြင်းကနေ လွတ်မြောက်ပြီး၊ သူတောင်းဆိုတဲ့ အရာကိုရတယ်ဆိုရင် ဘုရားသားသမီးတွေအနေနဲ့ ဘုရားနာမကို အမှီပြုပြီး ဆင်းရဲခြင်းကနေ လွတ်တဲ့ဘဝကို၊ လိုချင်တဲ့ အရာတွေကို ပိုင်ဆိုင်ရတဲ့ဘဝကို မရစရာ ဘာများရှိအုံးမလဲ?

ဧပြီလ ၂၁ ရက်နေ့

အထဲမှာ ဘယ်သူရှိသလဲ? (၂)

“ထို့နောက် ကိုယ်တော်​သည် ပင်လယ်​တစ်ဖက်ကမ်း​ရှိ ဂါဒရ​နယ်သား​တို့​၏​အရပ်​ဒေသ​သို့ ရောက်​တော်မူ​လျှင် နတ်ဆိုး​ပူး​သူ​နှစ်​ဦး​သည် သင်္ချိုင်း​မှ​ထွက်လာ​၍ ကိုယ်တော်​ကို​ဆီးကြို​ကြ​၏။ သူ​တို့​သည် အလွန်​ကြမ်းတမ်း​သည်​ဖြစ်၍ ထို​လမ်း​ကို မည်သူမျှ ဖြတ်​၍​မ​သွား​နိုင်​ကြ​ချေ။”ရှင်မဿဲခရစ်ဝင် ၈:၂၈

ဝိညာဉ်ဆိုးရဲ့ထိန်းချုပ်ခြင်းခံရတဲ့သူက အခြားသူတွေသွားတဲ့လမ်းကို ပိတ်ဆို့လေ့ရှိတယ်။ လမ်းဖေါက်ထားတဲ့ရည်ရွယ်ချက်က သွားလာဖို့ဖြစ်ပေမဲ့ နတ်ဆိုးစွဲတဲ့သူက ကိုယ်တိုင်လဲ ဒီလမ်းကို မသုံးသလို အခြားသူတွေ သွားလာဖို့လဲ အခွင့်မပေးဘူး။ ဘုရားသားသခင်ယေရှုကျတော့ ကိုယ်တိုင်လဲ​လမ်းဖြစ်သလို၊ ပိတ်နေတဲ့လမ်း တွေကိုလဲ ဖွင့်ပေးတဲ့သူဖြစ်တယ်။ သခင်ယေရှုက လေဂေါင်နတ်ဆိုးကို မောင်းထုတ်လိုကတာဟာ ဘယ်သူမှ သုံးလို့မရတဲ့ လမ်းကို ဖွင့်ပေးလိုက်ခြင်းပါ။ နတ်ဆိုး ရှိတဲ့သူက အခြားသူတွေရဲ့ လမ်းကိုပိတ်ပြီး သခင်ယေရှုရှိတဲ့သူကတော့ ပိတ်နေတဲ့လမ်းတွေကို ဖွင့်ပေးနိုင်တဲ့သူဖြစ်တယ်။

ဧပြီလ ၂၀ ရက်နေ့

အထဲမှာ ဘယ်သူရှိသလဲ?

“ခြေ​ချင်း၊ သံ​ကြိုး​နှင့် အ​ဖန်​များ​စွာ ချည်​စမ်း​သော်​လည်း၊ သံ​ကြိုး​ကို​ဆွဲ​ဖြတ်၍ ခြေ​ချင်း​ကို ဖြဲ​တတ်၏။ သူ့​ကို​ယဉ်​စေ​ခြင်း​ငှာ အ​ဘယ်​သူ​မျှ မ​တတ်​နိုင်။-” ရှင်မာကု ၅:၄

ဂါဒရအရပ်က နတ်ဆိုးစွဲတဲ့သူ အကြောင်းကို ကြည့်တဲ့အခါမှာ သူဟာ ကြမ်းတမ်းစွာနဲ့ ပြုမူတတ်သူတစ်ယောက် ဖြစ်ပြီးတော့ ဘယ်တော့မှ ဘယ်လိုမှ သင်ပေးလို့ မရဘူးဆိုတာ တွေ့ရတယ်။ အထဲမှာ နတ်ဆိုးရှိတဲ့အခါမှာ ကောင်းတဲ့အရာတွေ၊ တိုးတက်ဖို့ အကြောင်းတွေကို သင်ကြားပေးဖို့ မဖြစ်နိုင်ခဲ့ဘူး။ ကိုယ်တိုင်ကိုရော အခြားသူကိုပါ ဒုက္ခပေးတတ်တယ်။ သန့်ရှင်းသောဝိညာဉ်တော်အထဲမှာ ရှိတဲ့အခါမှာ သူဟာ သမ္မာတရားကို အကြွင်းမဲ့သွန်သင်ပေးတဲ့သူဖြစ်ပြီးတော့ တိုးတက်အောင် သင်ကြားခြင်းခံယူတဲ့သူဖြစ်လာစေတယ်။ တချို့က ကောင်းတာ သင်ပေးလို့မရဘူး။ အရင်အတိုင်းပဲ​အရင်လိုပဲ အသက်ရှင်နေထိုင်ဖို့ ရွေးချယ်ကြတယ်။ သန့်ရှင်းသောဝိညာဉ်တော် ရှိတဲ့သူကတော့ အဲ့လိုမဟုတ်ဘူး အမြဲတမ်း တိုးတက်ဖို့သင်ကြားခံယူနေတဲ့သူဖြစ်လာတယ်။

ဧပြီလ ၁၈ ရက်နေ့

တည်ဆောက်ဖို့အတွက်

“ညီ​အစ်​ကို​တို့၊ အ​ဘယ်​သို့​နည်း။ သင်​တို့ စည်း​ဝေး​ကြ​သော​အ​ခါ၊ ဆာ​လံ​သီ​ချင်း​ကို ရ​သော​သူ၊ ဆုံး​မ​ဩ​ဝါ​ဒ စ​ကား​ကို ရ​သော​သူ၊ အ​ခြား​သော ဘာ​သာ​စ​ကား​ကို ရ​သော​သူ၊ ဗျာ​ဒိတ်​တော်​ကို ရ​သော​သူ၊ အ​နက်​ဖော်​ပြ​ရာ​ကို ရ​သော​သူ၊ အ​သီး​အ​သီး​ရှိ​ကြ​သည်​ဖြစ်၍၊ ခပ်​သိမ်း​သော​အ​မှု​တို့​ကို တည်​ဆောက်​ခြင်း​အ​လို​ငှာ စီ​ရင်​ကြ​လော့။-” ၁ ကောရိန္သု ၁၄:၂၆

ရထားတဲ့ဆုကျေးဇူးလဲ မတူသလို၊ လုပ်ဆောင်နိုင်တာလဲ မတူဘူး။ ဘာပဲလုပ်လုပ်၊ ဘာပဲရရ၊ လုပ်သမျှဟာ တည်ဆောက်ဖို့ပဲ ဆိုတာ မမေ့နဲ့။ ဆာလံသီချင်းတွေ အသင်းတော်မှာ အသုံးပြုတဲ့အခါမှာ ရည်ရွယ်ချက်က တည်ဆောက်ဖို့အတွက်ပဲ။ ဒါကြောင့် ကိုယ် သီဆိုချီးမွမ်းနေတဲ့အရာတွေ၊ လုပ်ဆောင်နေတာတွေက တည်ဆောက်ခြင်း ကို ဖြစ်စေသလား ? ပြိုပျက်ခြင်း ဘက်ကို သွားသလား ? ဒါကို ကြည့်ပြီးတော့ ပဲ​ဆုံးဖြတ်တယ်။ တည်ဆောက်ခြင်းကို မဖြစ်စေတဲ့ အရာတွေကို နေရာမပေးမိဖို့လိုတယ်။ တည်ဆောက်ခြင်းကို ဖြစ်စေရင်တော့ ဘုရားက မတားပါဘူး။ ချီးမွမ်းခြင်း ကိုးကွယ်ခြင်း ဟောပြောခြင်းနှင့် လုပ်ဆောင်အားလုံးက တည်ဆောက်ဖို့အတွက်ပဲ ဘုရားက သုံးစေချင်တာပါ။

ဧပြီလ ၁၇ ရက်နေ့

ဆာလံသီချင်းကိုဆိုပါ

“သင်​တို့​တွင် ဆင်း​ရဲ​ခံ​ရ​သော​သူ​ရှိ​လျှင် ဆု​တောင်း​စေ။ ရွှင်​လန်း​သော​သူ​ရှိ​လျှင် ဆာ​လံ​သီ​ချင်း​ကို​ဆို​စေ။-” ရှင်ယာကုပ် ၅:၁၃

ဆာလံ သီချင်းက ဝမ်းမြောက်ရာကာလအတွက်ဖြစ်တယ်။ လူတိုင်းမဆိုနိုင်ဘူး။ ဆိုဖို့ ခက်ခဲတဲ့ကာလတွေ အများကြီးရှိနိုင်တယ်။ လူတိုင်းလဲဆိုဖို့ စိတ်ဝင်စားမှာ မဟုတ်ဘူး။ ဆာလံသီချင်းဟာ ဆင်းရဲခံရတဲ့သူတချို့နှင့် ဆင်းရဲသားစိတ်ဓါတ်ရှိတဲ့သူ တချို့ကတော့ လက်ခံပြီးဆိုနိုင်ဖို့ ခက်လိမ့်မယ်။ တချို့ဆာလံ သီချင်းတွေက ဝိညာဉ်တိုက်ပွဲ သီချင်းဖြစ်သလို၊ တချို့ ဆာလံသီချင်းတွေက အနာဂတ်မှာ ဖြစ်လာမယ့်အရာတွေကို ပရောဖက်ပြုခြင်းဖြစ်တယ်။ တချို့ဆာလံသီချင်းတွေက လက်ခံဖို့တောင် ခက်ခဲနိုင်တယ်။ ဘယ်လိုပဲဖြစ်ဖြစ် ဆာလံသီချင်းက ဝမ်းမြောက်ခြင်းကို တကယ်သဘောပေါက်တဲ့ သူတွေပဲ သီဆိုနိုင်တယ်။

ဧပြီလ ၁၆ ရက်နေ့

နှုတ်ကပတ်တော် အသက်တာထဲမှာ ကြွယ်ဝစွာ နေရာယူဖို့အတွက်

“ခရစ်တော်​၏​နှုတ်ကပတ်​တရား​ကို သင်​တို့​၌ ကြွယ်ဝ​စွာ​တည်​စေ​၍ အချင်းချင်း​တို့​ကို အမျိုးမျိုး​သော​ဉာဏ်ပညာ​ဖြင့်​သွန်သင်​လျက် သတိပေး​ဆုံးမ​ကာ ကျေးဇူး​တော်​ချီးမွမ်း​ခြင်း​နှင့်တကွ ဆာလံ​သီချင်း​များ၊ ဓမ္မ​သီချင်း​များ​နှင့် ဝိညာဉ်ရေး​ဆိုင်ရာ​သီချင်း​များ​ကို သင်​တို့​၏​စိတ်နှလုံး​နှင့်တကွ ဘုရားသခင်​ထံ သီဆို​ကြ​လော့။” ကောလောသဲဩဝါဒစာ ၃:၁၆

တမန်တော်ကြီးရှင်ပေါလုက ဝိညာဉ်တော်နှင့်ပြည့်ဝဖို့ သီချင်း အမျိုးမျိုး သီဆို ချီးမွမ်းဖို့ ပြောသလိုပဲ၊ နှုတ်ကပတ်တော် အသက်တာမှာ ကြွယ်ဝစွာနေရာယူဖို့အတွက်လဲ ချီးမွမ်းခြင်းက အရေးကြီးတယ်ဆိုတာကို သွန်သင်ပေးတယ်။ ချီးမွမ်းတဲ့သီချင်း သီဆိုချီးမွမ်းခြင်းက အသက်တာကို နှုတ်ကပတ်တော်နှင့်ဖြည့်နေတယ်ဆိုတာသိစေချင်တယ်။ ဒါကြောင့် နှုတ်ကပတ်တော်ထဲက ကတိတော်တွေ၊ ပရောဖက်ပြုချက်တွေထဲကနေ သီချင်းပြုလုပ်ပြီးသီဆိုခြင်းဟာ အသက်တာကိုနှုတ်ကပတ်တော်နှင့်ဖြည့်ဆည်းနေခြင်းဆိုတာသိဖို့လိုတယ်။ နှုတ်ကပတ် တော်ကို အခြေမခံတဲ့ သီချင်းတွေကတော့ သတိထားရမယ်။ နှုတ်ကပတ်တော်နှင့် ကြွယ်ဝဖို့အတွက် ဘုရားစကားတွေကို သီချင်းပြုလုပ်ပြီးတော့ စိတ်နှလုံးနှင့် ချီမွမ်းတတ်ဖို့ အရေးကြီးတယ်။ ဒီမှာ တမန်တော်ကြီးသီဆိုခိုင်းတဲ့ သီချင်း (၃) မျိုးရှိတယ်။ ဆာလံသီချင်း၊ ဓမ္မသီချင်းများနှင့် ဝိညာဉ်ရေးရာဆိုင်ရာ သီချင်းများဖြစ်တယ်။ ဒီသုံးမျိုး လုံး ဘုရားရှေ့မှာချီးမွမ်းပါ။

ဧပြီလ ၁၅ ရက်နေ့

ကောင်းကင် နိုင်ငံရဲ့ ချီးမွမ်းခြင်း

“ထို​သူ​တို့​သည် ဘု​ရား​သ​ခင်၏ ကျွန်​မော​ရှေ၏ သီ​ချင်း​နှင့် သိုး​သ​ငယ်၏​သီ​ချင်း​ကို သီ၍၊ အ​န​န္တ​တန်​ခိုး​နှင့် ပြည့်​စုံ​တော်​မူ​သော ထာ​ဝ​ရ​အ​ရှင်​ဘု​ရား​သ​ခင်၊ ကိုယ်​တော်၏ အ​ပြု​အ​မူ​တို့​သည် ကောင်း​မြတ်၍ အံ့​ဩ​ဖွယ်​ဖြစ်​ကြ​ပါ၏။ လူ​မျိုး​တို့၏​ဘု​ရင်၊ ကိုယ်​တော်၏ အ​ကျင့်​ဓ​လေ့​တို့​သည် ဖြောင့်​မတ်​ဟုတ်​မှန်​ကြ​ပါ၏။-” ဗျာဒိတ် ၂၅:၃

မြေကြီးပေါ်မှာပဲချီးမွမ်းကိုးကွယ်ကြတာမဟုတ်ပါဘူး။ တစ်နေ့ ကောင်းကင်မှာလဲ အားလုံး ဘုရားရဲ့ရှေ့မှာ ချီးမွမ်း ကိုးကွယ်ကြရမှာပါ။ ဒါဆိုရင် ကောင်းကင်နိုင်ငံရဲ့ ချီးမွမ်းခြင်း သီချင်းတွေက ဘာတွေများလဲ? ဆိုတဲ့သီချင်းတွေထဲမှာ မောရှေ၏သီချင်းနဲ့ သိုးသူငယ်ရဲ့သီချင်းဆိုတာတွေ့ရတယ်။ မော​ရှေရဲ့သီချင်းနဲ့ပတ်သက်ပြီးတော့ ဖေါ်ပြထားတဲ့ အဓိကအရာတွေကတော့ ထွက်မြောက်ရာ ၁၅ ပယ်လယ်နီဖြတ်သန်းပြီးတော့ အောင်ပွဲခံပြီးသီဆိုတဲ့သီချင်း၊ တရားဟောရာ ၃၂မှာ သူမသေခင် ဣသရေလလူမျိုးတွေကို အနာဂတ်ဟောပြောခြင်းနဲ့ဆိုင်တဲ့ သီချင်းနှင့် ဆာလံ ၉၀ မှာ ဆုတောင်းလျှက်သီဆိုသောသီချင်းတွေကို တွေ့ရတယ်။ ဒီသီချင်းတွေကို ကောင်းကင်မှာ တောင် ပြန်သီဆိုအုံးမယ်ဆိုတော့ အံ့ဩစရာတော့ ကောင်းတယ်။ သန့်ရှင်း၊ သန့်ရှင်း၊ သန့်ရှင်းနဲ့ ဟာလေလုယဆိုပြီး ဘုရားဘုန်းတော်ကိုပဲ ဖွဲ့နွဲ့တဲ့သီချင်းတွေပဲဆိုမှာ မဟုတ်ဘူး။ မြေကြီးပေါ်မှာအောင်ပွဲခံတဲ့သီချင်း၊ ဝိညာဉ်တိုက်ပွဲသီချင်းတွေကိုလဲ​သီဆိုကြအုံးမယ်။

ဧပြီလ ၁၄ ရက်နေ့

ဝိညာဉ်တော်နှင့်ပြည့်ဝစေရန် (၂)

“လွန်​ကျူး​စေ​တတ်​သော စ​ပျစ်​ရည်​နှင့် ယစ်​မူး​ခြင်း​ကို​ရှောင်၍ ဝိ​ညာဉ်​တော်​နှင့် ပြည့်​စုံ​လျက်​ရှိ​ကြ​လော့။- ဆာ​လံ​သီ​ချင်း​မှ​စ​သော ဓ​မ္မ​သီ​ချင်း အ​မျိုး​မျိုး​တို့​ကို အ​ချင်း​ချင်း ပြော​ဆို​ဖတ်​ရွတ်၍၊ နူး​ညွတ်​သော စိတ်​နှ​လုံး​နှင့် သ​ခင်​ဘု​ရား​ရှေ့​တော်၌ ကျူး​ဧ၍​သီ​ချင်း ဆို​ကြ​လော့။-” ဧဖက် ၅:၁၈-၁၉

သန့်ရှင်းသောဝိညာဉ်တော်နှင့်ပြည့်ဝစေရန် သီဆိုချီးမွမ်းရတဲ့ သီချင်းတွေမှာ ဆာလံသီချင်းနှင့် ဓမ္မသီချင်း အမျိုးမျိုးဆိုတာကို တမန်တော်ကြီးရှင်ပေါလုက ရေးသားတယ်။ ဓမ္မသီချင်းတောင်မှ တစ်မျိုးထဲ မဟုတ်ဘူး။ အမျိုးမျိုးရှိတယ်။ တစ်မျိုးထဲ ဆိုပါလို့ အကြံမပေးဘူး။ ကိုယ်နှစ်သက်ရာ ကိုယ်စိတ်ဝိညာဉ်နဲ့ ထိတွေ့တဲ့ သီချင်းဆိုနိုင်တယ်။ တစ်ယောက်နဲ့တစ်ယောက်၊ အသင်းတော်တစ်ခုနဲ့ တစ်ခုအကြိုက်ချင်းတော့တူမှာမဟုတ်သလို ဖွင့်ပြခြင်းလဲ တူမှာ မဟုတ်ဘူး။ ဘယ်သီချင်းဆိုတာမှ မှန်ပြီးတော့ ဘယ်သီချင်းဆိုတာက မှားနေတယ်ဆိုတာ မရှိပါဘူး။ အရေးကြီးဆုံးကတော့ နူးညွတ်တဲ့စိတ်နှလုံးဖြစ်ပြီးတော့ ဘုရားရှေ့မှာ သီဆိုချီးမွမ်းခြင်း ဖြစ်ဖို့ပဲလိုတယ်။ ဆာလံသီချင်းတွေကို လေ့လာတဲ့အခါမှာလဲ ဘာတွေတွေ့ရသလဲဆိုရင် ဘုရားရဲ့ကြီးမြတ်ခြင်း၊ သန့်ရှင်းခြင်းတွေကို ရေးဖွဲ့ထား တာတွေ့ရသလို၊ ရန်သူတွေကို တိုက်ခိုက်တဲ့သီချင်းတွေ၊ ဘုရားပေးတဲ့ ကောင်းကြီးတွေကို ရေတွက်တဲ့သီချင်းတွေနဲ့ ဘုရားလုပ်ပေးခဲ့တဲ့ အောင်မြင်ခြင်းတွေကို ဝန်ခံကြွေးကြော်တဲ့ သီချင်းတွေလဲ ပါဝင်နေတယ်။ တချို့စာသားတွေဆိုရင် သီချင်းထဲမှာ မပါသင့်တဲ့အရာတွေလို့ ထင်စရာရှိတဲ့ အရာတွေတောင်ပါတယ်။ ရန်သူတွေကို ဘယ်လို ဖြစ်ပါစေဆိုတဲ့ အကျိန်တိုက်ထားသလို စာသားတွေလဲပါဝင်တယ်။ လူ့အနေနဲ့ ပြောရင် ဒါတွေကို သီဆိုပြီးတော့ ဝိညာဉ်တော် နှင့်ပြည့်ဝနိုင်ဖို့ဆိုတာ ဖြစ်နိုင်ပါ့မလား? ဘုရားရဲ့ ပညာတော်ကို လူ့ဉာဏ်နှင့် မမှီနိုင် ဘူးဆိုတာ သိထားဖို့ပါပဲ။

ဧပြီလ ၁၃ ရက်နေ့

ဝိညာဉ်တော်နှင့်ပြည့်ဝစေရန်

“လွန်​ကျူး​စေ​တတ်​သော စ​ပျစ်​ရည်​နှင့် ယစ်​မူး​ခြင်း​ကို​ရှောင်၍ ဝိ​ညာဉ်​တော်​နှင့် ပြည့်​စုံ​လျက်​ရှိ​ကြ​လော့။- ဆာ​လံ​သီ​ချင်း​မှ​စ​သော ဓ​မ္မ​သီ​ချင်း အ​မျိုး​မျိုး​တို့​ကို အ​ချင်း​ချင်း ပြော​ဆို​ဖတ်​ရွတ်၍၊ နူး​ညွတ်​သော စိတ်​နှ​လုံး​နှင့် သ​ခင်​ဘု​ရား​ရှေ့​တော်၌ ကျူး​ဧ၍​သီ​ချင်း ဆို​ကြ​လော့။-” ဧဖက် ၅:၁၈-၁၉

တမန်တော်ကြီးရှင်ပေါလုက လောကကြီးမှာ အချိန်ကိုတန်ဖိုးရှိစွာ ဘယ်လိုအသုံးပြုရမလဲ ဆိုတာကို သင်ပေးတယ်။ အချိန်က တန်ဖိုးရှိတယ်ဆိုတာ လူတိုင်းသိတယ်။ ရှိတဲ့အချိန်လေးမှာ အသက်တာကိုယ် သန့်ရှင်းသောဝိညာဉ်တော်နှင့် ဖြည့်ဆည်းတတ်တဲ့သူက ကိုယ့်အချိန်ကို အကောင်းဆုံး အသုံးပြုတဲ့သူဖြစ်သလို ကိုယ့်ဘဝကိုလဲ တန်ဖိုး မြင့်တက်လာအောင် လုပ်ဆောင်နေတဲ့သူလဲ ဖြစ်တယ်။ ဝိညာဉ်တော်နှင့်ပြည့်လာတဲ့အခါမှာ ဆုကျေးဇူး အမျိုးမျိုး၊ ဝိညာဉ်အသီးအမျိုးမျိုးဖြင့် အသက်တာက လှပတင့်တယ်လာပြီးတော့ တန်ဖိုးပိုရှိလာတယ်။ ဘဝကို သန့်ရှင်းသောဝိညာဉ်တော်နှင့် အချိန်ယူပြီး ဖြည့်ဆည်းတတ်ဖို့ လိုတယ်။ တမန်တော်ကြီး ဘယ်လို သန့်ရှင်းသော ဝိညာဉ်တော်နှင့် ပြည့်ဖို့လုပ်ရမလဲဆိုတာ လမ်းညွှန်ပေးတယ်။ ဆာလံသီချင်းနှင့် ဓမ္မသီချင်းအမျိုးမျိုးကို နူးညွတ် တဲ့နှလုံးသားနှင့် သီဆိုကိုးကွယ်ခြင်းက သန့်ရှင်းသောဝိညာဉ်တော်နှင့် ပြည့်ဝဖို့ရန် ဖြစ်စေတယ်။

ဧပြီလ ၁၁ ရက်နေ့

တစ်လမ်းထဲကလာပေမဲ့ လမ်းခုနှစ်သွယ်ဖြင့် ပြေး

“သင့်​တစ်​ဖက်၌​ထ​သော ရန်​သူ​တို့​ကို သင့်​မျက်​မှောက်၌ ထာ​ဝ​ရ​ဘု​ရား​သည် ဒဏ်​ခံ​စေ​တော်​မူ​မည်။ သူ​တို့​သည် တစ်​လမ်း​တည်း​ဖြင့် သင်​ရှိ​ရာ​သို့​လာ​သော်​လည်း၊ လမ်း​ခု​နစ်​သွယ်​ဖြင့် သင့်​ရှေ့​မှ​ပြေး​ကြ​လိမ့်​မည်။” တရားဟောရာ ၂၈:၇

ဘုရားပေးတဲ့ကောင်းကြီးတွေထဲမှာ ဘာလဲပါသလဲဆိုရင် ရန်သူတွေက တစ်လမ်းထဲက သင့်ကိုတိုက်ဖို့ လာပေမဲ့၊ သင့်ကို ပြိုလဲစေမှာ ခက်ခဲစေမှာမဟုတ်ဘူး။ ရန်သူတွေကပဲ မတူတဲ့လမ်း (၇)ခုဖြင့် သင့်ဆီကနေ ပြေးရမယ်။ ရန်သူတွေရှေ့မှာ သင်ပြေးစရာမလိုပါဘူး။ ရန်သူတွေကြောင့် ဘယ်တော့မှ ဘဝပျက်ဆီး မှာမဟုတ် ဘူး။ ဘုရားပေးတဲ့အောင်မြင်ခြင်ဆိုတာ လုပ်ဆောင်နိုင်ခြင်းကြောင့် မဟုတ်ဘူး၊ ကိုယ်အရည်အချင်းကြောင့်မဟုတ်ဘူးဆိုတာ တွေ့ရတယ်။ ဘုရားပေးတဲ့ကောင်းကြီးမင်္ဂလာအားဖြင့် ရန်သူတွေအားလုံးကို ပြေးစေတဲ့သူ ဖြစ်လာစေမယ်။

ဧပြီလ ၁၀ ရက်နေ့

ဖြောင့်မတ်သူခံရတဲ့အမွေ

“သင့်​ကို​တိုက်ခိုက်​ရန် ထုတ်လုပ်​သော​လက်နက်​ရှိသမျှ​သည် အထမြောက်​မည်​မ​ဟုတ်​။ သင်​နှင့်​တရားဆိုင်​၍ သင့်​ကို​ဆန့်ကျင်​သော​လျှာ​ရှိသမျှ​တို့​ကို သင်​က အောင်​နိုင်​လိမ့်မည်​။ ဤသည်ကား ထာဝရဘုရား​၏​အစေအပါး​တို့ ရရှိ​သော​အမွေ​၊ ငါ့​ထံမှ​ရရှိ​သော​ဖြောင့်မတ်​ခြင်း​ဖြစ်​၏​”​ဟု မိန့်​တော်မူ​၏​။” ဟေရှာယအနာဂတ္တိကျမ်း ၅၄:၁၇

အရှိန်အဟုန်နဲ့ တိုးတက်နေတဲ့ခေတ်ကြီးထဲမှာ နည်းပညာရဲ့တိုးတတ်မှုဟာလဲ ကြောက်စရာ ကောင်းလောက်အောင်ပါပဲ။ အေအိုင်တွေရဲ့ နေရာယူစိုးမိုးလာမှုဟာလဲ တစ်နေ့တခြား လူသားမျိုးနွယ်စုတစ်ခုလုံးကိုတောင် စိန်ခေါ်နေတဲ့အထိပါပဲ။ တချို့နည်းပညာတွေဆို လူတွေအသက်ရှင် ရပ်တည်ဖို့တောင် စိုးရိမ်ရတဲ့အထိ ကြီးထွားလာတယ်။ ဘယ်လောက်ပဲ တိုးတက်ကြီးထွားပြီး နေရာယူပါစေ ဖြောင့်မတ်သူအတွက်ကတော့ ကြောက်ဖို့မဟုတ်ပါဘူး။ ဒီအရာတွေက ဘုရားသားသမီးအတွက် တိုက်ခိုက်ဖို့ ဖြစ်လာတယ်ဆိုရင် တော့ ဘုရားက ခွင့်ပြုမှာမဟုတ်ဘူး။ ဖြောင့်မတ်သူတွေကို တိုက်ခိုက်မယ့် လက်နက် ဘာတစ်ခုမှအထမြောက်မည်မဟုတ်လို့ကတိပေးထားတယ် မဟုတ်လား ? ဒါကြောင့် ဘုရားစကားကို စိတ်ချပြီး အသက်ရှင်ပါ။ ထွက်ပေါ်လာသမျှ အရာတွေ၊ တိုးတက်လာတဲ့အရာတွေကို သင့်ကိုတိုက်ခိုက်ဖို့ မဟုတ်ပဲ​ကောင်းကြီးဖြစ်စေဖို့ပါပဲ။

ဧပြီလ ၉ ရက်နေ့

ဘုရားသွန်သင် ဆုံးမခြင်းရောက်လာတဲ့အခါမှာ

“ကိုယ်တော်​သည် လူမျိုးတကာ​တို့​ကို တရားစီရင်​၍ လူ​များစွာ​တို့​ကို ဆုံးမ​တော်မူ​မည်​။ ထိုအခါ သူ​တို့​သည် မိမိ​တို့​၏​ဓား​များ​ကို ထယ်​များ​အဖြစ်​၊ မိမိ​တို့​၏​လှံ​များ​ကို တံစဉ်​များ​အဖြစ် ထုလုပ်​ကြ​လိမ့်မည်​။ လူမျိုး​တစ်မျိုး​နှင့်​တစ်မျိုး ဓား​ကို​မြှောက်​၍ တိုက်ခိုက်​တော့​မည်​မ​ဟုတ်​။ စစ်ရေး​လေ့ကျင့်​ခြင်း​လည်း ရှိ​တော့​မည်​မ​ဟုတ်​။” ဟေရှာယအနာဂတ္တိကျမ်း 2:4

ဘုရားရဲ့သွန်သင်ဆုံးမခြင်း ရောက်လာတဲ့အခါမှာ စစ်ပွဲ တွေရပ်တန့် သွားပြီးတော့ လက်နက်တွေနေရာမှာ ဖွံ့ဖြိုးတိုးတက်ရေး ပစ္စည်းတွေဖြစ်လာတယ်။ လူတွေကို ဒုက္ခပေးတဲ့ အရာတွေကနေ လူတွေကို အကျိုးပြုတဲ့အရာတွေ ရိတ်သိမ်းခြင်းအတွက် လိုအပ်တဲ့ အရာတွေဖြစ်လာစေတယ်။ စစ်ပွဲတွေပြီးတိုင်းမှာ ပိုကောင်းတဲ့ အနာဂတ်ကို ဖန်တီးပေးတယ်။ ရန်လို မုန်းတီးမှုတွေ မရှိတော့အခါမှာ ပိုလှပတဲ့ ကမ္ဘာကြီးကို မြင်ရပါလိမ့်မယ်။ ကမ္ဘာပေါ်မှာ စစ်ပွဲကြီးတွေ ရဲ့ဒဏ်ကို ပြန်လည် ကုသပေးတဲ့ နိုးထမှုကြီးတွေက အမြဲတမ်း ဘုရားစေလွှတ်ပေးလေ့ရှိတယ်။ စစ်ပွဲတွေရဲ့ ဒဏ်ရာတွေကို ကုသပေးနိုင်တဲ့ နိုးထမူကြီးတွေက နိုင်ငံနှင့် လူမျိုးတွေကို နာကျည်း မုန်းတီးမှုတွေကနေ နိုးထစေပြီးတော့ သာယာလှပတဲ့ အနာဂတ်သစ်ကို ပို့ဆောင်ပေးလိမ့်မယ်။

ဧပြီလ ၈ ရက်နေ့

ဆိုးရွားနေတဲ့ကြားမှာ တိုးပွါးနေဆဲဖြစ်ဖို့

“ထို့ကြောင့် ဆိုးညစ်​သော​နေ့ရက်​ကာလ​၌ ကြံ့ကြံ့​ခံ​၍ အလုံးစုံ​တို့​ကို​ပြီးမြောက်​စေ​လျက် ရပ်တည်​နိုင်​ရန် ဘုရားသခင်​၏​လက်နက်​စုံ​ကို ဆောင်ယူ​ကြ​လော့။” ဧဖက်ဩဝါဒစာ ၆:၁၃

လောကစစ်ပွဲ၊ ဝိညာဉ်ရေးရာစစ်ပွဲတွေကြားမှာ ရပ်တည်နိုင်ဖို့အတွက် ဘုရားပြင်ဆင်ထားတဲ့ လက်နက်စုံအမြဲဝတ်ဆင်ထားဖို့လိုတယ်။ ဘုရားပြင်ဆင်ထားတဲ့ လက်နက်တွေမရှိရင်၊ ဒါမှမဟုတ် မဝတ်ထားရင် ခံနိုင်ရည်ရှိဖို့မလွယ်ဘူး။ ရင်ဆိုင်နေရတဲ့ အရာတွေကို ခံနိုင်ရည်ရှိပြီးအောင်မြင်စွာကျော်လွှားစေဖို့က လက်နက်အစုံကို အသုံးပြုတတ်ဖို့လိုတယ်။ ဘုရားပြင်ဆင်ပေးထားတဲ့လက်နက်စုံကို အသုံးပြုတတ်တဲ့သူကတော့ ခံရပ်နိုင်ရုံသာမကပဲ ဒီအရာတွေကြားမှာပဲ ဘုရား ကိုယ့်အပေါ်မှာ ထားတဲ့ အလိုတော်ကို ပြီးစီးအောင် လုပ်ဆောင်နိုင်ပါလိမ့်မယ်။

ဧပြီလ ၇ ရက်နေ့

သူ့အချိန်နဲ့ သူပါပဲ

“ချစ်​ရ​သော​အ​ချိန်​နှင့် မုန်း​ရ​သော​အ​ချိန်​လည်း ရှိ၏။ စစ်​တိုက်​သော​အ​ချိန်​နှင့် စစ်​ငြိမ်း​ရ​သော​အ​ချိန်​လည်း ရှိ၏။”ဒေသနာ ၃:၈

ဆိုးတာတွေလာပြီးရင် ကောင်းတာတွေလဲ လာအုံးမှာပါ။ ကမ္ဘာပေါ်မှာ ဖြစ်ပျက်နေတဲ့အရာတွေက တသတ်မတ်ထဲ ၊ တစ်ပုံစံထဲမသွားပါဘူး။ သူ့အချိန်ကာလနဲ့ သူ ဘုရားရဲ့ထိန်းချုပ်မှုအောက်မှာ ဖြစ်ပေါ်နေပါတယ်။ ဒီနေ့ဖြစ်ပျက်နေတဲ့အရာတွေအားလုံးက တစ်ပုံစံထဲ၊ ဒီအတိုင်းပဲ သွားမှာ မဟုတ်ဘူး။ ဒီအရာတွေရဲ့အလွန်မှာ ပိုကောင်းတဲ့ အခွင့်အရေးတွေ၊ အဖြစ်ပျက်တွေ ဖြစ်လာအုံးမယ်။ ဒါကြောင့် လက်ရှိအခြေအနေကိုပဲ အဆုံးလို့ထင် မှတ်သွားရင်တော့ မှားပါလိမ့်မယ်။ အမှောင်ဆုံးအချိန်လာပြီးရင် လင်းလာတော့မယ်ဆိုတာ မမေ့စေချင်ဘူး။

ဧပြီလ ၆ ရက်နေ့

စစ်ပွဲတွေကြားမှာ ဘယ်လို စိတ်နှလုံးသားရှိရမလဲ?

“သင်​တို့​သည် စစ်​တိုက်​ခြင်း အ​ကြောင်း​ကို​လည်း​ကောင်း၊ စစ်​တိုက်​အံ့​သော သ​တင်း​စ​ကား​ကို​လည်း​ကောင်း ကြား​ရ​ကြ​လိမ့်​မည်။ သို့​သော်​လည်း စိုး​ရိမ်​တုန်​လှုပ်​ခြင်း မ​ရှိ​စေ​ခြင်း​ငှာ သ​တိ​ပြု​ကြ​လော့။ ထို​အ​မှု​အ​ရာ​များ​သည် ဖြစ်​ရ​မည်။ သို့​သော်​လည်း အ​ဆုံး​သည်​မ​ဖြစ်​သေး။-” ရှင်မဿဲ ၂၄:၆

တပည့်တော်တွေကမေးကြတယ် ဘယ်အချိန်မှာ ကိုယ်တော်ပြန်လာမလဲ?ကိုယ်တော် ပြန်လာတော့မယ်ဆိုတာ ဘယ်လိုသိနိုင်မလဲ? ဒီမေးခွန်းမေးပေးတဲ့ တပည့်တော်တွေကိုကျေးဇူးတင်ဖို့ကောင်းတယ်။ ဒီနေ့ခေတ်ကာလ လူတွေအတွက် တကယ်ကိို အဖိုးထိုက်တန်တဲ့ မေးခွန်းဖြစ်ပြီးတော့ သခင်ယေရှုဖြေခဲ့တဲ့ အရာကလဲ လူတိုင်းသိထားသင့်တဲ့အဖြေ ဖြစ်ခဲ့တယ်။ သခင်ပြန်လာတော့ မယ်ဆိုတဲ့ အချက်ပြမှုတွေထဲမှာ စစ်ပွဲသတင်းနဲ့ စစ်ဖြစ်ခြင်း အကြောင်းအရာကလဲ ထိပ်ဆုံးကပါဝင်တယ်။ ကမ္ဘာမှာ ငြိမ်းချမ်းရေးလို့ ပါးစပ်က မချပေမဲ့ စစ်ပွဲတွေကတော့ ပိုပြီး‌တော့မြင်တွေ့လာရတယ်။ သခင်ယေရှုပြောတဲ့ နေ့ရက်ကာလ ဖြစ်တယ်ဆိုတာငြင်းစရာမရှိဘူး။ ဒါဆိုရင် ဒီအရာက အဆုံးဖြစ်တော့မှာလားဆိုရင်တော့ မဟုတ်သေးပါဘူး။ စစ်တွေတော့ ပိုဖြစ်လာမယ်။ စစ်ဖြစ်ဖို့ အခြေအနေတွေလဲပိုပြီး မြင်တွေ့ရပေမဲ့ သခင်ယေရှုက မှာတာကတော့ စိုးရိမ်တုန်လှုပ်ခြင်းမရှိဖို့ သတိပြုဖို့ပါပဲ။ စိုးရိမ်နေမယ် စိတ်ပူနေမယ်ဆိုရင်တော့ သခင်မှာထားတဲ့ စကားကို စိတ်မချတာပါပဲ။ စိတ်ပူနေမယ့်အစား ဆုတောင်း ပေးခြင်းကိုပဲ ရွေးချယ်ပါ။

ဧပြီလ ၄ ရက်နေ့

ပရောဖက်ပြုချက်က နှစ်ဖက်အလုပ်လုပ်တယ်

“ထို​သူ​တို့​က​လည်း ဘု​ရား​သ​ခင်​ကို​ကြောက်​ရွံ့၍၊ ယု​ဒ​လူ​အ​ပေါင်း​တို့​တွင် အ​သ​ရေ​ရှိ​သော သူ​တော်​ကောင်း​တည်း​ဟူ​သော တပ်​မှူး​ကော်​နေ​လိ​သည်၊ ကိုယ်​တော်​ကို မိ​မိ​အိမ်​သို့​ခေါ်​ပင့်၍ ကိုယ်​တော်၏​စ​ကား​ကို နား​ထောင်​ရ​မည်​အ​ကြောင်း၊ သန့်​ရှင်း​သော ကောင်း​ကင်​တ​မန်​အား​ဖြင့် ဗျာ​ဒိတ်​တော်​ကို ခံ​ရ​ပါ​သည်​ဟု ပြန်​ပြော​ကြ၏။-” တမန်တော် ၁၀:၂၂

ပရောဖက်ပြုချက်တွေ အသက်တာထဲကို ရောက်လာတဲ့အခါမှာသိဖို့ လိုအပ်တဲ့အရာတစ်ခုက ဘယ်တော့မှ ဘုရားက တစ်ဖက်ထဲ အလုပ်မလုပ်ဘူး။ အမြဲတမ်း နှစ်ဖက် အလုပ်လုပ်တယ်။ ပေတရုကို သန့်ရှင်းသောဝိညာဉ်တော်က စကားပြောသလို၊ တစ်ဖက်မှာလဲ ကော်နေလိကိုလဲ ဘုရားက စကားပြောတယ်။ ဘုရားက တစ်ဖက်ထဲကို အလုပ်မလုပ်ဘူး။ အမြဲတမ်း နှစ်ဖက်စလုံးအတွက် အလုပ်လုပ်တယ်၊ ဖွင့်ပြတယ်။ တစ်စုံတစ်ခု သင့်ဆီကို ဘုရားရဲ့ပရောဖက်ပြုချက်ရောက်လာရင်၊ ဒါမှမဟုတ် ဘုရားဖွင့်ပြတယ်ဆိုပြီးတော့ သင့်ကိုလာပြောတဲ့ သူတွေ နဲ့တွေ့ရင် ကြောက်စရာ မလိုပါဘူး။ ဘုရားက တစ်ဖက်သတ်အလုပ်လုပ်တာမဟုတ်ပဲ နှစ်ဖက်စလုံးအတွက် အလုပ်လုပ်တယ်ဆိုတာကို စိတ်ချပြီးတော့ ဘုရားက နှစ်ဘက်လုံးကို ဖွင့်ပြတဲ့အထိစောင့်ပါ။

ဧပြီလ ၃ ရက်နေ့

ပရောဖက်ပြုချက်တွေကို နားလည်ချင်တယ်ဆိုရင်

“ဖိလိပ္ပု​သည်​လည်း ပြေး​သွား​ရာ ထို​သူ​သည် ပရောဖက်​ဟေရှာယ​ကျမ်း​ဖတ်​နေ​သည်​ကို ကြား​သဖြင့် “သင်​ဖတ်​နေ​သော​အရာ​ကို နားလည်​ပါ​သလော”​ဟု မေး​လေ​၏။ ထို​မှူးမတ်​က​လည်း “အကျွန်ုပ်​အား ရှင်းပြ​ပေး​သူ​မ​ရှိ​လျှင် မည်သို့​နားလည်​နိုင်​ပါ​မည်နည်း”​ဟု ဆို​ပြီးလျှင် ဖိလိပ္ပု​အား ရထား​ပေါ်​တက်​၍ မိမိ​နှင့်အတူ​ထိုင်​ရန် ဖိတ်ခေါ်​လေ​၏။” တမန်တော်ဝတ္ထု ၈:၃၀-၃၁

ပညာနဲ့ပြည့်စုံပြီးတော့ နိုင်ငံခေါင်းဆောင်ကတောင် အမှီပြုရတဲ့ အမတ်ကြီးက ပရောဖက်ပြုချက်စာစောင်ကို ဖတ်ပြီး နားမလည်ဖြစ်နေရှာတယ်။ သူဟာ ဗိမာန်တော်မှာ ဝတ်ပြုပြီးတာတောင် လမ်းမှာ ဆာငတ်လွန်းလို့ ပရောဖက်ဟေရှာယရဲ့ စာစောင်ကို ဖတ်နေရှာတယ်။ ပရောဖက်ပြုချက်ဆိုတာ ကိုယ့်အလိုလျှောက် အနက်မပေါ်ဘူးဆိုတော့ သူ့ရှိတဲ့ ဉာဏ်ဟာ ပရောဖက်ပြုချက်တွေကို နားလည်ဖို့အတွက်မမှီရှာဘူး။ ဒါကြောင့်ဖိလိပ္ပု မေးတဲ့အခါမှာ ရိုးသားစွာပြန်ဖြေရှာတယ်။ ရှင်းပြမည့်သူ မရှိရင် ဘယ်လောက်ပဲ ပညာတွေတတ်ပါစေ။ ရာထူး စည်းစိမ်တွေနဲ့ အပြည့်ရှိလဲ နားလည်နိုင်မှာ မဟုတ်ဘူး။ ဆာငတ်တဲ့သူကို ပစ်မထားတဲ့ ဘုရားက အမတ်ကြီးဆီကို ပရောဖက်ပြုချက်ရဲ့ အနက်ကို နားလည်နိုင်ဖို့အတွက် ဝိညာဉ်တော်နှင့်ပြည့်ဝတဲ့ လူကို လွှတ်ပေးတယ်။ ဝိညာဉ်တော်နှင့် သွားလာတဲ့သူကပဲ ပရောဖက်ပြုချက် အနက်အဓိပ္ပါယ်ကို အတိအကျ ဖေါ်ထုတ်နိုင်တယ်။

ဧပြီလ ၂ ရက်နေ့

ပရောဖက်ပြုချက် ပြည့်စုံဖို့ ဆန့်ကျင်င်ခံရခြင်း

“လော​ကီ​ရှင်​ဘု​ရင်​တို့​သည် ထ​ကြ၍၊ မှူး​မတ်​အ​ရာ​ရှိ​တို့​လည်း ထာ​ဝ​ရ​ဘု​ရား​နှင့် ခ​ရစ်​တော်​ကို ရန်​ဘက်​ပြု​လျက် စည်း​ဝေး​ကြ၏​ဟု ကိုယ်​တော်​ကျွန်​ဒါ​ဝိဒ်၏ နှုတ်​ဖြင့် ဗျာ​ဒိတ်​ထား​တော်​မူ​သည်​နှင့်​အ​ညီ၊-” တမန်တော် ၄:၂၆

ဘယ်သူကမှ ဆန့်ကြင်ခံရတာ ၊ရန်လုပ်ခံရတာကို ကြိုက်မှာမဟုတ်ပါဘူး။ ဒီလို မျိုးကြုံရင်လဲ​ဝမ်းနည်းတတ်ကြတယ်။ငါလုပ်တာ များ မှားနေပြီလား လို့ မေးခွန်းလဲ ထုတ်တတ်ပြီး ဆက်လုပ်ဖို့တောင် တုန့်ဆိုင်း သွားတတ်ကြပါတယ်။ တကယ်တော့ တချို့သောဆန့်ကြင်ခံရမူတွေ၊ ရန်ဘက်ပြုခံရတာတွေကိုက ဘုရားရဲ့ ရှေ့မဆွက ကြိုတင်ပရောဖက်ပြုချက်ပြည့်စုံခြင်း ဖြစ်တယ်။ ပရောဖက်ပြုချက်တွေက နေ့တိုင်း မှာ ပုံစံမျိုးစုံနဲ့ ပြည့်စုံနေကြတယ်။သိတဲ့အရာ၊မသိတဲ့အရာ အားလုံးမှာ ဘုရားသခင်ရဲ့ ပရောဖက်ပြုချက် မပြည့်စုံစေတာ တစ်ခုမှ မရှိဘူး။

ဧပြီလ ၁ ရက်နေ့

ပရောဖက်ပြုချက် ပြည့်စုံစေသော ဝေဒနာ

“သို့သော် ဘုရားသခင်​သည် မိမိ​၏​ခရစ်တော်​ဒုက္ခ​ဝေဒနာ​ခံစား​ရ​မည်​ဟု ပရောဖက်​အပေါင်း​တို့​၏​နှုတ်​အားဖြင့် ကြိုတင်​ဖော်ပြ​ထား​သော​အရာ​တို့​ကို ထိုသို့​ပြည့်စုံ​စေ​တော်မူ​၏။” တမန်တော်ဝတ္ထု ၃:၁၈

ကောင်းတဲ့အရာတွေပဲ ဝမ်းမြောက်စရာအကြောင်းတွေပဲ ပရောဖက်ပြုချက်ပြည့်စုံတာ မဟုတ်ဘူးဆိုတာ သိပြီးသားဖြစ်မှာပါ။ တချို့သော အထင်လွဲခံရတာတွေ၊ သစ္စာဖေါက်ခံရတာတွေနဲ့ ဝေဒနာ ခံစားရတာတွေကလဲ ပရောဖက်ပြုချက် ပြည့်စုံခြင်းထဲမှာ အဓိက အကြောင်းအရာအနေနဲ့ပါဝင်ပါတယ်။ ဣသရေလ လူမျိုးတွေ ခရစ်တော်နှင့်ပက်သက်ပြီးတော့ ပုံဖေါ်ထားပြီးနားလည်တာ နဲ့ တကယ့်လက်တွေ့မှာ ခြားနားလွန်းတဲ့အခါမှာ နားမလည်နိုင်ကြဘူး။ ပရောဖက်ပြုချက်တွေကို နှစ်ပေါင်းများစွာ လေ့လာတယ်၊ ယုံတယ်ပြည့်စုံဖို့ မျှော်လင့်နေပေမဲ့ တကယ် ပြည့်စုံလာတဲ့အခါမှာ မယုံပဲ ဆန့်ကျင်တဲ့အထဲမှာ ထိပ်ဆုံးက ရပ်တည်ခဲ့ကြတယ်။ ပရောဖက်ပြုချက်တွေ ပြည့်စုံလို့ ပြည့်စုံနေမှန်းတောင် မသိခဲ့ကြဘူး။ သင့်ဘဝမှာလဲ အချိန်တိုင်းမှာ ဘုရားကြိုတင်ဖွင့်ပြ ထားတဲ့ပရော ဖက်ပြုချက်တွေပြည့်စုံနေတယ်ဆိုတာ သိပါလား။

မတ်လ ၃၁ ရက်နေ့

အထင်လွဲခံရတဲ့ပရောဖက်ပြုချက်

“ယခု​အချိန်​ကား နံနက်​ကိုး​နာရီ​ဖြစ်​၍ ဤ​သူ​တို့​သည် သင်​တို့​ထင်မှတ်​သကဲ့သို့ ယစ်မူး​နေ​ကြ​သည်​မ​ဟုတ်။ ဤ​အရာ​သည် ပရောဖက်​ယောလ​ဟောပြော​ထား​သော​အရာ​ပင်​ဖြစ်​၏။” တမန်တော်ဝတ္ထု ၂:၁၅-၁၆

တစ်ခါတစ်လေ ဘုရားရဲ့ကြိုတင်ပရောဖက်ပြုချက်ပြည့်စုံခြင်း ရောက်လာပေမဲ့ လူတိုင်းက နားလည်သဘောပေါက်ကြတာတော့မဟုတ်ပါ။ ပရောဖက်ပြုချက်ပြည့်စုံခြင်းကို နားလည် သဘောပေါက် လွဲတဲ့သူလဲ ရှိတတ်ကြတာပါပဲ။ သန့်ရှင်းသောဝိညာဉ်တော် သွန်းလောင်းပြီးတော့ ပရောဖက်ယောလ ပြောတဲ့အတိုင်း ဖြစ်လာတဲ့အခါမှာ လူတွေက အရက်မူးနေတယ်လို့ အထင်လွဲခဲ့ကြတယ်။ တကယ်ဆို အထင်လွဲတဲ့သူတွေလဲဒီကျမ်းစာကို အကြိမ်ကြိမ်ဖတ်ဖူးတဲ့ ဘုရားကို ဝတ်ပြုကိုးကွယ်ကြတဲ့သူတွေဖြစ်သလို၊ ဒီယောလ ပရောဖက်ပြုချက် ပြည့်စုံဖို့ စောင့်နေကြတဲ့ သူတွေပဲ။ တကယ်လဲ ပြည့်စုံလာရော နားမလည်နိုင်ကြဘူး။

မတ်လ ၃၀ ရက်နေ့

ကြိုတင်ပရောဖက်ပြုထားတဲ့အတိုင်း

“ညီအစ်ကို​တို့၊ ယေရှု​ကို​ဖမ်းဆီး​သော​သူ​တို့​အား လမ်းပြ​ပေး​သူ​ဖြစ်​သည့် ယုဒ​ဣရှကာရုတ်​နှင့်​ပတ်သက်၍ သန့်ရှင်း​သော​ဝိညာဉ်​တော်​က ဒါဝိဒ်​၏​နှုတ်​အားဖြင့် ကြိုတင်​ဟောကြား​ထား​သော​ကျမ်းချက်​သည် ပြည့်စုံ​ခြင်း​သို့​ရောက်​ရ​မည်​ဖြစ်​၏။” တမန်တော်ဝတ္ထု ၁:၁၆

ကောင်းတာတွေပဲပရောဖက်ပြုချက်ပြည့်စုံခြင်းမဟုတ်ဘူး။ တစ်ခါတစ်လေ ဘဝမှာမကြုံချင်တဲ့ သစ္စာဖေါက်ခံရခြင်း၊ ဝမ်းနည်းစရာအဖြစ်ပျက်တွေကလဲ ကြိုတင်ပရောဖက်ပြုချက် ပြည့်စုံဖို့ ဆိုတာကို သိဖို့လိုတယ်။ သခင်ယေရှုထမြောက်ပြီးတဲ့နောက်ပိုင်းမှာ ပေတရု ပိုပြီးနားလည် သဘောပေါက်လာတဲ့အရာက အရာခပ်သိမ်းက ဘုရားရဲ့ပရောဖက်ပြုချက် ပြည့်စုံခြင်း ဖြစ်ပြီးတော့ သန့်ရှင်းသောဝိညာဉ်တော်ကပဲ ဉီးဆောင်နေတယ်ဆိုတာပါ။ ဘဝမှာ ကြုံချင်တဲ့အရာတွေပဲ ပရောဖက်ပြုချက်မဟုတ်ဘူး။ မကြုံချင်တဲ့အရာတွေကလဲ ဘုရားရဲ့ကြိုတင် ပရောဖက်ပြုချက် ပြည့်စုံခြင်းဆိုတာ သင်သိသွားရင် အရာရာကို စိတ်ပျက်နေမှာမဟုတ်တော့ဘူး။ သန့်ရှင်းသောဝိညာဉ်တော်နှင့် ဘယ်လို ခရီးဆက်မလဲ ဆိုတာကိုပဲ အာရုံစိုက်တော့မှာ သေချာတယ်။

မတ်လ ၂၈ ရက်နေ့

တစ်ခုတည်းသောဆု

“ထာဝရဘုရား​၏​ခန့်ညား​တင့်တယ်​ခြင်း​ကို ဖူးမြော်​ရန်​နှင့် ကိုယ်တော်​၏​ဗိမာန်တော်​၌ စူးစမ်းဆင်ခြင်​လျက်​နေ​ရန် ငါ​အသက်ရှင်​သမျှ​ကာလ​ပတ်လုံး ထာဝရဘုရား​၏​အိမ်​တော်​၌​နေ​ရ​မည့်​အကြောင်း တစ်ခုတည်း​ကို ထာဝရဘုရား​ထံ​၌ ငါ​တောင်းလျှောက်​ပြီ​။ ထို​အခွင့်​ကို ငါ​ရှာ​မည်​။” ဆာလံကျမ်း‬ ‭၂၇:၄

သိုးကျောင်းသားလေးကနေ ဘုရင်ကြီးဖြစ်လာတဲ့ ဒါဝိဒ်ရဲ့လျှို့ဝှက်ချက်က ဘာများဖြစ်မလဲ? တိုက်ပွဲတိုင်းအောင်မြင်လူတိုင်းသဘောကျရုံတင်မကဘူး ဘုရားကတောင် သူ့ရဲ့ နှလုံးသား နဲ့တစ်ထပ်တည်းကျတဲ့သူလို့ ဆိုရတဲ့အထိ ဖြစ်ခဲ့တဲ့သူ။ သူ့ရဲ့ဆုတောင်းနှင့် သူရဲ့လိုချင်တောင့်တမူကို ကြည့်ရင် သူ့ရဲ့လျှို့ဝှက်ချက်ကို သိမြင်နိုင်ပါတယ်။ သူရဲ့ အတောင့်တဆုံးအရာက သိုးကျောင်းသားဘဝမှာရော ဘုရင်ကြီးဘဝမှာရော လုံးဝကို မပြောင်းသွားဘူး။ ဘုရားရဲ့မျက်မှောက်တော်ကို ဆာငတ်လွန်းလို့၊ ဘုရားရဲ့အနီးဆုံးမှာ နေချင်တဲ့ ဆန္ဒနှင့်ဆုတောင်းချက်က သူ့ဘဝကို ဘယ်သူနဲ့မှ မတူအောင်ခြားနားစေတယ်။

မတ်လ ၂၇ ရက်နေ့

နေရာတိုင်းမှာရှိတဲ့သူ

“ငါ​မ​မြင်​နိုင်​အောင် ကွယ်​ရာ​၌ ပုန်းနိုင်​သော​သူ တစ်စုံတစ်ယောက်​ရှိ​သလော​”​ဟု ထာဝရဘုရား​မေး​တော်မူ​၏​။ “​ငါ​သည် ကောင်းကင်​၊ မြေကြီး​အနှံ့ ရှိ​သည်​မ​ဟုတ်​လော​”​ဟု ထာဝရဘုရား​မေး​တော်မူ​၏​။” ယေရမိအနာဂတ္တိကျမ်း ၂၃:၂၄

ဘုရား မျက်မှောက်တော်နှင့် ဝေး တဲ့အရပ်ကို ဘယ်သူများ သွားနိုင်မှာလဲ? နေရာတိုင်း အချိန်တိုင်းမှာ အတူရှိနိုင်သူပါ။ ဘုရားမမြင်အောင် ပုန်းနိုင်တဲ့သူ မရှိနိုင်သလို၊ ပုန်းရှောင်နိုင်တဲ့ နေရာလဲမရှိဘူး။ ဒီအရာက ဘာကို စိတ်ချမှုကိုပေးသလဲဆိုရင် ဘုရားမျက်မှောက်တော်နဲ့ဝေးတဲ့အရပ်ကို ဘယ်သူမှ ထွက်မသွားနိုင်ဘူး ဆိုတာပါပဲ။ နေ့ရက်တိုင်းမှာ ဘုရားနဲ့ ပိုနီးအောင်ပဲ အသက်ရှင်လို့ရနိုင်တယ်။ ပိုဝေးသွားအောင်တော့ထွက်သွားလို့မရဘူး။ သင့်ဘက်ကသာဘုရားနဲ့ဝေးတယ်၊ ဘုရား မျက်မှောက်တော် မခံစားရတာပဲရှိချင်ရှိမယ်။ ဘုရားဘက်ကတော့အချိန်တိုင်း ၊ နေရာတိုင်းမှာ သင်နဲ့အနီးဆုံးမှာ ရှိနေတယ်။

မတ်လ ၂၆ ရက်နေ့

ဘုရားဖြည့်ဆည်းပေးမယ်

“ထာဝရဘုရား​၌ မွေ့လျော်​ခြင်း​ရှိ​လော့​။ သို့ပြုလျှင် သင်​၏​စိတ်နှလုံး​ဆန္ဒ​များ​ကို သင့်​အား​ဖြည့်ဆည်း​ပေး​တော်မူ​လိမ့်မည်​။” ဆာလံကျမ်း ၃၇း၄

ကိုယ့်ဆန္ဒတွေကို ကိုယ့်ခွန်အားနဲ့ပဲ​အကောင်အထည်ဖေါ်ရင် ဖြစ်နိုင်ဖို့ မသေချာသလို၊ ဖြစ်နိုင်ခဲ့ရင်တောင် ခွန်အားတွေ ၊အစွမ်းအစတွေ အများကြီးလိုမယ်။ ကိုယ့်ရဲ့ အလိုဆန္ဒတွေကို ဘုရား အကောင်အထည်ဖေါ်ပေးရင်တောင် ကိုယ်ခွန်အား အစွမ်းအစတွေ နဲ့အကောင်အထည်ဖေါ်တာတွေ ထက်ပို လွယ် မယ်မဟုတ်ဘူးလား ? ဘုရားရဲ့မျက်မှောက်တော်ကို တိုးဝင်တဲ့အခါမှာ ဘုရားမျက်မှောက်တော် နဲ့ နီးတဲ့ချဉ်းကပ်မူ ထဲမှာ ပျော်မွေ့လေလေ ဘုရားကသင့်နှလုံးသား ဆန္ဒတွေကို အကောင်အထည်ဖေါ်ပေးလေလေပဲ။

မတ်လ ၂၅ ရက်နေ့

သက်သာစွာ အနားယူခွင့်ရမယ်

“ထိုအခါ ကိုယ်တော်​က “​ငါ​ကိုယ်တိုင်​ကြွ​မည်​။ သင့်​ကို သက်သာ​ခွင့်​ပေး​မည်​”​ဟု မိန့်​တော်မူ​၏​။” ထွက်မြောက်ရာကျမ်း ၃၃း၁၄

မောရှေက ဘုရားဆီကနေတောင်းဆိုတာ ကိုယ်တော်ရဲ့အတူရှိခြင်းပါ။ ကိုယ်တော်မျက်မှောက်တော်မပါရင် ဘယ်နေရာ မှ၊ ဘယ်ကို မှ မသွားခြင်ဘူးလို့သူက ဆိုတယ်။ ဘုရားရဲ့မျက်မှောက်တော် မပါရင် မလွယ်ဘူးဆိုတာ သူကောင်းကောင်းသိတယ်။ဒီလောက်ကြီးလေးတဲ့ တာဝန်ကို သူထမ်းဆောင်နိုင်တာက အရည်အချင်းကြောင့်မဟုတ်ပဲ​ဘုရား အတူပါရှိခြင်း

သက်သက်ကြောင့်ပဲ။ ဘုရားမျက်မှောက်တော်ပါလို့သာ ဒီလောက်ကြီးလေးတဲ့တာဝန်ကို သက်သာပေါ့ပါးစွာနဲ့သူလုပ်ဆောင်နိုင်တယ်။ ဘုရားကလဲ ကတိပေးတယ် ကိုယ်တိုင်ကြွပြီးတော့ သက်သာခွင့်ပေးမယ်။

မတ်လ ၂၄ ရက်နေ့

နှစ်လိုဖွယ်ကောင်းသောအရာ ရှိရာအရပ်

“ကိုယ်တော်​သည် အကျွန်ုပ်​အား အသက်ရှင်​ခြင်း​လမ်း​ကို​သိ​စေ​၍ ရှေ့​တော်​၌ အကျွန်ုပ်​ကို ဝမ်းမြောက်​ခြင်း​ဖြင့် ပြည့်စုံကြွယ်ဝ​စေ​တော်မူ​လိမ့်မည်​။ နှစ်လို​ဖွယ်​ကောင်း​သော​အရာ​သည် ကိုယ်တော်​၏​လက်ယာ​ဘက်​၌ အစဉ်​ရှိ​ပါ​၏​။” ဆာလံကျမ်း ၁၆း၁၁

ဘုရားရဲ့မျက်မှောက်တော် က အသက်တာကို ဘာတွေယူဆောင်လာသလဲ? အသက်ရှင်ခြင်းရဲ့ ရည်ရွယ်ချက် ကိုသိစေတဲ့ တစ်ခုတည်းသော နေရာက မျက်မှောက်တော် ထဲမှာ ပါပဲ။ ဘုရားမျက်မှောက်တော် ထဲ နက်ရိူင်းစွာ တိုးဝင်တဲ့သူ တစ်ယောက်ဘဝမှာ အခြေအနေတိုင်းမှာ ဝမ်းမြောက်စွာ ဖြတ်ကျော်နိုင်တဲ့ ဘဝကို ရရှိစေတယ်။ ဘဝရဲ့ ကောင်းမွန်နှစ်သက်တဲ့အရာ တွေကို ဘုရားရဲ့အနီးအနားမှာ ပဲရှာတွေ့နိုင်တယ်။

မတ်လ ၂၃ ရက်နေ့

ဘုရားကိန်းဝပ်ရာအရပ်

အ​ဘယ်​အ​ရပ်​သည် ငါ​ကျိန်း​ဝပ်​ရာ​အ​ရပ် ဖြစ်​မည်​နည်း။ ဤ​အ​ရာ​အ​လုံး​စုံ​တို့​သည် ငါ့​ကိုယ်​တိုင် ဖန်​ဆင်း​သော​ကြောင့် ဖြစ်​ကြ၏။ စိတ်​နှိမ့်​ချ​ခြင်း၊ နှ​လုံး​ကြေ​ကွဲ​ခြင်း၊ ငါ့​စ​ကား​ကြောင့် တုန်​လှုပ်​ခြင်း​ရှိ​သော​သူ​ကို​သာ ငါ​ကြည့်​ရှု​မည်။” ဟေရှာယ ၆၆း၁-၂

ဘုရားရဲ့မျက်မှောက်တော်ဆိုတာ ဘုရားသားသမီးတိုင်းအတွက် အရေးကြီးဆုံးဆိုတာ လူတိုင်းသိပါတယ်။ မျက်မှောက်တော် ကနေကင်းကွာလို့ နည်းနည်းလေး မှ မရဘူးဆိုတာလဲ သဘောပေါက်ပြီးသားပါ။ လူတွေ သတိမထားမိတာက ဘုရားမျက်မှောက်တော် ဘယ်မှာ နေရာယူသလဲ ? ဘယ်လို နေရာယူသလဲ ဆိုတာ ကို ပါ။ ပရောဖက်ဟေရှာယအားဖြင့် ဘုရားကပြောတယ် ငါ ဘယ်မှာ ကိန်းဝပ်သလဲ ? ကြီးမြတ်တဲ့ဘုရားအတွက် နေရာပြင်ဆင်ဖို့ဆိုတာ မလွယ်မှန်းလူတိုင်းသိပါတယ်။ဘုရားက သူနေရာယူမယ့် အရာကို ဒီလိုပဲပြောတယ် ၊အပြင်ပိုင်း ခမ်းနားမူတွေထက် အတွင်းနှလုံးသားရဲ့ တုန့်ပြန်မူတွေက ဘုရားမျက်မှောက်တော်ကို နေရာပေးဖို့ အရေးကြီးတယ်။ နှိမ့်ချတဲ့ နှလုံးသား ၊ ဘုရားပြောတဲ့စကားကို ရိုသေလေးစားစွာ တုန့်ပြန်တတ်တဲ့သူ ဒီလို လူတွေ ရှိတဲ့အရပ်ဟာ ဘုရားမျက်မှောက်တော် နေရာယူခြင်တဲ့နေရာလို့ဆိုတယ်။

မတ်လ ၂၁ ရက်နေ့

ပေါင်းသင်းတာ မှန်သောကြောင့်

“ပြည့်​တန်​ဆာ​ရာ​ခပ်​သည် သူ​လျှို​တို့​ကို အ​ဆွေ​ဖွဲ့၍ လက်​ခံ​သော​ကြောင့်၊ မ​ယုံ​ကြည်​သော​သူ​တို့​နှင့် အ​တူ မ​ပျက်​စီး​ဘဲ၊ ယုံ​ကြည်​ခြင်း​အား​ဖြင့် ချမ်း​သာ​ရ၏။” ဟေဗြဲ ၁၁း၃၁

ယုံကြည်ခြင်း က လုပ်ဆောင်တာအတွက်ပဲ​မဟုတ်ဘူး ပေါင်းသင်းခြင်းအတွက်လဲ အရေးကြီးတယ်ဆိုတာ ရာခပ်ရဲ့အသက်တာက လက်တွေ့ပြသခဲ့တယ်။ ယုံကြည်ခြင်းမရှိတဲ့သူတွေနဲ့ အတူ ပျက်ဆီးမယ့်အစား ယုံကြည်ခြင်းရှိတဲ့သူတွေနဲ့ ပေါင်းသင်းဖို့အခွင့်အရေးရတဲ့အခါမှာ လက်လွတ်မခံပဲ အရယူခဲ့တယ်။​ဒီပေါင်းသင်းဆက်ဆံရေးက သူဘဝကို လွတ်မြောက်စေရုံပဲ မက လက်ရှိဘဝကနေ အလှည့်အပြောင်းဖြစ်လာတယ်။ ပြည်တန်ဆာ အမျိုးသမီးတစ်ယောက်ကနေ နိုင်ငံတစ်ခုလုံး သမိုင်းတစ်ခုလုံးရဲ့ အားကျရတဲ့ ဘုရင် မျိုးနွယ်ဖြစ်လာစေတဲ့အထိ အပြောင်းအလဲ ဖြစ်လာခဲ့တယ်။

မတ်လ ၂၀ ရက်နေ့

မှတ်ယူတာ မှန်သောကြောင့်

“ထိုနည်းတူ အမြုံ​ဖြစ်​သော​စာရာ​သည်​လည်း အသက်အရွယ်​လွန်​ပြီး​သောအခါ ယုံကြည်​ခြင်း​အားဖြင့် ပဋိသန္ဓေ​တည်​နိုင်​သော​အစွမ်း​ကို​ရရှိ​၏။ အကြောင်းမူကား ကတိ​ပေး​တော်မူ​သော​အရှင်​သည် သစ္စာရှိ​သည်​ဟု​မှတ်ယူ​သောကြောင့်​ဖြစ်​၏။” ‭ဟေဗြဲဩဝါဒစာ ၁၁း၁၁

အသက်အရွယ်အားဖြင့် မဖြစ်နိုင်တဲ့အရာကို လုပ်နိုင်တဲ့ အစွမ်းကို ဘုရားက ဆာရာကို ပေးတယ်။ ဘာကြောင့်များ ဒီလို လုပ်နိုင်ရတာလဲ? အဖြေက မှန်ကန်တဲ့ မှတ်ယူ ထားတဲ့ ယုံကြည်ခြင်းကြောင့်ဖြစ်တယ်။ အရွယ်တွေပြောင်းလာပေမဲ့ ဘုရားအပေါ်မှာ ထားတဲ့ မပြောင်းလဲနိုင်တဲ့ မှတ်ယူမူဟာ သူ့ဘဝရဲ့ အစွမ်းတွေကို သက်ရောက်မူရှိလာစေတယ်။ ကတိပေးထားတဲ့ ဘုရားက ကတိပေးထားတဲ့အတိုင်း ပြည့်စုံစေမယ်၊ သစ္စာရှိတဲ့သူဆိုတာ သူ နှလုံးသားထဲမှာ မှတ်ယူတယ်။ အခြေနေတွေဘယ်လိုပဲ ရှိရှိပြည့်စုံလာမယ်ဆိုတဲ့ သူရဲ့ မှတ်ယူမူကြောင့် အရွယ်လွန်သွားပေမဲ့ မဖြစ်နိုင်တာတွေဖြစ်လာတယ်။ တချို့က ဖြစ်လာနိုင်တာတွေတောင် မဖြစ်လာဘူး ။ အဖြေကတော့ မှတ်ယူထားတဲ့ အရာတွေမှားနေလို့ပါပဲ။

မတ်လ ၁၉ ရက်နေ့

သိလို့လုပ်တာမဟုတ်ဘူး

“အာဗြဟံ​သည် အမွေ​အဖြစ်​ဆက်ခံ​ရ​မည့်​ပြည်​သို့​ထွက်ခွာ​သွား​ရန် ခေါ်ယူ​တော်မူ​ခြင်း​ခံရ​သောအခါ မည်သည့်​အရပ်​သို့​သွား​ရ​မည်​ကို​မ​သိ​ဘဲ​လျက် ယုံကြည်​ခြင်း​အားဖြင့်​နာခံ​၍ ထွက်သွား​လေ​၏။” ဟေဗြဲဩဝါဒစာ ၁၁း၈

ယုံကြည်ခြင်းဆိုတာ အားလုံးသိလို့ လုပ်တာမဟုတ်ဘူး။ လုပ်နေတဲ့အချိန်မှာတောင် မသိတဲ့အရာတွေအများကြီးရှိနေသေးတယ်။ ဒါပေမဲ့ ဘုရားကိုယုံတဲ့အခါမှာ သိတဲ့အရာကိုပဲ လုပ်ဆောင်တာ မဟုတ်ပဲ မသိတဲ့အရာတွေအတွက်လဲ ဘုရားကို စိတ်ချပြီး လုပ်ဆောင်ခြင်းဖြစ်တယ်။ အကုန်အစင်သိမှ ၊အတိအကျသိမှ လုပ်မယ်ဆိုရင် ယုံကြည်ခြင်းမဟုတ်တော့ဘူး။ အာဗြံဟံက ဘုရား သူ့ကိုပြောတဲ့အခါမှာ သူမသိတဲ့အရာတွေများစွာ ရှိပေမဲ့ ယုံကြည်ခြင်း အားဖြင့် လုပ်ဆောင်ခဲ့တယ်။ ဒါကြောင့်လဲ သူ့ကိုဘုရားက ယုံကြည်ခြင်း ဖခင်အဖြစ် အသိအမှတ်ပြုပြီးတော့ သူ့မှာမရှိတဲ့ ဖြောင့်မတ်ခြင်းအဖြစ် သတ်မှတ်ခဲ့တယ်။

မတ်လ ၁၈ ရက်နေ့

ဘဝပြောင်းစေသော ယုံကြည်ခြင်း

“ယုံကြည်​ခြင်း​အားဖြင့် ဧနောက်​သည် သေ​ခြင်း​နှင့်​မ​ကြုံတွေ့​ရ​ဘဲ ဘဝ​ပြောင်း​ခွင့်​ရ​၏။ ဘုရားသခင်​သည် သူ့​အား​ဘဝ​ပြောင်း​စေ​တော်မူ​သောကြောင့် သူ့​ကို​မ​တွေ့​ရ​ကြ​တော့ချေ။ သူ​သည် ဘဝ​မ​ပြောင်း​မီ ဘုရားသခင်​၏​စိတ်​တော်​နှင့်​တွေ့​သော​သူ​ဖြစ်​ကြောင်း အသိအမှတ်​ပြု​ခြင်း​ကို​ခံရ​၏။” ဟေဗြဲဩဝါဒစာ ၁၁း၅

ယုံကြည်ခြင်းက ကောင်းကင်ကိုပို့ ပေးတာ မဟုတ်ဘူး ဘဝတစ်ခုလုံးကို ပြောင်းလဲစေတယ်။လူတိုင်း သေချာပေါက်ကြုံရမယ့်သေခြင်းကိုလဲ မတွေ့ရပဲ ယုံကြည်ခြင်းကြောင့် ကျော်လွန်ခဲ့တယ်။ အားလုံးကြုံလို့ ကိုယ်လဲ ကြုံရမှာပဲလို့ တလွဲ မတွေးစေခြင်ဘူး။ ယုံကြည်ခြင်းက လူတိုင်းကြုံရတဲ့အရာကို ကျော်လွန်စေနိုင်တဲ့ အခွင့်တန်ခိုးရှိတယ်။ ယုံကြည်ခြင်းရှိတဲ့သူရဲ့ဘဝမှာ အခြားသူတွေအသက်တာမှာ မတွေ့ကြုံရတဲ့ ထူးဆန်းတဲ့အတွေ့အကြုံတွေကို ခံစားခွင့်ရစေတယ်။ ဘုရားကို ယုံကြည်ခြင်းဆိုတာ အံြသဖို့ ကောင်းသလို ကြုံလာရတဲ့အရာတွေကလဲ အထူးအံြသစရာတွေပါပဲ။

မတ်လ ၁၇ ရက်နေ့

သာပြီးမြတ်သော ယဇ်

“ယုံကြည်​ခြင်း​အားဖြင့် အာဗေလ​သည် ကာဣန​ထက် မြတ်​သော​ယဇ်​ကို ဘုရားသခင်​အား​ပူဇော်​ခဲ့​ပြီး ထို​ယုံကြည်​ခြင်း​အားဖြင့် ဖြောင့်မတ်​သော​သူ​အဖြစ် အသိအမှတ်ပြု​ခြင်း​ခံရ​၏။ အကြောင်းမူကား ဘုရားသခင်​သည် သူ​၏​ပူဇော်သက္ကာ​များ​ကို အသိအမှတ်ပြု​တော်မူ​၏။ သူ​သည် သေလွန်​သော်လည်း ထို​ယုံကြည်​ခြင်း​အားဖြင့် ယခု​တိုင်အောင် စကား​ပြော​နေ​သေး​၏။” ဟေဗြဲဩဝါဒစာ ၁၁း၄

လုပ်တာချင်း အတူတူ ယုံကြည်ခြင်းပါတာနှင့် မပါတာတော့ အင်မတန်ကွာတယ်။ယုံကြည်ခြင်း မပါတဲ့အခါမှာ အကောင်းဆုံးလုပ်ရင်တောင် အကောင်းဆုံးအဖြစ်သတ်မှတ်ခြင်းမခံရဘူး။ ယုံကြည်ခြင်းရှိတဲ့သူကတော့ ရိုးရိုးလေး လုပ်ရင်တောင် အကောင်းဆုံးအဖြစ်သတ်မှတ်ခြင်းခံရတယ်။ ဘုရားက ယုံကြည်ခြင်း ရှိတဲ့သူကို အကောင်းဆုံးအဖြစ်အမြဲတမ်း သတ်မှတ်တဲ့ဘုရားပါ။ ယုံကြည်ခြင်းမရှိတဲ့သူကတော့ မသေခင်ကတည်းက အသံမထွက် တော့ပေမဲ့ ၊ယုံကြည်ခြင်းရှိတဲ့သူကတော့ သေသွားရင်တောင်မှ အမြဲတမ်း စကားပြောနေသေးတယ်။

မတ်လ ၁၆ ရက်နေ့

ယုံကြည်သည့်အတိုင်း

“ထို့နောက် ယေရှု​သည် တပ်မှူး​အား“သွား​လော့။ သင်​ယုံကြည်​သည့်​အတိုင်း သင်​၌​ဖြစ်​စေ”​ဟု မိန့်​တော်မူ​၏။ ထို​အချိန်​နာရီ​၌​ပင် သူ​၏​ငယ်သား​သည် ကျန်းမာ​လာ​လေ​၏။” ရှင်မဿဲခရစ်ဝင် ၈:၁၃

အရည်အချင်း ဘယ်လောက်ရှိသလဲ ထက် ယုံကြည်ခြင်း ဘယ်လောက်ရှိသလဲ က ပိုအရေးကြီးတယ်။ အရည်အချင်းကိုကြည့်တဲ့ ဘုရားမဟုတ်ဘူး ။ ယုံကြည်ခြင်းကိုကြည့်တဲ့ဘုရား။ လူတချို့က အရည်အချင်းရှိရဲ့သားနဲ့၊ ကြိုးစားရဲ့သားနဲ့ ဘာလို့များ အသက်တာမှာ မထူးခြားရသလဲ လို့ မေးခွန်းထုတ်နေကြတယ်။ ဘုရားနဲ့အလုပ်လုပ်တဲ့အခါမှာ ဘုရားက ဘာကိုကြည့်သလဲ ? ဘာကိုတောင်းဆိုသလဲ ဆိုတာကို မသိကြဘူး။ ဘုရားက ကြိုးစားတဲ့အတိုင်း ဖြစ်စေတာမဟုတ်ဘူး။ အရည်အချင်းရှိတဲ့အတိုင်း ကောင်းကြီးပေးတာမဟုတ်ဘူး။ ယုံကြည်ခြင်းရှိတဲ့အတိုင်း ဖြစ်စေတာ ကို ဘယ်တော့မှ မမေ့နဲ့။

မတ်လ ၁၄ ရက်နေ့

ယုံကြည်ခြင်း အားနည်းသောသူ

“ယုံကြည်​ခြင်း​အားနည်း​သော​သူ​တို့၊ ယနေ့​ရှင်သန်​လျက်​ရှိ​သော်လည်း မနက်ဖြန်​မီးဖို​ထဲသို့​ပစ်ချ​ခံရ​မည့် တော​မြက်​ပင်​ကို​ပင် ဘုရားသခင်​သည် ဤမျှလောက်​ဆင်ယင်​ပေး​တော်မူ​လျှင် သင်​တို့​ကို ပို၍​ကောင်းစွာ​ဆင်ယင်​ပေး​တော်မူ​လိမ့်မည်​မ​ဟုတ်​လော။”‭‭ရှင်မဿဲခရစ်ဝင်‬ ‭၆:၃၀

ဘုရားသခင်က လမ်းဘေးက တောမြက်ပင်ကိုတောင် ရှောလမုန် မင်းကြီးဝတ်ရုံထက် ပိုကောင်းတဲ့ အရာနဲ့ဆင်မြန်းပေးတယ်။ ယုံကြည်ခြင်းအားနည်းသောသူတွေက စား၊ဝတ်နေရေးအတွက် စိုးရိမ်ပူပန်နေတယ်။ တချို့က အကောင်းဆုံး အဝတ်တွေ၊ အစားအစားတွေစားဖို့ ကိုယ်နဲ့မတန်ဘူးလို့ စဉ်းစားနေတယ်။ ယုံကြည်ခြင်း အားနည်းခြင်းရဲ့လက္ခဏာ ထဲကတစ်ခုက စားဝတ်နေရေးအတွက် စိုးရိမ်တာပါ။ ယုံကြည်ခြင်းရှိလာရင်တော့ ဘုရားလုပ်ပေးမယ့်အရာကို အကောင်းဆုံး စိတ်ချပြီးတော့ ဘယ်အခြေအနေမှာမဆို ဖြတ်ကျော်နိုင်မယ်။

မတ်လ ၁၃ ရက်နေ့

ယုံကြည်ခြင်း အားနည်းတဲ့အခါ

“ထိုအခါ ယေရှု​သည် ချက်ချင်း​လက်​တော်​ကို​ဆန့်​၍ သူ့​ကို​ကိုင်ဆွဲ​ကာ“ယုံကြည်​ခြင်း​အားနည်း​သော​သူ၊ အဘယ်ကြောင့် သံသယ​ဖြစ်​သနည်း”​ဟု မိန့်​တော်မူ​၏။” ရှင်မဿဲခရစ်ဝင် ၁၄:၃၁

သံသယတွေနဲ့ရှေ့ဆက်နေတုန်းလား? ယုံကြည်ခြင်းမှာ အကယ်လို့သာဆိုတဲ့ ဒုတိယ အစီအစဉ်မရှိဘူး။ သံသယတွေဟာ အမြဲတမ်း ယုံကြည်တဲ့အတိုင်း မဖြစ်ခဲ့ရင်ဆိုတဲ့ ဒုတိယအစီအစဉ်ကို အမြဲစွဲထားတယ်။ ပေတရု ယေရှုထံကို သွားဖို့ ရေပေါ်လမ်းလျှောက်တဲ့အခါမှာ သံသယတွေက သူ့ရင်ထဲကို ဝင်လာတယ်။ သူရေနစ်တာဟာ အပြင်မှာရှိတဲ့ ရေကြောင့်မဟုတ်ဘူး၊ သူ့ရဲရင်ထဲမှာ ရှိတဲ့သံသယကြောင့်ပါ။ ရေနစ်လဲ ဘာဖြစ်သေးလဲ ငါးဖမ်းသမားပဲ ရေကူးပြန်မှာပေါ့လို့ တွေးကောင်းတွေးမယ်။ ယေရှုခွင့်မပြုဘူး လှမ်းဆွဲတယ်၊ ပြီးတော့ အတူတူ လှေပေါ်ကို လမ်းလျှောက် ပြန်တယ်။

မတ်လ ၁၂ ရက်နေ့

မယုံကြည်မူကြောင့်သာ

“ကိုယ်တော်​သည် သူ​တို့​၏​မ​ယုံကြည်​မှု​ကြောင့် ထို​နေရာ​၌ များစွာ​သော​တန်ခိုး​လက္ခဏာ​တို့​ကို ပြု​တော်​မ​မူ​ခဲ့​ပေ။” ရှင်မဿဲခရစ်ဝင် ၁၃:၅၈

ဘုရားကအရာခပ်သိမ်းကို တတ်စွမ်းနိုင်တယ်။ အရာအားလုံးကို လုပ်ပေးခြင်တယ်။ မယုံကြည်တဲ့အခါမှာ တော့ ဘုရားဘာမှ လုပ်ပေး တော့မှာ မဟုတ်ပါဘူး။ လူတချို့ အသက်တာမှာ ဘုရားတန်ခိုးတော် နှင့် နိမိတ်လက္ခဏာ မမြင်တွေ့ရတဲ့အခါမှာ ဘုရား အလုပ်မလုပ်တော့ဘူးလို့ထင်နေတတ်ကြတယ်။ တကယ်တော့ မယုံကြည်နိုင်ခြင်းကြောင့်ပါ။ မယုံကြည်ခြင်းက ဘုရားလုပ်မယ့်အရာတွေကို ဆီးတားပစ်လိုက်တယ်။ အကြီးဆုံး အပြစ်ကလဲ မယုံကြည်ခြင်းပဲ ဖြစ်သလို၊ မယုံကြည်ခြင်းကပဲ သင့်ဘဝရဲ့ ကောင်းတဲ့ အရာတွေအားလုံးကို ဆီးတားပစ်လိုက်နိုင်တယ်။

မတ်လ ၁၁ ရက်နေ့

ထိမ်ဝှက်ထားတဲ့အရာတွေကို ထုတ်ဖေါ်တဲ့ကာလ

“ထို​သို့​သော​အား​ဖြင့် ပ​ရော​ဖက်​စ​ကား​ဟူ​မူ​ကား၊ ငါ​သည်​နှုတ်​ကို​ဖွင့်၍ ဥ​ပ​မာ​များ​ကို​မြွက်​ဆို​အံ့။ က​မ္ဘာ​ဦး​မှ​စ၍ ထိမ်​ဝှက်​သော​အ​ရာ​တို့​ကို ဖော်​ပြ​ပေ​အံ့​ဟု ဟော​ဖူး​သော​စ​ကား​သည် ပြည့်​စုံ​ခြင်း​သို့ ရောက်​သ​တည်း။-” ရှင်မဿဲ ၁၃:၃၅

တစ်ချိန်တုံးက ဖုံးကွယ်ထားတဲ့အရာတွေ၊ လူတွေ မသိတဲ့အရာတွေကို ဒီခေတ်ကာလမှာ အကုန်လုံးရှင်းလင်းစွာသိခွင့်၊ နားလည်ခွင့်ရလာကြတယ်။ အပြင်လောကမှာပဲ မဟုတ်ဘူး၊ ဝိညာဉ်လောကမှာလဲ နက်နဲတဲ့အရာတွေကို သန့်ရှင်းသောဝိညာဉ်တော်အားဖြင့် ဆာငတ်တဲ့သူတွေ သိခွင့် နားလည်ခွင့်ရလာကြတယ်။ ဘယ်လောက် ကြီးမားတဲ့အခွင့်အရေးလဲ? သိချင်တယ်ဆိုရင် သိခွင့်ရတဲ့ခေတ်ကြီးထဲမှာ ရှင်သန်ခွင့်ရပြီးတော့ ဘာမှမသိတဲ့ လူတွေထဲမှာ မပါမိစေနဲ့။ ဘဝမှာ ဆုံးရှုံးမှုထဲမှာ အကြီးဆုံးက နက်နဲတဲ့အရာတွေကို သိခွင့်မရခြင်းပဲ။

မတ်လ ၁၀ ရက်နေ့

ပေါ့သေးသေးတော့ မဟုတ်ဘူး

“အ​ခြား​သော​ဥ​ပ​မာ​စ​ကား​ကို မိန့်​မြွက်​တော်​မူ​သည်​ကား၊ ကောင်း​ကင်​နိုင်​ငံ​တော်​သည် လယ်၌​စိုက်​သော မုန်​ညင်း​စေ့​နှင့်​တူ၏။-” ရှင်မဿဲ ၁၃:၃၁

ကောင်းကင်နိုင်ငံတော်ဟာ လယ်မှာစိုက်တဲ့မုန်ညင်းစေ့နဲ့တူတယ်။ လူတွေကို နားလည်အောင် သခင်ယေရှုက ဉပမာနဲ့ရှင်းပြတယ်။ ကောင်းကင်နိုင်ငံတော်ကို နားမလည်ရင်၊ ကောင်းကင်နိုင်ငံတော်ရဲ့ အလုပ်လုပ်ပုံကို နားမလည်ရင် ဘုရားပေးချင်တဲ့ ကောင်းကြီးကို မြင်တွေ့ခံစားရမှာ မဟုတ်ဘူး။ လယ်မှာစိုက်တဲ့ မျိုးစေ့ဟာ သေးသေးလေး ဆိုပေမဲ့ အထင်သေးလို့တော့မရဘူး။ မုန်ညင်းစေ့ဟာ အစေ့တကာထဲမှာ အသေးဆုံးဆိုပေမဲ့ ယုံကြည်ခြင်းသာ ဒီပမာဏလောက်ရှိရင် တောင်ကြီးတွေကို ရွှေ့ပစ်နိုင်တယ်။ နောက် အပင်ပေါက်ပြီးတော့ အကိုင်းတွေအရွက်တွေထွက်လာရင် ငှက်ပေါင်းများစွာကို အမှီပြုလို့ရတဲ့ နေရာဖြစ်လာစေနိုင်တယ်။ ကောင်းကင်နိုင်ငံ သင့်အထဲမှာ တည်ဆောက်နေတယ်ဆိုရင်၊ သင်သာ ဘုရားနိုင်ငံတော်ထဲမှာ တည်ဆောက်နေတဲ့သူ ဖြစ်တယ်ဆိုရင် သေချာပေါက် ကြီးထွားမယ်၊ သေချာပေါက် များစွာသောသူတွေအတွက် နားခိုလို့ရတဲ့ နေရာဖြစ်လာမယ်။ မုန်ညင်းစေ့ ဘဝမှာ ငှက်တွေရဲ့အစာဖြစ်ခဲ့ပေမဲ့၊ မုန်ညင်းပင်ဘဝမှာတော့ ငှက်တွေရဲ့ နားခိုစရာ ဖြစ်လာတယ်။

မတ်လ ၉ ရက်နေ့

ကောင်းကင်နိုင်ငံတော်ဆိုတာ

“ကိုယ်တော်​သည် အခြား​သော​ပုံ​ဥပမာ​ကို​ပေး​၍ သူ​တို့​အား မြွက်ဆို​တော်မူ​သည်​မှာ“ကောင်းကင်​နိုင်ငံ​တော်​သည် ကောင်း​သော​မျိုးစေ့​ကို မိမိ​စိုက်ခင်း​၌ ကြဲ​သော​သူ​နှင့်​တူ​၏။” ရှင်မဿဲခရစ်ဝင် ၁၃:၂၄

လူတွေတွေးထင်ပြီးတော့ စိတ်ကူးပုံဖေါ်နေတဲ့ ကောင်းကင်နိုင်ငံနှင့် တကယ့် ကောင်းကင်ဘုံက လုံးဝမတူဘူး။ မှန်ကန်တဲ့ အရာကိုသိဖို့ သခင်ယေရှုက ပုံဉပမာ အဖြစ်ပျက်တွေအားဖြင့် လူတွေကို သင်ပေးတယ်။ ကောင်းကင်နိုင်ငံတော်က ဘာနဲ့တူသလဲဆိုရင် ကောင်းသောမျိုးစေ့ကြဲတဲ့ လယ်ပိုင်ရှင်နဲ့တူတယ်။ သူ့မှာ လယ်ရှိတယ်၊ မျိုးစေ့ရှိတယ်။ ဒီလိုပဲ ရန်သူလဲရှိပြီးတော့ ရန်သူ့ရဲ့ မကောင်းတဲ့မျိုးစေ့လဲ သူနဲ့အတူ လိုက်ကြဲခြင်းခံရတယ်ဆိုတာ တွေ့ရတယ်။ ဘယ်လောက်အံ့ဩဖို့ကောင်းသလဲဆိုရင် လယ်ပိုင်ရှင်က ရိတ်သိမ်းခြင်းအထိစိတ်ရှည်ရှည်ထားပြီးတော့ စောင့်တယ်။ ရိတ်သိမ်းခြင်းက ကောင်းသောမျိုးစေ့နဲ့ တောမျိုးစေ့ကို ခွဲခြားလိုက်တဲ့ အကြီးမားဆုံး အခိုက်အတန့်ဖြစ်တယ်။ ကျန်တဲ့အချိန်မှာ အားလုံးနီးပါးတူပေမဲ့ ရိတ်သိမ်းချိန်မှတော့ လုံးဝတူမှာ မဟုတ်တော့ဘူး။

မတ်လ ၇ ရက်နေ့

ပြောင်းလဲဖို့အတွက် အရေးကြီးတဲ့ အရာများ

“အကြောင်းမူကား ဤ​လူ​တို့​၏​စိတ်နှလုံး​သည် ထုံထိုင်း​လျက်​၊ နား​သည်​လည်း လေး​လျက်​၊ မျက်စိ​သည်​လည်း ပိတ်​လျက်​ရှိ​ကြ​၏။ သို့မဟုတ်​လျှင် သူ​တို့​သည် မျက်စိ​ဖြင့်​မြင်​လျက်၊ နား​ဖြင့်​ကြား​လျက်​၊စိတ်နှလုံး​ဖြင့်​နားလည်​ကာ ပြောင်းလဲ​ကြ​သဖြင့် ငါ​သည် သူ​တို့​ကို​ကျန်းမာ​စေ​ရ​မည်’ဟူ၍​ဖြစ်​၏။” ရှင်မဿဲခရစ်ဝင် ၁၃:၁၅

အသက်တာမှာ ပြောင်းလဲတိုးတက်ဖို့အတွက် အရေးကြီးတဲ့ အဆင့်တွေရှိတယ်။ ဘုရားရဲ့တန်ခိုးတော်ကို အသက်တာမှာ ခံစားရဖို့နှင့် ကြီးမားတဲ့အပြောင်းအလဲတွေအတွက် လိုအပ်တဲ့အရာတွေကို သိမြင်ဖို့ အရေးကြီးတယ်။ စိတ်နှလုံးသား ထုံထိုင်းခြင်းက ဘုရားထံက ကြီးမားတဲ့အရာတွေကို လက်ခံရရှိဖို့ ကာစီးထားတယ်။ နားနှင့်မျက်စ်ိပိတ်ခြင်းကြောင့် နှလုံးသားမှာ ကြီးမားတဲ့သက်ရောက်မှုရှိတယ်။ ဘုရားအသံကြားမယ်၊ ဘုရားပြတဲ့ ရူပါရုံကိုမြင်တတ်မယ်ဆိုရင် နှလုံးသားက နားလည်နိုင်တဲ့ ပညာနဲ့ပြည့်ဝလာမှာဖြစ်ပြီးတော့ ဘဝမှာ မပြောင်းလဲနိုင်တာတွေကနေ ကြီးမားတဲ့ပြောင်းလဲမှုတွေအဖြစ် မြင်တွေ့ရမယ်။

မတ်လ ၆ရက်နေ့

အလွန်ကို အခွင့်အရေးရသော မျိုးဆက်များ

“သင်​တို့​အား ငါ​အမှန်​ဆို​သည်​ကား များစွာ​သော​ပရောဖက်​တို့​နှင့် ဖြောင့်မတ်​သော​သူ​တို့​သည် သင်​တို့​မြင်​နေ​ရ​သော​အရာ​တို့​ကို​မြင်​ရ​ရန်အလွန်​အလို​ရှိ​သော်လည်း မ​မြင်​ခဲ့​ရ​ကြ​ပေ။ သင်​တို့​ကြား​နေ​ရ​သော​အရာ​တို့​ကို​ကြား​ရ​ရန် အလွန်​အလို​ရှိ​သော်လည်းမ​ကြား​ခဲ့​ရ​ကြ​ပေ။” ရှင်မဿဲခရစ်ဝင် ၁၃:၁၇

လူများစွာက ကျမ်းစာဖတ်ပြီးတော့ ကျမ်းစာထဲက ခေါင်းဆောင်ကြီးတွေကို အားကျနေကြတယ်။ ထူးထူးဆန်းဆန်း တန်ခိုးပြခဲ့တာတွေ၊ ကြီးမားတဲ့အောင်ပွဲ ရရှိခဲ့တာတွေကို ကြည့်ပြီးတော့ သူတို့ခေတ်က ငါတို့လဲရှိခဲ့ရင်၊ အဲ့ဒီလို အချိန်မျိုးမှာ ရှင်သန်ခွင့်ရရင် ကောင်းမှာပဲ​တွေးမိနေကြတယ်။ တကယ်တော့ အဖြစ်မှန်က အဲ့လိုမဟုတ်ဘူး။ သူတို့က လက်ရှိခေတ်ကာလမှာ ရှင်သန်ခွင့်ရတဲ့ သူတွေကို အားကျနေရတာ။ သူတို့ အလွန်အလိုရှိတဲ့ ကြားချင်တဲ့ အရာ၊မြင်ချင်တဲ့အရာတွေကို အခွင့်အရေးက မရခဲ့ ကြဘူး။ အခုမြင်နေရ ကြားနေရတဲ့အရာတွေနဲ့၊ မကြာခင်ဖြစ်လာမယ့် မြင်ရ ကြားရမယ့်အရာတွေက ခေတ်အဆက်ဆက်က သူတွေမြင်ချင်ကြားချင် ကြုံချင်တဲ့အရာတွေပဲ။

မတ်လ ၅ ရက်နေ့

ဘယ်လို နှလုံးသားမျိုးလဲ ?(၄)

“ကောင်း​သော​မြေ​ပေါ်၌ ကြဲ​ခြင်း​ခံရ​သည်​ဆိုသည်မှာ တရား​စကား​ကို​ကြား​၍ လက်ခံ​သဖြင့် အဆ​သုံးဆယ်၊ အဆ​ခြောက်ဆယ်၊ အဆ​တစ်ရာ အသီး​သီး​သော​သူ​တို့​ကို​ဆို​လို​၏”​ဟု မိန့်​တော်မူ​၏။” ရှင်မာကုခရစ်ဝင် ၄:၂၀

လက်ခံ တတ်သော နှလုံးသား

တရားစကားကို လူတိုင်း ကြားပါတယ်၊ ဒါပေမဲ့ လူတိုင်းကတော့ ကိုယ့်ဘဝအတွက် ဖြစ်တယ်ဆိုတာ လက်ခံဖို့တော့ခက်ပါတယ်။ အဆပေါင်းများစွာ တိုးပွါးတယ်ဆိုတာက နှလုံးသားရဲ့အရေးကြီးတဲ့လုပ်ရပ်ပါပဲ။ နှလုံးသားရဲ့လက်ခံနိုင်မှုကဆပွါးတိုးပွါးမူကို ဆုံးဖြတ်ပါတယ်။ နားလည်လက်ခံနိုင်ခြင်းကပဲ သင့်ဘဝရဲ့ တိုးပွါးခြင်းကို သတ်မှတ်ပါလိမ့်မယ်။ အကြိမ်ပေါင်းများစွာ ဘုရားစကားကိုကြားပေးမဲ့၊ ကိုယ့်ဘဝအတွက် မတိုးပွါးဘူးဆိုတာက ဘုရားစကားဘက်မှာ လိုအပ်ချက်ရှိလို့မဟုတ်ပါဘူး။ ကိုယ့်နှလုံးသားရဲ့ နှုတ်ကပတ်တော်အပေါ်မှာထားတဲ့ လက်ခံခြင်းကြောင့်ပါပဲ။ ဘယ်တော့မှ နှလုံးသားကို ဘုရားစကားနဲ့ပတ်သက်ပြီးတော့ မပေါ့ဆမိစေနဲ့။

မတ်လ ၄ ရက်နေ့

ဘယ်လို နှလုံးသားမျိုးလဲ ?(၃)

“ဆူးပင်​တို့​တွင် ကြဲ​ခြင်း​ခံရ​သည်​ဆိုသည်မှာ တရား​စကား​ကို​ကြား​သော်လည်း လောကီရေးရာ​၌​စိုးရိမ်​ပူပန်​ခြင်း​နှင့် စည်းစိမ်​၏​လှည့်ဖြား​ခြင်း​တို့​က တရား​စကား​ကို ကာဆီး​ပိတ်ဆို့​သဖြင့် အသီး​မ​သီး​သော​သူ​ကို​ဆို​လို​၏။” ရှင်မဿဲခရစ်ဝင် ၁၃:၂၂

စိုးရိမ်တတ်တဲ့နှလုံးသား

စိုးရိမ်နေလို့ ဘာများဖြစ်လာမလဲ? ဒီမေးခွန်းကိုဖြေရရင် ကောင်းတဲ့အရာတော့ဖြစ်မလာပေမဲ့ မကောင်းတဲ့အရာကတော့ သေချာပေါက်ဖြစ်လာမယ်။ ဘာမကောင်းတာဖြစ်လာမလဲလို့မေးရင် အသက်တာမှာ နှုတ်ကပတ်တော် ကြားပြီးတော့ ကောင်းတဲ့မျိုးစေ့ကနေ ပေါက်လာမယ့်အပင်ရဲ့ အသီးတွေကို မသီးအောင် ဆီးတားတာပါပဲ။ နှုတ်ကပတ်တော်လဲ အမြဲတမ်းကြားနေရတယ်၊ ဒီနှုတ်ကပတ်တော်ကိုလဲ ယုံတယ် ဒါပေမဲ့ အသီးမရှိတာဟာ စိုးရိမ်းခြင်းနှင့် စည်းစိမ်ရဲ့လှည့်ဖြားခြင်းကြားထဲမှာ ပိတ်မိနေလို့ပါ။ စိုးရိမ်ခြင်းကြီးစိုးနေသရွေ့ ဘယ်တော့မှ အသီးကိုတွေ့မြင်ရမှာမဟုတ်ဘူး။

မတ်လ ၃ ရက်နေ့

ဘယ်လို နှလုံးသားမျိုးလဲ ?(၂)

“ကျောက်​ပေါ်၌​ရှိ​သော​သူ​ကား၊ တ​ရား​စ​ကား​ကို​ကြား၍ ဝမ်း​မြောက်​သော​စိတ်​နှင့် ခံ​ယူ​သော်​လည်း စိတ်​နှ​လုံး၌ အ​မြစ်​မ​စွဲ၊ ခ​ဏ​သာ​ယုံ​ကြည်​သ​ဖြင့် စုံ​စမ်း​နှောင့်​ယှက်​ခြင်း​ကို ခံ​ရ​သော​အ​ခါ ဖောက်​ပြန်​သော​သူ​ကို ဆို​လို​သ​တည်း။-” ရှင်လုကာ ၈:၁၃

ဖေါက်ပြန်တတ်တဲ့နှလုံးသား

ဘုရားစကားကိုတော့ နေရာပေးတယ်၊ ယုံတယ်၊ ဝမ်းမြောက်တဲ့စိတ်နှင့် ခံယူပေမဲ့ အမြစ်စွဲတဲ့အထိ မဖြစ်လာဘူး။ အမြစ်စွဲတဲ့အထိ မလုပ်ရင် ရေရှည်အလုပ်ဖြစ်မှာမဟုတ်ဘူး။ တချို့က ယုံကြည်တယ် ဒါပေမဲ့ ခဏပဲယုံကြည်တာ ။ ယုံကြည်ခြင်းက ခဏပဲမရဘူး။ ခဏတာ ယုံကြည်ခြင်းသမားတွေက စုံစမ်းခြင်းတွေ့လာရင် ဖေါက်ပြန်ကြတယ်။ ယုံကြည်ခြင်း မရှိတာ မကောင်းသလို ခဏပဲ ယုံကြည်တာလဲ မကောင်းဘူး။ ဘုရားစကားကို အမြစ်စွဲတဲ့အထိ ဘယ်လိုအခြေအနေ မျိုးမှာမဆို ယုံကြည်ခြင်းနှင့် ဖြတ်ကျော်နိုင်တဲ့သူဖြစ်ဖို့လိုတယ်။

မတ်လ ၂ ရက်နေ့

ဘယ်လို နှလုံးသားမျိုးလဲ ?

“လမ်း၌ အ​စေ့​ကို​ကြဲ​ခြင်း အ​ကြောင်း​အ​ရာ​ကား၊ နိုင်​ငံ​တော်၏ တ​ရား​စ​ကား​ကို​ကြား၍ နှ​လုံး​မ​သွင်း​သည် ရှိ​သော်၊ နတ်​ဆိုး​လာ၍ နှ​လုံး၌​ကြဲ​သော​အ​စေ့​ကို နုတ်​ယူ​တတ်​သည်​ဟု ဆို​လို​သ​တည်း။-” ရှင်မဿဲ ၁၃:၁၉

သူခိုးဝင်လို့ရတဲ့နှလုံးသား

သခင်ယေရှုပြောတဲ့ ဉပမာထဲက မြေ (၄) မျိုးက လူတွေရဲ့နှလုံးသားတွေကို ပုံဆောင်တယ်ဆိုတာ သိပြီးသားဖြစ်မှာပါ။ လမ်းမြေကတော့ နှုတ်ကပတ်တော်ကိုကြားပေမဲ့ နှလုံးသားထဲကို မသွင်းပဲ တစ်ဖက်နားက ကြားပြီး ကျန်တစ်ဖက်နားက ပြန်ထွက်တတ်တဲ့ လူတွေကို ပြောနေတယ်။ ဘယ်တော့မှ ကိုယ့်အတွက်လို့မခံယူဘူး။ ကိုယ့်အသက်တာမှာ ဖြစ်လာမယ်ဆိုတာကိုလဲ မယုံဘူး။ဒါကြောင့် နှလုံးသား ထဲမှာ နေရာပေးခြင်းမရှိလို့ ကြားရုံသက်သက် ပဲဖြစ်တဲ့အတွက် နတ်ဆိုးက ကြားသမျှ တရားစကားတွေကို ဝင်ယူသွားတယ်။ နှုတ်ကပတ်တော်တွေတော့ နားထောင်နေပေမဲ့ အသက်တာမှာ နေရာမပေးရင်၊ ကိုယ့်အတွက် လက်တွေ့ အသုံးပြုခြင်း၊ ဆင်ခြင်အောက်မေ့ခြင်းမရှိရင် ကြားသမျှ အားလုံးက ယုံကြည်ခြင်းမဖြစ်ပဲ အလကား ဖြစ်သွားပါလိမ့်မယ်။

ဖေဖေါ်ဝါရီလ ၂၈ ရက်နေ့

ဘာကြောင့် ဧသော ကောင်းကြီး မရခဲ့သလဲ ?(၂)

“သင်​တို့​သိ​သည်​အ​တိုင်း၊ ဧ​သော​သည် နောက်​မှ ကောင်း​ချီး​မင်္ဂ​လာ​ကို အ​မွေ​ခံ​ခြင်း​ငှာ အ​လို​ရှိ​သော​အ​ခါ၊ ငြင်း​ပယ်​ခြင်း​ကို​ခံ​ရ၏။ မျက်​ရည်​ကျ၍ ကောင်း​ချီး​မင်္ဂ​လာ​ကို အ​လွန်​ရှာ​သော်​လည်း၊ မိ​မိ​အ​ဘ၏ စိတ်​ပြောင်း​လဲ​ခြင်း အ​ခွင့်​ကို မ​တွေ့​မ​ရ။” ဟေဗြဲ ၁၂:၁၇

နောက်ကျတယ်ဆိုတာ မကောင်းဘူးဆိုတာ လူတိုင်း သိပါတယ်။ အထူးသဖြင့် ဝိညာဉ်ရေးရာမှာ နောက်ကျခြင်းပါ။ ဧသောက နောက်ကျမှ ကောင်းကြီးမင်္ဂလာကို လိုချင်ခဲ့တယ်။ ပထမတုန်းကတော့ သူ့အတွက် ဘာမှအကျိုးမရှိဘူးဆိုပြီး မလိုချင်ခဲ့ဘူး။ နောက်ကျမှ လိုချင်ခဲ့ပေမဲ့ ငြင်းပယ်ခြင်းခံရတယ်။ ကောင်းကြီး မင်္ဂလာက ဘယ်အချိန် မဆိုရနိုင်တယ်လို့ သင်ထင်နေရင် မှားပါလိမ့်မယ်။ သူ့အချိန် ကျော်လွန်ပြီးမှ လိုချင်ခဲ့ ပေမဲ့ ဝမ်းနည်းခြင်းနဲ့ပဲ ကြုံတွေ့ခဲ့ရတယ်။ မျက်ရည်ဘယ်လောက် ကျကျ ကောင်းကြီးကတော့ ကျမလာခဲ့တော့ဘူး။ အချိန် မလွန်ခင်မှာ ဘုရားနဲ့ဆိုင်တဲ့အရာတွေကို လိုချင်ဖို့ ယူတတ်ဖို့ အင်မတန်အရေးကြီးတယ်။

ဖေဖေါ်ဝါရီလ ၂၇ ရက်နေ့

ဘာကြောင့် ဧသော ကောင်းကြီးမရခဲ့သလဲ?

“ဧ​သော​က၊ ငါ​သေ​လု​ပြီ။ သား​ဦး​အ​ရာ​အား​ဖြင့် အ​ဘယ်​အ​ကျိုး​ရှိ​ပါ​လိမ့်​မည်​နည်း​ဟု​ဆို၏။” ကမ္ဘာဦး ၂၅:၃၂

ရသင့်တဲ့အရာဖြစ်ပေမဲ့ မရခဲ့တာဟာ လိုခြင်စိတ်ပြင်းပြမူ မရှိခြင်းကြောင့်လို့ပဲဆိုရမယ်။ တကယ်ဆိုရင် ကိုယ်က အရင်ဆုံးရသင့်သူဖြစ်ပေမဲ့ နောက်ကလူဖြစ်တဲ့ ယာကုပ်လောက် သားဉီးအရာနဲ့ဆိုင်တဲ့ကောင်းကြီးကို လိုချင်စိတ် မပြင်းပြခဲ့ဘူး။ ဒါကြောင့်လဲ​အသက်ကြီးပြီ၊ သေတော့မယ် ဒါတာမရတာ ဘာများအကျိုးရှိမှာလဲလို့ မေးခွန်းထုတ်ခဲ့တယ်။ တကယ်တော့ဒီကောင်းကြီးမင်္ဂလာဟာ ကိုယ့်အသက်တာပဲမဟုတ်ဘူး သမိုင်းတစ်ခုလုံး၊ သားစဉ်မြေးဆက်ပေါင်းများစွာကို ပြောင်းလဲစေမယ်၊ ထူးခြားစေမယ်ဆိုတာကို ဧသော တကယ်မမြင်နိုင်ခဲ့ဘူး။ ဒါကြောင့် ကြီးမားတဲ့ဆုံးရှုံးမှုကြီးရင်ဆိုင်ခဲ့ရတယ်။ ပါးစပ်နားရောက်မှ ပုတ်ချခဲ့ရတဲ့အဖြစ် လို့ပဲပြောရမယ်။ ဘယ်လောက်ကောင်းတဲ့အရာပဲဖြစ်ဖြစ် မလိုချင်ရင်တော့ ဘာမှထူးခြားလာမှာမဟုတ်ဘူး။

ဖေဖေါ်ဝါရီလ ၂၆ ရက်နေ့

ကောင်းကြီးမခံရတဲ့ဧသော ဘာတွေဆုံးရူံးခဲ့သလဲ? (၂)

“သင်​သည် ဓား​ဖြင့်​အသက်မွေး​၍ သင့်​ညီ​ထံ၌​အစေခံ​ရ​လိမ့်မည်​။ သို့သော် သင်​ရုန်းကန်​သော​အားဖြင့် သူ​၏​ထမ်းပိုး​ကို သင်​၏​လည်ပင်း​မှ​ချွတ်​နိုင်​လိမ့်မည်​”​ဟု ဆို​လေ​၏​။” ကမ္ဘာဦးကျမ်း ၂၇:၄၀

ကောင်းကြီးရရှိဖို့ လက်လွတ်ခဲ့ရတဲ့ ဧသောက ကောင်းတဲ့အရာတွေအားလုံးလက်လွတ်ခဲ့ရရုံသာမကဘူး၊ ကြိုးစားရုန်းကန်ပြီးကိုယ့်ဟာကိုယ်ကာကွယ်၊ ကိုယ့်အစွမ်းအစနဲ့ ရပ်တည်အသက်ရှင်ဖို့ဖြစ်လာတယ်။ ထမ်းပိုးလည်ပင်းကနေလွတ်ဖို့အတွက် သူဟာ မနားမနေ ကြိုးစားရုန်းကန်နေရဖို့လိုတယ်။ ဒီအရာကိုကြည့်တဲ့အခါမှာ တချို့သော ယုံကြည်သူတွေကို ပြေးမြင်မိတယ်။ သူတို့ဘဝ ရပ်တည်ဖို့အတွက် မရပ်မနားကြိုးစားနေတာတောင်မှ ရပ်တည်ဖို့ မလွယ်ဘူး။ ကြိုးစားရင်တော့ သက်သာမယ်ဆိုပေမဲ့ ညီထံမှာ အစေခံဖို့ကတော့ ပြေးလို့မလွတ်ပြန်ဘူး။ ဘုရားပေးတဲ့ကောင်းကြီးမရတာ ဧသောဘဝတစ်ခုလုံးက ခက်ခဲကြမ်းတမ်းပြီး အလွန်ရုန်းကန်ရတဲ့ အသက်တာဖြစ်လာတယ်။ ကောင်းကြီး ခံစားရတဲ့ဘဝအသက်တာဟာ ဘယ်လောက်တောင် ကောင်းသလဲ ဆိုတာ ဒီအရာအားလုံး မြင်တွေ့နိင်တယ်။

ဖေဖေါ်ဝါရီလ ၂၅ ရက်နေ့

ကောင်းကြီးမခံရတဲ့ဧသော ဘာတွေဆုံးရှုံးခဲ့သလဲ?

“သူ​၏​ဖခင်​ဣဇက်​က​လည်း “​ကြည့်ရှု​လော့​။ သင်​နေထိုင်​ရာ​အရပ်​သည် မြေကြီး​အဆီအနှစ်​နှင့်​လည်းကောင်း​၊ အထက်​မိုးကောင်းကင်​နှင်း​နှင့်​လည်းကောင်း ဝေးကွာ​လိမ့်မည်​။” ကမ္ဘာဦးကျမ်း ၂၇:၃၉

နေတဲ့နေရာက ဘယ်လောက်‌ကောင်းကောင်း ဧသောအတွက်တော့ ဘယ်တော့မှ ကောင်းတာတွေဖြစ်လာတော့မှာ မဟုတ်ဘူး။ ဝိညာဉ်ရေးရာ ကောင်းကြီးရော၊ မြေကြီးနဲ့ဆိုင်တဲ့ ကောင်းကြီးကပါ ဧသောနဲ့ ဝေးနေလိမ့်မယ်။ ကောင်းတဲ့အရာတွေနဲ့ဘဝမှာနီးတာ ဘုရားပေးတဲ့ကောင်းကြီးကြောင့်ပဲ။ ကောင်းတဲ့အရာတွေဘဝမှာ ပိုင်ဆိုင်ဖို့ဆိုတာ ကိုယ့်ကြိုးစားမှုတစ်ခုထဲနဲ့ မလုံလောက်ဘူး။ ဘုရားကောင်းကြီးပေးခြင်းကိုခံရဖို့ အထူးလိုအပ်တယ်။ ဘုရားကောင်းကြီးမရတဲ့ ဧသောက ကြီးမားတဲ့အရာတွေများစွာဆုံးရှုံးခဲ့ပြီးတော့ ကောင်းတာတွေရဲ့အနီးမှာရှင်သန်ခွင့်မရခဲ့ဘူး။ ဘဝမှာ ကိုယ်ဘယ်နေရာ အရပ်မှာ ရှင်သန်လဲထက် ကိုယ်ရှင်သန်တဲ့ဘဝမှာ ဘယ်အရာတွေက နေရာယူနေသလဲဆိုတာကြည့်ရင် ဘုရားပေးတဲ့ကောင်းကြီး ရသလား? မရဘူးလားဆိုတာ သိနိုင်တယ်။

ဖေဖေါ်ဝါရီလ ၂၄ ရက်နေ့

ကာဣနရဲ့ ကျိန်ခြင်းမှ လွတ်မြောက်ခြင်း

“ကာဣန​က​လည်း “​အကျွန်ုပ်​၏​အပြစ်ဒဏ်​သည် အကျွန်ုပ်​ခံနိုင်​သည်​ထက်​ကြီးလေး​ပါ​၏​။” ကမ္ဘာဦးကျမ်း‬ ‭၄:၁၃

ကာဣနခံရတဲ့ ပြစ်ဒဏ်ဟာ ခံနိုင်တာထက် ပိုနေတယ်။ ဘုရား ပေးတဲ့ ပြစ်ဒဏ်ကို သူရင်ဆိုင်ဖို့ အားမရှိခဲ့ဘူး။ သူ့ရဲ့ အစွမ်းအစနဲ့ ဘယ်လိုမှ ကျော်လွှားနိုင်မှာ မဟုတ်ဘူးဆိုတာ သူသိတယ်။ ကျေးဇူးတော်ကာလမှာတော့ သခင်ယေရှုရဲ့ လုပ်ဆောင်ပေးမှုကြောင့် မခံနိုင်တဲ့ စုံစမ်းခြင်း မကျရောက်ဖို့ ဘုရားက ကတိပေးတယ်။ သင်ကြုံနေရတဲ့ အရာကမခံနိုင်

အောင်ဖြစ်နေတယ်ဆိုရင် ကာဣနရဲ့ အမင်္ဂလာ အသက်တာမှာ ကြုံနေရလို့ဖြစ်တယ်။ လွတ်မြောက်စေတဲ့ သခင်ယေရှုကို ယုံကြည်အားကိုးရင် သေချာတယ် မခံနိုင်တဲ့အရာ ဘာတစ်ခုမှ သင့်အသက်မှာ ကြုံရတော့မှာမဟုတ်ပါ။

ဖေဖေါ်ဝါရီလ ၂၃ ရက်နေ့

အာဒံရဲ့ DNA နှင့် သခင်ယေရူရဲ့DNA

“အကြောင်းမူကား တစ်​ယောက်​သော​သူ​ကျူးလွန်​သည့်​အပြစ်​ကြောင့် သေ​ခြင်း​သည် ထို​သူ​တစ်​ယောက်​အားဖြင့် စိုးမိုး​ခဲ့​လျှင် ကျေးဇူး​တော်​နှင့်​ဖြောင့်မတ်​ခြင်း​၏​ကောင်းချီး​လက်ဆောင်​ကို ကြွယ်ဝ​စွာ​ခံစားရ​သော​သူ​တို့​သည် တစ်​ယောက်​သော​သူ​တည်းဟူသော ယေရှု​ခရစ်တော်​အားဖြင့် အသက်ရှင်​ခြင်း​၌ ပို၍​ပင် စိုးမိုး​ရ​ကြ​လိမ့်မည်။” ရောမဩဝါဒစာ ၅:၁၇

အာဒံဟာ လူသားအားလုံးရဲ့ ပထမဆုံး ဖခင်ပါ။။ သူ့ရဲ့ ကျဆုံးခြင်းရဲ့ အဓိက ပြဿနာက မနာခံခြင်းနှင့် ဝန်မခံခြင်းပါ။ လူတချို့က ဘုရားသားလို့ပြောပေမဲ့ ဘုရားသားရဲ့ DNA မရှိဘူး။ အာဒံရဲ့ DNA ပဲရှိနေသေးတယ်။ သခင်ယေရူ ခရစ်တော်ရဲ့ DNA မှာ နာခံခြင်း နှင့် ဝန်ခံခြင်း က နောက်ဆုံးအချိန်ထိ ရှိတယ်။ အခြေအနေ ကောင်းမှ ပဲ​မဟုတ်ဘူး ။ မကောင်းတဲ့အချိန်တိုင်းလဲ ရှိတယ်။ သင်က ဘုရားသားလို့ပြောပြီးတော့ ဘုရားသားဖြစ်တဲ့ သခင်ယေရူရဲ့ DNA မရှိရင် အာဒံရဲ့ မျိုးရိုးဗီဇထဲမှာပဲ ရှိသေးတယ်။ ဘုရားသားရဲ့ DNA ဆိုရင်သေချာတယ် နာခံခြင်း နှင့် ဝန်ခံခြင်းကို အသက်တာမှာ တွေ့ရပါလိမ့်မယ်။

ဖေဖေါ်ဝါရီလ ၂၁ ရက်နေ့

စိုးရိမ်စရာမရှိတဲ့ဘဝ (၅)

“အို ပြည်​တော်၊ မ​စိုး​ရိမ်​နှင့်။ ဝမ်း​မြောက်​ရွှင်​လန်း​ခြင်း​ရှိ​လော့။ ထာ​ဝ​ရ​ဘု​ရား​သည် ကြီး​သော​အ​မှု​တို့​ကို ပြု​တော်​မူ​မည်။” ‭‭ယောလ‬ ၂း၂၁

ယုံကြည်ခြင်းရဲ့ ရန်သူ တွေထဲက တစ်ခုက စိုးရိမ်ခြင်းပါပဲ။ဘာကြောင့် အသက်တာမှာ စိုးရိမ်ခြင်းက နေရာယူသလဲ ? အဖြေကတော့ ဘုရား ရဲ့ ကြီးမြတ်ခြင်းနှင့် ဘုရားပြုမယ့် ကြီးမြတ်တဲ့အမူကို နားလည်သဘောပေါက်ခြင်း မရှိလို့ပါပဲ။ ကြီးမြတ်တဲ့ ဘုရားကသင့်အတွက် ကြီးမားတဲ့အရာတွေကို ပြုပေးမယ်လို့ ယုံတဲ့သူ အသက်တာမှာ စိုးရိမ်ခြင်းဆိုတာ ရှိလာစရာ မရှိတော့ဘူး။ နေ့စဉ်ဘဝကို ဘုရားပြုပေးတဲ့ ကြီးမားတဲ့အရာတွေကို ခံစားခြင်တယ်ဆိုရင်ဘဝ နေရာယူထားတဲ့စိုးရိမ်ခြင်း ကို ဖယ်လိုက်ပါ။

ဖေဖေါ်ဝါရီလ ၂၀ ရက်နေ့

စိုးရိမ်စရာမလိုတဲ့ဘဝ(၄)

“မည်သည့်​အမှု​ကို​မျှ မ​စိုးရိမ်​ဘဲ အရာရာ​၌ ကျေးဇူး​တော်​ချီးမွမ်း​ခြင်း​နှင့်တကွ ဆုတောင်း​ခြင်း​နှင့်​အသနားခံ​ခြင်း​တို့​ဖြင့် သင်​တို့​တောင်းခံ​လို​သော​အရာ​များ​ကို ဘုရားသခင်​အား သိ​စေ​ကြ​လော့။” ‭‭ဖိလိပ္ပိသြဝါဒစာ‬ ၄း၆

မစိုးရိမ်နဲ့လို့ပဲ ဘုရားက မပြောပါဘူး။ စိုးရိမ်ခြင်းကို ဘယ်လို ဖြတ်ကျော်မလဲ ဆိုတာကို ဘုရားက သေချာသင်ပေးတယ်။ စိုးရီမ်တဲ့ သူ တစ်ယောက်ကအသက်တာမှာ ကြုံသမျှ အတွက် ကျေးဇူးတော်ချီးမွမ်းတတ်ဖို့ ဘုရားက မှာတယ်။ ချီးမွမ်းခြင်းက စိုးရိမ်ခြင်းကို တိုက်ခိုက်တဲ အကောင်းဆုံး လက်နက်ပဲ။ နောက် စိုးရိမ်ခြင်းကို ရင်ဆိုင်ဖို့ ဆုတောင်းခြင်း လိုအပ်တယ်။ စိုးရိမ်တဲ့အရာကို ဘုရားထံမှာ အပ်နှံပြီး ဘုရားလုပ်လာမယ့်အကောင်းဆုံး အရာတွေအတွက် ချီးမွမ်းပါ။ အခြေအနေတိုင်း ကို ဆုတောင်းခြင်း ၊ ချီးမွမ်းခြင်း နဲ့ ဖြတ်ကျော်တယ်ဆိုရင် သေချာတယ် သင်ဟာ စိုးရိမ်စရာမလိုပဲ အသက်ရှင်နိုင်မယ်။

ဖေဖေါ်ဝါရီလ ၁၉ ရက်နေ့

စိုးရိမ်စရာမရှိတဲ့ဘဝ(၃)

“သင်​တို့​ကို​သ​တိ​နှင့် ကြည့်​ရှု​တော်​မူ​သော​ကြောင့်၊ သင်​တို့၌ စိုး​ရိမ်​ခြင်း​အ​မှု​ရှိ​သ​မျှ​တို့​ကို ကိုယ်​တော်၌ အပ်​နှံ​ကြ​လော့။” ‭‭၁ ရှင်ပေတရု‬ ‭၅း၇

သင့်ကို ဘယ်သူက တာဝန်ယူပြီးတော့ ပြုစုစောင့်ရှောက်နေသလဲ ဆိုတာကို မသိရင်တော့ အရာရာဟာ စိုးရိမ်စရာတွေ ချည်းပဲ ဖြစ်လိမ့်မယ်။ အရာခပ်သိမ်းတတ်နိုင်တဲ့၊ အရာအားလုံး ရှိတဲ့ ဘုရားက သင့်ကို ချစ်ပြီး ပြုစုစောင့်ရှောက်နေတယ်။ ဂရုစိုက်နေတယ်။ ၂၄ နာရီ ၇ ရက်လုံး အနားမယူပဲ တာဝန်ယူနေတယ်ဆိုတာ သိလာတဲ့အခါမှာ အရာရာမှာ စိုးရိမ် မူ က နေရာမယူပဲ ဝမ်းမြောက်ခြင်းက နေရာယူလာပါလိမ့်မယ်။

ဖေဖေါ်ဝါရီလ ၁၈ ရက်နေ့

စိုးရိမ်စရာ မရှိတဲ့ဘဝ(၂)

“ထို​သူ​သည်​ကား၊ ရေ​ရှိ​သော​အ​ရပ်၌​စိုက်၍ မြစ်​နား​မှာ အ​မြစ်​ဖြာ​သ​ဖြင့်၊ ပူ​သော​အ​ရှိန်​ရောက်​ကြောင်း​ကို မ​သိ၊ အ​ရွက်​မ​ညှိုး​နွမ်း၊ မိုး​ခေါင်​သော​ကာ​လ၌ စိုး​ရိမ်​စ​ရာ​မ​ရှိ​ဘဲ၊ အ​စဉ်​အ​မြဲ အ​သီး​ကို​သီး​တတ်​သော အ​ပင်​နှင့်​တူ၏။” ယေရမိ‬ ‭၁၇:၈

ဘုရားကို အားကိုးပြီးတော့ ရှင်သန်တဲ့ဘဝမှာ ပူတဲ့အရှိန်ရှိတဲ့ကာလ ကိုလဲ ဖြတ်ကျော်ရနိုင်ပါတယ်။ စိုးရိမ်စရာ ကာလတွေလဲ ကြုံရနိုင်ပါတယ်။ ဒါပေမဲ့ အရင်းအမြစ်ဖြစ်တဲ့ ဘုရားကို အားကိုးပြီး ရှင်သန်တတ်သူ အတွက်တော့ ပူတဲ့အရှိန်ဟာ သူ့ကို မထိခိုက်နိုင်သလို၊ မိုးခေါင်သောကာလတွေကလည်း သူ အသက်တာကို မခြိမ်းခြောက်နိုင်ဘူး။ စိုးရိမ်စရာ တွေ မရှိတာထက် စိုးရိမ် မူကို နေရာမပေးတာပါ။ စိုးရိမ်စရာအားလုံးကို ဖြေရှင်းပေးမယ့် အရင်းအမြစ်ဖြစ်တဲ့ ယေရူ အနားမှာ ရှိနေမှ တော့အချိန်တိုင်းမှာ လိုအပ်တဲ့ အသီး သီးပြီးတော့ စိုးရိမ်စရာ မလိုတဲ့ ဘဝနဲ့ ဖြတ်ကျော် နိုင်မှာ စိတ်ချပါတယ်။

ဖေဖေါ်ဝါရီလ ၁၇ ရက်နေ့

စိုးရိမ်စရာမရှိတဲ့ဘဝ

“မ​စိုး​ရိမ်​နှင့်။ ငါ​သည် သင့်​ဘက်​မှာ​ရှိ၏။ မ​ကြောက်​နှင့်။ သင်၏​ဘု​ရား​သ​ခင် ငါ​သည် သင့်​ကို​ခိုင်​ခံ့​စေ​မည်။ သင့်​ကို စောင့်​မ​မည်။ ငါ့​သ​စ္စာ​လက်​ယာ​လက်​ဖြင့် ထောက်​ပင့်​မည်။” ‭‭ဟေရှာယ‬ ၄၁:၁၀

လူတိုင်းမှာ စိုးရိမ်စရာရှိပါတယ်။ ဒါပေမဲ့ စိုးရိမ်စိတ်ထက် စိတ်ချမှုက အားကြီးလာတဲ့အခါ စိုးရိမ်ခြင်းကို အောင်မြင်လာတယ်။ ပရောဖက်ကြီးအတွက် စိုးရိမ်စရာ အခြေအနေမျိုးကြုံရပေမဲ့ ဘုရားက သူအတူရှိပြီး သူလက်တော်ဟာ အရာရာ ဖြေရှင်းပေးဖို့ ကတိပေးတယ်။ ဒီစိတ်ချမှုဟာ ကြုံရတဲ့ စိုးရိမ်မှုတွေကနေ လွတ်မြောက်စေတယ်။ သင့်ရဲ့ စိတ်ချမှုထက် စိုးရိမ်ခြင်းက်ိုနေရာ ပိုမပေးမိပါစေနဲ့။

ဖေဖေါ်ဝါရီလ ၁၄ ရက်နေ့

တန်ခိုးတော် (၆)

“ငါ​သည်​လည်း တန်ခိုး​တော်​အားဖြင့် ငါ့​အထဲ၌​လုပ်ဆောင်​နေ​သည့် ကိုယ်တော်​၏​လုပ်ဆောင်​မှု​အတိုင်း ထို​အမှု​အတွက် ကြိုးစား​အားထုတ်​နေ​၏။” ‭‭ကောလောသဲဩဝါဒစာ‬ ‭၁:၂၉

ဘဝမှာ ဖြစ်လာသမျှက ကိုယ့် လုပ်ဆောင်နိုင်ခြင်းကြောင့် မဟုတ်ပါဘူး။ လူတွေက ကိုယ်လုပ်နိုင်လို့ အရာခပ်သိမ်းဖြစ်လာတယ်လို့ မှားယွင်းစွာ မယုံမိဖို့လိုတယ်။ လုပ်တိုင်း ဖြစ်နေတာ မဟုတ်ဘူး။ ကောင်းတဲ့အရာတွေဖြစ်လာတယ်ဆိုတာ သင့်အထဲမှာ နေရာယူတဲ့ ဘုရားတန်ခိုးတော်က လုပ်ဆောင်ပေးနေခြင်းကြောင့်ပါ။ဒီတန်ခိုးတော်ကို အသိအမှတ်မပြုရင်၊ သေချာသဘောမပေါက်ရင် တစ်နေ့ သေချာပေါက် ကျရှုံးလိမ့်မယ်။ သင့်အထဲမှာရှိတဲ့ ဘုရားတန်ခိုးတော်ကို သိကျွမ်းလေ ဘဝဟာ အောင်မြင်လေပါပဲ။

ဖေဖေါ်ဝါရီလ ၁၃ ရက်နေ့

တန်ခိုးတော် (၅)

“ထို​သို့ သ​ခင်​ဘု​ရား၏​သာ​သ​နာ​တော်​သည် တန်​ခိုး​နှင့်​တိုး​ပွား၍ အောင်​မြင်​လေ၏။” တမန်တော် ၁၉:၂၀

လူတိုင်းတိုးပွားချင်ကြတယ် ဒါပေမဲ့ ဘယ်လို တိုးပွားနိုင်မလဲဆိုတာကိုတော့ လူတိုင်းကမသိကြဘူး။ ကိုယ့်ခွန်အား နှင့် ကိုယ့်အစွမ်းအစလောက်နဲ့ပဲ လိုချင်တဲ့ တိုးပွားခြင်းနယ်ပယ်ကို ဘယ်တော့မှ မရောက်နိုင်ဘူး။ လိုချင်တဲ့ တိုးပွားခြင်းကို ဘုရားတန်ခိုးတော်ကပဲလုပ်ဆောင်နိုင်တယ်။ ဘုရားတန်ခိုးတော်ကို နေရာမပေးမချင်း သင်လိုချင်တဲ့ တိုးပွားခြင်းကို အသက်တာမှာ ဘယ်တော့မှ မြင်တွေ့ရမှာ မဟုတ်ဘူး။ ဒါကြောင့် ဘုရားရဲ့တန်ခိုးတော်ကို နေရာပေး ပါ၊ တိုးပွားမှုကို မြင်တွေ့ရမယ်။

ဖေဖေါ်ဝါရီလ ၁၂ ရက်နေ့

တန်ခိုးတော် (၄)

“အကြောင်းမူကား ဘုရားသခင်​၏​နိုင်ငံ​တော်​သည် စကား​၌​မ​တည်​ဘဲ တန်ခိုး​၌​တည်​၏။” ၁ ကော ၄:၂၀

လောကနိုင်ငံက ငွေကြေးတွေ၊ လူ့ပညာ အစွမ်းအစတွေနဲ့ တည်ပေမဲ့၊ ဘုရားနိုင်ငံတော်ကတော့ တန်ခိုးမှာပဲ တည်တယ်။ ဘုရားနိုင်ငံတော်ကို တကယ်သဘော ပေါက်ချင်တယ်ဆိုရင် ဘုရားတန်ခိုးတော်ကို အရင်ဆုံး သဘောပေါက်ဖို့လိုတယ်။ ဘုရားနိုင်ငံသားတိုင်းက ဘုရားတန်ခိုးတော်အားဖြင့်ရှင်သန်ပြီးတော့ ဘုရားနိုင်ငံတော်ကိုတည်ဆောက်တယ်။ တန်ခိုးမရှိတဲ့ဘယ်သူကမှ ဘုရားနိုင်ငံတော် တည်ဆောက်ခြင်းမှာ မပါနိုင်ဘူး။ ဘုရားရဲ့တန််ခိုးကို မသုံးဘူး၊ တန်ခိုးကို သဘောမပေါက်သေးဘူး ဆိုရင်သေချာတယ် သင်နိုင်ငံတော်သားဖြစ်ခြင်းကို နားမလည်သေးဘူး။

ဖေဖေါ်ဝါရီလ ၁၁ ရက်နေ့

တန်ခိုးတော် (၃)

“ဤသည်ကား သင်​တို့​၏​ယုံကြည်​ခြင်း​သည် လူ​တို့​၏​ဉာဏ်ပညာ​၌​မ​တည်​ဘဲ ဘုရားသခင်​၏​တန်ခိုး​တော်​၌​တည်​မည့်​အကြောင်း​တည်း။” ၁ ‭‭ကော‬ ‭၂း၅

သာဘာဝလွန် တန်ခိုးတော်က သာဘာဝလွန် ယုံကြည်ခြင်းကို တည်ဆောက်ပေးတယ်။ တချို့သောသူတွေက ဘုရားရဲ့တန််ခိုးတော်ကို မသိသလို၊ သုံးလဲမသုံးကြဘူး။ ဘုရားတန်ခိုးတော်ကို သိပြီးတော့ နေ့စဉ် အသက်တာမှ အသုံးပြုတဲ့သူကတော့ သေချာတယ် ဘဝက အခြားသူတွေနဲ့ လုံးဝကို တူမှာမဟုတ်ဘူး။ ဘုရားနှစ်သက်တဲ့ ယုံကြည်ခြင်းမျိုးကိုလဲ အသက်တာမှာရနိုင်မယ်။ ယုံကြည်ခြင်းကိုတည်ဆောက်ပေးတဲ့အထဲမှာ ဘုရားရဲ့တန်ခိုးတော်ကလဲ တစ်ခုအပါအဝင်ဖြစ်တယ်။

ဖေဖေါ်ဝါရီလ ၁၀ ရက်နေ့

တန်ခိုးတော် (၂)

“‘အို ဘုရားရှင်​ထာဝရဘုရား​၊ ကိုယ်တော်​သည် ကြီးမား​သော​တန်ခိုး​နှင့် လက်ရုံး​တော်​ကို​ဆန့်​လျက် ကောင်းကင်​နှင့်​မြေကြီး​ကို ဖန်ဆင်း​တော်မူ​ပြီ​။ ကိုယ်တော်​အတွက် ခက်ခဲလွန်း​သော​အမှု​တစ်စုံတစ်ခု​မျှ​မ​ရှိ​ပေ​။” ယေရမိအနာဂတ္တိကျမ်း‬ ‭၃၂:၁၇

ကိုယ့်ခွန်အားကို အမှီပြုပြီး ရှင်သန်တဲ့သူနဲ့ ဘုရားတန်ခိုးတော်ကို အမှီပြုပြီးတော့ ရှင်သန်နေတဲ့သူ ဘာကွာခြားသလဲ? ကိုယ့်ရဲ့ခွန်အားက အခက်အခဲတစ်ချို့ကို ဖြေရှင်းကောင်းဖြေရှင်းနိုင်ပေမဲ့ ဘုရားတန်ခိုးတော်က အခက်ခဲတိုင်းကို ဖြေရှင်းပေးနိုင်တယ်။ လူတွေက တချို့သော အခက်အခဲတွေကို မဖြေရှင်းနိုင်ဘူးလို့တွေးတာဟာ ဘုရားတန်ခိုးတော်ကို နက်ရှိုင်းစွာ မယုံကြည်နိုင်သေးလို့ပါ။ ဘုရားတန်ခိုးတော်ကို စိတ်ချတဲ့သူအဖို့ မကျော်လွန်နိုင်တဲ့အခက်အခဲဆိုတာ ရှိကိုမရှိဘူး။

ဖေဖေါ်ဝါရီလ ၉ ရက်နေ့

တန်ခိုးတော်

“ငါ​တို့​ထဲ၌ သက်ဝင်​လှုပ်ရှား​နေ​သော​တန်ခိုး​တော်​အားဖြင့် ငါ​တို့​တောင်းလျှောက်​သော​အရာ​၊ သို့မဟုတ် ဆင်ခြင်​သော​အရာ​အားလုံး​တို့​ထက် သာလွန်​ထူးခြား​စွာ​ပြု​နိုင်​သော​အရှင်​၌” ဧဖက်ဩဝါဒစာ‬ ‭၃:၂၀

ကိုယ်လုပ်နိုင်တာထက်၊ ကိုယ့်မှာရှိတဲ့အစွမ်းအစထက် ဘုရားရဲ့တန်ခိုးတော်က အများကြီး တတ်စွမ်းနိုင်တယ်။ ကိုယ့်ခွန်အား အစွမ်းအစနဲ့ မရောက်နိုင်တဲ့ နယ်ပယ်၊ မရနိုင်တဲ့အရာတွေကို ဘုရားတန်ခိုးတော်က အမြဲတမ်းရယူပေးနိုင်တယ်၊ ပို့ဆောင်ပေးနိုင်တယ်။ လူတစ်ယောက်ရဲ့ဘဝက ကိုယ့်အစွမ်းအစနဲ့ပဲ အသက်ရှင်သလား? ဘုရားတန်ခိုးတော်နှင့်ရှင်သန်သလားဆိုတာကို သူ့ဘဝရဲ့ရလဒ်တွေကို ကြည့်ရင် သိနိုင်တယ်။ လုပ်နိုင်သလောက်ပဲ​ရနေသလား? ကိုယ်လုပ်နိုင်တာ ထက်ပို ခံစားနေရသလား? ဆိုတာ ဘယ်အပေါ်မှာ ရှင်သန်နေသလဲဆိုတာကို အဖြေထုတ်ပေးတယ်။

ဖေဖေါ်ဝါရီလ ၇ ရက်နေ့

မျက်မှောက်တော်ရဲ့အကျိုး (၆)

“ငါ​ကိုယ်​တိုင်​သွား၍ ငြိမ်​ဝပ်​ခြင်း​ချမ်း​သာ​ကို​ပေး​မည်​ဟု မိန့်​တော်​မူ၏။” ထွက်မြောက်ရာ‬ ‭၃၃:၁၄

ဘုရားမျက်မှောက်တော်ပါတာနဲ့ မပါတာ ဘာများကွာခြားမယ်လို့ထင်ပါသလဲ? လူတချို့က သူတို့နဲ့ဘုရားမျက်မှောက်တော်ပါသလား? မပါသလားဆိုတာ အခုထိ ဇဝေဇဝါဖြစ်နေတုန်းပဲ။ ဘုရားက ဣသရေလ လူမျိုးတွေ​ ခါနန်ပြည်ဝင်တဲ့အခါမှာ သူ့ရဲ့ကောင်းကင်တမန်ကိုပဲ စေလွှတ်ပြီးတော့ သူမပါတော့ဘူးလို့ပြောတဲ့အခါမှာ မောရှေက ဘုရားမပါပဲ ခြေတစ်လှမ်းတောင် မလှမ်းဖို့ဆုံးဖြတ်ခဲ့တယ်။ ဘုရားအတူပါရှိဖို့တောင်းဆိုတဲ့အခါမှာ ဘုရားက သူ့ရဲ့မျက်မှောက် နဲ့အတူ ခါနန်ပြည်ကို ဝင်ဖို့အတွက် ကတိပေးခဲ့တယ်။ သူကိုယ်တိုင် သွားပြီးတော့ ငြိမ်ဝပ်ခြင်းချမ်းသာကို ပေးဖို့ကတိပေးခဲ့တယ်။ ဘုရား မျက်မှောက်တော်ပါရှိတဲ့အခါမှာ ဘယ်လောက်ပဲ အခက်အခဲတွေ ရှိရှိ၊ အတားအဆီးတွေနဲ့ကြုံကြုံ လူတွေမပေးနိုင်တဲ့ ငြိမ်ဝပ်ခြင်း ချမ်းသာက အထဲကနေ ဉီးဆောင်နေတယ်။

ဖေဖေါ်ဝါရီလ ၆ ရက်နေ့

မျက်မှောက်တော်ရဲ့အကျိုး (၅)

“ထို့ကြောင့် ငါ​တို့​သည် ကရုဏာ​တော်​နှင့်​ကျေးဇူး​တော်​တို့​ကို​ခံစား​ရ​လျက် သင့်လျော်​သော​အချိန်​၌ ကူညီမစ​မှု​ကို​ရရှိ​မည့်​အကြောင်း ယုံကြည်​စိတ်ချ​စွာ​ဖြင့် ကျေးဇူး​တော်​ပလ္လင်​သို့ တိုးဝင်​ချဉ်းကပ်​ကြ​ကုန်​စို့။” ဟေဗြဲဩဝါဒစာ ၄:၁၆

ဘုရားရဲ့မျက်မှောက်တော်ထဲမှာ တိုးဝင်ခြင်းက လိုအပ်တဲ့အချိန်မှာ သင့်လျော်သော ကူညီမခြင်းကိုခံရဖို့အတွက် လိုအပ်တဲ့အာမခံချက်ကိုပေးတယ်။ လိုအပ်တဲ့အချိန်တိုင်းမှာ ဘုရားရဲ့မစခြင်းကို ခံရဖို့အတွက် မျက်မှောက်တော်ထဲမှာ အချိန်ယူဖို့လိုတယ်။ လူတွေမပေးနိုင်တဲ့၊ လောကကြီးကမရနိုင်တဲ့ အာမခံချက်ကို မျက်မှောက်တော်ထဲမှာသာ ရနိုင်တယ်။ သခင်ယေရှုက အားလုံးရဲ့စံနမူနာဖြစ်တယ်။ နေ့စဉ် ဘုရားရဲ့မျက်မှောက်တော်မှာ တိုးဝင်ခြင်းအားဖြင့် သူ့အတွက်သာမကပဲ သူအနီးနားမှာရှိတဲ့သူတွေရဲ့လိုအပ်တဲ့ အရာတွေကို လိုအပ်တဲ့အချိန်မှာ ကူညီမစပေးနိုင်တယ်။ သင့်ဘဝမှာလဲ သင့်အတွက်သာမကပဲ သင့်အနီးနားက လူတွေအတွက်လိုအပ်တဲ့အရာတွေကို လိုအပ်တဲ့အချိန်မှာ ကူညီနိုင်တဲ့သူဖြစ်ဖို့အတွက် ဘုရားမျက်မှောက်တော်မှာ အချ်ိန်ပေးတဲ့သူ ဖြစ်ပါ။

ဖေဖေါ်ဝါရီလ ၅ ရက်နေ့

မျက်မှောက်တော်ရဲ့အကျိုး (၄)

“အကျွန်ုပ်​ကို ကိုယ်တော်​၏​ရှေ့မှောက်​မှ နှင်ထုတ်​တော်​မ​မူ​ပါ​နှင့်​။ ကိုယ်တော်​၏​သန့်ရှင်း​သော​ဝိညာဉ်​တော်​ကို အကျွန်ုပ်​ထံမှ​ရုပ်သိမ်း​တော်​မ​မူ​ပါ​နှင့်​။ ကိုယ်တော်​၏​ကယ်တင်​ခြင်း​နှင့်ဆိုင်သော ရွှင်မြူး​ခြင်း​ကို အကျွန်ုပ်​အား ပြန်လည်ခံစား​စေ​၍ စေတနာထက်သန်​သော​ဝိညာဉ်​တော်​ဖြင့် အကျွန်ုပ်​ကို ထောက်မ​တော်မူ​ပါ​။” ဆာလံကျမ်း‬ ‭၅၁:၁၁-၁၂

ဒါဝိဒ်မင်းကြီး စိုးရိမ်တာက ရာထူးရုပ်သိမ်းသွားမှာကို မဟုတ်ပါဘူး၊ ရွှေငွေတွေ မရှိတော့မှာကိုမဟုတ်ပါဘူး။ ကျန်တာ မရှိတာထက် ဘုရားမျက်မှောက်တော် မရှိတော့မှာကို ပဲ အထူးစိုးရိမ်တယ်။ မျက်မှောက်တော်မရှိရင် ကျန်တာတွေဘယ်လောက်ရှိရှိ ဘာမှထူးသွားမှာ မဟုတ်ဘူး။ ဘုရား မျက်မှောက်တော်က အရာခပ်သိမ်းဖြစ်တယ် ဆိုတာ ဒါဝိဒ်က ကောင်းကောင်းသိတယ်။ သန့်ရှင်းသောဝိညာဉ်တော်မရှိရင် ဘာပဲရှိရှိ ဘဝက အဓိပ္ပါယ်မရှိပါဘူး။ ဝမ်းမြောက်ရွှင်မြူးခြင်း ၊ ခွန်အားအစွမ်းသတ္တိတွေကို မျက်မှောက်တော်ထဲမှာပဲ ရနိုင်ပါတယ်။

ဖေဖေါ်ဝါရီလ ၄ ရက်နေ့

မျက်မှောက်တော်ရဲ့ အကျိုး (၃)

“အကျွန်ုပ်​သည် ဘုရားသခင်​၏ သန့်ရှင်းရာဌာန​တော်​ထဲသို့​ဝင်​သည့်အခါမှသာ သူ​တို့​၏​နိဂုံး​ကို သိရှိနားလည်​ရ​ပါ​၏​။” ဆာလံကျမ်း‬ ‭၇၃:၁၇

လောကကြီးထဲမှာ အဖြေမရနိုင်တဲ့အရာတွေ အများကြီးရှိတယ်။ လူတွေကိုကြည့်ရင်၊ အခြေနေတွေကို ကြည့်ရင်ကြာလေ ပိုရှုပ်ထွေးလေပဲ။ လူတွေပေးနေတဲ့ အဖြေက ကျေနပ်မှုဘယ်တော့မှမဖြစ်စဘူး။ ဘုရားရဲ့မျက်မှောက်တော်ထဲ ရောက်တဲ့အခါမှာ လူတွေ မပေးနိုင်တဲ့ အဖြေက နှလုံးသား ကျေနပ်တဲ့အထိ ဘုရားကပေးတယ်။ ဆာလံဆရာက အခြေအနေနဲ့ လူတွေကိုကြည့်ပြီး စိတ်ပျက်နေတဲ့ အရာတွေကို မျက်မှောက်တော်ထဲမှာ တိုးဝင်တဲ့ နောက်ပိုင်းမှာ ကျေနပ်တဲ့ အဖြေကိုရရှိခဲ့တယ်။ ဒီအဖြေက သူ့ဘဝရဲ့ရှုပ်ထွေးနေတဲ့အရာတွေအားလုံးကိုရှင်းပေလိုက်တယ်။

ဖေဖေါ်ဝါရီလ ၃ ရက်နေ့

မျက်မှောက်တော် ရဲ့ အကျိုး (၂)

“စိတ်နှလုံး​တည်ကြည်​သော​သူ​သည် ကိုယ်တော်​ကို​ယုံကြည်ကိုးစား​သောကြောင့် ကိုယ်တော်​သည် သူ့​ကို​စောင့်ရှောက်​၍ ငြိမ်သက်​ခြင်း​အတိ ရှိ​စေ​တော်မူ​မည်​။” ဟေရှာယအနာဂတ္တိကျမ်း‬ ‭၂၆း၃

မငြိမ်သက်နေတဲ့ လောကကြီးထဲမှာ ငြိမ်သက်ခြင်းအပြည့်နဲ့ နေ့စဉ် ဖြတ်သန်းသွားနိုင်ဖို့ တစ်ခုတည်းသော နည်းလမ်းက ဘုရားမျက်မှောက်တော်ပဲ ရှိတယ်။ မျက်မှောက်တော်ထဲမှာ အချိန်ယူဖြတ်သန်းတဲ့သူဟာ လောကကြီးရဲ့ ဘယ်အရာကမှ သူ့ရဲ့ငြိမ်သက်ခြင်းကို ခိုးယူနိုင်မှာ မဟုတ်ဘူး။ အရာရာကို ငြိမ်သက်စွာနဲ့ ဖြတ်သန်းသွားလာနိုင်လိမ့်မယ်။ လူတစ်ယောက်တကယ် ဘုရားမျက်မှောက်တော်မှာ အချိန်ယူသလားဆိုတာ အခက်အခဲတွေကြားထဲမှာ ဘယ်လိုဖြတ်သန်းလဲဆိုတာကို ကြည့်ရင်သိနိုင်တယ်။ မျက်မှောက်တော်ထဲမှာ တကယ် စိမ်ထားတဲ့သူကတော့ အရာရာမှာ ဘုရားပေးတဲ့ ငြိမ်သက်ခြင်းနဲ့ ဖြတ်ကျော်နိုင်ပါလိမ့်မယ်။

ဖေဖေါ်ဝါရီလ ၂ ရက်နေ့

မျက်မှောက်တော်ရဲ့ အကျိုး

“ကိုယ်တော်​သည် အကျွန်ုပ်​အား အသက်ရှင်​ခြင်း​လမ်း​ကို​သိ​စေ​၍ ရှေ့​တော်​၌ အကျွန်ုပ်​ကို ဝမ်းမြောက်​ခြင်း​ဖြင့် ပြည့်စုံကြွယ်ဝ​စေ​တော်မူ​လိမ့်မည်​။ နှစ်လို​ဖွယ်​ကောင်း​သော​အရာ​သည် ကိုယ်တော်​၏​လက်ယာ​ဘက်​၌ အစဉ်​ရှိ​ပါ​၏​။” ဆာလံကျမ်း ၁၆:၁၁

လောကကို အချိန်ပေးလေ ဝမ်းနည်းခြင်းက အသက်တာကိုနေရာယူစိုးမိုးလာတယ်။ လောကကြီးမှာ စစ်မှန်တဲ့ ဝမ်းမြောက်ခြင်းဆိုတာ မရှိသလောက်ကို ရှားသွားပြီ။ ဒီနေ့လူတွေ လိုချင်တဲ့၊ လူတွေရှာနေတဲ့ ဝမ်းမြောက်ခြင်းက ဘုရားရဲ့ မျက်မှောက်တော်မှာပဲ ရှိတယ်။ မျက်မှောက်တော်ထဲမှာ တိုးဝင်လေ ဘဝရဲ့ နှစ်လိုဖွယ်အရာတွေကို ရှာတွေ့လေပါပဲ။ မျက်မှောက်တော်ကလွဲရင် ကျန်တဲ့နေရာမှာတော့ ရှာတွေ့ဖို့တော့ မလွယ်ဘူး။ ဝမ်းမြောက်ခြင်းနှင့် ကျေနပ်နှစ်သက်ဖွယ်သောအရာတွေကို စုံလင်စွာ ခံစားနိုင်တဲ့ တစ်ခုတည်းသော နေရာကတော့ ဘုရားရဲ့မျက်မှောက်တော်မှာပါပဲ။

ဇန်နဝါရီလ ၃၁ ရက်နေ့

သစ္စာနှင့်ပြည့်စုံသောဘုရား

“လူ​၌​ဖြစ်​တတ်​သော​စုံစမ်း​နှောင့်ယှက်​ခြင်း​ကို​သာ သင်​တို့​ခံရ​ကြ​၏။ ဘုရားသခင်​သည် သစ္စာ​နှင့်​ပြည့်စုံ​တော်မူ​သည်​ဖြစ်၍ သင်​တို့​ခံနိုင်​သည်​ထက် ပိုလွန်​သော​စုံစမ်း​နှောင့်ယှက်​ခြင်း​ကို သင်​တို့​အား​ခံ​စေ​တော်မူ​လိမ့်မည်​မ​ဟုတ်။ ထို့ပြင် သင်​တို့​ခံ​နိုင်​မည့်​အကြောင်း စုံစမ်း​နှောင့်ယှက်​ခြင်း​နှင့်တကွ ထွက်မြောက်​ရာ​လမ်း​ကို​လည်း ပြင်ဆင်​ပေး​တော်မူ​လိမ့်မည်။”

‭‭ကောရိန္သုဩဝါဒစာပထမစောင်‬ ‭၁၀:၁၃

နောက်ဆုံးသောကာလ နီးကပ်လာလေ လောက ကြီးက သစ္စာရှိခြင်းကို ရှာတွေ့ဖို့ ပိုခက်လာတယ်။ လူတွေကလဲ သစ္စာရှိခြင်းထက် ကိုယ်အဆင်ပြေဖို့ပဲ ဉီးစားပေးလာကြတယ်။ လောကကြီးမှာ ရှာတွေ့ဖို့ခက်ပေမဲ့ ဘုရားရဲ့ သစ္စာရှိခြင်းကတော့ ဘယ်အချိန်မှာမဆို မပြောင်းလဲသွားပါဘူး။ ဘုရားရဲ့သစ္စာရှိခြင်းကြောင့် သင်ဟာ ဘယ်တော့မှ သင်ခံနိုင်ရည် ကျော်လွန်တဲ့ စုံစမ်းခြင်းကို တွေ့ကြုံရမှာမဟုတ်ဘူး။ သင်ခံနိုင်တဲ့ အောင်မြင်ကျော်လွန်နိုင်တဲ့အရာကိုပဲ အမြဲတမ်းတွေ့ကြုံရတယ်။ ဒါဟာ ဘုရားရဲ့ သစ္စာရှိခြင်းထဲကတစ်ခုပဲ။ အမြဲတမ်း ထွက်ပေါက်ကိုကြိုတင်ပြင်ဆင်ပေးပြီးတော့ အောင်မြင်ဖို့အတွက် စီစဉ်ပေးထားတာဟာ ဘုရားရဲ့သစ္စာရှိခြင်းပါပဲ။

ဇန်နဝါရီလ ၃၀ ရက်နေ့

လူ့အတွက် မဖြစ်နိုင်ပေမဲ့

“ကိုယ်တော်​က​လည်း“လူ​တို့​အတွက်​မ​ဖြစ်နိုင်​သော​အရာ​များ​သည် ဘုရားသခင်​အတွက်​ဖြစ်နိုင်​၏”​ဟု မိန့်​တော်မူ​၏။” ‭‭ရှင်လုကာခရစ်ဝင်‬ ‭၁၈:၂၇

ဘဝမှာ ရှင်သန်တဲ့အခါမှာ မဖြစ်နိုင်တဲ့ အခြေအနေတွေကိုရင်ဆိုင်ရတတ်ပါတယ်။ တစ်ခါတစ်လေ လမ်းဆုံးပြီလို့ ထင်တတ်တဲ့အချိန်တွေ အများကြီးရှိတတ်

တယ်။ လူ့အနေနဲ့ မဖြစ်နိုင်တိုင်း လမ်းဆုံးပြီလို မထင်စေချင်ဘူး။ လူ့အနေနဲ့ မဖြစ်နိုင်တဲ့ အရာတိုင်းကို လုပ်ပေးနိုင်တဲ့ ဘုရားရှိတယ်။ သူ့ကို ယုံကြည်ရင်၊ အားကိုးရင် မဖြစ်နိုင်တဲ့အရာတိုင်းဖြစ်လာတာကိုမြင်ရလိမ့်မယ်။ ဘုရား မတတ်နိုင်တဲ့ အရာ ဘာဆို ဘာမှမရှိဘူး။

ဇန်နဝါရီလ ၂၉ ရက်နေ့

မဖြစ်နိုင်တာ မရှိဘူး (၄)

“ဘု​ရား​သ​ခင်​သည် ကြီး​သော​အ​မှု၊ စစ်၍ မ​ကုန်​နိုင်​သော​အ​မှု၊ ရေ​တွက်၍​မ​ဆုံး၊ အံ့​ဩ​ဖွယ်​သော​အ​မှု​တို့​ကို ပြု​တော်​မူ၏။” ယောဘ‬ ‭၅:၉

ဘုရားပြုတဲ့အမှုတွေက ဘယ်တော့မှ ရေတွတ်လို့ဆုံးနိုင်မှာ မဟုတ်ဘူး။ လူအနေနဲ့စဉ်းစားလို့ ဉာဏ်မှိီနိုင်မှာတောင်မဟုတ်ဘူး။ သေးသေးလေးတွေ၊ ဖြစ်နိုင်တဲ့အရာတွေလောက်ပဲ လုပ်တဲ့ ဘုရား မဟုတ်တာသေချာတယ်။ ဘာဖြစ်လို့များ ဘုရားကို ကန့်သတ်ချင်ရတာလဲ? လူတွေအနေနဲ့ မလုပ်နိုင်၊ မဖြစ်နိုင်တိုင်း၊ ဘုရားမလုပ်နိင် မတတ်နိုင်တာမှ မဟုတ်တာ။ သင့်ဘဝရဲ့မဖြစ်နိုင်တာတွေအားလုံးကို လုပ်ပေးဖို့ သူဟာ အမြဲတမ်းအသင့်ရှိတယ်။ သင့်ရဲ့မဖြစ်နိုင်တဲ့အဆုံးမှာ သူ့ရဲ့တတ်နိုင်ခြင်းကို ယုံကြည်ကိုးစားမယ်ဆိုရင် သေချာတယ် အံ့ဖွယ်အမှုအရာတွေဖြစ်လာတော့မှာပါ။

ဇန်နဝါရီလ ၂၈ ရက်နေ့

မဖြစ်နိုင်တာ မရှိဘူး (၃)

“ဘု​ရား​သ​ခင်​သည် ကြီး​သော​အ​မှု၊ စစ်၍ မ​ကုန်​နိုင်​သော​အ​မှု၊ ရေ​တွက်၍​မ​ဆုံး၊ အံ့​ဩ​ဖွယ်​သော​အ​မှု​တို့​ကို ပြု​တော်​မူ၏။” ယောဘ‬ ‭၅:၉

ကျမ်းစာတစ်အုပ်လုံးကို ဖတ်ကြည့်တဲ့အခါမှာ ဘုရားက ဖြစ်နိုင်တာတွေကိုပဲလုပ်ခဲ့တဲ့ဘုရားမဟုတ်ဘူး။ သူ့ကို ယုံကြည်သူတွေအတွက် သူလုပ်ခဲ့အရာတွေက ဖြစ်သင့်တာ တွေ၊ဖြစ်နိုင်တာတွေထက် အမြဲတမ်း ကျော်လွန်ခဲ့တယ်။ ကိုယ့်ရဲ့ အတွေးအခေါ်၊ ကိုယ်ခွန်အားအစွမ်းအစအပေါ်မှာမူတည်ပြီးတော့ စဉ်းစားနေရင်တော့ မဖြစ်နိုင်တာတွေက အများကြီး ဖြစ်နေအုံးမှာပဲ။ ဘုရားရဲ့ တတ်နိုင်ခြင်းကို မျှော်ကြည့်မယ်ဆိုရင်တော့ သေချာတယ် မဖြစ်နိုင်ဘူး ဆိုတာ တစ်ခုကိုမှ ရှိမှာ မဟုတ်ဘူး။

ဇန်နဝါရီလ ၂၇ ရက်နေ့

မဖြစ်နိုင်တာ မရှိဘူး(၂)

“ယေရှုကလည်း၊ သင်သည် ယုံကြည်နိုင်လျှင် ယုံကြည်သောသူ၌ ခပ်သိမ်းသောအမှုတို့သည် ဖြစ်နိုင်သည်ဟု မိန့်တော်မူ၏။”(မာကုခရစ်ဝင် ၉:၂၃)

တစ်ခါတစ်ရံမှာ ကျွန်ုပ်တို့ဟာ ဘုရားသခင်ရဲ့ တန်ခိုးတော်ကို သံသယမရှိပေမဲ့၊ ကိုယ်တိုင်ရဲ့ ယုံကြည်ခြင်းအပေါ်မှာတော့ ယုံကြည်မှုအားနည်းတတ်ကြပါတယ်။ ဒီကျမ်းပိုဒ်မှာ သခင်

ယေရှုက “ငါလုပ်နိုင်ပါ့မလား”လို့ မေးခွန်းထုတ်နေတာ မဟုတ်ဘဲ၊ “သင်ယုံကြည်နိုင်မလား” လို့ ပြန်လည်မေးခွန်းထုတ်ထားတာ ဖြစ်ပါတယ်။

“မဖြစ်နိုင်ဘူး”ဆိုတာ သင့်ရဲ့ ယုံကြည်ခြင်း ရပ်တန့်သွားတဲ့ နေရာတစ်ခုသာ ဖြစ်ပါတယ်။ သဘာဝတရားအရ ကုစားမရသော ရောဂါများ၊ ဖြေရှင်းမရသော မိသားစုပြဿနာများ၊ ပိတ်နေသော လမ်းစများသည် ယုံကြည်ခြင်းမျက်စိဖြင့် ကြည့်သောအခါ အခွင့်အရေးများ ဖြစ်လာတတ်သည်။ ယုံကြည်ခြင်းဆိုသည်မှာ လက်တွေ့အခြေအနေကို ငြင်းပယ်ခြင်းမဟုတ်ဘဲ၊ ထိုအခြေအနေများထက် ကြီးမားသော ဘုရားသခင်ကို မြင်တွေ့ခြင်းဖြစ်သည်။ သင် ယုံကြည်ရဲလျှင် ဘုရားသခင် အလုပ်လုပ်ဖို့ အဆင်သင့်ရှိပါသည်။

ဇန်နဝါရီလ ၂၆ ရက်နေ့

မဖြစ်နိုင်တာ မရှိဘူး

“ဘုရားသခင် မတတ်နိုင်သော အမှုမရှိ။” (လုကာခရစ်ဝင် ၁:၃၇)

လူသားတွေရဲ့ အမြင်မှာ “လမ်းဆုံးပြီ”၊ “မဖြစ်နိုင်တော့ဘူး” လို့ ထင်ရတဲ့ အခြေအနေတွေဟာ ဘုရားသခင်အတွက်တော့ “အစပြုခြင်း” သက်သက်သာ ဖြစ်ပါတယ်။ ကျွန်ုပ်တို့ဟာ ကိုယ့်ဉာဏ်၊ ကိုယ့်ခွန်အား၊ ကိုယ့်အကန့်အသတ်တွေနဲ့ ကြည့်ပြီး စိတ်ပျက်အားငယ်တတ်ကြတယ်။ ဒါပေမဲ့ ကျွန်ုပ်တို့ ကိုးကွယ်တဲ့ ဘုရားသခင်ဟာ သဘာဝနိယာမတွေကို ကျော်လွန်ပြီး အံ့ဖွယ်အမှုများကို ပြုနိုင်သော အနန္တတန်ခိုးရှင် ဖြစ်ပါတယ်။

ပင်လယ်နီကို နှစ်ခြမ်းခွဲခဲ့တဲ့ ဘုရား၊ ခြင်္သေ့တွင်းထဲက ဒံယေလကို ကယ်တင်ခဲ့တဲ့ ဘုရားသည် ယနေ့ သင့်ဘဝထဲ၌လည်း ရှိနေပါသည်။ သင့်ပြဿနာ ဘယ်လောက်ကြီးမားပါစေ ဘုရားသခင်ရဲ့ တန်ခိုးတော်ထက် မကြီးမားပါဘူး။ ဘုရားသခင်၌ “မဖြစ်နိုင်ဘူး” ဆိုတဲ့ စကားလုံး မရှိပါ။ ကိုယ်တော်ကို ယုံကြည်ကိုးစားခြင်းအားဖြင့် သင့်ဘဝရဲ့ မဖြစ်နိုင်တဲ့အရာတွေက ဖြစ်နိုင်တဲ့အရာတွေအဖြစ် ပြောင်းလဲလာပါလိမ့်မယ်။

ဇန်နဝါရီလ ၂၄ ရက်နေ့

အရာခပ်သိမ်းကို တတ်နိုင်စေတဲ့ ခွန်အား

“ငါ့ကို ခွန်အားနှင့် ပြည့်စုံစေတော်မူသော ဘုရားသခင်အားဖြင့် ခပ်သိမ်းသောအမှုကို ငါတတ်စွမ်းနိုင်၏။” ဖိလိပ္ပိသြဝါဒစာ ၄:၁၃

မလုပ်နိုင်တာတွေ အများကြီးရှိတယ်လို့ ထင်နေသေးတယ်ဆိုရင်တော့ သေချာတယ် သင် ဘုရားပေးတဲ့ခွန်အားနဲ့ မရှင်သန်သေးဘူး။ လူ့ရဲ့ခွန်အားက အကန့်အသတ်ရှိတယ်။ဒါကြောင့် ကိုယ့်ခွန်အားပေါ်မှာပဲ အသက်ရှင်တဲ့သူကတော့ မလုပ်နိုင်တာတွေ၊ မဖြစ်နိုင်တာတွေ များနေအုံးမှာပဲ။ ဘုရားခွန်အားနဲ့ ရှင်သန်တဲ့သူဆိုရင်သေချာတယ် တမန်တော်ကြီးရှင်ပေါလု ပြောသလို သင်ပြောနိုင်ပါလိမ့်မယ်။ ခပ်သိမ်းသောအရာကို ငါတတ်စွမ်း နိုင်တယ်လို့ ပေါလုပြောတဲ့အခါမှာ ကြွားတာလဲ မဟုတ်ဘူး။ စကားကြီးစကျယ်ပြောတာလဲ မဟုတ်ဘူး။ ဘုရားတန်ခိုးတော်ကို သူက သေချာပေါက် နားလည်လို့ ဒီလို ပြောနိုင်တာ။ ဒီလို စကားမျိုးကို ဘုရားပေးတဲ့ခွန်အားကို တကယ်နားလည်တဲ့သူကပဲ ပြောနိုင်တယ်။

ဇန်နဝါရီလ ၂၃ ရက်နေ့

အားပြည့်ခြင်း

“အ​လွန်​ချစ်​အပ်​သော​သူ၊ မ​ကြောက်​နှင့်။ ငြိမ်​သက်​ခြင်း​ရှိ​ပါ​စေ။ အား​ရှိ​လော့။ ခွန်​အား​နှင့်​ပြည့်​စုံ​လော့​ဟု ဆို၏။ ထို​သို့​ဆို​ပြီး​မှ ခွန်​အား​ကို​ငါ​ရ၍၊ အ​ကျွန်ုပ်၏​သ​ခင်၊ မိန့်​တော်​မူ​ပါ။ အ​ကျွန်ုပ်​ကို​ခွန်​အား​ပေး​တော်​မူ​ပြီ​ဟု လျှောက်၏။” ဒံယေလ ၁၀:၁၉

ဘုရားအသံကြားခြင်းက ကုန်ခမ်းသွားတဲ့အားအင်တွေကို ချက်ခြင်းပြည့်စေတဲ့ အရင်းအမြစ်တစ်ခုပါ။ လောက အသံနှင့်ပတ်ဝန်းကျင်အသံတွေ၊ လူ့အသံတွေ များများကြားလေ အားကုန်လေပါပဲ။ ကုန်သွားတဲ့အားတွေကိုပြန်လည် ဖြည့်ဆည်းပေးနိုင်တဲ့ တစ်ခုတည်းသောအရာက ဘုရားအသံ ကြားခြင်းဖြစ်တယ်။ ဘုရားအသံက အပြစ်တင်ခြင်း၊ တရားစီရင်ခြင်းနှင့် မလာပါဘူး။ ဘုရားအသံကို မှန်ကန်စွာကြားရတဲ့အခါမှာ ဘုရားရဲ့မေတ္တာကိုပိုမိုပြီးတော့ ခံစားရရှိတယ်။ လူ့အသံတွေကတော့အပြစ်တင်ခြင်း၊ စီရင်ခြင်းတွေနဲ့ပဲပြည့်နှက်နေတယ်။ ဘုရားအသံအမြဲ ကြားနေရတဲ့သူအတွက် အားအင်ကုန်ခမ်းတယ်ဆိုတာ ဘယ်တော့မှ ရှိလာတော့မှာ မဟုတ်ပါဘူး။

ဇန်နဝါရီလ ၂၂ ရက်နေ့

မကုန်ခမ်းနိုင်တဲ့ ခွန်အားနဲ့လဲလှယ်ပါ

“လူငယ်​တို့​ပင်လျှင် အားအင်​ကုန်ခန်း​၍ မောပန်း​ကြ​လိမ့်မည်​။ သန်မာ​သော​လူငယ်​တို့​သည်​လည်း ခလုတ်တိုက်​လဲကျ​ကြ​လိမ့်မည်​။ ထာဝရဘုရား​ကို စောင့်မျှော်​သော​သူ​တို့​မူကား ခွန်အား​သစ်​နှင့်​ပြည့်​လိမ့်မည်​။ သူ​တို့​သည် လင်းယုန်​ကဲ့သို့ အတောင်ပံ​ဖြင့် အထက်​သို့​ပျံတက်​ကြ​လိမ့်မည်​။ ပြေး​သောအခါ မောပန်း​ကြ​မည်​မ​ဟုတ်​။ သွားလာ​သောအခါ​လည်း အားအင်​ကုန်ခန်း​ကြ​မည်​မ​ဟုတ်​။” ဟေရှာယအနာဂတ္တိကျမ်း 40:30-31 MSBU

ကျွန်တော်တို့ လူသားတွေရဲ့ ခွန်အားဟာ “ဘက်ထရီ” တစ်လုံးလိုပါပဲ။ သုံးပါများရင် ကုန်ခမ်းသွားတတ်ပါတယ်။ အမှုတော်မြတ်မှာ ဘယ်လောက်ပဲ စိတ်အားထက်သန်ပါစေ၊ လူ့ခန္ဓာကိုယ်နဲ့ စိတ်ဟာပင်ပန်းနွမ်းနယ်မှုကို ကြုံတွေ့ရစမြဲပါ။ ဒါပေမဲ့ ဘုရားသခင်ရဲ့ ခွန်အားကတော့ ကုန်ခမ်းခြင်းမရှိတဲ့ “လျှပ်စစ်ဓာတ်အားပေးစက်ရုံ” ကြီးနဲ့တူပါတယ်။

ဒီကျမ်းချက်မှာ “စောင့်မျှော်သောသူ” ဆိုတာ ဘာမှမလုပ်ဘဲ ထိုင်နေသူကို မဆိုလိုပါဘူး။ မိမိရဲ့အားနည်းမှု၊ မောပန်းမှုတွေကို ဘုရားသခင်ရှေ့မှာ ဝန်ခံပြီး၊ ဘုရားဆီက ခွန်အားကို မျှော်လင့်တောင့်တသူကို ဆိုလိုပါတယ်။ ခွန်အားသစ်နှင့် ပြည့်မည်”ဆိုတဲ့ စကားရဲ့မူရင်းအဓိပ္ပာယ်ဟာ “အလဲအလှယ်လုပ်သည် (Exchange)” လို့ အဓိပ္ပာယ်ရပါတယ်။ ဘုရားသခင်ရှေ့မှာ ငြိမ်ဝပ်စွာ စောင့်မျှော်တဲ့အခါ…ကုန်ခမ်းနေတဲ့ အားအင်တွေကို ဘုရားကိုပေးအပ်ပြီးတော့ ဘုရားထံကနေ မကုန်ခမ်းနိုင်တဲ့ ဘုရားရဲ့ခွန်အားကို ရယူခြင်းဖြစ်ပါတယ်။

ဇန်နဝါရီလ ၂၁ ရက်နေ့

ဘုရားပေးတဲ့ခွန်အား

“ကိုယ်တော် သည် မောပန်း သော သူ တို့ ကို ခွန်အား ပေး တော်မူ ၏ ။ အစွမ်း မ ရှိ သော သူ တို့ ကို စွမ်းအား နှင့် ပြည့်စုံ စေ တော်မူ ၏ ။” (ဟေရှာယ ၄၀:၂၉)

လူ့ခွန်အားသည် သုံးစွဲလေ ကုန်ခမ်းလေပဲ၊ ဘုရားပေးသော ခွန်အားကတော့ သုံးစွဲလေ တိုးပွားလေပါပဲ။ ကျွန်ုပ်တို့ “မနိုင်တော့ဘူး” ဟု ဝန်ခံသည့်အချိန်မှာ ဘုရားသခင် “စတင်အလုပ်လုပ်” လာတယ်။ မောပန်းခြင်းကို စိတ်မပျက်ပါနှင့်။ ဘုရားသခင်ထံ တိုးဝင်၍ ကိုယ်တော်၏ အကန့်အသတ်မရှိသော ခွန်အားကို တောင်းပါ။ ဘုရားက ကုန်ခမ်းသွားတဲ့ အားအင်နေရာမှာ ပိုကောင်းတဲ့ အားအင်ကို ပေးပါလိမ့်မယ်။ လူ့ရဲ့ခွန်အား က အကန့်အသတ်ရှိပေမဲ့ ဘုရားပေးတဲ့ခွန်အားကတော့ အကန့်အသတ်မဲ့ဖြစ်တယ်။ လူ့အနေနဲ့မဖြစ်နိုင်တဲ့အရာတွေကို ဘုရားပေးတဲ့ခွန်အား နဲ့ လုပ်ဆောင်နိုင်တယ်။ ဘုရားထံမှရတဲ့ ခွန်အားနှင့် အရာရာကိုကျော်လွှားအောင်မြင်နိုင်မယ်ဆိုတာ စိတ်ချပါ။

ဇန်နဝါရီလ ၂၀ ရက်နေ့

ခွန်အားတိုးပွါးလျှက်

“သူ​တို့​သည် ခွန်အားတိုးသည်ထက်တိုးလာ​လျက်​၊ သွား​ကြ​လျက် ဇိအုန်​၌​ရှိ​တော်မူ​သော​ဘုရားသခင်​ကို ဖူးမြင်​ရ​ကြ​ပါ​လိမ့်မည်​။”‭‭ဆာလံကျမ်း‬ ‭၈၄:၇

ပုံမှန်အားဖြင့် ခရီးတစ်ခုကို လျှောက်လှမ်းတဲ့အခါ ခရီးဝေးလေလေ၊ လူက ပင်ပန်းနွမ်းနယ်လေလေ ဖြစ်တတ်ပါတယ်။ ဒါပေမဲ့ ဘုရားသခင်နဲ့ လျှောက်လှမ်းရတဲ့ ဝိညာဉ်ရေးရာခရီးလမ်းကတော့ အံ့ဩစရာကောင်းပါတယ်။ နှုတ်ကပတ်တော်က “ခွန်အားတိုးသည်ထက် တိုးလာလျက်” လို့ ကတိပေးထားပါတယ်။

ဘုရားပေးတဲ့ ခွန်အားသစ် – သင့်ဘဝမှာ စိန်ခေါ်မှုတွေ၊ အခက်အခဲတွေ ရှိနေနိုင်ပါတယ်။ ဒါပေမဲ့ ဘုရားသခင်ကို မှီခိုတဲ့သူတွေ၊ ဘုရားမျက်မှောက်တော်ကို ဉီးတည်တဲ့သူတွေဟာ အားလျော့သွားခြင်းမရှိဘဲ၊ အချိန်တိုင်းမှာ ခွန်အားသစ်ကို ပြန်လည်ရရှိပြီး အရင်ကထက် ပိုပြီးတောင် တိုးပွါးနေပါသေးတယ်။

ရှေ့ဆက်လှမ်းနိုင်မယ့် စွမ်းရည် – မနေ့ကထက် ဒီနေ့၊ ဒီနေ့ထက် မနက်ဖြန်မှာ သင့်ရဲ့ ဘုရားအပေါ်မှာထားတဲ့ ယုံကြည်

ခြင်းနဲ့ စိတ်ဓာတ်ခွန်အားဟာ ပိုပြီးရင့်ကျက်ခိုင်မာလာပါလိမ့်

မယ်။ မှန်ကန်တဲ့ ပန်းတိုင်ကတော့ ဘုရားနဲ့ ပိုပြီးတော့နီးကပ်ခြင်းဖြစ်ဖို့ပါပဲ။

ဇန်နဝါရီလ ၁၉ ရက်နေ့

ခွန်အားနှင့်ပြည့်စုံခြင်း

“နောက်ဆုံး​အနေဖြင့်​ဆို​ရ​လျှင် သခင်​ဘုရား​၌​လည်းကောင်း၊ ကိုယ်တော်​၏​အစွမ်းသတ္တိ​နှင့်ဆိုင်သော တန်ခိုး​အရှိန်အဝါ​၌​လည်းကောင်း ခွန်အား​နှင့်​ပြည့်စုံ​ကြ​လော့။” ဧဖက်ဩဝါဒစာ ၆:၁၀

ယုံကြည်သူတွေ ပြောလေ့ရှိတဲ့ စကားက ခွန်အားနည်းတယ်၊ ငါတို့ ခံနိုင်ရည်ရှိမှာ မဟုတ်ဘူး။ ဒီလို စကားတွေကို လွယ်လွယ်ပြောတာဟာ ယုံကြည်သူတစ်ယောက်အတွက် သခင်ဘုရားနဲ့ ဘယ်လိုခွန်အားယူတည်ဆောက်ရမလဲဆိုတာကို သေချာ သဘောမပေါက်လို့ဖြစ်တယ်။ ဘယ်လို ခွန်အားနှင့် ပြည့်စုံနိုင်မလဲဆိုတာ တမန်တော် ရှင်ပေါလုက သေချာရှင်းပြထားပါတယ်။ ပထမဆုံးက သခင်ဘုရားထဲမှာ ဘဝကိုတည်ဆောက်ခြင်းဖြစ်တယ်။ သခင်ဘုရားထဲမှာ ဘဝကို တည်ဆောက်တဲ့သူ ဟာ ဘယ်လို အခြေအနေမျိုးမှာမဆို အားနည်းသွားမှာ မဟုတ်ပဲ ခိုင်ခံ့စွာရပ်တည်နိုင်ပါလိမ့်မယ်။

ဘုရားရဲ့ အစွမ်းသတ္တိနှင့်တန်ခိုးအရှိန်အဝါကို နားလည်သဘောပေါက်လေ ခံနိုင်ရည်နဲ့ ခွန်အားတိုးပွားလေပါပဲ။ ဆုကျေးဇူးတွေ၊တန်ခိုးတော်တွေကို နားလည်သဘောပေါက်ပြီး အသုံးပြုတဲ့သူ တစ်ယောက်အသက်တာမှာ ပိုပြီးအားကြီးလာမှာ သေချာပါတယ်။

ဇန်နဝါရီလ ၁၇ ရက်နေ့

မိတ်ဆွေကောင်းရဲ့တန်ဖိုး

“ဧလိရှဲ​က​လည်း “​ငါ​ကိုးကွယ်​သော​ကောင်းကင်​ဗိုလ်ခြေ​အရှင်​ထာဝရဘုရား အသက်ရှင်​တော်မူ​သည်​နှင့်အညီ ယုဒ​ဘုရင်​ယောရှဖတ်​မင်းကြီး​၏​မျက်နှာ​ကို​မ​ထောက်​လျှင် သင့်​ကို ငါ​လှည့်ကြည့်​မည်​မ​ဟုတ်​၊ အရေးစိုက်​မည်​မ​ဟုတ်​။” ဓမ္မရာဇဝင်စတုတ္ထစောင်‬ ‭၃:၁၄

မိတ်ဆွေကောင်းတစ်ယောက်ကြောင့် နှစ်ပေါင်းများစွာပိတ်နေတဲ့ တံခါးတွေ၊ အခွင့်အရေးတွေ ပွင့်လာနိုင်တယ်ဆိုတာ သိလား? မိတ်ဆွေကောင်းတွေကြောင့် ဘဝမှာ ဖွင့်လို့မရတဲ့အရာတွေ၊ ပိတ်နေတဲ့ အခွင့်အရေးတွေ၊ မရသင့်တဲ့အရာတွေကို ဘဝမှာ ရရှိခံစားဖို့အကြောင်းဖြစ်လာတယ်။ ဣသရေလဘုရင် ယောရံဟာ ယုဒဘုရင် ယောရှဖတ်ကြောင့် ဧလိရှဲ ရဲ့ ကူညီမစမှုကို ခံခဲ့ရတယ်။ သူပေါင်းတဲ့ ယောရှဖတ်သာ မပါရင် ဧလိရှဲက လှည့်တောင်မကြည့်ဘူးလို့ဆိုတယ်။ မိတ်ဆွေတစ်ယောက်ရဲ့တန်ဖိုးက ဘယ်လောက်တောင်ကြီးသလဲ? မရသင့်တဲ့အခွင့်အရေးတွေ၊ ကောင်းကြီးမင်္ဂလာတွေ များစွာခံစားရဖို့ ဖြစ်လာစေတယ်။

ဇန်နဝါရီလ ၁၆ ရက်နေ့

အပေါင်းအသင်း

“အ​လွဲ​မ​ယူ​ကြ​နှင့်။ မ​ကောင်း​သော သူ​တို့​နှင့် ပေါင်း​ဖော်​ခြင်း​အား​ဖြင့် ကောင်း​သော​အ​ကျင့်​ဓ​လေ့ ယို​ယွင်း​တတ်၏။-” ‭၁ ကောရိန္သု ၁၅:၃၃

ကောင်းတဲ့အကျင့်တွေ တိုးတက်ဖို့အတွက်က သင်ပေါင်းသင်းတဲ့ အပေါ်မူတည်တယ်။ သင်ဘယ်သူနဲ့ ပေါင်းသလဲ ဆိုတာက ဝိညာဉ်ရေးရာအတွက်ရော၊ စိတ်ပိုင်းဆိုင်ရာ၊ အပြုအမူစတဲ့အရာတွေအားလုံးအတွက် အရမ်းကို အရေးကြီးတယ်။ မှားယွင်းတဲ့ ပေါင်းသင်းဖွဲ့ခြင်းက အသက်တာတစ်ခုလုံးကို ဆွဲချသွားနိုင်တယ်။ လူတချို့က အရည်အချင်းရှိရဲ့သားနဲ့၊ ဘုရားပေးထားတဲ့ဆုကျေးဇူးတွေရှိရဲ့သားနဲ့ အောင်မြင်သင့်သလောက် မအောင်မြင်တာဟာ အပေါင်းအသင်းကြောင့်လဲ အများကြီးသက်ဆိုင်မှုရှိတယ်။ ဒါဝိဒ်လို လူဖြစ်လာဖို့ ယောနသန်လိုမိတ်ဆွေကောင်းတွေလိုအပ်တယ်။ သင့်ဘဝထဲမှာ မပေါင်းသင့်တဲ့သူတွေကို ဖယ်ထုတ်ဖို့ ဝန်မလေးပါနဲ့။ သင့်ဘဝရဲ့ ကောင်းတဲ့အရာတွေကို ပျက်ဆီးစေလိမ့်မယ်။

ဇန်နဝါရီလ ၁၅ ရက်နေ့

မရှောင်နဲ့

“လူ​အ​ချို့​တို့၏ ထုံး​စံ​ရှိ​သည်​အ​တိုင်း၊ အ​ချင်း​ချင်း စည်း​ဝေး​ခြင်း​အ​မှု​ကို မ​ရှောင်​မ​လွှဲ​ကြ​နှင့်။ အ​ချင်း​ချင်း​တို့​ကို တိုက်​တွန်း​နှိုး​ဆော်​ကြ​လော့။ ကာ​လ​အ​ချိန် ရောက်​လု​နီး​သည်​ကို ထောက်​သ​ဖြင့်၊ သာ၍ ကြိုး​စား​ကြ​လော့။” ဟေဗြဲ‬ ‭၁၀:၂၅

ယုံကြည်သူအချင်းချင်း စည်းဝေးတွေ့ဆုံခြင်းက ဘယ်လောက်တောင် အရေးကြီးသလဲ? လူတချို့ကတော့ အချိန်ဖြုန်းခြင်းလို့မြင်တယ်။ လူတချို့ကတော့ ရှိတဲ့နေရာမှာ ပဲ ဘုရားကို ကိုးကွယ်လို့ ရတင်လို့မြင်တယ်။ အတူတူ စည်းဝေးခြင်းက ဘုရားကို အတူတကွဝတ်ပြုခြင်းဖြစ်သလို၊ အချင်းချင်း အားပေး တိုက်တွန်းခြင်း၊ တည်ဆောက်ခြင်းအတွက်လဲ​လွန်စွာ အရေးပါတယ်။ နောက်ဆုံးသောကာလ နီးလာတာနဲ့အမျှ အားပေးခြင်း၊ အချင်းချင်းဆုတောင်းပေးခြင်း၊ တည်ဆောက်ပေးခြင်းက ပိုလိုအပ်လာတယ်။ တစ်ယောက်ထဲ မရပ်တည်နိုင်တဲ့အခြေအနေတွေအများကြီးကြုံရဖို့ရှိတယ်။ ဒါကြောင့် ဘုရားနဲ့ ပတ်သက်တဲ့ စည်းဝေးခြင်းတွေကို မရှောင်ပဲ အချိန်ပေးတတ်ဖို့လိုတယ်။

ဇန်နဝါရီလ ၁၄ ရက်နေ့

စစ်မှန်တဲ့ မိတ်သဟာရ

“ငါ​တို့​သည် ဘုရားသခင်​နှင့်​မိတ်သဟာယ​ဖွဲ့​ခြင်း​ရှိ​၏​ဟု ဆို​လျက်​နှင့် အမှောင်​ထဲ၌​အသက်ရှင်​လျှောက်လှမ်း​နေ​ကြ​လျှင် ငါ​တို့​သည် လိမ်လည်​ပြောဆို​သည်​ဖြစ်၍ သမ္မာတရား​ကို​ကျင့်သုံး​နေ​ကြ​သည်​မ​ဟုတ်။” ‭‭ရှင်ယောဟန်ဩဝါဒစာပထမစောင်‬ ‭၁:၆

လူတွေမမြင်တဲ့နေရာမှာ ဘုရားနဲ့ မိတ်သဟာရဖွဲ့ခြင်းက မြင်ရတဲ့အသက်တာမှာ ထူးခြားမှုတွေကိုယူဆောင်လာပါတယ်။ ဘုရားနဲ့မိတ်သဟာရဖွဲ့လား? မဖွဲ့ဘူးလား?ဆိုတာ လိမ်ညာလို့ မရပါဘူး။ မှန်ကန်တဲ့ မိတ်သဟာရမှာ အသီးအပွင့်ရှိပါတယ်။ နှုတ်ကပတ်တော်အတိုင်းအသက်ရှင် ပြီးတော့ မှန်ကန်စွာ ဘုရားနဲ့ မိတ်သဟာရ ရှိလာတဲ့အခါမှာ မှောင်မိုက်ထဲအသက်ရှင်တဲ့ဘဝကနေ အလင်းရဲ့ရှင်သန်မှုတွေကိုနေ့စဉ် မြင်လာရတယ်။

ဇန်နဝါရီလ ၁၃ ရက်နေ့

“အကောင်းဆုံးကို ပဲရွေးချယ်ပါ

“ထို့ကြောင့် လက်တုံ့​မ​ပြန်​ဘဲ “သင့်​ရန်သူ​ဆာလောင်​လျှင် ကျွေးမွေး​လော့။ ရေငတ်​လျှင် သောက်​စရာ​ပေး​လော့။ ထိုသို့​ပြု​ခြင်း​အားဖြင့် သင်​သည် သူ​၏​ခေါင်း​ပေါ်၌ မီးခဲ​ကို​ပုံထား​လိမ့်မည်။” ‭‭ရောမဩဝါဒစာ‬ ‭၁၂:၂၀

ကိုယ့်အပေါ်မှာ ကောင်းတဲ့သူရော၊ မကောင်းတဲ့သူရော ဘယ်သူ့ကိုမဆို အကောင်းဆုံးပဲတုန့်ပြန်ပါ၊ အကောင်းဆုံးပဲပြုမူပါ၊ အကောင်းပဲ ပြောပါ။ ဘာတွေရသွားမလဲဆိုတာက သူတို့နဲ့ပဲ​ဆိုင်တယ်။ တချို့က ထင်တယ် ကိုယ့်ကို ဒီလောက်နှောင့်ယှက်တာ၊ ဒီလောက် ဒုက္ခပေးတာ အကောင်းဆုံးပြုမူတာနဲ့ တန်လို့လား? အကောင်းဆုံး တုန့်ပြန်တယ်ဆိုတာ သူတို့ တန်တာ မတန်တာကြောင့် မဟုတ်ဘူး၊ ဘုရားစကားကိုနားထောင်တာပါ။ ဘာရသွားမလဲဆိုတာကတော့ သူတို့ထားတဲ့ နှလုံးသားနဲ့ပဲဆိုင်တယ်။

ဇန်နဝါရီလ ၁၂ ရက်နေ့

ကောင်းချီးပေးခြင်းဖြင့် သာတုန့်ပြန်ပါ

“သင်​တို့​သည် ကောင်းချီး​မင်္ဂလာ​ကို အမွေ​ဆက်ခံ​ရ​မည့်အကြောင်း ခေါ်ယူ​တော်မူ​ခြင်း​ခံရ​သည်​ဖြစ်၍ အဆိုး​ကို အဆိုး​ဖြင့်​လည်းကောင်း၊ ကဲ့ရဲ့​ပြစ်တင်​ခြင်း​ကို ကဲ့ရဲ့​ပြစ်တင်​ခြင်း​ဖြင့်​လည်းကောင်း မ​တုံ့ပြန်​ဘဲ ကောင်းချီး​ကို​သာ​ပေး​ကြ​လော့။”‭‭ ရှင်ပေတရုဩဝါဒစာပထမစောင်‬ ‭၃:၉

ဘာတွေ​ရင်ဆိုင်ရသလဲဆိုတာထက် သင်ဘယ်လိုတုန့်ပြန်သလဲဆိုတာက ပိုအရေးကြီးတယ်။ ဘယ်လို အခြေအနေမှာမဆို ကောင်းချီးပေးခြင်းအားဖြင့် တုန့်ပြန်တတ်ဖို့က ကောာင်းချီးမင်္ဂလာကို အမွေဆက်ခံရတဲ့သူအတွက် လွန်စွာအရေးကြီးတယ်။ လူတွေကိုယ့်ကိုလုပ်သလိုပဲ လူတွေကိုပြန်လုပ်တာ အမွေခံတစ်ယောက်ရဲ့ အသက်ရှင်မှုမဟုတ်ဘူး။ လူတွေဆီကနေ ကောင်းတဲ့အရာမရလဲ အကောင်းဆုံး တုန့်ပြန်တာကပဲ ကောင်းကြီးမင်္ဂလာကို အမွေခံရတဲ့သူတွေရဲ့ရှင်သန်မှုဖြစ်တယ်။

ဇန်နဝါရီလ ၁၀ ရက်နေ့

အစ ထက် အဆုံး

“အ​မှု၏​အ​ဆုံး​သည် အ​စ​ထက်​သာ၍​ကောင်း၏။ သည်း​ခံ​တတ်​သော​သ​ဘော​ရှိ​သော​သူ​သည် မာ​န​ကြီး​သော​သူ​ထက် သာ၍​ကောင်း၏။” ဒေသနာ‬ ‭၇:၈

လူတိုင်း ဘယ်လို စသလဲဆိုတာကို ဂရုစိုက်တတ်ကြပေမဲ့၊ ဘုရားကတော့ ဘယ်လို အဆုံးသတ်သလဲ? ဆိုတာကိုပိုစိတ်ဝင်စားတယ်။ အစကတော့ ပြီးပြည့်စုံတဲ့သူရယ်လို့ မရှိတာများတယ်။ အမှုတော်မြတ်အစ၊ ယုံကြည်သူဖြစ်ကာစ၊ အိမ်ထောင်အစ၊ စီးပွါးရေးလုပ်ကာစတွေမှာ ရုန်းကန်ပြီးတော့ မပြည့်စုံတဲ့ အရာတွေ ရှိတတ်ပေမဲ့ ဘုရားနှင့် အတူ လုပ်ဆောင်ရင်း၊ ယုံကြည်ခြင်းနှင့် အသက်ရှင်တဲ့ အခါမှာတော့ အစထက် ကောင်းတဲ့ အဆုံးကို ပိုင်ဆိုင်ခွင့်ရခဲ့တာ များတယ်။ ကောင်းမွန်စွာ အဆုံးရောက်ရှိဖို့အတွက် သည်းခံတတ်တဲ့ သဘောက အရမ်းကို အရေးကြီးတယ်။ ဘယ်လို အရာကြုံကြုံ​သည်းခံပြီးတော့ အဆုံးထိ ဘုရားနဲ့သွားတဲ့သူတွေအတွက်တော့ အစထက် များစွာ ပိုကောင်း၊ ပိုပြီးခမ်းနားတဲ့ အဆုံးကို ပိုင်ဆိုင်ခွင့်ရပါလိမ့်မယ်။

ဇန်နဝါရီလ ၉ ရက်နေ့

အစနှင့်မတူတဲ့ အဆုံး

“ယောဘ​၏​ဘဝ​အစပိုင်း​ထက် နောက်ပိုင်း​ကို ထာဝရဘုရား ပို၍​ကောင်းချီးပေး​တော်မူ​သဖြင့်”၊ ‭‭ယောဘဝတ္ထု‬ ၄၂:၁၂

ဘဝရဲ့အစနှင့် အဆုံးကို နိုင်းယှဉ်ကြည့်ခြင်းအားဖြင့် လူတစ်ယောက်ရဲ့ဘုရားနဲ့ သွားလာခြင်းက ဘုရားနဲ့ အနီးမှာ အသက်ရှင်နေသလား? အဝေးမှာလား? ဆိုတာသိနိုင်တယ်။ အစပိုင်းတော့ ကောင်းပြီးတော့ နောက်ပိုင်း ယိုယွင်းပျက်စီးလာသလား? အစပိုင်းတော့ အားနည်းချက်တွေရှိပြီး နောက်ပိုင်းပိုကောင်းတဲ့ ဘဝအသက်တာကို ပိုင်ဆိုင်ထားသလား? အစနဲ့အဆုံးဟာ လူတစ်ယောက်ရဲ့ ဘုရားနဲ့ အနီးအဝေးမှာ အသက်ရှင်တဲ့ အရာကိုမြင်နိုင်တဲ့ အရာတစ်ခုပဲ။ ဘုရားအတူရှိပြီးတော့ ကောင်းကြီးပေးခြင်းခံရရင် သင်ဘယ်တော့မှ အစထက်အဆုံးမှာ လျော့နည်းသွားမှာ မဟုတ်တာသေချာတယ်။ အစထက် အဆုံးပိုင်းဟာ ပိုကောင်းတဲ့ဘဝနဲ့ ရှင်သန်ခွင့်ရမှာပါ။

ဇန်နဝါရီလ ၈ ရက်နေ့

အစမှာရှိတဲ့စိတ်ချမူ

“အကြောင်းမူကား ငါ​တို့​သည် အစ​၌​ရှိ​သော​စိတ်ချ​မှု​ကို အဆုံး​တိုင်အောင် ခိုင်မြဲ​စွာ​စွဲကိုင်​ထား​လျှင် ခရစ်တော်​နှင့်​စပ်ဆိုင်​သော​သူ​များ​ဖြစ်​ကြ​၏။” ဟေဗြဲဩဝါဒစာ‬ ‭၃:၁၄

နောက်ပိုင်း အဖျားရှုးသွားမယ်၊ ကောက်ရိုးမီးပါဆိုတဲ့စကားတွေကို ကြားဖူးမှာပါ။ အမှုတော်မြတ်မှာ စတင်ပြီးပါဝင်တဲ့ လူငယ်ဘဝမှာ ခဏခဏ အပြောခံရတဲ့စကားတွေထဲကတစ်ခုပဲ။ လူတွေက ဘုရားနဲ့ပတ်သက်ပြီးတောက်လောင်တဲ့အခါမှာ၊ အမှုတော်မြတ်မှာ လုပ်ဆောင်ဖို့ ဆုံးဖြတ်တဲ့အခါမှာ အဆုံးထိသွားမှာမဟုတ်ဘူး၊ နောက်ဆိုရင်ပေါ့လျော့လာမယ်ဆိုပြီးတော့ လှောင်ပြောင်တဲ့အနေနဲ့ ပြောကြတယ်။ ဒီလိုလူတွေလဲ အများကြီးရှိခဲ့ကြလို့လဲ အပြောခံရတာ လဲပါပါတယ်။ တကယ် ခရစ်တော်နှင့်စပ်ဆိုင်တဲ့သူ၊ ဘုရားခေါ်ထားတဲ့သူကတော့ လူတွေပြောတဲ့အတိုင်းတော့ လုံးဝမဟုတ်ဘူး။ အစပဲတက်ကြွ၊ အစပဲ ယုံကြည်ခြင်းမြင့်တတ်တဲ့သူတွေ၊ တောက်လောင်တဲ့သူတွေမဟုတ်ဘူး။ အစမှာရှိတဲ့ စိတ်ချမှု၊ ယုံကြည်ခြင်းက အဆုံးထိ ဒီအတိုင်းပဲယုံနေ၊ စိတ်ချနေမယ့်သူတွေဖြစ်တယ်။ နှစ်စမှာပဲ အကောင်းဆုံးလုပ်ပြီးတော့ အဆုံးမှာ ပေါ့လျော့တဲ့အထဲမှာ၊ ခရစ်တော်အထဲမှာ တကယ်အသက်ရှင်တဲ့သူတွေ မပါဘူး။

ဇန်နဝါရီလ ၇ ရက်နေ့

စစ်၍​မ​ကုန်​

သို့​ရာ​တွင်၊ ဘု​ရား​သ​ခင်​စီ​ရင်​တော်​မူ​သော​အ​မှု​ကို၊ အ​စ​မှ​အ​ဆုံး​တိုင်​အောင်၊ လူ​သည် စစ်၍​မ​ကုန်​နိုင်။” ဒေသနာ ၃:၁၁

အသက်တာ တစ်လျောက်မှာ ဘုရားပြုပေးခဲ့တဲ့အမှုမပြောနဲ့ ပြီးခဲ့တဲ့နှစ်တစ်ခုထဲမှာတောင် ပြုပေးခဲ့တဲ့အမူတွေက စစ်လို့တောင်မကုန်နိုင်ပါဘူး၊ ရေတွက်လို့လဲ မဆုံးဘူး။ ဒီနှစ်မှာလဲ သေချာတယ် မနေ့ ယနေ့ နောင်ကာလ မပြောင်းလဲ တဲ့ ဘုရားက ကြံစည်လို့မမှီနိုင်၊ တွက်ဆလို့မရနိုင်တဲ့ အမှုတွေ ပြုပေးအုံးမှာ သေချာတယ်။ ဒါကြောင့် အားငယ်စရာ စိတ်ပျက်စရာ ဘာအကြောင်းမှ မရှိဘူး။ ဘုရားရဲ့ကောင်းမြတ်ခြင်းကို မစစ်ပဲ ကိုယ့်ရဲ့အားနည်းချက်နဲ့ ပြဿနာ ကိုပဲစစ်နေသရွေ့ ဘယ်တော့မှ ဘုရားပြုပေးတဲ့အမှုကို မြင်ရအုံးမှာ မဟုတ်ဘူး။

ဇန်နဝါရီလ ၆ ရက်နေ့

ဘာကြောင့် အကျိုးမရှိလဲ?

“ကြည့်ရှု​လော့​။ သင်​တို့​သည် အကျိုး​မ​ရှိ​သော မုသား​စကား​ကို ယုံ​ကြ​၏​။” ယေရမိအနာဂတ္တိကျမ်း‬ ‭၇:၈

ကိုယ်ယုံတဲ့ အရာက အကျိုးမဖြစ်ထွန်းဘူးဆိုရင်၊ သေချာတယ် အကျိုးမရှိတဲ့ မုသာစကားကို ယုံမိနေလို့ ဖြစ်တယ်။ လူပေါင်းများစွာ သမ္မာတရားကို မယုံပဲ၊ မုသာ စကားတွေနဲ့ ပျော်မွှေ့နေကြတယ်။ ဒါကြောင့်ကောင်းကျိုး ဖြစ်လာမယ့်အစား၊ အကျိုးမဲ့တဲ့ အသက်တာပဲ ဖြစ်နေတယ်။ နှုတ်ကပတ်တော် သမ္မာတရားကို ယုံကြည်ခြင်းက ဘယ်တော့ မှ အကျိုးမမဲ့ဘူး။ သေချာပေါက် အဘက်ဘက်မှာ အကျိုး ဖြစ်ထွန်းမယ်။ မုသာတွေကို ယုံမိရင်တော့ သေချာတယ် ဘာ အကျိုးမှ ရှိလာမှာမဟုတ်ဘူး။

ဇန်နဝါရီလ ၅ ရက်နေ့

တူညီသောယုံကြည်ခြင်း

ငါ​သည် တူညီ​သော​ယုံကြည်​ခြင်း​အားဖြင့် စစ်မှန်​သော​ငါ့​သား​ဖြစ်​သည့်​တိတု​ထံသို့ ဤ​စာ​ကို ရေး​လိုက်​ပါ​၏။ ခမည်းတော်​ဘုရားသခင်​နှင့် ငါ​တို့​၏​ကယ်တင်ရှင်​ခရစ်တော်​ယေရှု​ထံမှ ကျေးဇူး​တော်​နှင့်​ငြိမ်သက်​ခြင်း​သည် သင်​၌​ရှိ​ပါစေသော။” တိတုဩဝါဒစာ ၁:၄

လက်တွဲ လုပ်ဆောင်ခြင်းမှာ ဘာအရေးကြီးလဲ လို့မေးရင်၊ တူညီတဲ့ရူပါရုံ ရှိဖို့လိုသလို၊ တူညီတဲ့ယုံကြည်ခြင်းရှိဖို့လဲ အရေးကြီးတယ်။ တချို့က ကိုယ့်ဝိညာဉ်ခေါင်းဆောင်လို့သာ ခေါ်ဆိုနေပေမဲ့ တူညီတဲ့ ယုံကြည်ခြင်းကို မရှိဘူး။ တူညီတဲ့ ယုံကြည်ခြင်းမရှိပဲ ရေရှည်လက်တွဲ လုပ်ဆောင်ဖို့၊ ရူပါရုံဆီကို ရေရှည်လက်တွဲဖို့ဆိုတာ မဖြစ်နိုင်ဘူး။ နှစ်ပေါင်းများစွာ လက်တွဲပြီးတော့ ဘုရားနိုင်ငံတော်ထဲမှာ လုပ်ဆောင်ခြင်း၊ အောင်မြင်ခြင်းက တူညီတဲ့ ယုံကြည်ခြင်းက အခြေခံပဲ။ တမန်တော်ကြီးရှင်ပေါလုက တိတုကို သူ့ရဲ့ယုံကြည်ခြင်းနှင့်တူညီတဲ့ စစ်မှန်တဲ့ သားလို့ ကြေငြာခဲ့တယ်။ ယုံကြည်ခြင်းမတူညီပဲနဲ့တော့ ဘယ်တော့မှ သားသမီး ဖြစ်လာစရာ အကြောင်းမရှိဘူး။ ဟန်ဆောင်တယ်ဆိုတာ ရေရှည်မခံဘူး။

ဇန်နဝါရီလ ၃ ရက်နေ့

သင် သွားရမယ့်လမ်း

“သင်​ကြံ​စည်​သော​အ​ကြံ​အ​စည်​သည် ထ​မြောက်၍၊ သင်​သွား​သော​လမ်း၌ ရောင်​ခြည်​ထွန်း​လိမ့်​မည်။” ယောဘ ၂၂:၂၈

နှစ်သစ်မှာ လျှောက်ရမယ့်လမ်းအတွက် စိုးရိမ်နေရတဲ့သူတွေရှိရင် ဘုရားကိုစိတ်ချစေချင်တယ်။ ဘုရားနဲ့မှန်ကန်တဲ့မိတ်ဿဟာရက သင့်ဘဝ၊ သင်သွားရမယ့်လမ်းကို အလင်းဖြစ်စေတယ်။ ဘုရားနဲ့ သွားလာတဲ့သူအတွက် အလင်းရှင် ဘုရားက အမြဲတမ်း အလင်းထွန်းလင်းပေးတယ်။ အလင်း ပျောက်မှာ ကြောက်စရာမလိုဘူး။ ဘုရားနဲ့ မှန်ကန်တဲ့ ဆက်သွယ်မှုမရှိရင်တော့ သေချာတယ် အလင်း ရှိမှာမဟုတ်ဘူး။ ဘုရားနဲ့မှန်ကန်တဲ့ ဆက်သွယ်မှုကပဲ အကြံအစည်တွေကို ထမြောက်အောင်မြင်စေပြီးတော့ သင့်ဘဝကို အလင်း ထွန်းလင်းပေးတယ်။ ကြံစည်တဲ့ အကြံစည်တိုင်းကို လဲ ထမြောက်အောင်မြင်စေတယ်။

ဇန်နဝါရီလ ၂ ရက်နေ့

ကြောက်ရွံ့ခြင်းနှင့်ကင်းတယ်

“ထာဝရဘုရား​သည် ငါ​၏​အလင်း​၊ ငါ့​ကို​ကယ်တင်​သော​အရှင်​ဖြစ်​တော်မူ​၏​။ ငါ​သည် မည်သူ့​ကို​ကြောက်​ရ​မည်နည်း​။ ထာဝရဘုရား​သည် ငါ့​အသက်​၏ မှီခို​ရာ​ဖြစ်​တော်မူ​၏​။ ငါ​သည် မည်သူ့​ကို​ကြောက်ရွံ့​ရ​မည်နည်း​။” ဆာလံကျမ်း ၂၇:၁

ကိုယ့်ရဲ့ အသက်တာမှာ ဘုရားထွန်းလင်းပေးတဲ့အလင်းကို သဘောမပေါက်တဲ့သူလောက် ဆုံးရှုံးတာ ဘာများရှိအုံးမလဲ? ဘုရားသားသမီးဖြစ်ပြီးတော့ အရာရာကို ကြောက်နေတယ်ဆိုရင်၊ အားငယ်တဲ့စိတ်နှင့်ဘဝကို ရှင်သန်နေရတယ်ဆိုရင် သေချာတယ် သင်ဟာ ဘုရားထံကလာတဲ့အလင်းကို သေချာ သဘောမပေါက်သေးဘူး။ အလင်းကို တကယ်သဘောပေါက်တဲ့သူအသက်တာကတော့ ဒါဝိဒ်လိုပဲ ကြောက်စရာတွေ မရှိတာ မဟုတ်ဘူး၊ ရှိပေမဲ့ မကြောက်တတ်တော့တာ။ ဘုရားရဲ့အလင်းနဲ့ ရှင်သန်နေတဲ့သူရဲ့ဘဝကို ဘယ်အရာကမှ ခြိမ်းခြောက်လို့ မရဘူး။

ဇန်နဝါရီလ ၁ ရက်နေ့

စိတ်မသာ ညည်းတွားရာကာလ ကုန်ပြီ

“နောက်​တစ်​ဖန် သင်၏​နေ​သည် မ​ဝင်​ရ။ သင်၏ လ​သည်​လည်း မ​ဆုတ်​ရ။ ထာ​ဝ​ရ​ဘု​ရား​သည် သင်၌ ထာ​ဝ​ရ​အ​လင်း​ဖြစ်​တော်​မူ၍၊ စိတ်​မ​သာ​ညည်း​တွား​ရာ ကာ​လ​ကုန်​လေ​ပြီ။” ဟေရှာယ ၆၀:၂၀

ဘုရားရဲ့အလင်း အသက်တာမှာ ပေါ်ထွန်းတဲ့အခါ လောကရဲ့ အလင်းနိယာမနဲ့ ဆန့်ကျင်ဘက်ဖြစ်သွားတယ်။ လောကမှာတော့ နေရဲ့ အလင်း နဲ့ လရဲ့ အလင်းက လင်းလိုက် မှောင်လိုက်ပဲ။ ဘုရားပေးတဲ့အလင်းကတော့ ဘယ်တော့မှ မမှောင်တော့ဘူး။ ဘယ်တော့မှ အလင်းကွယ်ပျောက်တယ်ဆိုတာ မရှိတော့ဘူး။ တောက်ပပြီးရင်း ပိုတောက်ပလာတယ်။ ဘုရားသားသမီးတစ်ယောက်ကို ဘယ်တော့များ မှေးမှိန်သွားမလဲ စောင့်နေရင် မောလိမ့်မယ်။ ဘယ်တော့မှ ဘယ်လိုမှ အလင်းက ပျောက်ကွယ်သွားစရာကို မရှိတော့ဘူး။ အလင်းနဲ့ စစ်မှန်စွာ အသက်ရှင်တဲ့သူရဲ့ဘဝမှာ စိတ်မသာ ညည်းတွားရာ ကာလဆိုတာကုန်ပြီ။ စိတ်ပျက်ခြင်းနှင့် အားငယ်ခြင်းအားလုံးက အလင်းရဲ့အောက်မှာ အမှောင်ပြေးသလို ပြေးထွက်သွားပြီ။

ဒီဇင်ဘာလ ၃၁ ရက်နေ့

ဘယ်သူမှ လွှမ်းမိုးလို့မရ

“ထို​အလင်း​သည် မှောင်မိုက်​၌​ထွန်းလင်း​၍ မှောင်မိုက်​သည် သူ့​ကို​မ​လွှမ်းမိုး​နိုင်။” ‭‭ရှင်ယောဟန်ခရစ်ဝင်‬ ‭၁:၅

အလင်းရဲ့ ဂုဏ်သတ္တိများစွာထဲက တစ်ခုက သူ့ကိုဘယ်သူမှ လွှမ်းမိုးချုပ်ကိုင်လို့မရတာပါပဲ။ အင်္ဂလိပ်ကျမ်းစာမှာတော့ မှောင်မိုက်က ဘယ်တော့မှ မနိုင်ဘူးလို့ဆိုတယ်။ ဘုရားပေတဲ့အလင်းနဲ့ ရှင်သန်တဲ့သူတစ်ယောက်ကို လောကကြီးက လွှမ်းမိုး အနိုင်ယူလို့မရဘူး။ အလင်းကပဲ​အရာခပ်သိမ်းကို လွှမ်းမိုးပြီးတော့အနိုင်ယူသွားပါလိမ့်မယ်။ ကိုယ့်အထဲမှာရှိတဲ့ ခရစ်တော်အားဖြင့်ရတဲ့ အလင်းကို သဘောပေါက်ဖို့လိုပြီး ယုံကြည်စိတ်ချဖို့လည်းလိုပါတယ်။ လောကသားတွေ၊ လောက ကြီးတစ်ခုလုံးက သင့်ကိုလွှမ်းမိုး ချုပ်ကိုင်လို့ မရမှာသေချာတယ်။ သင်ကပဲ လောကသားတွေနဲ့ လောကကြီးကိုလွှမ်းမိုး သွားပါလိမ့်မယ်။

ဒီဇင်ဘာလ ၃၀ ရက်နေ့

အခြေအနေတွေကို ပြောင်းပြန်လှန်နိုင်တယ်

“အ​ချင်း​ရန်​သူ၊ ငါ့​အ​ပေါ်​မှာ ဝါ​ကြွား​ဝမ်း​မြောက်​ခြင်း မ​ရှိ​နှင့်။ ငါ​လဲ​သော်​လည်း ထ​ဦး​မည်။ မှောင်​မိုက်၌ ထိုင်​ရ​သော်​လည်း၊ ထာ​ဝ​ရ​ဘု​ရား​သည် ငါ၏​အ​လင်း​ဖြစ်​တော်​မူ​လိမ့်​မည်။” မိက္ခာ ၇:၈

ဘုရားကို ဘဝရဲ့အလင်းအနေနဲ့ သဘောပေါက်လက်ခံတဲ့သူရဲ့ဘဝမှာ လက်ရှိအခြေအနေတွေ ဘယ်လောက်ဆိုးဆိုး အဲ့ဒီအခြေအနေတွေအားလုံးကို ပြောင်းပြန်လှန်နိုင်တယ်။ အခြေအနေဆိုးအောက်မှာ ဒူးထောက်ပြီးတော့ အရှုံးပေးကြတာဟာ ဘုရားရဲ့အလင်းကို သဘောမပေါက်လို့။ ဘုရားက ဘယ်လောက်မှောင်တဲ့ အခြေအနေထဲမှာမဆို အလင်းပေးနိုင်တဲ့ တစ်ခုတည်းသောသူပဲ။ ဒါကြောင့် မိက္ခာကပြောတယ် လက်ရှိအခြေအနေကိုကြည့်ပြီးတော့ ရှုံးပြီလို့ မသတ်မှတ်နဲ့။ လက်ရှိအခြေအနေနဲ့မဆိုင်တဲ့ဘဝကို ဘုရားရဲ့အလင်းက လုပ်ဆောင်ပေးလိမ့်မယ်ဆိုတာ သူက ကောင်းကောင်းယုံတယ်။

ဒီဇင်ဘာလ ၂၉ ရက်နေ့

အလင်းရဲ့နေရာ

“ဆီ​မီး​ထွန်း၍ တောင်း​ဇ​လား​အောက်၌ ဖုံး​ထား​လေ့​မ​ရှိ။ အိမ်​သူ​အိမ်​သား​အ​ပေါင်း​တို့​သည် အ​လင်း​ကို ရ​စေ​ခြင်း​ငှာ ဆီ​မီး​ခုံ​ပေါ်​မှာ တင်​ထား​လေ့​ရှိ၏။-” ရှင်မဿဲ‬ ‭၅:၁၅

ဘယ်သူကမှ အလင်းကို အနိမ့်မှာ ထားလေ့မရှိဘူး။ အလင်းမှာ သူနေရာနဲ့သူရှိတယ်။ အလင်းသာ မှန်ပါစေ သေချာတယ် အမြင့်မှာ နေရာချလိမ့်မယ်။ သခင်ယေရှုက ပြောတယ် သင်တို့က ဤလောကရဲ့ အလင်း။ အလင်းဆိုရင်တော့ မြင့်လေ ပိုပြီး လင်းလေပဲ။ ဒါကြောင့် အလင်းရဲ့နေရာက အမြင့်မှာပဲ။ သင့်ရဲ့ တာဝန်က လင်းဖို့ပဲ လိုတယ်။ လူတွေ နဲ့ ဘုရားက သေချာပေါက် အမြင့်မှာ ထားလိမ့်မယ့်။ အမြင့်မှာ ထားလေ အကျိုးသက်ရောက်မှုများလေပဲ။ အလင်းက အမြင့်ရောက်လေ လူတွေကို အကျိုးပြုလေပဲ။ အမြင့်ရောက်လို့မှ အကျိုး မပြုရင်သေချာတယ် စစ်မှန်တဲ့ အလင်း မဟုတ်သေးလို့ပဲ။

ဒီဇင်ဘာလ ၂၇ ရက်နေ့

မယုံတဲ့အတွက်

“အ​မတ်​က​လည်း၊ ထာ​ဝ​ရ​ဘု​ရား​သည် မိုး​ကောင်း​ကင်၌ ပြတင်း​ပေါက်​တို့​ကို ဖွင့်​လှစ်​တော်​မူ​လျှင်၊ ထို​သို့​ဖြစ်​နိုင်​ကောင်း​သည်​ဟု ဘု​ရား​သ​ခင်၏​လူ​အား​ဆို၍၊ ဘု​ရား​သ​ခင်၏​လူ​က သင်​သည်​ကိုယ်​မျက်​စိ​နှင့် မြင်​ရ​သော်​လည်း မ​စား​ရ​ဟု ပြန်​ပြော​သည်​အ​တိုင်း၊” ‭‭၄ ဓမ္မရာဇဝင်‬ ‭၇:၁၉

မြင်ပဲမြင်ရပြီး မခံစားရတဲ့အရာတွေအတွက် ဝမ်းနည်းဖူးလား? ဒီအရာတွေအတွက် တစ်စုံတစ်ယောက်ကို အပြစ်တင်နေဆဲလား? တကယ်တော့ မြင်ပဲမြင်ရပြီး အသက်တာမှာ မခံစားရတဲ့အရာအတွက် အဓိက တရားခံက ကိုယ်တိုင်ပါပဲ။ ယုံကြည်ခြင်းမရှိရင် ကောင်းတဲ့အရာတွေကို မြင်ပဲမြင်ရပြီးတော့ ဘယ်တော့မှ ကိုယ်တိုင်ခံစားပိုင်ဆိုင်ရမှာမဟုတ်ဘူး။ ဘုရားလူပြောတဲ့ ပရောဖက်ပြုချက်ကို မယုံပဲပြောခဲ့တဲ့ အမတ်က ကောင်းကြီးခံစားရတဲ့အရာကို ကိုယ်တိုင် မြင်ရပေမဲ့ မခံစားရခဲ့ရရှာဘူး။

ဒီဇင်ဘာလ ၂၆ ရက်နေ့

ယခုအတွက် ယုံပါ

“ယေရှု​က​လည်း“သင်​၏​မောင်​သည် ထမြောက်​မည်”​ဟု မိန့်​တော်မူ​လျှင် မာသ​က “နောက်ဆုံး​သော​နေ့​တည်းဟူသော ရှင်ပြန်​ထမြောက်​ရာ​ကာလ​၌ သူ​ထမြောက်​မည်​ကို ကျွန်မ​သိ​ပါ​သည်”​ဟု လျှောက်​လေ​၏။” ရှင်ယောဟန်ခရစ်ဝင် ၁၁:၂၃-၂၄

တချိန်ချိန်မှာ ဖြစ်လာမယ်ဆိုတာက ယုံကြည်ခြင်းမဟုတ်ဘူး မျှော်လင့်ခြင်းဖြစ်တယ်။ ယုံကြည်ခြင်းနှင့်မျှော်လင့်ခြင်းကို ရောထွေးနေကြတယ်။ တကယ်တော့ ယုံကြည်ခြင်းဆိုတာ မျှော်လင့်နေတဲ့ အနာဂတ်ကအရာကို အခုဖြစ်မယ်လို့ သိမှတ်စွဲလန်းခြင်းဖြစ်တယ်။ မာသကို သခင်ယေရှုကမေးတယ် သင့်မောင် ထမြောက်မယ်ဆိုတာ ယုံသလား? မာသကလည်း ယုံပါတယ်။ဒါပေမဲ့အခု အတွက်တော့မဟုတ်ဘူး တချိန်ချိန်မှာ ဖြစ်လာမယ်။ သခင်ယေရှုက ယခုထမြောက်ဖို့ ယုံခိုင်းပေမယ့် သူက တချိန်ချိန်မှာ ဖြစ်လာမယ့်အရာလို့ပဲ ခံယူနေတယ်။ တချို့အရာတွေနဲ့ လွဲနေတယ်ဆိုတာ ယုံကြည်ခြင်းလွဲနေသေးလို့ပါ။ ယုံကြည်ခြင်းသာမှန်သွားရင် ဖြစ်ပျက်လာမယ့် အရာတွေလဲ အကုန်လုံးမှန်သွားပါလိမ့်မယ်။

ဒီဇင်ဘာလ ၂၅ ရက်နေ့

စိတ်တော်နှင့်တွေ့စေသော ယုံကြည်ခြင်း (၂)

“ယုံကြည်​ခြင်း​မ​ရှိ​လျှင် ဘုရားသခင်​၏​စိတ်​တော်​နှင့်​မ​တွေ့​နိုင်။ အကြောင်းမူကား ဘုရားသခင်​ထံ​ချဉ်းကပ်​သော​သူ​သည် ဘုရားသခင်​ရှိ​တော်မူ​ကြောင်း​ကို​လည်းကောင်း၊ ဘုရားသခင်​သည် မိမိ​ကို​ရှာ​သော​သူ​တို့​အား အကျိုး​ပေး​တော်မူ​သော​အရှင်​ဖြစ်​ကြောင်း​ကို​လည်းကောင်း ယုံကြည်​ရ​မည်။” ဟေဗြဲဩဝါဒစာ‬ ‭၁၁:၆

ဘုရားသခင်ရဲ့ စစ်မှန်တဲ့သဘောသဘာဝကို နားမလည်ရင် မှန်ကန်တဲ့ ယုံကြည်ခြင်းရဖို့မလွယ်ဘူး။ ဘုရားကဘယ်လို နှလုံးသားရှိလဲဆိုတာသိဖို့ အရေးကြီးတယ်။ သူ့ နှလုံးသားကိုသိတဲ့အခါမှာ မှန်တဲ့ယုံကြည်ခြင်းကို ဖြစ်ပေါ်စေတယ်။ ဘုရားက သူ့ကို ရှာတဲ့သူတွေကို ဒုက္ခပေးတဲ့ ဘုရားမဟုတ်ဘူး။ အကျိုးကိုပေးတဲ့ ဘုရားဖြစ်တယ်။ ဒီအရာကို ယုံနိုင်တဲ့အခါမှာ ဘဝမှာ မဖြစ်နိုင်ဘူးဆိုတဲ့အရာတွေဖြစ်လာတော့တာပါပဲ။ ဘုရားကိုရှာလို့ ဒုက္ခရောက်တယ်လို့ ယုံနေသေးတယ်ဆိုရင် ယုံကြည်ခြင်းက မမှန်သေးဘူး။ ဘယ်တော့မှ ဘယ်သူကိုမှ သူ့ကိုရှာတဲ့သူတွေကို အကျိုးမနည်းစေတဲ့ သူပါ။

ဒီဇင်ဘာလ ၂၄ ရက်နေ့

စိတ်တော်နှင့်တွေ့သောယုံကြည်ခြင်း (၁)

“ယုံကြည်​ခြင်း​မ​ရှိ​လျှင် ဘုရားသခင်​၏​စိတ်​တော်​နှင့်​မ​တွေ့​နိုင်။ အကြောင်းမူကား ဘုရားသခင်​ထံ​ချဉ်းကပ်​သော​သူ​သည် ဘုရားသခင်​ရှိ​တော်မူ​ကြောင်း​ကို​လည်းကောင်း၊ ဘုရားသခင်​သည် မိမိ​ကို​ရှာ​သော​သူ​တို့​အား အကျိုး​ပေး​တော်မူ​သော​အရှင်​ဖြစ်​ကြောင်း​ကို​လည်းကောင်း ယုံကြည်​ရ​မည်။” ဟေဗြဲဩဝါဒစာ‬ ‭၁၁:၆

ယုံကြည်ခြင်းက လွန်စွာရိုးရှင်းပါတယ်။ မယုံကြည်ခြင်းက သာရှုပ်ထွေးတာပါ။ ဘုရားစိတ်တော်နှင့်တွေ့တဲ့၊ သဘောကျတဲ့ ယုံကြည်ခြင်းကတော့ ဘုရားရှိတယ်ဆိုတာ ယုံကြည်ဖို့ပါ။ ပြဿနာ ရှိတယ်၊ အခက်အခဲရှိတယ်ဆိုတာကိုတော့ လူတွေက ယုံကြည်ကြတယ် ဒါပေမဲ့ အဲ့ဒီ ပြဿာနတွေကို ဖြေရှင်းပေးမယ့် ဘုရားရှိတယ်ဆိုတာ ကျတော့ လူတွေက မယုံနိုင်ကြဘူး။ ဘယ်လို ကိစ္စကို မဆို ဖြေရှင်းပေးနိုင်တဲ့ ဘုရားရှိတယ်ဆိုတာကို မယုံနိုင်သရွေ့ ဘုရား လုပ်ပေးတဲ့အရာတွေကိုလဲ မြင်နိုင်တော့မှာ မဟုတ်ပါဘူး။

ဒီဇင်ဘာလ ၂၃ ရက်နေ့

အားလုံးဖြစ်နိုင်တယ်

“ယေရှု​က​လည်း“တတ်နိုင်​လျှင်​ဟု​ဆို​ရ​သလော။ ယုံကြည်​သော​သူ​အတွက် အရာ​ခပ်သိမ်း​သည် ဖြစ်နိုင်​၏”​ဟု မိန့်​တော်မူ​၏။” ရှင်မာကုခရစ်ဝင်‬ ‭၉:၂၃

မဖြစ်နိုင်တာ မဟုတ်ပါဘူး မယုံနိုင်တာပါ။ ယုံနိုင်တဲ့သူအတွက်တော့ အရာအားလုံးက ဖြစ်ကိုဖြစ်နိုင်ပါတယ်။ အရည်အချင်းပေါ်မှာ ရပ်တည်ရင်၊ ဒါမှ မဟုတ် ငွေကြေးပေါ်မှာ စဉ်းစားရင်တော့ မဖြစ်နိုင်စရာတွေ အများကြီး ရှိတယ်။ ယုံကြည်ခြင်း အပေါ်မှာ ရပ်တည်ရင်တော့ မဖြစ်နိုင်ဘူးဆိုတာ ဘာဆိုဘာမှမရှိပါဘူး။ ယုံကြည်ခြင်းက အရာရာကို ဖြစ်လာအောင်လုပ်ဆောင် ပေးနိုင်တဲ့ တစ်ခုတည်းသော အရာဖြစ်တယ်။

ဒီဇင်ဘာလ ၂၂ ရက်နေ့

သင့်ကို ကန့်သတ်ထားတဲ့အရာ

သင်​တို့ ယုံ​ခြင်း​ရှိ​သည်​အ​တိုင်း သင်​တို့၌​ဖြစ်​စေ​ဟု မိန့်​တော်​မူ​လျှင်၊-” ရှင်မဿဲ ၉:၂၉

ဘယ်အရာကများ သင့်ကို ကန့်သတ်ထားတယ်လို့ထင်သလဲ? ပတ်ဝန်းကျင်၊ ငွေကြေး၊ လူတွေနဲ့ နတ်ဆိုးတွေက သင့်ကို ကန့်သတ်ထားတယ်လို့ ထင်နေရင် မှားပါလိမ့်မယ်။ နောက်ဆုံး ဘုရားကိုယ်တိုင်ကတောင် သင့်ကို မကန့်သတ်ထားပါဘူး။ သင့်ကို အဓိက ကန့်သတ်ထားတဲ့အရာက သင့်ရဲ့ယုံကြည်ခြင်းပါပဲ။ သခင်ယေရှုက ပြောတယ် ဖြစ်လာသမျှအားလုံးက သင့်ရဲ့ ယုံကြည်ခြင်းနဲ့ပဲဆိုင်တယ်။ ဘုရားက သင်ယုံကြည်တဲ့အတိုင်း ဘဝကို ရှင်သန်ခွင့်ပေးပါတယ်။ ယုံကြည်ခြင်းကိုသာ ကန့်သတ် မထားရင် ဘဝမှာ ဘယ်အရာကမှ သင့်ကို ကန့်သတ်လို့မရနိုင်တော့ပါဘူး။

ဒီဇင်ဘာလ ၂၀ ရက်နေ့

အောင်မြင်ခြင်းပေးတဲ့ ကျေးဇူးတော်

“သို့သော် ငါ​တို့​သခင်​ယေရှု​ခရစ်တော်​အားဖြင့် ငါ​တို့​အား အောင်မြင်​ခြင်း​ကို​ပေး​တော်မူ​သော ဘုရားသခင်​၏​ကျေးဇူး​တော်​ကို​ချီးမွမ်း​၏။” ကောရိန္သုဩဝါဒစာပထမစောင် ၁၅:၅၇

ကိုယ်လုပ်မှ ကိုယ်ရမယ်လို့ ရိုက်သွင်းခံရပြီး ကြီးပြင်းလာတဲ့ အသိုင်းအဝိုင်းကြားမှာ ဘုရားလုပ်ပေးတဲ့ကျေးဇူးတော်အကြောင်းကို ယုံဖို့လောက် ခက်ခဲတာမရှိဘူး။ ကျေးဇူးတော်ကို ချီးမွမ်းတတ်တဲ့သူအတွက်ကတော့ အရာရာဟာ ဘုရားလုပ်ပေးတာချည်းပဲ။ မချီးမွမ်းနိုင်တဲ့သူတွေကို ကြည့်ရင် ကိုယ်လုပ်မှ ကိုယ်ရတယ်ဆိုတာကို လက်ခံထားကြတယ်။ တကယ်တော့ ယုံကြည်သူ ဘဝအသက်တာဆိုတာ ကိုယ်လုပ်နိုင်လို့ ရတယ်ဆိုတာ ဘာဆိုဘာမှမရှိတာ။ အားလုံးက သခင်ယေရှုခရစ်တော်အားဖြင့် ဘုရားသခင် ပေးသနားတာချည်းပါပဲ။ ဒါကို သဘောပေါက်တဲ့သူက အရာရာတိုင်း၊ အခြေအနေတိုင်းကို ကျေးဇူးတော်လို့ ဝန်ခံနိုင်တယ်၊ ကျေးဇူးတော်ကိုချီးမွမ်းနိုင်တယ်။

ဒီဇင်ဘာလ ၁၉ ရက်နေ့

ရန်သူတွေကို ရှုံးနိမ့်စေသော ချီးမွမ်းခြင်း

“ထိုသို့ စတင်​ချီးမွမ်း​သီဆို​လိုက်​သည်​နှင့် ယုဒ​ပြည်​ကို ဝင်ရောက်​ကျူးကျော်​သည့် အမ္မုန်​အမျိုးသား​၊ မောဘ​အမျိုးသား​နှင့် စိရ​တောင်ပေါ်သား​တို့​အား ချောင်းမြောင်း​တိုက်ခိုက်မှု​ကို ထာဝရဘုရား​ဖြစ်စေ​တော်မူ​သဖြင့် သူ​တို့ ရှုံးနိမ့်​သွား​လေ​၏​။” ရာဇဝင်ချုပ်ဒုတိယစောင် ၂၀:၂၂

ပတ်လည်ဝိုင်းထားတဲ့ ရန်သူတွေကို ကြည့်ပြီးတော့ အနာဂတ်ပျောက်နေတဲ့ သူတွေအတွက် ပရောဖက် ထံကနေ သတင်းစကားရောက်လာတယ်။ စစ်မှုဟာ သင်တို့ တာဝန်မဟုတ်ဘူး ဘုရားတာဝန်ယူမယ်။ ဘယ်လောက်တောင် ကောင်းလိုက်တဲ့ အာမခံချက်လဲ? ဒါကြောင့် စစ်မှုကိုရင်ဆိုင်တဲ့အခါမှာ လက်နက်တွေကိုင်ထားတဲ့ သူ‌တွေက ရှေ့ကမသွားပဲ ဘုရားကိုချီးမွမ်းတဲ့သူတွေကို ရှေ့ကနေ သွားခိုင်းတယ်။ ဒီဆုံးဖြတ်ချက်ကဘယ်လောက်မှန်သလဲဆိုရင် ရန်သူတွေက တိုက်စရာမလိုပဲ အချင်းချင်း တိုက်ခိုက်ပြီးတော့ ရှုံးနိမ့်သွားကြတယ်။ တချို့ပြဿနာတွေက သင်တိုက်ဖို့မဟုတ်ဘူးဆိုတာသိရင် စိတ်ပျက်တော့မှာ မဟုတ်ဘူး ချီးမွမ်းနေတော့မှာ သေချာတယ်။

ဒီဇင်ဘာလ ၁၈ ရက်နေ့

ကျေးဇူးတော်ကြောင့်သာ

“အ​ကျွန်ုပ်​မူ​ကား၊ ကျေး​ဇူး​တော်​ကို ချီး​မွမ်း​သော​စ​ကား​နှင့် ကိုယ်​တော်​အား ယဇ်​ပူ​ဇော်​ပါ​မည်။ သ​စ္စာ​က​တိ​ထား​သည်​အ​တိုင်း သ​စ္စာ​ဝတ်​ကို ပြု​ပါ​မည်။ ထာ​ဝ​ရ​ဘု​ရား၏​ကျေး​ဇူး​တော်​ကြောင့် ချမ်း​သာ​ရ​ပါ​သည်​ဟု ဆု​တောင်း​လေ၏။” ယောန‬ ‭၂:၉

ငြီးတွားခြင်းနှင့်အပြစ်တင်ခြင်းက လက်ရှိဘဝကနေ လွတ်အောင် မစွမ်းဆောင်နိုင်ပါဘူး။ ဘုရားရဲ့ကျေးဇူးတော်ကို သဘောပေါက်ပြီးတော့ ချီးမွမ်းခြင်းကသာ ပိတ်နေတဲ့လမ်းတွေကို ပွင့်စေနိုင်တယ်။ ဘုရားသွားခိုင်းတဲ့ နေရာကို ယောနမသွားပဲ၊ ဆန့်ကျင်ဘက်ကို သွားတဲ့အခါမှာ အဆင်ပြေတာထက် အဆင်မပြေတာတွေ ပိုများလာတယ်။ နောက်ဆုံး ငါးကြီးရဲ့ဝမ်းဗိုက်ထဲ မှာ သုံးရက်လုံး အကျဉ်းအကျပ်ထဲ ကျရောက်ခဲ့တယ်။ နောက်ဆုံး ကျေးဇူးတော်ချီးမွမ်းခြင်းကသာ အကျဉ်းအကျပ်ထဲကနေ လွတ်မြောက်ရာလမ်းကို ဖြစ်စေခဲ့တယ်။ ဘုရား ရောက်စေချင်တဲ့ နေရာကိုလဲ ကျေးဇူးတော်ချီးမွမ်းခြင်းကသာ ပို့ဆောင်ပေးခဲ့တယ်။

ဒီဇင်ဘာလ ၁၇ ရက်နေ့

ဝိညာဉ်တော်ရဲ့အရှိန် မငြိမ်းစေဖို့

“အရာရာ​၌ ကျေးဇူး​တော်​ချီးမွမ်း​ကြ​လော့​။ အကြောင်းမူကား သင်​တို့​သည် ထိုသို့​ပြု​ကြ​ရန် ခရစ်တော်​ယေရှု​၌ ဘုရားသခင်​အလို​ရှိ​တော်မူ​၏​။ ဝိညာဉ်​တော်​၏​အရှိန်​ကို မ​ငြိမ်း​စေ​ကြ​နှင့်။” သက်သာလောနိတ်ဩဝါဒစာပထမစောင် ၅:၁၈-၁၉

သန့်ရှင်းသောဝိညာဉ်တော် ရဲ့အရှိန် မရှိတော့ရင် အသက်တာက ဘယ်လောက်တောင် အန္တရယ်ရှိသလဲဆိုတာ လူတချို့က မသိကြဘူး။ သန့်ရှင်းသောဝိညာဉ်တော်ရဲ့ အရှိန်ကိုကျစေတဲ့ အဓိကအကြောင်းအရင်းကတော့ အသက်တာမှာ ကြုံသမျှ အရာတွေကို ကျေးဇူးတော် မချီးမွမ်းပဲ အပြစ်တင်ခြင်းပါပဲ။ ဘုရားရဲ့အလိုတော်က တွေ့ကြုံသမျှအားလုံးမှာ ကျေးဇူးတော်ချီးမွမ်းခြင်းနှင့်ဖြတ်သန်းဖို့ပါ။ ကျေးဇူးတော်ချီးမွမ်းခြင်းရဲ့အဓိပ္ပါယ်က ဘုရားပေးတွေ့တယ်၊ ဘုရားတာဝန်ယူမယ်ဆိုတာကို စိတ်ချခြင်းဖြစ်တယ်။ အရာရာကို ဘုရားပဲထိန်းချုပ်ထားပြီး‌တော့၊ ဘုရားပဲဉီးဆောင်နေတယ်လို့ ယုံကြည်တဲ့သူတွေ ချီးမွမ်းနိုင်တယ်။ မဟုတ်ရင်တော့ စိတ်ပျက်နေတာနဲ့ပဲ ဝိညာဉ်တော်ရဲ့အရှိန်က ငြိမ်းသွားလိမ့်မယ်။

ဒီဇင်ဘာလ ၁၆ ရက်နေ့

ကျေးဇူးတော်ကို ဝန်ခံခြင်း

“ကျေး​ဇူး​တော်​ကြီး​ပါ​သည်​ဟု ဝန်​ခံ​လျက်၊ တံ​ခါး​တော်​တို့​ကို​လည်း​ကောင်း၊ ဂုဏ်​တော်​ကို​ချီး​မွမ်း​လျက် တံ​တိုင်း​တော်​တို့​ကို​လည်း​ကောင်း ဝင်​ကြ​လော့။ ကျေး​ဇူး​တော်​ကို ချီး​မွမ်း၍ နာ​မ​တော်​ကို ကောင်း​ချီး​ပေး​ကြ​လော့။” ဆာလံ‬ ‭၁၀၀:၄

ကျေးဇူးတင်ခြင်းက ဘုရားရဲ့ အနီးဆုံးကို တိုးဝင်ခြင်းဖြစ်ပြီး၊ ဆန့်ကြင်ဘက်ဖြစ်တဲ့ အပြစ်တင်ခြင်းကတော့ အဝေးဆုံး ထွက်ခွါခြင်းပါပဲ။ လူတွေက ဘုရားနဲ့ အနီးဆုံးမှာ အသက်ရှင်ခြင်ပေမဲ့ ငြီးတွား အပြစ်တင် ခြင်းကိုတော့ မရပ်တန့်ကြဘူး။ ငြီးတွားအပြစ်တင်ခြင်းက စာတန်ကို ခေါ်ဖိတ်တဲ့ တေးဂီတ ဖြစ်ပြီး ၊ ချီးမွမ်းကျေးဇူးတင်ခြင်းကတော့ ဘုရားကိုနေရာပေးခြင်းပါပဲ။

ဒီဇင်ဘာလ ၁၅ ရက်နေ့

ချီးမွမ်းတတ်ရင်

“ကျေးဇူးတော်​ချီးမွမ်း​ခြင်း​ယဇ်​ကို​ပူဇော်​သော​သူ​သည် ငါ့​ကို​ဂုဏ်ပြုချီးမွမ်း​သော​သူ​ဖြစ်​၏​။ မိမိ​လမ်းခရီး​ကို​ပြင်ဆင်​သော​သူ​အား​လည်း ဘုရားသခင်​၏​ကယ်တင်​ခြင်း​ကို ငါ​ပြသ​မည်​”​ဟု မိန့်​တော်မူ​၏​။” ဆာလံကျမ်း‬ ‭၅၀:၂၃

ကျေးဇူးတင်တတ်ရင် ကျေးဇူးတင်စရာ အကြောင်းတွေထပ်တွေ့ပါလိမ့်မယ်။ ဘဝမှာ ကြုံလေရာရာက ကျေးဇူးတော်ကြောင့်ဆိုတာကိုနားလည်ရင်၊ ကျေးဇူးတော်ချီးမွမ်းတတ်ရင် ထပ်ပြီးတော့ ကျေးဇူးတော်ချီးမွမ်းစရာတွေက တစ်ခုပြီး တစ်ခု ပေါ်လာလိမ့်မယ်။ ကျေးဇူးတင်တတ်တဲ့သူအသက်တာမှာ ဆက်ပြီးတော့ သွားရမယ့်လမ်း သေချာပေါက် ပေါ်လာပါလိမ့်မယ်။ လူတချို့က လမ်းပျောက်နေကြတယ်။ လာမယ့်ကာလအတွက် ဘယ်လို ဆက်သွားရမလဲဆိုတာ တွေးကြည့်လို့တောင်မရဘူး။ ကျေးဇူးတော်ချီးမွမ်းတဲ့အသက်တာမှာတော့ လာမယ့်အနာဂတ်လမ်းကို ကောင်းကောင်းကြီး ဆင်ခြင်နိုင်အောင် ဘုရားက လုပ်ဆောင်ပေးတယ်။ လမ်းကိုပဲ မြင်တာ မဟုတ်ဘူး အဲ့ဒီလမ်းကို အောင်မြင်ခြင်းနဲ့လျှောက်နိုင်အောင်လဲ ဘုရားက မစပါလိမ့်မယ်။

ဒီဇင်ဘာလ ၁၃ ရက်နေ့

မခေါ်မှီကပင် ထူး

“သူ​တို့​မ​ခေါ်​မီ ငါ​ထူး​မည်​။ သူ​တို့​တောင်းလျှောက်​နေစဉ် ငါ​နားထောင်​မည်​။” ဟေရှာယအနာဂတ္တိကျမ်း‬ ‭၆၅:၂၄

ဘုရားက ခေါ်မှထူး၊ တောင်းမှပေးတဲ့ ဘုရားမဟုတ်ဘူး။ တချို့ဆိုရင် ခေါ်ရင်လဲ မထူး ၊တောင်းရင်လဲ မပေး တတ်ဘူး။ ဘုရားကတော့ သင် မခေါ်မိီကပင် ထူးတတ်တယ်။ ကိုယ်တိုင်တောင် တောင်းဖို့ သတိမရတဲ့အရာတွေ၊ မေ့လျော့ နေတဲ့အရာတွေ အများကြီးရှိတယ်။ ဒါပေမဲ့ ဘုရားက သူချစ်တဲ့သူတွေအတွက် အမြဲတမ်း ကူညီမစဖို့၊ ကောင်းတဲ့အရာတွေပေးဖို့အတွက် အဆင်သင့်ဖြစ်နေတယ်။ ဘဝမှာ ပြန်စမ်းစစ်ကြည့်ရင် ကိုယ်တောင်းခဲ့တဲ့အရာတွေ၊ ကိုယ်လိုအပ်တဲ့အရာတွေထက် ပိုပြီးတော့ ဘုရားကူညီမစခဲ့တာကို မြင်တွေ့ရပါလိမ့်မယ်။

ဒီဇင်ဘာလ ၁၂ ရက်နေ့

ခေါ်တဲ့သူရတဲ့ ရလဒ်

“သူ​သည် ငါ့​ကို​ခေါ်​သောအခါ သူ့​ကို​ငါ​ထူး​မည်​။ ဆင်းရဲဒုက္ခ​ရောက်​သောအခါ သူ​နှင့်အတူ​ငါ​ရှိ​မည်​။ ငါ​သည် သူ့​ကို​ကယ်မ​၍ သူ့​ကို​ဂုဏ်ပြု​မည်​။” ဆာလံကျမ်း‬ ‭၉၁:၁၅

အရည်အချင်းရှိတဲ့သူတွေ ဂုဏ်ပြုခံရတယ်ဆိုတာ ထုံးစံပါပဲ။ ဒါပေမဲ့ ဘုရားကိုခေါ်တဲ့သူ၊ အားကိုးတတ်တဲ့သူ ဂုဏ်ပြုခံရတာကတော့ အရမ်းကို ထူးဆန်းပါတယ်။ ဘုရားက သူ့ကို ယုံကြည်ခြင်းနှင့် ခေါ်တဲ့သူကို ဆင်းရဲခြင်းကပဲ လွတ်မြောက်စေတာမဟုတ်ဘူး။ သူကိုယ်တိုင် အတူဖြတ်သန်းပြီးတော့ ကယ်မခြင်းနှင့်အတူ ဂုဏ်ပြုချီးမြှောက်ခြင်းကို ခံစားစေတယ်။

ဒီဇင်ဘာလ ၁၁ ရက်နေ့

ခေါ်တိုင်း ထူးစေချင်ရင်

“ထို​အ​မှု​ရောက်​သော​သူ​တို့​သည် ငါ့​ကို​ခေါ်​သော်​လည်း ငါ​မ​ထူး။ ငါ့​ကို​ကြိုး​စား၍ ရှာ​သော်​လည်း မ​တွေ့​ရ​ကြ။”‭‭သုတ္တံ‬ ‭၁:၂၈

ဘုရားကိုခေါ်တဲ့အခါမှာ ဘုရားဘက်ကနေ တုန့်ပြန်တဲ့ ထူးတဲ့အရာကို လူတိုင်းလိုချင်ကြတယ်။ ကိုယ်ခေါ်တိုင်း ထူးစေချင်ရင် ဘုရားခေါ်တဲ့အခါမှာလဲ ကိုယ်က ပြန်ပြီး တုန့်ပြန်တတ်ဖို့လိုတယ်။ ဘုရားခေါ်တဲ့အခါမှာကိုယ်က မထူးပဲ၊ ကိုယ်ခေါ်တဲ့အခါမှာပဲထူးစေချင်လို့မရဘူး။ အမြဲတမ်း ဘုရားခေါ်သံကို တုန့်ပြန်တတ်တဲ့ အလေ့အကျင့် လုပ်ဖို့လိုတယ်။ ဘုရားခေါ်တဲ့အခါတိုင်း၊ ဘုရားနိုးဆော်တဲ့အခါတိုင်းမှာ မှန်ကန်စွာတုန့်ပြန်တတ်တဲ့သူတွေ ဘုရားကို ခေါ်တဲ့အခါမှာ ဘုရားကအမြဲတမ်း လျှင်မြန်စွာထူးလေ့ရှိတယ်။

ဒီဇင်ဘာလ ၁၀ ရက်နေ့

မယုံနိုင်အောင် ထူးတယ်

“ငါ​ခေါ်၍ အ​ရှင်​သည် ထူး​တော်​မူ​သော်​လည်း၊ ငါ့​စ​ကား​ကို နား​ထောင်​တော်​မူ​မည်​ဟု ငါ​မ​ယုံ​နိုင်။” ယောဘ‬ ‭၉:၁၆

အနာရောဂါတွေ ပြဿနာတွေနဲ့ရုန်းကန်နေရတဲ့ ယောဘရဲ့ယုံကြည်ခြင်းက အဆိုးဆုံးထိကျဆင်းသွားတယ်။ အခက်အခဲတွေ ရင်ဆိုင်ရတဲ့ အခါမှာ လူတိုင်းဖြစ်လေ့ ရှိကြပါတယ်။ ဘုရားကတော့ အဆိုးဆုံးအခြေအနေမှာတောင် သူ့သားသမီးတွေ​ခေါ်ရင် ထူးဖို့ Ready ရှိနေတယ်။ ဘယ်တော့မှ​ ပစ်ထားဖို့၊ မကြားချင်ယောင်ဆောင်ပြီးနေဖို့ ဆန္ဒမရှိဘူး။ ဘယ်လိုအခြေအနေ၊ ဘယ်လို ပြဿနာမျိုး ကြားထဲကမဆို ခေါ် ရင် သူဟာ ထူးတယ်။ ယောဘဟာ ပြဿနာများလွန်းလို့ သူခေါ်ရင် ဘုရားထူး မယ်ဆိုတာကိုတောင် မယုံနိုင်တော့ဘူး။ ဘုရားကိုယုံပါ ဘယ်လို အခြေအနေ၊ ဘယ်လို အခက်အခဲမျိုး ကြားထဲကမဆို သင်ခေါ်ရင် ထူးကိုထူးတယ်။

ဒီဇင်ဘာလ ၉ ရက်နေ့

ခေါ်တဲ့သူပဲ သိခွင့်ရမယ့်အရာ

“‘ငါ့​ကို​ခေါ်​လော့​။ ငါ​ထူး​မည်​။ သင်​မ​သိ နား​မ​လည်​နိုင်​သော ကြီးမြတ်​သော​အရာ​၊ ကွယ်ဝှက်​ထား​သော​အရာ​တို့​ကို သင့်​အား​ပြောပြ​မည်’​ဟု မိန့်​တော်မူ​၏​။” ‭‭ယေရမိအနာဂတ္တိကျမ်း‬ ‭၃၃:၃

ဘဝမှာ နားမလည်နိုင်တဲ့ အရာတွေ အများကြီးရှိတယ်ဆိုတာ ငြင်းမရပါဘူး။ ကျောင်းတွေမှာလဲ သင်မပေးသလို၊ ဘယ်လူကမှလဲ ရှင်းမပြနိုင်တဲ့ အရာတွေများစွာရှိတယ်။ ဒီလို အရာတွေကို နားလည်ချင်တယ်၊ သဘောပေါက်ချင်တယ်ဆိုရင် ဘုရားကို ခေါ်ဖို့၊ အားကိုးတတ်ဖို့လိုတယ်။ ဘုရားက သူ့ကို ယုံကြည်စွာနဲ့ခေါ်တဲ့သူတွေကို လူ့အသိနှင့် နားမလည်နိုင်တဲ့ ကြီးမြတ်တဲ့အရာတွေကို အမြဲတမ်း နားလည်စေတယ်။ သာမန်ကိစ္စတွေလောက်ပဲမဟုတ်ဘူး။ အခြားသူတွေ အတွက် ကွယ်ဝှက်ထားတဲ့အရာတွေကိုလဲ သူ့ကိုခေါ်တဲ့သူတွေကိုအမြဲတမ်း ဖွင့်ပြနားလည်စေတယ်။ အရေးကြီးဆုံးက နှလုံးသားထဲကနေ အားကိုးပြီးခေါ်တတ်ဖို့ပဲလိုတယ်။

ဒီဇင်ဘာလ ၈ ရက်နေ့

ခေါ်သောအခါ

“အကျွန်ုပ်​ခေါ်​သော​နေ့​၌ ကိုယ်တော်​သည် အကျွန်ုပ်​ကို​ထူး​တော်မူ​၍ အကျွန်ုပ်​၏​စိတ်ဝိညာဉ်​ကို အစွမ်းသတ္တိ​နှင့်​ပြည့်​စေ​တော်မူ​၏​။” ဆာလံကျမ်း‬ ‭၁၃၈:၃

နေ့တိုင်း ဘုရားကိုခေါ်ပေမဲ့ ထူးသံမကြားရဘူးလို့ လူအချို့က ထင်နေတတ်တယ်။ ကြားရတဲ့အသံနဲ့ ပြန်ပြီးတော့ ထူးချင်မှ ထူးလိမ့်မယ်။ ဘုရားကိုခေါ်တဲ့သူရဲ့အသက်တာမှာ ထူးလာတဲ့အရာတွေအများကြီးရှိတယ်။ စိတ်

ဝိညာဉ်ထဲမှာ အစွမ်းသတ္တိတွေနှင့် ပြည့်စုံပြီးတော့ အရင်ကနဲ့မတူတဲ့ အသက်တာ ဘုရားကိုခေါ်တဲ့သူ ခံစားရတယ်။ အသံနဲ့ မထူးရင်တောင်မှ အသက်တာမှာ ထူးခြားလာတာကိုတော့သေချာပေါက်မြင်ရပါလိမ့်မယ်။

ဒီဇင်ဘာလ ၆ ရက်နေ့

ဘုရားအတူမပါရှိရင်

“မောရှေ​က​လည်း “​ကိုယ်တော်တိုင် ကြွ​တော်​မ​မူ​လျှင် အကျွန်ုပ်​တို့​ကို ဤ​နေရာ​မှ သွား​စေ​တော်​မ​မူ​ပါ​နှင့်​။”‭‭ထွက်မြောက်ရာကျမ်း‬ ‭၃၃:၁၅

မောရှေရဲ့ဆုံးဖြတ်ချက်က ကောင်းတဲ့နေရာ၊ကောင်းတဲ့ အရာတွေကို ရချင်တာ မဟုတ်ဘူး။ ဘုရားအတူပါရှိခြင်းကိုတန်ဖိုးထားတဲ့သူအတွက် ကျန်တဲ့အရာတွေက ဘုရားလောက် အရေးမကြီးပါဘူး။ ဒါကို မောရှေက ကောင်းကောင်းသဘောပေါက်သလို၊ လက်တွေ့ လုပ်ဆောင်တဲ့သူပါ။ ဘုရားက ခါနန်ပြည်ကို သွားဖို့ ကောင်းကင်တမန်ကိုပဲဉီးဆောင်ပြီး သူမပါတော့ ကြောင်းပြောတဲ့အခါမှာ၊ မောရှေက သူ့ရည်ရွယ်ချက်ဖြစ်တဲ့ ခါနန်ပြည်ထက် ဘုရားအတူပါရှိခြင်းကိုပိုတန်ဖိုးထားတယ်။

ဒီဇင်ဘာလ ၅ ရက်နေ့

ဘုရားအတူရှိခြင်းကို စိတ်ချခြင်း

“ယုံ​ကြည်​ခြင်း​မ​ရှိ​လျှင်၊ ဘု​ရား​သ​ခင်၏ စိတ်​တော်​နှင့်​မ​တွေ့​နိုင်။ အ​ကြောင်း​မူ​ကား၊ ဘု​ရား​သ​ခင့် အ​ထံ​တော်​သို့ ချဉ်း​ကပ်​သော​သူ​သည်၊ ဘု​ရား​သ​ခင် ရှိ​တော်​မူ​သည်​ကို​လည်း​ကောင်း၊ ကိုယ်​တော်​ကို ရှာ​သော​သူ​အား အ​ကျိုး​ပေး​တော်​မူ​သည်​ကို​လည်း​ကောင်း၊ ယုံ​ကြည်​ရ​မည်။-” ဟေဗြဲ‬ ‭၁၁:၆

ဘုရားသခင် အတူရှိတယ်ဆိုတာကို မယုံနိုင်သေးသရွေ့ ဘယ်တော့မှ ဘုရားရဲ့ ကျေနပ်အားရခြင်းကို ရရှိမှာမဟုတ်ဘူး။ ဘုရားကျေနပ်တဲ့ စိတ်တော်နှင့်တွေ့တဲ့ ယုံကြည်ခြင်း ဆိုတာ ဘယ်လို အခြေအနေမျိုးမဆို၊ ဘယ်လို အရာတွေကိုပဲ​ကြုံနေရ၊ ကြုံနေရ ဘုရားက ကိုယ်နဲ့အတူရှိတယ်၊ အားလုံးကိုဖြေရှင်းပေးဖို့ သူအနားမှာ ရှိတယ်ဆိုတာကို အကြွင်းမဲ့ယုံဖို့လိုတယ်။ မဟုတ်ရင် ဘယ်တော့မှ အပြောင်းအလဲကို ဖြစ်စေမှာ မဟုတ်သလို ဘုရားပေးတဲ့ အကျိုးကိုလဲ ထင်ရှားစွာ မြင်တွေ့ရမှာ မဟုတ်ဘူး။

ဒီဇင်ဘာလ ၄ ရက်နေ့

လုပ်ဆောင်လေရာရာမှာ

“ထာဝရဘုရား​သည် ဒါဝိဒ်​နှင့်အတူ ပါရှိ​တော်မူ​သဖြင့် သူ​လုပ်ဆောင်​လေရာရာ​တို့​၌ အောင်မြင်​မှု​ရရှိ​လေ​၏​။” ‭‭ဓမ္မရာဇဝင်ပထမစောင်‬ ‭၁၈:၁၄

လုပ်သမျှမှာ အောင်မြင်တဲ့ဘဝဆိုတာ လူတိုင်း စိတ်ကူးယဉ် ဖြစ်ချင်တဲ့ဘဝပါပဲ။ ဒီဘဝကို ရောက်ဖို့ ကြိုးစားနေကြတယ်။ ဘာလုပ်လုပ် ရာနှုန်းပြည့် အောင်မြင်မှုကို မြင်တွေ့ရတယ်။ ဒီလိုဘဝမျိုးကို ဒါဝိဒ်လဲ ပိုင်ဆိုင်ခွင့်ရခဲ့တယ်။ သူ့ရဲ့ အထက်လူကြီးဖြစ်တဲ့ ရှောလုက သူ့ကို မကြည်ဖြူပဲ တစ်ချိန်လုံးအပြစ်ရှာပြီး ရှင်းပစ်ဖို့ကြိုးစားနေတဲ့ကြားက သူဟာ လုပ်သမျှမှာ အောင်မြင်ခဲ့တယ်။ ဒီလို ဘဝမျိုးပိုင်ဆိုင်ခွင့်ရတာဟာ အခြားကြောင့်တော့မဟုတ်ဘူး။ ဘုရားအတူပါရှိခြင်း သက်သက်ကြောင့်ပဲ။

ဒီဇင်ဘာလ ၃ ရက်နေ့

မောရှေနှင့်အတူရှိသလို

“ထာ​ဝ​ရ​ဘု​ရား​က​လည်း၊ ယော​ရှု​ကို​ခေါ်၍ ငါ​သည် မော​ရှေ​နှင့်​အ​တူ​ရှိ​သ​ကဲ့​သို့ သင်​နှင့်​အ​တူ​ရှိ​သည်​ကို ဣ​သ​ရေ​လ အ​မျိုး​သား​အ​ပေါင်း​တို့​သည် သိ​ကြ​မည်​အ​ကြောင်း၊ သူ​တို့​မျက်​မှောက်၌ သင့်​ကို ယ​နေ့​ငါ​ချီး​မြှင့်​စ​ပြု​မည်။”‭‭ယောရှု‬ ‭၃:၇

လောကမှာ မွေးဖွားဖို့အတွက် အစပြုပေးတဲ့ဖခင်ရှိသလို၊ ဝိညာဉ်ရေးရာမှာလဲ အစပြုပေးခဲ့တဲ့ ခေါင်းဆောင်ကြီးတွေဆိုတာ အောင်မြင်တဲ့ လူတိုင်းမှာရှိပါတယ်။ ဒီလို ခေါင်းဆောင်ကြီးတွေကဘယ်လောက်တောင် အရေးကြီးသလဲဆိုရင် သူနဲ့ဘုရားအတူရှိပြီး အလုပ်လုပ်သလို ကို သူတို့မွေးထုတ်ပေးလိုက်တဲ့သူတွေနဲ့လဲ ဘုရားက အလုပ်

လုပ်မှာဖြစ်တယ်။ ယောရူကို ဘုရားက မောရှေနဲ့ အတူရှိသလို ရှိမယ်လို့ ကတိပေးခဲ့တယ်။ ဒီကတိကြောင့် ဘုရားက ယောရှုအားဖြင့် ကြီးမားတဲ့ အရာတွေအများကြီးလုပ်ခဲ့သလို၊ ဣသရေလ လူမျိုးတွေရှေ့မှာလဲ ချီးမြှောက်ခဲ့တယ်။

ဒီဇင်ဘာလ ၂ ရက်နေ့

ဘုရားအတူရှိတယ် (၂)

“ထာဝရဘုရား​သည် ယောသပ်​နှင့်အတူ​ရှိ​တော်မူ​သဖြင့် သူ​သည် အောင်မြင်​သော​သူ​ဖြစ်လာ​၍ မိမိ​သခင်​အီဂျစ်​အမျိုးသား​၏​အိမ်​၌​နေထိုင်​ရ​၏​။ ထာဝရဘုရား​သည် သူ​နှင့်အတူ​ရှိ​တော်မူ​ကြောင်း​ကို​လည်းကောင်း​၊ သူ​ပြု​လေရာရာ​၌ ထာဝရဘုရား​အောင်မြင်​စေ​တော်မူ​ကြောင်း​ကို​လည်းကောင်း သူ​၏​သခင်​သည် သိမြင်​လေ​၏​။”‭‭ကမ္ဘာဦးကျမ်း‬ ‭၃၉:၂-၃

နှုတ်ကပတ်တော်ထဲက ကြီးကြီးမားမား အောင်မြင်ခြင်းရတဲ့သူတွေရဲ့အသက်တာဟာ အရည်အချင်းရှိလို့ မဟုတ်၊ ကြိုးစားနိုင်လွန်းလို့မဟုတ်၊ နောက်ခံ အသိုင်းအဝိုင်းကောင်းတာကြောင့်မဟုတ်၊ ဘုရားအတူရှိခြင်း သက်သက်ကြောင့်ပဲ ဖြစ်တယ်။ မိဘနဲ့ ဝေးရာကို အကိုတွေ ရောင်းစားလို့ ရောက်ခဲ့တဲ့ ယောသပ် ဘုရားအတူရှိခြင်းကလွဲရင် ကျန်တာ ဘာမှ မရှိခဲ့ပေမဲ့ သူက အောင်မြင်သူဖြစ်လာတယ်။ ပြုသမျှမှာ ဘုရားက အောင်မြင်ခြင်းပေးတယ်။ ဘုရားအတူရှိလို့ အောင်မြင်တယ်ဆိုတာကို မယုံကြည်သူ အလုပ်ရှင်ကပါ သတိထားမိတဲ့အထိ ဖြစ်လာတယ်။ ဘုရားအတူရှိခြင်းက အရာခပ်သိမ်းရရှိခြင်းရဲ့ အရင်းအမြစ်ပဲ။

ဒီဇင်ဘာလ ၁ ရက်နေ့

ဘုရားအတူရှိတယ်

“မ​ကြောက်​နှင့်​၊ ငါ​သည် သင်​နှင့်အတူ​ရှိ​၏​။ မ​စိုးရိမ်​နှင့်​။ ငါ​သည် သင်​၏​ဘုရားသခင်​ဖြစ်​၏​။ အကယ်စင်စစ် သင့်​ကို ခိုင်ခံ့​စေ​မည်​။ သင့်​ကို ကူညီမစ​မည်​။ ငါ​၏​ဖြောင့်မတ်​သော​လက်ယာ​လက်​ဖြင့် သင့်​ကို ငါ​ထောက်မ​မည်​။” ဟေရှာယအနာဂတ္တိကျမ်း‬ ၄၁:၁၀

ကြောက်စိတ်ဆိုတာ ဘုရားအတူ မရှိတဲ့သူတွေဘဝမှာ အမြဲအုပ်စိုးခြင်းခံရတဲ့ ခံစားချက်တစ်ခုပါ။ ဘုရားအတူရှိခြင်းကို သဘောပေါက်လာတဲ့အခါမှာ ကြောက်စိတ်ထက် ရဲရင့်ခြင်းက နေရာယူလာတယ်။ ဘုရားအတူရှိခြင်းက ဘဝအသက်တာကို ပြိုလဲနိုင်တဲ့အခြေအနေကြားမှာ ခိုင်ခံ့စေတယ်။ လိုအပ်မှုတွေ၊ ကြောက်စရာကောင်းတဲ့အခြေအနေကြားထဲမှာ ဘုရားရဲ့ကူညီမစမှုနဲ့ လိုအပ်တဲ့အရာတွေကို လိုအပ်တဲ့အချိန်တိုင်းမှာ ထောက်ပံ့ခြင်းကို မြင်တွေ့ခံစားရတယ်။

နိုဝင်ဘာလ ၂၉ ရက်နေ့

ဝမ်းမြောက်စရာစုံလင်

“ငါ​၏​ဆင်ခြင်တွေးတောမှု​သည် ကိုယ်တော်​အတွက် နှစ်သက်​ဖွယ်​ဖြစ်​ပါစေသော​။ ငါ​သည် ထာဝရဘုရား​၌​ဝမ်းမြောက်​မည်​။”ဆာလံကျမ်း‬ ‭၁၀၄:၃၄

ဘုရားနှစ်သက်တဲ့ဘဝကိုရရှိရုံသာမကပဲ ကိုယ်တိုင်လဲ ဝမ်းမြောက်စရာကောင်းတဲ့ဘဝကို ဘယ်သူတွေပိုင်ဆိုင်ခွင့်ရနေသလဲ? တချို့သူတွေအသက်တာမှာ ကိုယ်တိုင် ဝမ်းမြောက်ပေမဲ့ ဘုရားရဲ့ကျေနပ် နှစ်သက်မှုကို မရနိုင်သလို၊ တချို့ကျတော့လဲ ဘုရားနှစ်သက်တဲ့ ဘဝကို ပိုင်ဆိုင်ပေမဲ့ ကိုယ်တိုင် ဝမ်းနည်းကြေကွဲစွာနဲ့ ဘဝကို ရင်ဆိုင်ဖြတ်သန်းနေကြတယ်။ မှန်ကန်တဲ့ ဘုရားစကားအပေါ်မှာ ဆင်ခြင်အောက်မေ့ ပြီးတော့အသက်ရှင်တဲ့သူ အသက်တာကတော့ ဘုရားရဲ့နှစ်သက်မှုကို ရရုံသာမကပဲ ကိုယ်တိုင်လဲ ဘုရားအထဲမှာ ဝမ်းမြောက်စွာနဲ့ အသက်ရှင်တဲ့သူဖြစ်လာတယ်။

နိုဝင်ဘာလ ၂၈ ရက်နေ့

ဆင်ခြင်ဉာဏ် ရှိတဲ့သူ

“အသိဉာဏ်​နည်းပါး​သော​သူ​သည် အရာ​အားလုံး​ကို​ယုံ​တတ်​၏​။ ဆင်ခြင်ဉာဏ်​ရှိ​သော​သူ​မူကား မိမိ​၏​ခြေလှမ်း​ကို ဆင်ခြင် သုံးသပ်​တတ်​၏​။” သုတ္တံကျမ်း‬ ‭၁၄:၁၅

ဆင်ခြင်ဉာဏ် ရှိတဲ့သူနဲ့ မရှိတဲ့သူ က ဘာကွာခြားသလဲ? သူများပြောသမျှကို ယုံတယ်၊ လူအများရဲ့ ခံယူချက်နောက်လိုက်တတ်တဲ့သဘော ရှိတယ်။ ပြောတဲ့အရာတွေ ကောင်းတိုင်း မှန်တာမဟုတ်သလို၊ လူအများရဲ့ခံယူချက် အားလုံးလဲ သမ္မာတရားမဟုတ်ပြန်ဘူး။ အရေးကြီးဆုံးကိုယ်တိုင် အလေးအနက် ဆင်ခြင်ပြီးတော့ ကိုယ်သွားမယ့်လမ်းနဲ့ ပန်းတိုင်ကို အာရုံစိုက်ဖို့လိုတယ်။ လျှောက်တဲ့လမ်းမတူ ၊ ပန်းတိုင်မတူလို့ တချို့ အရာတွေလဲ တူမှာမဟုတ်ဘူး။ လူအများစုနဲ့ သင့်ရဲ့ခံယူချက်မတူလို့ အားငယ်စိတ်ပျက်စရာ မလိုဘူး။

နိုဝင်ဘာလ ၂၇ ရက်နေ့

ဆင်ခြင်အောက်မေ့ခြင်း အကျိုး (၂)

“ကိုယ်တော်​၏​သက်သေခံချက်​တို့​သည် အကျွန်ုပ်​ဆင်ခြင်အောက်မေ့စရာ​ဖြစ်​သောကြောင့် အကျွန်ုပ်​သည် အကျွန်ုပ်​၏​ဆရာ​အားလုံး​တို့​ထက် ပို၍​ပညာသတိ​ရှိ​ပါ​၏​။” ‭‭ဆာလံကျမ်း‬ ‭၁၁၉:၉၉

ကိုယ့်ကို သင်ပေးတဲ့ ဆရာတွေထက်သာဖို့ဆိုတာ မလွယ်တဲ့ကိစ္စမှန်း လူတိုင်းသိတယ်။ မလွယ်ပေမဲ့ နည်းလမ်းတော့ရှိတယ်။ နှုတ်ကပတ်တော်ကို ဆင်ခြင်အောက်မေ့တဲ့ အခါမှာ သာမန်မဖြစ်နိုင်တဲ့အရာတွေက ဘဝမှာဖြစ်လာတယ်။ ကိုယ့်ကို သင်ကြားပေးတဲ့ ကိုယ်လေးစားရတဲ့သူတွေ ထက် ဘုရားက သာတဲ့ဘဝကို ပို့ဆောင်ပေးတယ်။ မကောင်းတဲ့နှလုံးသား၊ မကောင်းတဲ့ ရည်ရွယ်ချက်ရှိရင်တော့ ဖြစ်လာမှာမဟုတ်ဘူး။ မှန်ကန်တဲ့နှလုံးသားနဲ့ နှုတ်ကပတ်တော်ကိုဆင်ခြင်အောက်မေ့တဲ့အခါမှာ ကိုယ့်အရည်အချင်းနဲ့ ဘယ်လိုမှ မမှီနိုင်တဲ့သူတွေရဲ့ရှေ့ကို ဘုရားက ရောက်စေတယ်။

နိုဝင်ဘာလ ၂၆ ရက်နေ့

ဆင်ခြင်အောက်မေ့ခြင်း အကျိုး(၁)

“ကိုယ်​တော်၏​တ​ရား​ကို အ​ကျွန်ုပ်​သည် အ​လွန် နှစ်​သက်​ပါ၏။ တစ်​နေ့​လုံး ဆင်​ခြင်​အောက်​မေ့​လျက် နေ​ပါ၏။ ပ​ညတ်​တ​ရား​တော်​သည် အ​ကျွန်ုပ်၏​ရန်​သူ​တို့​ထက်၊ အ​ကျွန်ုပ်​ကို​သာ၍ ပ​ညာ​ရှိ​စေ​ပါ၏။ ပ​ညတ်​တ​ရား​တော်​သည် အ​ကျွန်ုပ်၌ အ​စဉ်​တည်​ပါ၏။” ဆာလံ‬ ‭၁၁၉:၉၇-၉၈

တခဏ ဆင်ခြင်အောက်မေ့တာနဲ့ တစ်နေ့လုံး ဆင်ခြင်အောက်မေ့တာ ဘာကွာလဲ? ဆာလံဆရာက ဘုရားရဲ့တရားကို သူတစ်နေ့လုံးဆင်ခြင် အောက်မေ့ပြီးတဲ့နောက်မှာ ဖြစ်လာတဲ့အရာတွေကို ဖေါ်ပြခဲ့တယ်။ ပထမဆုံး ကောင်းကြီးက ရန်သူတွေထက် ပိုပြီးတော့ ပညာရှိလာတာပါ။ ရန်သူတွေ ထက်လူတိုင်းသာချင်တယ်။ နည်းလမ်းကတော့ နှုတ်ကပတ်တော်ကို တစ်နေ့လုံး ဆင်ခြင်အောက်မေ့ခြင်းပါပဲ။ ရန်သူတွေသာလို့ စိတ်ပျက်စရာ မလိုဘူး။ တရားတော်ကို ဆင်ခြင်အောက်မေ့တဲ့သူကို ဘုရားကအမြဲတမ်း ရန်သူထက် ပိုသာတဲ့ ဘဝကိုပေးတယ်။

နိုဝင်ဘာလ ၂၅ ရက်နေ့

နေ့ည မပြတ်

“ထာဝရဘုရား​၏​တရားတော်​၌​မွေ့လျော်​၍ ထို​တရားတော်​ကို နေ့​ည​မပြတ် ဆင်ခြင်အောက်မေ့​သော​သူ​သည် မင်္ဂလာ​ရှိ​၏​။” ဆာလံကျမ်း‬ ‭၁:၂

နေ့ညမပြတ် ဘာတွေကို ဆင်ခြင်အောက်မေ့နေသလဲ ? လူတစ်ယောက်ရဲ့ အတွေးတွေကို မမြင်ရပေမဲ့၊ ဆင်် ခြင်တွေးခေါ်နေတဲ့ရလဒ်အသီးအပွင့်ကိုတော့ အချိန်တစ်ခု ရောက်တဲ့အခါမှာ အပြင်မှာ မြင်ရပါလိမ့်မယ်။ ရလဒ်တွေ မှားနေတဲ့ အခါမှာ အခြားအရာတွေကို လက်ညှိုးထိုးတာထက်၊ ကိုယ့်အတွေး အခေါ်တွေကို ပြန်စမ်းစစ်ဖို့လိုတယ်။ ဒါဝိဒ်မင်းကြီးကတော့ ပြောတယ် တရားတော်ကို နေ့ညမပြတ် ဆင်ခြင်အောက်မေ့တဲ့ အခါမှာ ပြုလေသမျှမှာ အောင်မြင် ပြီးတော့ အသီးအပွင့်များစွာ ဝေဆာတဲ့ဘဝကို ပိုင်ဆိုင်ခွင့်ရှိမယ်။

နိုဝင်ဘာလ ၂၄ ရက်နေ့

ဆင်ခြင်အောက်မေ့ခြင်း

“သူ​တို့​သည် ထာဝရဘုရား​၏ လုပ်ဆောင်မှု​တို့​ကို​လည်းကောင်း​၊ ကိုယ်တော်​၏​လက်​တော်​ဖြင့်​ပြု​သော အမှု​ကို​လည်းကောင်း အလေးအနက်​ဆင်ခြင်​ခြင်း​မ​ရှိ​ကြ​သောကြောင့် ကိုယ်တော်​သည် သူ​တို့​ကို​ဖြိုဖျက်​၍ မည်သည့်​အခါ​မျှ သူ​တို့​ကို ပြန်လည်​တည်ဆောက်​တော်မူ​လိမ့်မည်​မ​ဟုတ်​။” ဆာလံကျမ်း‬ ‭၂၈:၅

လူတချို့ အကြိမ်ကြိမ်လဲကျတယ်။ ဒါပေမဲ့အကြိမ်ကြိမ် ပြန်ထလာတယ်။

အကြိမ်ကြိမ် ဖြိုချခြင်းခံရတယ်။ ဒါပေမဲ့ ဘုရားက အကြိမ်ကြိမ်သူတို့ကို ပြန်တည်ဆောက်ပေးတယ်။ လူတွေကတော့ သွားပြီလို့ ထင်မှတ်ပေမဲ့ ဘုရားက သူတို့အသက်တာကို ပြိုကျတဲ့ဘဝအတိုင်း မထားဘူး။

ဒါပေမဲ့ လူတချို့ကတော့ မဖြိုခင်ကတည်းက ပြိုကျနေပြီ။ ပြိုပြီးရင်လဲ ဘယ်တော့မှ ပြန်လည် တည်ဆောက် ခြင်းဆိုတာ ဖြစ်မလာဘူး။ သူတို့ဘဝကို ဘုရားက ပြန်လည်တည်ဆောက်မယ်တယ်ဆိုတာ မမြင်တွေ့ရဘူး။ ဘာကြောင့်လဲ ? ဆာလံဆရာကအဖြေပေးထားတယ်။ ဘုရား ပြုတဲ့အမှုတွေကို အလေးအနက်ဆင်ခြင်ခြင်း မရှိသောကြောင့်ပါ။ ဆင်ခြင်အောက်မေ့ခြင်းက ဘဝအသက်တာ တည်ဆောက်ခြင်း အတွက် အလွန်အရေးပါတယ်။

နိုဝင်ဘာလ ၂၂ ရက်နေ့

တံခါးကိုရှာပြီး ပင်းပန်းနေတဲ့သူ

“ထို့နောက် အိမ်​တံခါးဝ​ရှိ လူ​ကြီး​လူငယ်​တို့​ကို မျက်စိကွယ်​စေရန် ဒဏ်ခတ်​သဖြင့် သူ​တို့​သည် တံခါး​ကို​ရှာ​ရ​၍ မောပန်း​ကြ​၏​။”ကမ္ဘာဦးကျမ်း‬ ‭၁၉:၁၁

ဘာကြောင့်သွားရမယ့် တံခါးတွေကို မတွေ့ရတာလဲ? အဖြေကရှင်းပါတယ် ဘုရားရဲ့ ဒဏ်ခတ်မှုကြောင့်လို့ ကျမ်းစာက ဆိုပါတယ်။ ဘုရားရဲ့မေတ္တာကျေးဇူးကတော့ သင် သွားသင့်တဲ့ တံခါးတွေကို မြင်တွေ့ဖို့ မျက်စိဖွင့်ပေးတယ်။ တချို့လူတွေက ကိုယ့်အတွက် ဘုရားပြင်ဆင်တဲ့ တံခါးတွေကိုရှာရင်းနဲ့ အချိန်တွေကုန်၊ ငွေတွေကုန်နဲ့ ပင်ပန်းနေကြတယ်။ ဘုရားပြင်ဆင်တဲ့လမ်းက်ို မြင်တွေ့ခွင့်ရရင်တော့ပင်ပန်းမှုတွေကနေ လွတ်မြောက်ပြီး ငြိမ်သက်ချမ်းသာတဲ့ ဘဝကို ပိုင်ဆိုင်ခွင့်ရတယ်။

နိုဝင်ဘာလ ၂၁ ရက်နေ့

တံခါးအနားမှာ

“သင်​သည် ကောင်းမွန်​စွာ​ပြု​လျှင် လက်​မ​ခံ​ဘဲ​နေ​မည်လော​။ ကောင်းမွန်​စွာ​မ​ပြု​လျှင် အပြစ်​သည် တံခါး​နား​မှာ​ဝပ်ချောင်း​လျက်​နေ​၍ သင့်​ကို လွှမ်းမိုး​လို​၏​။ သို့သော် သင်​သည် သူ့​ကို​အနိုင်ယူ​ရ​မည်​”​ဟု မိန့်​တော်မူ​၏​။” ကမ္ဘာဦးကျမ်း‬ ‭၄:၇

သင့်ဘဝထဲကို ဘယ်အရာ ဝင်လာမလဲဆိုတာက သင် ဘယ်လို ဘုရားစကားအပေါ် တုန့်ပြန်သလဲဆိုတဲ့ အပေါ်မူတည်တယ်။ ကောင်းတဲ့ အရာရော၊ မကောင်းတဲ့ အရာရောအဝေးကြီးမှာ မရှိဘူး။ သင့်တံခါး အနားမှာပဲရှိတယ်။ မကောင်း တဲ့ အရာတွေကို သင်လွှမ်းမိုးမလား? မကောင်းတဲ့အရာက သင့်က်ို လွှမ်းမိုးမလားဆိုတာ သင်ဆုံးဖြတ်ရမယ်။ အားလုံးက အဝေးကြီး မှာမရှိဘူး တံခါးနားမှာပဲရှိတယ်။ ကောင်းတဲ့ အရာကိုလဲ သင်ဝင်လာခိုင်း ခွင့်ရှိသလို မကောင်းတဲ့ အရာကလဲ သင့် အပေါ် မှာပဲမူတည်တယ်။ သင့်ကို လွှမ်းမိုးချုပ်ကိုင် လိုတဲ့ မကောင်းတဲ့ အရာကို အခွင့်မပေးမိစေနဲ့။ ကောင်းတဲ့ အရာကိုပဲ တံခါးဖွင့်ပေးသူဖြစ်ပါစေ။

နိုဝင်ဘာလ ၂၀ ရက်နေ့

တံခါးဖွင့် ပေးရင်

“ကြည့်ရှု​လော့။ ငါ​သည် တံခါး​ရှေ့မှာ​ရပ်​၍ ခေါက်​လျက်​နေ​၏။ မည်သူ​မဆို ငါ့​အသံ​ကို​ကြား​၍ တံခါး​ကို​ဖွင့်​လျှင် ထို​သူ​ရှိ​ရာ​သို့ ငါ​ဝင်​ပြီး သူ​နှင့်အတူ​စားသောက်​မည်။ သူ​သည်​လည်း ငါ​နှင့်အတူ​စားသောက်​ရ​လိမ့်မည်။” ဗျာဒိတ်ကျမ်း‬ ‭၃:၂၀

ဘုရားဖွင့်ပေးတဲ့ တံခါးတွေ ရှိသလို၊ ကိုယ်ဖွင့်ရမယ့်တံခါးတွေလဲရှိတယ်။ ဘုရားအသံကြားပြီးတော့ ကိုယ်ဖွင့်သင့်တဲ့တံခါးကို ဖွင့်ပေးတတ်ရင် ရလာမယ့် အရာတွေက သေးသေးလေးတွေမဟုတ်ဘူး။ လူတိုင်းရချင်တဲ့ အခွင့်အရေးတွေက ကိုယ့်ဆီကို ရောက်လာပါလိမ့်မယ်။ ဘုရား နဲ့ ပိုရင်းနှီးတဲ့ခံစားချက်ကို ဘုရားအသံကြားပြီးတော့ ကိုယ့်ဘက်ကနေ ဖွင့်ပေးရမယ့်တံခါးကို အချိန်ကိုက်ဖွင့်တတ်တဲ့သူတွေအသက်တာမှာ အမြဲတမ်းခံစားရတယ်။

နိုဝင်ဘာလ ၁၉ ရက်နေ့

အလွန်ကြီးစွာသောတံခါး

“အ​ကြောင်း​မူ​ကား၊ အ​လွန်​ကြီး​စွာ​သော တံ​ခါး​သည် အ​ဆင်​သင့်၍ ငါ့​အား​ဖွင့်​လျက်​ရှိ၏။ ဆီး​တား​သော သူ​အ​များ​လည်း ရှိ​ကြ၏။”‭‭၁ ကောရိန္သု‬ ‭၁၆:၉

ဘုရားကြီးစွာသောတံခါးဖွင့်ပေးရင် မနာလိုတဲ့သူ ဆီးတားတဲ့သူတွေရှိတာထုံးစံပါပဲ။ လူတွေက ထင်တာက ဒီလိုအခြေအနေတွေနဲ့တွေ့ရင် ဘုရား အလိုတော်မရှိလို့ဆိုပြီး နောက်ဆုတ်ကြတယ်။ တကယ်တော့မဟုတ်ပါဘူး။ ဘုရားလမ်းဖွင့်ပေးတိုင်းမှာ အမြဲတမ်း ဆီးတားတဲ့သူတွေက ရှိစမြဲပါ။ ဘယ်လိုပဲရှိပါစေ အရေးမကြီးဘူး။ ဘုရားဖွင့်ပေးတဲ့အခါမှာ လူတွေ ဘယ်လောက်ပဲ ဆီးတားပါစေ သင့်ကို ရပ်တန့်စေမှာမဟုတ်ဘူး။ ဘုရားဖွင့်ပေးတဲ့တံခါးအတိုင်း ကြီးစွာသော အောင်မြင်မှုတွေ အသက်တာမှာ ရရှိခံစားမှာ သေချာတယ်။

နိုဝင်ဘာလ ၁၈ ရက်နေ့

ဖွင့်နိုင်၊ ပိတ်နိုင်သူ

သန့်ရှင်း​သော​သူ၊ ဖြောင့်မှန်​သော​သူ၊ ဒါဝိဒ်​၏​သော့​ကို​ကိုင်​ထား​သော​သူ၊ မည်သူမျှ​မ​ပိတ်​နိုင်​အောင်​ဖွင့်​သော​သူ၊ မည်သူမျှ​မ​ဖွင့်​နိုင်​အောင်​ပိတ်​သော​သူ​က ဤသို့​မိန့်​တော်မူ​၏။”ဗျာဒိတ်ကျမ်း‬ ၃:၇

ဘုရားသခင်ဖွင့်ရင် ဘယ်သူမှ ပိတ်လို့မရဘူး။ ဒါကြောင့် သင့်တံခါးတွေပွင့်လာဖို့ ဘုရားကဖွင့်ပေးဖို့ပဲလိုတယ်။ လူတွေက သင့်တံခါးတွေ၊ လမ်းတွေကိုပိတ်နေတယ်လို့ ဘယ်တော့မှ မတွေးမိစေနဲ့။ ဘယ်သူကမှ ဘုရားဖွင့်ပေးလာရင် ပိတ်လို့ကို မရဘူး။ ဘုရားမဖွင့်သေးလို့တံခါးတွေ မပွင့်လာသေးတာပါ။ ဘုရားပိတ်ထားရင် ဘယ်သူမှ ဖွင့်လို့မရဘူး။ ဒါကြောင့် မပွင့်လာမယ့် တံခါးအရှေ့မှာ အချိန်ကုန်ခံပြီးတော့ စောင့်မနေနဲ့။ ဘုရားပိတ်ထားရင် ဘယ်သူမှ ဖွင့်လို့ရမှာမဟုတ်ဘူး။ အချိန်ကုန်တာပဲ​အဖတ်တင်လိမ့်မယ်။

နိုဝင်ဘာလ ၁၅ ရက်နေ့

အလုပ်လုပ်လို့ရတဲ့အချိန်နှင့် လုပ်လို့မရတဲ့အချိန်

“ငါ​တို့​သည် ငါ့​ကို​စေလွှတ်​တော်မူ​သော​အရှင်​၏​အမှု​တော်​များ​ကို နေ့​အချိန်​ရှိ​စဉ် လုပ်ဆောင်​ရ​မည်။ မည်သူမျှ​အလုပ်​မ​လုပ်​နိုင်​သော ည​အချိန်​ရောက်​လာ​လိမ့်မည်။” ‭‭ရှင်ယောဟန်ခရစ်ဝင်‬ ‭၉:၄

ဘုရားစေခိုင်းတဲ့ အလုပ်ကို လုပ်လို့ရတဲ့အချိန်ရှိသလို၊ လုပ်လို့ မရနိုင်တဲ့အချိန်လဲရှိတယ်။ သခင်ယေရှုက သေချာရှင်းပြတယ် အံ့ဘွယ်နိမိတ်လက္ခဏာတွေကို သူပြုနေခြင်းက ခမည်းတော်သူ့အတွက် ပြင်ဆင်ပေးထားတဲ့ နေ့အချိန် ဖြစ်ပြီး၊ ဘယ်သူမှ အမူမပြုနိုင်တဲ့ ညအချိန်လဲရှိတယ်။ကိုယ့်အတွက် ကြီးမားတဲ့အမူပြုခွင့်ရတဲ့နေ့အချိန်တွေကို သိပြီးတော့ ကောင်းမွန်စွာ အသုံးပြုတတ်ဖို့လိုတယ်။ မဟုတ်ရင် အမှုပြုလို့မရတဲ့အချိန်ရောက်မှ ဘယ်လောက်ပဲ အားထုတ်ထုတ် ဘာမှ ထူးလာမှာမဟုတ်ဘူး။

နိုဝင်ဘာလ ၁၄ ရက်နေ့

ဒီအချိန်ကာလအတွက်

“ဤ​အချိန်​တွင် သင်​နှုတ်ဆိတ်​နေ​မည်​ဆိုပါက ဂျူး​လူမျိုး​တို့​ကို လွတ်မြောက်​အောင် ကယ်တင်​ပေး​မည့်​သူ​သည် အခြား​တစ်နေရာ​မှ​ပေါ်လာ​လိမ့်မည်​။ သင်​နှင့်​သင့်​ဖခင်​အမျိုးအနွယ်​မူကား ပျက်စီး​ရ​လိမ့်မည်​။ ဤ​အချိန်​ကာလ​အတွက် သင်​သည် မိဖုရား​ဖြစ်လာ​ခဲ့​သလော​ဟု အဘယ်သူ သိ​နိုင်​မည်နည်း​”​ဟု မှာကြား​လိုက်​၏​။” ‭ဧသတာဝတ္ထု ၄:၁၄

သင့်မှာရှိတဲ့ ဆုကျေးဇူး၊ စွမ်းရည်နှင့်ရှိသမျှဟာ ဒီချိန်ကာလမှာ လိုအပ်တဲ့နေရာမှာ သုံးဖို့အတွက် ဘုရားက ပေးထားတာပါ။ ဒါကို အသုံးမပြုဘူးဆိုရင် ကိုယ်တိုင်နှင့် ကိုယ်နဲ့နီးစပ်တဲ့သူတွေ ပျက်ဆီးခြင်းကိုပဲဖြစ်စေပြီးတော့ ဘုရားကတော့ သူနဲ့အတူအချိန်ကိုက်လုပ်မယ့်သူ အခြားသူတစ်ဉီးကို ပေါ်ထွက်စေမှာပါ။ ဘုရားပေးထားတဲ့အရာကို အချိန်ကိုက် အသုံးပြုတတ်ဖို့ အရေးကြီးတယ်။ ဘုရားက အမြဲတမ်း တစ်စုံတစ်ခုလုပ်ဖို့အတွက် ကြိုတင်ပြီးပြင်ဆင်လေ့ရှိတယ်။ အဲဂုတ္တုက လွတ်မြောက်ဖို့ မောရှေကို ကြိုတင်ပြီးတော့ ဖါရောရဲ့နန်းတော်ထဲ ထည့်ထားသလို၊ ဧသတ္တာကိုလဲ အာရွှေရုအနားမှာ ထားထားပေးတယ်။ သင်ရော ဘာကြောင့်လက်ရှိပိုင်ဆိုင်တဲ့အရာတွေကို ဘုရားပေးထားတယ်လို့ထင်ပါသလဲ?

နိုဝင်ဘာလ ၁၃ ရက်နေ့

သင်တို့အချိန်

“ထို့ကြောင့် ယေရှု​က ညီ​တော်​တို့​အား“ငါ့​အချိန်​မ​ရောက်​သေး။ သင်​တို့​အချိန်​ကား အမြဲ​အဆင်သင့်​ဖြစ်​၏။” ‭‭ရှင်ယောဟန်ခရစ်ဝင်‬ ‭၇:၆

ဘုရားရဲ့အချိန်ကို အတိအကျသိပြီးတော့ အတိအကျ လုပ်နိုင်တာ၊ လုပ်ခဲ့တာ သခင်ယေရှုတစ်ပါးတည်းပဲရှိတယ်။ သူလောကမှာ ကြွလာတဲ့အခါမှာ ခမည်းတော်ရဲ့ အချိန်ကာလ ကိုက်ပြီးတော့ အရာရာကို လုပ်ဆောင်ခဲ့တယ်။ သူ့ရဲ့ လုပ်ဆောင်မှုတွေကို လူတွေကနားမလည် သဘောမပေါက် ခဲ့ပေမယ့် သူဟာ ခမည်းတော်ရဲ့ချိန်းချက်တဲ့အချိန်ကို အတိအကျ လိုက်နာခဲ့တယ်ဆိုတာ တွေ့ရတယ်။ ဒီလို သူ့ရဲ့ ချိန်းချက်တဲ့အချိန်ကို နာခံခြင်းအားဖြင့် ယုံကြည်သူတွေအသက်တာမှာ အမြဲအဆင်သင့် ဖြစ်နေတဲ့အချိန်ကို ဖြစ်စေတယ်။

နိုဝင်ဘာလ ၁၂ ရက်နေ့

အချိန်ကို ကောင်းကောင်းသုံးပါ

“နေ့ရက်​ကာလ​တို့​သည် ဆိုးညစ်​သောကြောင့် အချိန်အခါ​ကို ကောင်းစွာ​အသုံးချ​ကြ​လော့။”‭‭ဧဖက်ဩဝါဒစာ‬ ‭၅:၁၆

ခဲယဉ်းဆိုးရုတ်တဲ့ကာလကြီးထဲမှာ နောက်ဆုံးနေ့ရက်တွေနီးလာတာနဲ့အမျှ ကောင်းတာတွေထက်၊ မကောင်းတဲ့အရာတွေက ပိုများ၊ ပိုကြားလာရတယ်။ ဒီလို အချိန်ကာလထဲမှာ ယုံကြည်သူတွေအနေနဲ့ဘယ်လို ယုံသင့်လဲ? ဘယ်လို အသက်ရှင်ရမလဲ? အရာအားလုံးကို နှုတ်ကပတ်တော်က အဖြေပေးထားပြီးသားပါ။ အချိန်ကို ကောင်းမွန်စွာ အသုံးပြုတဲ့သူအတွက်တော့ ဘယ်လို ကာလမျိုးမှာမဆို ဆိုးညစ်တဲ့ ခေတ်ရေစီးကြောင်းထဲ မျောပါမသွားပဲ၊ ကောင်းမြတ်တဲ့ ဘုရားရဲ့ ပို့ဆောင်ခြင်းထဲမှာပဲ ရှင်သန်ပါလိမ့်မယ်။ ဘုရားနဲ့ရှင်သန်တဲ့သူကတော့ ဆိုးညစ်တဲ့ ကာလထဲမှာ ကောင်းကြီးနဲ့ရှင်သန်တဲ့သူ ဖြစ်လာမှာ သေချာပါတယ်။

နိုဝင်ဘာလ ၁၁ ရက်နေ့

ယခုပင် ရိတ်သိမ်းတဲ့အချိန်

“ယ​ခု​မှ​စ၍ လေး​လ​လွန်​လျှင်၊ စ​ပါး​ရိတ်​ရာ​ကာ​လ ဖြစ်​လိမ့်​မည်​ဟု သင်​တို့​ဆို​တတ်​သည် မ​ဟုတ်​လော။ ငါ​ဆို​သည်​ကား၊ စ​ပါး​ရိတ်​ခြင်း​အ​လို​ငှာ လယ်​ပြင်​တို့​သည် ယ​ခု​ပင်​ဝင်း​ဝင်း​ရှိ​သည်​ကို မျှော်၍​ကြည့်​ကြ​လော့။-” ယောဟန်‬ ‭၄:၃၅

ဘဝရဲ့အမုန်းဆုံးတစ်ခုကိုပြောပါဆိုရင် စောင့်ဆိုင်းရခြင်းလို့ဖြေရမယ်။ တစ်ခုခု လုပ်ဖို့၊ ရဖို့ကို စောင့်နေရတာက ခံစားလို့မကောင်းဆုံးတွေထဲက တစ်ခုပဲ။ လူတိုင်းလည်း အဲ့လိုဖြစ်မှာပါ။ အရာရာ ဖြစ်ချင်တိုင်း မဖြစ်လာပဲ အချိန်စောင့်ရတာက အမြဲလိုလို ဖြစ်လာတော့ အချိန်နဲ့ပတ်သက်ရင် ပြင်းပြတဲ့စိတ်တွေက လျော့လာချင်တယ်။ တကယ်တော့ ဘုရားရဲ့နှလုံးသားနှင့်အမြင်ကို သဘောမပေါက်သေးလို့ပါ။ ကျွန်တော်တို့ဖြစ်ချင်တာထက်၊ ဖြစ်ဖို့နှလုံးသားရှိတာထက် ဘုရားက အမြဲတမ်း ပိုဆန္ဒရှိတယ်။ လူတွေကတောင်လိုသေးတယ်လို့ပြောနေတဲ့အရာကို ဘုရားက အခုဖြစ်လာမယ်လို့ မြင်နေ၊ ဆန္ဒ ရှိနေတယ်ဆိုတာ တွေ့ရတယ်။ ဘုရားနှလုံးသားနှင့်အမြင်ကို သဘောပေါက်လာတဲ့အခါမှာ နှေးတယ်လို့ထင်တဲ့အရာတွေ၊ အနာဂတ်မှာ ဖြစ်မယ်လို့ မြင်နေတဲ့အရာတွေက ဘဝမှာ ချက်ခြင်း ဖြစ်ပျက်လာတယ်။

နိုဝင်ဘာလ ၁၀ ရက်နေ့

အကောင်းဆုံး အချိန်

“အကြောင်းမူကား ကိုယ်တော်​က “ငါ​သည် နှစ်သက်​လက်ခံ​ဖွယ်​ရာ​အချိန်​၌ သင်​၏​စကား​ကို​နားထောင်​ပြီ။ ကယ်တင်​ရာ​နေ့ရက်​၌ သင့်​ကို​ကူညီမစ​ပြီ”​ဟု မိန့်​တော်မူ​၏။ ကြည့်ရှု​လော့။ ယခု​ပင် နှစ်သက်​လက်ခံ​ဖွယ်​ရာ​အချိန်​ဖြစ်​၏။ ယခု​ပင် ကယ်တင်​ရာ​နေ့ရက်​ဖြစ်​၏။” ၂ ကော၆:၂

ဆုံးရှုံးတဲ့သူတွေက အတိတ်ရဲ့ အချိန်တွေကိုလွမ်းမောနေကြတယ်။

အိမ်မက်ထဲမှာ ပျော်နေတဲ့သူတွေကတော့ အနာဂတ်ကာလကို တမ်းတနေရင်းနဲ့ ကျော်ဖြတ်နေတယ်။

အောင်မြင်တဲ့သူတွေကတော့ လက်ရှိအချိန်ကို အကောင်းဆုံးအသုံးပြုပြီးတော့ ဘုရားစကားကို အကောင်အထည်ဖေါ်တယ်။

လက်ရှိအချိန်ဟာ အကောင်းဆုံးပဲလို့ ယုံတဲ့သူတွေအတွက် အဆိုးဆုံးအခြေအနေမှာတောင် အကောင်းဆုံးရလဒ်တွေ ရရှိပိုင်ဆိုင်ကြတယ်။

ဒါဝိဒ်ဟာ တိုင်းပြည်တစ်ခုလုံးအမှောင်ဖုံးပြီးတော့ ရန်သူရဲ့ခြိမ်းခြောက်မှုအောက်မှာ ကြောက်နေရတဲ့အချိန်မှာ ခဲတစ်လုံးထဲနဲ့ နာမည်ကျော်လူကြိုက်များတဲ့သူ တစ်ယောက်ဖြစ်လာသလို၊ ယောသပ်ဟာလဲ အစာခေါင်းပါးဆုံးအချိန်မှာ သူ့ရဲ့ရူပါရုံတွေပြည့်စုံလာတယ်။

နိုဝင်ဘာလ ၈ ရက်နေ့

နှိမ့်ချသူ မှန်လျှင်

“စိတ်နှိမ့်ချ​သော​သူ​တို့​သည် ထာဝရဘုရား​၌ တစ်ဖန်​ဝမ်းမြောက်​ကြ​လိမ့်မည်​။ ဟေရှာယ ၂၉:၁၉

လောကကြီးမှာ ဝမ်းမြောက်ခြင်းက အရှားပါးဆုံးတွေထဲက တစ်ခုဖြစ်လာတယ်။ နောက်ဆုံးသောကာလထဲကို ဝင်ရောက်လာလေလေ ဝမ်းမြောက်ခြင်းက ကွယ်ပျောက်လေပဲ။ နိုင်ငံရေး၊ စီးပွားရေး စတဲ့အရေးရှိသမျှမှာလဲ စိတ်ပျက်စရာတွေနဲ့သာ စီတန်းနေတယ်။ နှုတ်ကပတ်‌တော်ကတော့ပြောတယ် ဒီလိုကာလမှာ ဘယ်လိုလူတွေကပဲ ဘုရားကိုအမှီပြုပြီးတော့ ဝမ်းမြောက်နိုင်မလဲဆိုရင် ဘုရားကို အမှီပြုတဲ့ နှိမ့်ချတဲ့ နှလုံးသားရှိသူတွေပဲ။ နှလုံးသား မှန်တဲ့သူတွေက အခြေအနေနဲ့ မဆိုင်တဲ့ ဝမ်းမြောက်ခြင်းကို ရရှိပိုင်ဆိုင်ခွင့်ရမယ်။

နိုဝင်ဘာလ ၇ ရက်နေ့

ဝိညာဉ်တော်ဉီးဆောင်တဲ့ဘဝ

“သူ​သည် ထာဝရဘုရား​အား ကြောက်ရွံ့​ခြင်း​၌ မွေ့လျော်​၍ မိမိ​မျက်စိ​မြင်​သည့်​အတိုင်း​မ​စီရင်​၊ နား​ကြား​သည့်​အတိုင်း မ​ဆုံးဖြတ်​။” ဟေရှာယ ‭၁၁:၃

လူတစ််ယောက်ကို သန့်ရှင်းသောဝိညာဉ်တော်က ဉီးဆောင်နေသလား? သူ့ရဲ့ဇာတိအသွေးအသားက ဉီးဆောင်နေသလား? ဆိုတာကို ဘယ်လို သိနိုင်မလဲ?အဖြေကတော့ရှင်းပါတယ်။ ဇာတိအသွေးအသားနဲ့ရှင်သန်တဲ့သူက အာရုံငါးပါး ဖြစ်တဲ့ အမြင်၊ အကြား၊ အထိအတွေ့တွေနဲ့ပဲ အရာရာကိုဆုံးဖြတ်တယ်။ သန့်ရှင်းသောဝိညာဉ်တော် ဉီးဆောင်တဲ့သူကတော့ အာရုံငါးပါးအပေါ်မှာ အခြေမခံပဲ သဘာဝလွန် သန့်ရှင်းသောဝိညာဉ်တော်ဖေါ်ပြခြင်းအပေါ်မှာ ရှင်သန်တဲ့သူ ဖြစ်တယ်။

နိုဝင်ဘာလ ၆ ရက်နေ့

ဘုရားအကြံ အတိုင်းဖြစ်လာမယ်

“The Lord Almighty has sworn, “Surely, as I have planned, so it will be, and as I have purposed, so it will happen.”Isaiah‬ ‭14‬:‭24‬ ‭NIV‬‬

ကမ္ဘာပေါ်မှာ လူတွေကြံစည်တဲ့အရာတိုင်း မဖြစ်လာနိုင်တာ အများကြီးရှိတယ်။ ဖြစ်ဖို့ ဘယ်လောက် ကြိုးစားကြိုးစား၊ ဘယ်လောက် ငွေကြေးတွေ စိုက်ထုတ်လဲ မဖြစ်နိုင်တဲ့အရာတွေ စိတ်ကူးနဲ့လွဲသွားတဲ့အရာတွေအများကြီးပဲ။ ဘုရားရဲ့ အစီအစဉ်နှင့် အကြံအစည်ကတော့ ဘယ်သူကမှ ဘယ်အရာမှ မဖျက်နိုင်တာသေချာတယ်။ သင့်အပေါ်မှာ ဘုရားထံကအကြံအစည်ကို သိပြီးဝန်ခံတတ်မယ်၊ သဘောတူ ပြီး အသက်ရှင်မယ်ဆိုရင် အရာအားလုံးက ဘုရားစီစဉ်တဲ့အတိုင်း ဖြစ်လာမယ်။

နိုဝင်ဘာလ ၅ ရက်နေ့

အဆုံးထိတာဝန်ယူပေးမယ့်သူ

“သင်​တို့​၌ ကောင်း​သော​အမှု​ကို​အစပြု​ခဲ့​သော​အရှင်​သည် ခရစ်တော်​ယေရှု​၏​နေ့ရက်​တိုင်အောင် ထို​အမှု​ကို ပြီးမြောက်​စေ​တော်မူ​လိမ့်မည်​ဟု ငါ​ယုံကြည်​စိတ်ချ​၏။” ဖိလိပ္ပိသြဝါဒစာ‬ ‭၁:၆

ဘုရားက တစ်ခုခုလုပ်ရင် ဘယ်တော့မှ တစ်ဝက်တစ်ပျက်မလုပ်ဘူး။ လူတွေကသာ အဆုံးထိ တည်ကြည်ဖို့ခက်ခဲကြတာ။ ဘုရားကတော့အမြဲတမ်း သူ့လုပ်ပေးတဲ့အရာတိုင်းကို အဆုံးထိတာဝန်ယူတယ်။ ငရဲကပဲ ကယ်တင်တာမဟုတ်ဘူး။ တစ်ခါတစ်လေ လိုအပ်တဲ့အရာပဲ ထောက်ပံ့ပေးတာ မဟုတ်ဘူး။ သင့်ဘဝရဲ့ အစ-အဆုံး၊ သင့်ရဲ့လိုအပ်ချက်အားလုံးကို သူကပဲ တာဝန်ယူတယ်။ သူကပဲ ကောင်းမွန်စွာ အစပြုပေးသလို၊ အဆုံးထိ တာဝန်ယူပေးမယ်။ ကိုယ့်ဘက်ကတော့ ယုံကြည်စိတ်ချနေဖို့ပဲ လိုတယ်။

နိုဝင်ဘာလ ၄ ရက်နေ့

ကလေးသူငယ်တွေခေတ်

“ငါ​သည် သူငယ်​တို့​ကို သူ​တို့​၏​အကြီးအကဲ​များ​ဖြစ်​စေ​မည်​။ ကလေးငယ်​တို့​သည် သူ​တို့​ကို အုပ်စိုး​ကြ​လိမ့်မည်​။”‭‭ဟေရှာယအနာဂတ္တိကျမ်း‬ ၃:၄‬

ကလေးတွေဆိုပြီးတော့ ကိုယ့်ကိုရော အခြားသူတွေရော အထင်မသေးမိ​စေနဲ့။ ဘုရားက ကလေးငယ်တွေကို တန်ဖိုးထားသလို၊ ကလေးငယ်တွေအတွက် ကြီးမားတဲ့ ရူပါရုံတွေ မျှော်လင့်ထားတာတွေရှိတယ်။ နောက်ဆုံးသောကာလမှာ ကလေးတွေဟာ ဝိညာဉ်တော်ရဲ့လမ်းပြမှုနဲ့အတူ အရာရာမှာ ထူးခြားမှုတွေနဲ့ ဉီးဆောင်လာမယ်။ လူတွေ အထင်သေးတဲ့ ကလေးသူငယ်တွေ ရဲ့ခေတ်ကာလဟာ နောက်ဆုံးသောကာလမှာ ပိုထင်ရှားလာမယ်။

နိုဝင်ဘာလ ၃ ရက်နေ့

အကောင်းဆုံးသောအရာကို ဘယ်သူတွေခံစားရမလဲ?

“သင်​တို့​သည် စိတ်ဆန္ဒ​အပြည့်အဝ​ဖြင့် နာခံ​ကြ​လျှင် မြေကြီး​၏​အကောင်းဆုံး​သော​အရာ​ကို စား​ရ​မည်​။” ဟေရှာယအနာဂတ္တိကျမ်း‬ ‭၁:၁၉

လူတွေလိုချင်တဲ့ အဖြေအားလုံး နှုတ်ကပတ်တော် ဘုရားစကားထဲမှာ အဖြေရှိပြီးသားပါ။ မြေကြီးရဲ့ အကောင်းဆုံးသောအရာတွေကို ဘယ်သူတွေ ခံစားရမလဲ? ဆိုတာကို ပရောဖက်ဟေရှာယအားဖြင့် ဘုရားကအဖြေပေးထားတယ်။ လူတိုင်းတော့ အကောင်းဆုံးသော အရာတွေကိုလိုချင်ကြတာချည်းပဲ။ ဒါပေမဲ့ အကောင်းဆုံးသောအရာက လူတိုင်းအတွက်တော့မဟုတ်ဘူး။ အကောင်းဆုံးသောအရာတွေကဘုရားစကားကို စိတ်နှလုံးသား အပြည့်အဝဖြင့် နာခံကြတဲ့သူတွေအတွက်ပါပဲ။

နိုဝင်ဘာလ ၁ ရက်နေ့

ဖျက်ဆီးလို့မရတဲ့ လက္ခဏာ

“ဆူးချုံ​အစား ထင်းရှူးပင်​ပေါက်​၍ နှင်းဆီရိုင်းပင်​အစား မုရတုပင် ပေါက်​လိမ့်မည်​။ ဤ​အမှု​သည် ထာဝရဘုရား​အတွက်​အထိမ်းအမှတ်​၊ ဖျက်ဆီး​၍​မ​ရ​သော ထာဝရ​အမှတ်လက္ခဏာ​ဖြစ်​လိမ့်မည်​”​ဟု မိန့်​တော်မူ​၏​။” ဟေရှာယအနာဂတ္တိကျမ်း‬ ‭၅၅:၁၃

အသက်တာမှာ ဘုရား အလုပ်လုပ်လာတဲ့အခါမှာ အရင်က အသုံးမဝင် တန်ဖိုးမရှိတဲ့ အရာတွေအစား တန်ဖိုးရှိပြီးတော့ အသုံးဝင်တဲ့အရာတွေက နေရာယူလာမယ်။ ဖျက်ဆီးလို့မရတဲ့ အထိန်းအမှတ် တစ်ခုအဖြစ် ထင်ရှားပေါ်လွင်စေမယ်။ ဘဝမှာ ဘယ်လိုအရာတွေနဲ့ ပြည့်နေသလဲ​ဆိုတာကို ကြည့်ခြင်းအားဖြင့်၊ ဘုရားအလုပ်လုပ်နေသလား? မလုပ်ဘူးလား? ဆိုတာ ကို သိနိုင်တယ်။ ဘုရားလုပ်ဆောင်ပေးတဲ့အရာတွေကတော့ ဘယ်တော့မှ ဘယ်သူမှ ဖျက်ဆီးလို့မရနိုင်ပါဘူး။

အောက်တိုဘာလ ၃၁ ရက်နေ့

ဒါဝိဒ်ခံစားရတဲ့ မေတ္တာနည်းတူ

“ငါ့​စကား​ကို နားထောင်​ကြ​လော့​။ ငါ့​ထံသို့​လာ​ကြ​လော့​။ သင်​တို့​၏​စိတ်ဝိညာဉ် အသက်ရှင်​မည့်​အကြောင်း နားထောင်​ကြ​လော့​။ ဒါဝိဒ်​အပေါ်​ထားရှိ​သော မြဲမြံ​သည့်​မေတ္တာကရုဏာ​နှင့်အညီ ထာဝရ​ပဋိညာဉ်​ကို သင်​တို့​နှင့်​ငါ​ပြု​မည်​။” ‭‭ ဟေရှာယအနာဂတ္တိကျမ်း‬ ‭၅၅:၃

သိုးကျောင်းသားလေးကနေ နန်းတော်ထဲကို ရုပ်ရှင်လိုလို ပြဇါတ်လိုလို ဘဝကြီးက ပြောင်းလဲသွားပြီးတော့ လူတိုင်းမရတဲ့ ဘုရားရဲ့ အထူး ဂရုစိုက်မူတွေကို ဒါဝိဒ်ရခဲ့တာ ဟာ သူတော်လို့၊ တတ်လို့မဟုတ်ပဲ ဘုရားသူ့အပေါ်မှာ ထားတဲ့တစ်ဖက်သတ် မေတ္တာကြောင့်ပဲ။ ဒီမေတ္တာဟာ တခြားလူတွေခံစားရသလို မဟုတ်ပဲ ဘယ်တော့မှ မပြောင်းလဲ တတ်ဘူး။ ဒါဝိဒ် အားနည်းသွားရင်လဲ ဘယ်တော့မှ လျော့ကျ ပျောက်ကွယ်သွားတာ မရှိဘူး။ ဒီလို မေတ္တာမျိုးနှင့် ဂရုစိုက်မှုမျိုးကို ဘုရားအသံကို ကြားပြီးနားထောင်ကာ ဘုရားအနားမှာ အမြဲတမ်းရှင်သန်ဖို့ဆက်ကပ်ထားတဲ့သူတွေအသက်တာမှာ ခံစားရမယ်။

အောက်တိုဘာလ ၃၀ ရက်နေ့

အချိန်ကိုက်

“တွေ့​နိုင်​သည် ကာ​လ​တွင် ထာ​ဝ​ရ​ဘု​ရား​ကို ရှာ​ကြ​လော့။ နီး​တော်​မူ​သည်​ကာ​လ​တွင် ဆု​တောင်း​ပ​တ္ထ​နာ ပြု​ကြ​လော့။” ဟေရှာယ‬ ၅၅;၆

သူ့အချိန်နှင့်သူ လုပ်ဆောင်တတ်ခြင်းက အောင်မြင်ခြင်းရဲ့ တကယ့်လျှို့ဝှက်ချက်ဖြစ်တယ်။ လူတွေရဲ့ပြဿနာက ဘုရားရဲ့အချိန်ကိုက်မလုပ်တတ်ခြင်းပါပဲ။ ဘုရားရဲ့အချိန်ကာလကို နားလည်ပြီးတော့ မှန်ကန်စွာလုပ်ဆောင်

တတ်သူတွေအတွက် ကြီးမားတဲ့အောင်မြင်ခြင်းတွေ၊ ကောင်းကြီးမင်္ဂလာတွေက အမြဲတမ်း တံခါးပွင့်လာစေတယ်။ သင့်အတွက် ဘုရားနဲ့ပတ်သက်ပြီးတော့ ဘယ်လို အချိန်ကာလ ဖြစ်တယ်ဆိုတာကို သိရှိသဘောပေါက်ပြီးတော့ မှန်ကန်စွာ လုပ်ဆောင်တတ်ဖို့ ဘုရားထံမှာ ပညာတောင်းပါ။

အောက်တိုဘာလ ၂၉ ရက်နေ့

ချမ်းသာစွာ ပို့ခြင်းကိုခံရမယ်

“သင်​တို့​သည် ဝမ်း​မြောက်​သော စိတ်​နှင့်​ထွက်၍၊ ချမ်း​သာ​စွာ​ပို့​ခြင်း​ကို ခံ​ရ​ကြ​လိမ့်​မည်။ တောင်​ကြီး တောင်​ငယ်​တို့​သည် သင်​တို့​ရှေ့​မှာ သီ​ချင်း​ဆို​သံ​နှင့် ကြွေး​ကြော်၍၊ တော၌​ရှိ​သ​မျှ​သော အ​ပင်​တို့​သည် လက်​ခုပ်​တီး​ကြ​လိမ့်​မည်။” ဟေရှာယ‬ ‭၅၅:၁၂

ပြဿနာတောင်တွေ၊ အခက်အခဲကုန်းတွေဝိုင်းရံနေရတဲ့ဘဝမှာ ဘုရားရဲ့ မစပို့ဆောင်ခြင်း ခံစားရတဲ့အခါမှာ ဘဝဟာ အတိတ်ကနဲ့မတူပဲ​လုံးဝကိုကွဲပြားသွားပါလိမ့်မယ်။ ဘုရားရဲ့နှုတ်ကပတ်တော်ကိုဉီးစားပေးပြီးတော့၊ နှုတ်ကပတ်တော်ရဲ့လမ်းပြမှုနောက်ကို လိုက်တဲ့အခါမှာ အခြေအနေတိုင်းကို ဝမ်းမြောက်တဲ့စိတ်နှင့် ဖြတ်ကျော်ခွင့်ရပြီးတော့ ကြွယ်စွာနဲ့ ပို့ဆောင်ပေးခြင်းကို ခံစားရပါလိမ့်မယ်။ တချိန်တုန်းက အခက်အခဲတွေက ကိုယ့်ရှေ့မှာ ချီးမွမ်းစရာ၊သက်သေခံစရာ အဖြစ်ကို ပြောင်းလဲ​သွားလိမ့်မယ်။

အောက်တိုဘာလ ၂၈ ရက်နေ့

သင့်၏ဘုန်းကို ပွင့်စေမယ်

“ကြည့်​ရှု​လော့။ သင်​သည် မ​သိ​ဖူး​သော​လူ​မျိုး​ကို ခေါ်​လိမ့်​မည်။ သင့်​ကို မ​သိ​ဖူး​သော လူ​မျိုး​တို့​သည်​လည်း၊ သင်၏​ဘု​ရား​သ​ခင် ထာ​ဝ​ရ​ဘု​ရား၊ ဣ​သ​ရေ​လ​အ​မျိုး၏ သန့်​ရှင်း​သော​ဘု​ရား​ကြောင့်၊ သင့်​ထံ​သို့ ပြေး​လာ​ကြ​လိမ့်​မည်။ ထို​ဘု​ရား​သည် သင်၏​ဘုန်း​ကို ပွင့်​စေ​တော်​မူ၏။” ‭‭ဟေရှာယ‬ ‭၅၅:၅

ဘုရားဘုန်းအတွက် ဆက်ကပ်ပြီး အသက်ရှင်တဲ့သူအတွက် သင့်ဘုန်းအတွက် ဘုရားကလဲ မေ့မသွားပါဘူး။ သူ့သားသမီးတွေ ဘုန်းပွင့်လန်းစေဖို့အတွက် ဘုရားကအကြံအစည်ရှိတယ်။ ဘုရား ချီးမြှောက်ကောင်းကြီးပေးတဲ့အခါမှာ သင်၏ ဘုန်း ပွင့်လန်းလာပြီးတော့ ကိုယ်သိတဲ့ အရာတွေ၊ သိတဲ့လူတွေပဲကိုယ့်ဆီကို ရောက်လာတာမဟုတ်ဘူး။ မသိတဲ့အရာတွေ မသိတဲ့လူတွေကပါ ကိုယ့်ဆီကို ရောက်လာကြတယ်။ ဘဝမှာ မသိတဲ့လူတွေ၊ မသိနားမလည်နိုင်တဲ့အရာတွေ သင့်အနားမှာ ရောက်လာပြီး၊ ကောင်းမွန်တဲ့ အရာတွေ ဖြစ်ပျက် လာပြီဆိုရင် သေချာတယ် ဘုရားက သင့်ဘုန်းကိုပွင့်ဖို့အတွက် အလုပ်လုပ်နေပြီ။

အောက်တိုဘာလ ၂၇ ရက်နေ့

မတူ ထူးခြားတဲ့ ဘဝ

“ထာဝရဘုရား​က “​ငါ​၏​အကြံအစည်​သည် သင်​တို့​၏​အကြံအစည်​နှင့်​မ​တူ​။ ငါ​၏​နည်းလမ်း​သည်​လည်း သင်​တို့​၏​နည်းလမ်း​နှင့်​မ​တူ​။” ဟေရှာယအနာဂတ္တိကျမ်း‬ ‭၅၅:၈

လူတိုင်းက အခြားသူတွေနဲ့မတူပဲ ထူးခြားတဲ့ဘဝကို ပိုင်ဆိုင်ချင်ကြပါတယ်။ လူရဲ့အတွေးအခေါ် အကြံအစည်နဲ့သာသွားရင်တော့ အရမ်းကြီးထူးခြားဆန်းပြားတဲ့ ဘဝကို ပိုင်ဆိုင်ရဖို့ဆိုတာက မဖြစ်နိုင်ပါဘူး။ ထူးခြားရင်လဲ နည်းနည်းပေါ့။ ဘုရားရဲ့ အကြံအစည်၊ နည်းလမ်းကတော့ လူတွေရဲ့ စိတ်ကူး၊ တွေးခေါ်မှုနဲ့အမြဲတမ်း ဆန့်ကျင်ဘက်ပါ။ ဘုရား အကြံစည် နည်းလမ်းကိုသဘောပေါက်ပြီး ဝန်ခံအသက်ရှင်တဲ့သူရဲ့ဘဝကတော့ ဘယ်သူနဲ့မတူ၊ ဘာနဲ့မတူတဲ့ ထူးခြားတဲ့ ဘဝကို သေချာပေါက်ပိုင်ဆိုင်သူဖြစ်လာမယ်။

အောက်တိုဘာလ ၂၅ ရက်နေ့

ဘုရားထံမှ မလာသောအရာနှင့် လာသောအရာ

“တစ်စုံတစ်ဦး​သည် သင့်​ကို ရန်ပြု​ခဲ့​လျှင် ထို​အမှု​သည် ငါ့​ထံမှ​လာ​သည်​မ​ဟုတ်​။ သင့်​ကို​ရန်ပြု​သော​သူ​သည် သင့်​ရှေ့​၌​ကျဆုံး​လိမ့်မည်​။” ဟေရှာယ ၅၄:၁၅

လူတွေ အထင်မှားနေတဲ့ အရာရှိပါတယ်။ အဲ့ဒါကတော့ အခက်အခဲတွေ၊ ကိုယ်ကို ဆန့်ကျင်တဲ့အရာတွေက ဘုရားထံကနေ လာတယ်လို့ထင်မှတ်နေတာပါ။ ဘုရားက သူ့သားသမီးတွေကို ဆန့်ကျင်တဲ့၊ ရန်ဘက်ပြုတဲ့သူတွေကို ဘယ်တော့မှ စေလွှတ်မှာ မဟုတ်သလို၊ ခွင့်ပြုမှာ မဟုတ်ဘူး။ မကောင်းတဲ့အရာတွေ၊ သင့်ကို မကောင်းတာ လုပ်မယ့်သူတွေကို ဘုရားဘယ်တော့မှ စေလွှတ်မှာ မဟုတ်ဘူး၊ ခွင့်ပြုမှာ မဟုတ်ဘူးဆိုတာ ယုံပါ။ ဘုရားထံကလာတဲ့အရာကတော့ သင့်ကိုရန်ဘက်ပြုတဲ့သူတွေကို သင့်ရှေ့မှာ ကျဆုံးစေလိမ့်မယ်ဆိုတာပါပဲ။ ဘုရားလူတစ်ယောက်ကို ရန်ဘက် မပြုမိဖို့ သတိထားဖို့လိုသလို၊ ရန်ဘက်ပြုသူတိုင်းကလဲ သေချာပေါက်ကျရှုံးစေမယ်လို့ ဘုရားက ကတိပေးထားပြီးသားပါ။ ဘုရားကိုစိတ်ချပါ။

အောက်တိုဘာလ ၂၄ ရက်နေ့

ဘုရားသွန်သင်ခြင်းခံရတဲ့ မျိုးဆက်

“သင်၏​သား​သ​မီး​အ​ပေါင်း​တို့​သည် ထာ​ဝ​ရ​ဘု​ရား ဆုံး​မ​သွန်​သင်​တော်​မူ​သော​သူ ဖြစ်၍၊ များ​စွာ​သော စည်း​စိမ်​ချမ်း​သာ​နှင့် ပြည့်​စုံ​ကြ​လိမ့်​မည်။” ဟေရှာယ‬ ‭၅၄:၁၃

သားသမီးတွေကို ကိုယ်တိုင် ဆုံးမသွန်သင်ဖို့ ခက်ခဲလွန်းတဲ့ ခေတ်ကာလကြီးမှာ မိဘတွေအတွက်တော့ ကြီးမားတဲ့စိန်ခေါ်မှုကြီးနဲ့ရင်ဆိုင်နေရတယ်။ သားသမီးတွေ အကြောင်းကို စဉ်းစားမိတိုင်း စိတ်ပျက်နေတဲ့သူတွေအတွက် ဘုရားက ကတိပေးထားတာရှိတယ်။ ဘုရားရဲ့သွန်သင်ခြင်းကို အပ်နှံဖို့ပါပဲ။ ဘုရားသွန်သင်ပေးခြင်း လမ်းပြခြင်းကိုခံရတဲ့မျိုးဆက်သာဖြစ်ခဲ့ရင်တော့ တခြားသားသမီးတွေနဲ့တူမှာမဟုတ်ပါဘူး။ လက်ရှိမှာ ဘယ်လိုပဲ ဖြစ်ဖြစ်၊ ဘုရားက သွန်သင်ဆွဲခေါ်ပြီးတော့ ကောင်းမွန်တဲ့ဘဝတွေထဲကို ပို့ဆောင်ပေးလိမ့်မယ်၊ ဘုရားလက်ထဲကို သေချာ အပ်နှံတတ်ဖို့ပဲလိုတယ်။

အောက်တိုဘာလ ၂၃ ရက်နေ့

ဖြောင့်မတ်ခြင်းတရားအားဖြင့်သာ

“သင်​သည် ဖြောင့်​မတ်​ခြင်း​တ​ရား​အား​ဖြင့် တည်​လိမ့်​မည်။ ညှဉ်း​ဆဲ​ခြင်း​နှင့် ဝေး​သည်​ဖြစ်၍ မ​ကြောက်​ရ။ ထိတ်​လန့်​ခြင်း​သည်​လည်း ဝေး၍၊ သင့်​အ​နီး​သို့​မ​ရောက်​ရ။” ဟေရှာယ‬ ‭၅၄:၁၄

ငွေကြေးဟာ သင့်ဘဝကို ခပ်သိမ်းသော အခြေအနေထဲမှာရပ်တည်နိုင်အောင် လုပ်ဆောင်ပေးနိုင်မှာ မဟုတ်သလို၊ အခြားဘယ်အရာကမှလဲ ရပ်တည်အောင် လုပ်ဆောင်ပေးနိုင်မှာ မဟုတ်ဘူး။ ဘဝမှာ ဘယ်လို အခြေအနေမျိုးကြုံကြုံ​မပြိုလဲပဲ ရပ်တည်စေနိုင်မှာက ဘုရားသင့်ကိုပေးတဲ့ ဖြောင့်မတ်ခြင်းအားဖြင့်ပဲ။ ဒီဖြောင့်မတ်ခြင်းထဲမှာ အသက်ရှင်တဲ့အခါမှာ ညှင်းဆဲခြင်းနှင့် ထိတ်လန့်ခြင်းက အနီးမှာ မရောက်လာနိုင်သလို၊ ဘယ်အရာမှလဲ သင့်ကို ပြိုလဲပျက်ဆီးသွားအောင် မလုပ်ဆောင်နိုင်ဘူး။ ဘယ်လောက် ကောင်းတဲ့ဖြောင့်မတ်ခြင်းအား သင်ပိုင်ဆိုင်ရလဲဆိုတာ သင်သိဖို့ပဲလိုတယ်။

အောက်တိုဘာလ ၂၂ ရက်နေ့

ဖြောင့်မတ်သူတွေခံရမယ့်အမွေ

“သင့်​တစ်​ဖက်၌ လုပ်​သော​လက်​နက်​တစ်​စုံ​တစ်​ခု​မျှ အ​ထ​မ​မြောက်​ရ။ သင့်​ကို တ​ရား​တွေ့​သော​သူ မည်​သည်​ကား၊ အ​ရှုံး​ခံ​ရ​လိမ့်​မည်။ ထာ​ဝ​ရ​ဘု​ရား၏ ကျွန်​တို့​သည် ထို​သို့​သော အ​မွေ​ကို​ခံ​ရ၍၊ ငါ့​ကြောင့် ဖြောင့်​မတ်​ရာ​သို့ ရောက်​ရ​ကြ​လိမ့်​မည်​ဟု ထာ​ဝ​ရ​ဘု​ရား မိန့်​တော်​မူ၏။” ဟေရှာယ‬ ၅၄:၁၇

သခင်ယေရှုခရစ်တော် အားဖြင့်ရတဲ့ဖြောင့်မတ်ခြင်းဟာ ဘယ်လောက်တန်ဖိုးရှိသလဲ? ဘယ်လိုအကျိုးသက်ရောက်မူရှိသလဲ?ဆိုတာ လူအနည်းငယ်ကပဲ သိကြတယ်။ သခင်ယေရှုက နိုင်ငံတော်နှင့် ဖြောင့်မတ်ခြင်းကို ရှေ့ဉီးစွာရှာပါလို့ ပြောတဲ့အခါမှာ အရေးကြီးတာတစ်ခုပဲမဟုတ်ဘူး အကျိုးလွန်စွာရှိလို့ပါ။ ဖြောင့်မတ်သူရဲ့တစ်ဖက်မှာ လုပ်တဲ့ ဘယ်လက်နက်ကမှ အထမြောက်မှာမဟုတ်ဘူး။ ဘုရားက ဖြောင့်မတ်သူကိုပျက်ဆီးစေမယ့် လက်နက်တွေကို ခွင့်ပြုမှာ မဟုတ်ပါ။ ဖြောင့်မတ်သောသူတစ်ဘက်မှာ တရားတွေ့တဲ့သူတွေဟာလဲ သေချာပေါက် အရှုံးခံရမယ်။ ဘယ််တော့မှ အောင်မြင်ခြင်းကိုရမှာမဟုတ်ဘူး။ သခင်ယေရှုအားဖြင့်ရထားတဲ့ ဖြောင့်မတ်ခြင်းကို သင် သေချာ သဘောပေါက် ပြီးတော့ နေ့တိုင်း စိတ်ချတတ်ဖို့ပဲလိုတယ်။

အောက်တိုဘာလ ၂၁ ရက်နေ့

လက်ယာဘက်၊ ဘက်ဝဲဘက် တိုးပွါးမယ်

“အ​ကြောင်း​မူ​ကား၊ သင်​သည် လက်​ယာ​ဘက်၊ လက်​ဝဲ​ဘက်၌ တိုး​ပွား​လိမ့်​မည်။ သင်၏​အ​မျိုး​အ​နွယ်​သည် တစ်​ပါး​အ​မျိုး​သား​တို့​ကို အ​မွေ​ခံ၍၊ သူ​တို့၏ ဆိတ်​ညံ​သော​မြို့​တို့၌ နေ​ကြ​လိမ့်​မည်။” ဟေရှာယ‬ ‭၅၄:၃

ဘုရားကောင်းကြီးပေးတဲ့အခါမှာ တစ်ဘက်မှာပဲ တိုးပွါးမှာမဟုတ်ဘူး။ တစ်ဘက်မှာ တိုးပွါးပြီးတော့ ကျန်

တစ်ဘက်မှာ ကျရှုံးဝမ်းနည်းရမှာမဟုတ်ဘူး။ ဘုရားရဲ့ ကောင်းကြီးမင်္ဂလာက အဘက်ဘက်မှာ တိုးပွါးများပြားစေမယ်။ ကိုယ်ရသင့်တဲ့ လုပ်နိုင်သလောက်ပဲ အသက်တာမှာ ရရှိခံစားမှာ မဟုတ်ဘူး။ တစ်ပါးအမျိုးသားတွေရဲ့ အမွေကို ပိုင်ဆိုင်ခွင့်ရမှာဖြစ်ပြီးတော့ အကောင်းဆုံးဆိုတဲ့အရာတွေကို ပိုင်ဆိုင်ခွင့်ရမယ်။ လောကအရာမှာပဲ တိုးပွါးမှာမဟုတ်ပဲ ဝိညာဉ်ရေးရာ၊ မိသားစုရေးရာနှင့် စီးပွါးရေးစတဲ့ အဘက်ဘက်မှာ တိုးတက်ကောင်းစားတာကို ခံစားရမယ်။

အောက်တိုဘာလ ၂၀ ရက်နေ့

တိုးပွါးခြင်းကို ကန့်သတ်ထားတဲ့စိတ်သဘော

“သင်၏​တဲ​ရာ​ကို ကျယ်​စေ​လော့။ သင်၏​နေ​ရာ မျက်​နှာ​ကြက်​ကို ကြက်​ဦး​လော့။ နှ​မြော​သော စိတ်​မ​ရှိ​နှင့်။ ကြိုး​တို့​ကို ရှည်​စေ​ဦး​လော့။ တိုင်​တို့​ကို မြဲ​စွာ​စိုက်​လော့။” ‭‭ဟေရှာယ‬ ‭၅၄:၂

သင်တိုးပွါးဖို့ ဘုရားကအလိုရှိပေမဲ့ တိုးပွါးခြင်းမရောက်လာအောင် ကန့်သတ်ထားတဲ့ အရာတော့ရှိတယ်။ လူတွေက မတိုးပွါးစေတာက ပတ်ဝန်းကျင်ကြောင့်၊ လူတွေကြောင့်၊ စာတန်ကြောင့်လို့ထင်တတ်ပေမဲ့ တကယ်တမ်းတော့ တိုးပွါးခြင်းကို ဆီးတားထားတဲ့အရာက ကိုယ့်ရဲ့ စိတ်သဘောကြောင့်ပါ။ ဟေရှာယက ပြောတယ် နှမြောတဲ့စိတ် မရှိနဲ့။ ဒီ စိတ်သဘောက ဘုရားပေးချင်တဲ့ တိုးပွါးခြင်းတွေ အသက်တာထဲကို မရောက်အောင် ဆီးတားထားတယ်။ အရာရာကို နှမြောတွန့်တိုနေလို့ ဘုရားပေးချင်တဲ့ တိုးပွါးခြင်း ရောက်လာမှာ မဟုတ်ဘူးဆိုတာ သိပါ။

အောက်တိုဘာလ ၁၈ ရက်နေ့

ယုံကြည်ခြင်းမှ လာသော

“သင်​တို့​သည် သန့်ရှင်း​သော​ဝိညာဉ်​တော်​၏​တန်ခိုး​အားဖြင့် မျှော်လင့်​ခြင်း​နှင့်​ကြွယ်ဝ​မည့်​အကြောင်း မျှော်လင့်​ခြင်း​၏​အရှင်​ဘုရားသခင်​သည် ယုံကြည်​ခြင်း​မှ​လာ​သော ဝမ်းမြောက်​ခြင်း​နှင့်​ငြိမ်သက်​ခြင်း​အလုံးစုံ​တို့​ဖြင့် သင်​တို့​ကို​ပြည့်စုံ​စေ​တော်မူ​ပါစေသော။”‭‭ရောမဩဝါဒစာ‬ ‭၁၅:၁၃

ကိုယ်ံဟာကိုယ် ယုံကြည်ခြင်းရှိသလား? မရှိဘူးလား? ဘယ်လိုသိနိုင်မလဲ? လူတချို့က ကိုယ့်ဟာကိုယ် ယုံကြည်ခြင်း အလွန်ရှိတယ်လို့ထင်မှတ်နေပေမဲ့ တကယ်တမ်းတော့ နည်းနည်းမှ မရှိဘူးဆိုတာ နှုတ်ကပတ်တော်နှင့် စစ်ဆေးလိုက်တော့ တွေ့ရတယ်။ တချို့ကျတော့ ကိုယ့်ဟာကိုယ် မရှိဘူးလို့ထင်နေပေမဲ့၊ ထင်မထားလောက်အောင် ယုံကြည်ခြင်းရဲ့ အသီးအပွင့်တွေကို မြင်တွေ့နေရပြန်ရော။ နှုတ်ကပတ်တော်က ပြောတယ် ယုံကြည်ခြင်း တကယ်တမ်းရှိရင် အသက်တာမှာ ဝမ်းမြောက်ခြင်းနှင့် ငြိမ်သက်ခြင်းကနေ နေရာယူနေတယ်။ ယုံကြည်ခြင်းမရှိတဲ့သူအသက်တာမှာ ဒီအရာတွေကို တွေ့ရမှာမဟုတ်ဘူး။ ဝမ်းမြောက်ခြင်းနှင့် ငြိမ်သက်ခြင်း မရှိတဲ့သဘောက ယုံကြည်ခြင်းကိုတကယ်နေရာမပေးဘူးဆိုတဲ့အဓိပ္ပါယ်ပဲ။

အောက်တိုဘာလ ၁၇ ရက်နေ့

ဘုရားရဲ့တိကျတဲ့လမ်းညွှန်ခြင်း

“သင်​တို့​သည် လက်ယာ​ဘက်​၊ သို့မဟုတ် လက်ဝဲ​ဘက်​သို့ လှည့်​သောအခါ “​ဤ​လမ်း​သည် မှန်​၏​။ ဤ​လမ်း​အတိုင်း သွား​လော့​”​ဟု သင်​တို့​နောက်​၌​ပြော​သော​စကား​ကို သင်​တို့​၏​နား​ဖြင့် ကြား​ကြ​ရ​မည်​။” ဟေရှာယအနာဂတ္တိကျမ်း‬ ၃၀:၂၁

ကိုယ့်ကို ဘယ်သူမှ လမ်းမပြဘူး၊ သင်ပေးတဲ့သူမရှိဘူးလို့ တွေးပြီး စိတ်ပျက် အားငယ်နေသလား? လူတွေအနေနဲ့ သွန်သင်ပြသမယ့်သူ မရှိပေမဲ့ သန့်ရှင်းသောဝိညာဉ်တော်က လိုအပ်တဲ့ အရာတိုင်းကို အတိအကျ လမ်းညွှန်ပြသသူဖြစ်တယ်။ အဝေးကနေပဲ လမ်းညွှန်တာ မဟုတ်သလို၊ တစ်ပတ်တစ်ခါ လိုအပ်မှ လမ်းညွှန်တာ မဟုတ်ဘူး။ သင့်အနားကနေပြီးတော့ အချိန်တိုင်း အတိအကျ လမ်းညွှန်ပြ သသူဖြစ်တယ်။ သန့်ရှင်းသောဝိညာဉ်တော်က သွားရမယ့်လမ်း၊ လုပ်ရမယ့်အလုပ်၊ ရွေးချယ်မှုတစ်ခုစီတိုင်းကို အနားမှာ နေပြီးတော့ အသံနှင့် လမ်းညွှန် ပေးနိုင်သူဖြစ်တယ်။ ဝိညာဉ်တော်ရှိရင် လမ်းမှားမှာ ကြောက်စရာ၊ စိုးရိမ်စရာမလိုဘူး။

အောက်တိုဘာလ ၁၆ ရက်နေ့

ရှိတော့မည်မဟုတ်

“ကိုယ်တော်​သည် သူ​တို့​၏​မျက်စိ​မှ​မျက်ရည်​ရှိသမျှ​တို့​ကို သုတ်​ပေး​တော်မူ​လိမ့်မည်။ သေ​ခြင်း​သည် ရှိ​တော့မည်​မ​ဟုတ်။ ဝမ်းနည်း​ကြေကွဲ​ခြင်း၊ အော်ဟစ်​ငိုကြွေး​ခြင်း​နှင့် နာကျင်​ခြင်း​ဝေဒနာ​တို့​သည်​လည်း ရှိ​တော့မည်​မ​ဟုတ်။ အကြောင်းမူကား ယခင်​ဖြစ်​ခဲ့​သော​အရာ​တို့​သည် ပျောက်ကွယ်​သွား​ကြ​ပြီ”​ဟု ဆို​သည်​ကို ငါ​ကြား​ရ​၏။” ဗျာဒိတ်ကျမ်း‬ ၂၁:၄

ဘုရားသခင်နှင့်အတူရှင်သန်တဲ့ ကောင်းကင်သစ်နှင့်မြေကြီးသစ်မှာ အားလုံးရှိမှာမဟုတ်ဘူး။ မရှိတဲ့အရာတွေ အများကြီးရှိတယ်။ ရှင်ယောဟန်မြင်တဲ့ ရူပါရုံနဲ့ ကြားတဲ့ ဘုရားအသံကိုကြည့်ရင် မရှိတဲ့အရာတွေကို တွေ့ရတယ်။ မျက်ရည်ရှိတော့မှာမဟုတ်ဘူး။ ဘယ်လိုအကြောင်းကြောင့်မှ မျက်ရည်ကျစရာ အကြောင်းမရှိတော့ဘူး။ သေခြင်းလဲ ရှိတော့မှာမဟုတ်ဘူး။ ဝမ်းနည်း ခြင်း နှင့်အော်ဟစ်ငိုကြွေးခြင်းလဲ မရှိတော့ဘူး။ အပြီးတိုင် ဘုရားက ဖယ်ရှားပစ်လိုက်ပြီ။ နာကျင်ခြင်းဝေဒနာကိုလဲ ဘုရားက ခွင့်ပြုတော့မှာမဟုတ်ဘူး။ ပြီးခဲ့တဲ့ အတိတ်နဲ့ဆိုင်တဲ့အရာတွေကို ဘုရားက အပြီးတိုင် ဖယ်ရှားပစ်လိုက်လို့။ ဘဝမှာ ဘုရားနဲ့အတူ အသက်ရှင်တဲ့အခါမှာ အတိတ်ဆိုးကနေ လွတ်မြောက်စေပြီးတော့ မကောင်းတဲ့အရာတွေကို ဖယ်ရှားပစ်ခြင်းခံရတဲ့ဘဝဟာ ဘယ်လောက်တောင် ကောင်းလိုက်သလဲ ?

အောက်တိုဘာလ ၁၅ ရက်နေ့

ကျေးဇူးပြုခြင်း

ဖြောင့်​မတ်​သော​သူ​တို့​မူ​ကား၊ တစ်​ယောက်​ကို​တစ်​ယောက် ကျေး​ဇူး​ပြု​ကြ၏။” ‭‭သုတ္တံ‬ ၁၄:၉

ဖြောင့်မတ်သူလို့သတ်မှတ်ခြင်းခံရတဲ့ ဘုရားသားသမီးတွေရဲ့ အသက်ရှင်က လောကသားတွေနဲ့ မတူတာတော့သေချာတယ်။ တစ်ယောက်ကို တစ်ယောက် အပြစ်မြင်တာ၊ အပြစ်ပြောတာထက်၊ ကျေးဇူးပြုတတ်တဲ့သဘောနဲ့ပြည့်ဝတဲ့ သူတွေဖြစ်တယ်။ ကျေးဇူးပြုတတ်ခြင်းက ဖြောင့်မတ်သောသူတွေရဲ့ သဘောသဘာဝဖြစ်တယ်။ ဒါဝိဒ်ကို ယောနသန်ကလိုအပ်တဲ့အချိန်မှာ ကျေးဇူးပြုခဲ့သလို၊ ဒါဝိဒ်ကလဲ ယောနသန် မရှိတော့ပေမဲ့ သူ့ရဲ့သားကို ပြန်လည်ကျေးဇူးပြုခဲ့တဲ့သူဖြစ်တယ်။ ကျေးဇူးပြုခြင်းက ဖြောင့်မတ်သူတစ်ယောက်ရဲ့ ထင်ရှားတဲ့အမှတ်လက္ခဏာတစ်ခုပဲ။

အောက်တိုဘာလ ၁၄ ရက်နေ့

ဘု​ရား​သ​ခင်၌ ဝမ်း​မြောက်​ခြင်း

“ပင်​လယ်​ကို ကုန်း​ဖြစ်​စေ​တော်​မူ၏။ သူ​တို့​သည် ရေ​စီး​ရာ​အ​ရပ်​ကို ခြေ​ဖြင့်​လျှောက်​သွား​ကြ​သည်​ဖြစ်၍၊ ငါ​တို့​သည် ဘု​ရား​သ​ခင်၌ ဝမ်း​မြောက်​ကြ၏။”ဆာလံ‬ ‭၆၆:၆

လူတွေက နောက်ဆုံးသောကာလ ရောက်လာလေ ကြောက်ရွံ့ခြင်း၊ စိုးရိမ်ခြင်းတွေနဲ့ လွှမ်းမိုးခြင်းခံရလေဖြစ်လာတယ်။ စီးပွါးရေးလောကမှာလဲ လှုပ်ခတ်မှုတွေက လူပေါင်းများစွာကို ဘဝပျက်စေခဲ့ပြီး ဆိုးရွားတဲ့သတင်းတွေကြောင့် လမ်းမရှိတော့ဘူးလို့ လူပေါင်းများစွာက ထင်မှတ်နေကြတယ်။တကယ်တော့ ဘုရားက လမ်းမရှိတဲ့အရပ်မှာ လမ်းဖေါက်ပေးပြီးတော့ ခေါ်ဆောင်ပေးတဲ့ဘုရားပါ။ လမ်းရှိမှ ဖြစ်နိုင်မှ လုပ်တဲ့ ဘုရားမဟုတ်ပါဘူး။ ဆိုးရွားမှုတွေကြားမှာ ဘုရားရဲ့ဝမ်းမြောက်ခြင်းနဲ့ အသက်ရှင်တဲ့သူတွေအတွက် မဖြစ်နိုင်ဘူးလို့ထင်နေရတဲ့အရာတွေအားလုံးက၊ ဝမ်းနည်းစရာတွေနှင့် ငြီးတွားမှုတွေက ဝမ်းမြောက်ခြင်း ကူးပြောင်းသွားမှာပါ။

အောက်တိုဘာလ ၁၃ ရက်နေ့

လူတွေကြောက်တဲ့အထိ

“ဘု​ရား​သ​ခင်​သည် ငါ​တို့​ကို​ကောင်း​ချီး​ပေး​တော်​မူ​ဦး​မည်။ မြေ​ကြီး​စွန်း​အ​ပေါင်း​တို့​သည်​လည်း၊ ဘု​ရား​သ​ခင်​ကို ကြောက်​ရွံ့​ကြ​လိမ့်​မည်။” ဆာလံ‬ ၆၇:၇

ဘုရားကိုလူတွေက ကြောက်ရတဲ့အထိ ဘုရားက သူ့လူတွေကို ကောင်းကြီးပေးပြီး ကြွယ်ဝစေမယ်။ လူတွေကြောက်တဲ့အထိ ကြွယ်ဝစေမယ်ဆိုတော့ ဘယ်လောက်တောင် ကြွယ်ဝမလဲ စဉ်းစားကြည့်။ နောက်ဆုံးသောကာလမှာ ဘုရားကသူ့သားသမီးတွေကို အခက်အခဲတွေ ဒုက္ခတွေထဲမှာပဲ ကျက်လည်စေမယ်လို့မထင်လိုက်စေချင်ဘူး။ လောကသားတွေကြောက်တဲ့အထိ ကြွယ်ဝခြင်းနယ်ပယ်ထဲမှာ ပို့ဆောင်ချင်တယ်။ ဒါကိုမယုံဘူး မမျှော်လင့်ဘူးဆိုရင်တော့ သေချာတယ် အခြားသူတွေကိုကြည့်ပြီးတော့ ကြောက်ရွံ့ရတဲ့သူပဲ ဖြစ်ပါလိမ့်မယ်။

အောက်တိုဘာလ ၁၁ ရက်နေ့

ဘုရားရဲ့ အစွမ်းထက်သောလက်နက်

“ငါ​တို့​စစ်​တိုက်၍ သုံး​စွဲ​သော လက်​နက်​သည် ဇာ​တိ​ပ​က​တိ​လက်​နက် မ​ဟုတ်။ ဘု​ရား​သ​ခင်၏ တန်​ခိုး​တော်​အား​ဖြင့် မြို့​ရိုး​မြို့​ပြ​တို့​ကို ဖြို​ဖျက်​နိုင်​သော​လက်​နက် ဖြစ်၏။-” ၂ ကောရိန္သု‬ ‭၁၀:၄

ကိုယ်ဟာ ဘယ်သူလဲ မသိတာက ဆုံးရှုံးမှုကြီးတစ်ခုဖြစ်သလို၊ ကိုယ်သုံးစွဲတဲ့ လက်နက်တွေက ဘယ်လောက် အစွမ်းထက်ပြီးတော့ ပြင်းထန်သလဲဆိုတာ မသိတာကလဲ ယုံကြည်သူတွေ အောင်မြင်သင့်သလောက် မအောင်မြင်ရတဲ့ အကြောင်းအရင်းတွေထဲကက တစ်ခုပဲ။ တကယ်တော့ အတားအဆီးတွေကြောင့် စိတ်ပျက်ရမှာ မဟုတ်ဘူး။ အတားအဆီးတွေကို ဘုရားပေးထားတဲ့ အစွမ်းထက်တဲ့ လက်နက်တွေနဲ့ ဖြိုဖျက်ရမှာ။ ဝိညာဉ်ရေးရာမှာ ဘုရားအပ်နှင်းထားတဲ့ အစွမ်းထက်တဲ့လက်နက်တွေကို မသိတာရော၊ မသုံးတတ်တာဟာ မအောင်စေတဲ့ အဓိက အချက်တွေပဲ။

အောက်တိုဘာလ ၁၀ ရက်နေ့

အောင်မြင်သူသာလျှင် ထိုင်ရမယ်

“ငါ​သည်​အောင်​မြင်၍ ငါ့​ခ​မည်း​တော်၏ ပ​လ္လင်​တော်​ပေါ်​မှာ ခ​မည်း​တော်​နှင့်​အ​တူ ထိုင်​နေ​သ​ကဲ့​သို့၊ အောင်​မြင်​သော​သူ​သည် ငါ၏​ပ​လ္လင်​ပေါ်​မှာ ငါ​နှင့်​အ​တူ ထိုင်​နေ​ရ​သော​အ​ခွင့်​ကို ငါ​ပေး​မည်။-” ဗျာဒိတ်‬ ၃:၂၁

တချို့သောနေရာတွေမှာ မတ်တပ်ရပ်ခွင့်နှင့် ထိုင်ခွင့်က လူတိုင်းရမှာမဟုတ်ဘူး။ အစီစဉ်တွေ၊ သင်တန်းတွေမှာ တွေ့ဖူးလိမ့်မယ်။ အကောင်းဆုံးနေရာတွေကို သီးသန့်လူတွေအတွက် ဉီးထားတာ၊ဖယ်ထားတာကို။ ဒီလိုနေရာတွေက လူတိုင်း ထိုင်ချင်တဲ့နေရာတွေဖြစ်ပေမဲ့၊ လူတိုင်းတော့ ထိုင်ခွင့်မရဘူး။ ဒီနှစ်အစောပိုင်းမှာ ဘုရားကြီးမားစွာအသုံးပြုနေတဲ့ ဆရာကြီး မယ်ဒိုနာဒို ရဲ့ အစည်းအဝေးကို သွားခွင့်ရခဲ့တယ်။ လူထောင်ပေါင်းများစွာ လာရောက်တတ်ခဲ့ပေမဲ့ အရှေ့ဆုံးတန်းမှာ အထူး ဉီးစားပေးသူများ နေရာတွင်ထိုင်ခွင့်ရခဲ့တယ်။ ဒီနေရာမှာ သွားထိုင်တိုင်းမှာ လူတိုင်းရဲ့ ကြည့်တဲ့အကြည့်တွေက မတူဘူး။ ဒီနေ့ အောင်မြင်သောသူတွေကိုသာ ပေးမယ့်အခွင့်အရေးကလဲ လူတိုင်းရတဲ့အရာ မဟုတ်ဘူး ဆိုတာ သိစေချင်တယ်။ လူတိုင်း အားကျလိုချင်တဲ့အရာကို သင့်ကို ပိုင်ခွင့်ပေးတယ်ဆိုတာ သင်ဟာ သာမန် မဟုတ်ဘူးဆိုတာ သိထားဖို့လိုတယ်။

အောက်တိုဘာလ ၉ ရက်နေ့

ငါ၏အောင်လံ

“မောရှေ​သည်​လည်း ယဇ်ပလ္လင်​ကို​တည်​၍ ၎င်း​၏​အမည်​ကို “​ထာဝရဘုရား​သည် ငါ​၏​အောင်လံ​ဖြစ်​တော်မူ​၏​”​ဟု ခေါ်​၏​။” ထွက်မြောက်ရာကျမ်း‬ ‭၁၇:၁၅

သင့်ဘဝရဲ့အောင်မြင်ခြင်း လျှို့ဝှက်ချက်က ဘာလဲ? လူတိုင်းမှာ အောင်မြင်ခြင်းရဲ့လျှို့ဝှက်ချက် ကိုယ်စီရှိတယ်။ မောရှေမှာလဲ ဒီလောက်ကြီးတဲ့ တာဝန်တွေကို အောင်မြင်စွာနဲ့ ဆောင်ရွက်နိုင်ခဲ့သလို၊ ကြီးမားတဲ့ရန်သူတွေကိုလဲ တိုက်နိုင်ခဲ့တယ်။ လူသန်းပေါင်းများစွာကိုလဲ နေ့စဉ် ဉီးဆောင်ပြီးတော့ ရန်သူတွေလက်ကနေ ကယ်ထုတ်နိုင်ခဲ့တဲ့သူ။ နေ့စဉ် ပြဿနာတွေကိုလဲ​ဉီးဆောင်ပြီးတော့ အောင်မြင်စွာ ဖြေရှင်းပေးနိုင်ခဲ့တဲ့သူ။ တစ်နေ့မှာတော့သူရဲ့ အောင်မြင်ခြင်းရဲ့အရင်းအမြစ်ကို သူဟာ ဝန်ခံခဲ့တယ်။ ဒီအရာကအခြားအရာမဟုတ်ဘူး။ ဘုရားပဲဖြစ်တယ်။

အောင်တိုဘာလ ၈ ရက်နေ့

အစဉ်အောင်ပွဲ ခံစေခြင်းငှါ

“ငါ​တို့​သည် ခ​ရစ်​တော်​နှင့်​အ​တူ အောင်​ပွဲ​ကို အ​စဉ်​ခံ​စေ​ခြင်း​ငှာ​လည်း​ကောင်း၊ ထို​သ​ခင်​ကို သိ​ခြင်း၏ အ​မွှေး​အ​ကြိုင်​သည် ငါ​တို့​အား​ဖြင့် အ​ရပ်​ရပ်​တို့၌ နှံ့​ပြား​စေ​ခြင်း​ငှာ​လည်း​ကောင်း၊ ပြု​တော်​မူ​သော ဘု​ရား​သ​ခင်၏ ကျေး​ဇူး​တော်​ကို ချီး​မွမ်း​ခြင်း​ရှိ​စေ​သ​တည်း။-” ၂ ကောရိန္သု‬ ‭၁၂:၁၄

ဘုရားက ကိုယ့်ကို ခေါ်ထားတာ အရှုံးခံဖို့မဟုတ်ဘူး။ အစဉ် အောင်ပွဲခံဖို့ ။ ဒါကို နားမလည်တဲ့ သူတွေက စာတန်ရဲ့လှည့်စားခြင်းအောက်မှာ နေ့စဉ် အရှုံးခံနေရတယ်။ ဘယ်လောက် ဝမ်းနည်းဖို့ကောင်းသလဲ? ဘုရားနှင့်အတူ အောင်ပွဲကို အစဉ်ခံခြင်းကို သဘောပေါက် နားလည်တဲ့သူတွေကတော့ ဒီအောင်မြင်ခြင်းကို နေရာတိုင်းသယ်ဆောင်သွားနိုင်သူတွေဖြစ်လာတယ်။ ဒီသမ္မာတရားကိုနားမလည်သဘော မပေါက်တဲ့သူတွေကတော့ ဆုံးရှုံးခံနေရအုံးမှာပဲ။

အောက်တိုဘာလ ၇ ရက်နေ့

မင်း ကဲ့သို့ ပြိုင်၍ နိုင်လေပြီ

“နောင်၌ သင်၏​အ​မည်​ကို​ယာ​ကုပ်​ဟူ၍ မ​ခေါ်​ရ။ ဣ​သ​ရေ​လ​ဟူ၍​ခေါ်​ရ​မည်။ အ​ကြောင်း​မူ​ကား၊ သင်​သည်​ဘု​ရား​သ​ခင်​နှင့်​လည်း​ကောင်း၊ လူ​နှင့်​လည်း​ကောင်း၊ မင်း​ကဲ့​သို့​ပြိုင်၍ နိုင်​လေ​ပြီ​ဟု မိန့်​တော်​မူ၏။” ကမ္ဘာဦး‬ ‭၃၂:၂၈

လက်ဝှေ့ နှုတ်ဆက်ပွဲအနေနဲ့ နောက်ဆုံးထိုးသွားတဲ့ အောင်လပွဲကို ကြည့်တော့ တစ်ဖက်လူက မပြိုင်ခင်ကတည်း အနိုင်ပေးဖို့ ဆုံးဖြတ်ထား ပုံရှိတယ်။ သူ့ရဲ့ လုပ်နိုင်အား အကုန်လုံးကို မမြင်ရဘူး။ နောက်ဆုံးပွဲဆိုတော့ အမှတ်တရအဖြစ် အောင်မြင်ခြင်းနဲ့အဆုံးသတ်စေချင်ပုံပါပဲ။ ဒါလဲ ကောင်းတဲ့သူရဲ့ အားကစားစိတ်ပေါ့။ ဘုရားရဲ့ဖခင် စိတ်ကလဲ ဒီထက်ပိုပြီး နက်ရှိုင်းတယ်။ သူ့သားသမီးတိုင်းကို မပြိုင်ခင် ရင်ဆိုင်မှုတွေ မကြုံခင်ကတည်းက အောင်မြင်မှုပေးဖို့ ကြိုတင်ဆုံးဖြတ်ထားပြီးသား။ လူတွေထဲမှာပဲ မဟုတ်ဘူး၊ သူ့ဘက်ကတောင် အလျော့ပေးဖို့ ကြိုတင်ဆုံးဖြတ်ထားပြီးသား။ ဒါကြောင့် ဘုရားသားဟာ အရာရာမှာ မအောင်မြင်စရာ၊ ကောင်းကြီးမရစရာကို မရှိဘူး။ အရာရာမှာ ထိပ်ဆုံးကနေ အောင်ပွဲခံနိုင်မှာ သေချာတယ်။

အောက်တိုဘာလ ၆ ရက်နေ့

အာတောဧလရော

“ထို​သို့​မိန့်​မြွက်​တော်​မူ​သော ထာ​ဝ​ရ​ဘု​ရား​ကို၊ အာ​တော​ဧ​လ​ရော ဟူ​သော​အ​မည်​ဖြင့်​ခေါ်​ဝေါ်၍၊ ငါ့​ကို​မြင်​တော်​မူ​သော​သူ​ကို ဤ​အ​ရပ်၌​ပင် ငါ​ဖူး​မြင်​ရ​သည်​တ​ကား​ဟု ဟာ​ဂ​ရ​ဆို​လေ၏။” ကမ္ဘာဦး‬ ‭၁၆:၁၃

နိုဝင်ဘာလမှာ သင့်ကိုမြင်သော ဘုရားကို မြင်တွေ့ရမယ့် ကာလဖြစ်တယ်။ တစ်ခါတစ်လေ အသက်တာမှာ ဘုရားက ကိုယ့်ကိုမြင်တယ်၊ ကိုယ့်အမှုအရာတွေ၊ လိုအပ်ချက်တွေကို မြင်တယ်ဆိုတာ မေ့နေတတ်ကြတယ်။ ဟာဂရ တောထဲမှာ ဒုက္ခရောက်တဲ့အချိန်မှာ ကောင်းကင်တမန်နှင့်ဆုံတွေ့ပြီးတော့ သူဘာလုပ်ရမလဲဆိုတာကို လမ်းညွှန်ပြတယ်။ သူ့သားရဲ့အနာဂတ်ကိုလဲ​သိခွင့်ရတယ်။ တစ်ခါတစ်လေ အခက်အခဲဆိုတာ ရှောင်ပြေးတာထက် ရင်ဆိုင်ကြုံတွေ့ပြီးတော့ ဘုရားရှိစေချင်တဲ့နှလုံးသားကို သင်ယူ တတ်ဖို့လိုတယ်။ ဘုရားထားတဲဲ့နေရာမှာ နေတတ်ခြင်းက အလွန်အရေးကြီးတယ်။ ဒါကို ဟာဂရ ကောင်းကင်တမန်အားဖြင့် နားလည်ပြီးတော့ သခင်မဆီကို ပြန်လာခွင့်ရတယ်။ ဘုရားက သင့်အခက်အခဲတွေကို မြင်တာ မသိတာ နားမလည်တာ မဟုတ်ပါဘူး။ သိတယ် မြင်တယ် နားလည်တယ် ဒါပေမဲ့ အဲ့ဒီအထဲမှာ သူနဲ့အတူ ဖြတ်သန်းသွားလာစေချင်တာပါ။

အောက်တိုဘာလ ၄ ရက်နေ့

ကြားရသောသူတိုင်း ရယ်မောရမယ်

“စာ​ရာ​က​လည်း၊ ငါ​ရယ်​ရ​သော​အ​ခွင့်​ကို ဘု​ရား​သ​ခင်​ပေး​တော်​မူ​ပြီ။ ဤ​သ​တင်း​ကို ကြား​သော​သူ​အ​ပေါင်း​တို့​သည်​လည်း၊ ငါ​နှင့်​အ​တူ ရယ်​ကြ​လိမ့်​မည်​ဟူ၍​လည်း​ကောင်း၊”ကမ္ဘာဦး‬ ၂၁:၆

ဝမ်းမြောက်ခြင်းအခွင့်ဆိုတာ ဘုရားပေးမှရတာပါ။ စာရာအတွက်ရယ်မောရတဲ့အခွင့်ကို အသက်ကြီးမှ ဘုရားက ပြင်ဆင်ပေးတယ်။ သူ့အသက်အရွယ်နဲ့ မဖြစ်နိုင်တာ လုပ်ဆေောင်ပေးတဲ့အခါမှာ သူဟာ အံ့ဩလွန်းလို့ ရယ်မောခြင်းတွေနဲ့ပဲပြည့်နှက်နေခဲ့တယ်။ သူ့မှာ ဘုရားပြုတဲ့အမှုတွေကိုလဲ ကြားတဲ့သူတိုင်းက ရယ်မော ပျော်ရွှင်ခွင့်ရခဲ့တယ်။ မဖြစ်နိုင်တော့ဘူးလို့ ထင်တဲ့အရာတွေ ဖြစ်လာတဲ့အခါမှာ ဘယ်လောက်ပျော်ရွှင်ရသလဲ ဆိုတာ ကြုံဖူးတဲ့သူတိုင်း သိမှာပါ။ ဒီလို စာရာကြုံသလို ဘုရားက သင့်ကိုလဲ ကြုံတွေ့ခွင့်ပေးနိုင်တယ်။ သင့်ဘဝမှာ ဘုရားပြုတဲ့ နိမိတ်လက္ခဏာတွေဟာ သင့်ကိုယ်တိုင်ရော ကြားရတဲ့သူတိုင်းရော ရယ်မော ပျော်ရွှင်ရမယ့်နေ့ရက် ရောက်လာပြီ။

အောက်တိုဘာလ ၃ ရက်နေ့

မတောင်းသောဆု

“ထို​မှ​တစ်​ပါး သင်​နှင့်​တူ​သော ရှင်​ဘု​ရင်​တစ်​ယောက်​ကို​မျှ သင့်​လက်​ထက်၌ မ​ရှိ​စေ​ခြင်း​ငှာ၊ သင်​မ​တောင်း​သော​ဆု၊ စည်း​စိမ်​ဥ​စ္စာ၊ ဂုဏ်​အ​သ​ရေ​ကို ငါ​ပေး၏။” ၃ ဓမ္မရာဇဝင်‬ ၃:၁၃

ဘုရားက တောင်းတဲ့ဆုတွေကိုပဲ ပေးတာမဟုတ်ဘူး။ သင့်ရဲ့ဆုတောင်းခြင်းက ဘုရားရဲ့နှလုံးသားနှင့်ချိတ်ဆက်မိသွားတဲ့အခါမှာ သင် မတောင်းမိခဲ့တဲ့ဆုတွေကိုလဲ ဘုရားက ပြည့်စုံစေတယ်။ ဘုရားရဲ့ နှလုံးသားက သူ့ရဲ့သားသမီးတစ်ယောက်စီတိုင်းကို တောင်းတဲ့အရာတွေကို ပဲ ပြည့်စုံစေချင်တာ မဟုတ်ဘူး။ မတောင်းတဲ့အရာတွေကိုလဲ ဖြည့်ပေးခြင်တယ်။ ရှောလမုန်ဟာ အိမ်မက်ထဲမှာတောင် ဆုတောင်းတာ မှန်ခဲ့တယ်။ အိမ်မက်ဆိုပြီး အထင်မသေးနဲ့ တကယ်အပြင်မှာ ပြည့်စုံခဲ့တယ်ဆိုတာ တွေ့ရတယ်။ သူမတောင်းတဲ့ နာမည် ကျော်ကြားမူတွေ၊ ကြွယ်ဝခြင်းတွေနဲ့ သူနဲ့တူတဲ့သူ တစ်ယောက်မှ မရှိလောက်အောင်ကို ဘုရားက သူ့ကို ဖြစ်စေခဲ့တယ်။

အောက်တိုဘာလ ၂ ရက်နေ့

သက်တမ်းတိုးပေးခြင်း

“သင်​သည် ငါ့​လူ​တို့၏ ဗိုလ်​ချုပ်​ဟေ​ဇ​ကိ​မင်း​ထံ​သို့ တစ်​ဖန်​သွား​ပြီး​လျှင်၊ သင့်​အ​ဘ​ဒါ​ဝိဒ်၏ ဘု​ရား​သ​ခင်​ထာ​ဝ​ရ​ဘု​ရား မိန့်​တော်​မူ​သည်​ကား၊ သင်၏​ပ​တ္ထ​နာ​စ​ကား​ကို ငါ​ကြား​ပြီ။ သင်၏​မျက်​ရည်​ကို​လည်း ငါ​မြင်​ပြီ။ သင်၏​အ​နာ​ကို ငါ​ပျောက်​စေ​သ​ဖြင့်၊ သင်​သည် သုံး​ရက်​လွန်​လျှင် ဗိ​မာန်​တော်​သို့​တက်​ရ​လိမ့်​မည်။” ၄ ဓမ္မရာဇဝင်‬ ၂၀:၅

မကြာခင် အချိန်ပိုင်းတွင်းမှာ သေရတော့မယ့် ဟေဇကိမင်း ကြီးတစ်ယောက် နံရံဘက်လှည့်ပြီး နှလုံးသားသွန်းလောင်းကာ ဆုတောင်းလိုက်တဲ့ ခဏချင်းမှာ အပြောင်းအလဲတွေက ချက်ခြင်းဆိုသလို ရောက်လာတယ်။ ၁၅ နှစ် သက်တမ်း တိုးပေးခြင်းကို ခံရသတဲ့။ တကယ်တော့ ဆက်အသက်ရှင်ဖို့ သက်တမ်းကုန်တဲ့ ဘဝကနေ သက်တမ်း တိုးပေးခံရတဲ့ဘဝကို ခဏလေး အတွင်းမှာ ပြောင်းလဲ ခဲ့တယ်။ ဆုတောင်းခြင်းက သင့်ဘဝရဲ့ သက်တမ်းကုန်နေတဲ့အရာတွေ အားလုံးကို ဆက်လက် ရှင်သန်နိုင်ဖို့ သက်တမ်း တိုးပေးနိုင်တယ်။ ဘယ်အရာတွေက သင့်ဘဝမှာ သက်တမ်းကုန်နေပြီလဲ? နှလုံးသားအကြွင်းမဲ့နဲ့ ဘုရားဆီမှာ ဆုတောင်းခြင်းနဲ့တိုးဝင် ပါ။ သက်တမ်းတိုးခွင့်ပြန်ရပါလိမ့်မယ်။

အောက်တိုဘာလ ၁ ရက်နေ့

အထင်လွဲခံရတဲ့အထိ

“စိတ်​နှ​လုံး​နှင့် ဆု​တောင်း၍ နှုတ်​ခမ်း​လှုပ်​သော်​လည်း၊ စ​ကား​သံ​မ​ထွက်​သော​ကြောင့်၊ ယစ်​မူး​သည်​ဟု ဧ​လိ​ထင်​လျက်၊”၁ ဓမ္မရာဇဝင်‬ ၁:၁၃

ဟန္ဒရဲ့ ဆုတောင်းခြင်းကို သိတယ် မဟုတ်လား? အခက်အခဲတွေ၊ပြဿနာတွေကြုံရတဲ့အခါမှာ ခံစားချက်တွေကို ဒီအတိုင်း မထားပဲ ဆုတောင်းခြင်းဘက်ကိုပြောင်းပစ်လိုက်တယ်။ ခံစားနေလို့လဲ အပိုပဲ ဆိုတာ သူကောင်းကောင်းသိတယ်။ ခံစားချက်တွေက ဆုတောင်းချက် အဖြစ်ပြောင်းလဲပေမဲ့ ချက်ခြင်းတော့ အကောင်းဘက်ပြောင်းလာတာတော့မဟုတ်ဘူး။ သူ့ရဲ့ဆုတောင်းပုံကိုကြည့်ပြီးတော့ ယဇ်ပုရောဟိတ်ကြီးက အထင်လွဲ​လိုက်သေးတယ်။ ဘယ်လောက်ပဲ အထင်လွဲခံရ သူကတော့ လက်မလျော့ဘူး ဆက်ဆုတောင်းခဲ့တယ်။ ဒါကြောင့်လဲ​ ဘုရားကလူတွေ မနာလိုလောက်အောင် ကောင်းကြီးပြန်ပေးခဲ့တယ်။ ဘဝမှာ ဘယ်တော့မှ​မရနိုင်တဲ့အရာတွေ တစ်ခုပြီးတစ်ခု အကောင်းဆုံး ပိုင်ဆိုင်ခွင့်ရခဲ့တယ်။

စက်တင်ဘာလ ၃၀ ရက်နေ့

သန့်​ရှင်း​သော​ဝိ​ညာဉ်​တော်​ကို သာ၍

သင်​တို့​သည် အ​ဆိုး​ဖြစ်​လျက်​ပင် ကိုယ်​သား​တို့​အား ကောင်း​သော​အ​ရာ​ကို ပေး​တတ်​လျှင်၊ ထို​မျှ​မ​က ကောင်း​ကင်​ဘုံ၌ ရှိ​တော်​မူ​သော သင်​တို့​အ​ဘ​သည် ဆု​တောင်း​သော​သူ​တို့​အား သန့်​ရှင်း​သော​ဝိ​ညာဉ်​တော်​ကို သာ၍ ပေး​တော်​မူ​မည် မ​ဟုတ်​လော​ဟု မိန့်​တော်​မူ၏။” ရှင်လုကာ‬ ‭၁၁:၁၃

ဆုတောင်းတဲ့သူနဲ့ ဆုမတောင်းတဲ့သူ ဘာကွာခြားလဲလို့မေးရင် သန့်​ရှင်း​သော​ဝိ​ညာဉ်​တော်​ကို သာ၍ရတဲ့သူနဲ့ မရတဲ့သူကွာတယ်လို့ပဲ ဖြေရမယ်။ သန့်ရှင်းသောဝိညာဉ်တော်နဲ့ပိုပြီး ပြည့်ဝချင်ရင် အခြားနည်းလမ်းမရှိဘူး။ ဘုရားနဲ့အချိန်ယူတဲ့ ဆုတောင်းခြင်းပဲရှိတယ်။ ဆုတောင်းခြင်းကို လျော့လိုက်တဲ့သူက ဝိညာဉ်တော်နဲ့ပြည့်ဝခြင်းမှာလဲ လျော့ရဲလာလိမ့်မယ်။ ဆုမတောင်းတဲ့သူကတော့ ဘယ်တော့မှ ဝိညာဉ်တော် ရဲ့တန်ခိုးထဲမှာ ရှင်သန်ခွင့် ရမှာမဟုတ်ဘူး။ သန့်ရှင်းသောဝိညာဉ်တော်က သင်မတတ်နိုင်တာတွေကိုမစဖို့ ဘုရားက စေလွှတ်ပေးခဲ့တာ။ သူ မရှိရင်တော့ သင့်မှာ ကူညီပေးမယ့်သူ မရှိတဲ့ဘဝကို သေချာပေါက်ရောက်လိမ့်မယ်။

စက်တင်ဘာလ ၂၉ ရက်နေ့

ကောင်းသောအရာကို သာ၍

“သင်​တို့​သည် အ​ဆိုး​ဖြစ်​လျက်​ပင် ကိုယ်​သား​တို့​အား ကောင်း​သော​အ​ရာ​ကို ပေး​တတ်​လျှင်၊ ထို​မျှ​မ​က ကောင်း​ကင်​ဘုံ၌ ရှိ​တော်​မူ​သော သင်​တို့​အ​ဘ​သည် ဆု​တောင်း​သော​သူ​တို့​အား ကောင်း​သော​အ​ရာ​ကို​သာ၍ ပေး​တော်​မူ​မည် မ​ဟုတ်​လော။-”ရှင်မဿဲ ၇:၁၁

လူတိုင်းကောင်းသောအရာကို သာ၍ လိုချင်ကြတာချည်းပဲ။ မကောင်းတဲ့အရာပဲ ရပါစေလို့ ဆန္ဒ ရှိတဲ့သူမရှိသလောက်ရှားလိမ့်မယ်။ ကောင်းတဲ့အရာ ကိုသာ၍ လိုချင်တယ်ဆိုရင် သခင်ယေရှုက နည်းလမ်းပေးထားတယ်။ ဒါကတော့ ဆုတောင်းခြင်းပဲ။ တောင်းကြလော့ တောင်းလျှင်ရမယ်လို့ လူတိုင်း ဒီကတိတော်ကို သိကြပေမဲ့ လက်တွေ့လုပ်တဲ့သူကတော့ အင်မတန်နည်းတယ်။ တကယ် ဆုတောင်းခြင်းထဲမှာ အချိန်ပေးတဲ့သူဆိုတာ ညာလို့တော့မရဘူး။ ဘဝမှာ ကောင်းတဲ့အရာတွေနဲ့ပဲ ပြည့်နေတဲ့သူကတော့ သေချာတယ် သူဟာ တကယ်ကို ဘုရားနဲ့ ချိတ်ဆက်ပြီး တော့ ဆုတောင်းတဲ့သူပဲ။ ကောင်းတဲ့အရာတွေ တစ်စုံတစ်ခုမှ မလိုတဲ့ဘဝကို ရောက်ချင်ရင် ဆုတောင်းခြင်းနဲ့နေ့စဉ် ဘုရားနဲ့တိုးဝင်တက်ဖို့တော့တကယ်လိုတယ်။

စက်တင်ဘာလ ၂၇ ရက်နေ့

မကြောက်ပဲ

“မော​ရှေ​ကို ဖွား​မြင်​ပြီး​မှ အ​ဆင်း​လှ​သော သူ​ငယ်​ဖြစ်​သည်​ကို မိ​ဘ​တို့​သည်​မြင်​လျှင်၊ ယုံ​ကြည်​ခြင်း​အား​ဖြင့် ရှင်​ဘု​ရင်​အ​မိန့်​တော်​ကို မ​ကြောက်​ဘဲ သုံး​လ​ပတ်​လုံး သူ့​ကို ဝှက်​ထား​လေ၏။-” ဟေဗြဲ‬ ‭၁၁:၂၃

ယုံကြည်ခြင်းရဲ့ ဆန့်ကျင်ဘက်က ကြောက်ရွံခြင်းပဲ။ ကြောက်ရွံခြင်းရှိရင် ယုံကြည်ခြင်း မရှိနိုင်သလို၊ ယုံကြည်ခြင်းရှိရင်လဲ ကြောက်ရွံခြင်းက နေရာယူလို့မရဘူး။ မောရှေရဲ့မိဘတွေဟာ ယုံကြည်ခြင်းကိုနေရာပေးခဲ့လို့ ရှင်ဘုရင်ရဲ့အမိန့်ကို မကြောက်ပဲ ဆန့်ကျင်ခဲ့ကြတယ်။ ယုံကြည်ခြင်းနဲ့ မောရှေကို ဝှက်ထားမိတဲ့အတွက် သူနဲ့ မိသားစုသာမက ဣသရေလ တမျိုးလုံးကိုကောင်းကြီးခံစားရာ ဖြစ်တဲ့မောရှေပေါ်လာတယ်။ ယုံကြည်ခြင်းနှင့်လုပ်ဆောင်တဲ့အရာတွေက ကြာလေ ကောင်းကြီးရလေ ဖြစ်လာတယ်။ ကြောက်စိတ်နှင့်လုပ်ခဲ့တဲ့အရာတွေက ကြာလေ အဆိုးဘက်ကို ရောက်လေပဲ ဖြစ်စေတယ်။

စက်တင်ဘာလ ၂၆ ရက်နေ့

မရေတွက်နိုင်အောင်

အ​ကြောင်း​မူ​ကား၊ က​တိ​ထား​တော်​မူ​သော​သူ​သည် သ​စ္စာ​ရှိ​သည်​ဟု စိတ်​စွဲ​လမ်း​ခြင်း​ရှိ၏။- သို့​ဖြစ်၍၊ ထို​အ​မှု​အ​ရာ၌ လူ​သေ​နှင့်​တူ​သော သူ​တစ်​ယောက်​သည်၊ အ​ရေ​အ​တွက်​အား​ဖြင့် ကောင်း​ကင်​ကြယ်​ကဲ့​သို့​လည်း​ကောင်း၊ သ​မု​ဒ္ဒ​ရာ​ကမ်း​နား၌ မ​ရေ​တွက်​နိုင်​သော သဲ​လုံး​ကဲ့​သို့​လည်း​ကောင်း၊ များ​စွာ​သော​သူ​တို့၏​အ​ဘ ဖြစ်​သ​တည်း။-” ဟေဗြဲ‬ ‭၁၁:၁၁-၁၂

ဘာမှမရှိတဲ့ ဘဝကနေ မရေတွက်နိုင်အောင်များစွာသော အရာတွေပိုင်ဆိုင်တဲ့အထိ တိုးပွါးခဲ့တဲ့ အာဗြဟံအသက်တာကိုကြည့်ရင် ယုံကြည်ခြင်းဆိုတာ ဘာလဲ? ဘယ်လို အလုပ်လုပ်သလဲ? ဆိုတာကို တွေ့ရမှာပါ။ ယုံကြည်ခြင်းဆိုတာ အပြောသက်သက်မဟုတ်ဘူး။ လက်တွေ့ အသီးအပွင့်ရှိတယ်။ အာဗြဟံရဲ့ စိတ်စွဲလန်းခြင်းက သူ့ဘဝကို လူသေနဲ့တူတဲ့ဘဝကနေ မရေတွက်နိုင်အောင် များစွာသော သားသမီးတွေကို ပိုင်ဆိုင်တဲ့သူအဖြစ်ဘုရားက ပြောင်းလဲစေခဲ့တယ်။ လျှို့ဝှက်ချက်ကတော့ ယုံကြည်ခြင်းရဲ့စွဲလန်းခြင်းကြောင့်ပဲ။ ကတိပေးထားတဲ့ ဘုရားက ကတိပေးထားတဲ့အတိုင်း လုပ်ပေးဖို့ တတ်နိုင်တယ်ဆိုတဲ့ ယုံကြည်ခြင်းကို ဘယ်လို အခြေအနေမျိုးမှာမဆို မပြောင်းလဲပဲ ဆက်လက်ယုံကြည်ခဲ့လို့ဖြစ်တယ်။

စက်တင်ဘာလ ၂၅ ရက်နေ့

ကိုယ်တိုင်မသိ

“အာ​ဗြ​ဟံ​သည် အ​မွေ​ခံ​ရ​လ​တ္တံ့​သော​ပြည်​သို့ ထွက်​သွား​မည်​အ​ကြောင်း၊ ဘု​ရား​သ​ခင်​ခေါ်​တော်​မူ​သော​အ​ခါ၊ သူ​သည် အ​ဘယ်​အ​ရပ်​သို့​သွား​သည်​ကို ကိုယ်​တိုင်​မ​သိ​ဘဲ​လျက်၊ ယုံ​ကြည်​ခြင်း​အား​ဖြင့် နား​ထောင်၍ ထွက်​သွား​လေ၏။-” ‭‭ဟေဗြဲ‬ ၁၁:၈

ယုံကြည်ခြင်းနှင့် အသက်ရှင်တဲ့သူဟာ အကုန်သိတဲ့သူလို့ထင်နေတတ်တယ်။ တကယ်တော့မဟုတ်ပါဘူး အာဗြဟံကိုကြည့်ရင် တွေ့ရတာက ယုံကြည်ခြင်းနှင့် သူဟာ လုပ်ဆောင်ပေမယ့် မသိတဲ့အရာတွေ အများကြီးရှိတယ်ဆိုတာ တွေ့ရတယ်။ အများကြီးသိပြီး နည်းနည်းမှ ယုံကြည်ခြင်းနှင့်မလုပ်တာ ထက် အကုန်မသိပေမယ့် ယုံကြည်ခြင်းနှင့် လုပ်ဆောင်ဖို့ ဘုရား အလိုတော်ရှိတယ်။ အာဗြဟံက ကိုယ်တိုင် မသိပေမယ့် ယုံကြည်ခြင်း နှင့် လုပ်ဆောင်သူ ဖြစ်ပြီး ဘုရားရဲ့ ပြင်ဆင်ထားတဲ့နယ်ပယ်ထဲကို ခြေချခွင့်ရတဲ့သူဖြစ်လာတယ်။

စက်တင်ဘာလ ၂၄ ရက်နေ့

အရွယ်လွန် သွားပေမဲ့

“သူ၏​ခင်​ပွန်း​စာ​ရာ​သည်​လည်း အ​ရွယ်​လွန်​သော​အ​ခါ၊ ပ​ဋိ​သ​န္ဓေ​ယူ​နိုင်​သော အ​ခွင့်​တန်​ခိုး​ကို ယုံ​ကြည်​ခြင်း​အား​ဖြင့် ခံ​ရ​လေ၏။ အ​ကြောင်း​မူ​ကား၊ က​တိ​ထား​တော်​မူ​သော​သူ​သည် သ​စ္စာ​ရှိ​သည်​ဟု စိတ်​စွဲ​လမ်း​ခြင်း​ရှိ၏။-” ဟေဗြဲ‬ ‭၁၁:၁၁

ဘဝမှာလုပ်ဖို့ လွန်သွားပြီဆိုတဲ့အရာတွေ ကြောင့် စိတ်ပျက်နေသလား? ကောင်းတဲ့အရာတွေ လုပ်ဖို့၊ အောင်မြင်ဖို့၊ ကောင်းကြီးရဖို့၊ ဘုရားကြီးမားစွာ အသုံးပြုဖို့ စတဲ့ ကောင်းတဲ့အရာတွေကိုခံစားဖို့ ကိုယ့်ဟာာကိုယ် အချိန်လွန်သွားပြီ၊ အရွယ်လွန်သွားပြီလို့ ထင်နေတဲ့သူတွေ အများကြီးရှိတယ်။ စာရာအကြောင်းကိုသိရင် သင့်ဘဝမှာ ကောင်းတဲ့အရာတွေကို ဖြစ်လာဖို့အတွက် အချိန်မလွန်သေးဘူးဆိုတာကို ကောင်းကောင်းသဘောပေါက်လိမ့်မယ်။ စာရာဟာ လူ့အနေနဲ့ ရော၊ အခြေအနေအရရော၊ သိပ္ပံအရရော ကလေးရဖို့ဆိုတာ ဘယ်လိုမှ​မဖြစ်နိုင်တော့ပါဘူး။ မဖြစ်နိုင်တာတောင် တော်တော်လေးကို လွန်သွားပါပြီ။ ဒါပေမဲ့ ယုံကြည်ခြင်းရှိတဲ့သူအတွက် လွန်သွားတဲ့အရာတွေအားလုံးကို ဖြစ်ခွင့်၊ ခံစားခွင့် ရှိတယ်ဆိုတာကို စာရာရဲ့အသက်တာအားဖြင့် သိခွင့်ရတယ်။

စက်တင်ဘာလ ၂၃ ရက်နေ့

ဘယ်လိုယုံရမလဲ

“ယုံ​ကြည်​ခြင်း​မ​ရှိ​လျှင်၊ ဘု​ရား​သ​ခင်၏ စိတ်​တော်​နှင့်​မ​တွေ့​နိုင်။ အ​ကြောင်း​မူ​ကား၊ ဘု​ရား​သ​ခင့် အ​ထံ​တော်​သို့ ချဉ်း​ကပ်​သော​သူ​သည်၊ ဘု​ရား​သ​ခင် ရှိ​တော်​မူ​သည်​ကို​လည်း​ကောင်း၊ ကိုယ်​တော်​ကို ရှာ​သော​သူ​အား အ​ကျိုး​ပေး​တော်​မူ​သည်​ကို​လည်း​ကောင်း၊ ယုံ​ကြည်​ရ​မည်။-” ဟေဗြဲ‬ ‭၁၁:၆

ယုံချင်တိုင်းယုံရင် ယုံကြည်ခြင်းတော့ဖြစ်မှာ မဟုတ်ဘူး။ ယုံမှားခြင်းပဲ ဖြစ်သွားလိမ့်မယ်။ နှုတ်ကပတ်တော်တိုင်း ဘုရားယုံစေချင်တဲ့အတိုင်း ယုံတတ်ဖို့လိုတယ်။ နှုတ်ကပတ်တော်ကပြောထားတဲ့ ဘုရားယုံစေချင်တဲ့အရာက၊ ဘုရား ရှိတယ်ဆိုတာ ယုံရမယ်။ သင်တစ်ယောက်ထဲမှာ မဟုတ်ဘူး။ အခြေအနေတိုင်းမှာ သင်နဲ့အတူ ဖြေရှင်းပေးဖို့ ဘုရားရှိနေတယ်။ နောက်တစ်ခုကတော့ ဘုရားကိုရှာတဲ့သူကို အကျိုးပေးတယ်။ ဘာအကျိုးမှ မမျှော်လင့်ပဲ အသက်ရှင်ခိုင်းတာ ယုံကြည်ခြင်းမဟုတ်ဘူး။ အကျိုးကို ရကိုရမယ်လို့ ယုံတာမှ စစ်မှန်တဲ့ ဘုရားရှိစေချင်တဲ့ ယုံကြည်ခြင်းပဲ။

စက်တင်ဘာလ ၂၂ ရက်နေ့

ယုံကြည်ခြင်းရှိသူရဲ့ ဘဝ

“ဧ​နောက်​သည် ယုံ​ကြည်​ခြင်း​အား​ဖြင့် သေ​ခြင်း​နှင့်​လွတ်၍ ဘ​ဝ​ပြောင်း​ရ၏။ ဘု​ရား​သ​ခင်​သည် သူ့​ကို ဘ​ဝ​ပြောင်း​စေ​တော်​မူ​သော​ကြောင့်၊ သူ​သည် နောက်​တစ်​ဖန် မ​ပေါ်​မ​ရှိ။ သူ​သည် ဘ​ဝ​မ​ပြောင်း​မီ ဘု​ရား​သ​ခင်၏ စိတ်​တော်​နှင့် တွေ့​သော​သူ​ဖြစ်​သည်​ဟု သက်​သေ​ခံ​ခြင်း​ကို ရ​လေ၏။-” ဟေဗြဲ‬ ‭၁၁:၅

လက်ရှိအခြေအနေ၊ လက်ရှိဘဝကပဲ ဘယ်တော့မှ မပြောင်းလဲပဲ ဆက်သွားမယ်လို့ တော့ မထင်လိုက်စေချင်ဘူး။ ယုံကြည်ခြင်းရှိတဲ့သူအတွက် အရာရာဟာ ပြောင်းလဲနိုင်တယ်။ ယုံကြည်ခြင်းနှင့်အသက်ရှင်တဲဲ့သူကို ဘုရားက အမြဲတမ်း အခြားသူတွေ မရတဲ့အခွင့်အရေး၊ အခြားသူတွေ မရတဲ့ ဘဝကို ပိုင်ဆိုင်ခွင့်ပေးတယ်။ ဘုရားကိုယုံကြည်ခြင်း နှင့်အသက်ရှင်တာ ဘာနဲ့မတူဘူး အရမ်းကို ထူးခြားတယ်။ ဘဝတစ်ခုလုံးကို ကြီးမားတဲ့အပြောင်းလဲတွေကို ဖြစ်ပေါ်စေနိုင်တယ်။ ဧနောက်ဟာ ယုံကြည်ခြင်း နှင့် လျှောက်လှမ်းတဲ့သူ ဖြစ်တဲ့အတွက် အခြားသူတွေမရတဲ့ အတွေ့အကြုံ၊ အဖြစ်ပျက်ကို ဘယ်သူမှ မခံစားခင်ကြိုတင်ကြုံတွေ့ခံစားခွင့်ရခဲ့တယ်။ ဘယ်လောက်တောင်ထူးခြားသလဲ?

စက်တင်ဘာလ ၂၀ ရက်နေ့

ယုံကြည်ခြင်းရှိတဲ့သူရဲ့ နှုတ်

သူ​သည် သေလွန်​သော်လည်း ထို​ယုံကြည်​ခြင်း​အားဖြင့် ယခု​တိုင်အောင် စကား​ပြော​နေ​သေး​၏။” ဟေဗြဲဩဝါဒစာ‬ ‭၁၁:၄

အခြေအနေနှင့် လူတွေက ယုံကြည်ခြင်းရှိတဲ့ သူရဲ့ နုတ်ကို ပိတ်ဖို့ ကမ္ဘာဉီးကပင် ကြိုးစားလေ့ရှိတယ်။ ဒါပေမဲ့ အမှန်တကယ် ယုံကြည်ခြင်း ရှိတဲ့သူရဲ့ နုတ်ကို ဘယ်သူကမှ ပိတ်လို့မရနိုင်ဘူး။ ယုံကြည်ခြင်းရှိတဲ့သူမှာ အမြဲတမ်းပြောစရာ စကားရှိတယ်။ ယုံကြည်ခြင်း မရှိတဲ့သူကတော့ ဇာခရိလို ဆွံ့အသွားရတယ်။ ယုံကြည်ခြင်းရှိတဲ့သူရဲ့ စကားလုံးတွေကို ကြည့်ခြင်းအားဖြင့် သူ့ရဲ့ နှလုံးသားထဲက ယုံကြည်ခြင်းကို မြင်နိုင်တယ်။ ကာဣနက ယုံကြည်ခြင်းရှိတဲ့ သူ့ညီအာဗေလ ရဲ့ နုတ်ကိုပိတ်ဖို့ ကြိုးစားပေမဲ့မရဘူး။ သေသွားရင်တောင်မှ စကားပြော နေသေးတယ်။ လူသန်းပေါင်းများစွာရဲ့အသက်တာကိုတို့ထိ ပြောင်းလဲ စေနိုင်သေးတယ်။

စက်တင်ဘာလ ၁၉ ရက်နေ့

ဘုရားရဲ့ အောက်မေ့သတိရခြင်း

“ကောင်းကင်​ဗိုလ်ခြေ​အရှင်​ထာဝရဘုရား​၊ ကိုယ်တော့်​ကျွန်မ ခံရ​သော​ဆင်းရဲဒုက္ခ​ကို အကယ်စင်စစ် ကြည့်​တော်မူ​ပါ​။ ကိုယ်တော့်​ကျွန်မ​ကို မ​မေ့လျော့​ဘဲ အောက်မေ့​တော်မူ​ပါ​။ ‭‭ဓမ္မရာဇဝင်ပထမစောင်‬ ‭၁:၁၁

ဘုရားရဲ့အောက်မေ့ သတိရခြင်းတစ်ချက်က ဘဝတစ်ခုလုံးကို ပြောင်းလဲသွားစေနိုင်တယ်ဆိုတာ သင် သိပါသလား? တစ်သက်လုံး ကြုံရတဲ့ အခက်အခဲပြဿနာများစွာဟာ ဘုရားရဲ့ အောက်မေ့သတိရခြင်း ရောက်လာတဲ့အခါမှာ တစ်ချက်ထဲနဲ့ အရည်ပျော်သွား၊ ပျောက်သွားနိုင်ပြီးတော့၊ အရင်ကဘဝနဲ့ ဆန့်ကျင်ဘက်ဖြစ်တဲ့ ကောင်းကြီးမင်္ဂလာကို ရရှိပိုင်ဆိုင်နိုင်တယ်။ ဟန္ဒ ရဲ့ဘဝမှာ ကြုံနေရတဲ့ အရှက်ကွဲခြင်း၊ ရန်သူတွေရဲ့ လုပ်ဆောင်ချက်အားလုံးကို ဘုရားရဲ့ အောက်မေ့ ခြင်းက ပြောင်းပြန်လှန်ပစ်လိုက်တယ်။ ပထမဆုံးရလာတဲ့သားက သူ့ကို အရှက်ကွဲခြင်းက နေလွတ်မြောက်စေရုံတင်မကဘူး။ ဣသရေလ တိုင်းပြည်တစ်ခုလုံးကိုပါ လွတ်မြောက်စေတဲ့၊ကောင်းကြီးရစေတဲ့ သူဖြစ်လာတယ်။

စက်တင်ဘာလ ၁၈ ရက်နေ့

ဘာအတွက်တောင်းတာလဲ?

“ကောင်းကင်​ဗိုလ်ခြေ​အရှင်​ထာဝရဘုရား​၊ ကိုယ်တော့်​ကျွန်မ ခံရ​သော​ဆင်းရဲဒုက္ခ​ကို အကယ်စင်စစ် ကြည့်​တော်မူ​ပါ​။ ကိုယ်တော့်​ကျွန်မ​ကို မ​မေ့လျော့​ဘဲ အောက်မေ့​တော်မူ​ပါ​။ ကိုယ်တော့်​ကျွန်မ​အား သား​ယောက်ျား​ကို​ပေးသနား​တော်မူ​ပါ​။ သို့ပြုလျှင် အကျွန်ုပ်​သည် သူ့​ဘဝ​တစ်ခုလုံး​ကို ထာဝရဘုရား​ထံ ဆက်ကပ်​အပ်နှံ​ပါ​မည်​။ သူ့​ဆံပင်​ကို​လည်း မ​ရိတ်​ပါ​”​ဟု ကတိသစ္စာ​ပြု​ဆုတောင်း​လေ​၏​။” ‭‭ဓမ္မရာဇဝင်ပထမစောင်‬ ‭၁:၁၁

လူတိုင်းက ဘုရားဆီကနေ ကြီးမားတဲ့အရာတွေမျှော်လင့်လို့ တောင်းနေတဲ့အရာတွေရှိပါတယ်။ ပြဿနာက ဘာအတွက် တောင်းနေတာလဲ ? ဆိုတာကို တိတိကျကျ သိတဲ့သူကတော့ ရှားတယ်။ တချို့ကလဲ အလွယ်ပြောမယ် လိုချင်လို့ တောင်းတာပေါ့။ ဘုရား ဆီကနေ ကြီးမားတဲ့ အရာတွေကို မျှော်လင့်တဲ့သူတွေက ရည်ရွယ်ချက်ရှိဖို့လိုတယ်။ ဟန္ဒက သူကြုံရတဲ့ ဆင်းရဲခြင်းကနေ လွတ်မြောက်ခြင်းအတွက် တောင်းတယ်။ ဘုရားက အဖြေပေးတဲ့အခါမှာ နှလုံးသားကို အမြဲတမ်းကြည့်တယ်။ သူ့ရဲ့နှလုံးသားက လိုခြင်လို့ပဲ​တောင်းတာ မဟုတ်ဘူး။ ဘုရားအတွက် ပေးချင်လို့၊ပါဝင်ချင်လို့ တောင်းတာ။ ဒီဆန္ဒ​နှင့် ဆုတောင်းချက်က သူ့ဘဝကိုရော တိုင်းပြည်နဲ့လူမျိုးတစ်ခုလုံးကိုရော ပြောင်းလဲ စေခဲ့တယ်။

စက်တင်တာဘာလ ၁၇ ရက်နေ့

ငယ်သောအမှု ဖြစ်ပေမဲ့

“အ​မှု​ငယ်​ပြု​သော နေ့​ရက်​ကို အ​ဘယ်​သူ​သည် မ​ထီ​မဲ့​မြင် ပြု​ရ​သ​နည်း။ ဇာခရိ‬ ‭၄:၁၀

သေးငယ်တဲ့အလုပ်ကို လုပ်နေရသေးရင်တောင် ကြီးမြတ်တဲ့ နှလုံးသားနဲ့ လုပ်ဆောင်တတ်ဖို့လိုတယ်။ ဘယ်လို အလုပ်ကို လုပ်တယ်ဆိုတာထက် ဘယ်လို နှလုံးသားနဲ့ လုပ်သလဲ ဆိုတာ ပိုပြီးတော့အရေးကြီးတယ်။ လူတချို့က ကြီးမားတဲ့အရာတွေကို လုပ်ဖို့ဆန္ဒရှိတယ်၊ ပြဿနာက လက်ရှိလုပ်နေတဲ့ သေးငယ်တယ်လို့ ထင်ရတဲ့ ကိစ္စတွေမှာ ဂရုမစိုက်ကြဘူး။ ဘုရားက သေးငယ်တဲ့အရာတွေမှာ သစ္စာရှိတဲ့သူတွေကိုပဲ ကြီးမားတဲ့အရာတွေကို အမြဲတမ်း အပ်နှင်းတယ်။ ကြီးမားတဲ့အရာတွေကို လုပ်ဖို့ ရူပါရုံရှိရင် သေးငယ်တဲ့ ကိစ္စတွေကို လုပ်ခွင့်ရတိုင်းမှာ အကောင်းဆုံး လုပ်ဆောင်တတ်သူဖြစ်စေပါ။

စက်တင်ဘာလ ၁၆ ရက်နေ့

အားငယ်ဖို့ မလိုဘူး 

“ကောင်း​ကင်​တ​မန်​က​လည်း၊ ဇေ​ရု​ဗ​ဗေ​လ​သို့ ရောက်​လာ​သော ထာ​ဝ​ရ​ဘု​ရား၏ နှုတ်​က​ပတ်​တော်​ဟူ​မူ​ကား၊ ဤ​အ​မှု​သည် ဗိုလ်​ခြေ​အား​ဖြင့် မ​ဟုတ်၊ အာ​ဏာ​တန်​ခိုး​အား​ဖြင့် မ​ဟုတ်၊ ငါ့​ဝိ​ညာဉ်​အား​ဖြင့် ဖြစ်​လိမ့်​မည်​ဟု ကောင်း​ကင်​ဗိုလ်​ခြေ​အ​ရှင် ထာ​ဝ​ရ​ဘု​ရား မိန့်​တော်​မူ၏။”  ဇာခရိ‬ ‭၄:၆

ကိုယ့်မှာ ကျောထောက်နောက်ခံမရှိလို့၊ ရာထူး စည်းစိမ် မပိုင်သေးလို့ စိတ်ပျက်အားငယ်စရာမလိုဘူး။ ဘုရားပေးတဲ့ ရူပါရုံ အိမ်မက်တွေက ကိုယ့်ခွန်အား အစွမ်းအစ၊ တတ်နိုင်ခြင်း လုပ်နိုင်ခြင်းတွေကြောင့် အကောင်အထည် ပေါ်လာမှာ မဟုတ်ဘူး။ သေချာတဲ့ အရာကတော့ သန့်ရှင်းသောဝိညာဉ်တော်ရဲ့ မစခြင်း၊ လမ်းပြခြင်းနှင့် လုပ်ဆောင်ခြင်း ကြောင့်ပဲဖြစ်လာမှာ။ ဒါကြောင့် ကိုယ့်မှာ မရှိတဲ့အရာတွေအတွက် အားငယ်နေဖို့ မဟုတ်ဘူး။ သန့်ရှင်းသောဝိညာဉ်တော် အတူပါရှိရင် လုံလောက်ပြီ။ 

စက်တင်ဘာလ ၁၅ ရက်နေ့

သန့်ရှင်းသောဝိညာဉ်တော် အားဖြင့်သာ

“ကောင်း​ကင်​တ​မန်​က​လည်း၊ ဇေ​ရု​ဗ​ဗေ​လ​သို့ ရောက်​လာ​သော ထာ​ဝ​ရ​ဘု​ရား၏ နှုတ်​က​ပတ်​တော်​ဟူ​မူ​ကား၊ ဤ​အ​မှု​သည် ဗိုလ်​ခြေ​အား​ဖြင့် မ​ဟုတ်၊ အာ​ဏာ​တန်​ခိုး​အား​ဖြင့် မ​ဟုတ်၊ ငါ့​ဝိ​ညာဉ်​အား​ဖြင့် ဖြစ်​လိမ့်​မည်​ဟု ကောင်း​ကင်​ဗိုလ်​ခြေ​အ​ရှင် ထာ​ဝ​ရ​ဘု​ရား မိန့်​တော်​မူ၏။”  ဇာခရိ‬ ‭၄:၆

ဘုရားစေခိုင်းတဲ့အလုပ်ကို ပြီးစီးအောင် လုပ်ဆောင်နိုင်စေတာက ဘယ်သူကြောင့်မှ မဟုတ်ဘူး။ ကိုယ့်အစွမ်းအစနဲ့ လဲ ဘုရားအလိုတော်ကိုပြည့်စုံနိုင်အောင် လုပ်ဆောင်နိုင်မှာ မဟုတ်ဘူး။ ကိုယ့်ကြိုးစားမှုနဲ့ အရည်အချင်းကလဲ ဘုရား ဖြစ်စေချင်တဲ့အမှုကို အကောင်အထည်ဖေါ်နိုင်မှာ မဟုတ်ဘူး။ ဘုရားအလိုတော် အကုန်အစင် ပြည့်စုံပြီးတော့ ကိုယ့်လုပ်ဆောင်ရမယ့်အရာကို အကောင်းဆုံး လုပ်ဆောင်နိုင်စေတာက သန့်ရှင်းသောဝိညာဉ်တော်ကြောင့်သာပဲ။ ဝိညာဉ်တော် မပါရင် ဘယ်အရာမှ ဖြစ်လာမှာမဟုတ်ဘူး။

စက်တင်ဘာလ ၁၃ ရက်နေ့

မှန်ကန်တဲ့စစ်ဆေးခြင်း 

“ယောနသန်​က လက်နက်ကိုင်​လုလင်​အား “​လာ​ပါ​။ အရေဖျားမလှီး​သော​ထို​သူ​တို့​၏​ကင်းတပ်​သို့ ကူးသွား​ကြ​စို့​။ ထာဝရဘုရား ငါ​တို့​နှင့် ပါရှိ​ကောင်း​ပါရှိ​တော်မူ​လိမ့်မည်​။ ထာဝရဘုရား​သည် မည်သည့်​အမှု​၌​မဆို လူ​အနည်းငယ်​နှင့်​ဖြစ်စေ​၊ လူ​အများ​နှင့်​ဖြစ်စေ အတားအဆီး​မ​ရှိ​ကယ်တင်​ပေး​နိုင်​သည်​”​ဟု ဆို​၏​။” ဓမ္မရာဇဝင်ပထမစောင်‬ ‭၁၄:၆

ယောနသန်က ရန်သူတွေဆီသွားဖို့အတွက် သူအဓိက စစ်ဆေးခဲ့တာ တစ်ခုရှိတယ်။ အဲ့ဒါကတော့ ဘုရားက သူနဲ့အတူ ပါရှိပြီးတော့ ရန်သူကိုရင်ဆိုင်ဖို့ သွားခိုင်းသလား? မသွားခ်ိုင်းဘူးလား? ဆိုတာပါပဲ။ ဒီအရာက ကြီးမားတဲ့ရန်သူတွေကို လူအနည်းငယ်၊ လက်နက်အနည်းငယ်နဲ့ ရင်ဆိုင် အောင်မြင်ဖို့ဖြစ်စေခဲ့တယ်။ တစ်စုံတစ်ခု လုပ်တဲ့အခါမှာ ကျန်တဲ့အရာတွေပါတာ/မပါတာထက် ဘုရားအတူပါရှိပြီးတော့၊ ခွင့်ပြုချက်က အရေးကြီးဆုံးပဲ။ ယောနသန်ရဲ့ စစ်ဆေးခြင်းက အဖြေရခဲ့ပြီးတော့ ရင်ဆိုင်ဖို့ခက်ခဲတဲ့ အခြေအနေတွေကို လွယ်လွယ်လေးနဲ့ အောင်မြင်ကျော်လွှားနိုင်ခဲ့တယ်။

စက်တင်ဘာလ ၁၂ ရက်နေ့

ဘုရားအတူပါရှိရင်

“ယောနသန်​က လက်နက်ကိုင်​လုလင်​အား “​လာ​ပါ​။ အရေဖျားမလှီး​သော​ထို​သူ​တို့​၏​ကင်းတပ်​သို့ ကူးသွား​ကြ​စို့​။ ထာဝရဘုရား ငါ​တို့​နှင့် ပါရှိ​ကောင်း​ပါရှိ​တော်မူ​လိမ့်မည်​။ ထာဝရဘုရား​သည် မည်သည့်​အမှု​၌​မဆို လူ​အနည်းငယ်​နှင့်​ဖြစ်စေ​၊ လူ​အများ​နှင့်​ဖြစ်စေ အတားအဆီး​မ​ရှိ​ကယ်တင်​ပေး​နိုင်​သည်​”​ဟု ဆို​၏​။” ‭‭ဓမ္မရာဇဝင်ပထမစောင်‬ ‭၁၄:၆‬‬

ဘုရားအတူပါရှိတယ်ဆိုတာကို ယုံတဲ့သူနဲ့ မယုံတဲ့သူဟာ ထွက်လာတဲ့ရလဒ်ကို ကြည့်ခြင်းအားဖြင့် သိနိုင်တယ်။ လူတွေက ဘုရားပါရှိတယ်လို့ နုတ်ကနေ ပြောနေပေမယ့်တကယ့် ယုံတဲ့သူကတော့ရှားပါတယ်။ မြင်ရတဲ့အပိုင်းမှာ အများကြီးမရှိပေမဲ့၊ မျက်စိနဲ့ မမြင်ရတဲ့ ဘုရားပါတယ်လို့ ယုံတဲ့အခါမှာ ဘယလောက်ပဲ ကြောက်စရာကောင်းတဲ့ အင်အားကြီးတဲ့သူတွေကို ရင်ဆိုင်နိုင်တယ်။ ယောနသန်ရဲ့ ယုံကြည်ခြင်းမြင်ရတဲ့ လက်နက်အပေါ်မှာမဟုတ်ဘူး။ မမြင်ရတဲ့ အရာအားလုံးထက်ကြီးမြတ်တဲ့ ဘုရားအပေါ်မှာ။ ဒါကြောင့် လူ အင်အား၊ လက်နက်နည်းနည်းလေး ကြီးမားတဲ့ရန်သူတွေကို ရင်ဆိုင်နိုင်ခဲ့တယ်။

စက်တင်ဘာလ ၁၁ ရက်နေ့

ဘုရား အလုပ်လုပ်ပေးမယ်

“Then Jonathan said to the young man who bore his armor, “Come, let us go over to the garrison of these uncircumcised; it may be that the Lord will work for us. For nothing restrains the Lord from saving by many or by few.”I Samuel 14:6 NKJV

ယောနသန်ဟာ သူ့ရဲ့အဖေတောင်ရင်ဆိုင်ဖို့ ကြောက်တဲ့ ရန်သူတွေဆီကို နှစ်ယောက်ထဲနဲ့ ရင်ဆိုင်ဖို့ ဆုံးဖြတ်ခဲ့တယ်။ နှစ်ယောက်တောင်မှ လက်နက်က တစ်ခုပဲရှိတာ။ လူနှစ်ယောက်၊ ထားတစ်ချောင်းထဲနဲ့ ဒီလောက်များတဲ့ရန်သူတွေကို ဘာကြောင့်များ ရင်ဆိုင်ဖို့ဆုံးဖြတ်ခဲ့တာလဲ။ လူအင်အား လက်နက် အင်အားမမျှရင်တခြားသူတွေဆိုရင် ရင်ဆိုင်ရဲမှာ မဟုတ်ဘူး။ သူကတော့ မကြောက်ပဲ ရင်ဆိုင်ခဲ့တယ်။ ဘာကြောင့်များလဲ? အဖြေကတော့ ဒီရန်သူတွေကို သူ့ခွန်အား၊ သူ့လက်နက်နဲ့ အောင်မြင်မှာ မဟုတ်ဘူးဆိုတာ သူသိတယ်။ ဘုရားသူတို့အတွက် အလုပ်လုပ်ပေးမယ်ဆိုတာ ယုံကြည်တာပါပဲ။ ဒီယုံကြည်ခြင်းက သူ့ကို ရှိတာ နည်းနည်းလေး နဲ့ ကြီးကြီးမားမား အောင်မြင်ဖို့ ဖြစ်စေတယ်။

စက်တင်ဘာလ ၁၀ ရက်နေ့

အဆီးအတားမရှိ

“ယော​န​သန်​က၊ အ​ရေ​ဖျား​လှီး​ခြင်း​ကို​မ​ခံ​သော တပ်​သား​တို့​ဆီ​သို့​သွား​ကြ​ကုန်​အံ့။ ထာ​ဝ​ရ​ဘု​ရား​သည် ငါ​တို့​အ​မှု​ကို စောင့်​ကောင်း​စောင့်​တော်​မူ​လိမ့်​မည်။ လူ​များ​သော်​လည်း​ကောင်း၊ နည်း​သော်​လည်း​ကောင်း၊ ထာ​ဝ​ရ​ဘု​ရား ကယ်​တင်​တော်​မူ​ခြင်း​ကို အ​ဆီး​အ​တား​မ​ရှိ​နိုင်​ဟု လက်​နက်​ဆောင်​လု​လင်​အား​ပြော​ဆို​လျှင်၊”၁ ဓမ္မရာဇဝင် ၁၄:၆

ဘုရား အလုပ်လုပ်ဖို့အတွက် ဘယ်အရာကများ ဆီးနိုင်မလဲ? လူတွေက ဘုရားရဲ့လုပ်ဆောင်ပေးနိုင်ခြင်းကို ကန့်သတ်ထားကြတယ်။ ဘဝမှာ လိုအပ်တဲ့ထိုးဖေါက်မူတွေ၊ အောင်မြင်မူတွေရောက်လာဖို့အတွက် ၊ ဘုရား တတ်နိုင်တယ်ဆိုတာ ကို အကြွင်းမဲ့ ယုံတာထက်၊ ဆီးတားထားတဲ့အကြောင်း ပြချက်တွေကိုပဲ ပိုပြီးယုံကြည်စိတ်ချနေတတ်တယ်။ စာတန်က အရာရာကို ဖျက်ဆီးနိုင်တာကိုယုံကြတယ်။ ဘုရားက အရာရာကို အကောင်းဆုံး လုပ်ပေးနိုင်တယ်ဆိုတာကျတော့ ယုံဖို့ ခက်နေတယ်။ ဘုရားအလုပ်လုပ်ဖို့အတွက် ဘယ်အရာကမှ ဆီးတားလို့မရဘူး။ တစ်ခုပဲ သင့်ရဲ့မယုံကြည်ခြင်းကသာ ဘုရားလုပ်ဆောင် နိုင်မူတွေကို ကန့်သတ်ဆီးတားပစ်လိုက်တယ်။ ယောနသန် ပြောတဲ့စကား ဟာ ယုံကြည်ခြင်း ပါတဲ့စကား ။ ဒါကြောင့် လူ နှစ်ယောက်ထဲနဲ့ များစွာသော ရန်သူတွေကို အောင်မြင်ခဲ့တယ်။

စက်တင်ဘာလ ၉ ရက်နေ့

နည်းတာ၊ များတာ အရေးမကြီးဘူး

“ယောနသန်​က လက်နက်ကိုင်​လုလင်​အား “​လာ​ပါ​။ အရေဖျားမလှီး​သော​ထို​သူ​တို့​၏​ကင်းတပ်​သို့ ကူးသွား​ကြ​စို့​။ ထာဝရဘုရား ငါ​တို့​နှင့် ပါရှိ​ကောင်း​ပါရှိ​တော်မူ​လိမ့်မည်​။ ထာဝရဘုရား​သည် မည်သည့်​အမှု​၌​မဆို လူ​အနည်းငယ်​နှင့်​ဖြစ်စေ​၊ လူ​အများ​နှင့်​ဖြစ်စေ အတားအဆီး​မ​ရှိ​ကယ်တင်​ပေး​နိုင်​သည်​”​ဟု ဆို​၏​။” ‭‭ဓမ္မရာဇဝင်ပထမစောင်‬ ‭၁၄:၆

နည်းနေလို့ များနေလို့ဆိုတဲ့ အကြောင်းပြချက်တွေ လူတိုင်းစီမှာ ရှိကြစမြဲပါ။ နည်းလို့ မအောင်မြင်နိုင်ဘူး၊ များနေလို့ အဆင်မပြေဘူးဆိုတဲ့အရာတွေ ထားခဲ့လိုက်ပါ။ ဘုရားဆီမှာ သင့်ကို ကောင်းကြီးပေးဖို့ ဘယ်အကြောင်းအရာကမှ အတားအဆီး မဖြစ်စေနိုင်ဘူး။ ဘုရားကလူတစ်ယောက်ကို ကောင်းကြီးပေးရင်၊ အောင်မြင်ခြင်းပေးရင် အခြေအနေ အပေါ်မှာ၊ လုပ်နိုင်စွမ်းပေါ်မှာ ဘယ်တော့မှမပေးဘူး။ ဘုရားရဲ့တတ်နိုင်ခြင်း အပေါ်မှာပဲ အမြေဲတမ်း ပေးတယ်။ ဒါကို သိတဲ့သူတွေတိုင်းက မဖြစ်နိုင်တဲ့အရာတွေကို လုပ်တဲ့သူတွေဖြစ်လာတယ်။

စက်တင်ဘာလ ၈ ရက်နေ့

ငါတို့လက်သို့

“ထာ​ဝ​ရ​ဘု​ရား​သည် ဓား​လှံ​အား​ဖြင့် ကယ်​တင်​တော်​မ​မူ​ကြောင်း​ကို၊ ဤ​ပ​ရိ​သတ်​အ​ပေါင်း​တို့​သည် သိ​ရ​ကြ​လိမ့်​မည်။ အ​ကြောင်း​မူ​ကား၊ ထာ​ဝ​ရ​ဘု​ရား​သည် စစ်​မှု​ကို​ပိုင်၍၊ ငါ​တို့​လက်​သို့ အပ်​နှံ​တော်​မူ​မည်​ဟု ဖိ​လိ​တ္တိ​လူ​အား​ဆို၏။” ၁ ဓမ္မရာဇဝင်‬ ၁၇:၄၇ ‭

ဂေါလျက်ကို ရင်ဆိုင်တဲ့နေရာမှာ ကြီးမားတဲ့ရန်သူကို ရင်ဆိုင်ခဲ့တဲ့ ဒါဝိဒ်ကနေ ပြီးတော့ပေးတဲ့ ကြီးမားတဲ့သင်ခန်းစာတွေ အများကြီးရှိတယ်။ အောင်မြင်ခြင်းကို လူတွေက အနက်ဖွင့်တာ အများစုက မှားနေတယ်။ ကိုယ်လုပ်လို့၊ ကြိုးစားနိုင်လို့ ထင်နေတုန်းပဲ။ ကိုယ်လုပ်နိုင်တာ၊ ကြိုးစားနိုင်တာဆို အကန့်အသတ်ရှိတာပေါ့။ ဒါဝိဒ်ရတဲ့ အောင်မြင်ခြင်းကိုကြည့် သူ့ ခွန်အား အစွမ်းအစနဲ့ဆို ဘယ်လိုမှ မဖြစ်နိုင်တာကိုရတာ။ သူ နားလည်တဲ့အောင်မြင်ခြင်းဆိုတာ ဘုရားက ပေးလို့၊ ပြီးတော့ သူရတဲ့အောင်မြင်ခြင်းက တစ်ယောက်ထဲအတွက် မဟုတ်ဘူး။ လူ အားလုံးအတွက်။ ဒါကိုနားလည်သွားတဲ့ ဒါဝိဒ်အတွက် ဘယ်အရာကိုမဆို ရင်ဆိုင်ဖို့ အရမ်းလွယ်သွားတယ်။

စက်တင်ဘာလ ၆ ရက်နေ့

လူတိုင်းသိစေဖို့

“ထာ​ဝ​ရ​ဘု​ရား​သည် ဓား​လှံ​အား​ဖြင့် ကယ်​တင်​တော်​မ​မူ​ကြောင်း​ကို၊ ဤ​ပ​ရိ​သတ်​အ​ပေါင်း​တို့​သည် သိ​ရ​ကြ​လိမ့်​မည်။ အ​ကြောင်း​မူ​ကား၊ ထာ​ဝ​ရ​ဘု​ရား​သည် စစ်​မှု​ကို​ပိုင်၍၊ ငါ​တို့​လက်​သို့ အပ်​နှံ​တော်​မူ​မည်​ဟု ဖိ​လိ​တ္တိ​လူ​အား​ဆို၏။” ၁ ဓမ္မရာဇဝင်‬ ၁၇:၄၇

ဘုရားက တစ်ခုခုလုပ်ရင် တစ်ချက်ခုတ် အများကြီးပြတ်အောင်လုပ်ပါတယ်။ လူတစ်ယောက်ရဲ့ အောင်မြင်ခြင်းက လူပေါင်းများစွာ ဘုရားရဲ့ တတ်နိုင်ခြင်း၊ ကယ်တင်ခြင်း၊ တန်ခိုးတော်ကို မြင်တွေ့ခံစားရဖို့ပါ။ ဘုရားက တစ်ယောက်တည်းအတွက် ဘယ်တုန်းကမှ မရည်ရွယ်ပါဘူး ။ အာဗြဟံကို ကောင်းကြီးပေးတာကလဲ သူ့အားဖြင့် လူမျိုးတကာ ကောင်းကြီးခံစားရဖို့ပါ။ ဒါကို ဒါဝိဒ်က ကောင်းကောင်းသိတယ်။ သူဘယ်လောက် တော်သလဲ? အစွမ်းရှိသလဲ? လူတွေကို သိစေချင်တာ မဟုတ်ဘူး။ ဘုရားတတ်နိုင်တယ်ဆိုတာ လူတိုင်းသိစေချင်တာပါ။ ဒါဝိဒ်အားဖြင့် ဘုရားရဲ့ တတ်စွမ်းခြင်းကို လူတိုင်းသိသလို သင့်အားဖြင့် ဘုရားကောင်းမြတ်ကြောင်းကို သိစေချင်တဲ့ နှလုံးသားလေးပဲ ရှိလုပ်သမျှ ထူးခြားလာလိမ့်မယ်။

စက်တင်ဘာလ ၅ ရက်နေ့

ဘုရားရဲ့ကယ်တင်ခြင်း

“ထာ​ဝ​ရ​ဘု​ရား​သည် ဓား​လှံ​အား​ဖြင့် ကယ်​တင်​တော်​မ​မူ​ကြောင်း​ကို၊ ဤ​ပ​ရိ​သတ်​အ​ပေါင်း​တို့​သည် သိ​ရ​ကြ​လိမ့်​မည်။ အ​ကြောင်း​မူ​ကား၊ ထာ​ဝ​ရ​ဘု​ရား​သည် စစ်​မှု​ကို​ပိုင်၍၊ ငါ​တို့​လက်​သို့ အပ်​နှံ​တော်​မူ​မည်​ဟု ဖိ​လိ​တ္တိ​လူ​အား​ဆို၏။” ‭၁ ဓမ္မရာဇဝင်‬ ၁၇:၄၇

ဘုရားရဲ့နှလုံးသားနှင့် ဘုရားရဲ့အလုပ်လုပ်ပုံနည်းလမ်းကိုသိရင် ကိုယ့်မှာမရှိတဲ့အရာတွေအတွက် အားငယ်မှာ မဟုတ်သလို၊ ကိုယ့်မှာရှိတဲ့အရာတွေကိုလဲ အထင်သေးမှာ မဟုတ်ဘူး။ လူတွေက ဒါဝိဒ်ကို အထင်သေးပေမဲ့ ဒါဝိဒ်က အရာရာ တတ်စွမ်းနိုင်တဲ့ ဘုရားနှလုံးသားကိုရော ဘုရားနည်းလမ်းကိုရော ကောင်းကောင်းသိတယ်။ လက်နက်တွေ၊ လူ့ရဲ့ခွန်အားတွေက ဘုရားရှေ့မှာ ဘာဆိုဘာမှမဟုတ်ဘူး။ ဘုရားရဲ့ ကယ်တင်ခြင်းက ယုံကြည်ခြင်းရှိတဲ့ သူတွေအတွက်ပဲ။ ယုံကြည်ခြင်းရှိတဲ့သူတွေဘက်မှာ ဘုရားက အလုပ်လုပ်တယ်။ ယုံကြည်ခြင်းရှိတဲ့ သူတွေကို အမြဲတမ်း ချီးမြှောက်တယ်။ ဒါကို သိတဲ့ ဒါဝိဒ် ဘယ်တော့မှ အားမငယ်သလို ၊ ဘယ်တော့မှ အရှုံးနဲ့ ရင်မဆိုင်ရဘူး။

စက်တင်ဘာလ ၄ ရက်နေ့

ရှိတာနည်းနည်းလေးနဲ့

“ထာ​ဝ​ရ​ဘု​ရား​သည် ဓား​လှံ​အား​ဖြင့် ကယ်​တင်​တော်​မ​မူ​ကြောင်း​ကို၊ ဤ​ပ​ရိ​သတ်​အ​ပေါင်း​တို့​သည် သိ​ရ​ကြ​လိမ့်​မည်။ အ​ကြောင်း​မူ​ကား၊ ထာ​ဝ​ရ​ဘု​ရား​သည် စစ်​မှု​ကို​ပိုင်၍၊ ငါ​တို့​လက်​သို့ အပ်​နှံ​တော်​မူ​မည်​ဟု ဖိ​လိ​တ္တိ​လူ​အား​ဆို၏။” ‭၁ ဓမ္မရာဇဝင်‬ ‭၁၇:၃၇‬‬

အများကြီးလက်ထဲမှာရှိလို့ အများကြီးလုပ်နိုင်တာ၊ အများကြီး ဖြစ်လာတာမဆန်းပါဘူး။ လက်ထဲရှိတာ နည်းနည်းလေးနဲ့ အများကြီးလုပ်နိုင်တာမှ တကယ့် နိမိတ်လက္ခဏာ။ ဒါဝိဒ်အသက်တာမှာ ဒီထူးဆန်းတဲ့နိမိတ်လက္ခဏာ ခဏခဏဖြစ်တယ်။ သူ့လက်ထဲမှာ ရှိတာက ကျောက်ခဲ ငါးလုံး၊ နည်းနည်းလေးပဲ သူ့မှာ ရှိတဲ့ခွန်အားလေးက တစ်ဖက်ရန်သူရဲ့အခြေအနေနဲ့ယှဉ်ကြည့်ရင် အရမ်းနည်းလွန်းတယ်။ အရပ်အမောင်း၊ အသက်အရွယ်၊ အတွေ့အကြုံ၊ ဘာဆို ဘာမှ ယှဉ်လို့မရအောင် ကို ကွာခြားလွန်းတယ်။ ဒါပေမဲ့ ဘာလို့များ ခဏလေး အတွင်းမှာ အနိုင်ရသွားတာလဲ? အဖြေကတော့ သူ့မှာ ရှိတဲ့ အပြင်က အရာတွေ၊ မြင်ရတဲ့အရာတွေကြောင့်မဟုတ်ဘူး။ သူ့အထဲမှာ ဘုရား ဘယ်လောက် ကြီးမြတ်တယ်၊ ဘယ်လောက်တတ်နိုင်သလဲ ? ဆိုတာ သိတဲ့ အသိကြောင့် ဖြစ်တယ်။

စက်တင်ဘာလ ၃ ရက်နေ့

ယုံကြည်တဲ့အတိုင်း

“ထာ​ဝ​ရ​ဘု​ရား​သည် ဓား​လှံ​အား​ဖြင့် ကယ်​တင်​တော်​မ​မူ​ကြောင်း​ကို၊ ဤ​ပ​ရိ​သတ်​အ​ပေါင်း​တို့​သည် သိ​ရ​ကြ​လိမ့်​မည်။ အ​ကြောင်း​မူ​ကား၊ ထာ​ဝ​ရ​ဘု​ရား​သည် စစ်​မှု​ကို​ပိုင်၍၊ ငါ​တို့​လက်​သို့ အပ်​နှံ​တော်​မူ​မည်​ဟု ဖိ​လိ​တ္တိ​လူ​အား​ဆို၏။” ‭၁ဓမ္မရာဇဝင်‬ ‭၁၇:၄၇

ဒါဝိဒ်ရဲ့ယုံကြည်ခြင်းက ဘုရားရဲ့ကယ်တယ်ခြင်းဟာ လက်နက်တွေ အပေါ်မှာ၊ ခွန်အား အနည်းအများပေါ်မှာ မမူတည်ပဲ ဘုရားကပဲ အရာအားလုံးရဲ့အဖြေဖြစ်တယ်။ ဒါကို လဲ လူတိုင်း သိဖို့အတွက် သူ့ကို ဘုရားက အသုံးပြုမယ်။ ဂေါလျက်နှင့်ရင်ဆိုင်တဲ့ပွဲဟာ သူ့ရဲ့အရည်အချင်းနဲ့ ယှဉ်ပြိုင်ဖို့ထက် ဘုရားဘုန်း ထင်ရှားဖို့အတွက် ရင်ဆိုင်တာပါ။ စစ်မှုဟာ ဘုရားပိုင်တယ်၊ ဘုရားပိုင်တာကို ဘုရားသားဖြစ်တဲ့သူကို ဘုရားက အပ်နှံမယ်။ အရမ်းကိုရိုးရှင်းတဲ့ယုံကြည်ခြင်းဖြစ်ပေမဲ့ တန်ခိုးပါတယ်။ ဒါကြောင့်လဲ အခြေအနေကိုမကြည့်ပဲ သူ ရင်ဆိုင်ခဲ့တယ်။ ဘုရားအားလုံးပိုင်တယ်လို့ လူတွေက ယုံပေမဲ့ ဘုရားပိုင်တဲ့အရာကို သူ့သားသမီးဖြစ်တဲ့ ကိုယ့်ကိုပေးမယ်ဆိုတာတော့ လူတွေက မယုံနိုင်ကြတော့ဘူး။ ဒါဝိဒ်ရဲ့အောင်ပွဲက သူ့အဖေပိုင်တာကို သူ့သား လက်ခံရယူတဲ့ ပွဲပါပဲ။

စက်တင်ဘာလ ၂ ရက်နေ့

ရိုးရှင်းတဲ့ယုံကြည်ခြင်း

“ထို့ပြင် ထာဝရဘုရား​သည် ဓား​၊ လှံ​အားဖြင့် ကယ်တင်​သည်​မ​ဟုတ်​ကြောင်း​ကို ဤ​လူထုကြီး သိ​ရ​လိမ့်မည်​။ စစ်မှု​သည် ထာဝရဘုရား​၏​အရေး​ဖြစ်၍ ကိုယ်တော်​သည် သင်​တို့​ကို ငါ​တို့​လက်​သို့ အပ်နှံ​တော်မူ​မည်​”​ဟု ဆို​၏​။”‭‭ဓမ္မရာဇဝင်ပထမစောင်‬ ‭၁၇:၄၇

ဒါဝိဒ်က သူ့ထက် အဆမတန် ကြီးမားတဲ့ ရန်သူ ဂေါလျက်ကို ဘာမှမဟုတ်တဲ့ ခဲလေးတစ်လုံးနဲ့ အနိုင်ရလိုက်တယ်။ ဘာကြောင့် ဒီလောက်ရိုးရှင်းတဲ့ အောင်မြင်မှုကို အချိန်တိုတိုလေးအတွင်းမှာ ရလိုက်သလဲဆိုရင် ရိုးရှင်းတဲ့သူ့ရဲ့ယုံကြည်ခြင်းကြောင့်ပဲ။ သူ့အရည်အချင်း၊ သူ့ခွန်အားနဲ့ ရန်သူကို တိုက်ရမယ်လို့ သူက မယုံခဲ့ဘူး။ ဘုရားကပဲ တိုက်ပေးမယ်လို့ အထူးယုံကြည်ခဲ့တယ်။ သူယုံကြည်တဲ့အတိုင်းပဲ ဘာမှ မဟုတ်တဲ့ လက်နက်၊ အထင်ကြီးစရာ မကောင်းတဲ့ ကျောက်ခဲလေးက သူယုံကြည်တဲ့အတိုင်း ဂေါလျက်ကို ပြိုလဲစေတယ်။

စက်တင်ဘာလ ၁ ရက်နေ့

ဘုရားတာဝန်

“ထို့ပြင် ထာဝရဘုရား​သည် ဓား​၊ လှံ​အားဖြင့် ကယ်တင်​သည်​မ​ဟုတ်​ကြောင်း​ကို ဤ​လူထုကြီး သိ​ရ​လိမ့်မည်​။ စစ်မှု​သည် ထာဝရဘုရား​၏​အရေး​ဖြစ်၍ ကိုယ်တော်​သည် သင်​တို့​ကို ငါ​တို့​လက်​သို့ အပ်နှံ​တော်မူ​မည်​”​ဟု ဆို​၏​။” ‭ဓမ္မရာဇဝင်ပထမစောင်‬ ၁၇:၄၇

ကိုယ့်တာဝန်ကိုယ်သိဖို့လိုသလို၊ ဘုရားတာဝန်ယူထားတဲ့အပိုင်းကိုလဲ သိထားဖို့လိုတယ်။ ကိုယ်တာဝန်ကို ကျေအောင် အာရုံစိုက်ဖို့လိုသလို၊ ဘုရားတာဝန်ယူထားပေးတဲ့အပိုင်းကိုလဲ စိတ်ချထားဖို့လိုတယ်။ လူ့ဘက်ကသာ ပျက်ကွက်ကောင်း ပျက်ကွက်မယ် ဘယ်တော့မှ ဘုရားဘက်ကတော့ ပျက်ကွက်မှာ မဟုတ်ဘူး။ ဒါကိုသိတဲ့ ဒါဝိဒ်က ဂေါလျက်ကို ရင်ဆိုင်ဖို့အတွက် မကြောက်ခဲ့ဘူး။ ကြုံနေရတဲ့ အရာတွေကို ရင်ဆိုင်ဖို့ ကြောက်ရွံ့တယ်ဆိုတာ ဘုရားတာဝန်ယူမယ့်အပိုင်း အပေါ်မှာ စိတ်မချတတ်လို့ပါပဲ။

ဩဂုတ်လ ၃၀ ရက်နေ့

ဘုရားကပယ်ရတဲ့အကြောင်းအရင်း

“ထိုအခါ ထာဝရဘုရား​က ရှမွေလ​အား သူ​၏​ရုပ်ရည်အဆင်း​နှင့် အရပ်အမောင်း​ကို မ​ကြည့်​နှင့်​။ သူ့​ကို ငါ​ပယ်​ပြီ​။ ထာဝရဘုရား​သည် လူ​မြင်​သကဲ့သို့ မြင်​တော်မူ​သည်​မ​ဟုတ်​။ လူ​သည် အပြင်ပန်း​သဏ္ဌာန်​ကို​သာ ကြည့်​တတ်​၏​။ ထာဝရဘုရား​မူကား စိတ်နှလုံး​ကို ကြည့်​တော်မူ​၏​”​ဟု မိန့်​တော်မူ​၏​။” ဓမ္မရာဇဝင်ပထမစောင် ၁၆:၇

ရှာမွေလဟာ ဧလျာဘကိုမြင်တဲ့အချိန်မှာ ခေါင်းဆောင်တစ်ယောက်အနေနဲ့ လက်ခံနိုင်တဲ့ အပြင်ပန်း အရည်အချင်းတွေကို မြင်ခဲ့တယ်။ ဒါပေမဲ့ ဘုရားကတော့ လုံးဝကို လက်မခံပဲ ပယ်လိုက်တယ်။ လူ့အနေနဲ့ ပြောရင် ဧလျာဘဟာ သားဉီးလဲဖြစ်သလို ငြင်းစရာမရှိပဲ လက်ခံလို့ရပေမဲ့ ဘုရားအမြင်ကတော့ နှလုံးသားကိုပဲကြည့်ခဲ့တယ်။ ဘုရားက အနာဂတ်ကိုသိတယ်။ ဧလျာဘရဲ့ နှလုံးသားက ဘာဖြစ်နေလို့လဲ? ဂေါလျက် စိန်လာခေါ်တဲ့အချိန်မှာ ဧလျာဘရဲ့ နှလုံးသားကို မြင်ခဲ့ရတယ်။ လူတိုင်း ကြောက်တဲ့ ဂေါလျက်ကို သူလဲ​ရင်ဆိုင်ဖို့ ကြောက်ရွံ့ခဲ့တယ်။ ဒါဝိဒ်က ရင်ဆိုင်ဖို့ ပြောတဲ့အချိန်မှာလဲ ဒါဝိဒ်အပေါ်မှာ သူမြင်တဲ့အမြင်ဟာ အင်မတန်မှ ဆိုးရွားလွန်းတယ်။ ဘုရား အသုံးပြုတဲ့သူတစ်ယောက်ကို အထင်သေး လွန်းတဲ့နှလုံးသားဟာ ဘုရားဘယ်လိုမှ သုံးလို့မရတဲ့အဓိက အကြောင်းအရင်းတွေထဲက တစ်ခုပဲ။

ဩဂုတ်လ ၂၉ ရက်နေ့

အမြင်

“ထိုအခါ ထာဝရဘုရား​က ရှမွေလ​အား “​သူ​၏​ရုပ်ရည်အဆင်း​နှင့် အရပ်အမောင်း​ကို မ​ကြည့်​နှင့်​။ သူ့​ကို ငါ​ပယ်​ပြီ​။ ထာဝရဘုရား​သည် လူ​မြင်​သကဲ့သို့ မြင်​တော်မူ​သည်​မ​ဟုတ်​။ လူ​သည် အပြင်ပန်း​သဏ္ဌာန်​ကို​သာ ကြည့်​တတ်​၏​။ ထာဝရဘုရား​မူကား စိတ်နှလုံး​ကို ကြည့်​တော်မူ​၏​”​ဟု မိန့်​တော်မူ​၏​။” ဓမ္မရာဇဝင်ပထမစောင် ၁၆း၇

လူတစ်ယောက်ရဲ့ မြင်တဲ့အမြင်က သူ့ရဲ့နှလုံးသားထဲမှာ ဘာရှိသလဲဆိုတာကို ဖွင့်ဟပြတယ်။ ဧဝဟာ မြွေရဲ့သွေးဆောင်မှုကိုခံရတဲ့အချိန်မှာ ဘုရားသခင် မစားခိုင်းတဲ့အသီးဟာ အဆင်းလှတယ်၊ ပညာတိုးပွါးစေမယ်၊ နှစ်သက်သဘောကျစရာဖြစ်လာခဲ့တယ်။ ဘုရားနဲ့ဆန့်ကျင် တဲ့အရာကို ကောင်းတယ်လို့ မြင်နိုင်တာဟာ သူ့နှလုံးသားမှာ ဘုရားနဲ့ဆန့်ကျင်တဲ့အရာကို နေရာပေးမိလို့ဖြစ်တယ်။ ရှာမွေလကလဲ ဒီအတိုင်းပဲ ခံစားချက်တွေကိုနေရာပေးမိတဲ့အခါမှာ အမြင်ကလဲ ဘုရားသခင်မခန့်တဲ့သူတွေကို သဘောကျလက်ခံနိုင်လာတယ်။ ဘုရားခန့်အပ်တဲ့မှန်ကန်တဲ့သူကို မမြင်နိုင်တော့ဘူး။

ဩဂုတ်လ ၂၈ ရက်နေ့

မကြည့်နဲ့

“ထိုအခါ ထာဝရဘုရား​က ရှမွေလ​အား “​သူ​၏​ရုပ်ရည်အဆင်း​နှင့် အရပ်အမောင်း​ကို မ​ကြည့်​နှင့်​။ သူ့​ကို ငါ​ပယ်​ပြီ​။ ထာဝရဘုရား​သည် လူ​မြင်​သကဲ့သို့ မြင်​တော်မူ​သည်​မ​ဟုတ်​။ လူ​သည် အပြင်ပန်း​သဏ္ဌာန်​ကို​သာ ကြည့်​တတ်​၏​။ ထာဝရဘုရား​မူကား စိတ်နှလုံး​ကို ကြည့်​တော်မူ​၏​”​ဟု မိန့်​တော်မူ​၏​။” ဓမ္မရာဇဝင်ပထမစောင် ၁၆:၇

ခံစားချက်မှားရင် အကြည့်တွေကလဲ​အလိုလို လိုက်မှားတော့တာပဲ။ အကြည့်မှားရင် ပြောတဲ့စကားတွေလဲ မှားတော့တာပဲ။ ရှာမွေလပြောသမျှ အကုန်လုံး တစ်လုံးမကျန် ပြည့်စုံတဲ့ ပရောဖက်လို့မှတ်တမ်းတင်ခံရတဲ့သူ။ ဒီတကြိမ်တော့ ရှောလုကြောင့် ခံစားချက်များသွားခဲ့တယ်။ ဒါကြောင့် သူ့ဘဝမှာ ကြောက်ရွံ့ခြင်း နေရာယူလာပြီးတော့ ဘုရားခိုင်းတာ တောင် ထင်ထင်ရှားရှားမလုပ်ရဲပဲ ခိုးကြောင်ခိုးဝှက် လုပ်ခဲ့ရပြီးတော့ ၊ သူကြည့်တဲ့အကြည့်တွေရော၊ ပြောတဲ့ အပြောတွေရော မှားသွားခဲ့တယ်။ ဘုရားက သူရွေးချယ် အသုံးပြုမယ့်သူကို ခံစားချက်နဲ့ကြည့်ပြီး ရွေးချယ်တာ၊ ဆုံးဖြတ်တာကို သဘောမကျဘူး။ ဒါကြောင့် ဘုရား ပြင်ဆင်ထားတဲ့အရာကို ခံစားချက်နှင့် လူ့သတ်မှတ်နဲ့ မကြည့်မိစေနဲ့။

ဩဂုတ်လ ၂၇ ရက်နေ့

ဘုရားစံချိန်

“ထိုအခါ ထာဝရဘုရား​က ရှမွေလ​အား “​သူ​၏​ရုပ်ရည်အဆင်း​နှင့် အရပ်အမောင်း​ကို မ​ကြည့်​နှင့်​။ သူ့​ကို ငါ​ပယ်​ပြီ​။ ထာဝရဘုရား​သည် လူ​မြင်​သကဲ့သို့ မြင်​တော်မူ​သည်​မ​ဟုတ်​။ လူ​သည် အပြင်ပန်း​သဏ္ဌာန်​ကို​သာ ကြည့်​တတ်​၏​။ ထာဝရဘုရား​မူကား စိတ်နှလုံး​ကို ကြည့်​တော်မူ​၏​”​ဟု မိန့်​တော်မူ​၏​။” ဓမ္မရာဇဝင်ပထမစောင် ၁၆:၇

အပြင်ပန်းကြည့်ကောင်းဖို့ပဲ ဉီးစားပေးရင် တစ်နေ့ ဧလျာဘလိုပဲ အပယ်ခံရမယ်။ သားဉီးဖြစ်တယ်၊ အပြင်ပိုင်းဆိုင်ရာမှာ ပြောစရာ မရှိလောက်အောင်ကို ပြည့်စုံတယ်။ ဘုရားနဲ့အရင်းနှီးဆုံး ဝိညာဉ်ခေါင်းဆောင်ကိုတောင် လှည့်စားနိုင်ခဲ့တယ်။ ဘုရားကိုတော့လှည့်စားလို့ မရဘူး။ ဘုရားက အပြင်ပိုင်း အရည်အချင်းထက်၊ အတွင်း နှလုံးသားကိုပိုပြီး တန်ဖိုးထားတယ်။ ဉီးစားပေးတယ်။ နှလုံးသား စံချိန်မမှီရင် ဘယ်သူမှ၊ ဘယ်တော့မှ ဘုရားရွေးချယ်တဲ့ စံချိန်ကိုမှီမှာ မဟုတ်ဘူး။

ဩဂုတ်လ ၂၆ ရက်နေ့

ဘုရားမြင်သလို မြင်တတ်ခြင်း

“ထိုအခါ ထာဝရဘုရား​က ရှမွေလ​အား “​သူ​၏​ရုပ်ရည်အဆင်း​နှင့် အရပ်အမောင်း​ကို မ​ကြည့်​နှင့်​။ သူ့​ကို ငါ​ပယ်​ပြီ​။ ထာဝရဘုရား​သည် လူ​မြင်​သကဲ့သို့ မြင်​တော်မူ​သည်​မ​ဟုတ်​။ လူ​သည် အပြင်ပန်း​သဏ္ဌာန်​ကို​သာ ကြည့်​တတ်​၏​။ ထာဝရဘုရား​မူကား စိတ်နှလုံး​ကို ကြည့်​တော်မူ​၏​”​ဟု မိန့်​တော်မူ​၏​။” ဓမ္မရာဇဝင်ပထမစောင် ၁၆:၇

ဘုရားသခင်က ရှောလုကို ပယ်လိုက်တဲ့ အခါမှာ ရှာမွေလဟာ ဝမ်းနည်းခံစားပြီးတော့ ဘုရားရှေ့မှာ ငိုကြွေး မြည်တမ်းခဲ့တယ်။ ဘုရားပယ်လိုက်ပေမဲ့ သူ့နှလုံးသားထဲကနေ မပယ်နိုင်ဘူးဖြစ်ခဲ့တယ်။ ရှောလုနေရာမှာ အခြားသူကို လွယ်လွယ်နဲ့အစားမထိုး နိုင်ခဲ့ဘူး။ ဘုရားက သူ့နေရာမှာ အသစ်ခန့်မယ်လို့ပြောတဲ့အခါမှာလဲ ရှာမွေလဟာ ဘုရားခိုင်းတာ လုပ်ဖို့အတွက် ကြောက်ရွံခဲ့တယ်။ မှားယွင်းတဲ့ ခံစားချက်၊ စိတ်ထားတွေကို နေရာပေးလိုက်မိတဲ့နောက်ပိုင်းမှာ ပြောသမျှ စကားတိုင်း ပြည့်စုံတဲ့၊ တစ်ခါမှ မမှားဖူးတဲ့ ရှာမွေလ အမြင်နဲ့ အပြော စတင်မှားလာတယ်။ ယေရှဲ ရဲ့သားအကြီး ဧလျာဘကို မြင်တဲ့အခါမှာ ဘုရားခန့်တဲ့ဘုရင်လို့ ထင်ခဲ့မိပြီး ဘိသိက်ဖို့တောင် လုပ်ခဲ့တယ်။ မှားယွင်းတဲ့ခံစားချက်နှင့် ကြောက်ရွံမူကို နေရာပေးရင် ဘယ်တော့မှ ဘုရားမြင်သလို မမြင်တတ်တော့ဘူး။ ဘုရားပြောသလို လဲမလုပ်နိုင်တော့ဘူး။

ဩဂုတ်လ ၂၅ ရက်နေ့

အဟောင်းတွေကနေ လွတ်ချင်ရင်

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ‭၅၁:၁၀

အတိတ်ကအရာတွေ အကြိမ်ကြိမ်ဘဝမှာ ပြန်ပြန်ဖြစ်လို့ စိတ်ညစ်နေတဲ့ သူတွေ၊ ဘယ်လို လွတ်မြောက်နိုင်မလဲ လို့ မေးတာ ခံရဖူးတယ်။ လူတိုင်း အတိတ်ကိုထားခဲ့ချင်ကြတာ ချည်းပါပဲ။ အထူးသဖြင့် ဆိုးတဲ့အတိတ်တွေကိုပေါ့။ ဒီအရာတွေကလဲ မပြီးနိုင်တော့ဘူး အမြဲလိုလို ပြန်ပြန်ဖြစ်နေတတ်တယ်။ မကောင်းတဲ့အတိတ်က အရာတွေကို ဘဝထဲမှာ အပြီးတိုင်ရပ်တန့်ချင်ရင်တော့ မကောင်းတဲ့ နှလုံးသားကို ပြောင်းလဲ​ပစ်မှပဲရမယ်။ အညှီရှိရင် ယင်ကောင် လာသလိုပဲ၊ မကောင်းတဲ့နှလုံးသားရှိနေသရွေ့တော့ မကောင်းတဲ့အတိတ်ကတော့ သင့်ဘဝထဲကို လာနေအုံးမှာပဲ။

ဩဂုတ်လ ၂၃ရက်နေ့

အိမ်မက်တွေ အကောင်အထည်ဖေါ်ဖို့

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ၅၁:၁၀ ‭

ဒါဝိဒ်ဆီမှာ ဘုရားထည့်ထားပေးတဲ့အိမ်မက်တွေများစွာရှိတယ်။ သူအပြစ်လုပ်ပြီးတော့ အိမ်မက်တွေ အကောင်အထည်ဖေါ်ဖို့ သွားတဲ့လမ်းမှာ လဲကျသွားခဲ့တယ်။ ဒါပေမဲ့ သူ့အိမ်မက်တွေ အားလုံးကို သူရှိတဲ့အချိန်မှာ ရော၊ မရှိတော့တဲ့အချိန်မှာပါ ဆက်လက်ပြီးတော့ အကောင်အထည်ဖေါ်ခွင့်ရခဲ့တယ်။ အကြောင်းက တော့ အားနည်းချက်တွေရှိတဲ့နှလုံးသားကို ထုတ်ပြီးတော့ အိမ်မက်တွေကို အကောင်ထည်ဖေါ်နိုင်တဲ့ နှလုံးသားအသစ်ကို ဘုရားဆီမှာတောင်းဆိုခဲ့တယ်။ ဒါကြောင့်လဲ အိမ်မက်တွေတစ်ခုမကျန် အကောင်အထည်ဖေါ်ဖို့အတွက် လုပ်ဆောင်နိုင်ခဲ့တာပေါ့။

ဩဂုတ်လ ၂၂ ရက်နေ့

မှန်ကန်သော ဆုတောင်း (၂)

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ၅၁:၁၀

အမှားလုပ်ပြီးတဲ့အခါမှာ မှန်တဲ့ဆုတောင်းချက်ကြောင့် ဒါဝိဒ်အသက်တာမှာ မှန်တဲ့လမ်းကြောင်းပေါ်ပြန်ရောက်လာတယ်။ ရှုပ်ထွေးမူတွေ၊ ခါးသီးမှုတွေကို ကြုံတွေ့ရပေမဲ့ ခဏလေးအတွင်းမှာ ပြန်ပြီးတော့လမ်းကြောင်းမှန်ပေါ်ရောက်ခဲ့တယ်။ ရှောလမုန်ကလဲ မှန်တဲ့ဆုတောင်းချက်ကြောင့်ပဲ မတောင်းတဲ့ဆုတွေပါ ဘုရားက ပေးပြန်တယ်။ မှန်တဲ့ဆုတောင်းချက်က မတောင်းတဲ့ဆုတွေကိုပါ သယ်ဆောင်လာပေးတယ်။ အတိတ်က အဟောင်းတွေက သံသရာ စက်ဝန်းလို ပြန်ပြန် ဘဝထဲကို မရောက်လာတာဟာ မှန်ကန်တဲ့ဆုတောင်းချက်ဖြစ်တဲ့ စိတ်သဘောသစ်၊ နှလုံးသားအသစ်ကြောင့်ပဲဆိုတာ ဒါဝိဒ်အသက်တာကိုကြည့်ပြီးတော့ သိခွင့်ရခဲ့တယ်။

ဩဂုတ်လ ၂၁ ရက်နေ့

မှန်ကန်သော ဆုတောင်း

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ‭၅၁:၁၀

ဆုသာတောင်းနေတာ မမှန်တဲ့ ဆုတောင်းချက်တွေ အများကြီးပဲ။ တချို့ဆိုရင် ကိုယ့်ဆုတောင်းချက်ကြောင့်ကို ပိုပြီးခက်ခဲစေတယ်ဆိုတာကို သဘောမပေါက် ကြဘူး။ တချို့သောအခက်အခဲတွေ ပြဿနာတွေက ဘုရားပေးတွေ့တာ မဟုတ်ဘူး ကိုယ့်ဆုတောင်းချက်ရဲ့အဖြေပါပဲ။ ဒါဝိဒ်ဟာ အပြစ်လုပ်တဲ့အခါမှာ အဲ့ဒီပြဿနာ ကိုဖြေရှင်ဖို့အတွက် ဘုရားဆီမှာ နောင်တနဲ့ဆုတောင်းခဲ့တယ်။ ဒီဆုတောင်းချက်က မှန်ကန်တယ်လို့ဆိုရမယ်။ သူဟာ လဲကျတဲ့နေရာကနေ ပြန်ထနိုင်ပြီးတော့ အဆုံးထိ ကောင်းမွန်စွာ လျှောက်လှမ်းနိုင်ခဲ့တယ်။

ဩဂုတ်လ ၂၀ ရက်နေ့

အသစ်သောနှလုံးသား

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ‭၅၁:၁၀

အပြစ်လုပ်ခြင်းက နှလုံးသားကို ဟောင်းနွမ်းဆွေးမြေ့သွားစေတယ်။အပြစ်ကြောင့် ယိုယွင်းသွားတဲ့နှလုံးသားကို ပြုပြင်ရုံနဲ့တော့ အသစ်မဖြစ်လာဘူး။ ဒါကို ဒါဝိဒ်က သိတယ်၊ ဒါကြောင့် ဘုရားကို နှလုံးသား အသစ်ကို ဖန်ဆင်းခိုင်းတယ်။ နှလုံးသားအသစ် ဘုရားဖန်ဆင်းပေးတဲ့အခါမှာ စိတ်သဘောအသစ်ကနေရာယူ လာတယ်။ မြဲမြံတည်ကြည်တဲ့ စိတ်သဘော၊ ဒီစိတ်သဘော မရှိရင် အပြောင်းအလဲလွယ်တဲ့ စိတ်၊ ခံစားချက်နောက်ကိုလိုက်တဲ့စိတ်ကပဲ နေရာယူသွားလိမ့်မယ်။

ဩဂုတ်လ ၁၉ ရက်နေ့

အသစ်ဖြစ်ချင်ရင်

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ၅၁:၁၀

အသစ်ကိုလူတိုင်းသဘောကျတယ်၊ လူတိုင်းလိုချင်တယ်။ အသစ်သောအရာတွေကိုထိတွေ့ခံစားဖို့အတွက် အရေးကြီးဆုံးကတော့ စိတ်သဘော အသစ်ဖြစ်ဖို့လိုတယ်။ ဘာဖြစ်လို့ အဟောင်းတွေပဲ တွေ့ကြုံနေတာလဲလို့ မေးရင် နှလုံးသား အသစ်မဖြစ်သရွေ့ ကြုံတွေ့ရတာတွေလဲ အဟောင်းတွေပဲဖြစ်နေအုံးမှာပဲလို့ ပြန်ဖြေရမယ်။ နှလုံသား အသစ်မဖြစ်သရွေ့ အရာရာဟာ အဟောင်းတွေနဲ့ပဲ ရင်ဆိုင်နေရအုံးမယ်။ နှလုံးသားအသစ်ဖြစ်မှပဲ သင်ခံစားထိတွေ့ခွင့်ရတာ အားလုံးက အသစ်ဖြစ်လာမှာပါ။

ဩဂုတ်လ၁၈ ရက်နေ့

ဘုရားစိတ်တော်နှင့်တွေ့သော စိတ်သဘော

“အို​ဘု​ရား​သ​ခင်၊ အ​ကျွန်ုပ်​အ​ထဲ၌ စင်​ကြယ်​သော​နှ​လုံး​ကို ဖန်​ဆင်း​တော်​မူ​ပါ။ မြဲ​မြံ​တည်​ကြည်​သော သ​ဘော​ကို အ​သစ်​ပြု​ပြင်​တော်​မူ​ပါ။”‭‭ဆာလံ‬ ‭၅၁:၁၀

လူတစ်ယောက် အပြစ်လုပ်တဲ့အခါမှာ အရင်ဆုံး ပျက်ဆီးသွားတာက စိတ်နှလုံးသားဖြစ်တယ်။ စိတ်နှလုံးသားယိုယွင်းသွားရင် ကျန်တဲ့အရာတွေပါ ကောင်းဖို့မလွယ်တော့ဘူး။ ဒါဝိဒ်ဟာ အပြစ်တစ်ခု ကျူးလွန်မိပြီး ဒီအပြစ်ကို ဖုံးကွယ်ဖို့အတွက် နောက်ထပ်အပြစ်ပေါင်းများစွာ ထပ်မံကျူးလွန်ခဲ့တယ်။ အပြစ်ရဲ့အကျိုးဆက်တွေထဲက အဆိုးဆုံးတစ်ခုကတော့ နှလုံးသားယိုယွင်းသွားခြင်းပဲ။ ဒါကြောင့်သူဟာ နောင်တရတဲ့အခါမှာ သူ့နှလုံးသားကို အသစ် ပြုပြင်ပေးဖို့နှင့် စိတ်သဘော အသစ်ကို တောင်းဆိုတယ်။ မှားယွင်းတဲ့ စိတ်သဘောကြီးနဲ့ မှန်ကန်တဲ့ လမ်းကို မလျှောက်နိုင်ဘူးဆိုတာ သူသိတယ်။

ဩဂုတ်လ ၁၆ရက်နေ့

အထူးကာကွယ်စောင့်ရှောက်ရမယ့်အရာများ (၆)

“မြွေ​သည် မိ​မိ​ပ​ရိ​ယာယ်​အား​ဖြင့် ဧ​ဝ​ကို​လှည့်​စား​သ​ကဲ့​သို့၊ သင်​တို့​သည် စိတ်​ဆွေး​မြေ့​ယို​ယွင်း၍၊ ခ​ရစ်​တော်​ကို အ​ကြွင်း​မဲ့​ချစ်​သော​စိတ် ပျောက်​မည်​ဟု စိုး​ရိမ်​ခြင်း​ရှိ၏။-”‭‭၂ ကောရိန္သု‬ ‭၁၁:၃

ဘဝမှာ တခြားအရာတွေပျောက်တာထက် ခရစ်တော်ကို အကြွင်းမဲ့ချစ်တဲ့စိတ်ပျောက် တာကတော့ အဆိုးဆုံးပါပဲ။ တမန်တော်ကြီးရှင်ပေါလုက သူ့အသင်းသားတွေကို အမြဲတမ်းသတိပေးတယ်၊ အမြဲတမ်းစိုးရိမ်တယ်။ မြွေရဲ့လှည့်စားမှုကြောင့် ဧဝရဲ့နှလုံးသား ဆွေးမြေ့ယိုယွင်းသွားပြီးတော့ ဘုရားကို ချစ်တဲ့စိတ် ပျောက်ဆုံးသွားတယ်။ ဒီအတိုင်းပဲ လောကနှင် ဝိညာဉ်ဆိုးတွေရဲ့လှည့်စားမှုကြောင့် ခရစ်တော်ကို အကြွင်းမဲ့ချစ်တဲ့စိတ်ပျောက်ပြီးတော့ ရှင်သန်မှာကိုသူက သတိပေးတယ်။ ဘုရားကိုအကြွင်းမဲ့ချစ်တဲ့စိတ် မပျောက်ဆုံး ဖို့အတွက် အမြဲတမ်းကာကွယ်စောင့်ရှောက်ဖို့လိုတယ်။