ဧပြီလ ၂ ရက်နေ့

နှလုံးသားယဇ်ပလ္လင်

“At each and every sunrise you will hear my voice as I prepare my sacrifice of prayer to you. Every morning I lay out the pieces of my life on the altar and wait for your fire to fall upon my heart.” Psalms 5:3 TPT

နံနက်တိုင်း နှလုံးသား ယဇ်ပလ္လင်မှာ ကိုးကွယ်ခြင်း ယဇ်ကိုပူဇော်ပြီးတော့ ဘုရားရဲ့ ဝိညာဉ်တော်မီးကို မျှော်လင့်ပါ။ သန့်ရှင်းသောဝိညာဉ်တော်မီးက ဘယ်တော့မှငြိမ်းလို့မရဘူး။ နှလုံးသား နှင့် ကိုးကွယ်ခြင်းကလဲ ဘယ်တော့မှ ရပ်တန့်လို့မရဘူး။ ဘုရားက နေ့တိုင်း ကိုယ့်ရဲ့အသံကိုနားထောင်ပြီးတော့ ကိုယ်ရဲ့ ဆုတောင်းချက်တွေကို အဖြေပေးတယ်ဆိုတာ နေ့တိုင်းသင့်ရဲ့ နှလုံးသား အကြွင်းမဲ့ ကိုးကွယ်ဝတ်ပြုခြင်း နှင့်အများကြီးဆိုင်တယ်။ ဒါဝိဒ်ဟာ နှလုံးသားနှင့် ကိုးကွယ်တဲ့နေရာမှာ အခြားသူတွေ သဘောမပေါက်တဲ့ အရာကို နက်နဲစွာ သဘောပေါက်နားလည်ခဲ့တယ်။ နံနက်တိုင်း နက်ရှိုင်းစွာ ကိုးကွယ်ခြင်းရဲ့နောက်ကွယ်မှာ သူဟာ ထူးခြားစွာပြောင်းလဲ တိုးတက်ခဲ့တဲ့သူတစ်ယောက်ဖြစ်လာတယ်။ သူဘာလုပ်လုပ် ထူးခြားတယ်၊ သူ့ရဲ့နေ့ရက်တိုင်းဟာ ကောင်းကြီးမင်္ဂလာနဲ့ ပြည့်နှက်နေတယ်ဆိုတာ အခြားအကြောင်းကြောင့်မဟုတ်ဘူး။ ဘုရားကို နံနက်တိုင်း နှလုံးသား အကြွင်းမဲ့ ကိုးကွယ်ချဉ်းကပ်တတ်လို့ပဲ။

ဧပြီလ ၁ ရက်နေ့

ဆင်ခြင်အောက်မေ့ခြင်း

“အကျွန်ုပ်​သည် လွန်ခဲ့သော​နေ့ရက်​များ​ကို သတိရ​လျက် ကိုယ်တော်​၏​လုပ်ဆောင်​တော်မူ​ချက်​ရှိသမျှ​တို့​ကို ဆင်ခြင်အောက်မေ့​ပါ​၏​။ ကိုယ်တော်​၏​လက်​တော်​ဖြင့်​ပြုလုပ်​သော​အရာ​များ​ကို အကျွန်ုပ်​တွေးတောဆင်ခြင်​ပါ​၏​။”. ဆာလံကျမ်း ၁၄၃:၅

ဘာတွေတွေးတော ဆင်ခြင်နေသလဲ? စိုးရိမ်ခြင်း (သို့) စိတ်ချမူဟာ ဆင်ခြင်တွေးတောခြင်းရဲ့ရလဒ်ပါ။ မှားယွင်းတဲ့ ဆင်ခြင်အောက်မေ့ခြင်းက စိုးရိမ်ခြင်းကိုယူဆောင်လာသလို၊ ဘုရားနှုတ်ကပတ်တော်နှင့် လုပ်ဆောင်ပေးခြင်းကို ဆင်ခြင်အောက်‌မေ့တဲ့သူ အသက်တာမှာတော့ စိတ်ချမှုကိုယူဆောင်လာတယ်။ ဆင်ခြင်မှုမှားရင် ကျန်တဲ့အရာတွေ အားလုံး မှားယွင်းသွားနိုင်တယ်။ ဆင်ခြင်မှုမှန်ရင်တော့ အသက်တာမှာ အားလုံး မှန်လာလိမ့်မယ်။ ဆာလံ ဆရာက ပြီးခဲ့တဲ့ကာလရဲ့ မကောင်းတဲ့အရာတွေကို ပြန်သတိမရဘူး။ အရှုံးတွေနဲ့ စိတ်ပျက်စရာတွေကို ပြန်မတွေးဘူး။ ဘုရားလုပ်ပေးတဲ့ အရာတွေ၊လက်တော်ရဲ့လုပ်ဆောင်မူတွေပဲ ပြန်တွေးတယ်။ ဒါကြောင့်လဲ အရာရာကို မစိုးရိမ်ပဲ စိတ်ချမှုအပြည့်နဲ့ ဖြတ်သန်းနိုင်တာပေါ့။

မတ်လ ၃၁ ရက်နေ့

ကယ်တင်နိုင်သော တစ်ပါးတည်းသူ

“ထို​သ​ခင်၏ နာ​မ​တော်​မှ​တစ်​ပါး ငါ​တို့​ကို ကယ်​တင်​နိုင်​သော နာ​မ​တစ်​စုံ​တစ်​ခု​မျှ ကောင်း​ကင်​အောက် လူ​တို့​တွင် မ​ပေါ်​မ​ရှိ​ဟု ပေ​တ​ရု​သည် ထို​သူ​တို့​အား မြွက်​ဆို၏။” ‭‭တမန်တော်‬ ၄း၁၂‬‬

နာမည်ပြောလိုက်တာနဲ့ အရာရာ အဆင်ပြေသွားတဲ့ နိုင်ငံနှင့် ခေတ်ကြီးထဲမှာ ကျွန်တော်ကြီးလာတာ။ နာမည်တစ်ခု တန်ဖိုး ဘယ်လောက်ရှိသလဲ ဆိုတာ ကျွန်တော် ကောင်းကောင်းသိခွင့်ရတယ်။ နာမည်လေး ပြောလိုက်တာနဲ့ ဝင်လို့မရတဲ့ နေရာတွေ အကုန်လုံးဝင်၊ ထွက်လို့ရတယ်။ နာမည်ပြောလိုက်တာနဲ့ မရဘူးဆိုတဲ့ ကိစ္စတွေ အကုန် ရသွားတယ်။ လောကကြီးရဲ့နာမည်တွေတောင် ဒီလောက်စွမ်းရင် အမြင့်ဆုံး အရာရာကို လုပ်ဆောင်ပေးနိုင်တဲ့ ကယ်တင်ရှင်ရဲ့နာမက ဘယ်လောက်တောင် စွမ်းမလဲ? ကောင်းကင်အောက်မြေကြီးပေါ်မှာ သခင်ယေရှုနာမလောက် ကြီးမြတ်တဲ့နာမ မရှိသလို အရာရာ လုပ်ဆောင်ပေးနိုင်တဲ့နာမ တခြားမရှိဘူး။ ယုံကြည်ခြင်းနှင့်ခေါ်ကြည့်ပါ ထူးကို ထူးလာမယ်။

မတ်လ ၂၉ ရက်နေ့

ခွန်အားပေးတဲ့ သူရှိလို့

“ဘု​ရား​သ​ခင်​သည် ငါ​တို့​ခို​လှုံ​ရာ​ဖြစ်၍၊ ခွန်​အား​ကို​ပေး​တော်​မူ၏။ ဘေး​ရောက်​သည်​ကာ​လ အ​ထူး​သ​ဖြင့် ကူ​မ​တော်​မူ​ကြောင်း ထင်​ရှား​လျက်​ရှိ၏။ ထို​ကြောင့် ပ​ထ​ဝီ​မြေ​ကြီး​သည်​ရွေ့​သွား၍ တောင်​များ​တုန်​လှုပ်​လျက် သ​မု​ဒ္ဒ​ရာ​သို့​ကျ​သော်​လည်း၊ ငါ​တို့​သည် ကြောက်​လန့်​ခြင်း​မ​ရှိ။” ဆာလံ‬ ‭၄၆:၁-၂

ကြောက်စရာကောင်းတဲ့အခြေအနေမှာ စိုးရိမ်ကြောက်ရွံ့ခြင်းမရှိပဲ ဖြတ်ကျော်နိုင်တာဟာ ခွန်အားပေးတဲ့သူ ရှိလို့ပါပဲ။ ဘုရားက ကောင်းစားနေတဲ့အချိန်၊ အဆင်ပြေတဲ့အချိန်မှာပဲ ဘေးမှာရှိတာမဟုတ်ဘူး။ အဆိုးဆုံးအခြေအနေတွေမှာလဲ ပြိုလဲမသွားအောင် ကူညီမစတယ်။ ကျော်လွှားနိုင်အောင် ခွန်အားပေးတယ်။ ဘုရားရဲ့တူပါရှိခြင်းက လောက ကြီးတစ်ခုလုံး တုန်လှုပ်နေရင်တောင်မှ မတုန်မလှုပ်ပဲ ကောင်းမွန်စွာ ဖြတ်ကျော်သွားစေနိုင်တယ်။ အရာရာမှာ ခွန်အားပေးတဲ့သူရှိလို့ ဘယ်အရာကိုမဆို အောင်မြင်စွာ ကျော်လွှားသွားစေနိုင်တယ်။

မတ်လ ၂၈ ရက်နေ့

မခေါ် မီကပင် ထူးမည်

“ငါ​သည် သူ​တို့​မ​ခေါ်​မီ​က​ပင် ထူး​မည်။ လျှောက်​စဉ်​တွင်​ပင် ငါ​နား​ထောင်​မည်။” ဟေရှာယ‬ ‭၆၅:၂၄

ဘုရားကို ခေါ်ရင်တောင်မှ မထူးတဲ့ သူတွေ ရှိသလို ၊ တချို့တွေခေါ်ရင်တော့လဲ ဘုရားက ထူးပါတယ်။ ခေါ်မှထူးမယ်ဆိုတဲ့ဘဝကိုလဲ မကျေနပ်နေနဲ့။ ဘုရားနှင့် ပိုရင်းနှီးတဲ့အခါမှာ အရင်ထက်ပိုတဲ့ အခွင့်အရေးတွေ ရောက်လာတယ်။ ခေါ်ရင် မထူးတဲ့ဘဝကနေ ခေါ်မှထူးတဲ့ ဘဝကိုရောက်လာတယ်။ နောက် ဆုံးတော့ ခေါ်တောင်မခေါ်ရသေးဘူး ဘုရားက ကြိုပြီးတော့ ထူးတဲ့ဘဝကို ရောက်လာစေတယ်။ ဘယ်လောက်တောင် ကြီးမားတဲ့အခွင့် အရေးလဲ? ဘုရားက သင့်ဘဝကို အခြားသူတွေ​ မရနိုင်တဲ့ ဘဝထဲကို ပို့ဆောင်ပေးတယ်။

မတ်လ ၂၇ ရက်နေ့

တန်ဖိုးကြီးပြီးများပြားလှတဲ့ သင့်အတွက် ဘုရားအကြံအစည်

“အို ဘုရားသခင်​၊ ကိုယ်တော်​၏​အတွေးအကြံ​တို့​သည် အကျွန်ုပ်​အတွက် တန်ဖိုးကြီး​လှ​ပါ​၏​။ ၎င်း​တို့​အားလုံး​၏​ပမာဏ​သည် များပြား​လှ​ပါ​၏​။” ဆာလံ ၁၃၉:၁၇

              ကိုယ်ဟာကိုယ် တန်ဖိုးမရှိဘူးထင်နေတုန်းလား?

               ဘာတစ်ခုမှ ကြံစည်မရလို့ စိတ်ညစ်နေတာလား ?

ကိုယ့်အကြံအစည် ကိုယ့်အတွေးအခေါ်နဲ့ပဲ သွားနေရင်တော့ ဒီအတိုင်းပဲ ဖြစ်နေအုံးမှာပဲ။ အရည်အချင်းတစ်ခုထဲကို ကြည့်ပြီးတော့ တန်ဖိုး သတ်မှတ်လိုက်ရင်တော့မှားသွားမှာပေါ့။ တန်ဖိုးကြီးပြီးတော့ များပြားလှတဲ့ အကြံအစည်တွေ ဘုရား သူ့သားသမီးတွေအတွက် ကြံစည်ထားတယ်။ လူ့အနေနဲ့ မမြင်နိုင် မသိနိုင်သေးရင်တောင် ဘုရားက တန်ဖိုးထားပြီးတော့ ပြင်ဆင်ပေးထားတယ်။ တန်ဖိုးကြီးတဲ့ အကြံအစည်တော်နှင့် မရေတွက်နိုင်တဲ့ ပြင်ဆင်ပေးထားမူတွေကို အရှေ့မှာ ပြင်ဆင် ထားပေးတယ်။

မတ်လ ၂၆ ရက်နေ့

သတိနဲ့ စောင့်ကြည့် ဂရုစိုက်ခြင်းခံရသောသူ

“The Lord watches over you— the Lord is your shade at your right hand;” Psalms‬ ‭121‬:‭5‬ ‭NIV‬‬

အရေးကြီး ပုဂ္ဂိုလ်တွေ၊ ခေါင်းဆောင်ကြီးတွေရဲ့ဘေးမှာ သူတို့ကို အထူးစောင့်ရှောက်တဲ့ ကာကွယ်ရေး တပ်တွေကို မြင်ဖူးတယ်မဟုတ်လား? ဒီလိုလူတွေလာရင် လုံခြုံရေးက အထူးတင်းကြပ်ပြီးတော့ ပတ်ဝန်းကျင်ကို မျက်တောင် မခတ်ပဲ စောင့်ကြည့်နေတဲ့ သန်မာတဲ့ အစောင့်တွေလဲ ပါလာတတ်တယ်။ ဒါက အထူးပုဂ္ဂိုလ်တွေအတွက်ပဲလို့ လောကကြီးမှာ တော့ထင်တတ်ပါတယ်။ တကယ်တော့ ဘုရားက သူ့သားသမီးတိုင်းကို ဒီလိုကာကွယ်စောင့်ရှောက်မှုထက်ပိုအောင် စောင့်ကြည့် ဂရုစိုက်နေတယ်။ ပတ်လည်မှာ ကောင်းကင်တမန်တွေ ရော သူကိုယ်တိုင်လဲ သင့်ကိုလုံခြုံစေဖို့ ဘေးကင်းဖို့ အမြဲတမ်း စောင့် ကြည့်နေတယ်။ ဘဝမှာ ဘုရားရဲ့ ဂရုစိုက်ခြင်းကိုနားလည်သဘောပေါက်တဲ့အခါမှာ ဘယ်အရာကမှ သင့်ကို စိုးရိမ်အောင် ၊ကြောက်ရွံ့အောင် လုပ်နိုင်မှာ မဟုတ်တော့ပါဘူး။

မတ်လ ၂၅ ရက်နေ့

ကျွန်ုပ် ဝေစု

“အကျွန်ုပ်​၏​ကိုယ်ခန္ဓာ​နှင့်​အကျွန်ုပ်​၏​စိတ်နှလုံး​သည် အားအင်ကုန်ခန်း​သော်လည်း ဘုရားသခင်​သည် အစဉ်အမြဲ အကျွန်ုပ်​စိတ်နှလုံး​၏​အစွမ်းသတ္တိ​၊ အကျွန်ုပ်​၏​ဝေစု​ဖြစ်​တော်မူ​၏​။” ဆာလံ ၇၃:၂၆

လူ့ရဲ့ သဘာဝဟာ အားအင်ကုန်ခမ်းတတ်ပါတယ်။ စိတ်ဓါတ်လဲ ခဏခဏ ကျတတ်ပါတယ်။ ဆာလံဆရာက ဝိညာဉ်ရေးရာ လျှို့ဝှက်ချက်တစ်ခုကို တွေ့ပြီးနောက်ပိုင်းမှာ အဲ့လို အခြေအနေကနေ လွတ်မြောက်လာတယ်။ ကိုယ်ခန္ဓာ​နှင့်​အကျွန်ုပ်​၏​စိတ်နှလုံး​ ဘယ်လောက်ပဲ အားအင်ကုန်ခမ်းပါစေ ပြန်လည် ဖြည့်စွမ်းပေးမယ့် ဘုရားကိုပိုင်ဆိုင်ထားတယ်။ အကြိမ်ကြိမ်လဲကျလဲ ထူမမယ့်သူ ရှိမှတော့ ကြောက်စရာမလိုသလို၊ ကုန်သမျှ အားအင်တိုင်းကို ဖြည့်စွမ်းပေးမယ့် ဘုရားကို ပိုင်ထားမှတော့ ဘယ်တော့မှ အားကုန်ပြီးတော့ ရှေ့မဆက်နိုင်တဲ့ဘဝကိုရောက်သွားမှာ မဟုတ်ဘူး။ အမြဲတမ်း အားအင်ပြည့်ဝပြီးတော့ လန်းဆန်းနေမှာ သေချာတယ်။

မတ်လ ၂၄ ရက်နေ့

အရာအားလုံး လုပ်နိုင်တယ်

“ငါ့​ကို ခွန်​အား​နှင့်​ပြည့်​စုံ​စေ​တော်​မူ​သော ခ​ရစ်​တော်​အား​ဖြင့် ခပ်​သိမ်း​သော​အ​မှု​တို့​ကို ငါ​တတ်​စွမ်း​နိုင်၏။-” ‭‭ဖိလိပ္ပိ‬ ၄း၁၃‬‬

ဒီဟာလဲမလုပ်နိုင်ဘူး၊ ဟိုဟာလဲမလုပ်နိုင်ဘူးလို့ ဘာလို့ထင်ရတာလဲ? ငါလုပ်ရင်ဖြစ်မှာ မဟုတ်ဘူး ဆိုတဲ့အတွေးက ဘာမှမလုပ်ခင်ကတည်းက လက်နက်ချ အညံခံပြီးသား အတွေးအခေါ်ပါ။ တကယ်တော့ ကိုယ့်ခွန်အားနှင့် လုပ်ရင်မဖြစ်နိုင်ပေမဲ့ ဘုရားပေးတဲ့ ခွန်အားကတော့ အရာအားလုံးကို လုပ်နိုင်ဖို့အတွက် မစတယ်။ တမန်တော်ကြီးရှင်ပေါလုက သူ့ခွန်အားနှင့် အားလုံးလုပ်နိုင်တယ်လို့ မပြောပါဘူး။ အားလုံးလုပ်နိုင်စေတဲ့ ဘုရားပေးတဲ့ခွန်အားကို သူသဘောပေါက်တယ်၊ ယုံကြည်တယ်။ ဘုရားပေးတဲ့ခွန်အားက အချို့အရာတွေပဲ လုပ်နိုင်ပြီးတော့ အချို့အရာတွေကိုတော့ မလုပ်နိုင်ဘူးဆိုတာ လုံးဝမဟုတ်ပါဘူး။ အရာအားလုံးကို လုပ်ဆောင်နိုင်ဖို့ တတ်နိုင်တယ်။

မတ်လ ၂၂ ရက်နေ့

ဘယ်တော့မှ မပြောင်းလဲဘူး

“ယေရှု​ခရစ်တော်​သည် မနေ့၊ ယနေ့​နှင့် နောင်​ကာလ​အစဉ်အဆက် ပြောင်းလဲ​ခြင်း​မ​ရှိ။” ‭ဟေဗြဲဩဝါဒစာ ၁၃း၈‬‬

ကုန်စျေးနှုန်းတွေ ပြောင်းလဲလာတယ်၊ အခြေအနေတွေ ပြောင်းလဲလာတယ်၊ လူတွေရဲ့ ခံစားချက်တွေ၊ ခံယူချက်တွေ ပြောင်းလဲလာတယ်။ အရာရာပြောင်းလဲတတ်တဲ့ လောက ကြီးထဲမှာ ဘယ်တော့မှ မပြောင်းလဲ​တတ်တာ သခင်ယေရှုပဲ။ အရင်တုန်းက ချစ်သလို အခုလဲ ချစ်တယ် နောင်လဲ ချစ်နေအုံးမယ်။ အရင်တုန်းက ဂရုစိုက်သလို အခုလဲဂရုစိုက်တယ် နောင်လဲဂရုစိုက်မယ်။ အရင်တုန်းက လိုအပ်သမျှ တာဝန်ယူ ထောက်ပံ့သလို အခုလဲ တာဝန်ယူတယ် နောင်လဲတာဝန်ယူမယ်။ ဒီလို ဘုရားမျိုးရထားမှတော့ ဘာကို တွေးပြီးတော့ ပူနေအုံးမှာလဲ?

မတ်လ ၂၁ ရက်နေ့

ရှာတဲ့ သူတွေ့မယ်

“ဖြောင့်​မတ်​ခြင်း​တ​ရား​နှင့် က​ရု​ဏာ​တ​ရား​ကို​ရှာ​သော​သူ​သည် အ​သက်​ရှင်​ခြင်း၊ ဖြောင့်​မတ်​ခြင်း၊ ဂုဏ်​အ​သ​ရေ​ထင်​ရှား​ခြင်း​ကို တွေ့​တတ်၏။” ‭‭သုတ္တံ‬ ‭၂၁း၂၁‬‬

မွေးကတည်းကနေ သေတဲ့အထိ လူတွေက ရှာဖွေမှုတွေကို အဆက်မပြတ် လုပ်ဆောင်နေကြတယ်။ တစ်ယောက်နဲ့တစ်ယောက် ရှာတာသာမတူတာ ရှာနေတာခြင်းကတော့ အတူတူပဲ။ မှန်ကန်တဲ့အရာကို ရှာဖွေတတ်ဖို့ အရေးကြီးတယ်။ ရှာတာ မှားရင် တွေ့တဲ့အရာလဲ မှားနေအုံးမှာပဲ။ ရှောလမုန်မင်းကြီးက အကြံပေးတယ် ဖြောင့်မတ်ခြင်းနှင့် ကရုဏာတရားကို ရှာဖို့။ သခင်ယေရှုကလဲ နိုင်ငံတော် နှင့် ဖြောင့်မတ်ခြင်းတရားကို ရှာတဲ့သူကို သူတို့လိုတဲ့အရာကို ထပ်ပြီးပေးမယ်လို့ ကတိပေးထားတယ် မဟုတ်လား။ မှန်တဲ့အရာကိုရှာတဲ့သူက မှန်တဲ့အရာကိုပဲတွေ့တယ်။ အသက်ရှင်ခြင်း၊ ဖြောင့်မတ်ခြင်း နှင့် ဂုဏ် အသရေ ထင်ရှားကို လူတိုင်း မတွေ့ဘူး။ ဖြောင့်မတ်ခြင်းနှင့်ကရုဏာတရားကို ရှာတဲ့သူအသက်တာမှာပဲတွေ့ပါလိမ့်မယ်။

မတ်လ ၂၀ ရက်နေ့

ဘယ်လို အားရှိအောင် လုပ်ရမလဲ?

ထာဝရဘုရား​ထံ​တော်​မှ ဝမ်းမြောက်​ခြင်း​သည် သင်​တို့​အဖို့ ခွန်အား​ဖြစ်​၏​”​ဟု ဆို​၏​။” နေဟမိ ၈:၁၀

နေ့တိုင်းရင်ဆိုင်ရတဲ့ အရာတွေအတွက် လုံလောက်တဲ့ ခွန်အားလိုတယ်။ အားကုန်စေတဲ့ အရာတွေများစွာ ရှိပြီး ပြန်လည် အားဖြည့်ဖို့အတွက် ဘယ်လိုလုပ်ရမလဲဆိုတာကိုမသိရင် ခဏလေးအတွင်းမှာ အားကုန်ပြီးတော့ ရှေ့ဆက်လို့ မရဖြစ်ပါလိမ့်မယ်။ နေဟမိကတော့ အကြံပေးတယ် ဝမ်းနည်းခြင်းက အားကုန်စေတယ်။ ဘုရားထံမှာ ဝမ်းမြောက်ခြင်းကတော့ ခွန်အားဖြစ်စေတယ်။ ကိုယ့်ကိုကိုယ် သခင်ဘုရားအထဲမှာ ဝမ်းမြောက်တတ်ဖို့လိုတယ်။ ဘယ်လိုအရာပဲ ကြုံကြုံစိတ်ညစ်နေမယ့်အစား ဝမ်းမြောက်စွာနဲ့ ဖြတ်ကျော် တတ်ရင် ကြာလေ အားကုန်ခမ်းလေ မဖြစ်ပဲ ပိုပြီးအားပြည့်လေ ဖြစ်လာလိမ့်မယ်။ ကြုံရတဲ့အရာရာတိုင်းမှာ ဘုရားထဲမှာ အားယူပြီး ဝမ်းမြောက်စွာနဲ့ ဖြတ်ကျော်ပါ။ ကြာလေ အားတိုးပွါးတာကိုမြင် ရပါလိမ့်မယ်။

မတ်လ ၁၉ ရက်နေ့

တန်ခိုးစွမ်းအားကိုပေးသူ

“He gives strength to the weary and increases the power of the weak.” Isaiah‬ ‭40‬:‭29‬ ‭NIV‬‬

ဘဝရဲ့ စိန်ခေါ်မှုတွေကို ရင်ဆိုင်နေရတဲ့သူတွေတိုင်း ကြုံရလေ့ရှိတဲ့မောပန်းခြင်းနှင့် ပင်ပန်းခြင်းအတွက် လောကမှာတော့ ပြန်လည်ဖြည့်တင်းဖို့ဆိုတာ အင်မတန်ခက်ပါတယ်။ တစ်ချို့ဆို ခြေကုန်လက်ပန်းကျပြီးတော့ စောစောစီးစီးဘဝကို အရှုံးပေးသွားတဲ့သူတွေများကြီးပဲ။ ပင်ပန်းတဲ့သူကို ခွန်အားနှင့်ဖြည့်ပေးပြီး အားနည်းတဲ့သူ့ကို တန်ခိုးနဲ့ ပြည့်စေနိုင်တဲ့သူက ဘုရားတစ်ပါးတည်းပဲရှိတယ်။ သူက သင့်ဘဝကို တာဝန်ယူနိုင်တယ်။ ကြုံတွေ့နေရတဲ့ စိန်ခေါ်မှုတွေကြားမှာ ယနေ့တိုင်အောင် အားမလျော့ပဲ တိုးပွါးနေတဲ့ လျှို့ ဝှက်ချက်တော့ ဘုရားဆီကနေရတဲ့ ခွန်အား၊ အစွမ်းသတ္တိနှင့် တန်ခိုးကြောင့်ပါပဲ။

မတ္လ ၁၉ ရက္ေန့

မတ်လ ၁၈ ရက်နေ့

ထပ်ချပ်မကွာအတူလိုက်နေတယ်

“အကယ်စင်စစ် အကျွန်ုပ်​အသက်ရှင်​သမျှ​ကာလ​ပတ်လုံး ကောင်းမြတ်​တော်မူ​ခြင်း​နှင့်​မေတ္တာကရုဏာ​တော်​သည် အကျွန်ုပ်​နှင့်အတူ​လိုက်ပါ​လာ​လိမ့်မည်​။ အကျွန်ုပ်​သည်​လည်း ထာဝရဘုရား​၏​အိမ်​တော်​၌ အစဉ်အမြဲ​နေ​ရ​ပါ​လိမ့်မည်​။” ‭ဆာလံကျမ်း‬ ၂၂:၆ ‭

အချို့လူတွေရဲ့နောက်မှာ အတိတ်အရိပ်မည်းကြီးက တကောက်ကောက် လိုက်ပါနေလို့ စိတ်ဖိဆီးနေရတယ်။ အချို့ကျတော့လဲ နတ်ဆိုးတွေက သူတို့နောက်ကနေ လိုက်နေတယ်လို့ ခံစားနေပြန်ရော။ အချို့ကျတော့လဲ သူတို့သွား လေရာရာ အဆိုးတွေကပဲ အရိပ်သဖွယ်လိုက်နေတယ်လို့ နှုတ်ကနေ တဖွဖွပြောနေတတ်တယ်။ ယုံကြည်သူ ဘုရားသားသမီးတွေ နောက်က တကောက်ကောက် လိုက်နေတာ အရင်က လုပ်ခဲ့တဲ့အပြစ်တွေလဲ မဟုတ်ဘူး။ နတ်ဆိုးတွေလဲမဟုတ်ဘူး။ ဆိုးရွားတဲ့ ကံကြမ္မာတွေလဲ မဟုတ်ဘူး။ အမြဲမခွါပဲ တကောက်ကောက် အသက်ရှင်သမျှ ကာလပတ်လုံး လိုက်နေတာကတော့ ဘုရားရဲ့ ကောင်းမြတ်ခြင်း နှင့် မေတ္တာ ကရုဏာတော်ပါပဲ။

မတ်လ ၁၇ ရက်နေ့

ကောင်းကျိုးအတွက် ပူးပေါင်းခြင်း

“ဘုရားသခင်​ကို​ချစ်​သော​သူ​များ​တည်းဟူသော အကြံအစည်​တော်​အတိုင်း ခေါ်ယူ​တော်မူ​ခြင်း​ခံရ​သော​သူ​များ​အတွက် ဘုရားသခင်​သည် ခပ်သိမ်း​သော​အမှုအရာ​တို့​ကို ပူးပေါင်း​လုပ်ဆောင်​စေ​၍ ကောင်းကျိုး​ဖြစ်​စေ​တော်မူ​ကြောင်း​ကို ငါ​တို့​သိ​ကြ​၏။” ‭‭ရောမ ၈း၂၃‬‬

ဘုရားသားသမီးတစ်ယောက်အနေနဲ့ ပထမဆုံးယုံရမှာက ဘုရားသင့်အပေါ်မှာ ထားတဲ့ အကြံအစည်က အလွန်ကြီးမားပြီးတော့ တစ်နေ့ သေချာပေါက် ပြည့်စုံမယ်။ ဘယ်အရာကမှ ဘယ်လိုအခြေအနေမျိုးမှ မဖျက်ဆီး နိုင်ဘူးဆိုတာကို စိတ်ချဖို့လိုတယ်။ ကြုံတွေ့ရတဲဲ့အခြေအနေတွေ၊ အဖြစ်ပျက်တွေနှင့် လူတွေက သင့်အပေါ်မှာထားတဲ့ ဘုရားရဲ့ ခေါ်ခြင်းနှင့်အကြံအစည်ကို လုံးဝမဖျက်ဆီးနိုင်ဘူး။ ဘယ်လိုပဲ ကြုံကြုံ ဘုရားကြံစည်ထားတဲ့အကြံအစည်ကို ပြည့်စုံဖို့အတွက်ပဲ ပူးပေါင်းလုပ်ဆောင်ဖို့ပဲဖြစ်ပါလိမ့်မယ်။

မတ်လ ၁၅ ရက်နေ့

မေတ္တာကရုဏာကို တည်စေသူ

“ရှေးယခင်​ကပင် ထာဝရဘုရား​သည် ကိုယ်ထင်ရှားပြ​၍ “​ငါ​သည် သင့်​ကို ထာဝရ​မေတ္တာ​နှင့်​ချစ်​၏​။ ထို့ကြောင့် ငါ​၏​မေတ္တာကရုဏာ​ကို သင်​၌ တည်​စေ​ပြီ​။” ယေရမိ ၃၁:၃

လူအချင်းချင်း ချစ်တာကတော့ တခဏပဲ။ ဘုရားရဲ့အချစ်ကတော့ ထာဝရအချစ်။ ပြည့်စုံတဲ့သူ ကိုယ့်အပေါ်မှာ ကောင်းတဲ့သူကို လူတိုင်းချစ်နိုင်တယ်။ အားနည်းချက်အပြည့်နဲ့ ဘယ်တော့မှ မစုံလင်တဲ့သူကို ချစ်နိုင်တာကတော့ ဘုရားတစ်ပါးတည်းပဲရှိတယ်။ ကောင်းလို့ချစ်ခဲ့တာမဟုတ်ဘူး။ ဘုရားအချစ်ကို ခံရလို့ ကောင်းသွားတာပဲရှိတယ်။ ဒီနေ့ အရင်ကရော အခုရော နောင်ရော ဘယ်တော့မှ မပြောင်းလဲတဲ့မေတ္တာနဲ့ ချစ်နိုင်တာ လောကကြီးမှာ ဘုရားတစ်ပါးတည်းပဲရှိတယ်။ တစ်လောလုံး သင့်အနားမှာ မရှိရင်လဲ၊ ဘယ်သူကမှ သင့်ကို မချစ်ရင်လဲ သူဟာ သင့်ကိုချစ်နေဆဲ၊ နောင်လဲ ချစ်နေအုံးမှာပဲ၊ ဒါကြောင့် ဘယ်လိုအခြေနေ၊ ဘယ်လို အရာမျိုးကြုံကြုံ သူမချစ်တော့ဘူးလို့ မတွေးမိစေနဲ့။ သူဟာအမြဲ တမ်းချစ်နေတဲ့ တစ်ဉီးတည်းသောသူပါပဲ။

မတ်လ ၁၄ ရက်နေ့

အမြဲတမ်းအောင်မြင်သူ

“သို့သော် ငါ​တို့​သည် ငါ​တို့​ကို​ချစ်​တော်မူ​သော​အရှင်​အားဖြင့် ထို​အမှု​ခပ်သိမ်း​တို့​ကို​ခံရ​စဉ်​၌​ပင် လုံးလုံးလျားလျား​အောင်မြင်​လျက်​ရှိ​ကြ​၏။” ရောမ ၈:၃၇

လောကကြီးမှာ အမြဲတမ်းအောင်မြင်တဲ့သူဆိုတာ မရှိဘူး။ အရင်တုန်းက အောင်မြင်ခဲ့တဲ့သူတွေက ဒီနေ့မှာ မအောင်မြင်တော့ပဲ သူတို့ထက် ပိုပြီးတော်တဲ့သူတွေကို အောင်မြင်ခြင်းသရဖူကို လွှဲပြောင်းပေးလိုက်ရသလို၊ ဒီနေ့ အောင်မြင်တဲ့သူတွေလဲ မကြာခင်သူတို့ထက် ပိုပြီးတော်တဲ့၊ ကြိုးစားတဲ့သူတွေဆီကို လက်လွှဲပေးလိုက်ရအုံးမှာပဲ။ ဝိညာဉ်ရေးရာမှာတော့ အဲ့လိုမဟုတ်ဘူး။ ဘုရားရဲ့ ချစ်ခြင်းဟာ ဘယ်လောက်ကြီးမားပြီး အသက်တာကို အောင်မြင်စေသလဲ ဆိုရင် အခြေအနေတိုင်းမှာ ပြီးပြည့်စုံတဲ့အောင်မြင်သောအသက်တာကိုဖြစ်စေတယ်။ အသာရတဲ့အချိန်ပဲမဟုတ်ဘူး ခံရတဲ့အချိန်မှာလဲ အောင်မြင်ဆဲပဲ။ ဒါကို တမန်တော်ကြီးရှင်ပေါလုက သဘောပေါက်သွားခဲ့တယ်။ ကြီးမားတဲ့အခက်အခဲတွေ ပြင်းထန်တဲ့ တိုက်ခိုက်မှုတွေကို သူရင်ဆိုင်ရပေမယ့် ခရစ်တော်ရဲ့ ချစ်ခြင်းမေတ္တာဟာ သူ့ကို ပြီးပြည့်စုံတဲ့အောင်မြင်သူ ဖြစ်စေတုန်းပဲ ဆိုတာ သူ ယုံကြည်တယ်။

မတ်လ ၁၃ ရက်နေ့

ဘယ်တော့မှ မကုန်သွားဘူး

“ထာ​ဝ​ရ​ဘု​ရား​သည်​သ​နား​တော်​မူ၍ က​ရု​ဏာ​တော်​သည် မ​ကုန်​သော​ကြောင့် ငါ​တို့​သည် ဆုံး​ရှုံး​ခြင်း​သို့ မ​ရောက်​ဘဲ​နေ​ကြ၏။” ယေရမိမြည်တမ်း ၃;၂၂

လောကမှာ ရှိရှိသမျှအရာက ကုန်သွားတတ်သလို တစ်ခါတစ်လေ ရှိရင်တောင် သုံးလို့မရတဲ့ သက်တမ်းကုန်တတ်တဲ့ အရာတွေချည်းပဲ။ ဘုရားရဲ့သနားခြင်း ကရုဏာကတော့ ဘယ်တော့မှ မကုန်ဆုံးတတ်သလို၊ သက်တမ်းကုန်ဆုံးသွားတယ်ဆိုတာလဲ မရှိဘူး။ နေ့ရက်တိုင်းတောင် အသစ်အသစ်ချပေးလိုက်သေးတယ်။ ဘုရားရဲ့ ကရုဏာသာ ကုန်သွားမယ်။ သက်တမ်း လွန်သွားမယ်ဆိုရင် လောကကြီးက မတွေးရဲစရာပဲ။ နေ့ရက်စဉ်တိုင်း၊ ကြုံလာတဲ့အရာတိုင်းကို အောင်မြင်စွာ ဖြတ်ကျော်နိုင်စေတာက ဘုရားရဲ့ကရုဏာတော်ကြောင့်ပါပဲ။

မတ်လ ၁၂ ရက်နေ့

ထပ်ချပ်မကွာ အတူလိုက်နေတယ်

“အကယ်စင်စစ် အကျွန်ုပ်​အသက်ရှင်​သမျှ​ကာလ​ပတ်လုံး ကောင်းမြတ်​တော်မူ​ခြင်း​နှင့်​မေတ္တာကရုဏာ​တော်​သည် အကျွန်ုပ်​နှင့်အတူ​လိုက်ပါ​လာ​လိမ့်မည်​။ အကျွန်ုပ်​သည်​လည်း ထာဝရဘုရား​၏​အိမ်​တော်​၌ အစဉ်အမြဲ​နေ​ရ​ပါ​လိမ့်မည်​။”‭‭ဆာလံကျမ်း‬ ၂၂:၆ ‭

အချို့လူတွေရဲ့နောက်မှာ အတိတ်က အရိပ်မည်းကြီးက တကောက်ကောက် လိုက်ပါနေလို့ စိတ်ဖိဆီးနေရတယ်။ အချို့ကျတော့လဲ နတ်ဆိုးတွေက သူတို့နောက်ကနေ လိုက်နေတယ်လို့ ခံစားနေပြန်ရော။ အချို့ကျတော့လဲ သူတို့သွား လေရာရာ အဆိုးတွေကပဲ အရိပ်သဖွယ်လိုက်နေတယ်လို့ နှုတ်ကနေ တဖွဖွ ပြောနေတတ်တယ်။ ယုံကြည်သူ ဘုရားသားသမီးတွေ နောက်က တကောက်ကောက် လိုက်နေတာ အရင်က လုပ်ခဲ့တဲ့အပြစ်တွေလဲ မဟုတ်ဘူး။ နတ်ဆိုးတွေလဲမဟုတ်ဘူး။ ဆိုးရွားတဲ့ ကံကြမ္မာတွေလဲ မဟုတ်ဘူး။ အမြဲမခွါပဲ တကောက်ကောက် အသက်ရှင်သမျှ ကာလပတ်လုံး လိုက်နေတာကတော့ ဘုရားရဲ့ ကောင်းမြတ်ခြင်း နှင့် မေတ္တာ ကရုဏာတော်ပါပဲ။

မတ်လ ၁၁ ရက်နေ့

မေတ္တာ ကရုဏာတော်

““ငါ့​ခြေ​ချော်​ပြီ​”​ဟု အကျွန်ုပ်​ဆို​သောအခါ အို ထာဝရဘုရား​၊ ကိုယ်တော်​၏​မေတ္တာကရုဏာ​တော်​သည် အကျွန်ုပ်​ကို​ဖေးမ​တော်မူ​၏​။” ဆာလံကျမ်း‬ ‭၉၄:၁၈

လောကကြီးမှာ ခြေချော်လဲဖို့ကိစ္စတွေက များမှ များ။ တွဲခေါ်ဖို့ထက် တွန်းချမယ့်သူတွေက ပိုများတ​ယ်။ တစ်ခါတစ်လေ ငါတော့ လုံးဝလဲကျပြီလို့ ထင်တဲ့အချိန်တွေလဲ ရှိတတ်တယ်။ ဆာလံဆရာကိုယ်တိုင်က ဒီလိုအခြေနေ မျိုးကိုကြုံခဲ့ရတယ်။ ငါလဲကျတော့မယ်လို့ ပြောတောင်ပြောပြီးပြီ။ ဘာလို့များမလဲကျသွားရတာလဲဆိုရင် ဘုရားရဲ့မေတ္တာကရုဏာတော်က လဲကျမသွားအောင် ဖေးမထားလို့။ ဘယ်လိုအခြေအနေမျိုးမှာမဆိုလဲမကျသွားအောင် အမြဲတမ်းဖေးကူပေးနေတဲ့ အရာရှိတယ်။ အဲ့ဒါကတော့ ဘုရားရဲ့မေတ္တာ ကရုဏာပါပဲ။ ဘယ်လိုအခြေအနေမျိုးမှာမဆို လဲမကျသွားအောင် အမြဲတမ်း အားပေးလမ်းပြနေတဲ့ ဘုရားရဲ့မေတ္တာရှိနေသရွေ့ ဘယ်တော့မှ ကျဆုံးသွားမှာ မဟုတ်တာသေချာတယ်။

မတ်လ ၁၀ ရက်နေ့

ကြွယ်ဝခြင်း (၆)

“မြေ​ကြီး​ဘ​ဏ္ဍာ စုံ​လင်​ရာ​အား​ဖြင့်​လည်း​ကောင်း၊ ထာ​ဝ​ရ​ဘု​ရား​ပေး​တော်​မူ​ရာ၌ မင်္ဂ​လာ​ရှိ​ပါ​စေ​သော။ ချုံ၌​နေ​တော်​မူ​သော​သူ၏ ကျေး​ဇူး​တော်​သည် ယော​သပ်​ခေါင်း​ပေါ်၊ မိ​မိ​အစ်​ကို​တို့​တွင် အ​ကြီး​အ​ကဲ​ဖြစ်​သော​သူ၏ ခေါင်း​ထိပ်​ပေါ်​မှာ သက်​ရောက်​ပါ​စေ​သော။” တရားဟော ၃၃:၁၆

ယောသပ်ဟာ ညီအကိုတွေထက် အငယ်ဖြစ် သော်လည်း ကြွယ်ဝခြင်းနှင့် အောင်မြင်ခြင်းအရာမှာတော့ ညီအကိုတွေထဲမှာ ဉီးဆောင်တဲ့ သူတစ်ယောက်ဖြစ်လာတယ်။ဘာကြောင့် ညီအကိုထဲမှာ အဘက်ဘက်မှာ သာလွန်တဲ့သူတစ်ယောက်၊ ပြည့်စုံ ကြွယ်ဝတဲ့သူတစ်ယောက် ဖြစ်လာရသလဲ? အဖြေကတော့ ကျေးဇူးတော်က သူတို့အသက်တာမှာ သက်ရောက်လို့ဖြစ်တယ်။ ဒါကြောင့် အဘက်ဘက်မှာ အခြား ညီအကိုတွေထက်သာလွန်ခြင်းကို ဖြစ်စေတယ်။ ခရစ်ယာန်ဆိုတာတူပေမယ့် ခံစားရတဲ့ကောင်းကြီးမတူတာ ကျေးဇူးတော်ကို အမှီပြုတဲ့သူနဲ့ ကိုယ့်ခွန်အားကိုအမှီပြုတဲ့သူ မတူလို့ပါ။ ကျေးဇူးတော် သက်ရောက်တဲ့ ယောသပ်တောင် ညီအကိုတွေထဲမှာ မတူတဲ့ကောင်းကြီး ဖြစ်စေရင် သင့်အသက်တာမှာလဲ အခြားသူတွေမတူတဲ့ ပြည့်စုံကြွယ်ဝခြင်း ဘုရားက ဖြစ်စေလိမ့်မယ်။

မတ်လ ၈ ရက်နေ့

ကြွယ်ဝခြင်း (၅)

“အ​ချင်း​ချစ်​သူ၊ သင်၏​စိတ်​နှ​လုံး​သည် ကောင်း​စား​သ​ကဲ့​သို့၊ သင်​သည် အ​ရာ​ရာ၌​ကောင်း​စား​ခြင်း​နှင့် ကျန်း​မာ​ခြင်း​ရှိ​မည်​အ​ကြောင်း ငါ​ဆု​တောင်း၏။-” ၃ယော ၁:၂

အရာရာမှာ ကောင်းစားဖို့၊ ကျန်းမာဖို့က နှလုံးသားက အဓိကဆိုတာ မကြာခဏ ကြားဖူးမှာပါ။ ကောင်းစားတဲ့နှလုံးသားဆိုတာ လူ့အနေနဲ့ ရှိဖို့လွယ်တာမှ မဟုတ်တာ။ လူ့ရဲ့နှလုံးသားဟာ မကောင်းတဲ့ အရာတွေနဲ့ပဲပြည့်နှက်နေပြီးတော့ ကောင်းတဲ့အရာရှိဖို့ထက် မကောင်းတဲ့အရာတွေကိုနေရာပေးဖို့ပဲ ပိုစိတ်ဝင်စားတယ်။ ကောင်းစားတဲ့နှလုံးသားဆိုတာ ခရစ်တော်ရဲ့စိတ်သဘောကလွဲပြီး ကျန်တဲ့ဘယ်အရာမှ မရှိဘူး။ ခရစ်တော်ရဲ့စိတ်သဘောကို သန့်ရှင်းသောဝိညာဉ်တော်အားဖြင့် လက်ခံရရှိတဲ့အခါမှာ တော့ လူ့အနေနဲ့မရှိနိုင်တဲ့ ကောင်းစားတဲ့နှလုံးသားကို သင်ရရှိနိုင်တယ်။ ခရစ်တော်ရဲ့နှလုံးသားကိုရရှိတဲ့သူတိုင်းက အရာရာမှာ ကောင်းစားခြင်းနှင့် ကျန်းမာခြင်းကို ခံစားရမှာ သေချာတယ်။

မတ်လ ၇ ရက်နေ့

ကြွယ်ဝခြင်း (၄)

“အ​ကြင်​သူ​သည် ရ​တတ်၏။ ထို​သူ၌ ကြွယ်​ဝ​ပြည့်​စုံ​စေ​ခြင်း​ငှာ ပေး​ဦး​မည်။ အ​ကြင်​သူ​သည် ဆင်း​ရဲ၏။ ထို​သူ၌​ရှိ​သ​မျှ​ကို​ပင် နုတ်​လိမ့်​မည်။-” မဿဲ‬ ‭၁၃:၁၂

လူ့အထင်နဲ့ ဘုရားလုပ်ရပ်ဟာ ခေတ်ကာလ တိုင်းမှာ လွဲနေသလိုပဲ အခုလဲလွဲနေတုန်းပါပဲ။ လူတွေက လောကရဲ့ အတွေးအခေါ်တွေအပေါ်မှာ အခြေခံပြီးတော့ ဘုရားက အလုပ်လုပ်မယ် လို့တွေးထင်မိတတ်ကြတယ်။ တကယ်တော့ ဘုရားက ဘယ်တော့မှ လူ့အတွေးအခေါ်နဲ့အလုပ်မလုပ်ဘူး။ သူ့ရဲ့နည်းလမ်းအတိုင်းပဲအလုပ်လုပ်တယ်။ လူတွေက ဆင်းရဲသားတွေကို သနားပြီးတော့ ကြွယ်ဝခြင်းကိုပေးရင်ကောင်းမယ်လို့ ထင်တတ်တယ်။ ဘုရားနည်းလမ်းက အဲ့လိုမဟုတ်ဘူး။ ရတတ်တဲ့သူတွေကပဲ ကြွယ်ဝခြင်းကို ပိုပြီးရရှိခံစားရတယ်။ ဒါကြောင့်လဲ ကြွယ်ဝတဲ့သူတွေကပဲ ပိုပြီးကြွယ်ဝ လာတော့ ပေါ့။ ဆင်းရဲသားကနေ ရုတ်တရတ် ချမ်းသာလာတယ်ဆိုတာ ရာခိုင်းနှုန်းအရမ်းနည်းတယ်။ ရတတ်တယ်ဆိုတာက ဘုရားရဲ့နည်းလမ်းကိုသိပြီးတော့ အသက်ရှင်တဲ့သူတွေ ဒါကြောင့်သူတို့ဟာ ဆက်ပြီးတော့ ဘုရားရဲ့ကြွယ်ဝခြင်းကို ထပ်အပ်နှံခြင်းခံရတယ်။ ဘုရားရဲ့နည်းလမ်းမသိပဲ ရှင်သန်တဲ့သူတွေကတော့ ဆင်းရဲရုံတင်မဟုတ်ဘူး ရှိတဲ့အရာတွေ တောင် ထပ်ရှိနေဖို့အာမခံချက်မရှိဘူး။

မတ်လ ၆ ရက်နေ့

ကြွယ်ဝခြင်း (၃)

“သင်​၏​ဘဝ​ကို ကောင်းမြတ်​သော​အရာ​ဖြင့် ပြည့်စုံကြွယ်ဝ​စေ​တော်မူ​သဖြင့် သင်​၏​ပျိုရွယ်မှု​သည် လင်းယုန်​ကဲ့သို့ အသစ်ပြုပြင်​ခြင်း​ကို​ခံရ​၏​။” ‭‭ဆာလံကျမ်း‬ ၁၀၃း၅‬‬

ဆာလံဆရာကပြောတယ် ကျေးဇူးတော်အပေါင်းကိုမမေ့နဲ့တဲ့။ ကျေးဇူးတော်ဆိုတာ ကယ်တင်ခြင်းတစ်ခုထဲ မဟုတ်သလို ကောင်းကင်ဝင်ခွင့်ရဖို့တစ်ခုထဲအတွက်လဲ မဟုတ်ဘူး။ ကျေးဇူးတော် အပေါင်းထဲမှာ ကျန်းမာခြင်း၊ အောင်မြင်ခြင်း၊ ကြွယ်ဝခြင်း စတဲ့ အရာအားလုံးက ပါဝင်ပါသေးတယ်။ သင့်ရဲ့ဘဝကို ကောင်းမြတ်တဲ့ အရာတွေရှိရုံပဲမဟုတ်ဘူး၊ ပြည့်စုံကြွယ်ဝစေတယ်။ သင်ဟာလိုအပ်ချက်တွေနဲ့ ချွတ်ခြုံကျတဲ့ဘဝကို ရောက်သွားမှာ မဟုတ်ဘူး။ ဘုရားပြုပေးတဲ့ကျေးဇူးတော်ထဲမှာ ပိုပြီးတောင် ပြည့်စုံကြွယ်ဝလာအုံးမယ်ဆိုတာ ယုံပါ။

မတ်လ ၅ ရက်နေ့

ကြွယ်ဝခြင်း (၂)

“ထို့ကြောင့် သင်​၏​ဘုရားသခင်​ထာဝရဘုရား​ကို​သာ သင်​အောက်မေ့​ရ​မည်​။ အကြောင်းမူကား ကိုယ်တော်​သည် သင့်​ဘိုးဘေး​တို့​အား​ကျိန်ဆို​တော်မူ​ခဲ့​သည့် မိမိ​ပဋိညာဉ်​ကို တည်​စေရန် ယနေ့​မြင်​ရ​သည့်​အတိုင်း ဥစ္စာပစ္စည်း​ရ​နိုင်​သည့်​အစွမ်း​ကို သင့်​အား ပေး​တော်မူ​သော​အရှင်​ဖြစ်​တော်မူ​၏​။” ‭‭တရားဟော ၈း၁၈

ဘယ်အရာက ဘုရားသားသမီးတွေကိုကြွယ်ဝစေတာလဲ? ဣသရေလ လူမျိုးတွေကို ကျွန်ဘဝကနေ ကတိတော်နယ်မြေဆီကို ပို့ဆောင်တဲ့အခါမှာ စထွက်ကတည်းကလဲ အဲဂုတ္တုလူတွေဆီကနေ ရွှေ၊ ငွေပါလျှက် ထုတ်ဆောင်သလို လမ်းမှာလဲ ဘုရားက သဘာဝလွန် ထောက်ပံ့ပေးခဲ့တယ်။ ဘုရားက သူ့လူမျိုးများကို တစ်ခုသတိပေးတယ်။ ကိုယ့်အစွမ်းနဲ့ စည်းစိမ်ရတယ်ဆိုတဲ့ အပြစ်ကိုသတိနဲ့ရှောင်ဖို့။ လူ့ရဲ့အစွမ်းနဲ့ ဘုရားပေးတဲ့ကြွယ်ဝခြင်းကို ဘယ်လိုမှမရနိုင်ဘူး။ ဘုရားပေးတဲ့အစွမ်းကြောင့်သာလျှင် စစ်မှန်တဲ့ကြွယ်ဝခြင်းကို ရရှိခံစားနိုင်တယ်။

မတ်လ ၄ ရက်နေ့

ကြွယ်ဝခြင်း

“​မိမိ​အစေအပါး​၏​ကောင်းစား​ခြင်း​ကို နှစ်သက်​တော်မူ​သော​ထာဝရဘုရား​သည် ကြီးမြတ်​တော်မူ​၏​”​ဟု သူ​တို့​သည် အစဉ်မပြတ်​မြွက်ဆို​ကြ​ပါစေသော​။” ဆာလံ ၃၅:၂၇

ဘုရားနှစ်သက်တဲ့အရာက ဘာလဲ? သူ့သားသမီးတွေဆင်းရဲ မွဲတေပြီးတော့ ခက်ခဲတာကိုလား? ဒါမှ မဟုတ် ကြွယ်ဝပြည့်စုံပြီးကောင်းစားတာကိုလား? နှုတ်ကပတ်တော် ကရှင်းလင်းစွာ ဖေါ်ပြတာကတော့ ဘုရားက သူ့သားသမီးတွေကို ကောင်းစားတာ၊ ပြီးပြည့်စုံတဲ့ ဘဝအသက်တာမှာ ကျင်လည်တာကိုသဘောကျတယ်။ မိဘတွေတောင် ကိုယ့်သားသမီးတွေကို ကောင်းစားတာကိုမြင်ချင်တာမဟုတ်လား။ ကောင်းကင်ဘုံအဖက ပိုပြီးတောင် မြင်ချင်ပါသေးတယ်။ မုန့်ကိုတောင်းရင် ကျောက်ခဲကို ပေးမယ့်သူ၊ ငါးကိုတောင်းရင် တောင်မြွေကိုပေးမယ့် မိဘမရှိသလိုပဲ။ ဘုရားက သူ့သားသမီးတွေအတွက် ကောင်းစားပြီးတော့ ပြီးပြည့်စုံတဲ့ဘဝကို ခံစား ကျေနပ်အားရတယ်။

မတ်လ ၃ ရက်နေ့

သန့်ရှင်းသောဝိညာဉ်တော် (၇)

“ကောင်းကင်တမန်​က​လည်း သန့်ရှင်း​သော​ဝိညာဉ်​တော်​သည် သင့်​အပေါ်​သက်ရောက်​တော်မူ​၍ အမြင့်ဆုံး​သော​ဘုရား​၏​တန်ခိုး​တော်​သည် သင့်​ကို​လွှမ်းမိုး​လိမ့်မည်။ ‭‭လုကာ ၁း၃၅ ‬‬

သင့်ဘဝကို ဘာတွေ ကလွှမ်းမိုး ထားသလဲ? လောကကြီးက လွှမ်းမိုးထားတယ်ဆိုရင် လောကရဲ့ ဝိညာဉ်ဆိုးက သင့်ကိုလွှမ်းမိုး ထားလိမ့်မယ်။ သန့်ရှင်းသောဝိညာဉ်တော် သက်ရောက်တဲ့အခါမှာတော့ ဘုရားတန်ခိုးတော်ရဲ့လွှမ်းမိုးခံရမယ်။ ဘုရားရဲ့ တန်ခိုးတော် လွှမ်းမိုး ခြင်း ခံရတဲ့အခါမှာ ဘဝမှာ မဖြစ်နိုင်တာတွေ၊မဖြစ်ဘူးတာတွေအားလုံးက ဖြစ်လာတယ် မာရိဘဝမှာ ဘုရားအလို‌တော် ပြည့်စုံဖို့အတွက် သန့်ရှင်းသောဝိညာဉ်တော် ရဲ့သက်ရောက်မှုက လုပ်ဆောင်ပေးတယ်။ သန့်ရှင်းသော ဝိညာဉ်တော် ရဲ့ သက်ရောက်မှုမပါပဲ၊ လောကရဲ့လွှမ်းမိုးမှုကနေ လွတ်ဖို့မလွယ်ဘူး။

မတ်လ ၁ ရက်နေ့

သန့်ရှင်းသောဝိညာဉ်တော် (၆)

“သို့သော် ငါ့​နာမ​၌ ခမည်းတော်​စေလွှတ်​တော်မူ​မည့် ကူညီ​မစ​သူ​တည်းဟူသော သန့်ရှင်း​သော​ဝိညာဉ်​တော်​သည် အရာ​ခပ်သိမ်း​တို့​ကို သင်​တို့​အား​သွန်သင်​တော်မူ​၍ ငါ​ပြောဆို​ခဲ့​သမျှ​သော​အရာ​တို့​ကို သင်​တို့​အား ပြန်လည်​သတိရ​စေ​တော်မူ​လိမ့်မည်။” ယောဟန် ၁၄:၂၆

ဝိညာဉ်ရေးရာ နှင့်ပတ်သက်ပြီး ဘုရားဖွင့်ပြတဲ့အရာတွေ၊ ဝိညာဉ်ခေါင်းဆောင်တွေ သွန်သင်ပေးတဲ့အရာတွေကို တစ်ခါတစ်လေ မေ့လျော့သွားတတ်တယ်။ နှစ်ပေါင်းများစွာ ခံယူလာတဲ့အရာတွေက ဘာမှအရာမထင်တော့ဘူးလားလို့ တောင် ထင်မိတယ်။ တကယ်တော့ လူ့ရဲ့ မှတ်မိနိုင်စွမ်းနဲ့တော့ ဝိညာဉ်ရေးရာ ကောင်းတဲ့အရာတွေကို မှတ်ထားနိုင်ဖို့တော့မလွယ်ဘူး။ ဒါပေမယ့် သန့်ရှင်းသောဝိညာဉ်တော်ရောက်လာတဲ့အခါမှာတော့ မေ့လျော့နေတဲ့ အရာမှန်သမျှကို ပြန်လည် မှတ်မိသတိရစေဖို့ ကူညီပေးတယ်။ လိုအပ်တဲ့အချိန် လိုအပ်တဲ့ဖွင့်ပြချက်တွေ၊ သင်ယူထားတဲ့ အရာတွေကို ပြန်လည် သတိရစေဖို့ သန့်ရှင်းသောဝိညာဉ်တော်က ကူညီမစပါလိမ့်မယ်။

ဖေဖေါ်ဝါရီလ ၂၈ ရက်နေ့

သန့်ရှင်းသောဝိညာဉ်တော် (၅)

“စိတ်​နှ​လုံး​ကို စစ်​တော်​မူ​သော​သူ​သည်​လည်း ဝိ​ညာဉ်​တော်၏ စိတ်​သ​ဘော​ကို သိ​တော်​မူ၏။ အ​ကြောင်း​မူ​ကား ဝိ​ညာဉ်​တော်​သည် သန့်​ရှင်း​သူ​တို့၏ ဆု​တောင်း​ခြင်း​အ​မှု​ကို ဘု​ရား​သ​ခင်၏​အ​လို​တော်​နှင့်​အ​ညီ စောင့်​မ​တော်​မူ၏။” ရောမ‬ ‭၈:၂၇

ဆုတောင်းခြင်း တိုင်းက ဘုရားအလိုတော် နှင့်အညီ ဖြစ်တာတော့မဟုတ်ဘူး။ တချို့ဆုတောင်းပေမယ့် ဘာသာရေးဆန်တဲ့ ဆုတောင်းခြင်းတွေ အများကြီးရှိတယ်။ ဖါရိရှဲတွေလဲ ဆုတောင်းတာပဲ။ ဒါပေမယ့် ဘာသက်ရောက်မှုမှမရှိသလို၊ ပြောင်းလဲမှုလဲ မရှိဘူး။ အထူးသဖြင့် ဘုရားအလိုတော်နှင့် အညီ ဖြစ်ဖို့ကတော့ဝေးတယ်။ ဘုရားအလိုတော် အညီ ဖြစ်ဖို့က သန့်ရှင်းသောဝိညာဉ်တော် ကူညီမစခြင်း အထူးလိုအပ်တယ်။ ဘုရားစိတ်တော်နှင့် ထိတွေ့ဖို့အတွက် သန့်ရှင်းသောဝိညာဉ်တော်မပါပဲ ဘယ်လိုမှ ဘယ်တော့မှ မဖြစ်နိုင်ဘူး။

ဖေဖေါ်ဝါရီလ ၂၇ ရက်နေ့

သန့်ရှင်းသောဝိညာဉ်တော် (၄)

“ထို​မှ​တစ်​ပါး၊ ငါ​တို့ မ​တတ်​နိုင်​သော​အ​ရာ​မှာ ဝိ​ညာဉ်​တော်​သည် မ​စ​တော်​မူ၏။ ရောမ‬ ‭၈:၂၆

ကိုယ်မတတ်နိုင်တာတွေကိုကြည့်ပြီးတော့ အားငယ်ဖို့၊ စိတ်ပျက်ဖို့ မဟုတ်ပါဘူး။ ကိုယ့်ရဲ့ မတတ်နိုင်ခြင်း၊ အားနည်းခြင်းတွေကို ကူညီမစမယ့် အနီးဆုံးမိတ်ဆွေ ရှိတယ်။ သူက မတတ်နိုင်တဲ့ အရာအားလုံးကို အနီးကပ်နေပြီးတော့ ကူညီမစဖို့ ဘုရားက စေလွှတ်ပေးခဲ့တာပါ။ သန့်ရှင်းသောဝိညာဉ်တော်ကိုလက်မခံတာ၊ လက်ခံရဲ့သားနဲ့ သူ့ရဲ့လုပ်ဆောင်ပေးမှုကို အသိအမှတ် မပြုတာလောက် ဆုံးရှုံးတာ တခြားမရှိတော့ဘူး။ နေ့စဉ် သူ့ကို အသိအမှတ်ပြုပါ၊ စကားပြောပါ။ လိုအပ်တဲ့အရာတိုင်းအတွက် သူ့ဆီမှာ နည်းခံပါ။ ဘဝမှာ မတတ်နိုင်ဘူးဆိုတဲ့အရာတွေ လျော့နည်းပျောက်ကွယ်သွားပါလိမ့်မယ်။

ဖေဖေါ်ဝါရီလ ၂၆ ရက်နေ့

သန့်ရှင်းသောဝိညာဉ်တော် (၃)

ရန်​သူ​သည် ရေ​လွှမ်း​မိုး​သ​ကဲ့​သို့​ဝင်​သော​အ​ခါ၊ ထာ​ဝ​ရ​ဘု​ရား၏​ဝိ​ညာဉ်​တော်​သည် ဆီး​တား​တော်​မူ​မည်။” ‭‭ဟေရှာယ‬ ‭၅၉:၁၉

ရန်သူတွေကြောင့် စိုးရိမ်နေတဲ့ဘဝထဲကနေ လွတ်မြောက်စေတာက သန့်ရှင်းသောဝိညာဉ်တော်ဖြစ်တယ်။ သန့်ရှင်းသောဝိညာဉ်တော်ကို သိကျွမ်းလေ စိုးရိမ်စိတ်လျော့နည်းလေပဲ။ စိုးရိမ်စိတ်က ဘဝရဲ့ကောင်းတဲ့အရာတွေကို ယူသွားတယ်။ ဘုရားက သန့်ရှင်းသောဝိညာဉ်တော်နှင့်လျောက်လှမ်းတဲ့အခါမှာ ရန်သူရဲ့ တိုက်ခိုက်မှုမှန်သမျှကို ကြောက်စရာမလိုပဲ ရှင်သန်နိုင်စေတယ်။ ရန်သူရဲ့ အားကြီးစွာတိုက်ခိုက်မှုတိုင်းကို သန့်ရှင်းသောဝိညာဉ်တော်က လျှင်မြန်စွာ တု့န်ပြန်ဆီးတားတယ်ဆိုတာ ယုံပါ။ ဘယ်လောက်ပဲ အားကြီးတဲ့ရန်သူဖြစ်ပါစေ သန့်ရှင်းသောဝိညာဉ်တော်ရဲ့ တန်ခိုးတော်ကိုတော့ မကျော်လွန်နိုင်ပါ။ ဝိညာဉ်တော်ထဲမှာ နေ့စဉ် စိတ်ချမှုရှိစွာနဲ့ ရှင်သန်ပါ။

ဖေဖေါ်ဝါရီလ ၂၅ ရက်နေ့

သန့်ရှင်းသောဝိညာဉ်တော် (၂)

“ထို​သူ​သည် ထာ​ဝ​ရ​ဘု​ရား​ကို​ကြောက်​ရွံ့​ခြင်း၌ မွေ့​လျော်​သည်​ဖြစ်၍၊ မိ​မိ​မျက်​စိ​မြင်​သည်​အ​တိုင်း တ​ရား​မ​စီ​ရင်၊ မိ​မိ​နား​ကြား​သည်​အ​တိုင်း မ​ဆုံး​ဖြတ်​ဘဲ၊” ဟေရှာယ‬ ၁၁:၃

သန့်ရှင်းသောဝိညာဉ်ထံမှ သက်ရောက်တဲ့ ကောင်းတဲ့အရာတွေထဲက တစ်ခုက ဘုရားကို ကြောက်ရွံ့ခြင်းမှာ မွေ့လျော်တာပါ။ ဘုရားကို ကြောက်ရွံ့ခြင်း က သူ့ဟာသူ အလိုလို ပေါ်လာတဲ့အရာတစ်ခုမဟုတ်ဘူး။ သန့်ရှင်းသောဝိညာဉ်တော်ပေးမှသာ ဒီစိတ်သဘောက အသက်တာမှာ သက်ရောက်နိုင်တယ်။ လူပေါင်းများစွာက ဘုရားကို ချစ်ပေမယ့် ကြောက်ဖို့မေ့နေကြတယ်။ ဒါကြောင့်လဲ အသက်တာမှာ နေချင်သလို နေကြတာ။ ဘုရားကိုကြောက်ရွံ့ပြီးတော့ အသက်ရှင်တဲ့သူဟာ မှန်တဲ့သန့်ရှင်းသောဝိညာဉ်ထံက စိတ်သဘော နှင့်ပြည့်စုံတဲ့ သူဖြစ်တယ်။

ဖေဖေါ်ဝါရီ ၂၄ ရက်နေ့

သန့်ရှင်းသောဝိညာဉ်တော်

“ထာ​ဝ​ရ​ဘု​ရား၏ ဝိ​ညာဉ်​တော်​တည်း​ဟူ​သော ဉာဏ်​ပ​ညာ​ကို ပေး​သော​ဝိ​ညာဉ်၊ ကြံ​စည်​တတ်​စွမ်း​နိုင်​သော​သ​တ္တိ​ကို ပေး​သော​ဝိ​ညာဉ်၊ ထာ​ဝ​ရ​ဘု​ရား​ကို​သိ၍ ကြောက်​ရွံ့​သော​သ​ဘော​ကို​ပေး​သော ဝိ​ညာဉ်​တော်​သည် ထို​သူ​အ​ပေါ်​မှာ ကျိန်း​ဝပ်​တော်​မူ​လိမ့်​မည်။” ဟေရှာယ‬ ‭၁၁:၂

ကောင်းတဲ့အကြံတွေ လူတိုင်းကိုယ်စီမှာ ရှိကြပေမယ့် မရှိနိုင်တာက အဲ့ဒီ ကြံစည်ထားတဲ့အရာတွေကို အကောင်အထည်ဖေါ်ဖို့အတွက် တတ်စွမ်းနိုင်တဲ့ တန်ခိုးပါ။ ဒါကြောင့်လဲ စိတ်ကူးအိမ်မက်တွေကလေထဲမှာပဲ ပျောက်ကွယ်သွားရပြီးတော့ ဘယ်တော့မှ အကောင်အထည် မဖြစ်လာခဲ့ ကြဘူး။ လူတချို့က နှစ်ပေါင်းများစွာ စိတ်ကူးအကြံအစည်တွေရှိပေမယ့်အကောင်အထည်မဖေါ်နိုင်ပဲ သူများ အကောင်အထည်ဖေါ်သွားတာကိုပဲ ငေးကြည့်နေရတယ်။ စိတ်ကူးကောင်းရှိရုံနဲ့မအောင်မြင်နိုင်ဘူး။ အဲ့ဒီစိတ်ကူးတွေကို အကောင်အထည်ဖေါ်နိုင်ဖို့အတွက် သန့်ရှင်းသောဝိညာဉ်တော်ပေးတဲ့ အစွမ်း လိုတယ်။ သန့်ရှင်းသောဝိညာဉ်တော် ကူညီမစတဲ့အခါမှပဲ အကြံအစည်တွေကို အကောင်အထည်ဖေါ်နိုင်တဲ့ ကြံစည် တတ်စွမ်းနိုင်ခြင်းသတ္တိ သင့်ဘဝထဲ ရောက်လာပြီး ကောင်းတဲ့စိတ်ကူးတွေဟာ မျက်မြင်အကောင်အထည်အဖြစ် ပုံပေါ်လာပါလိမ့်မယ်။​

ဖေဖေါ်ဝါရီလ ၂၂ ရက်နေ့

ကြီးထွားပါ (၆)

ယုံကြည်သူတစ်ယောက်အသက်တာမှာ ဝိညာဉ်၊စိတ် ၊ခန္ဓာ သုံးခုစလုံးကြီးထွားဖို့လိုတယ်။တချို့က ကိုယ်ခန္ဓာကြီးထွားပေမဲ့ စိတ်ပိုင်းနှင့် ဝိညာဉ်ပိုင်းမှာ ကြီးထွားဖို့ နောက်ကျနေတတ်တယ်။ စိတ်နှလုံး ကောင်းစားခြင်း (ကြီးထွား) ရှိတဲ့အခါမှာ အရာရာမှာ ကောင်းစားလာမယ်လို့ နုတ်ကပတ်တော်က ဆိုတယ် မဟုတ်လား။ အတွင်း ဝိညာဉ် ကြီးထွားခြင်း မရှိပဲ အပြင်ပိုင်းပဲ ကြီးထွားတဲ့အခါမှာ အသက်တာမှာ အရာရာ ကောင်းစားခြင်း ကိုမမြင်တွေ့ရတတ်ပေ။ အရာရာမှာ ကောင်းစားခြင်းနှင့် ကျန်းမာခြင်းကို မြင်တွေ့ခြင်ရင် စိတ်နှင့်ဝိညာဉ်ပိုင်းဆိုင်ရာကိုကြီးထွားဖို့အတွက် ဂရုစိုက်ဖို့အထူးလိုတယ်။ ဝိညာဉ်ပိုင်းဆိုင်ရာ ကြီးထွားဖို့ကိုဂရုစိုက်ရင် ကျန်တဲ့ နယ်ပယ်မှာ ကြီးပွားလာ တာကိုမြင်တွေ့ရလိမ့်မယ်။

ဖေဖေါ်ဝါရီလ ၂၁ ရက်နေ့

ကြီးထွားပါ (၅)

“ဖြောင့်​မတ်​သော​သူ​သည် စွန်​ပ​လွံ​ပင်​ကဲ့​သို့​ပွင့်​လန်း၍ လေ​ဗ​နုန်​တောင်​ပေါ်​မှာ အာ​ရဇ်​ပင်​ကဲ့​သို့ ကြီး​ပွား​လိမ့်​မည်။” ဆာလံ ၉၂’၁၂

ဖြောင့်မတ်သူဆိုတာ ထင်ရှားတဲ့ အမှတ်သားနဲ့ပြည့်နှက်နေတဲ့သူပါ။ အထူးထင်ရှာတဲ့အရာက လူတွေ အံ့သြစရာ ကောင်းလောက်အောင် မြင်သာတဲ့ ကြီးထွားခြင်းဖြစ်တယ်။ နှုတ်ကပတ်တော်က ပြောတယ် ဖြောင့်မတ်သူဟာ စွန်ပလွံပင်ကဲ့သို့ ပွင့်ပြီး အာရဇ်ပင်ကဲ့သို့ ကြီးပွားတယ်။ စွန်ပလွံပင်က အခြားအပင်တွေ မပေါက်နိုင်တဲ့ ကန္တရမှာ ပေါက်တဲ့အပင်ဖြစ်ပြီးတော့ အရိပ်ပဲပေးတာမဟုတ်ဘူး အသီးလဲချိုတယ်၊ အဟာရလဲရှိတယ်။ ပတ်ဝန်းကျင်က ကြီးထွားဖို့ အားမပေးပေမယ့် သူဟာ ပတ်ဝန်းကျင်ကို ဆန့်ကျင်ပြီးတော့ ကြီးထွားနိုင်တယ်။ လေဗနုန်တောင်ပေါ်က အာရဇ်ပင် ကျတော့ ပြင်းထန်တဲ့လေကို အံတုပြီးတော့ လှပစွာနဲ့ ရှင်သန်တယ်။ သူ့ရဲ့ဖြောင့်တန်းပြီးတော့မွှေးကြိုင်တဲ့အနံ့က ပြင်းထန်တဲ့လေကို ဂရုမစိုက်ပဲ ရှင်သန်တယ်။ လေက သူ့ကို မဖျက်ဆီးပစ်နိုင်ပဲ သူ့ရဲ့မွှေးရနံ့ကိုပဲ တစ်တောလုံးကို ဆောင်သွားရတယ်။

ဖေဖေါ်ဝါရီလ ၂၀ ရက်နေ့

ကြီးထွားပါ (၄)

“ထို​ကြောင့်၊ သင်​တို့​သည် သ​ခင်​ဘု​ရား၏ ကျေး​ဇူး​တော်​ကို မြည်း​စမ်း​ကြ​သည်​ဖြစ်၍၊ အ​မျိုး​မျိုး​သော မ​နာ​လို​ခြင်း၊ လှည့်​ဖြား​ခြင်း၊ လျှို့​ဝှက်​ခြင်း၊ ငြူ​စူ​ခြင်း၊ ကဲ့​ရဲ့​ခြင်း​ရှိ​သ​မျှ​ကို ပယ်​ရှား၍၊ ကယ်​တင်​ခြင်း​အ​လို​ငှာ နှုတ်​က​ပတ်​တ​ရား၏ နို့​စစ်​အား​ဖြင့် ကြီး​ပွား​မည်​အ​ကြောင်း၊ ဖွား​စ​သော​သူ​ငယ်​ကဲ့​သို့၊ ထို​တ​ရား​နို့​ကို အ​လွန် လို​ချင်​သော စိတ်​ရှိ​ကြ​လော့။-” ၁ပေ ၂:၁-၃

နှုတ်ကပတ်တော်ဟာ ဝိညာဉ်ရေးရာကြီးထွားဖို့အတွက် အရေးကြီးတဲ့ လိုအပ်ချက်် တစ်ခုဖြစ်တယ်။ လူတချို့ နှုတ်ကပတ်တော်ကိုလဲ ခံယူ တယ်ပြောပေမဲ့ ဘာလို့များ မကြီးထွားတာလဲလို့ မေးခွန်းထုတ်ကြတယ်။ နှုတ်ကပတ်တော် ခံယူနေရင်းနဲ့မကြီးထွားတဲ့ အကြောင်းအရင်းကို တမန်တော်ကြီးရှင်ပေတရုက သေချာရှင်းပြတယ်။ နှုတ်ကပတ်တော်ကို ခံယူနေပေမယ့် အတွင်းထဲမှာ ပယ်ရှားသင့်တဲ့ မကြီးထွားစေသောအရာတွေကို နေရာပေးထားမိလို့ဖြစ်တယ်။ မှားယွင်းတဲ့စိတ်နေစိတ်ထားနှင့် မကောင်းမြင် တတ်ခြင်းက ဘယ်လောက်ပဲ နှုတ်ကပတ်တော်ကို ခံယူနေပါစေ အသက်တာကို မကြီးထွားစေပါဘူး။ ကြီးထွားခြင်းကို တကယ် လိုချင်ရင်တော့ ပယ်ရှားသင့်တဲ့ မှားယွင်းတဲ့ ခံစားချက် တွေ၊ခံယူချက်တွေကို ပယ်ရှားဖို့တော့လိုတယ်။

ဖေဖေါ်ဝါရီလ ၁၉ ရက်နေ့

ကြီးထွားပါ(၃)

“ဤသို့ဖြင့် သခင်​ဘုရား​၏​နှုတ်ကပတ်​တရား​သည် တန်ခိုး​အရှိန်အဝါ​ဖြင့်​ကြီးထွား​လျက် ဩဇာလွှမ်း​လေ​၏။” တမန်တော်ဝတ္ထု ၁၉:၂၀

နေ့စဉ်မှန်ကန်စွာ နှုတ်ကပတ်တော်နှင့် အချိန်ယူတဲ့သူတစ်ယောက်အသက်တာမှာ ဘုရားရဲ့တန်းခိုတော်ဟာအရှိန်ကြီးစွာနှင့် နေရာယူလာတယ်။ နှုတ်ကပတ်တော်ကို ခံယူတယ်ပြောပြီး ဘုရားတန်ခိုးတော် ထဲမှာ မကြီးထွားရင်တော့ တစ်စုံတစ်ခုမှားယွင်းနေတာသေချာတယ်။ လူပေါင်းများစွာက နှုတ်ကပတ်တော်ကို ဖတ်ပေမယ့် ဘာသာရေး ခံယူချက်အနေနဲ့ပဲ ဖတ်တာများတယ်။ ဘာသာရေး ရှုထောင်ကနေပဲဖတ်ပြီးတော့ ဘုရားရဲ့တန်ခိုးတော် အသက်တာမှာ မသက်ရောက်ရင်တော့ ပြန်ဆပ်ကပ်ဖို့လိုနေပြီ။ နှုတ်ကပတ်တော်ထဲမှာ ရှင်သန်လေ ဘုရားတန်ခိုးတော်သင့်အထဲမှာ ကြီးထွားနေရာယူလေပဲ။

ဖေဖေါ်ဝါရီလ ၁၈ ရက်နေ့

ကြီးထွားပါ(၂)

“ငါ​သည် စိုက်​ပျိုး​သော​သူ​ဖြစ်၏။ အာ​ပေါ​လု​သည် ရေ​လောင်း​သော​သူ​ဖြစ်၏။ အ​ပင်​ကို​ကြီး​ပွား​စေ​သော​သူ​ကား၊ ဘု​ရား​သ​ခင်​ပေ​တည်း။-”၁ ကော ၃:၆

ကြီးထွားဖို့အတွက် လိုအပ်ချက်တွေများစွာလိုတယ်။ ကြီးထွားတယ်ဆိုတာ လူတွေရဲ့လုပ်ဆောင်မှုတွေလဲ ပါသလို၊ အရေကြီးဆုံးကတော့ ဘုရားသခင်ရဲ့လုပ်ဆောင်ပေးမှုပဲ။ စိုက်ပျိုးတဲ့သူလဲ လိုအပ်သလို ရေလောင်းပေးမယ့်သူလဲ လိုအပ်တယ်။ သူတို့ရဲ့ လုပ်ဆောင်ပေးမှုမပါရင် ကြီးထွားဖို့မလွယ်သလို ဘုရားရဲ့မစခြင်းမပါရင် ပိုတောင်မလွယ်ဘူး။ ဘုရားက လူတစ်ယောက်ကို ကြီးထွားတိုးတက်စေချင်ရင် ကြီးထွားတိုးတက်စေတဲ့သူတွေကို သင့်ဘဝထဲမှာ လွှတ်ပေးလိမ့်မယ်။ အဲ့ဒီလူတွေ သင့်အနားကိုရောက်လာပြီဆိုရင် သေချာတယ် သင်ဟာ ဘုရားရဲ့ကြီးထွားတိုးတက်မှုအစီအစဉ်ထဲမှာ စတင်လည်ပတ်နေပြီ။

ဖေဖေါ်ဝါရီလ ၁၇ ရက်နေ့

ကြီးထွားပါ

“ငါ​တို့​၏​သခင်​နှင့်​ကယ်တင်ရှင်​ဖြစ်​တော်မူ​သော ယေရှု​ခရစ်တော်​၏​ကျေးဇူး​တော်​၌​လည်းကောင်း၊ ကိုယ်တော်​ကို​သိ​သော​ဉာဏ်​၌​လည်းကောင်း ကြီးထွား​ကြ​လော့။ ယခု​မှစ၍ ထာဝရ​နေ့ရက်​ကာလ​တိုင်အောင် ကိုယ်တော်​၌ ဘုန်း​အသရေ​တော်​ရှိ​ပါစေသော။ အာမင်။”

‭‭၂ ပေ ၃း၁၈

ဘုရားသားသမီးဆိုတာ ကျေးဇူးတော်ကိုသိရုံ၊ သဘောပေါက်ရုံ၊ ခံစားရုံပဲမဟုတ်ဘူး။ လူပေါင်းများစွာ ကျေးဇူးတော်ကို သိရှိနားလည်ခံစားပြီး ကျေးဇူးတော်ကြောင့် များစွာသောအရာတွေ ဖြစ်ပျက်ပြောင်းလဲကြပေမယ့်ကျေးဇူးတော်ထဲမှာ ကြီးထွားဖို့တော့ မေ့နေကြတယ်။ ကျေးဇူးတော်ထဲမှာ ကြီးထွားတဲ့သူကတော့ဘယ်သူနဲ့မတူတဲ့ ဘုရားဘုန်းကို အသက်တာမှာ ခံစားရရှိနိုင်တယ်။ ကျေးဇူးတော်ခံစားရုံမဟုတ်ပဲ ကျေးဇူးတော်ထဲမှာ ကြီးထွားတဲ့သူဖြစ်ပါ။ ကြီးစွာသော ဘုရားဘုန်း အသက်တာမှာ လွှမ်းခြုံခြင်းကို ခံစားရလိမ့်မယ်။

ဖေဖေါ်ဝါရီလ ၁၅ ရက်နေ့

ရှိမှာမဟုတ် (၆)

“အို အချင်း​ရန်သူ​၊ ငါ့​ကြောင့် သင်​ဝမ်း​မ​မြောက်​နှင့်​။ ငါ​သည် လဲကျ​သော်လည်း ပြန်ထ​မည်​။ မှောင်မိုက်​၌ နေ​ရ​သော်လည်း ထာဝရဘုရား​သည် ငါ​၏​အလင်း​ဖြစ်​တော်မူ​လိမ့်မည်​။”

‭‭မိက္ခာ ၇:၈

ဘုရားနဲ့နီးကပ်စွာအသက်ရှင်တဲ့သူအတွက် အရှုံးပေးတယ်ဆိုတာ၊ အလျော့ပေးတယ်ဆိုတာ ဘယ်တော့မှ ရှိလာတော့မှာမဟုတ်ဘူး။ အကြိမ်ကြိမ်ဆွဲချလို့လဲကျသွားရင် တောင်မှ ချော်လဲရောထိုင်ဘယ်တော့မှ မလုပ်ဘူး။ လက်လျော့အရှုံးပေးတယ်ဆိုတာ ဘုရားသားသမီးရဲ့အဘိဓာန်မှာ မရှိဘူး။ လဲရင်ပြန်ထမယ် ထူပေးတဲ့ဘုရား က အနားမှာရှိတယ်။ အားနည်းရင်အားပေးမယ့် အားကြီးတဲ့ဘုရားက အနီးနားလေးမှာပဲ။ ဒါကြောင့် ရန်သူတွေ ဝမ်းမြောက်ခွင့်ဆိုတာ ဘုရားသားသမီးတွေပေါ်မှာ ဘယ်တော့မှ​ရှိလာတော့မှာမဟုတ်ဘူး။

ဖေဖေါ်ဝါရီလ ၁၄ ရက်နေ့

ရှိမှာမဟုတ် (၅)

“သင်​၌ နေ​ဝင်​ခြင်း​၊ လ​ကွယ်​ခြင်း ရှိ​တော့​မည်​မ​ဟုတ်​။ အကြောင်းမူကား ထာဝရဘုရား​သည် သင်​၌​ထာဝရ​အလင်း​ဖြစ်​တော်မူ​၍ သင်​ငိုကြွေးမြည်တမ်း​ရ​သော​နေ့ရက်​တို့ အဆုံးသတ်​လေ​ပြီ​။” ဟေရှာယ ၆၀:၂၀

ဝမ်းနည်းခြင်း၊ ကြေကွဲခြင်း၊ ရှုံးနိမ့်ခြင်းဆိုတာ မှောင်မိုက်ခြင်းထဲမှာ အသက်ရှင်တဲ့သူတွေအတွက် နေ့စဉ် ကြုံတွေ့ရတဲ့အရာပါ။ မှောင်မိုက်ထဲမှာ ကောင်းတဲ့အရာမရှိဘူး။ အလင်းရှင် အသက်တာထဲမှာ ရောက်လာတဲ့အခါမှာ မှောင်မိုက်ခြင်းနဲ့ဆိုင်သမျှ ပျောက်ကွယ်သွားတယ်။ အလင်းကတော့ မှောင်မိုက်ခြင်းနဲ့အားလုံးဆန့်ကျင်ဘက်ပဲ။ သင်တကယ်ပဲ အလင်းထဲမှာ ကျင်လည်တဲ့အခါမှာ ဘုရားကသင့်ရဲ့ အနီးဆုံးမှာ အသက်ရှင်တဲ့အခါမှာ မှောင်မိုက်ခြင်းအလုံးစုံရော မှောင်မိုက်ခြင်းနဲ့ဆိုင်တဲ့အရာတွေအားလုံးရော ပျောက် ကွယ်သွားတယ်။ ဘုရားရဲ့အလင်းထဲကျင်လည်နေတဲ့သူအတွက် မှောင်မိုက်ခြင်းရဲ့ အမင်္ဂလာများအားလုံး အသက်တာမှာ ရှိတော့မှာမဟုတ်ဘူး။

ဖေဖေါ်ဝါရီလ ၁၃ ရက်နေ့

ရှိမှာမဟုတ် (၄)

“မ​ကွာ​စေ​သည်​သာ​မ​က၊ ငါ​တို့​ကို ချစ်​တော်​မူ​သော​သူ၏ ကျေး​ဇူး​တော်​ကြောင့်၊ ငါ​တို့​သည် ထို​အ​မှု​ခပ်​သိမ်း​တို့​ကို ခံ​စဉ်​တွင်​ပင် အ​ထူး​သ​ဖြင့် အောင်​မြင်​ကြ၏။-” ရောမ‬ ‭၈:၃၇

ယုံကြည်သူတစ်ယောက်အတွက် အကြီးမားဆုံး ရှုံးနိမ့်ခြင်းက ချစ်တဲ့ ဘုရားနဲ့ ဝေးကွာခြင်းပါပဲ။ စာတန်က နည်းလမ်းပေါင်းစုံနဲ့ လူနဲ့ဘုရားကို ဝေးနိုင်သမျှ ဝေးအောင်လုပ်ဆောင်တယ်။ အခက်အခဲတွေ၊ ပြဿနာတွေ၊ အနာရောဂါတွေကို အသုံးပြုပြီးတော့ ဘုရားအပေါ်မှာ အထင်လွဲအောင် အမြဲတမ်း ကြိုးစားနေတယ်။ ဘုရားရဲ့ကျေးဇူးတော်ကို မှန်ကန်စွာနားလည်တဲ့သူကတော့ ဘယ်လို အခက်အခဲ၊ ဘယ်လိုပြဿနာ ကြုံတွေ့ရပါစေ၊ ဘယ်တော့မှ ဘယ်လိုမှ ဘုရားအပေါ်အထင်မလွဲဘူး။ ဘုရားနဲ့ဝေးမသွားဘူး။ ပိုပြီးတော့ ဘုရားနဲ့နီးကပ် လာသေးတယ်။

ဖေဖေါ်ဝါရီလ ၁၂ ရက်နေ့

ရှိမှာမဟုတ် (၃)

“ထို​သူ​သည် လဲ​သော်​လည်း ဆုံး​ရာ​သို့​မ​ရောက်​ရ။ အ​ကြောင်း​မူ​ကား၊ ထာ​ဝ​ရ​ဘု​ရား​သည် သူ၏​လက်​ကို ကိုင်​မ​တော်​မူ၏။” ‭‭ဆာလံ ၃၇း၂၄‬

မကောင်းတဲ့အရာတွေက ဘဝမှာ အမြဲတမ်းနေရာယူမှာမဟုတ်ဘူး။ မကျန်းမာခြင်း နဲ့ကြုံရင်တောင် တစ်သက်လုံး ရောဂါရဲ့ အောက်မှာ ပြားပြားဝပ် လဲကျသွားမှာမဟုတ်ဘူး။ ဒီလိုပဲ ဆင်းရဲခြင်း၊ အဆင်မပြေခြင်း၊ ခက်ခဲခြင်းတွေအောက်မှာ ဒူးထောက် ခစားပြီးတော့ ဆုံးရှုံးသွားရမယ့်အထဲမှာ ဘုရားသားသမီးမပါဘူး။ တစ်ခါတစ်လေ ကြုံခဲ့ရင်တောင် အမြဲကြုံရမယ်လို့ အတွေးအခေါ်မမှားစေချင်ဘူး။ ဘုရားရဲ့လက်တော်အောက်မှာ ဘယ်အရာကမှ​သင့်ကို ဆွဲချလို့မရဘူး။ ဘုရားရဲ့လက်တော် ဆွဲကိုင်ထားလို့ မကောင်းတဲ့ တခြားအရာတွေရဲ့ ချုပ်ကိုင်ခြင်းကို ဘယ်တော့မှ ခံရမှာမဟုတ်ဘူး။

ဖေဖေါ်ဝါရီလ ၁၁ ရက်နေ့

ရှိမှာမဟုတ် (၂)

“ထို့ကြောင့် ငါ​တို့​သည် ကရုဏာ​တော်​ကို​ခံစား​ရ​လျက် ဤ​အမှု​တော်​ကို​ဆောင်ရွက်​ရ​သည်​ဖြစ်၍ စိတ်ပျက်​အားလျော့​ခြင်း​မ​ရှိ​ကြ​ချေ။” ၂ ကော ၄:၁

လူပဲ စိတ်ပျက်တာတွေ အားနည်းတာတွေရှိမှာပေါ့လို့ လွယ်လွယ်ပြောနေတာတွေ ရပ်တန့်လိုက်ပါ။ တကယ်တော့ လူချင်းတူရင်တူမယ် ခံစားရတဲ့အရာကတော့မတူပါ။ ဘုရားရဲ့ကြီးမားတဲ့ ကရုဏာကျေးဇူးတော်ကို ခံစားရတဲ့သူတစ် ယောက်ဟာ သာမန်လူတစ်ယောက်နဲ့ ဘယ်လိုမှမတူပါ။ အခြားသူတွေ စိတ်ပျက် အားလျော့ပေမယ့် ဘုရားရဲ့ကျေးဇူးကရုဏာတော်ကို ခံစားရတဲ့ သူတွေကတော့ ဘယ်တော့မှ စိတ်ပျက်အားလျော့ခြင်းဆိုတာ ရှိမှာမဟုတ်ပါ။ ဘယ်လို အတားအဆီးတွေအခက်အခဲတွေ ကြုံတွေ့ပါစေ တမန် တော်ကြီးရှင်ပေါလုကတော့ ဘယ်တော့ စိတ်မပျက် အားမလျော့ ဘူးလို့ဆိုတယ်။ အခက်အခဲ မရှိလို့မဟုတ်ပါဘူး။အခက်အခဲထက် အဆပေါင်းများစွာကြီးမားတဲ့ ကရုဏာ ကျေးဇူးတော်ရှိလို့ပါ။

ဖေဝေါ်ဝါရီလ ၁၀ ရက်နေ့

ရှိမှာမဟုတ်

‘Trust ye in the LORD for ever: for in the LORD JEHOVAH is everlasting strength: ‘ Isaiah 26:4

ဘုရားဟာ သင့်ရဲ့ ထာဝရခွန်အား အစွမ်းသတ္တိ ဖြစ်တဲ့အတွက်၊ သင် အားနည်းသွားတယ်ဆိုတာ ရှိလာတော့မှာမဟုတ်ဘူး။ သင့်တစ်ဖက်မှာ ရှိတဲ့သူတွေက ဘယ်တော့များ အားနည်းပျောက်ကွယ်သွားမလဲ? အားနည်းပြီးတော့ လဲကျသွားမလဲ? လို့ အမြဲတမ်းစောင့်မျှော်နေကြပေမဲ့။ ထာဝရအစွမ်းသတ္တိ ခွန်အားဖြစ်စေတဲ့ ဘုရားကို အားကိုးခိုလှုံတတ်တဲ့သူအဖို့တော့ အားနည်းတယ်ဆိုတာ ရှိကိုရှိလာတော့မှာမဟုတ်ပါဘူး။ လွန်ခဲ့တဲ့ ၂၈ မှာ တုန်းက အားအင်အပြည့်နဲ့ အမှုတော်မြတ်ကို စခဲ့တဲ့အခါမှာ လူတွေက ဒပြောတယ် ကောက်ရိုးမီးပါ။ မကြာခင် အားလျော့ပျောက်ကွယ်သွားလိမ့်မယ်တဲ့။ ၂၈ နှစ်ကြာလာတဲ့အခါမှာ ဒီမီးဟာ ကောက်ရိုးမီးမဟုတ်ဘူး တောမီးတစ်ခုထက်ကြီးတဲ့ပမာဏကို ရောက်ရှိလာပြီးတော့ အရင်ထက် အားမနည်းတဲ့အပြင်အဆပေါင်းများစွာ ပိုအားကြီးသွားတယ်ဆိုတာ ကိုယ်တွေ့ပဲ။

ဖေဖေါ်ဝါရီလ ၈ ရက်နေ့

မရှိ (၆)

‘အို ဘုရားရှင်​၊ ဘုရား​များ​ထဲတွင် ကိုယ်တော်​နှင့်တူသော​ဘုရား​မ​ရှိ​ပါ​။ ကိုယ်တော်​ပြု​တော်မူ​သော​အမှု​များ​နှင့်တူသော အမှု​လည်း မ​ရှိ​ပါ​။ ‘ ဆာလံကျမ်း ၈၆း၈

အသက်ရှင်ပြီး လူတွေကိုချစ်တဲ့ ဘုရားနဲ့တူတဲ့ဘုရား ဘယ်ဘုရား ရှိအုံးမလဲ? ကိုးကွယ်ခံချင်တဲ့ ဘုရားတွေပဲ များနေတယ် ကယ်တင်ပေးတဲ့ဘုရားကတော့တစ်ပါးတည်းပဲ။ ပေးကမ်းူဒါန်းဖို့ပဲ တောင်းဆိုပြီးတော့ တဖက်သတ်မေတ္တာနဲ့ ကောင်းချီးပေး လမ်းပြတဲ့ ဘုရားကတော့ ဘုရားတစ်ပါးတည်းပဲရှိတယ်။ အတိတ်မှာလဲ သူပြုပေးခဲ့တဲ့ အမှုတွေဟာ ဘယ်သူမှ တုပလို့မလုပ်နိုင်ခဲ့သလို၊ လုပ်လဲ မလုပ်ခဲ့ကြဘူး။လက်ရှိကာလမှာ သူပြုပေးနေတဲ့ အံ့ဖွယ်အမှုတွေဟာ ယုံတဲ့သူတိုင်း အပေါ်မှာ ပြည့်နှက်နေပြီးတော့ အနာဂတ်မှာလဲ ဘယ်သူမှ မလုပ်ပေးနိုင်တဲ့ အရာတွေကို သူ့သားသမီးတွေပေါ်မှာ ဆက်လက် လုပ်ဆောင်ပေးအုံးမယ်ဆိုတာ သေချာတယ်။

ဖေဖေါ်ဝါရီလ ၇ ရက်နေ့

မရှိ (၅)

“ပု​ရွက်​ဆိတ်​သည် ဆ​ရာ​မ​ရှိ၊ ပဲ့​ပြင်​သော​သူ​မ​ရှိ၊ မင်း​မ​ရှိ​ဘဲ​လျက်၊ နွေ​ကာ​လ​နှင့် စ​ပါး​ရိတ်​ရာ​ကာ​လ၌ မိ​မိ​စား​စ​ရာ​အ​စာ​ကို ရှာ​ဖွေ​သို​ထား​တတ်၏။” သုတ္တံ‬ ‭၆:၇-၈

လူပျင်းတစ်ယောက်ကို ပညာရှိစေဖို့အတွက် ပုရွက်ဆိတ် ထံကိုသွားပြီးတော့ သင်ယူစေတယ်။ ပုရွက်ဆိတ်မှာ မရှိတဲ့ အရာတွေ အများကြီးပဲ ။ သင်ယူစရာ ကောင်းတယ်ဆိုတာ ရှိတဲ့အရာတွေ အများကြီးကနေ လုပ်ဆောင်တာ မဟုတ်ဘူး။ မရှိတဲ့အရာတွေ အများကြီး ရှိပေမဲ့ အနာဂတ်အတွက် အကောင်းဆုံး ပြင်ဆင်တယ်။ မရှိတာတွေကို အကြောင်းပြပြီးတော့ စိတ်ပျက်နေမယ့်အစား အကောင်းဆုံးလုပ်ချင်တဲ့ ဆန္ဒသာရှိမယ်ဆိုရင် လူများစွာအတွက် ကောင်းကြီး ဖြစ်စေတဲ့ အရာဖြစ်လာတယ်ဆိုတာ ပုရွက်ဆိတ်တွေက သက်သေပါပဲ။

ဖေဖေါ်ဝါရီလ ၆ ရက်နေ့

မရှိ (၄)

“ကောင်းကင်ဘုံ​၌ ကိုယ်တော်​မှတစ်ပါး အကျွန်ုပ်​တွင် မည်သူ​ရှိ​သနည်း​။ မြေကြီး​ပေါ်၌​လည်း ကိုယ်တော်​မှတစ်ပါး အခြား​မည်သည့်​အရာ​ကို​မျှ အကျွန်ုပ်​အလို​မ​ရှိ​ပါ​။” ဆာလံကျမ်း ၇၃:၂၅

ကောင်းကင်ဘုံရဲ့ အရှင်သခင် ဘုရားသခင်က သင့်ဘက်မှာရပ်တည်တယ်ဆိုတာ သင်သိပါသလား? တစ်လောကလုံး သင့်ဘက်မှာ မရှိရင်တောင်မှ၊ သင်လိုအပ်တဲ့အရာတွေ သင့်နားမှာ မရှိရင်တောင်မှ အမြင့်ဆုံးသောဘုရား သခင်က သင့်ဘက်မှာ ခိုင်ခံ့စွာရပ်တည်နေတယ်။ ဘာလို့ ဘုရားက သင့်ဘက်မှာရပ်တည်သလဲလို့မေးခွန်းထုတ်

ရင်တော့ မြေကြီးပေါ်မှာ စွဲလန်းစရာ အားကိုးစရာတွေများစွာရှိတဲ့အထဲမှာ ဘုရားကိုပဲ အားကိုးပြီးရပ်တည်တယ်။ ဘုရားကိုပဲလိုအပ်တယ်လို့ ဝန်ခံတယ်။ ဘုရားကလွဲပြီး အခြားမရှိတဲ့သူရဲ့ဘဝအသက်တာမှာ ဘုရားကလဲ သူ့ဘက်မှာ ပြတ်သားစွာရပ်တည်တာ မဆန်းပါဘူး။

ဖေဖေါ်ဝါရီလ ၅ ရက်နေ့

မရှိ (၃)

“ယုံ​မှား​သော​စိတ်​နှင့်​ကင်း၍ ဘု​ရား​သ​ခင်၏ က​တိ​တော်​ကို တွေး​တော​ခြင်း​မ​ရှိ၊ ယုံ​ကြည်​အား​ကြီး​သ​ဖြင့် ဘု​ရား​သ​ခင်​ကို ချီး​မွမ်း၍၊-” ရောမ ၄:၂၀

ဘုရားရဲ့ ကတိတော်ကို ဖြစ်ရော ဖြစ်နိုင်ပါ့မလား ဆိုပြီးတော့ တွေးတောနေပြီဆိုရင်တော့ အဲ့ဒီကတိတော် သင့်အသက်တာမှာ ပြည့်စုံဖို့ဆိုတာ မဖြစ်နိုင်တော့ပါဘူး။ ရှင်ယာကုပ်က သတိပေးတယ် တွေးတောခြင်းရှိတဲ့သူက လေခပ်ပြီးတော့ လှုပ်ရှားတဲ့ လှိုင်းတံပိုးနဲ့တူတယ် ပြုလေသမျှမှာ မတည်ကြည်သောသူ ဖြစ်ပြီးတော့ ဘုရားလက်တော်ကနေ ဘာတစ်ခုမှ မရနိုင်ဘူး။ အာဗြဟံ ဘုရားထံကနေ ကြီးမားတဲ့အရာတွေလက်ခံရရှိခဲ့ခြင်းက ဘုရားကတိတော်အပေါ်မှာ သံသယနဲ့ တွေးခေါ်ခြင်းလုံးဝ မရှိခဲ့ခြင်းကြောင့်ဖြစ်တယ်။ မရှိသင့်တာ ရှိနေပြီဆိုရင် တော့ ရှိသင့်တာတွေ မရှိနိုင်တော့မှာမဟုတ်ဘူး။

ဖေဖေါ်ဝါရီလ ၄ ရက်နေ့

မရှိ (၂)

“ဘု​ရား​သ​ခင် တတ်​နိုင်​တော်​မ​မူ​သော​အ​မှု မ​ရှိ​ဟု ပြော​ဆို​လျှင်၊-”

ရှင်လုကာ ၁း၃၇

ဘုရားကို အကြွင်းမဲ့ယုံတယ်ဆိုတာ ဘုရားမတတ်နိုင်တာ တစ်ခုမှမရှိဘူးဆိုကို စိတ်ချတာပါ။ သူဟာ အရာခပ်သိမ်း လုပ်ပေးနိုင်ရုံသာမက အရာခပ်သိမ်းကို သူ့သားသမီးအတွက် လုပ်ပေးချင်တဲ့သူဆိုတာကို ယုံကြည်စိတ်ချခြင်းပါ။ ဘုရားကို ယုံပေမယ့် ဘုရားအားလုံး လုပ်နိုင်တယ်ဆိုတာကိုတော့ လူအချို့က စိတ်ချမှုမရှိဘူးဖြစ်နေတယ်။ သင့်အခက်အခဲအားလုံးကို သူဖြေရှင်းပေးနိုင်တယ်။သူမတတ်နိုင်တာ၊ မလုပ်ပေးချင်တာ မရှိဘူးဆိုတာကို စိတ်ချတဲ့နေ့ဟာ သင့်ဘဝမှာ ပြဿနာရဲ့ခြိမ်းခြောက်မှုတွေ မရှိတော့တဲ့နေ့ပါပဲ။

ဖေဖေါ်ဝါရီလ ၃ ရက်နေ့

မရှိ

“ထို​ကြောင့် ပ​ထ​ဝီ​မြေ​ကြီး​သည်​ရွေ့​သွား၍ တောင်​များ​တုန်​လှုပ်​လျက် သ​မု​ဒ္ဒ​ရာ​သို့​ကျ​သော်​လည်း၊ ငါ​တို့​သည် ကြောက်​လန့်​ခြင်း​မ​ရှိ။” ဆာလံ ၄၆း၂

ဘုရားသခင်အတူရှိခြင်းကို သဘောပေါက်သွားတဲ့အခါမှာ လောကမှာ ဖြစ်ပျက်နေတဲ့အရာတွေ၊ ကိုယ့်ကိုခြိမ်းခြောက်နေတဲ့ ပြဿနာတွေအပေါ်မှာ ကြောက်လန့်ခြင်းမရှိတော့ပါ။ ကြောက်လန့်ခြင်းဆိုတာ တစ်ယောက်ထဲ အထီးကျန်တဲ့သူတွေမှာ ဖြစ်လေ့ရှိတဲ့ စိတ်ပိုင်းဆိုင်ရာပြဿနာတစ်မျိုး။ ကိုယ်အားကိုးရတဲ့သူ ရှိတဲ့အချိန်မှာ ဒီကြောက်စိတ်က ဘယ်လိုမှ ရှာလို့ကို မရတော့ဘူး။ ကြောက်စရာကောင်းတဲ့အခြေအနေမှာ မကြောက်မလန့်ပဲ ရှင်သန်နိုင်စေတာ ဘုရားအတူပါရှိခြင်းနှင့် ဘုရားရဲ့ တတ်နိုင်ခြင်းကို ယုံကြည်ခြင်းစိတ်ချတဲ့ သူကလွဲပြီး အခြားသူရဲ့အသက်တာမှာ ရှာလို့တွေ့နိုင်မှာမဟုတ်ဘူး။

ဖေဖေါ်ဝါရီလ ၁ ရက်နေ့

ဖြောင့်မတ်သောသူ မှန်လျှင်(၆)

“လိုက်​သော​သူ​မ​ရှိ​သော်​လည်း၊ မ​တ​ရား​သော​သူ​သည် ပြေး​တတ်၏။ ဖြောင့်​မတ်​သော​သူ​မူ​ကား၊ ခြင်္သေ့​ကဲ့​သို့ ရဲ​ရင့်​တတ်၏။” သုတ္တံ‬ ‭၂၈:၁

စိုးရိမ်စိတ်နှင့် အခက်အခဲတွေကို ရင်ဆိုင်ဖို့ထက် ရှောင်လွဲ နေတတ်တဲ့အထဲမှာ ဖြောင့်မတ်သောသူ မပါဘူး။ အခက်အခဲတော့ လူတိုင်းမှာ ရှိပါတယ်။ အဲ့ဒီအခက်အခဲတွေကို ဘယ်လိုရင်ဆိုင်သလဲ ဆိုတာကိုကြည့်ပြီးတော့ သင်ဘယ်သူလဲဆိုတာကို သိနိုင်တယ်။ ဖြောင့်မတ်သူဟာ အခြေအနေတိုင်းမှာ ခြင်္သေ့ကဲ့သို့ရဲရင့်တဲ့သူပါ။ ဖြောင့်မတ်

ခြင်းကို သဘောပေါက်တဲ့သူပဲ အရာရာကို ခြင်္သေ့ကဲ့သို့ ရဲရင့်စွာရင်ဆိုင် နိုင်လိမ့်မယ်။ ဖြောင့်မတ်ခြင်းကို သဘောမပေါက်တဲ့သူက တော့စိုးရိမ်မှုတွေ၊ အားငယ်မှုတွေနဲ့ ပြည့်နေတဲ့သူပဲဖြစ်မယ်။

ဇန်နဝါရီလ ၃၁ ရက်နေ့

ဖြောင့်မတ်သောသူ မှန်လျှင်(၅)

“တစ်​ဖန်​တုံ၊ ဖြောင့်​မတ်​သော​သူ​သည် ယုံ​ကြည်​ခြင်း​အား​ဖြင့် အ​သက်​ရှင်​လိမ့်​မည်။-” ဂလာတိ ၃:၁၁

ဖြောင့်မတ်သူဆိုတာ အခြေအနေပေါ်မှာ ရပ်တည်တဲ့သူမဟုတ်ဘူး။ ခံစားချက်ပေါ်မှာ ပြောဆို လုပ်ဆောင်တဲ့သူမဟုတ်ဘူး။ လူတွေရဲ့ အယူအဆတွေပေါ်မှာ ဘဝကို တည်ဆောက်ထားတဲ့သူမဟုတ်ဘူး။ ဘုရားအပေါ်မှာ ထားတဲ့ ယုံကြည်ခြင်း တစ်ခုထဲနဲ့ ဘဝကို ရှင်သန် ရှေ့ဆက်နေတဲ့သူတွေဖြစ်တယ်။ ဘုရားက ဖြောင့်မတ်သူလို့သတ်မှတ်တာ အခြားအရာတွေကြောင့်မဟုတ်ဘူး။ ယုံကြည်ခြင်း တစ်ခုထဲကြောင့်ပါ။ ဒါကြောင့် အရာရာကို ယုံကြည်ခြင်းနှင့် မရှင်သန်ပဲနဲ့ တော့ ဖြောင့်မတ်သူတစ်ယောက်ဘဝ ဘယ်လိုမှ ရှေ့မဆက်နိုင်ဘူး။

ဇန်နဝါရီလ ၃၀ ရက်နေ့

ဖြောင့်မတ်သောသူ မှန်လျှင်(၄)

“ဖြောင့်​မတ်​သော​သူ​တို့​သည် အော်​ဟစ်​သော​အ​ခါ၊ ထာ​ဝ​ရ​ဘု​ရား​သည် နား​ထောင်၍၊ သူ​တို့​ကို ခပ်​သိမ်း​သော ဆင်း​ရဲ​ထဲ​က ကယ်​လွှတ်​တော်​မူ၏။” ဆာလံ‬ ‭၃၄:၁၇

ငါ့ရဲ့ ဆုတောင်းသံကို ဘုရားနားမထောင်ဘူးလို့ခံစားရရင်၊ သင့်ကို သင် ပြန်စစ်ရမယ်။ ဖြောင့်မတ်သူဆိုတာကို သင်သေချာ သဘောပေါက်ရဲ့လား? တချို့က ကိုယ့်

ဆုတောင်းသံကို ဘုရားနားထောင်မယ်၊ နားမထောင်ဘူးဆိုတာကိုတောင် မသေချာဘူးလို့ခံစားနေကြတယ်။ သင်ဟာ ဖြောင့်မတ်သူဆိုရင် စိတ်ချမှုရှိဖို့လိုတယ် ဘုရားက သင့်အသံကို သေချာပေါက်နား ထောင်မယ်၊ အဖြေပေးမယ်ဆိုတာ၊ ဖြောင့်မတ်သောသူဟာ ခပ်သိမ်းသော ဆင်းရဲခြင်းထဲမှာ ပိတ်လှောင်ခံရမယ့်သူတွေမဟုတ်ဘူး။ ခပ်သိမ်းသော အခက်အခဲပြဿနာတွေကနေ လွတ်ကိုလွတ်မယ့်သူတွေဖြစ်တယ်။

ဇန်နဝါရီလ ၂၉ ရက်နေ့

ဖြောင့်မတ်သောသူ မှန်လျှင်(၃)

“ဖြောင့်မတ်​သော​သူ​သည် ဆင်းရဲဒုက္ခ​ထဲမှ​လွတ်မြောက်​၍ ဆိုးယုတ်​သော​သူ​သည် သူ့​အစား​ဝင်​ရ​၏​။” သုတ္တံကျမ်း ၁၁:၈

ဖြောင့်မတ်သူဟာ ခပ်သိမ်းသော ဒုက္ခထဲက လွတ်မြောက်ဖိုအတွက် အခွင့်အရေးရှိတယ်။ ဘုရားက ဖြောင့်မတ်သူကို ဒုက္ခမခံခိုင်းဘူး။ သူများဒုက္ခကိုအစားထိုးဖိုလဲ တာဝန်မပေးဘူး။ သူများဒုက္ခတွေကို အစားထိုးဝင်ရောက်ခံရတာက ဆိုးယုတ်တဲ့သူတွေပဲ။ ဖြောင့်မတ်သူဟာ အမြဲတမ်း ဆင်းရဲဒုက္ခ မျိုးစုံကနေ နည်းလမ်းပေါင်းစုံအားဖြင့်ဘုရားက နေ့စဉ် ကယ်လွှတ်ပေးနေတယ်။

ဇန်နဝါရီလ ၂၈ ရက်နေ့

ဖြောင့်မတ်သောသူ မှန်လျှင်(၂)

“မ​တ​ရား​သော​သူ​သည်​ချေး​ငှား၍ မ​ဆပ်​ဘဲ​နေ​တတ်၏။ ဖြောင့်​မတ်​သော​သူ​မူ​ကား၊ သ​နား​သော​စိတ်​ရှိ၍ ပေး​တတ်၏။” ‭ဆာလံ‬ ‭၃၇:၂၁

လူတစ်ယောက်ရဲ့ဖြောင့်မတ်ခြင်းက သူ့ရဲ့ငွေကြေးပေါ်ထားတဲ့စိတ်နေသဘောထားပေါ်မှာလဲ အများကြီးသက်ရောက်မှုရှိတယ်။ တချို့က ငွေကြေး ချေးယူပြီး ဘယ်တော့မှ ပြန်မဆပ်တတ်ဘူး။ ကိုယ်ခက်ခဲတဲ့အချိန်မှာ ကူညီပေးတဲ့သူတွေအပေါ်မှာ ကျေးဇူးမသိတဲ့အပြင်၊ ပြန်တောင်းတဲ့အခါမှာ မောက်မာလိုက်သေးတယ်။ ဒါဟာ ဖြောင့်မတ်သောသူတစ်ယောက်ရဲ့ လက္ခဏာ လုံးဝမဟုတ်ဘူး။ တကယ့် ဖြောင့်မတ်သူတစ်ယောက်ဟာ သူများဟာ ချေးပြီး ပြန်ဆပ်ရုံမကပဲ အမြဲတမ်း လိုအပ်တဲ့သူတွေကို ကူညီဆောင်မလေ့ ရှိတဲ့သူပဲ။ ဖြောင့်မတ်သူ တစ်ယောက်လို သနားပြီး ကျေးဇူးပြုတဲ့သူ ဖြစ်ပါ။

ဇန်နဝါရီလ ၂၇ ရက်နေ့

ဖြောင့်မတ်သောသူ မှန်လျှင်

‘ဖြောင့်​မတ်​သော​သူ​သည် ခု​နစ်​ကြိမ်​လဲ​သော်​လည်း ထ​ပြန်​လိမ့်​မည်။ မ​တ​ရား​သော​သူ​မူ​ကား၊ လဲ​သော​အ​ခါ ဆုံး​ရှုံး​လိမ့်​မည်။’ သုတ္တံ ၂၄:၁၆

ချော်လဲ ရောထိုင်လုပ်တဲ့အထဲမှာ ဖြောင့်မတ်သူ တစ်ယောက်မှ မပါဘူး။ ဖြောင့်မတ်သူဆိုတာ တစ်ခါမှမလဲကျဖူးတဲ့သူမဟုတ်ဘူး။ အကြိမ်ကြိမ်လဲကျဖူးပေမယ့် လဲကျတဲ့အကြိမ်တိုင်းကို လဲကျတဲ့နေရာပဲ စိတ်ပျက်ပြီးတော့ ရပ် တန့်သွားတာမျိုးမလုပ်ဘူး။ ရှေ့ဆက်သွားဖို့အတွက် အမြဲတမ်း လဲကျတဲ့နေရာကနေ ပြန်ထတယ်။ လဲကျလို့ပြန်မထပဲ ဆုံးရှုံးသွားတယ်ဆိုရင်တော့ မတရားတဲ့သူစာရင်းထဲမှာသေချာပေါက်ပါသွားလိမ့်မယ်။ ဘယ်လိုအခြေမျိုးကနေမဆို သေချာပေါက် ပြန်ထနိုင်စေတာ ဖြောင့်မတ်သူရဲ့အမှတ်

လက္ခဏာပဲ။

ဇန်နဝါရီလ ၂၅ ရက်နေ့

ဘုရားရဲ့မေတ္တာ (၇)

“ကိုယ်​ဉာဏ်​နှင့်​မ​သိ​နိုင်​သော ခ​ရစ်​တော်၏ မေ​တ္တာ​တော်​ကို သိ​နား​လည်​ခြင်း​ငှာ​လည်း​ကောင်း၊ ဧဖက် ၃း၁၉

လောကကြီးထဲမှာ ကိုယ့်ဉာဏ်နှင့်မမှီနိုင်တဲ့အရာတွေများစွာရှိတယ် အဲ့အထဲမှာ ဘုရားရဲ့ချစ်တဲ့ မေတ္တာလဲပါတယ်။ ဘုရား သူ့သားသမီးတွေအပေါ်မှာ ထားတဲ့မေတ္တာကို လောက သားတွေ မသိနိုင်တာမဆန်းပေမယ့်၊ တစ်ခါတစ်လေ ဘုရားသားသမီးတွေတောင် သိဖို့ နားလည်ဖို့ ခက်ခဲတဲ့အချိန်တွေများကြီးရှိတယ်။ ဘုရားရဲ့နက်ရှိုင်းတဲ့မေတ္တာကို သိနားလည်ဖို့အတွက် သန့်ရှင်းသောဝိညာဉ်တော်ရဲ့အကူအညီမပါပဲ ဘယ်လိုမှ မဖြစ်နိုင်ဘူး။ ဘုရားရဲ့အချစ်ကို နားလည်တဲ့သူပဲ အသက်တာမှာ ကြီးမားတဲ့ပြောင်းလဲမူကြီးတွေကို မြင်တွေ့ခံစားရတယ်။

ဇန်နဝါရီလ ၂၄ ရက်နေ့

ဘုရားရဲ့မေတ္တာ (၆)

“သို့သော် ကရုဏာ​တော်​နှင့်​ကြွယ်ဝ​တော်မူ​သော​ဘုရားသခင်​သည် ငါ​တို့​ကို​ချစ်​တော်မူ​သည့် ကြီးမား​သော​မေတ္တာ​တော်​အားဖြင့်” ဧဖက်ဩဝါဒစာ ၂း၄

ဘုရားရဲ့ကယ်တင်ခြင်းဆိုတာ မဖြစ်လို့ ကယ်တင်တာမဟုတ်ဘူး။ ချစ်လို့ကယ်တင်ခဲ့တာပါ။ ကျေးဇူးတော်ဟာ ဘုရားရဲ့ကြီးမားတဲ့ မဟာမေတ္တာတော်ကနေ မြစ်ဖျားခံတယ်။ ဘုရားက ချစ်ခြင်းမေတ္တာဖြစ်ပြီးတော့ အဲ့ဒီမေတ္တာကြောင့်ပဲ မကောင်းတဲ့အရာရာထဲကနေ ကယ်တင်ခဲ့တယ်။ ဘဝမှာ ကောင်းတဲ့အရာတွေဖြစ်လာတယ်ဆိုတာ ဘုရားမေတ္တာ သက်သက်ကြောင့်ပါပဲ။ ဘုရားပြုပေးတဲ့ အရာတွေက ဘုရားရဲ့မေတ္တာကိုဖေါ်ပြနေသလို၊ ဘုရားမေတ္တာကိုသိလာလေလေ အသက်တာမှာ ကြီးမားတဲ့ပြောင်းလဲမှုကြီးက နေရာယူလေပါပဲ။

ဇန်နဝါရီလ ၂၃ ရက်နေ့

ဘုရားရဲ့မေတ္တာ (၅)

“ထာ​ဝ​ရ​ဘု​ရား​သည် အ​ဝေး​ကထင်​ရှား၍ မိန့်​တော်​မူ​သည်​ကား၊ အ​ကယ်​စင်​စစ် ထာ​ဝ​ရ​မေ​တ္တာ​နှင့် သင့်​ကို​ငါ​ချစ်၏။ ထို​ကြောင့်၊ က​ရု​ဏာ​ကျေး​ဇူး​ကို သင်၌ ကြာ​မြင့်​စွာ​ပြ၏။” ယေရမိ ၃၁:၃

လူ့ရဲ့မေတ္တာကကုန်တတ်တယ်။ အကန့်အသတ်ရှိသလို၊သတ်မှတ်ချက်တွေလဲအပြည့်ပဲ။ သက်တမ်း ကုန်ဆုံးသွားပြီဆိုရင် ဘယ်တော့မှ၊ ဘယ်လိုမှပြန်ဆက်ဖို့မလွယ်တော့ဘူး။ တချိန်တုန်းက ချစ်တယ်ဆိုတဲ့လူတွေ အခုမျက်နှာချင်းတောင် မဆိုင်နိုင်တော့အထိဖြစ်ကုန်တယ်။ ဘုရားရဲ့မေတ္တာကတော့ လူ့မေတ္တာနဲ့တခြားစီပဲ အကန့်အသတ်လဲမရှိသလို၊ကုန်ဆုံးရက်လဲမပါလာဘူး။ အရည်အချင်းသတ်မှတ်ချက်တွေ အပေါ်မှာမမူတည်ပဲ ထာဝရကာလတိုင်အောင် အဆုံးအစမဲ့ချစ်တဲ့ ဘုရားဖြစ်တယ်၊ သင့်ဘက်က ဘယ်လို အားနည်းချက်တွေရှိရှိ သူ့ဘက်က သင့်ကို အချစ်မပြတ်ဘူး။

ဇန်နဝါရီလ ၂၂ ရက်နေ့

ဘုရားရဲ့မေတ္တာ (၄)

‘ခ​ရစ်​တော်၏​ချစ်​ခြင်း​မေ​တ္တာ​နှင့် ငါ​တို့​ကို အ​ဘယ်​သူ​ကွာ​စေ​မည်​နည်း။- ‘ရောမ ၈:၃၅

ရှင်ပေါလု ကြုံခဲ့ရတဲ့ အခက်အခဲတွေက ကြီးလွန်းတယ်လို့ တချို့ကတော့ထင်လိမ့်မယ်။ သူခံရတဲ့ အရာတွေ များစွာ ကဘာကြောင့်များသူ့ကို စိတ်မပျက်စေတာလဲလို့ သင်မေးခွန်းထုတ်ကောင်းထုတ်လိမ့်မယ်။ တကယ်တော့ သူ အမှုတော်မြတ်မှာ ဘယ်လောက် ကြီးမားတဲ့အရာတွေ ကြုံရပေမယ့် စိတ်မပျက်၊ နောက်မဆုတ်ပဲ ခရီးဆက်စေတာက သူ့အပေါ်မှာ ဘုရားချစ်တဲ့ မေတ္တာ ဖြစ်တယ်။ အဲ့ဒီမေတ္တာ ကြောင့် ဘယ်လိုအရာတွေပဲ ကြုံကြုံသူဟာ အကောင်းဆုံးရင်ဆိုင်ပြီးတော့ ဖြတ်သန်းသွားလာနိုင်တာပါ။

ဇန်နဝါရီလ ၂၁ ရက်နေ့

ဘုရားရဲ့မေတ္တာ (၃)

“ငါ​သည် သူ​တို့​ကို ကရုဏာ​ကြိုး​၊ မေတ္တာ​ကြိုး​ဖြင့် ဆွဲခေါ်​ခဲ့​၏​။ သူ​တို့​မေးရိုး​မှ နဖားကြိုး​ကို ဖယ်ရှား​ပေး​ခဲ့​၏​။ ကိုယ်​ကို​ညွှတ်​၍ သူ​တို့​ကို အစာကျွေး​ခဲ့​၏​။” ဟောရှေ ၁၁:၄

ဆွဲအားတွေ​ပြင်းထန်လွန်းတဲ့ လောကကြီးထဲမှာ ဒီနေ့ထိတိုင်အောင် မကောင်းတဲ့ဘက်ကို မပါသွားရတဲ့ အဓိက အကြောင်းအရင်းက အရာရာထက် ပိုကြီးမားတဲ့မေတ္တာ ကြိုးနဲ့ ဘုရားက ဆွဲခေါ်နေလို့ပါ။ နာကျင်စေမယ့် အရာတွေနဲ့မဆွဲဘူး။ နာကျင်စေတဲ့ လောကရဲ့ နဖားကြိုးတွေကိုတောင် ဖယ်ရှားပေးသေးတယ်။ နေ့တိုင်းမှာ လိုအပ်တဲ့ အရာတွေကိုလဲ လိုလေသေးမရှိ ထောက်ပံ့ ပေးသေးတယ်။ ဒီလောက်ကြီးမားတဲ့ မေတ္တာ ဘယ်မှာရှိအုံးမလဲ?

ဇန်နဝါရီလ ၂၀ ရက်နေ့

ဘုရားရဲ့မေတ္တာ (၂)

“ချစ်​ခြင်း​မ​ရှိ​သော​သူ​သည် ဘု​ရား​သ​ခင်​ကို​မ​သိ။ အ​ကြောင်း​မူ​ကား၊ ဘု​ရား​သ​ခင်​သည် ချစ်​ခြင်း​မေ​တ္တာ ဖြစ်​တော်​မူ၏။-”  ၁ယော ၄:၈

ဘုရားကို သိတဲ့သူနဲ့ မသိတဲ့သူ ဘာကွာသလဲ လို့မေးရင် ချစ်ခြင်းမေတ္တာပေါ်မှာပဲ အခြေခံတယ်လို့ဖြေရ လိမ့်မယ်။ တချို့က အချစ်မခံရဘူးဆိုပြီးတစ်ချိန်လုံးငြီးတွားနေတယ်။ တကယ်တော့လူတွေရဲ့ အချစ်မခံရ ရင်တောင် အမြင့်ဆုံးဘုရားရဲ့ ချစ်တာခံစားခွင့်ရနေတာ သတိမထားမိကြလို့ပါ။ အချစ်မခံစားရဘူးဆိုတာက ဘုရားကို နက်ရှိုင်းစွာ မသိဘူးဆိုတဲ့သဘောပါ။ ချစ်ခြင်းမေတ္တာ ဘုရားကိုသိလေ ချစ်ခြင်းမေတ္တာကိုနက်ရှိုင်းစွာ သိမြင်ခံစားလေပါပဲ။

ဇန်နဝါရီလ ၁၈ ရက်နေ့

ဘုရားရဲ့မေတ္တာ

(ယော ၃း၁၆)

လူတွေက ဘုရားရဲ့မေတ္တာကို တိုင်းတာတဲ့အခါမှာ တိုင်းတာတဲ့ပေတံမှားနေလို့ ဘုရားမေတ္တာ အမှန်ကိုမသိကြဘူး။ လက်ရှိဖြစ်ပျက်နေတဲ့အခြေအနေတွေနဲ့ တိုင်းတာရင် ဘယ်တော့မှ ဘုရားမေတ္တာကို သင်မြင်တွေ့ရမှာမဟုတ်ဘူး။ ခံစားချက်တွေနဲ့ တိုင်းတာလို့လဲမရသလို၊ အဆင်ပြေခြင်းမပြေခြင်းစတာတွေနဲ့လဲ ဘုရားရဲ့မေတ္တာကို လုံးဝတိုင်းတာလို့ရမှာမဟုတ်ဘူး။ ဘုရားရဲ့မေတ္တာကို သိနိုင်တဲ့ အရာကတော့ သူ့ရဲ့တပါးတည်းသောသားတော်ကို လူသားတိုင်း အပြစ်လွှတ်ဖို့အတွက် ကားတိုင်ပေါ်မှာ စတေး ခံခြင်းကိုကြည့်ခြင်း အားဖြင့်ထင်ရှားစွာမြင်နိုင်တယ်။

ဇန်နဝါရီလ ၁၇ ရက်နေ့

ပညာရှိသောသူ (၇)

“ထို့ကြောင့် သင်​တို့​သည် မည်သို့​အသက်ရှင်​လျှောက်လှမ်း​သည်​ကို သေချာ​စွာ​ဆင်ခြင်​ကြ​လော့။ ပညာမဲ့​ကဲ့သို့​မ​ဟုတ်​ဘဲ ပညာရှိ​ကဲ့သို့ လျှောက်လှမ်း​၍” ဧဖက်ဩဝါဒစာ‬ ‭၅:၁၅

ပညာရှိတဲ့သူနှင့် ပညာမဲ့တဲ့သူ ဘာကွာလဲလို့မေးရင် ပညာရှိတဲ့သူက ကိုယ့်အသက်တာကို ဖြစ်သလို မရှင်သန်ဘူး။ တစ်ခါတည်းရတဲ့ဒီဘဝကို အကျိုးရှိစွာ အသုံးပြုဖို့အတွက် အမြဲတမ်းသေချာပြင်ဆင်တယ်။ ပြင်ဆင်ခြင်းအတွက် မရှိမဖြစ်ကတော့ ဆင်ခြင်အောက်မေ့ခြင်းဖြစ်တယ်။ သေချာ မဆင်ခြင်ရင် ပြင်ဆင်ခြင်းမှာ အားနည်းပြီးတော့ ဘဝကို ကြုံသလို အသက်ရှင်ဖို့ပဲဖြစ်သွားလိမ့်မယ်။ ပညာမဲ့တဲ့သူကတော့ဘယ်တော့မှ​သူ့ဘဝရဲ့ တန်ဖိုးရှိတဲ့အရာတွေကို သေချာမပြင်ဆင်ပဲအသုံးပြုတယ်။

ဇန်နဝါရီလ ၁၆ ရက်နေ့

ပညာရှိသောသူ (၆)

“ပ​ညာ​ရှိ​တို့​နှင့် ပေါင်း​ဖော်​သော​သူ​သည် ပ​ညာ​ရှိ​တတ်၏။ လူ​မိုက်​တို့​နှင့် ပေါင်း​ဖော်​သော​သူ​မူ​ကား၊ ပျက်​စီး​တတ်၏။” သုတ္တံ ၁၃:၂၀

ဘုရားအသုံးပြုခဲ့တဲ့ဆရာကြီး တစ်ယောက်က အမြဲပြောလေ့ရှိတာက သင်ဘယ်သူလဲဆိုတာ သင်ပေါင်းတဲ့သူကို ကြည့်ပါတဲ့။ ပညာရှိတဲ့သူက လူတိုင်းနဲ့ မပေါင်းသင်းဘူး။ သူ့ဘဝကို တကယ် တိုးတက်ပြောင်းလဲစေမယ့် သူတွေကိုပဲ ရွေးပေါင်းတယ်။ ကိုယ့်ဘဝကို ပျက်ဆီးစေမယ့်သူတွေနဲ့ဘယ်တော့မှ မပေါင်းသင်းဘူး။ ပညာရှိတဲ့သူတွေနဲ့ပေါင်းသင်းခြင်းအားဖြင့် အသက်တာကိုတိုးတက်စေတဲ့ ပညာကို သင့်ဘဝထဲကိုရမယ်။

ဇန်နဝါရီလ ၁၅ ရက်နေ့

ပညာရှိသောသူ (၅)

“အ​ဘယ်​သူ​သည် ပ​ညာ​ရှိ​သော​သူ​ကဲ့​သို့ ဖြစ်​သ​နည်း။ နက်​နဲ​သော​အ​နက်​ကို အ​ဘယ်​သူ​နား​လည်​သ​နည်း။ ပ​ညာ​သည် ပ​ညာ​ရှိ​သော​သူ၏​မျက်​နှာ​ကို ထွန်း​လင်း​စေ​တတ်၏။ ထို​သူ၏​မျက်​နှာ​သည် အ​ထူး​သ​ဖြင့် ရဲ​ရင့်​သော​အ​ဆင်း​ရှိ​တတ်၏။” ဒေသနာ‬ ‭၈:၁

ပညာရှိတဲ့သူရဲ့ ထင်ရှားတဲ့အသက်တာကိုပြပါဆိုရင် ရဲရင့်ခြင်းလို့ဖြေရမယ်။ ကြောက်ရွံ့ခြင်းကတော့ ပညာရှိတဲ့သူအသက်တာမှာ နေရာမရှိဘူး။ ပညာမရှိတဲ့အခါမှာ ဘာမှ မဟုတ်တဲ့အရာတွေကို အကြောင်းမဲ့ စိုးရိမ်ကြောက်ရွံ့နေတတ်တယ်။ ဘုရားနှင့် ဆိုင်သော နက်နဲသောအရာကို နားလည်လေလေ အသက်တာမှာ ရဲရင့်ခြင်းနှင့် ရှင်သန်နိုင်လေလေ ဖြစ်တယ်။

ဇန်နဝါရီလ ၁၄ ရက်နေ့

ပညာရှိတဲ့သူ (၄)

သု ၆း၆-၁၁

ပညာရှိတဲ့သူက အရာရာတိုင်းကနေ သင်ယူနိုင်စွမ်းရှိတယ်။ သင်ပေးတဲ့သူ ရှိမှ မဟုတ်ဘူး။ သင်ယူတတ်တဲ့နှလုံးသားဟာ ပညာရှိတဲ့သူရဲ့အမှတ်တံဆိပ်တစ်ခုပဲ။ လူတစ်ချို့က သေချာသင်ပေးတာတောင် ပညာမယူတတ်ကြဘူး။ သင်ယူတတ်မယ်ဆိုရင် သင့်ပတ်ဝန်းကျင်မှာ သင်ယူစရာတွေနဲ့ပြည့်နှက်နေတယ်ဆိုတာကို သိလာလိမ့်မယ်။ သင်ကြားခံယူတတ်တဲ့သူက လူတွေဆီကနေ တောင်မဟုတ်ဘူး တိရိစ္ဆာန်တွေဆီကတောင် သင်ယူလို့ရတယ်။ လူပျင်းတစ်ယောက်ကို ပညာရှိလာဖို့အတွက် ဘုရားက ကျောင်းကို မသွားခိုင်းဘူး။ ပုရွက်ဆိတ်ထံကိုသွားပြီး‌တော့ သင်ကြား ခံယူမှုကို ပြုဖို့အကြံပေးတယ်။

ဇန်နဝါရီလ ၁၃ ရက်နေ့

ပညာရှိတဲ့သူ (၃)

(သု ၁၅း၂၀)

ဖခင် (၃)မျိုးရှိတယ်။ ပထမ ဖခင်ကတော့ ကောင်းကင်ဘုံဖခင်၊ ဒုတိယကတော့ ဝိညာဉ်ရေးရာမှာ ပြုစုပေးတဲ့ဖခင်နှင့် မွေးဖွားခဲ့တဲ့ဖခင်။ ပညာရှိတဲ့သူဟာ ဖခင်တွေ ဝမ်းမြောက်ခြင်းကို ဖြစ်စေတဲ့သူတွေပါ။ ဖခင်တွေ ဘယ်လောက်အရေးကြီးသလဲ ဆိိုတာကို သဘောပေါက်ပြီးတော့ တန်ဖိုးထား တဲ့သူတွေ။ ဖခင်တွေရဲ့ ဝမ်းမြောက်ခြင်းဟာ ဘဝအသက်တာမှာ ကြီးစွာသော ကောင်းကြီးမင်္ဂလာကို ယူဆောင်လာပေးတယ်ဆိုတာ ပညာရှိတဲ့သူတွေက နားလည်တယ်။ ပညတ်တော် ဆယ်ပါးမှာတောင် ကတိတော်နှင့်ခံစားဖို့ပါ တစ်ပါတည်းရှိတဲ့ပညတ်က မိဘကို ရိုသေစွာပြုခြင်းမဟုတ်လား? ပညာရှိတဲ့သူတွေက အဲ့ဒီ ရှားရှားပါးပါး ပေးထားတဲ့ကတိတော်ကို ခံစားရသူတွေပါ။

ဇန်နဝါရီလ ၁၁ ရက်နေ့

ပညာရှိတဲ့သူ (၂)

“ပ​ညာ​ရှိ​သော​သူ​သည် နား​ထောင်​သ​ဖြင့်၊ ပ​ညာ​အ​တတ် တိုး​ပွား​ရ​လိမ့်​မည်။” သုတ္တံ‬ ‭၁:၅

ပညာနှင့် အသက်ရှင်တဲ့သူရဲ့လက္ခဏာက ဘာလဲလို့မေးရင် အဖြေကတော့ နားထောင်တတ်၊ သင်ယူတတ်ခြင်းပါပဲ။ ဘဝမှာ သင်ယူတတ်တဲ့သူတွေအတွက် သင်ခန်းစာများစွာ သင်ကြားခံယူနိုင်တယ်။ တစ်ချို့သော သင်ခန်းစာတွေက ကျောင်းကနေ သင်ပေးတာ မဟုတ်ပဲ ဘဝကနေ သင်ပေးတာဖြစ်တယ်။ တွေ့ကြုံရသမျှမှာ ပညာရှိတဲ့သူကတော့ ဆုတ်ယုတ်သွားမှာမဟုတ်ပဲ တိုးပွါး တိုးတက်လာတဲ့သူတွေပါ။

ဇန်နဝါရီလ ၁၀ ရက်နေ့

ပညာရှိတဲ့သူ

“အ​ကြင်​သူ​သည် ပ​ညာ​ရှိ၏၊ ထို​သူ​သည် ဤ​အ​မှု​အ​ရာ​တို့​ကို​ဆင်​ခြင်၍၊ ထာ​ဝ​ရ​ဘု​ရား၏ က​ရု​ဏာ​ကျေး​ဇူး​တော်​ကို နား​လည်​လိမ့်​မည်။” ဆာလံ‬ ၁၀၇:၄၃

ကြုံရတဲ့အရာတွေပေါ်မှာ ပညာရှိတဲ့သူတွေက မှန်ကန်စွာ ဆင်ခြင်တတ်ပြီး ထိုအမှုအရာအထဲမှာ ဘုရားရဲ့ကရုဏာ ကျေးဇူးကို နားလည်တယ်။ အခက်အခဲထဲမှာ ဘုရားကို အထင်လွဲတဲ့သူတွေကတော့ ပညာမဲ့တဲ့သူတွေပဲ။ ပညာရှိတဲ့သူတွေက အရာရာမှာ ဘုရားရဲ့ကရုဏာကို မြင်တွေ့ပြီးတော့ ပညာမဲ့တဲ့သူတွေက အရာရာကို အမျက်တော်လို့ပဲသတ်မှတ်တယ်။

ဇန်နဝါရီလ ၉ ရက်နေ့

အမြင့်ဆုံးကို ရောက်စေသောနှလုံးသား (၅)

(၁ပေ ၅း၆)

ကိုယ်ကိုကိုယ်နှိမ့်ချတဲ့အခါမှာ ဘုရားရဲ့ချီးမြှောက်ခြင်းက ဘဝအသက်တာထဲကို ရောက်လာဖို့တံခါးဖွင့်ပေးလိုက်

တယ်။ လူတစ်ယောက်တကယ် နှိမ့်ချလား? မနှိမ့်ချဘူးလား? ဆိုတာ သူ့အသက်တာမှာ ဘုရားရဲ့ချီးမြှောက်ခြင်း လက်တော် ကိုကြည့်ပြီးသိနိုင်တယ်။ တချို့က နှိမ့်ချသလိုလိုနဲ့ အမှန်တကယ် မနှိမ့်ချတဲ့သူတွေရှိတယ်။ တချို့က မာနကြီးတယ် ထင်ရပေမယ့် ဘုရားအမြင်မှာ နှိမ့်ချတဲ့သူတွေရှိတယ်။ လူတွေကို ညာလို့ရပေမယ့် ဘုရားကိုတော့ဘယ်သူကမှ ညာလို့ မရဘူး။ ဘုရားရဲ့လက်တော်က နှိမ့်ချတဲ့ နှလုံးသားပိုင်ရှင်တွေကို အမြဲတမ်းချီးမြှောက်တယ်။

ဇန်နဝါရီလ ၈ ရက်နေ့

အမြင့်ဆုံးကို ရောက်စေသောနှလုံးသား (၄)

(၂ရာ ၉း၁၃)

အမြင့်ဆုံး ရှင်ဘုရင်တွေက သူ့တို့အနားမှာ အကောင်းဆုံး၊ အလှဆုံး အတော်ဆုံးတွေပဲထားတာ အားလုံးအသိပဲမဟုတ်လား? မကောင်းတာ၊ မတော်တာ၊ မလှတာဘယ်သူမှ မထားချင်ကြဘူး။ ဒါဝိဒ်ကတော့သူ့အနားမှာ သူနဲ့အတူ နေ့တိုင်း စားသောက်တဲ့အခါမှာ လူ့အနေနဲ့ ရုပ်ဆိုးအကျည်းတန်တဲ့ မေဖိဗောရှက်ကို ထားပြီးစားသောက်စေတယ်။ အမျိုးတော်တာလဲမဟုတ်ပေမယ့် သူ့ရဲ့ ပဋိညာဉ်အပေါ်မှာ ထားတဲ့ နှလုံးသားကိုမြင်ရတယ်။

ဇန်နဝါရီလ ၇ ရက်နေ့

အမြင့်ဆုံးကို ရောက်စေသောနှလုံးသား (၃)

လူတစ်ယောက်ကို အမြင့်ဆုံး ဆွဲတင်ပေးနိုင်တာ နှလုံးသားဖြစ်သလို အနိမ့်ဆုံးကို ဆွဲချနိုင်တာကလည်း နှလုံးသားပဲဖြစ်တယ်။ အမြင့်ဆုံးရာထူးမှာရှိပေမယ့် နှလုံးသား မမြင့်တဲ့ ရှောလုဟာ အချိန် တစ်ခုရောက် လာတဲ့အခါမှာတော့ နှလုံးသား ရှိတဲ့အတိုင်း နိမ့်ဆင်းသွားသလို၊ အနိမ့်ဆုံး သိုးကျောင်းသားလေး နေရာမှာ နေရပေမယ့် နှလုံးသား ကောင်းစားတဲ့အခါမှာ နှလုံးသားရှိတဲ့အတိုင်း ဘုရားက အမြင့်ဆုံးကိုချီးမြှောက်ခဲ့တယ်။

ဇန်နဝါရီလ ၆ ရက်နေ့

အမြင့်ဆုံးကို ရောက်စေတဲ့နှလုံးသား (၂)

၃ယော၁း၂

အသက်တာတော့ ကောင်းစားချင်တယ် နှလုံးသားတော့ တစ်စက်လေးမှ မကောင်းဘူးဆိုရင် ဘယ်လိုလုပ်မလဲ? နှုတ်ကပတ်တော်က သေချာမှာတယ် အပြင်မှာ ဖြစ်ပျက်သမျှအားလုံးက နှလုံးသားအပေါ်မှာ ရာနှုန်းပြည့်မူတည်တယ်ဆိုတာကို။ လူတွေက နှလုံးသားကိုပဲ ကြည့်တာ အပြင်အရေးမကြီးဘူးလို့ပြောတယ်။ တကယ် နှလုံးသား ကကောင်းစားရင်၊ ဘုရားနှစ်သက်ရင် အပြင်မှာလည်း နှလုံးသားရဲ့ ရောင်ပြန်ဟပ်မှုကိုသေချာပေါက်မြင်ရမယ်ဆိုတာ လူတွေက မသိချင်ယောင်ဆောင်နေကြတယ်။

ဇန်နဝါရီလ ၄ ရက်နေ့

အမြင့်ဆုံးကို ရောက်စေတဲ့နှလုံးသား

မဿဲ ၇း၁၃

လမ်းကတော့ ကျဉ်းတဲ့လမ်း လျှောက်ရမယ်။ ဒါပေမယ့် နှလုံးသားကတော့မကျဉ်းမြောင်းသွားစေနဲ့။ လူတစ်ချို့က ကျယ်တဲ့လမ်းကိုတော့ လျှောက်နေရင်တောင် နှလုံးသားက ကျဉ်းမြောင်းနေကြတယ်။ အမြင့်ဆုံးကိုရောက်စေတဲ့အရာက နှလုံးသားပေါ်မှာ အများကြီးမူတည်တယ်။ သခင်က လမ်းကျဉ်းကို လျှောက်ခိုင်းပေမယ့် နှလုံးသားတော့ မကျဉ်းခိုင်း ပါဘူး။ ကျယ်ဝန်းတဲ့ နှလုံးသားကတော့ ထားဖို့ အမြဲတမ်း မှာတယ်။

ဇန်နဝါရီလ ၃ ရက်နေ့

ဘုရားသခင်နှင့် မကစားနဲ့ (၅)

တမန်တော် ၅း၁-၆

သေးသေးလေးလို့ထင်ပြီး လုပ်လိုက်ပေမယ့် ကြီးမားတဲ့ အရာတွေ ဖြစ်သွားတာတွေအများကြီးရှိတယ်။​ အာနာနိနှင့်ရှဖိရေ လင်မယားက ဘုရားနှင့် ဘုရားလူကို လျော့တွက်ခဲ့မိတယ်။ ဘုရားက ဘယ်သူ့ကိုမှ အတင်းအကြပ် မလုပ်ခိုင်းပါဘူး။ စေတနာနှင့် ကိုယ့်ဆုံးဖြတ်ချက်နှင့်ပဲ လုပ်တာကိုသဘောကျတာပါ။ လှည့်စားခြင်းကိုတော့ ဘုရားကသဘောမကျဘူး။ ဒါကြောင့် ကောင်းတာ လုပ်ပြီးတော့ သူတို့ဘဝမှာ မကောင်းတာ ကြုံခဲ့ရတယ်။ ဘုရားဘိသိက်တဲ့လူတွေ၊ ဘုရားနဲ့ပက်သက်တဲ့အရာတွေကို ဘယ်တော့မှ ပေါ့ပေါ့တန်တန်ထားပြီး မလုပ်မိစေနဲ့ ။ ကြုံလာရမယ့်အရာက တွတ်လို့တောင်မရဘူး။

ဇန်နဝါရီလ ၂ ရက်နေ့

ဘုရားသခင်နှင့် မကစားနဲ့ (၄)

ယောန ၄း၁-၃

ခံစားချက်တွေထက် ဘုရားရဲ့ စကားကို ဉီးစားမပေးနိုင်သရွေ့ ဘယ်တော့မှ စစ်မှန်တဲ့ ငြိမ်သက်ချမ်းသာခြင်းကို ခံစားရမှာမဟုတ်ဘူး။ တချို့ဘုရားနှင့်သွားလာနေရင်းတောင်မှ အသက်တာမှာ ဝမ်းမြောက်ခြင်း၊ ငြိမ်သက်ခြင်းတွေ ပျောက်ဆုံးနေကြတယ်။ ဘုရားနဲ့ အသက်ရှင်လျှောက်လှမ်းတယ်ဆိုတာ ကိုယ့်စိတ်ကူးနဲ့ကိုယ်၊ ကိုယ့်အတွေးနဲ့ကိုယ် သွားလာလို့မရဘူး။ ဘုရားစကားအတိုင်း အတိကျ အသက်ရှင်ဖို့လိုတယ်။ ယောနလိုပေါ့ ဘုရား သွားခိုင်းတာ တစ်ခု သူသွားနေတာ တခြားဖြစ်နေတဲ့အခါမှာ မလိုလားအပ်တဲ့ပြဿနာတွေ အသက်တာမှာ မဖိတ်ခေါ်ပဲရောက်လာတယ်။ ဘုရားနဲ့ ကစားဖို့ ကြိုးစားတဲ့အခါမှာ ရလဒ်က ကောင်းတာထက် မကောင်းတဲ့အရာက ပိုများတယ်။

ဇန်နဝါရီလ ၁ ရက်နေ့

ဘုရားသခင်နှင့် မကစားနဲ့ (၃)

(၁ရာ ၁၅း၂၂-၂၄)

ပိုကောင်းမယ်ထင်ပြီးတော့ လုပ်တာထက် ဘုရားပြောတဲ့အတိုင်းတိတိကျကျ လုပ်တာပိုပြီးတော့ ဘုရားသဘောကျတယ်။ လူတွေက ဘုရားပြောတာတော့လုပ်ချင်ပေမယ့်တိတိကျကျ လုပ်ဖို့ကျတော့ ပျက်ကွက်ပြန်ရော။ကိုယ်လုပ်ချင်သလောက် ကောင်းမယ်ထင်တာ လောက်လေးပဲလုပ်ပြီးတော့ ကိုယ်မလုပ်ချင်တဲ့အပိုင်းတော့ ချန်ထားတတ်ကြတယ်။ ရှောလုလို လူမျိုးတွေပေါ့။ ဘုရားစကားထက် ကိုယ့်အကြံအစည် စိတ်ကူးလေးတွေနဲ့ ကောင်းမယ်ထင်ရာ လုပ်ပြီးတော့ ရှေ့ဆက်ချင်ကြတယ်။ ဘုရားနဲ့ ကစားတာ အဖိုးအခတော့အရမ်းကြီးတယ်။

ဒီဇင်ဘာလ ၃၁ ရက်နေ့

ဘုရားသခင်နှင့် မကစားနဲ့ (၂)

(က ၂၅း၂၉-၃၄)

ဘုရားနဲ့ဆိုင်တဲ့အရာတွေကို တန်ဖိုးမထားတတ်တဲ့သူက တန်ဖိုးအမဲ့ဆုံးလူဖြစ်တယ်။ ဧသောဟာ ခဏတာဆာလောင်မှု ကိုဖြေဖျောက်ဖို့အတွက် ဘုရားပေးထားတဲ့သားဉီးအရာကို ရောင်းခဲ့တယ်။ ဒီအရောင်းအဝယ်အတွက် စာချုပ်မရှိဘူး။အသိသက်သေမရှိဘူးဆိုပေမယ့် ဘုရားရှေ့မှာတော့ တရားဝင်ဖြစ်ခဲ့တယ်။ ဘုရားနဲ့ဆိုင်တဲ့အရာတွေကို ဘယ်တော့မှ ပေါ့ပေါ့တန်တန်မထားနဲ့ ။ သူ့ရဲ့ရူပါရုံ ထက် အစာအိမ်က ပိုအရေးကြီးတဲ့နေရာမှာ ထားမိတဲ့အတွက် ဘုရားပေးတဲ့ရူပါရုံကို လက်လွှတ်ခဲ့ရတယ်။

ဒီဇင်ဘာလ ၃၀ ရက်နေ့

ဘုရားသခင်နှင့် မကစားနဲ့

(က ၃း၈-၁၀)

ရှေ့မှာ တစ်မျိုး ကွယ်ရာတစ်မျိုးအသက်ရှင်တဲ့သူတွေဟာ ဘုရားနဲ့ ကစားဖို့အတွက် ကြိုးစားနေတဲ့သူတွေပဲ။ ဘုရားကို ဘယ်သူမှ လှည့်စားလိုမရဘူး။ ခေတ်အဆက်ဆက်မှာလဲ လူတွေက ကြိုးစားဖူးတယ် ဘယ်သူမှ မအောင်မြင်ကြဘူး။ အဲ့အထဲမှာ ထိပ်ဆုံးကတော့ အာဒံနှင့် ဧဝပါတယ်။ ဘုရားစကားနားမထောင်ရုံတင်မကဘူး ဘုရားထံကနေ ပုန်းကွယ်ဖို့ကြိုးစားတယ်။ ဒါတင်မကဘူး အပြစ်ကို ဝန်မခံပဲ သူများကိုလက်ညိုးထိုးအပြစ်ပုံချတယ်။ဘယ်တစ်ခုကမှ အပြစ်ကနေလွတ်ဖို့ ထွက်ပေါက်မဟုတ်ပဲ အပြစ်တစ်ခုပေါ် တစ်ခုဆင့်လာတာပဲ ပိုသွားတယ်။ လာမယ့်နှစ်သစ်မှာ ပြီးခဲ့တဲ့ကာလတွေနဲ့ မတူျင်ဘူးဆိုရင် အဖြေကတော့ ရှင်းပါတယ် ဘုရားနဲ့ ကစားနေတာ ရပ်ပြီးတော့ မှားခဲ့တဲ့အပြစ်တွေဝန်ခံပြီး၊ မှားခဲ့တာတွေကို ပြင်ဆင်ပြီး ရှင်သန်ဖို့လိုတယ်။

ဒီဇင်ဘာလ ၂၈ ရက်နေ့

စစ်မှန်တဲ့ နှိမ့်ချခြင်း(၆)

‘စိတ်​နှိမ့်​ချ​ခြင်း၊ ထာ​ဝ​ရ​ဘု​ရား​ကို ကြောက်​ရွံ​ခြင်း​ကျေး​ဇူး​ကြောင့် စည်း​စိမ်၊ ဂုဏ်​အ​သ​ရေ၊ အ​သက်​ကို ရ​တတ်၏။ ‘ သုတ္တံ ၂၂း၄

မှားယွင်းတဲ့ ဘာသာရေးအတွေးအခေါ်များစွာထဲကတစ်ခုက ဆင်းရဲခြင်းဟာ နှိမ့်ချခြင်းရဲ့ အသွင်ပုံစံဖြစ်တယ်ဆိုတာပါပဲ။ တကယ်တော့ ဆင်းရဲခြင်းက နှိမ့်ချခြင်းရှိတဲ့သူရဲ့အသက်တာမှာ ဘယ်တော့မှ ဘုရားပေးမတွေ့တဲ့အရာပဲ။ ဘုရားရဲ့ကတိတော်ကဘာလဲ? စိတ်နှိမ့်ချတဲ့သူဟာ စည်းစိမ်၊ ဂုဏ်အသရေနှင့် အသက်ခံစားရမယ်။ နှိမ့်ချခြင်းဟာ ဆင်းရဲခြင်းကို ဖြစ်စေမယ်ဆိုတဲ့ ဘုရားပြောထားတာ ဘယ်နေရာမှာမှ မတွေ့ဘူး။ နှိမ့်ချတယ်လိုပြောပြီး ဘာလိုများ ဆင်းရဲခြင်းထဲကနေ မလွတ်သလဲဆိုရင် အဖြေက ရှင်းပါတယ်။ နှလုံးသားထဲက တကယ့် စစ်မှန်တဲ့နှိမ့်ချခြင်း မဟုတ်လိုပါပဲ။

ဒီဇင်ဘာလ ၂၇ ရက်နေ့

စစ်မှန်တဲ့ နှိမ့်ချခြင်း(၅)

“စိတ်​နှိမ့်​ချ​သော​သူ​တို့​မူ​ကား၊ ပြည်​တော်​ကို​အ​မွေ​ခံ၍၊ များ​ပြား​သော​ငြိမ်​သက်​ခြင်း၌ မွေ့​လျော်​ကြ​လိမ့်​မည်။” ဆာလံ ၃၇:၁၁

လူတစ်ယောက်ရဲ့အတွင်းနှလုံးသား နှိမ့်ချလား? မနှိမ့်ချဘူးလား? ဆိုတာ မမြင်ရပေမယ့်၊ နှိမ့်ချတဲ့ သူခံရတဲ့ ကောင်းကြီးမင်္ဂလာကို ကြည့်ခြင်းအားဖြင့် သူ့ရဲ့နှလုံးသားကို သိန်ိုင်ပါတယ်။ အသီးအားဖြင့် အပင်ရဲ့သဘောကိုသိနိုင်သလိုပါပဲ။ သူ့ရဲ့ ရလဒ်ကိုကြည့်ပြီးတော့ နှလုံးသားကို တွက်ကြည့်လို့ရပါတယ်။ နှိမ့်ချတဲ့သူဟာ အမွေခံရမယ်သူဖြစ်သလို ဘယ်လို အခြေအနေ မျိုးမဆို ငြိမ်သက်ခြင်းနဲ့ပဲ ကျော်လွန်ဖြတ်သန်းနိုင်တဲ့သူလို့ ကျမ်းစာက ဆိုပါတယ်။

ဒီဇင်ဘာလ ၂၆ ရက်နေ့

စစ်မှန်တဲ့ နှိမ့်ချခြင်း(၄)

‘ကိုယ်​ကို​ကိုယ် ချီး​မြှောက်​သော​သူ မည်​သည်​ကား နှိမ့်​ချ​ခြင်း​သိုရောက်​လ​တ္တံ့။ ကိုယ်​ကို​ကိုယ်​နှိမ့်​ချ​သော​သူ မည်​သည်​ကား ချီး​မြှောက်​ခြင်း​သို ရောက်​လ​တ္တံ့​ဟု မိန့်​တော်​မူ၏။ ‘ လုကာ ၁၄း၁၁

စစ်မှန်တဲ့နှိမ့်ချခြင်းရဲ့ နောက်မှာ ဘုရားထံကလာတဲ့ ချီးမြှောက်ခြင်းရှိတယ်။ လူ့အမြင်နဲ့ ဘယ်အရာကိုမှ ဆုံးဖြတ်လို့မရဘူး။ လူတချိုက မာနကြီးတယ်မြင်ပေမယ့် ဘုရားက နှလုံးသားကိုကြည့်တဲ့ဘုရားပါ။ ဘုရားရှေ့မှာ နှိမ့်ချတဲ့နှလုံးသားရှိတဲ့သူက ဘယ်တော့မှ နိမ့်ကျတဲ့ဘဝကို မရောက်ဘူး။ လူတွေက မာနကြီးတယ်လို ယူဆပေမယ့် ဘုရားရှေ့မှာ နှိမ့်ချတဲ့သူတွေဟာ တစ်နှစ်ထက်တစ်နှစ်ပိုပြီး ချီးမြှောက်ခြင်း ခံစားရပြီးတော့ လူတွေရှေ့မှာ နှိမ့်ချတယ်လို့ မြင်နေပြီးတော့ တစ်နှစ်ထက်တစ်နှစ် ပိုပြီး နိမ့်ကျလာတဲံ့တွေ အများကြီးပဲ။ ဒါကြောင့် အထင်နဲ့မဆုံးဖြတ်နဲ့ ဘုရားပေးတဲ့ရလဒ် ရတဲ့အထိ စောင့်ကြည့်ဖို့လိုတယ်။

ဒီဇင်ဘာလ ၂၅ ရက်နေ့

စစ်မှန်တဲ့ နှိမ့်ချခြင်း(၃)

“ထို​ဝိ​ညာဉ်​တော်​သည် သာ၍​များ​သော ကျေး​ဇူး​ကို ပြု​တော်​မူ၏။ ထို​သို့​နှင့်​အ​ညီ ကျမ်း​စာ​လာ​သည်​ကား၊ ထောင်​လွှား​စော်​ကား​သော​သူ​တို့​ကို ဘု​ရား​သ​ခင် ဆီး​တား​တော်​မူ၏။ စိတ်​နှိမ့်​ချ​သော သူ​တို့​အား ကျေး​ဇူး​ပြု​တော်​မူ၏​ဟု လာ​သ​တည်း။” ရှင်ယာကုပ် ၄:၆

သန့်ရှင်းသောဝိညာဉ်တော်ထံမှ ပိုကြီးပြီး ပိုများတဲ့ကျေးဇူးပြုခြင်းကို လိုချင်တယ်ဆိုရင် မရှိမဖြစ်ရှိရမယ့်အရာက နှိမ့်ချခြင်းပါပဲ။ သန့်ရှင်းသောဝိညာဉ်တော်ကို အကြိမ်ပေါင်းများစွာ ရေ နှင့်ခိုင်းနှိုင်းထားတယ်။ ရေက အမြဲတမ်း မြင့်ရာကနေ နိမ့်ရာကိုစီးဆင်းသလိုပါပဲ။ သန့်ရှင်းသောဝိညာဉ်တော်က နှိမ်ချသောသူရဲ့အသက်တာမှာ ပိုပြီးအရှိန်ပြင်းစွာ စီးဆင်းတယ်။

ဒီဇင်ဘာလ ၂၄ ရက်နေ့

စစ်မှန်တဲ့ နှိမ့်ချခြင်း(၂)

သူ​တစ်​ပါး​သည် ကိုယ်​ထက်​သာ၍ ကောင်း​မြတ်​သည်​ဟု နှိမ့်​ချ​သော စိတ်​ရှိ၍ တစ်​ယောက်​ကို​တစ်​ယောက် ထင်​မှတ်​ကြ​လော့။-” ဖိလိပ္ပိ ၂:၃

ကိုယ်က အခြားသူထက် ပိုကောင်းတယ်၊ ပိုသာတယ် လို့မြင်ပြီး အခြားသူတွေကို ဘာမှ မဟုတ်တဲ့ သူတွေလို့မြင်တာဟာ မာနကြီးခြင်းရဲ့ လက္ခဏာတစ်ခုဖြစ်တယ်။ ဘုရားသခင် ရှိစေချင်တဲ့ နှိမ့်ချခြင်းက အခြားသူတွေကို အကောင်းမြင်နိုင်၊အကောင်းပြောနိုင်တာပါ။ တကယ်ကောင်းနေလို့ကောင်းတယ်လိုမြင်တာမဟုတ်ဘူး။ နှိမ့်ချတဲ့နှလုံးသားရှိလို့သာ လူတွေကို အကောင်းမြင်၊ အကောင်းပြောနိုင်တာပါ။ သခင်ခရစ်တော်ဟာ လွန်စွာမြင့်မြတ်တဲ့ ဘုရားဖြစ်ပေမယ့် အင်မတန်နိ့မ်ကျတဲ့ လူတွေအတွက် သူ့ရဲ့တန်ဖိုး ရှိလာတဲ့ အသွေးအသက်နဲ့ ရွေးဝယ်ပြီးတော့ ကယ်တင်ခဲ့ခြင်းဟာ သူ့ရဲ့ နှိမ့်ချတဲ့ နှလုံးသားကြောင့်သာဖြစ်တယ်။

ဒီဇင်ဘာလ ၂၃ ရက်နေ့

စစ်မှန်တဲ့ နှိမ့်ချခြင်း

“ရန်​တွေ့​လို​သော​စိတ်၊ အ​ချည်း​နှီး ကျော်​စော​ကိ​တ္တိ​ကို တပ်​မက်​သော​စိတ်​ရှိ၍ အ​ဘယ်​အ​မှု​ကိုမျှ မ​ပြု​ကြ​နှင့်။ သူ​တစ်​ပါး​သည် ကိုယ်​ထက်​သာ၍ ကောင်း​မြတ်​သည်​ဟု နှိမ့်​ချ​သော စိတ်​ရှိ၍ တစ်​ယောက်​ကို​တစ်​ယောက် ထင်​မှတ်​ကြ​လော့။-” ဖိလိပ္ပိ ၂:၃

တစ်ခါတစ်လေ ကိုယ့်ဟာကိုယ် နှိမ့်ချတယ်လိုထင်နေတတ်တဲ့ မာနကြီးကို လူတွေက သတိမထားမိဘူး။ နှိမ့်ချခြင်းဆိုတာ ကိုယ်ကြိုက်သလို အနက်ဖွင့်ဆိုလိုမရဘူး။ နှုတ်ကပတ်တော်နှင့်ညီတဲ့နှိမ့်ချခြင်းဆိုတာ ရန်တွေ့လိုတဲ့စိတ် ၊ တပ်မက်တဲ့စိတ်တွေရှိသရွေ့ဘယ်တော့မှ အသက်တာမှာ မြင်တွေ့ရမှာမဟုတ်ဘူး။ ရန်တွေ့ချင်တဲ့စိတ်က မာနကြီးခြင်းရဲ့ထင်ရှားတဲ့လက္ခဏာပဲ။ စစ်မှန်တဲ့နှိမ့်ချခြင်းကတော့ ရန်ငြိမ်းခြင်းကို သယ်ဆောင်လာတယ်။

ဒီဇင်ဘာလ ၂၁ ရက်နေ့

ဘုရားသခင်ရဲ့ရွေးကောက်ခြင်း (၅)

“ဘုရားသခင် ရွေးကောက်တော်မူခြင်းနှင့် ယှဉ်သောအကြံတော်သည် အကျင့်အားဖြင့် မတည်၊ ခေါ်တော်မူသောသူ၏ အလိုတော်အားဖြင့် တည်မည်အကြောင်း၊ သားမဖွားမီ၊ ထိုသားတို့သည် ကောင်းသောအကျင့်၊ မကောင်းသောအကျင့်ကို မကျင့်မီ၊-” ရောမ ၉:၁၁

ဘုရားသခင်ရဲ့ ရွေးကောက်ခြင်းက လူ့ရဲ့လုပ်ဆောင်နိုင်မှု၊ တော်ခြင်းတတ်ခြင်း နှင့် လုံးဝပတ်သက်မှု မရှိဘူး။ ဒါကြောင့် ဘုရားရွေးကောက်ခံရတဲ့သူတွေဟာ ခေတ်အဆက်ဆက်မှာ ဝေဖန်တိုက်ခိုက်ခံရလေ့ရှိတယ်။ အရည်အချင်းရှိတဲ့သူတွေ၊ တတ်ကျွမ်းတဲ့သူတွေကို ကျော်ပြီးတော့ လူ့အနေနဲ့ အားနည်းတဲ့သူတွေ မရေရာတဲ့သူတွေကို ဘုရားက ရွေးကောက်ပြီး အသုံးပြုခြင်းကြောင့်ဖြစ်တယ်။ ဘုရားရွေးကောက်ခြင်းကိုသဘောပေါက်ပြီး အသက်ရှင်တတ်ဖို့ လွန်စွာအရေးကြီးတယ်။

ဒီဇင်ဘာလ ၂၀ ရက်နေ့

ဘုရားသခင်ရဲ့ရွေးကောက်ခြင်း (၄)

“ငါ​ရွေး​ကောက်​သော​သူ၏ လှံ​တံ​သည် အ​ပွင့်​ပွင့်​လိမ့်​မည်။ တောလည်ရာ ၁၇:၅

လူရွေးချယ်ထားတဲ့သူ မလုပ်နိုင်တဲ့အရာကို ဘုရား ရွေးကောက်ထားတဲ့သူတွေလုပ်နိုင်တယ်။ လူရွေးချယ်ထားတဲ့သူကို ဖယ်လို့ရပေမယ့် ဘုရားရွေးကောက်ထားတဲ့သူတွေကိုတော့ လူကဖယ်လို့မရဘူး။ ဘုရားရွေးကောက်ထားတဲ့ သူက ဘယ်တော့မှ သာမန်ဘဝနှင့်အသက်မရှင်ဘူး။ သဘာဝလွန်တန်ခိုး နှင့် အမြဲတမ်း ရှင်သန်တယ်။ သူ့ဘဝအသက်တာမှာ ဘုရားပြုတဲ့ နိမိတ်လက္ခဏာတွေနှင့်အမြဲတမ်း ပြည့်နှက်နေတယ်။

ဒီဇင်ဘာလ ၁၉ ရက်နေ့

ဘုရားသခင်ရဲ့ရွေးကောက်ခြင်း (၃)

“ဘု​ရား​သ​ခင်​သည် ပ​ညာ​ရှိ​တို​ကို ရှက်​ကြောက်​စေ​ခြင်း​ငှာ၊ လော​ကီ​အ​ရာ၌ မိုက်​မဲ​သော​သူ​တို​ကို ရွေး​ကောက်​တော်​မူ၏။ အ​စွမ်း​သ​တ္တိ​ရှိ​သော သူ​တို​ကို ရှက်​ကြောက်​စေ​ခြင်း​ငှာ၊ လော​ကီ​အ​ရာ၌ အား​နည်း​သော သူ​တို​ကို ရွေး​ကောက်​တော်​မူ၏။-” ၁ ကော ၁:၂၇

မပြည့်စုံတဲ့သူတွေ အားနည်းတဲ့သူတွေကို ရွေးကောက်ပြီးတော့ ဘုရားအသုံးပြုခြင်းက အားကြီးပါတယ်၊ ပြည့်စုံပါတယ်လို့ ကိုယ့်ဟာကိုယ်ထင်နေတဲ့သူတွေ နောင်တရဖိုဖြစ်တယ်။ ဘုရားသခင်ရဲ့ အသုံးပြုခြင်းက ကိုယ့်အရည်အချင်းနဲ့မဆိုင်ပဲ ဘုရားရွေးကောက်ခြင်းနဲ့သာဆိုင်တယ်ဆိုတာ သိထားဖိုလိုတယ်။ ဘုရားရွေးကောက်တဲ့အခါမှာ အရည်အချင်းတွေ၊ နောက်ခံသမိုင်းတွေ မရှိရင်လဲ ကြီးမားစွာဘုန်းထင်ရှားဖို့ဖြစ်နိုင်တယ်။

ဒီဇင်ဘာလ ၁၈ ရက်နေ့

ဘုရားသခင်ရဲ့ရွေးကောက်ခြင်း (၂)

“သင်​တို့​သည် ငါ့​ကို​ရွေး​ကောက်​ကြ​သည်​မ​ဟုတ်။ ငါ​သည် သင်​တို့​ကို ရွေး​ကောက်​သ​ဖြင့်၊ သင်​တို့​သည် သွား၍ တည်​ကြည်​သော​အ​သီး​ကို သီး​မည်​အ​ကြောင်း​နှင့် ငါ့​နာ​မ​ကို​အ​မှီ​ပြု၍ ခ​မည်း​တော်​မှာ​တောင်း​သ​မျှ​တို့​ကို ရ​မည်​အ​ကြောင်း သင်​တို့​ကို ငါ​ခန့်​ထား၏။” ယောဟန် ၁၅:၁၆

ကိုယ်က ဘုရားကို ရွေးချယ် တယ်လို့ထင်ရင်မှားသွားမယ်။?ဘုရားက ရှေးမဆွကတည်းက တစ်ယောက်ချင်းစီ တိုင်းကို ကြီးမားတဲ့အကြံအစည်နှင့် ရွေးချယ်ထားပြီးသားပါ။ ကိုယ်ကလုပ်နိုင်လို့ ရွေးချယ်ခံရတယ်လို့ထင်ရင်လဲ မမှန်သေးဘူး။ ဘုရားရဲ့ ရွေးကောက်ခြင်းကြောင့် ကြီးမားတဲ့အရာတွေကို လုပ်ဆောင်နိုင်ခြင်းသာဖြစ်တယ်။ လုပ်သမျှမှာအောင်မြင်တယ်တာ ဘုရား ရွေးကောက်ခြင်း သက်သက်ကြောင့်ပါ။

ဒီဇင်ဘာလ ၁၇ ရက်နေ့

ဘုရားသခင်ရဲ့ရွေးကောက်ခြင်း

‘ဤ​က​မ္ဘာ​မ​တည်​မ​ရှိ​မီ ငါ​တို့​ကို ခ​ရစ်​တော်၌ ရွေး​ကောက်​တော်​မူ​သည်​နှင့်​အ​ညီ၊ ကောင်း​ကင်​ဘုံ​နှင့် ဆိုင်​သော​အ​ရာ​တို့၌ ခပ်​သိမ်း​သော ဓ​မ္မ​မင်္ဂ​လာ​တို့​ကို ခ​ရစ်​တော်​အား​ဖြင့် ငါ​တို့​အား ပေး​သ​နား​တော်​မူ​သော ငါ​တို့​သ​ခင်​ယေ​ရှု​ခ​ရစ်၏ ခ​မည်း​တော်​ဘု​ရား​သ​ခင်​သည် မင်္ဂ​လာ​ရှိ​တော်​မူ​စေ​သ​တည်း။- ‘ ဧဖက် ၁:၄

ဘုရားသခင်ရဲ့ ရွေးကောက်ခံရခြင်းကို နားမလည် သဘောမပေါက်သေးလျှင် အသက်တာထဲမှာ ဘယ်တော့မှ ထူးထူးခြားခြား တွေဖြစ်လာမှာမဟုတ်ဘူး။ ကိုယ့်ရဲ့လုပ်ဆောင်နိုင်ခြင်းအပေါ်မှာ ဘုရားက ရွေးကောက်ခဲ့တာမဟုတ်ပါ။ သင်ဘာမှ မလုပ်ဆောင်သေးချိန်မှာပင် ရှေးမဆွ အကြံအစည်တော်အားဖြင့် ခရစ်တော်ထဲမှာ ရွေးကောက်ခဲ့ပြီးသားဖြစ်သလို ထိုရွေးကောက်ခြင်းကလည်း ကောင်းကင်ဘုံရဲ့ ဓ​မ္မ​မင်္ဂ​လာ​များကို ခရစ်တော်အားဖြင့် ခံစားဖို့ရန်ဖြစ်တယ်။ ရွေးကောက်ခံထားပြီးကြောင်းမသိလျှင် ကျန်တဲ့အရာတွေအသက်တာမှာ ရှိလာမှာမဟုတ်တော့ပေ။

ဒီဇင်ဘာလ ၁၆ ရက်နေ့

ကျေးဇူးတော် (၆)

“ကိုယ်တော်​၏​ကျေးဇူး​တော်​အားဖြင့် ဇိအုန်​ကို​ကောင်းစား​စေ​တော်မူ​ပါ​။ ဂျေရုဆလင်​မြို့ရိုး​တို့​ကို တည်ဆောက်​တော်မူ​ပါ​။” ဆာလံကျမ်း ၅၁:၁၈

ကယ်တင်တဲ့ကျေးဇူးတော်ကို လက်ခံပေမယ့် ကြွယ်ဝ ကောင်းစားစေတဲ့ကျေးဇူးတော်ကိုလက်မခံပဲ ငြင်းပယ်တဲ့သူတွေအသက်တာမှာ ဘယ်တော့မှ ဘုရားသခင်ပေးတဲ့ ချမ်းသာခြင်းကို မြင်တွေ့ရမှာမဟုတ်ဘူး။ ကျေးဇူးတော်က အသက်တာထဲလုပ်ဆောင်ပေးတဲ့အရာပေါင်းများစွာရှိတယ်။ ကောင်းစားစေရုံတင်မကဘူး လိုအပ်တဲ့တည်ဆောက်

ပြုပြင်ခြင်းတွေကိုလည်း ကျေးဇူးတော်ကလုပ်ဆောင်ပေးတယ်။

ဒီဇင်ဘာလ ၁၄ ရက်နေ့

ကျေးဇူးတော် (၅)

“ကောင်းကင်တမန်​က​လည်း “မာရိ၊ ကြောက်ရွံ့​ခြင်း​မ​ရှိ​နှင့်။ အကြောင်းမူကား သင်​သည် ဘုရားသခင်​ထံမှ ကျေးဇူး​တော်​ကို​ခံစား​ရ​လေ​ပြီ။” လုကာ ၁:၃၀

ကျေးဇူးတော်ကို သိကျွမ်းခြင်းက သင်ရင်ဆိုင်နေရသမျှသောအရာတွေကိုရင်ဆိုင်ဖို့အတွက် ကြောက်ရွံ့နေမှုအပေါင်းကနေ လွတ်မြောက်စေတယ်။ အသက်တာမှာ ကြောက်ရွံ့ခြင်း ကြီးနေတယ်ဆိုတာက ကျေးဇူးတော်ကို အုပ်စိုးခွင့်မပေးထားသေးလို့ပါ။ ကျေးဇူးတော်သာတကယ်အုပ်စိုးနေရာယူလာရင် ဘယ်ကြောက်ရွံ့ခြင်းကမှ သင့်အသက်တာမှာ နေရာယူ နိုင်တော့မှာမဟုတ်ဘူး။

ဒီဇင်ဘာလ ၁၃ ရက်နေ့

ကျေးဇူးတော်(၄)

“သို့ဖြစ်၍ ငါ့​သား၊ သင်​သည် ခရစ်တော်​ယေရှု​၌​ရှိ​သော ကျေးဇူး​တော်​အားဖြင့် ခွန်အား​နှင့်​ပြည့်စုံ​လော့။” ၂တိ ၂:၁

ဘုရားရဲ့ကြီးမားတဲ့ကျေးဇူးတော်ကို အမှီပြုခြင်းမရှိရင် ခွန်အားကြီးမားတဲ့သူတစ်ယောက် ဖြစ်လာမှာမဟုတ်ဘူး။ ဘုရားရဲ့ကျေးဇူးတော်က လူတစ်ယောက်ကို ကယ်တင်ရုံ လုပ်ဆောင်ပေးတာမဟုတ်ဘူး။ ကယ်တင်ခြင်းရပြီးတဲ့အခါမှာလဲ ရင်ဆိုင်ရသမျှ အမှုအရာတွေမှာ ကြီးမားတဲ့ခွန်အားနှင့်ရှင်သန်နိုင်အောင် ကူညီမစတယ်။ ကျေးဇူးတော်ထဲမှာ တကယ်ရှင်သန်တဲ့လူလောက် ခွန်အားကြီးတဲ့သူ၊ ခွန်အားအပြည့်နှင့် ရှင်သန်နိုင်တဲ့သူ အခြားမရှိဘူး။

ဒီဇင်ဘာလ ၁၂ ရက်နေ့

ကျေးဇူးတော် (၃)

“ထို​သူ၏​ပြည့်​စုံ​ခြင်း​မှ​လည်း ကျေး​ဇူး​တစ်​ပါး၌ ထပ်​ဆင့်၍ ကျေး​ဇူး​တစ်​ပါး​ကို ငါ​တို့​ရှိ​သ​မျှ​သည်​ခံ​ရ​ကြ​ပြီ။-” ရှင်ယောဟန် ၁:၁၆

ကျေးဇူးတော်ဆိုတာ အားနည်းခြင်း၊ မပြည့်စုံခြင်းမှ ပြည့်စုံကောင်းမွန်တဲ့ဘဝ၊ အားကြီးတဲ့ဘဝကိုပဲ ပို့ဆောင်ပေးရုံတင်မကပါဘူး။ ပြည့်စုံတဲ့ဘဝ၊ အားကြီးတဲ့ဘဝပိုင်ဆိုင်ထားရုံနဲ့မပြီးသေးပဲ ပိုကောင်းသောအရားများ ထပ်ဆင့် ထပ်ဆင့်ပြီးတော့ ပို့ဆောင်ပေးပါတယ်။ အစိုးတွေကနေပဲ လွတ်မြောက်စေတာမဟုတ်ပဲ လက်ရှိခံစားနေရတဲ့အကောင်းတွေထက် ပိုကောင်းသောအရာများစွာကို ဆင့်ကဲ့ပြီးခံစားစေနိုင်တဲ့ ဘုရားရဲ့ တစ်ဖက်သတ် လုပ်ဆောင်ပေးခြင်းပါ။ ကိုယ့်ရဲ့ပြည့်စုံခြင်း၊ အစွမ်းအစအပေါ်မှာ မမူတည်ပဲ သခင်ယေရှုရဲ့ ပြည့်စုံခြင်းကြောင့် ယုံကြည်တဲ့သူတိုင်းခံစားရတဲ့ ဘုရားပြင်ဆင်ပေးထားတဲ့ လွန်စွာထူးခြားသော သဘာဝလွန် မျက်နှာသာပါပဲ။

ဒီဇင်ဘာလ ၁၁ ရက်နေ့

ကျေးဇူးတော် (၂)

“ဘု​ရား​သ​ခင်၏ ကျေး​ဇူး​တော်​သည် သင့်​ကို နောင်​တ​လမ်း​သို့ သွေး​ဆောင်​သည်​ကို မ​သိ​မ​မှတ်​ဘဲ၊ ရောမ ၂:၄

အပြစ်ရဲ့သွေးဆောင်မူ အကြောင်းကို လူတွေက ပုံကြီးချဲ့ပြီး ပြောနေကြပေမယ့် ကျေးဇူးတော်ရဲ့သွေးဆောင်မှုကိုတော့ မေ့နေကြတယ်။ တကယ်တော့ အပြစ်တရားထက် အဆပေါင်းများစွာ ကြီးမားတဲ့ကျေးဇူးတရားရဲ့သွေးဆောင်မှုက အသက်တာကို များစွာပြောင်းလဲမှုဖြစ်စေတယ်။ အပြစ်သွေးဆောင်မှုကြောင့်လူပေါင်းများစွာ အသက်တာပြိုလဲနေတာပဲမဟုတ်ဘူး ကျေးဇူးတော်ကြောင့် ပိုများတဲ့လူတွေ ကြီးမားစွာ ဘုရားအသုံးပြု နေတာ ကောင်းကြီးခံစားနေရတာကို မြင်တတ်ဖို့လိုတယ်။

ဒီဇင်ဘာလ ၁၀ ရက်နေ့

ကျေးဇူးတော်

“ငါ​သည် ဘုရားသခင်​၏​ကျေးဇူး​တော်​ကို မ​ပစ်ပယ်။ အကြောင်းမူကား ဖြောင့်မတ်​ခြင်း​ကို ပညတ်​တရား​အားဖြင့်​ရရှိ​နိုင်​လျှင် ခရစ်တော်​သည် အချည်းနှီး​အသေခံ​တော်မူ​ပြီ။” ဂလာတိဩဝါဒစာ ၂:၂၁

ကျေးဇူးတော်ကိုပယ်တဲ့သူဘဝမှာ ကောင်းတဲ့ အရာတွေခံစားဖို့လဲ အပယ်ခံရမှာပဲ။ လူတွေက အပယ်ခံရမှာ ကြောက်တယ်။ဒါပေမဲ့ ဘုရားသခင်ရဲ့ အပယ်မခံရစေသော တစ်ခုတည်းသောအရာဖြစ်တဲ့ ကျေးဇူးတော်ကို ကျတော့ အပြည့်အဝ လက်မခံကြဘူး။ လုပ်သမျှ၊ ကြုံသမျှမှာ ကျေးဇူးတော်အပေါ်မှာ ရပ်တည် အသက်ရှင်မှုှုရှိပဲ၊ တရားဟောင်းအပေါ်မှာပဲ တွေးခေါ်ရှင်သန်နေကြတယ်။ ကျေးဇူးတော်ကို ပယ်ခြင်းဟာ ခရစ်တော်ရဲ့လုပ်ပေးသမျှကို ပယ်ခြင်းဖြစ်ပြီးတော့ ကောင်းတဲ့အရာတွေ တစ်ခုမှအသက်တာမှာမရောက် လာဖို့အတွက် ဆီးတားလိုက်ခြင်းပါပဲ။

ဒီဇင်ဘာလ ၉ ရက်နေ့

တန်ဖိုးထားပါ (၅)

“အ​ဘယ်​အ​ပြစ်​မျှ​မ​ရှိ၊ အ​ညစ်​အ​ကြေး​နှင့် ကင်း​စင်​သော သိုး​သ​ငယ်​ကဲ့​သို့​သော ခ​ရစ်​တော်၏ အ​သွေး​တော်​မြတ်​နှင့် ရွေး​တော်​မူ​သည်​ကို သိ​မှတ်​ကြ​လော့။-” ၁ပေတရု ၁:၁၉

လူတစ်ယောက်ရဲ့တန်ဖိုးကို သူပိုင်ဆိုင်တဲ့ငွေကြေး၊ ရထားတဲ့ဘွဲ့၊ ရှိတဲ့အရည် အချင်းနဲ့ပဲ တိုင်းတာရင်တော့ ဘယ်တော့မှ မှန်ကန်တဲ့ တန်ဖိုးထွက်မှာမဟုတ်ဘူး။ အထူး သဖြင့် ယုံကြည်သူတစ်ယောက်ရဲ့တန်ဖိုးဟာ သူ့မှာရှိတဲ့အရာတွေနဲ့တွတ်လို့မရဘူး။ သူ့ကို ရွေးချယ်ဝယ်ယူထားတဲ့ သခင်ယေရှုရဲ့ တန်ဖိုးဖြတ်လို့မရတဲ့အသွေးတော်နှင့် တွက်ချက်မှသာ လျှင်မှန်ကန်တဲ့ တန်ဖိုးကိုသဘောပေါက်လိမ့်မယ်။ သခင်ယေရှုရဲ့အသွေးတော်ရဲ့တန်ဖိုးဟာ အဖိုးဖြတ်လို့မရသလိုပဲ သင့်ရဲ့ စစ်မှန်တဲ့တန်ဖိုးကလဲ သခင်ယေရှုအသွေးနဲ့ ထပ်တူ တန်တယ်။

ဒီဇင်ဘာလ ၇ ရက်နေ့

တန်ဖိုးထားပါ (၄)

“သင်​၏​ဘု​ရား​သ​ခင်​ထာ​ဝ​ရ​ဘု​ရား ပေး​သ​နား​တော်​မူ​သော​ပြည်၌ သင်၏​အ​သက်​တာ ရှည်​မည်​အ​ကြောင်း၊ သင်၏​မိ​ဘ​ကို​ရို​သေ​စွာ​ပြု​လော့။” ထွက်မြောက်ရာ ၂၀:၁၂

ကောင်းကြီးခံစားရာ နေရာကိုဝင်စားပြီးတော့ ကြာကြာ မခံစားလိုက်ရတာမျိုးမဖြစ်ရလေအောင် ဘုရားက သတိပေးထားတယ်။ ကတိတော် ခံစားရုံပဲ ဘုရားကမဖြစ်စေချင်ဘူး။ သင့်ကိုမွေးတဲ့ မိဘတွေ၊ ဝိညာဉ်ရေးရာမှာပြုစုပျိုးထောင်ပေးတဲ့ ဝိညာဉ်မိဘတွေကို တန်ဖိုးထားပြီးတော့ ပြုစုဖို့လိုတယ်။ မိဘတွေ၊ ခေါင်းဆောင်တွေကို လေးစားတန်ဖိုးမထားတဲ့ ဘယ်သူကမှ ဘုရားပေးတဲ့ ကတိတော် ထဲမှာ ကြာကြာ ရပ်တည်ခွင့်ရမှာမဟုတ်ဘူး။

ဒီဇင်ဘာလ ၆ ရက်နေ့

တန်ဖိုးထားပါ (၃)

အစား​တစ်​နပ်​အတွက် မိမိ​၏​သားဦး​အရိုက်အရာ​ကို​ရောင်း​သည့် ဧသော​ကဲ့သို့ ဘုရား​တရား​ကို​မထီမဲ့မြင်​ပြု​သော​သူ တစ်စုံတစ်ဦး​မျှ​မ​ရှိ​စေရန် သတိပြု​ကြ​လော့။” ဟေဗြဲဩဝါဒစာ ၁၂:၁၆

တစ်ချို့သော အခွင့်အရေးတွေ၊ ကောင်းကြီးမင်္ဂလာတွေက ဘုရားက ကိုယ့်ကိုပေးပေမယ့် တန်ဖိုးမထားတဲ့အတွက် ကျော်သွားတဲ့အချိန်တွေ ရှိတယ်။ လူတွေသတိမထားမိတဲ့အချိန်မှာ ကောင်းတဲ့အရာတွေက ကိုယ့်ကို လွန်သွားတတ်တယ်။ ဧသောဟာ ဘုရားပေးတဲ့ သားဉီးအရာကို ဘာမဟုတ်တဲ့ ပဲဟင်းတစ်ခွက်နဲ့ လဲဖို့ဆုံးဖြတ်ခဲ့တယ်။ တန်ဖိုးမထားတဲ့သူအတွက် တန်ဖိုးရှိတဲ့အရာတွေက ဘယ်တော့မှ ကြာကြာ သူ့ဆီမှာ မနေတတ်ဘူး။ နောက်မှ နောင်တရပေမယ့် တချို့သောအရာတွေက ပြန်ရဖို့ဆိုတာ မဖြစ်နိုင်တော့ဘူး။ ကိုယ့်ကိုဘုရားပေးတဲ့အရာရာတိုင်းကို တန်ဖိုးထားပါ။ သင့်ရဲ့တန်ဖိုးလဲ ပြောင်းလဲ လာပါလိမ့်မယ်။

ဒီဇင်ဘာလ ၅ ရက်နေ့

တန်ဖိုးထားပါ(၂)

ညီအစ်ကို​ထက် ပို၍​ခင်တွယ်​တတ်​သော​မိတ်ဆွေ​လည်း ရှိ​၏။” သုတ္တံကျမ်း ၁၈:၂၄

တန်ဖိုးဖြတ်လို့မရတဲ့အထဲမှာ ဘဝမှာ ရင်းနှီးခွင့်ရတဲ့ မိတ်ဆွေ စစ်တွေလဲပါတယ်။ ညီအကိုမောင်နှမ ထက်တောင်မှ ပိုပြီးကောင်းမွန်တဲ့မိတ်ဆွေစစ်တွေ အသက်တာမှာ ဘုရားပေးတွေ့တဲ့အခါမှာ တန်ဖိုးထားတတ်ဖို့လိုတယ်။ ဆုံးရှုံးမှုထဲမှာ အကြီးမားဆုံး ဆုံးရှုံးမှုတစ်ခုကတော့ မိတ်ဆွေစစ်တွေကိုလက်လွှတ််လိုက်ရတာပါပဲ။ ဒါကြောင့် ဘယ်တော့မှ မိတ်ဆွေတွေနဲ့ ဝေးစေမယ့် အလုပ်တွေမလုပ်မိပါစေနှင့်။ ဒီလို မိတ်ဆွေတွေကို တန်ဖိုးထားတတ်သူအသက်တာမှာ အမြဲတမ်း တန်ဖိုးရှိတဲ့အသက်တာကိုပိုင်ဆိုင်ခွင့်ရတယ်။

ဒီဇင်ဘာလ ၄ ရက်နေ့

တန်ဖိုးထားပါ

“အကျွန်ုပ်​တို​သည် ဉာဏ်ပညာ​နှင့်​ပြည့်စုံ​သော စိတ်နှလုံး​ရှိ​လာ​မည့်​အကြောင်း အကျွန်ုပ်​တို​၏ နေ့ရက်​များ​ကို မှန်ကန်​စွာ​ရေတွက်​နိုင်​ရန် သွန်သင်​တော်မူ​ပါ​။” ဆာလံကျမ်း ၉၀း၁၂

တန်ဖိုးအရှိဆုံးအရာတွေထဲမှာ ထိပ်ဆုံးက တစ်ခုကို ပြောပါဆိုရင်တော့ အချိန်လို့ပဲပြောရမယ်။ အချိန်က အစားထိုးလိုမရနိုင်သလို၊ ဆွဲထားလိုလဲမရနိုင်တဲ့အရာပါ။ အားလုံးကို တူညီတဲ့အချိန်ပေးထားပေမယ့်တန်ဖိုးထားတဲ့အပေါ်မှာမူတည်ပြီးတော့ အချိန်က ပြန်ပေးတဲ့ လက်ဆောင်ကလဲ ကွာသွားတယ်။ အချိုအတွက် တစ်နာရီ ဟာ ၁သောင်း တန်ပေမယ့် အချိုအတွက် တစ်နာရီဟာ သန်းပေါင်းများစွာ တန်တယ်။ တန်ဖိုးထားတဲ့သူအတွက် တန်ဖိုး ပြန်ပေးတဲ့သဘောပါပဲ။

ဒီဇင်ဘာလ ၃ ရက်နေ့

မရှိရင်

မျှော်လင့်ခြင်းမရှိတဲ့သူဆီမှာ အနာဂတ်ဆိုတာ မရှိဘူး သူတိုဘဝဟာ ရှင်လျှက်နှင့် သေနေသလိုပါပဲ၊ ရေးသားထားတဲ့ ဘုရားစကားကို ဖတ်ရူ့လေ့လာခြင်းမရှိရင်ဘုရားအသံကြားခွင့် ရှိလာမှာမဟုတ်ဘူး၊ တကယ်ကြားခြင်ရင် အမြဲဖတ်ရူ့လေ့လာဖိုလိုတယ်။ သည်းခံခြင်းမရှိရင် ပန်းတိုင်ကို ဘယ်တော့မှ ရောက်မှာမဟုတ်ဘူး၊ ပန်းဝင်တဲ့စာရင်းမှာ နာမည်ပါခြင်ရင် သည်းခံခြင်းလေးတော့ဆောင်ထား။ ချစ်ခြင်းမေတ္တာမရှိတဲ့သူတွေက ဘုရားကိုမသိဘူး

ဘုရားရဲ့ ဂုဏ်သတ္တိတွေ သူတိုအသက်တာမှာ မြင်ခွင့်ရမှာမဟုတ်ဘူး၊ ဆုတောင်းခြင်း မရှိရင် သဘာဝလွန်အဖြစ်ပျက်တွေ ရှိလာမှာမဟုတ်ဘူး၊ သာမန်ဘဝမှာ ပျော်နေတဲ့သူတွေက ဘယ်တော့မှ ဆုတောင်းခြင်းမှာ ပျော်မှာမဟုတ်ဘူး။ သစ္စာမရှိတဲ့သူ ဘဝမှာ ကောင်းတဲ့အရာတွေက ကြာကြာ ရှိမှာမဟုတ်ဘူး၊ ရှေရှည် အောင်မြင်ခြင်ရင်တော့ သစ္စာရှိခြင်းကို ကိုင်ဆွဲထားဖိုတော့လိုတယ်၊ ဆာငတ်ခြင်းမရှိရင် သန့်ရှင်းသောဝိညာဉ်တော်နှင့် ဝပြောဖိုမလွယ်ဘူး သန့်ရှင်းသောဝိညာဉ်တော်က ဆာငတ် ခြင်းရှိတဲ့သူတွေနဲ့ပဲပို အလုပ်လုပ်တယ်၊ စိုက်ပျိုးခြင်း မရှိရင် ရိတ်သိမ်းခြင်းဆိုတာ လဲ ဘယ်တော့မှ​ရှိလာမှာမဟုတ်ဘူး၊ ကိုယ်စိုက်တဲ့ အရာပဲ အဆပေါင်းများစွာအသက်တာမှာ ပြန်ရိတ်သိမ်းရမယ်၊ သန့်ရှင်းသောဝိညာဉ်တော် မရှိရင် လောကကို အောင်နိုင်တဲ့ တန်ခိုးလဲ သင့်မှာ ရှိမှာမဟုတ်ဘူး။ သန့်ရှင်း သောဝိညာဉ်တော်ကသာလျှင် အရာရာကို လုပ်နိုင်တဲ့ တန်ခိုးသင့်ကိုထည့်ပေးနိုင်တယ်။

ဒီဇင်ဘာလ ၂ ရက်နေ့

မရှိရင် (၉)

“ထို​သို​မ​ရှိ​သော်​လည်း၊ သင်​တို​အ​ပေါ်​သို သန့်​ရှင်း​သော​ဝိ​ညာဉ်​တော် ဆင်း​သက်​သော​အ​ခါ သင်​တို​သည် တန်​ခိုး​ကို​ခံ​ရ၍။“ တမန်တော် ၁း၈

တန်ခိုးမရှိတဲ့ သာမန်ဘဝနှင့် ရှင်သန်ဖို့စိတ်ကူးမယဉ်နဲ့။ လောကမှာ ငွေမရှိရင် မျက်နှာငယ်သလိုပဲ ဝိညာဉ်ရေးရာမှာလဲ တန်ခိုးမရှိရင် အားငယ်နေရမယ်။ တန််ခိုးမရှိတဲ့ ဘဝနှင့် ကြီးမားတဲ့အရာတွေမလုပ်နိုင်ဘူး။ ယုံကြည်သူ တစ်ယောက်အတွက် လောကကိုအောင်မြင်တဲ့တန်ခိုးက သန့်ရှင်းသောဝိညာဉ်တော်ထံကနေလာတယ်။ သန့်ရှင်းသောဝိညာဉ်တော်ကိုလက်မခံရင် သင်လိုအပ်နေတဲ့ တန်ခိုးကိုဘယ်တော့မှ ရမှာမဟုတ်ဘူး။ တန်ခိုးမရှိရင်တော့သင်ဟာ သာမန်ဘဝနဲ့ပဲ ရှင်သန် နေရလိမ့်မယ်။

နိုဝင်ဘာလ ၃၀ ရက်နေ့

မရှိရင် (၈)

‘မျက်​ရည်​ကျ​လျက် မျိုး​စေ့​ကြဲ​သော​သူ​တို​သည် ရွှင်​လန်း​လျက် စ​ပါး​ရိတ်​ကြ​လိမ့်​မည်။ ‘ ဆာလံ ၁၂၆း၅

သခင်ယေရှုက တရားဟောတဲ့အခါမှာ အမြဲတမ်း စိုက်ပျိုးရေးနဲ့ဉပမာပေးလေ့ရှိတယ်။ ဒီနိယာမဟာ အသက်တာမှာ အမြဲတမ်းသိထားသင့်တဲ့ အရာတစ်ခုဆိုမမှားဘူး။ မစိုက်ပဲ ရိတ်ချင်လိုမရဘူး။ စိုက်ထားတဲ့အရာကိုပဲ ရိတ်သိမ်းရမယ်။ စိုက်တဲ့အခါမှာ ပေးတဲ့ အဖိုးအခဟာ ရိတ်သိမ်းတဲ့အခါမှာရမယ့် ကောင်းကြီးကိုဆုံးဖြတ်တယ်။ အဖိုးအခပေးခြင်းမရှိပဲ အားလုံးကို အခမဲ့လိုျင်တဲ့နှလုံးသားကတော့ မှန်တဲ့နှလုံးသားမဖြစ်နိုင်ဘူး။ ဒီနေ့ ကြီးမားတဲ့ အောင်မြင်ခြင်းတွေကို ရိတ်သိမ်းနေကြတဲ့သူတွေဟာ တချိန်တုံးက မျက်ရည်နှင့်မျိုးစေ့ကြဲခဲ့ကြတဲ့သူတွေပါ။ ဒီနေ့လဲ သင်ဟာ မျိုးစေ့ မကြဲ ထားဘူးဆိုရင် သေချာတာကတော့အနာဂတ်မှာ ရီတ်စရာ ဘာမှ ရှိမှာမဟုတ်ဘူး။

နိုဝင်ဘာလ ၂၉ ရက်နေ့

မရှိရင် (၇)

“ဖြောင့်​မတ်​ခြင်း​ပါ​ရ​မီ​ကို ဆာ​ငတ်​ခင်​မွတ်​သော​သူ​တို​သည် မင်္ဂ​လာ​ရှိ​ကြ၏။ အ​ကြောင်း​မူ​ကား၊ ထို​သူ​တို​သည် ဝ​ပြော​ခြင်း​သို ရောက်​ကြ​လ​တ္တံ့။-” မဿဲ ၅း၆

ကယ်တင်ခြင်းက ကျေးဇူးတော်ကို ယုံကြည်ခြင်းတစ်ခုထဲအားဖြင့်သာ လက်ခံရရှိနိုင်ပါတယ်။ ဒီလိုပါပဲ သန့်ရှင်းသောဝိညာဉ်တော်နှင့် ပတ်သက်တဲ့ ဆုကျေးဇူးတွေ၊ ဘိသိတ်တွေကလဲ ဆာငတ်ခြင်း အားဖြင့်သာ အသက်တာထဲမှာ ရောက်ရှိနေရာယူလာတာပါ။ ဘုရားနှင့်ပက်သက်ပြီးတော့ ဆာငတ်တောက်လောင်ခြင်း မရှိတဲ့သူတွေအသက်တာမှာ ဘယ်တော့မှ သန့်ရှင်းသောဝိညာဉ်တော်ရဲ့ လုပ်ဆောင်မှုတွေ၊ တန်ခိုးတော်တွေမမြင်တွေ့ရတတ်ဘူး။ မှန်ကန်တဲ့ ဆာငတ်ခြင်းမရှိရင် သန့်ရှင်းသောဝိညာဉ်တော်ရဲ့ အတူပါရှိခြင်းကို မြင်တွေ့ရဖိုမလွယ်ဘူး။

နိုဝင်ဘာလ ၂၈ ရက်နေ့

မရှိရင် (၆)

“သေးငယ်​သော​အမှု​၌ သစ္စာရှိ​သော​သူ​သည် ကြီး​သော​အမှု​၌​လည်း သစ္စာရှိ​၏။ လုကာ ၁၆း၁၀

ဘဝမှာ ရေရှည်တည်တံ့ပြီးတော့ ကောင်းကြီးခံစားခြင်တယ်ဆိုရင် သစ္စာရှိခြင်းကတော့ မရှိမဖြစ်လိုအပ်တယ်။ သစ္စာမရှိတဲ့သူဟာ ရေရှည် ဘုရားအသုံးပြုလိုမရဘူး ဒါကြောင့် ခဏလေးတော့ ကောင်းကြီးခံစားခြင်ခံစားမယ်၊ အောင်မြင်ချင်ရင် အောင်မြင်မယ်၊ နာမည်ကျော်ချင်ကျော်မယ် ကြာရင်တော့ ပျောက်ကွယ်သွားပါလိမ့်မယ်။ ကြာရှည်စွာ ခံစားရမယ့်ကောင်းကြီးမဂ်လာဟာ သစ္စာရှိတဲ့သူတွေ အသက်တာမှာပဲ​မြင်တွေ့ရတယ်။ သစ္စာမရှိရင် ကောင်းတဲ့အရာတွေလဲ ဘဝမှာ ကြာကြာမရှိနိုင်ဘူး။

နိုဝင်ဘာလ ၂၇ ရက်နေ့

မရှိရင် (၅)

သူ​တော်​ကောင်း​ဆု​တောင်း၍ အ​ရှိန်​ကြီး​သော​ပ​တ္ထ​နာ​သည် အ​လွန်​တန်​ခိုး​ပါ၏။-” ယာကုပ် ၅း၁၆

သာမန်လူတစ်ယောက်က သာမန်ထက်ထူးခြားတဲ့အရာတွေ လုပ်နိုင်တယ်ဆိုတာ ဆုတောင်းခြင်းကြောင့်ပါ။ ဆုတောင်းခြင်းက သင့်ဘဝကို အခြားသူတွေဘဝတွေနဲ့များစွာခြားနားသွားစေတယ်။ ဖြစ်ရိုးဖြစ်စဉ် လုပ်ရိုးလုပ်စဉ် ဘဝကနေ မဖြစ်နိုင်မလုပ်နိုင်တဲ့အရာတွေကိုလုပ်နိုင်၊ ဖြစ်နိုင်အောင် ကူညီပံ့ပိုးပေးတယ်။ ဆုတောင်းခြင်းမရှိရင် ထူးခြားတဲ့သဘာဝလွန်အရာတွေ ရှိမှာမဟုတ်ဘူး။ ဆုတောင်းခြင်းမရှိရင် ကိုယ်လုပ်ဆောင်မှုရလဒ်ကိုပဲ အသက်တာမှာ ရရှိမှာဖြစ်ပြီး ဆုတောင်းတဲ့သူအသက်တာမှာတော့ ဘုရားလုပ်ပေးတဲ့အရာတွေကိုမြင်တွေ့ခံစားရစေမှာပါ။

နိုဝင်ဘာလ ၂၆ ရက်နေ့

မရှိရင် (၄)

“ချစ်​ခြင်း​မ​ရှိ​သော​သူ​သည် ဘု​ရား​သ​ခင်​ကို​မ​သိ။ အ​ကြောင်း​မူ​ကား၊ ဘု​ရား​သ​ခင်​သည် ချစ်​ခြင်း​မေ​တ္တာ ဖြစ်​တော်​မူ၏။-” ၁ယော ၄း၈

မှန်ကန်တဲ့ ချစ်ခြင်းမေတ္တာဆိုတာ ဘုရားမပါပဲ ဘယ်တော့မှ မပြည့်စုံဘူး။ လူတစ်ယောက် ဘဝမှာ ဘုရားနှင့် အသက်ရှင်တယ်ဆိုပြီးတော့ ချစ်ခြင်းမေတ္တာထဲမှာမကျင်လည်ဘူးဆိုရင် မှန်ကန်တဲ့ အသက်ရှင်မှုမဖြစ်နိုင်ဘူး။ ချစ်ခြင်းမေတ္တာရဲ့ အရင်းအမြစ်က ဘုရားသခင်ဖြစ်သလို ချစ်ခြင်းမေတ္တာဆိုတာ ဘုရားကိုယ်တိုင်ဖြစ်တယ်။ ဒါကြောင့်ရှင်ပေါလုကဆိုတာ ချစ်ခြင်းမေတ္တာရှိတဲ့သူက အကျင့်တရားနှင့်ပြည့်စုံတယ်ဆိုပြီးတော့။ ချစ်ခြင်းမေတ္တာမရှိတဲ့သူဘဝမှာ ဘုရားဆိုတာလဲ ဘယ်တော့မှ ရှိမှာမဟုတ်ဘူး။ ဘုရားမပါပဲ ချစ်တဲ့ အချစ်တွေက ဘယ်တော့မှ မှန်ကန်တဲ့ချစ်မေတ္တာလိုမခေါ်ဆိုနိုင်ဘူး။

နိုဝင်ဘာလ ၂၅ ရက်နေ့

မရှိရင် (၃)

“သင်​တို​သည် အ​လျှင်း​မ​ချို​တဲ့​ဘဲ စေ့​စပ်​စုံ​လင်​မည်​အ​ကြောင်း၊ သည်း​ခံ​ခြင်း​စိတ်​သည် အ​ကုန်​အ​စင် ပြု​ပြင်​ပါ​စေ။” ယာကုပ် ၁း၄

ပန်းတိုင်တော့ရောက်ချင်တယ် ဒါပေမယ့် သည်းခံတဲ့စိတ်မရှိရင် ဘယ်တော့မှ ပန်းတိုင်ရောက်မှာမဟုတ်ဘူး။ ပန်းတိုင်ဆိုတာ လူတိုင်းမှာရှိပေမယ့် လူတိုင်းကတော့ပန်းတိုင်ရောက်အောင်သွားနိုင်ကြတာမဟုတ်ဘူး။ စုံလင်ပြည့်စုံတဲ့ အသက်တာကို ရရှိပိုင်ဆိုင်ဖိုရန် သည်းခံခြင်းစိတ်ကမရှိမဖြစ်လိုအပ်တယ်။ သည်းခံခြင်းစိတ်က အသက်တာရဲ့ အားနည်းချက် အားလုံးကို ပြုပြင်ပေးတယ်။ ပြုလေသမျှမှာ သည်းခံသောစိတ်နှင့် လုပ်ဆောင်တတ်သူတွေသာ ပန်းတိုင်ကို ရောက်ရှိရုံသာမက ပဲ ရရှိတဲ့အောင်မြင်ခြင်းကိုလဲ ရေရှည်ထိန်းသိမ်း နိုင်သူတွေဖြစ်နိုင်တယ်။

နိုဝင်ဘာလ ၂၃ ရက်နေ့

မရှိရင် (၂)

“ထို​ကျမ်း​စာ​ရှိ​သ​မျှ​သည် ဘု​ရား​သ​ခင် မှုတ်​သွင်း​တော်​မူ​သော အား​ဖြင့်​ဖြစ်၍၊-” ၂ တိ ၃:၁၆

ကျမ်းစာဖတ်ခြင်းမရှိတဲ့သူ အသက်တာမှာ ဘုရားစကားသံရောက်လာမှာမဟုတ်ဘူး၊ ဒါကြောင့် သူတို့ကပဲ ဘုရားကို တဖက်သတ် ပြောနေပေမယ့် ပြန်ပြောသံကို နှစ်ပေါင်းများစွာကြာလဲ မကြားရနိုင်ဘူးဖြစ်နေတယ်။ လူများစွာက ဘုရားအသံကြားချင်တယ်လို့ နှုတ်ကနေ တွင်တွင်ပြောနေပေမယ့် ကြားနိုင်မယ့် နည်းလမ်းကိုတော့ လက်တွေ့လုပ်ဖို့ပျက်ကွက်ခဲ့ကြတယ်။ ဘုရားအသံရှင်းလင်းစွာကြားချင်ရင် ရေးသားထားတဲ့ဘုရားစကားကို အရင်ဆုံး အသက်တာမှာ နေရာပေးဖို့လိုတယ်။ ရေးသားထားတဲ့ဘုရားစကားကို နေ့စဉ်ဖတ်ရွတ်မယ်ဆိုရင် မကြာခင်မှာ ကိုယ်တိုင်ပြောတဲ့စကားကိုလဲ သေချာပေါက်ကြားရပါလိမ့်မယ်။

နိုဝင်ဘာလ ၂၂က်နေ့

မရှိရင် (၁)

“And now these three remain: faith, hope and love. 1 Corinthians 13:13

မိုးတိမ်တွေက ပြင်းထန်စွာရွာသွန်းမယ့် မိုးတွေရဲ့အစပျိုးခြင်းဖြစ်သလို၊ မျှော်လင့်ခြင်းကလဲ ဘုရားစိတ်တော်နှင့်တွေ့စေတဲ့ ယုံကြည်ခြင်းဖြစ်လာဖို့ အတွက်လိုအပ်တဲ့ အရာပါပဲ။

မျှော်လင့် ခြင်းမရှိတဲ့ဘဝတွေဟာ ရှင်လျှက်နဲ့သေနေသလိုပါပဲ။ မျှော်လင့်ခြင်းက တစ်ခါတစ်ရံမှာ လေထဲ တိုက်အိမ်ဆောက်သလို ဖြစ်နေတတ်ပေမယ့် မျှော်လင့်ခြင်းဆိုတဲ့ကုန်ကြမ်းမရှိပဲ နဲ့ ဘယ်တော့မှ ယုံကြည်ခြင်း မရှိလာနိုင်ဘူး။ ဘုရားနဲ့ဆိုင်တဲ့ ကောင်းမွန်တဲ့မျှော်လင့်ခြင်းက သင့်ရဲ့အသက်တာကို အဆိုးတွေမလုပ်မိစေဖို့ ကွယ်ကာပေးတယ်။ ဘုရားသခင်သင့်အတွက် အကောင်းဆုံးအရာတွေ လုပ်ဆောင်ပေးမယ်ဆိုတာကို မျှော်လင့်ပါ။ သင်မျှော်လင့်တဲ့အရာတွေ တစ်နေ့သင့်ဆီကို သေချာပေါက်ရောက်လာပါလိမ့်မယ်။

နိုဝင်ဘာလ ၂၁ရက်နေ့

ဘုရားကိုသိကျွမ်းခြင်း (၃)

“ထာ​ဝ​ရ​အ​သက်​ဟူ​မူ​ကား၊ မှန်​သော​ဘု​ရား​သ​ခင် တစ်​ဆူ​တည်း​ဖြစ်​တော်​မူ​သော ကိုယ်​တော်​ကို​လည်း​ကောင်း၊ စေ​လွှတ်​တော်​မူ​သော ယေ​ရှု​ခ​ရစ်​ကို​လည်း​ကောင်း၊ သိ​ကျွမ်း​ခြင်း​တည်း။-” ရှင်ယောဟန် ၁၇:၃

ထာဝရအသက်ဆိုတာ သေပြီးမှရမယ်လို့ တလွဲထင်နေတတ်သူတွေရှိတယ်။ တကယ်တော့ မှန်ကန်သော အဘခမည်းတော်နှင့် အပြစ်ငရဲမှာ ကယ်လွှတ်တော်မူပြီး အဘနှင့်ပြန်လည်သင့်မြတ်စေတဲ့ သခင်ယေရှုခရစ်တော်ကို သိကျွမ်းခြင်းက ထာဝရအသက်ဖြစ်တည်ခြင်းဆိုတာ သိတဲ့သူကနည်းတယ်။ ဘုရားကို မှန်ကန်စွာ ရင်းနှီးသိကျွမ်းခြင်းမရှိပဲ ထာဝရအသက်ရပြီးပြီ လို့ သတ်မှတ်လို့မရဘူး။ ဘုရားနှင့်သိကျွမ်းရင်းနှီးခြင်းကနေပဲ အသက်ကို ရရှိခံစားရတယ်။

နိုဝင်ဘာလာ ၂၀ရက်နေ့

ဘုရားကိုသိကျွမ်းခြင်း (၂)

“ငါ​တို့​သည် ဘုရားသခင်​၏​ပညတ်​တော်​တို့​ကို လိုက်နာ​စောင့်ထိန်း​လျှင် ထို​အမှုအရာ​အားဖြင့် ဘုရားသခင်​ကို ငါ​တို့​သိကျွမ်း​သည်​ကို​သိ​ကြ​၏။” ရှင်ယောဟန်ဩဝါဒစာပထမစောင် ၂:၃

ဘုရားရဲ့နည်းလမ်းတွေအတိုင်း အသက်မရှင်ပဲနဲ့ ဘုရားနဲ့ကိုယ်တိုင် ရင်းနှီးကျွမ်းဝင်တယ်လို့ ဘယ်ပြောလို့ရမလဲ? အမှန်တကယ် ဘုရားနှင့် သိကျွမ်းရင်းနှီးတဲ့သူတိုင်းက ဘုရားရဲ့ နိယာမအတိုင်း အသက်ရှင်ပြီးတော့ ဘုရားစကားအတိုင်း နာခံလုပ်ဆောင်တတ်တဲ့သူဖြစ်တယ်။ လူတစ်ယောက်ရဲ့ဘဝမှာ သူအသက်ရှင်တဲ့အရာကို ကြည့်ပြီးတော့ ဘုရားနှင့် ဘယ်အတိုင်းအတာမှာ ရင်းနှီးကျွမ်းဝင်သလဲဆိုတာ သိနိုင်တယ်။ အာဗြဟံရဲ့ ဘုရားကိုသိကျွမ်းခြင်းက ဘယ်သူနဲ့မှမတူတဲ့ မိတ်ဆွေအဆင့်ဖြစ်သလို သူ့ရဲ့နာခံခြင်း၊ ဘုရားကိုချစ်ခြင်းကလဲ ဘယ်သူနဲ့မတူဘူး။

နိုဝင်ဘာလာ ၁၉ရက်နေ့

ဘုရားကိုသိကျွမ်းခြင်း

မိ​မိ​တို ဘု​ရား​သ​ခင်​ကို သိ​သော​သူ​တို​မူ​ကား၊ ကြီး​စွာ​သော​အား​နှင့် ပြု​ကြ​လိမ့်​မည်။” ဒံ ၁၁း၃၁

လူတစ်ယောက် ဘုရားကို တကယ်သိကျွမ်းခြင်းရှိသလား? မရှိဘူးလား? ဘယ်လိုသိနိုင်မလဲ။ အပေါ်ယံကြည့်ရုံနဲ့တော့ မသိနိုင်ဘူး။ သေချာတာကတော့ အမှန်တကယ် ဘုရားကိုသိတဲ့သူတွေဟာ သာမန်လူတွေလိုတော့မဟုတ်ဘူး။ ပရောဖက် ဒံယေလကတော့ ဒီလိုဆိုတယ် ဘုရားကိုသိတဲ့သူဟာ အားနည်းတဲ့သူတွေ၊ အားငယ်တဲ့သူတွေတော့ လုံးဝမဟုတ်ဘူး။ ကြီးစွာသော အားနှင့် ပြုမူလုပ်ဆောင်တဲ့သူတွေဖြစ်တယ်။ ဘာလုပ်လုပ် ကြီးစွာသောအားနှင့် ပြုမူအသက်ရှင်တဲ့သူဖြစ်ဖို ဘုရားကို သိကျွမ်းခြင်းမှာ တိုးတက်လာဖို့လိုတယ်။

နိုဝင်ဘာလာ ၁၈ရက်နေ့

သဘောချင်း တူတဲ့သူ

“အ​ကြောင်း​မူ​ကား၊ အ​ကြင်​အ​ရပ်၌ လူ​နှစ်​ဦး​သုံး​ဦး​သုံး​ဦး​တို့​သည် ငါ၏​နာ​မ​ကို​ထောက်၍ စည်း​ဝေး​ကြ၏။ ထို​အ​ရပ်၌ သူ​တို့​အ​လယ်​မှာ ငါ ရှိ​သည်​ဟု​မိ​န့်​တော်​မူ၏။” ရှင်မဿဲ ၁၈း၂၀

         သဘောချင်း တူတဲ့သူ၊ လူမျိုးချင်း တူဖို့ထက်၊ ခံယူချက် တူတဲ့သူတွေထက် အသင်းတော်အဖွဲ့အစည်းချင်း တူဖို့ထက်၊ အသားအရောင် တူတဲ့သူဖြစ်ဖို့ထက် နေထိုင်တဲ့နိုင်ငံချင်း တူတဲ့သူ ဖြစ်ဖို့ထက် သခင်ခရစ်တော်မှာ ညီအကိုမောင်နှမချင်းဖြစ်တယ် ဘုရားဘုန်းတော်၊ ဘုရားနိုင်ငံတော်အတွက် လုပ်ဆောင်မယ်ဆိုတဲ့ သဘောချင်းတဲ့သူဖြစ်ဖို့ ပိုပြီးတော့အရေးကြီးတယ်။ ဒီလိုလူတွေ သဘောတူပြီးစုဝေးလာပြီဆိုရင်တော့ ကြီးမားတဲ့အရာတွေဖြစ်လာဖို့သေချာနေပြီ။

နိုဝင်ဘာလ ၁၆ရက်နေ့

တကယ်လို့များ (၉)

“အ​ကျွန်ုပ် ပြစ်​မှား​ပါ​ပြီ။ အ​ပြစ်​မ​ရှိ​သော​သူ၏ အ​သွေး​ကို အပ်​မိ​ပါ​ပြီ​ဟု ဆို၏။ ထို​သူ​တို့​က​လည်း ငါ​တို့​နှင့် အ​ဘယ်​သို့ ဆိုင်​သ​နည်း။ ကိုယ်​အ​မှု​ကို ကိုယ်​ကြည့်​လော့​ဟု ဆို​ကြ​သော်၊-” ရှင်မဿဲ ၂၇း၄

      တကယ်လို့များ ယုဒရှာကာယုတ်သာ စစ်မှန်တဲ့နောင်တနှင့် ဘုရားထံကိုပြန်လှည့်လာမယ်ဆိုရင်၊ ဘုရားရဲ့ရွေးကောက်ခံရခြင်းအပေါ်မှာ တန်ဖိုးထားပြီး အကောင်းဆုံး အသက်ရှင်ခဲ့မယ်ဆိုရင်၊ ကိုယ်စိတ်ခံယူချက်တွေနောက်မလိုက် သခင်ယေရှုနောက်သာ လုံးလုံးလိုက်ခဲ့မယ်ဆိုရင်၊ နတ်ဆိုးဝင်ဖို့အတွက် အခွင့်အရေးတွေကို မပေးခဲ့မိဘူးဆိုရင်၊ ငွေကြေးကိုချစ်တာ ဘုရားကိုချစ်တာထက် မကျော်လွန်ခဲ့ဘူးဆိုရင်၊ သေချာတာကတော့ ကျန်တဲ့ တမန်တော်တိုလိုပဲ ကမ္ဘာကြီးမှောက်လှန်တဲ့သူတစ်ယောက် ဖြစ်နေခဲ့မှာပါ။ ဒါပေမဲ့ အမှားတွေကိုပဲကျူးလွန်ခဲ့မိရုံမက နောင်တနဲ့ဘုရားထံကိုပြန်မလှည့်လာခဲ့တဲ့အတွက် ရရှိခဲ့တဲ့ ကြီးမားတဲ့အခွင့်အရေးတွေကို လက်လွှတ်ဆုံးရူံးခဲ့တဲ့သူတစ်ယောက်ဖြစ်ခဲ့တယ်။

နိုဝင်ဘာလ ၁၅ရက်နေ့

တကယ်လို့များ (၈)

“ကမ်း​နား​မှာ​လှေ​ကို ဆိုက်​ပြီး​လျှင်၊ ထို​သူ​တို့​သည် ရှိ​သ​မျှ​တို့​ကို စွန့်​ပစ်၍ နောက်​တော်​သို့ လိုက်​ကြ၏။”လုကာ ၅:၁၁

တကယ်လို့များ ပေတရုသာ ယေရှုနောက်မလိုက်ပဲ ဖမ်းမိတဲ့ ငါးတွေနဲ့ သာ အချိန်ကုန်ခဲ့မယ်ဆိုရင်၊ သခင်ယေရှုအမိန့်တော်အတိုင်း ရေနက်ရာသာ မရွေ့ ခဲ့ဘူးဆိုရင်၊ လှေနှစ်စင်းနစ်လုမတတ် ဖမ်းမိတဲ့ငါးတွေကို ကြည့်ပြီး အသက်တာမှာ တစ်စုံတစ်ခု အပြောင်းအလဲမဖြစ်ခဲ့ဘူးဆိုရင်၊ ရှိသမျှကိုစွန့်ပစ်ပြီးတော့ သခင်ယေရှုရဲ့နောက်တော်သို့ မလိုက်ခဲ့မိဘူးဆိုရင်၊ သေချာတာကတော့ ကနဉီးအသင်းတော်ရဲ့ဖခင်ကြီးတစ်ဉီး ဘယ်တော့မှ ဖြစ်လာတော့မှာမဟုတ်ဘူး။ သာမန် ငါးဖမ်းသမားဘဝနဲ့ပဲ အဆုံးသတ်ပြီးတော့လူမသိ သူမသိပဲနဲ့ ဘဝကို အဆုံးသတ်သွားလိမ့်မယ်။ လူသန်းပေါင်းများစွာကို လွှမ်းမိုးနိုင်တဲ့ ခေါင်းဆောင်ကြီးတစ်ဉီး၊ လူကိုဖမ်းမိတဲ့သူသာမက သိုးထိန်းကြီးတစ်ဉီးအဖြစ်၊ ကောင်းကင်တံခါးသော့တွေအပ်နှင်းခြင်း ခံရတဲ့သူဖြစ်လာစေတာက ဘုရားစကားကိုကြားတဲ့အခါမှာ တွေဝေမနေပဲ ချက်ခြင်းလုပ်ဆောင်ခဲ့ခြင်းကြောင့်ပဲ။

နိုဝင်ဘာလ ၁၄ရက်နေ့

တကယ်လို့များ (၇)

“နောက်​မှ​ထို​သူ​ကို​ပယ်၍၊ ဣ​သ​ရေ​လ​ရှင်​ဘု​ရင်​အ​ရာ၌ ဒါ​ဝိဒ်​ကို ချီး​မြှောက်​တော်​မူ၏။ ထို​သူ​အား သက်​သေ​ခံ​တော်​မူ​လျက်၊ စိတ်​နှ​လုံး၌ ညီ​ညွတ်​သည်​ဖြစ်၍ ငါ့​အ​လို​ကို​ပြည့်​စုံ​စေ​မည့်​သူ၊ ယေ​ရှဲ၏​သား​ဒါ​ဝိဒ်​ကို ငါ​တွေ့​ရ​ပြီ​ဟု မိန့်​တော်​မူ၏။-” တမန်တော် ၁၃း၂၂

တကယ်လို့ များ ဒါ​ဝိဒ်​က ဘုရားစိတ်တော်နှင့်တွေ့တဲ့ သူတစ်ယောက်မဖြစ်ခဲ့ဘူးဆိုရင်သိုးတွေ ထိန်းရင်းနှင့် မကျေနပ်ချက်တွေ၊ ကိုယ့်ရဲ့ခံစားချက်တွေကိုပဲ ရှေ့တန်းတင်ခဲ့မယ်ဆိုရင်အလုပ်လုပ်ရင်းနှင့် ကြုံတွေ့ရတဲ့ပြဿနာတွေကိုကောင်းမွန်စွာ မကိုင်တွယ်ခဲ့ဘူးဆိုရင်၊ ရောက်တဲ့နေရာတိုင်းမှာ ကြုံတွေ့တဲ့ အခြေအနေတိုင်းမှာ ဘုရားကို နှလုံးသားနှင့်မချီးမွမ်း မကိုးကွယ်ခဲ့ဘူးဆိုရင်၊ ဣသရေလ လူတွေကိုလာပြီးတော့စိန်ခေါ်တဲ့ ဂေါလျက်ကြီးကို မရင်ဆိုင်ခဲ့ဘူးဆိုရင်၊ သေချာတာကတော့ သာမန်သိုးကျောင်းသားဘဝနဲ့ အဆုံးသတ်သွားမှာ ပါ။ ဘဝရဲ့အနိမ့်အမြင့်တွေမှာ ဘုရားကို နှလုံးသားနှင့် ချီးမွမ်းကိုးကွယ်ရင် ကြုံတွေ့ရတဲ့အရာရာတိုင်းပေါ်မှာ ဘုရားကို အားကိုးပြီးတော့ဖြေရှင်းရင်း ဘုရားနှလုံးသားနှင့် ထပ်တူကျသွားတဲ့နောက်မှာတော့ သိုးကျောင်းသားကနေ ဘုရင်ကြီးအဖြစ်ဘုရားက ပြောင်းလဲပေးလိုက်တယ်။

နိုဝင်ဘာလ ၁၃ရက်နေ့

တစ်ကယ်လို့များ (၆)

စောင့်​မိ​လျှင်၊ ထာ​ဝ​ရ​ဘု​ရား​သည် ဣ​သ​ရေ​လ​အ​မျိုး၌​သင်၏​အာ​ဏာ​ကို ယ​ခု​မှ​စ၍ အ​စဉ်​အ​မြဲ တည်​စေ​တော်​မူ​ပြီ။” ၁ဓမ္မ ၁၃:၁၃

တကယ်လို့များ ရှောလုက ဘုရားစကားကို နားထောင်ပြီးတော့ ရှာမွေလကို စောင့်ခဲ့မိတယ်ဆိုရင်အခြေအနေတွေကိုမကြည့်၊ လူတွေကိုမကြည့်ပဲ ဘုရားကိုပဲစေ့စေ့ မျှော်ကြည့်တတ်မိခဲ့မယ်ဆိုရင်ခံစားချက်မနောက်မလိုက်ပဲ ဘုရားနောက်ကိုပဲ လုံးလုံးလိုက်မိခဲ့တယ်ဆိုရင်၊ သူ့ထံကနေ ဘုရင်ဖြစ်မယ့်ကောင်းကြီးမင်္ဂလာက ဒါဝိဒ်ထံကို ရွေ့သွားစရာ အကြောင်းမရှိဘူး။ သူ့ရဲ့သားစဉ်မြေးဆက်က ဘုရားခန့်အပ်တဲ့ဘုရင် နေရာမှာ အခန့်သားထိုင်ပြီးတော့ အုပ်ချုပ်ခွင့်ရမှာ။ မစောင့် မိတာလေး တစ်ခုက ကြီးမားတဲ့အရာတွေကို လက်လွှတ်ဆုံးရှုံးလိုက်ရတယ်။ ဘုရားနှင့်ပတ်သက်ရင်မလောပါနှင့် စိတ်ရှည်ပါ။

နိုဝင်ဘာလ ၁၂ရက်နေ့

တစ်ကယ်လို့များ (၅)

“မော​ရှေ​ကို ဖွား​မြင်​ပြီး​မှ အ​ဆင်း​လှ​သော သူ​ငယ်​ဖြစ်​သည်​ကို မိ​ဘ​တို့​သည်​မြင်​လျှင်၊ ယုံ​ကြည်​ခြင်း​အား​ဖြင့် ရှင်​ဘု​ရင်​အ​မိန့်​တော်​ကို မ​ကြောက်​ဘဲ သုံး​လ​ပတ်​လုံး သူ့​ကို ဝှက်​ထား​လေ၏။-” ဟေဗြဲ ၁၁:၂၃

တကယ်လို့များ မောရှေ ရဲ့မိဘတွေသာ ဘုရားကိုမကြောက်ပဲ ရှင်ဘုရင်ရဲ့အမိန့်တော်ကိုသာကြောက်ခဲ့မယ်ဆိုရင်၊ ရှိဖရနှင့်ပုအာတို့ကလဲ ဘုရားထက် ဘုရင့် စကားကိုနားထောင်ခဲ့မယ်ဆိုရင်၊ အဆိုးဆုံးအခြေအနေမှာ အကောင်းဆုံး ယုံကြည်ခြင်းနဲ့သာမဖြတ်ကျော်ခဲ့ကြရင် သေချာတာကတော့ ဣသရေလ လူမျိုးတွေကို ခေါင်းဆောင်ပြီး ကျွန်ဘဝကနေ ကယ်ထုတ်မယ့် မောရှေဆိုတာ ပေါ်လာစရာ အကြောင်းမရှိဘူး။ အဆိုးဆုံးအခြေအနေကြောင့်လူတွေ ပျက်ဆီး ဆုံးရှုံးသွားတာမဟုတ်ပါဘူး။ အဆိုးဆုံးအခြေအနေ ကြုံရပေမယ့် အကောင်းဆုံးယုံကြည်ခြင်းနှင့်ဖြတ်ကျော်တဲ့သူတိုင်းဟာ ပိုကောင်းတဲ့အရာတွေ မြင်တွေ့ခံစားရစမြဲပါ။ ယနေ့ရင်ဆိုင်ရနေရတဲ့ အရာတွေကြောင့်စိတ်မပျက်နှင့် အကောင်းဆုံး ယုံကြည်ခြင်းနှင့်သာ ဆက်လျောက်ပါ။အကောင်းဆုံးသောအရာတွေပေါ်ထွက်လာမယ်။

နိုဝင်ဘာလ ၁၁ရက်နေ့

တစ်ကယ်လို့များ (၄)

သို့ဖြစ်၍ အကျွန်ုပ်​သည် ဤမျှလောက်​ကြီးမား​သော​မကောင်းမှု​ကို​ပြု​၍ ဘုရားသခင်​ကို ပြစ်မှား​ရ​ပါ​မည်လော​”​ဟု ဆို​လေ​၏​။” ကမ္ဘာဦး ၃၉:၉

တကယ်လို့များ ယောသပ်ဟာ ဘုရားသခင်ထံက လာတဲ့ အိမ်မက်ရူပါရုံတွေကို မယုံခဲ့ဘူးဆိုရင်၊ အမှောင်ဖုံးလွှမ်းတဲ့ ကာလတွေမှာ ဘုရား အတူမရှိခဲ့ဘူးဆိုရင်၊ ပေါတိဖါဇနီး သွေးဆောင်တဲ့အခါမှာ ဘုရားကိုမကြောက်ပဲ နီးရာဓားဖြစ်တဲ့အလုပ်ရှင်ကိုပဲ ကြောက်ခဲ့မယ်ဆိုရင် လူသန်းပေါင်းများစွာ ကြုံတွေ့ရမယ့် အငတ်ဘေးကြီးကနေ ကယ်တင်တဲ့ သူတစ်ယောက် ဘယ်တော့မှ​ဖြစ်လာတော့မှာမဟုတ်တာသေချာတယ်။ သူ့ရဲ့ဆွေမျိုး (၇၀) အတွက် ရှင်သန်ဖို့ ကူညီနိုင်တဲ့သူလဲ မဖြစ်နိုင်တော့သလို၊ ချစ်ရတဲ့အဖေနဲ့လဲ ပြန်လည်ဆုံတွေ့ဖို့ ဘယ်လိုမှ မဖြစ်နိုင်တော့ပါဘူး။ ဘုရားပေးတဲ့အိမ်မက်တွေကို ယုံကြည်ပြီးတော့ ဘုရားအတူရှိခြင်းအားဖြင့် သွေးဆောင်မူတွေကိုကျော်လွန်ခဲ့ခြင်းက လူသန်းပေါင်းများစွာရဲ့ဘဝတွေကို ကယ်တင်ပေးခဲ့နိုင်သူဖြစ်လာတယ်။

နိုဝင်ဘာလ ၉ရက်နေ့

တစ်ကယ်လို့များ (၃)

“ယာကုပ်​ကို ငါ​ချစ်​၏။ ဧသော​ကို​မူကား ငါ​မုန်း​၏”​ဟု ကျမ်းစာ​၌​ရေး​ထား​သည့်​အတိုင်း​ဖြစ်​၏။” ရောမ ၉:၁၃

တစ်ကယ်လို့များ ယာကုပ်က မမွေးခင်ကတည်း ဘုရားပေးတဲ့ပရောဖက်ပြုချက်ကိုမရခဲ့ဘူးဆိုရင် တစ်ကယ်လို့များယာကုပ်က ဘုရားပေးတဲ့ ကတိတော်ကို မယုံကြည်၊ လိုချင်တဲ့ပြင်းပြတဲ့ စိတ်မရှိခဲ့ဘူးဆိုရင် တစ်ကယ်လို့များ ယာကုပ်က ကောင်းကင်တမန်နှင့် လုံးထွေးတဲ့အခါမှာ လွယ်လွယ်လေးနဲ့ လက်လျော့ အရှုံးပေးလိုက်မယ်ဆိုရင် တစ်ကယ်လို့များ ယာကုပ်က ဉီးလေးလာဗန်ရဲ့လှည့်စားမှုတွေကိုရင်ဆိုင်ဖို့ ဘုရားဆီက ရူပါရုံသာ မရခဲ့ဘူးဆိုရင်

ယာကုပ်ဆိုတာ လူလိမ်ဘဝနဲ့ပဲ​ဘဝကိုအဆုံးသတ်သွားပြီးတော့ သားဉီးကောင်းကြီးမင်္ဂလာနှင့် ဝေးသွားပါလိမ့်မယ်။သမိုင်းတစ်ခုလုံး ရဲ့ ဖခင်ကြီးတစ်ဉီးအနေနဲ့ ရပ်တည်နိုင်စေတာက ဘုရားပြောတဲ့စကားကို ယုံကြည်ပြီးတော့ လွယ်လွယ်နဲ့ လက်မလျော့ခဲ့လို့ပဲ မဟုတ်လား? သင်လဲ လက်မလျော့သေးသရွေ့ အခွင့်အရေး ရှိပါသေးတယ်။

နိုဝင်ဘာလ ၈ရက်နေ့

တစ်ကယ်လို့များ (၂)

“သင်​သည် ဤ​အ​မှု​ကို​ပြု၍၊ သင်၏​သား၊ သင်၌​တစ်​ယောက်​တည်း​သော​သား​ကို၊ ငါ့​အား​မ​ငြင်း​သော​ကြောင့်၊” ကမ္ဘာဦး ၂၂:၁၆

တကယ်လို့များ အာဗြဟံက ဘုရားတောင်းတဲ့ တစ်ဦးတည်းသော သားကို မပေးရဲပဲ ငြင်းခဲ့မယ်ဆိုရင် သေချာတာကတော့ ကောင်းကင်ကြယ်တွေလို များပြားတဲ့ သူတွေရဲ့ အဘ နေရာမှာ ဘယ်တော့မှ ရောက်လာတော့မှာ မဟုတ်ဘူး။ ဘုရားတောင်းတာ သာ မပေးရဲရင် သူလိုတဲ့အရာတွေလဲ အသက်တာမှာ လွယ်လွယ်နဲ့ ဘယ်ရမလဲ။ သူလိုတာ အားလုံး ဘုရားပေးတာက ဘုရားတောင်းတာ အားလုံး သူပေးရဲခဲ့လို့ ပါ။ ဘုရားသခင်က လူတွေ လိုအပ်တဲ့ သူ့ရဲ့ တစ်ပါးတည်းသော သားကို လောကသားတွေအတွက်အရင်ပေးတာ မဟုတ်ဘူး။ အာဗြဟံကသူ့ရဲ့သားကို ဘုရားတောင်းတဲ့ အတိုင်း အရင်ပေးတာပါ။

နိုဝင်ဘာလ ၇ရက်နေ့

တစ်ကယ်လို့များ

“အာ​ဗြံ​သည် ထာ​ဝ​ရ​ဘု​ရား​ကို​ယုံ​ကြည်​သည်​ဖြစ်၍၊ သူ၏​ယုံ​ကြည်​ခြင်း​ကို ဖြောင့်​မတ်​ခြင်း​ကဲ့​သို့ မှတ်​တော်​မူ၏။” ကမ္ဘာဦး ၁၅:၆

တကယ်လို့များ အာဗြဟံသာ ဘုရားအသံမကြား ခဲ့ဘူး၊ ကြားခဲ့ရင်လဲနာခံဖို့ယုံကြည်ဖို့ ပျက်ကွက်ခဲ့တယ်ဆိုရင်ဘယ်လိုဖြစ်မလဲ? သေချာတာကတော့ သမိုင်းတစ်ခုလုံးက ပြောင်းပြန်ဖြစ်သွားမယ်။ သားသမီးမရှိပဲ အမြုံဘဝနဲ့အဆုံးသတ်လိုက်ရတဲ့ လူမသိသူမသိပဲအဆုံးသတ်ခဲ့ရတဲ့ သာမည လူတစ်ယောက်သာ ဖြစ်မှာသေချာတယ်။ သမိုင်းတစ်ခုလုံးမှာ အလွှမ်းမိုးဆုံးနဲ့ အရေးကြီးဆုံး လူအဖြစ်မှတ်တမ်းတင်ခဲ့ပြီး အကြီးမားဆုံး သမိုင်းဝင် အဖြစ်ရှင်သန်ခဲ့ခြင်းဟာ ဘုရး အသံကြားခွင့်ရခဲ့တာကြောင့်ရော၊ ကြားခဲ့တဲ့ဘုရားစကားကို ယုံကြည်ခဲ့ခြင်းကြောင့် သာဖြစ်တယ်။

နိုဝင်ဘာလ ၆ရက်နေ့

ကောင်းတယ်လို့ပဲပြောပါ

“ဖြောင့်မတ်​သော​သူ​တို့​သည် မိမိ​တို့​လုပ်ဆောင်မှု​၏​အသီးအပွင့်​ကို​စား​ရ​မည်​ဖြစ်​သောကြောင့် ကောင်း​ပေ​သည်​ဟု သူ​တို့​အား ပြောကြား​လော့​။” ဟေရှာယ ၃:၁၀

ဘာတွေဖြစ်လာမလဲဆိုတာ ကိုယ်ဘယ်သူလဲဆိုတာနဲ့ပဲဆိုင်တယ်။ အခြေအနေတွေဘယ်လိုပဲဖြစ်နေပါစေ၊ လူတွေဘာတွေပဲ ကိုယ့်အပေါ်မှာ လုပ်နေပါစေ အရေးမကြီးဘူး၊ ဖြောင့်မတ်သူ အတွက်တော့ ကိုယ်စိုက်ထားတဲ့ကောင်းတဲ့အသီးအပွင့်တွေကို ဘုရားက အချိန်တိုင်းနေရာတိုင်းမှာခံစားစေမယ်။ လက်ရှိမှာ အဆိုးတွေဖြစ်နေရင်လဲ​ကောင်းမယ်လို့ပဲ သူတို့ကိုပြောရမယ်လို့ ပရောဖက်ဟေရှာယအားဖြင့် ဘုရားက ဆိုတယ်။

နိုဝင်ဘာလ ၅ရက်နေ့

သေးသေးလေးပါ

“ဤ​အမှု​သည် ထာဝရဘုရား​အဖို့ သေးငယ်​သော​အမှု​သာ​ဖြစ်​၏​။

နိုင်ငံသုံးခုပေါင်းပြီး စစ်ချီလာတဲ့အချိန်မှာ ကြုံတွေ့ရတဲ့ အခက်အခဲကို ဘုရင်တွေလည်း မဖြေရှင်းနိုင်သလို၊ လူတွေမှာလည်းအဖြေမရှိခဲ့ပါ။ စစ်မရောက်ခင်ကတည်းက သောက်ရေ မရှိတဲ့အတွက် ဆုံးရှုံးရဖို့ကြုံခဲ့ရပြီး လူတွေ အတွက် ဘယ်လိုမှ မဖြေရှင်းနိုင်တဲ့အရာကို ဘုရားလူထံ ရောက်လာတဲ့အခါမှာတော့ လွယ်လွယ်လေးနဲ့ ဖြေရှင်းပေးခဲ့တယ်။ လူတွေအတွက်ခက်တိုင်း ဘုရားအတွက် ခက်ခဲတတော့မဟုတ်ဘူး။ ဘုရားကို အားကိုးမယ်၊ ဘုရားနည်းနဲ့ဖြေရှင်းမယ်ဆိုရင် အခက်အခဲဆိုတာကို ရှိမှာမဟုတ်တော့ဘူး။

နိုဝင်ဘာလ ၂ရက်နေ့

ချီးမြှောက်ခြင်းနှင့် ဂုဏ်အသရေ

ငါ့​ကို ချီး​မြှောက်​သော သူ​တို့​ကို ငါ​ချီး​မြှောက်​မည်။ ငါ့​ကို မ​ထီ​မဲ့​မြင်​ပြု​သော သူ​တို့​သည် ဂုဏ်​အ​သ​ရေ​ပျက်​ရ​ကြ​လိမ့်​မည်။” ၁ဓမ္မ ၂:၃၀

လူတိုင်းချီးမြှောက်ခြင်းကိုသဘောကျနှစ်သက်သလို၊ ဂုဏ်အသရေရှိချင်ကြတဲ့သူချည်းပဲ။ လူဆီကလာတဲ့ချီးမြှောက်ခြင်းနှင့်လူရှေ့မှာရတဲ့ ဂုဏ်အသရေတောင် ကြီးမားတဲ့ အခွင့်အရေးတွေ ယူဆောင်လာပေးတယ်ဆိုရင် ဘုရားဆီကနေလာတဲ့ ချီးမြှောက်ခြင်းနှင့်ဂုဏ်အသရေက ဘယ်လောက်တောင် ကောင်းမလဲစဉ်းစားကြည့်။ ဘုရားဆီကနေ တကယ်ပဲချီးမြှောက်ခြင်းနှင့် ဂုဏ်အသရေကို လိုချင်တယ်ဆိုရင် တခြားအရာမလိုပါဘူး။ ဘုရားကို အမှန်တကယ် ချီးမြှောက် တတ်ဖို့ပဲလိုပါတယ်။

နိုဝင်ဘာလ ၁ရက်နေ့

မျက်နှာမပျက်

“သူ​တို့​သည် ခဲ​ယဉ်း​သော​ကာ​လ၌ မျက်​နှာ​မ​ပျက်၊ အ​စာ​ခေါင်း​ပါး​သည်​ကာ​လ၌ ဝ​စွာ​စား​ရ​ကြ၏။” ဆာလံ ၃၇:၁၉

ဘဝ ပျက်လောက်တဲ့ အခက်အခဲ မပြောနဲ့၊ မျက်နှာ ပျက်လောက်တဲ့အခက်အခဲတောင်ရင်ဆိုင်ရဖို့ မရှိဘူး။ အခက်အခဲဆိုတာ ကြုံရရင်တောင်၊ ပြိုကျပျက်ဆီးပြီး ဘဝပျက်ဆီးအောင်မလုပ်နိုင်ပါဘူး။ ဘုရားနှင့်တည်ဆောက်တဲ့ဘဝလောက်ခိုင်ခံ့ပြီးတော့ ပြီးပြည့်စုံတာ အခြားမရှိဘူး။ ဘုရားတည်ဆောက်တာကိုလည်း ဖြိုချနိုင်လောက်အောင် အားကြီးတဲ့ သူမရှိဘူး။ ဘယ်လိုအခြေအနေ မျိုးမဆို တာဝန်ယူပြီးတော့ ကောင်းကြီးပေးနိုင်တဲ့ဘုရားကို ပိုင်ဆိုင်ထားတာလောက်မြတ်တဲ့ဘဝ ဘာရှိသေးလဲ?

အောက်တိုဘာလ ၃၁ရက်နေ့

ဘယ်တော့မှ မမေ့နဲ့

“အို ငါ့​ဝိ​ညာဉ်၊ ထာ​ဝ​ရ​ဘု​ရား​ကို ကောင်း​ချီး​ပေး​လော့။ ကျေး​ဇူး​တော်​အ​ပေါင်း​ကို မ​မေ့​လျော့​နှင့်။” ဆာလံ ၁၀၃:၂

ဘယ်လောက်ပဲ မှတ်ဉာဏ်ကောင်းတယ်ပြောပြော လူဟာ မေ့တတ်ပါတယ်။ မမေ့သင့် မမေ့ထိုက်တဲ့အရာတွေကို မေ့သွားတယ်ဆိုရင် ကိုယ့်အတွက် အင်မတန်နစ်နာတယ်။ တခြားအရာတွေမေ့ချင်မေ့ပါစေ ဘုရားပြုပေးတဲ့ ကျေးဇူးတော်အပေါင်းကိုတော့ ဘယ်တော့မှ မမေ့လိုက်နဲ့။ ကျေးဇူးတော်ကို မေ့လျော့ သွားရင်တော့ သင့်ဘဝမှာ ကောင်းတဲ့အရာတွေအားလုံးနဲ့ကင်းကွာသွားဖြစ်စေလိမ့်မယ်။ နေ့စဉ်အောင်မြင်စွာ ရှင်သန်နေရခြင်းရဲ့တစ်ခုထဲသော လျှို့ဝှက်ချက်က ကျေးဇူးတော်အပေါင်းရဲ့ မစပို့ဆောင်မှုကြောင့်ဖြစ်တယ်။

အောက်တိုဘာလ ၃၀ရက်နေ့

အထဲက လုပ်ဆောင်ပေးနေသော တန်ခိုးတော်

“ငါ​သည်​လည်း တန်ခိုး​တော်​အားဖြင့် ငါ့​အထဲ၌​လုပ်ဆောင်​နေ​သည့် ကိုယ်တော်​၏​လုပ်ဆောင်​မှု​အတိုင်း ထို​အမှု​အတွက် ကြိုးစား​အားထုတ်​နေ​၏။” ကောလောသဲ ၁:၂၉

လူတွေက မလုပ်နိင်ဘူး၊ မတတ်နိုင်ဘူးကိုလွယ်လွယ်ပြောတတ်ကြတယ်။ အရည်အချင်းအပေါ်မှာ ကြည့်ပြီးတော့လုပ်ရင်တော့ ဟုတ်တာပေါ့။ ဘုရားသားသမီးတွေက အရည်အချင်းနဲ့ အသက်ရှင်တာမှမဟုတ်တာ။ အထဲမှာ ရှိတဲ့ ဘုရားရဲ့တန်ခိုးတော် အားဖြင့် ရှင်သန်တတ်မယ်ဆိုရင်မလုပ်ဆောင်နိုင်တာ ၊မတတ်နိုင်တာ ဆိုတာ ရှိကိုရှိတော့မှာမဟုတ်ဘူး။

အောက်တိုဘာလ ၂၉ရက်နေ့

ကောင်းကျိုးချမ်းသာအတွက် အကြံအစည်

“သင်​တို့​သည် အကျွန်ုပ်​ကို မကောင်း​ကြံစည်​ခဲ့​သော်လည်း ယနေ့​မြင်​ရ​သည့်​အတိုင်း များစွာ​သော​လူ​တို့​အသက်ချမ်းသာ​ရာ​ရ​စေရန် ဘုရားသခင်​သည် ကောင်းကျိုးချမ်းသာ​အတွက် ကြံစည်​တော်မူ​၏​။” ကမ္ဘာဦး ၅၀:၂၀

အဆိုးတွေ ကြုံလို့ ဘဝက ဆိုးသွားတာမဟုတ်ပါဘူး။ ဒုက္ခပေးတဲ့သူတွေ ၊ကိုယ့်ကို တိုက်ခိုက် နှောင့်ယှက်သူတွေကြောင့်လဲ ဘဝက ဆိုးရွားသွားစရာမရှိဘူး။ ယောသပ် ဘဝအသက်တာကိုပဲကြည့်။သူ့လောက် အဆိုးဆုံး လုပ်ကြံခံရတာ ဘယ်သူရှိအုံးမလဲ? အကိုတွေ ရဲ့ လုပ်ရပ်က ဘဝတစ်ခုလုံးကို အဆုံးသတ်သွားစေအောင် လုပ်ဆောင်ခဲ့ပေမယ့် ဘုရားအကြံစည်ကို ဖျက်ဆီးဖို့တော့ မလုပ်ဆောင်နိုင်ခဲ့တာသေချာတယ်။ သူတို့ရဲ့ မကောင်းဆုံးအကြံအစည်က ဘုရားရဲ့အကောင်းဆုံးအကြံစည်ကို ပြည့်စုံဖို့အတွက် ကူညီတဲ့အရာတစ်ခုပဲဖြစ်လာခဲ့တယ်။

အောက်တိုဘာလ ၂၈ရက်နေ့

မရမချင်း

ယာ​ကုပ်​က၊ ကိုယ်​တော်​သည် အ​ကျွန်ုပ်​ကို​ကောင်း​ချီး​မ​ပေး​လျှင်၊ မ​သွား​ရ​ဟု​ဆို၏။” ကမ္ဘာဦး ၃၂:၂၆

ယာကုပ်ဟာ ဘုရားထံကလာတဲ့ ကောင်းကြီးနဲ့ပတ်သက်ပြီးတော့ ဘယ်အရွယ်ပဲရောက်ရောက်လိုချင်တဲ့စိတ် မပြောင်းသွားဘူး။ တချို့က ငယ်ငယ်ကလိုချင်တဲ့အရာ လူငယ်ဖြစ်လာတော့မလိုချင်တော့တဲ့အရာတွေရှိသလို၊ အသက်ကြီးလာရင် ပိုဆိုးသွားတယ်။ ယာကုပ်က ကလေးဘဝ မှာရော လူငယ်ဘဝမှာရော သားသမီးတွေအများကြီးနဲ့ဖခင်တစ်ယောက် ဖြစ်လာတဲ့အချိန်မှာပါ ဘုရားထံကလာတဲ့ကောင်းကြီးနဲ့ပတ်သက်ရင် ဘယ်တော့မှ​ မပြောင်းလဲသွားဘူး။ အကိုနဲ့တွေ့တဲ့အချိန်လည်း ဘုရားကောင်းကြီး သူ့ကိုပေးဖို့ပြောခဲ့ သလို အဖေနဲ့တွေ့တဲ့အချိန်လည်း ဒါပဲထပ်တောင်းဆိုတယ်။ နောက်ဆုံး ဘုရားသခင်နှင့် ထိတွေ့တဲ့အခါမှာလည်းသူ့ရဲ့ ပြင်းပြတဲ့ ဆန္ဒဟာ မပြောင်းသွားဘူး။

အောက်တိုဘာလ ၂၆ ရက်နေ့

ပြင်ဆင်ထားတယ်

“ထို​အရပ်​ကို “​ထာဝရဘုရား ပြင်ဆင်​တော်မူ​မည်​”​ဟူသော​အမည်​ဖြင့် အာဗြဟံ​ခေါ်​သည့်​အတိုင်း ယနေ့​တိုင်အောင် “​ထာဝရဘုရား​၏​တောင်​ပေါ်၌ ပြင်ဆင်​ထား​ပေ​လိမ့်မည်​”​ဟု ဆို​လေ့​ရှိ​၏​။” ကမ္ဘာဦးကျမ်း ၂၂:၁၄

လိုအပ်တဲ့အရာကို လိုအပ်တဲ့အချိန်မှာ ဘုရားပြင်ဆင်ထားတာ မြင်ခြင်တယ်ဆိုရင်၊ ဘုရား ပြောတဲ့အတိုင်း နာခံပြီးတော့ ပြတဲ့အရပ်ကို သွားတတ်ဖို့လိုတယ်။ ဘုရားပြောတဲ့ အရပ်မှာ သင့်မှာမရှိတဲ့ လိုအပ်တဲ့အရာ မှန်သမျှကို သင့်အတွက် ဘုရားကကြိုတင်ပြင်ဆင်ထားပြီးသားဆိုတာ နာခံပြီးသွားတဲ့ သူတိုင်းက တွေ့ရှိရမယ်။ ရှိတဲ့အရပ်မှာပဲ ဘုရားပြင်ဆင်ပေးပါ လို့ဆုတောင်းနေတဲ့သူတချို့အတွက်ကတော့ ပြင်ဆင်ထားတာနဲ့ လွဲနေအုံးမှာသေချာတယ်။ တချို့မေးခွန်းတွေရဲ့အဖြေက နာခံခြင်းနဲ့လုပ်ဆောင်ပြီးမှာပဲ ရပါလိမ့်မယ်။

အောက်တိုဘာ ၂၅ရက်နေ့

အလျှင်အမြန်(၅)

“အ​ဘ​ဣ​ဇာက်​က​လည်း၊ ငါ့​သား၊ ဤ​မျှ​လောက် လျင်​မြန်​စွာ​တွေ့​ရ​သော​အ​ကြောင်း​ကား၊ အ​ဘယ်​သို့​နည်း​ဟု သား​အား​မေး​လျှင်၊ အ​ဘ၏​ဘု​ရား​သ​ခင်​ထာ​ဝ​ရ​ဘု​ရား​သည် အ​ကျွန်ုပ်​ရှိ​ရာ​သို့ ဆောင်​ခဲ့​တော်​မူ​သော​ကြောင့်၊ လျင်​မြန်​စွာ​တွေ့​ရ​ပါ​သည်​ဟု ပြန်​ဆို​လေ၏။” ကမ္ဘာဦး ၂၇:၂၀

ခက်ခဲတဲ့အလုပ်ထဲမှာ ရှာဖွေရတဲ့အရာလဲတစ်ခုအပါအဝင်ဖြစ်တယ်။ တခြားအရာတွေမပြောနဲ့ အိမ်မှာ နေရင်းတောင် ကိုယ့်ပစ္စည်းနဲ့ကိုယ်တောင် ပျောက်နေတဲ့အရာတွေကို ရှာတွေ့ဖို့ တော်တော်လေးအချိန်ပေးရတယ်။ ကောင်းကြီးပေးဖို့ စားစရာရှာခိုင်းတဲ့နေရာကနေ ဧသောအစားယာကုပ်ရောက်လာတဲ့အခါမှာ ဣဇါက် အံ့ဩခဲ့ရတယ်။ ဘာကြောင့်များ ဒီလောက်တောင် မြန်တာလဲ? ဧသောနေရာမှာ အစားဝင်ခဲ့တဲ့ ယာကုပ်က ပြန်ဖြေတယ် ကျွန်တော်ရဲ့ကြိုးစားမှုကြောင့်ဆိုရင်တော့ ကြာနိုင်တယ် ဒါပေမယ့် ဘုရားက ကျွန်တော်ရှာနေတဲ့အရာကို ယူဆောင်လာတဲ့အတွက် လျင်မြန်စွာ ရရှိတယ်လို့ဖြေတယ်။ ဒီအရာက တကယ့်ကို အရေးကြီးတဲ့ အရာတစ်ခုဖြစ်တယ်လို့ယုံတယ်။ ကိုယ်ရှာတာထက် ဘုရားက ကိုယ်ရှာနေတဲ့အရာကို ဆောင်ယူခဲ့ရင် လူတွေ လုပ်နိုင်တာထက် ပိုလျင်မြန်စွာ တွေ့ရှိပါလိမ့်မယ်။

အောက်တိုဘာလ ၂၄ရက်နေ့

အလျှင်အမြန်(၄)

“ထိုအခါ အာဗြဟံ​သည် တဲ​ထဲ၌​ရှိ​သော​စာရာ​ထံသို့ အလျင်အမြန်​ဝင်သွား​ပြီး “​အကောင်းဆုံး​ဂျုံမှုန့် သုံး​စေအာ​ကို​နယ်​၍ မုန့်ပြား​များ အမြန်​လုပ်​ပါ​”​ဟု ဆို​၏​။” ကမ္ဘာဦးကျမ်း ၁၈:၆

ယုံကြည်ခြင်းဖခင်လို့ ခေါ်ခြင်းခံရတဲ့ အာဗြဟံက ဘုရားနှင့်ပတ်သက်ပြီးတော့ပဲ အမြဲတမ်းတက်ကြွနေတာမဟုတ်ပဲ ဧည့်သည်ဝတ်ပြုခြင်းမှာလည်း အမြဲတမ်း တက်ကြွနေတတ်တယ်။ အသက်အရွယ်နှင့်မဆိုင်တဲ့ လျှင်မြန်ခြင်း သူ့ဆီမှာတွေ့ရတယ်။ ဘာကြောင့်များ အသက် တရာကျော်ပေမယ့် ဘုရားရဲ့ရွေးကောက်ခြင်းနှင့် ချီးမြှောက်ခြင်း ရောက်လာသလဲလို့ မေးခွန်း ထုတ်ခဲ့မယ်ဆိုရင် ဘယ်အရာကိုမဆို အလျှင်အမြန် လုပ်ဆောင်လေ့ရှိတဲ့ အရာကလဲ ချန်ထားခဲ့လို့ရမယ် မထင်ဘူး။ သူဟာ ဖခင်နဲ့ မတူတဲ့အရာကလဲ ဒီအရာပဲ။ သူ့ဖခင်နာမည်က တေရဖြစ်ပြီး အဓိပ္ပါယ်က နှေးကွေးခြင်းလို့အဓိပ္ပ္ပါယ်ရတယ်။ ဒါကြောင့် သူနဲ့မခွဲမခွါသရွေ့ ကြီးမားတဲ့ကောင်းကြီးတွေ​ မရ ရှိခဲ့ဘူး။

အောက်တိုဘာလ ၂၃ရက်နေ့

အလျှင်အမြန်(၃)

“သို့​ပြု​လျှင် သင်၏​အ​လင်း​သည် မိုး​သောက်​သော အ​လင်း​ကဲ့​သို့​ပေါ်​ထွန်း၍၊ အ​လျင်​အ​မြန် ကျန်း​မာ​ခြင်း​သို့​ရောက်​လိမ့်​မည်။ သင်၏ ဖြောင့်​မတ်​ခြင်း​ပါ​ရ​မီ​သည် သင့်​ရှေ့၌ သွား၍၊ ထာ​ဝ​ရ​ဘု​ရား၏​ဘုန်း​တော်​သည် နောက်၌ လုံ​ခြုံ​စေ​လိမ့်​မည်။” ဟေရှာယ ၅၈:၈

အလင်းသွား နှုန်းလောက်မြန်တာ ဘာများရှိအုံးမလဲ? ဘုရားက မှန်ကန်တဲ့သူ့မျက်နှာ ရှာတဲ့သူတွေ နောက်မှာ ဘုန်းတော်နှင့်လွှမ်းခြုံပြီးတော့ရှေ့ကနေ ဖြောင့်မတ်ခြင်း ပါရမီကို သွားစေတယ်။ အလင်းလိုတောက်ပပြီးတော့ မကျန်းမာခြင်းတွေဟာ အလျှင်အမြန်ကွယ်ပျောက် ကာ ကောင်းမွန်တဲ့ နေ့ရက်တွေကို ပို့ဆောင်ပေးလိမ့်မယ်။ အလင်းရဲ့သားတစ်ယောက်ရဲ့ဘဝလောက် လျှင်မြန်တဲ့နှုန်းနဲ့ ရှင်သန်နိုင်တာ ဘာများရှိအုံးမလဲ? အမှောင်တွေ သေချာ ပေါက်ဘေးကိုဖယ်ပေးရမယ်။

အောက်တိုဘာလ ၂၂ရက်နေ့

အလျှင်အမြန်(၂)

“အ​ရှင်​ထာ​ဝ​ရ​ဘု​ရား​သည် ငါ၏​အ​စွမ်း​သ​တ္တိ ဖြစ်​တော်​မူ၏။ ငါ့​ခြေ​ကို သ​မင်​ခြေ​ကဲ့​သို့​ဖြစ်​စေ၍၊ ငါ၏​မြင့်​ရာ အ​ရပ်​ပေါ်​မှာ ငါ့​ကို​နေ​ရာ​ချ​တော်​မူ​မည်။ ဟဗက္ကုတ် ၃:၁၉

ဘာမှ မျှော်လင့်စရာမရှိတဲ့ အခြေ၊ အဆိုးဆုံး အရာတွေကို ရင်ဆိုင်ကြုံတွေ့ရတဲ့အချိန်မှာ သင်ဘယ်လို ရင်ဆိုင်တုန့်ပြန်သလဲ? အရေးကြီးဆုံးက ဘာတွေရင်ဆိုင်နေရတယ်ဆိုတာထက် ဘယ်လို ရင်ဆိုင်တုန့်ပြန်သလဲ ဆိုတာပါပဲ။ ပရောဖက်ဟဗက္ကုတ်က သူ့ရင်ဆိုင်ရတဲ့အရာတွေက ဘာတစ်ခုမှ ရစရာမရှိတဲ့အခြေအနေတွေဖြစ်ပေမယ့် ဘုရားနှင့် ဝမ်းမြောက်စွာဖြတ်သန်းဖို့ ဆုံးဖြတ်ခဲ့တယ်။ သူနားလည်ယုံကြည်ထားတဲ့အရာက ဘာလဲဆိုရင် ဘုရားကပဲသူ့ရဲ့အရာခပ်သိမ်းဆိုတာပါပဲ။ ဒါကြောင့် ဘုရားက သူ့ရဲ့ခြေကို သမင်လိုပဲ မြန်စေပြီးတော့မြင့်ရာအရပ်မှာ နေရာချ မယ်ဆိုတာသူစိတ်ချတယ်။

အောက်တိုဘာလ ၂၁ရက်နေ့

အလျှင်အမြန်

“ငါ့​ခြေ​ကို သ​မင်​ခြေ​ကဲ့​သို့ လျင်​မြန်​စေ၍၊ ငါ၏​မြင့်​ရာ​အ​ရပ်​ပေါ်​မှာ ငါ့​ကို​တင်​ထား​တော်​မူ၏။” ဆာလံ ၁၈:၃၃

ဆာလံဆရာဒါဝိဒ်အသက်တာကို ကြည့်ရင် ဘုရားသခင်ရဲ့ ဆွဲခေါ်ပို့ဆောင်ခြင်းက ဘယ်လောက်လျှင်မြန်သလဲဆိုတာကို တွေ့ရတယ်။ သိုးကျောင်းသား ဘဝကနေ လူတိုင်းရောက်ချင်တဲ့ နန်းတော်ထဲကို အခက်အခဲတွေကို ကျော်လွန်ပြီး အလွန်မြန်သောနှုန်းနဲ့ ရောက်ရှိသွားတယ်။ ဘယ်လိုကြောင့်များ ဒီလို အသက်တာမျိုးပိုင်ဆိုင် ခွင့်ရသလဲလို့ မေးရင်တော့ ဘုရားသခင်က သူ့ရဲ့ခြေကို သမင်ခြေကဲ့သို့ လျင်မြန်စေတယ်လို့သူက ပြန်ဖြေထားတယ်။ သင်သွားနေတဲ့ပန်းတိုင်ကိုရောက်ဖို့ လိပ်ရဲ့ခြေလှမ်းတွေနဲ့ သမင်ရဲ့ခြေလှမ်းတွေတူမှာမဟုတ်ဘူး။ ဘုရားက ဘယ်သူမှ လိိုက်လို့မမှီနိုင်တဲ့ သမင်ရဲ့ ခြေလို ဖြစ်စေမယ်။ ဘယ်တော့မှ​အနိမ့်မှာ မထားဘူး၊ မြင့်တဲ့အရပ်မှာပဲသင့်ကို ခြေချခွင့်ပေးမယ်။

အောက်တိုဘာလ ၁၉ရက်နေ့

ကျန်းမာခြင်း (၄)

“အ​ကြောင်း​မူ​ကား၊ ထို​တ​ရား​စ​ကား​ကို တွေ့​ရ​သော​သူ​တို​သည် အ​သက်​ရှင်​ခြင်း၊ တစ်​ကိုယ်​လုံး​ကျန်း​မာ​ခြင်း​အ​ကြောင်း​ကို တွေ့​ရ​ပြီ။” သုတ္တံ ၄:၂၂

တစ်ကိုယ်လုံး ကျန်းမာခြင်း အကြောင်းကို တွေ့ချင်ရင် တခြားနေရာမှာ ရှာလို့မရနိုင်ဘူး။ ကိုယ်ခန္ဓာအစိတ်အပိုင်းတစ်ခုအတွက် ကျန်းမာဖို ကုသတဲ့ ဆေးဟာ အခြား အစိတ်အပိုင်းကို ထိခိုက်စေတဲ့ဘေးထွက်ဆိုးကျိုး ရှိတတ်တယ်။ အစားအစာ တစ်မျိုးက တစ်ခုအတွက်ကောင်းပေမယ့် အခြားတစ်ခုအတွက်တော့ မကောင်းပြန်ဘူး။ ဘယ်အရာကိုမှ မထိခိုက်ပဲ ကျန်းမာစေတဲ့ တစ်ကိုယ်လုံးကျန်းမာစေတဲ့ အရာကတော့ နှုတ်ကပတ်တော်တရားစကားထဲမှာပဲရှိတယ်။

အောက်တိုဘာလ ၁၈ရက်နေ့

ကျန်းမာခြင်း (၃)

“လျှာ​သည် အ​သက်​သေ​ခြင်း​နှင့် ရှင်​ခြင်း​ကို​အ​စိုး​ရ၏။ လျှာ​ကို​နှစ်​သက်​သော​သူ​သည်​လည်း၊ လျှာ၏​အ​သီး​ကို စား​ရ၏။” သုတ္တံ ၁၈:၂၁

နေမကောင်းလို့ ဆေးခန်းသွားပြတဲ့အခါမှာ ဆရာဝန်က ကိုယ်ခန္ဓာရဲ့ အခြေအနေကိုသိရအောင် လျှာကိုစစ်ဆေးကြည့်ရှုလေ့ရှိတယ်။ လျှာက ကျန်းမာရေးကို ကောင်း၊ မကောင်းဖေါ်ပြနိုင်တယ်။ နှုတ်ကပတ်တော်ကလဲ လျှာက သေခြင်းနှင့်ရှင်ခြင်းကို ထိန်းချုပ်ထားတယ်လိုဆိုတယ်။ ကျန်းမာတဲ့ လျှာက ကျန်းမာတဲ့ကိုယ်ခန္ဓာကိုဖန်တီးတယ်။ တကိုယ်လုံးကျန်းမာချင်တယ်ဆိုရင် လျှာကို ထိန်းသိမ်း ဖို့လိုတယ်။ ကျန်းမာခြင်းကို နှုတ်ကနေ ယုံကြည်ခြင်းနှင့် မြွတ်ဆိုတဲ့အခါမှာ ဘုရားသခင်ရဲ့ကျန်းမာခြင်းက သင့်အသက်တာကို နေရာယူလာလိမ့်မယ်။

အောက်တိုဘာလ ၁၇ရက်နေ့

ကျန်းမာခြင်း (၂)

“နှုတ်​က​ပတ်​တော်​ကို​လွှတ်​သ​ဖြင့်၊ သူ​တို​အ​နာ​ကို ငြိမ်း​စေ၍၊ ဖျက်​ဆီး​ခြင်း​အ​ရာ​များ​ထဲ​က နုတ်​ယူ​တော်​မူ၏။” ဆာလံ ၁၀၇:၂၀

အသက်တာမှာ ဘုရားရဲ့နှုတ်တော်ထွက် စကားကိုရဖို့ဘယ်လောက်တောင် အရေးကြီးသလဲ? ကျန်းမာခြင်းအတွက် လိုအပ်တဲ့နှုတ်ကပတ်တော် ရရှိလာတဲ့အခါမှာ ဘယ်တော့မှ​မပျောက်နိုင်တဲ့ ရောဂါတွေလဲ ရုတ်တရက် ကျန်းမာခြင်းကို လက်ခံရရှိစေတယ်။ လူပေါင်းများစွာ ကျန်းမာခြင်းကို လက်ခံမရရှိခြင်းက နှုတ်ကပတ်တော်ကိုအရင် မရရှိသေးလို ပါ။ နှုတ်ကပတ်တော်ကို တကယ် အသက်တာမှာ နေရာပေးလိုက်တာနဲ့ လိုအပ်တဲ့ ကျန်းမာခြင်းကိုမြင်တွေ့ရမှာသေချာတယ်။ နှုတ်ကပတ်တော်က ကျန်းမာခြင်းကို ယူဆောင်လာရုံတင်မကဘူး။ သင့်ကို ဖျက်ဆီးနေတဲ့အရာများစွာမှလဲ ရွေးနုတ်ကယ်တင်နိုင်တယ်။

အောက်တိုဘာလ ၁၆ ရက်နေ့

ကျန်းမာခြင်း

“အ​ချင်း​ချစ်​သူ၊ သင်၏​စိတ်​နှ​လုံး​သည် ကောင်း​စား​သ​ကဲ့​သို့၊ သင်​သည် အ​ရာ​ရာ၌​ကောင်း​စား​ခြင်း​နှင့် ကျန်း​မာ​ခြင်း​ရှိ​မည်​အ​ကြောင်း ငါ​ဆု​တောင်း၏။-” ၃ ယော ၁:၂

ကောင်းစားတဲ့ နှလုံးသားဟာ ကျန်းမာတဲ့ ဘဝကို ယူဆောင်လာပေးတယ်။ နှလုံးသားဟာ အသက်တာရဲ့ အခြေအမြစ်ဖြစ်လို့ နှလုံးသားကို အထူးသဖြင့် စောင့်ရှောက်ဖို့ ရှောလမုန်က သတိပေးတယ်။ နှလုံးခုန်တာ ရပ်သွားရင် ကျန်တာ အားလုံးလည်း ပြီးဆုံးသွားတယ်မဟုတ်လား? ကောင်းမွန်တဲ့နှလုံးသားနဲ့ အရာရာကို တွေးခေါ်တတ်ရင် သေချာတယ် ကောင်းမွန်ပြည့်စုံတဲ့ကျန်းမာတဲ့ဘဝကို ပိုင်ဆိုင်ခွင့်ရပါလိမ့်မယ်။

အောက်တိုဘာလ ၁၅ရက်နေ့

မင်္ဂလာဖြစ်စေသောနှလုံးသား (၈)

“ငါ့​ကြောင့် လူ​တို​သည် သင်​တို​ကို ကဲ့ရဲ့​ပြစ်တင်​လျက် ညှဉ်းဆဲ​ကာ မကောင်း​သော​အရာ​အမျိုးမျိုး​တို​ဖြင့် သင်​တို​ကို မဟုတ်မမှန်​ဆန့်ကျင်​ပြောဆို​ကြ​သောအခါ သင်​တို​သည် မင်္ဂလာရှိ​ကြ​၏။” ရှင်မဿဲခရစ်ဝင် ၅:၁၁

မင်္ဂလာဆိုတာ အမြဲတမ်းကိုယ်ပြောတာ ကိုယ်လုပ်တာကို ထောက်ခံတာ၊ အားပေးတာ၊ အကောင်းပြောပြီးတော့ လူတွေချီးကျူးဂုဏ်ပြုခြင်းခံရတာပဲ မင်္ဂလာမဟုတ်ပါဘူး။ ကိုယ့်ရဲ့ မှန်ကန်တဲ့ယုံကြည်ချက်၊ ဘုရားဖွင့်ပြခြင်းတွေကြောင့် လူတွေရဲ့ မဟုတ်မမှန် ပြောဆိုဝေဖန် တာ၊ တိုက်ခိုက်တာတွေလဲ ခံရတဲ့အခါမှာ စိတ်ပျက်ဖို့၊ နောက်ဆုတ်ဖို့မဟုတ်ပဲ။ အမှားလုပ်လို့ကြုံရတာမဟုတ်ပဲ ဘုရားရဲ့နိုင်ငံတော်၊ နှုတ်ကပတ်တော်ကြောင့် ကြုံရတာ မှန်ရင် ဘုရားပေးတဲ့မင်္ဂသေချာပေါက် ခံစားရမယ်ဆိုတာ ယုံပါ။ အကောင်းပြောခံရမှပဲ ကောင်းတဲ့မင်္ဂလာရရှိတာမဟုတ်ပါဘူး။ ဘုရားနဲ့ပတ်သက်ပြီး မမှန်ပဲ အကောင်းမပြောခံရရင်လဲ မင်္ဂလာ ခံစားရပါတယ်။

အောက်တိုဘာလ ၁၄ရက်နေ့

မင်္ဂလာဖြစ်စေသောနှလုံးသား (၇)

“သူ​တစ်​ပါး​ချင်း ခိုက်​ရန်​ပြု​ခြင်း​ကို ငြိမ်း​စေ​တတ်​သော​သူ​တို​သည် မင်္ဂ​လာ​ရှိ​ကြ၏။ အ​ကြောင်း​မူ​ကား ထို​သူ​တို​သည် ဘု​ရား​သ​ခင်၏​သား​တော်​ဟု ခေါ်​ဝေါ်​ခြင်း​ကို ခံ​ရ​ကြ​လ​တ္တံ့။-”

ရှင်မဿဲ ၅:၉

ဘုရားသားဆိုတာ လူတွေနဲ့ လိုက်ပြီးရန်ဖြစ်နေတဲ့သူတွေလဲ မဟုတ်ဘူး။ အချင်းချင်းကြားမှာ ရန်တိုက်ပေးနိုင်တဲ့သူလဲမဟုတ်ဘူး။ ဘုရားသားလို့ မပြောဖို့သိနိုင်တဲ့ အရာကတော့ ဘယ်သူနဲ့မှလဲ ရန်ဖြစ်တာမရှိသလို အချင်းချင်းကြားမှာလဲ ရန်ငြိမ်းခြင်းကို ယူဆောင်လာတဲ့ သူပဲ။ ရန်ပွဲတွေရဲ့ အဓိက တရားခံဟာနှလုံးသားကြောင့်ပါပဲ။ နှလုံးသား မမှန်တဲ့သူတွေက ရန်ဖြစ်ဖို့ပဲ တာစူနေကြတယ်။ ဘုရားသဘောနှင့်ရှင်သန်တဲ့သူတွေကတော့ ရန်လုပ်တဲ့သူရှိရင်တောင်မှ သခင်ခရစ် တော်ရဲ့ တရားအတိုင်းပဲ တုန့်ပြန်တယ်။ တခြားနည်းလမ်းနဲ့တော့ ဘုရားသားဆိုတာ ဖေါ်ထုတ် တာထက် ရန်ငြိမ်းခြင်းအားဖြင့် ထုတ်ဖေါ်တာဟာမှန်ကန်တဲ့နည်းလမ်း တစ်ခုပါပဲ။

အောက်တိုဘာလ ၁၂ရက်နေ့

မင်္ဂလာဖြစ်စေသောနှလုံးသား (၆)

“စိတ်​နှ​လုံး​ဖြူ​စင်​သော​သူ​တို​သည် မင်္ဂ​လာ​ရှိ​ကြ၏။ အ​ကြောင်း​မူ​ကား၊ ထို​သူ​တို့သည်ဘု​ရား​သ​ခင်​ကိုမြင်​ရ​ကြ​လ​တ္တံ့။-” ရှင်မဿဲ ၅း၈

ဘုရားသခင်ကို လူ့မျက်စိနှင့် မမြင်ရနိုင်တာမဟုတ်ပါဘူး။ ဘုရားကလဲ ဘယ်တော့မှ သူ့ကို မြင်ရမှာမဟုတ်ဘူးလို့မပြောဘူး။ ဓမ္မဟောင်းကျမ်းမှာသာ ဘုရားကိုမြင်ဖို့ခက်တာပါ။ ကျေးဇူးတော်ကာလမှာတော့ဘုရားကိုမြင်ချင်ရင် နည်းလမ်းရှိပါတယ်။ ဘုရားကိုမြင်တာ မမြင်တာဆိုတဲ့အရာမှာ အဓိက ကျတဲ့အရာကတော့နှလုံးသားပါပဲ။ သခင်ယေရှုကတော့ ဆိုတယ် ဘုရားကို မြင်နိုင်တဲ့ နှလုံးသားကတော့ ဖြူစင်တဲ့စိတ်နှလုံးသားပိုင်ရှင်တွေပါပဲ။ ဘုရားကိုမြင်ဖို့ ဘုရားနှလုံးသားလေးတော့ရှိဖို့လိုတယ်။ တခြားနှလုံးသားနှင့်တော့ ဘယ်တော့မှ ဘယ်လိုမှ ဘုရားကိုမြင်နိုင်မှာမဟုတ်ဘူး။

အောက်တိုဘာလ ၁၁ရက်နေ့

မင်္ဂလာဖြစ်စေသောနှလုံးသား (၅)

“သ​နား​စုံ​မက်​တတ်​သော​သူ​တို​သည် မင်္ဂ​လာ​ရှိ​ကြ၏။ အ​ကြောင်း​မူ​ကား၊ ထို​သူ​တို​သည် သ​နား​စုံ​မက်​ခြင်း​ကို ခံ​ရ​ကြ​လ​တ္တံ့။-” ရှင်မဿဲ ၅:၇

ကောင်းသောရှာမာရိအကြောင်းကို သခင်ယေရှုဟောပြောတဲ့အခါမှာ လူပေါင်းများစွာကို မေးခွန်းတစ်ခုမေးခဲ့တယ်။ လမ်းမှာလဲနေတဲ့ ဓါးပြနှိပ်စက်ခဲ့တဲ့သူ နဲ့ စပ်ဆိုင်တဲ့သူဟာ ဘယ်သူလဲ ?

ယဇ်ပုရောဟိတ်တွေ ကျော်သွားခြင်းခံရတယ်၊ လေဝိ လူတွေ လှည့်တောင် မကြည့်ခဲ့တဲ့ လူနာကို၊ လူတွေအထင်သေး ရွံရှာတဲ့ ရှာမာရိလူတစ်ယောက်က အနာကို ဆီနဲ့လူးပေးပြီး စပျစ်ရည် နဲ့ သက်သာစေရုံသာမကပဲ ကုသဖိုအတွက် သူ့ရဲ့မြည်းနဲ့ခေါ်သွားပြီး ကုန်ကျငွေကို တာဝန်ယူခဲ့တယ်။ လူတွေက မကောင်းဘူးလိုသတ်မှတ်တဲ့ ရှာမာရိလူဟာ အမူတော်ဆောင်ကြီးတွေ မြင့်မြတ်ပါတယ် ဆိုတဲ့လူတွေ မလုပ်နိုင်တဲ့ အရာကိုလုပ်ဆောင်ခဲ့တယ်။ ဒီနေရာမှာ ယေရူက မေးခွန်းတစ်ခုမေးတယ်။ ဘယ်သူဟာ ဒီလူနာနဲ့စပ်ဆိုင်သလဲတဲ့။ အဖြေက သနားသောသူလို ဖြေကြတယ်။ ဒီနေ့ သနားစုံမက်ခြင်း မရှိတဲ့ သူအတွက်ကတော့ အရာရာ သူနဲ့ ဆိုင်မှာမဟုတ်ဘူး။ သနားစုံမက်တတ်တဲ့သူအတွက်ကတော့ ဖြစ်ပျက်သမျှအားလုံးက သူ့ နဲ့ဆိုင်တာ ချည်းပဲမို့ အရာရာကို သနားတဲ့စိတ်နှင့် ကူညီလုပ်ဆောင်ပေးဖိုအဆင်သင့်ရှိတယ်။

အောက်တိုဘာလ ၁၀ရက်နေ့

မင်္ဂလာဖြစ်စေသောနှလုံးသား(၄)

“ဖြောင့်​မတ်​ခြင်း​ပါ​ရ​မီ​ကို ဆာ​ငတ်​ခင်​မွတ်​သော​သူ​တို​သည် မင်္ဂ​လာ​ရှိ​ကြ၏။ အ​ကြောင်း​မူ​ကား၊ ထို​သူ​တို​သည် ဝ​ပြော​ခြင်း​သို ရောက်​ကြ​လ​တ္တံ့။-” ရှင်မဿဲ ၅:၆

ကယ်တင်ခြင်းက သခင်ယေရှုကို ယုံကြည်ခြင်း အားဖြင့်သာလက်ခံရရှိသလိုပဲ သန့်ရှင်းသောဝိညာဉ်တော် နှင့်ပြည့်ဝခြင်းကလည်း ဆာငတ်ခြင်း နှလုံးသားအားဖြင့်သာရနိုင်တယ်။ အသက်တာမှာ ပြည့်ဝခြင်းကိုမြင်ချင်ရင် ဘုရားရဲ့ဖြောင့်မတ်ခြင်းကို ဆာငတ်တတ်တဲ့နှလုံးသားဟာ အဓိက ကျတယ်။ လူတွေဟာ ဘုရားနှင့်ဆိုင်တဲ့အရာတွေကို ဆာငတ်ခြင်းပျောက်ဆုံးလာတာနဲ့အမျှ ဝပြောခြင်းလဲ ရှားပါးလာတယ်။ ဘုရားနဲ့ဆိုင်တဲ့အရာတွေကို ဆာငတ်တတ်တဲ့သူတွေအသက်တာကိုကြည့်ရင် ဘုရားက သူတိုအသက်တာကို ဘယ်လောက်တောင် ဝပြောခြင်းနှင့်ဖြည့်ပေးလေ့ရှိသလဲ ဆိုတာ တွေ့ရတယ်။ အထူးသဖြင့်ဒါဝိဒ် ရဲ့ဆာငတ်တဲ့နှလုံးသား ဟာ စံနမူနာပဲ။ ဒါကြောင့်လဲ ဘုရားက သူ့ကို သိုးကျောင်းသားလေးဘဝကနေ လူတိုင်း အားကျတဲ့ ကောင်းမွန်တဲ့အရာတွေနှင့် ပြည့်ဝတဲ့ဘဝကို ပိုင်ဆိုင်ခွင့် ပေးခဲ့တယ်မဟုတ်လား။

အောက်တိုဘာလ ၉ရက်နေ့

မင်္ဂလာဖြစ်စေသောနှလုံးသား(၃)

“စိတ်​နူး​ညံ့​သိမ်​မွေ့​သော​သူ​တို​သည် မင်္ဂ​လာ​ရှိ​ကြ၏။ အ​ကြောင်း​မူ​ကား၊ ထို​သူ​တို​သည် ပြည်​တော်​ကို အ​မွေ​ခံ​ရ​ကြ​လ​တ္တံ့။-” မဿဲ ၅:၅

မြေကြီးပေါ်မှာ ပိုင်ဆိုင်ခွင့်နှင့် အုပ်စိုးခွင့် ဘယ်သူတွေကို ဘုရားကပေးမှာလဲ? ဒီမေးခွန်းကို တောင်ပေါ်ဒေသနာ ကအဖြေပေးထားတယ်။ စိတ်နှလုံးနူးညံ့သိမ်မွေ့ခြင်းရှိတဲ့သူတွေက မြေပေါ်မှာ အုပ်စိုးခွင့်နှင့် အမွေခံစားခွင့်ရမယ်။ ဘုရားက အရည်အချင်းကိုကြည့်တဲ့ဘုရားမဟုတ်ဘူး။ နှလုံးသားကိုပဲကြည့်တဲ့ဘုရား။ တချိန်တုန်းက အဲဂုတ္တုကနေ ကယ်ထုတ် ခြင်း အမှုကို ဉီးဆောင်ခဲ့တဲ့ မောရှေကိုယ်တိုင် ဒီနှလုံးသားရှိခဲ့တယ်။ ဒါကြောင့်လဲ​ဒီလောက်ကြီးတဲ့ အလုပ်ကိုလုပ်ဆောင်နိုင်တာ။ သခင်ယေရှုကိုယ်တိုင်ကလည်း သူ့ထံမှာ နည်းခံဖိုနဲ့ သူ့နှလုံးသားကို သင်ယူဖိုပြောတဲ့အခါမှာ နူးညံ့သိမ်မွေ့ခြင်းနှလုံးသားက သက်သာခြင်း ဝန်ပေါ့ခြင်း အတွက် လိုအပ်တယ် ဆိုတာ ပြောခဲ့တယ်။

အောက်တိုဘာလ ၈ ရက်နေ့

မင်္ဂလာဖြစ်စေသောနှလုံသား (၂)

“စိတ်​မ​သာ​ညည်း​တွား​သော​သူ​တို့​သည် မင်္ဂ​လာ​ရှိ​ကြ၏။ အ​ကြောင်း​မူ​ကား ထို​သူ​တို့​သည် သက်​သာ​ခြင်း​သို့ ရောက်​ကြ​လ​တ္တံ့။-” ‭‭ရှင်မဿဲ‬ ‭၅:၄

ဆင်းရဲခက်ခဲနေတဲ့သူတွေ၊ နာကြင်ခံစားနေရတဲ့သူတွေ၊ ငိုကြွေး နေတဲ့သူတွေ အတွက် ထပ်တူခံစားပြီးတော့ စိတ်မသာညည်းတွားနေတဲ့သူဘယ်သူရှိလဲ? ဖြစ်ပျက်နေတဲ့ အရာတွေအပေါ်မှာ၊ လူတွေ ဘုရားကို မရှာပဲ လောက ကြီးထဲမှာ ပျော်ပါးပြီးဖြစ်ချင်တိုင်းဖြစ်နေတဲ့အရာတွေကြောင့် ဝမ်းနည်းကြေကွဲပြီး သူတို့ကိုယ်စားဘုရားရှေ့မှာ မျက်ရည်ကျပြီး ဆုတောင်းပေးနေတဲ့သူတွေ၊ ဒီလိုလူတွေဟာ တကယ့်ကို ဘုရားရဲ့နှလုံးသားကို ရရှိပိုင်ဆိုင်ထားတဲ့သူတွေပဲ။ ကိုယ်ကြောင့်၊ ကိုယ့်အခက်အခဲတွေကြောင့်မဟုတ်ပဲ အခြားသူတွေအတွက် ကိုယ်စားပြုပြီးတော့ ဘုရားရှေ့မှာ ညည်းတွား ဆုတောင်းပေးနေတဲ့ အဖြေကို ဘုရားကပေးမှာ။ သူတို့ လိုချင်တဲ့ အဖြေကို ဘုရားက ပေးမယ်။ မင်္ဂလာရှိတဲ့နှလုံးသားဟာ တကိုယ်ကောင်းဆန်ခြင်းမရှိပဲ အခြားသူတွေအတွက် ကိုယ်စားပြုတတ်တဲ့ စိတ်အမြဲရှိတယ်။

အောက်တိုဘာလ ၇ ရက်နေ့

မင်္ဂလာဖြစ်စေသောနှလုံသား

“စိတ်​နှ​လုံး​နှိမ့်​ချ​သော​သူ​တို့​သည် မင်္ဂ​လာ​ရှိ​ကြ၏။ အ​ကြောင်း​မူ​ကား ကောင်း​ကင်​နိုင်​ငံ​တော်​သည် ထို​သူ​တို့၏ နိုင်​ငံ​ဖြစ်၏။-”‭‭ရှင်မဿဲ‬ ‭၅:၃

သခင်ယေရူရဲ့ ပထမဆုံး ဟောကြားတဲ့ တောင်ပေါ်ဒေသနာ ကိုလေ့လာတဲ့အခါမှာ ကောင်းကင်နိုင်ငံသားတစ်ယောက်အနေနနဲ့ နှလုံးသားကိုဘယ်လောက်တောင် ဂရုစိုက်ရမလဲ ဆိုတာ ကို တွေ့ရတယ်။ ကောင်းကင်နိုင်ငံသား တိုင်းရဲ့ စံနုန်းဟာ နှလုံးသားကိုပဲ ဗဟိုပြုပြီးတော့တိုင်းတာတယ်။ အခြားမည့်သည့်အရာပေါ်မှာမှ​မတိုင်းတာဘူးဆိုတာကို သိပါ။ ကောင်းကင်နိုင်ငံသားဆိုတဲ့ အမှတ်တံဆိပ်ကို ပြောပါဆိုရင် နှိမ့်ချခြင်း လို့ပြောရမယ်။ ကောင်းကင်နိုင်ငံ သားလို့ မပြောပဲ သိစေနိုင်တဲ့ အဓိကအချက်ကတော့ နှိမ့်ချတဲ့ နှလုံးသားပါပဲ။

အောက်တိုဘာလ ၅ရက်နေ့

ဘုရားအတွက် တောက်လောင်ကြသူများ (၆)

“ထို​သို ကယ်​လွှတ်​တော်​မ​မူ​သော်​လည်း အ​ရှင်​မင်း​ကြီး၊ ကိုယ်​တော်၏​ဘု​ရား​တို​ကို အ​ကျွန်ုပ်​တို​သည် ဝတ်​မ​ပြု​ပါ။ တည်​ထား​တော်​မူ​သော ရွှေ​ရုပ်​တု​ကို​လည်း မ​ကိုး​ကွယ်​ပါ​ဟု ပြန်​လျှောက်​ကြ၏။” ဒံယေလ ၃:၁၈

ဘုရားသခင်ကလွဲပြီး ကျန်တဲ့အရာတွေကိုဘယ်တော့မှ ဉီးမညွှတ်ဘူးလို ဆုံးဖြတ်ထားတဲ့သူတွေအတွက် ဗာဗုန်လုန်မှာ ရှင်သန်ရတာ လွယ်တာတော့မဟုတ်ဘူး။ ဘုရားအတွက်တောက်လောင် နေကြသူများအတွက်တော့ လွယ်တဲ့အရာတွေကိုပဲလုပ်ဖို ဆုံးဖြတ်ထားကြတာမဟုတ်ဘူး။ အဖိုးအခတွေထဲမှာ ကိုးကွယ်ခြင်းအပေါ်မှာ သစ္စာရှိစွာ ကိုးကွယ်တဲ့သူတွေပေး ရတဲ့အဖိုးအခကအကြီးဆုံးပဲ။ ဘုရားအတွက်တောက်လောင်နေတဲ့ သူတွေအတွက်ကတော့ (၇ )ဆပိုပြင်းတဲ့ မီးပုံက မခြိမ်းခြောက်နိုင်ခဲ့ဘူး။ သူတိုရဲ့တောက်လောင်မှုက ပိုခဲ့ပြီးတော့ မီးတောက်တွေတောင်မှ အပူမပေးနိုင်တဲ့အထိကို ပြင်းထန်ခဲ့တယ်။ ဘုရားအတွက် မီးတောက်နေတဲ့သူအတွက် တခြား အပူမီးတွေက မလောင်ကျွမ်းနိုင်ဘူး။

အောက်တိုဘာလ ၄ရက်နေ့

ဘုရားအတွက် တောက်လောင်ကြသူများ (၅)

သို​ဖြစ်​လျှင် အ​ပြစ်​ကြီး​သော​ဤ​အ​မှု​ကို ကျွန်​တော်​ပြု၍ ဘု​ရား​သ​ခင်​ကို အ​ဘယ်​သို​ပြစ်​မှား​နိုင်​သ​နည်း​ဟု သ​ခင်၏​မ​ယား​ကို​ငြင်း၍ ပြန်​ဆို၏။” ကမ္ဘာဦး ၃၉:၉

ဘုရားကိုပြစ်မှားတဲ့အလုပ်တော့ ဘယ်တော့မှ မလုပ်ဘူးလို့ ဆုံးဖြတ်ထားတဲ့ယောသပ်အတွက်တော့ အလုပ်ရှင်ရဲ့သွေးဆောင်မှုတွေကို နေ့တိုင်းကြုံတွေ့ရပေမယ့် အောင်မြင်စွာကျော်လွှားနိုင်ခဲ့တယ်။ သူကြောက်တာ အလုပ်ရှင်မဟုတ်ဘူး။သူကြောက်တာ ဘုရင်မဟုတ်ဘူး။ သူကြောက်တာ အမြင့်ဆုံး ဘုရား။ ဘုရားကိုပြစ်မှားမိပြီး ဘုရားနဲ့ဝေးကွာတဲ့ဘဝနှင့်ရှင်သန်ရမှာသူကြောက်တယ်။ မိဘနဲ့ဝေးတဲ့နေရာမှာလည်းသူအောင်မြင်စွာရှင်သန်နိုင်တယ်။ ငယ်ငယ်လေးနဲ့ တိုင်းတစ်ပါးမှာလည်း သူဟာအောင်မြင်စွာ အသက်ရှင်နိုင်ပေမယ့် ဘုရားနဲ့ဝေးရာမှာတော့ သူမရှင်သန်နိုင်ဘူးဆိုတာသိတယ်။ ဒါကြောင့် ဘုရားနဲ့ဝေးမဲ့ အရာတွေကို လုပ်မိမှာသူကြောက်တယ်။ ဒီအရာကသူ့ရဲ့ အမြင့်ဆုံး အောင်မြင်မှုကို ပိုဆောင်ပေးတဲ့ အရာလိုပြောလိုရသလို အိမ်မက်တွေ ကိုပြည့်စုံစေခဲ့တဲ့ လျှို့ဝှက်ချက်လို့လည်း ဆိုနိုင်တယ်။

အောက်တိုဘာလ ၃ ရက်နေ့

ဘုရားအတွက် တောက်လောင်ကြသူများ (၄)

“သ​မင်​ဒ​ရယ်​သည် ရေ​စီး​သော​ချောင်း​ကို တောင့်​တ​သ​ကဲ့​သို၊ အ​ကျွန်ုပ်​ဝိ​ညာဉ်​သည် ကိုယ်​တော်​ကို တောင့်​တ​ပါ​သည်​ဘု​ရား။” ဆာလံ ၄၁း၁

သမင်ဒရယ်လေးတွေအတွက် ရေစီးနေတဲ့ချောင်းက အသက်ရှင်ဖိုမရှိ မဖြစ်လိုအပ်တယ်။ ရေစီးနေတဲ့ချောင်းသာမရှိ ဘယ်လိုမှ မရှင်သန်နိုင်ဘူး။ နေ့တိုင်း အချိန်တိုင်းအတွက်လိုအပ်တယ်။ ဆာလံဆရာ ဒါဝိဒ်က ဒီအရာကို မြင်တဲ့အခါမှာ သူ့ဘဝအတွက်လည်း အသက်ရှင်တဲ့ဘုရားက မရှိမဖြစ်လိုအပ်တဲ့အရာဖြစ်ပြီးတော့ နေ့တိုင်းအချိန်တိုင်း ဘုရားမပါပဲ ဘယ်လိုမှ မရှင်သန်နိုင်ဘူးဆိုတာ အမြဲဝန်ခံတယ်။ သိုးထိန်းလေးဘဝကနေ တိုင်းပြည်တစ်ခုလုံးရဲ့ဘုရင် အနေနဲ့ ဖြစ်လာတာ သူ့အရည်အချင်း၊ သူ့ရဲ့အစွမ်းအစကြောင့်မဟုတ်ဘူး ၊ ဘုရားအတူပါရှိခြင်းကို တန်ဖိုးထားပြီးတော့ နေ့စဉ် ဘုရားကို ဆာငတ် တောင့်တတတ်တဲ့ နှလုံးသားကြောင့်ပါပဲ။

အောက်တိုဘာလ ၂ ရက်နေ့

ဘုရားအတွက် တောက်လောင်ကြသူများ (၃)

“အ​ကျွန်ုပ်​ကို အ​ထံ​တော်​ထဲ​က နှင်​ထုတ်​တော်​မ​မူ​ပါ​နှင့်။ သန့်​ရှင်း​သော​ဝိ​ညာဉ်​တော်​ကို ရုပ်​သိမ်း​တော်​မ​မူ​ပါ​နှင့်။” ဆာလံ ၅၁း၁၁

ကျန်တဲ့အရာ​တွေ ရုပ်သိမ်းချင်ရုပ်သိမ်းပါ ။ ဘုရားမျက်မှောက်တော်ထဲမှာ ရှိနေစေဖို့အတွက် လိုအပ်တဲ့ သန့်ရှင်းသောဝိညာဉ်တော်ကိုတော့ မရုပ်သိမ်းလိုက်ပါနှင့်။ အပြစ်လုပ်မိပြီးတဲ့အခါမှာ ဒါဝိဒ်ရဲ့ဆုတောင်းပါ။ ဒီဆုတောင်းချက်ကိုကြည့်ပြီးတော့ ဒါဝိဒ်ဟာ ဘယ်အရာအတွက် တောက်လောင်နေတာလဲဆိုတာကိုမြင်စေတယ်။ ရာထူးတွေ စည်းစိမ်တွေ အောင်မြင်ကျော်ကြားမှုတွေ ဘယ်အရာကိုမှ မရုပ်သိမ်းဖိုမတောင်းဆိုဘူး။ ဒီအရာတွေထက် သူ့ဘဝကို အဓိပ္ပါယ်ရှိစေတဲ့ သန့်ရှင်းသောဝိညာဉ်တော် အတူရှိခြင်းကိုပိုပြီးတန်ဖိုးထားတယ်။ ကျန်တဲ့အရာတွေဘယ်လောက်ရှိရှိ သန့်ရှင်းသောဝိညာဉ်တော်မရှိတော့ရင်တော့ သင့်ဘဝဟာ ရှင်လျှက်နှင့်သေနေသလိုပါပဲ။

အောက်တိုဘာလ ၁ရက်နေ့

ဘုရားအတွက်တောက်လောင်ကြသူများ(၂)

“တစ်​ဖန်​တုံ၊ ကိုယ်​တော်၏​ဘုန်း​ကို အ​ကျွန်ုပ်​အား​ပြ​တော်​မူ​ပါ။ အ​ကျွန်ုပ်​တောင်း​ပန်​ပါ၏​ဟု​လျှောက်​လျှင်၊” ထွက်မြောက်ရာ ၃၃:၁၈

မောရှေလောက် ဘုရားနှင့် နီးစပ်ပြီး ထိတွေ့ခွင့်ရှိတာ ဘယ်သူများရှိအုံးမလဲ? အကြိမ်ကြိမ် ဘုရားနှင့် နေ့ရက်ပေါင်းများစွာ အတူတူဖြတ်သန်းခွင့်ရတဲ့သူ။ အသက်အရွယ်အရပြောရင်လည်းတရာကျော်ပြီ။ ဘုရားနှင့်ပတ်သက်တဲ့ သူ့ရဲ့ဆာငတ်မှုနှင့် တောက်လောင်မှုကြီးက ဘယ်လောက်ပဲ ဘုရားနှင့် နီးစပ်ခွင့်ရရ သူဟာ ဆာငတ်နေတုန်းပဲ။ တစ်ရက်မှာ ဘုရားကို သူတောင်းဆိုတယ်။ ကိုယ်တော်ရဲ့ ဘုန်းကို မြင်ချင်တယ်။ သူသိခွင့်ရတာတွေ၊ ထိတွေ့ခွင့်ရတာတွေ လောက်နဲ့ မကျေနပ်နိုင်ဘူး။ ပိုပြီးတော့ ထိတွေ့ခွင့် ပိုပြီးတော့ နီးစပ်ခွင့်လိုချင်သေးတယ်။ ဒီလို တောက်လောင်တဲ့သူတွေကိုမှ ဘုရားက မသုံးရင် ဘယ်သူတွေကိုသုံးအုံးမှာလဲ? သင့်ရဲ့တောက်လောင်မှုမကုန်ဆုံးသရွေ့ ဘုရားနဲ့ပတ်သက်တဲ့ အရာတွေမှာ ရှေ့ဆက်ရွေ့လျားနေအုံးမယ်။ တောက်လောင်မှုကုန်ဆုံးသွားတာနဲ့ ရှေ့ဆက်မသွားတော့ပဲ ရှိတဲ့နေရာမှာ ပဲရပ်တန့်သွားပါလိမ့်မယ်။

စက်တင်ဘာလ ၃၀ ရက်နေ့

ဘုရားအတွက် တောက်လောင်ကြသူများ

“ထို​လု​လင်​ကို မ​ထိ​မ​ခိုက်​နှင့်။ အ​လျှင်း​မ​ပြု​နှင့်။ သင်​သည် ဘု​ရား​သ​ခင်​ကို ကြောက်​ရွံ့​သည်​ဟု ယ​ခု​ငါ​သိ၏။ အ​ကြောင်း​မူ​ကား၊ သင်၏​သား၊ သင်၌​တစ်​ယောက်​တည်း​သော​သား​ကို​ငါ​တောင်း၍၊ သင်​သည်​ငါ့​ကို​မ​ငြင်း​ဟု မိန့်​တော်​မူ၏။” ကမ္ဘာဦး ၂၂:၁၂

လူတွေက ထင်တတ်ကြတယ် ငယ်တုန်းတော့ ဘုရားအတွက် တက်ကြွတောက်လောင် တက်ကြွပေမယ့် အသက်အရွယ်တစ်ခု၊ အောင်မြင်မှုအခြေအနေတစ်ခုရောက်လာရင်ရော ဆက်လက်တက်ကြွတောက်လောင် နိုင်ပါအုံးမလား? ဘုရားနဲ့ပတ်သက်ပြီးတော့ တက်ကြွတောက်လောင်မှုဆိုတာ အရွယ်နှင့်ရော အခြေအနေနဲ့ပါလုံးဝမဆိုင်ဘူးဆိုတာ သိစေချင်တယ်။ ကိုယ်ရဲ့ နှလုံးသားနှင့်ပဲဆိုင်တဲ့အရာပါ။ အာဗြဟံ ဆို အသက် တရာကျော်အထိ ဘုရားနှင့်ပတ်သက်ပြီးတော့ လွန်စွာတက်ကြွတဲ့သူတစ်ယောက်ဆိုတာ တွေ့ရတယ်။ အသက်တရာကျော်မှ ကတိတော်နှင့်ရတဲ့သားကို ဘုရားတောင်းတဲ့အခါမှာ မငြင်းပဲ ပေးရဲတယ်။ သူ့တက်ကြွမှုဟာ အမူအရာပဲမဟုတ်ဘူး ခဏတာပဲမဟုတ်ဘူး။ တစ်ဘဝစာလုံး ဖြစ်တယ်ဆိုတာ ငြင်းလို့မရဘူး။ တစ်ခဏတာ တောက်လောင်မှုမျိုး မဟုတ်ပဲ အာဗြဟံလို တစ်ဘဝစာ တက်ကြွတောက်လောင်မှုမျိုးနှင့် ဘုရားအတွက် တောက်လောင်တဲ့ မျိုးဆက်ဖြစ်ပါစေ။

စက်တင်ဘာလ ၂၈ ရက်နေ့

ဘုရားသခင်ရဲ့ မဟာကရုဏာ (၆)

“ဒါ​ဝိဒ်​က​လည်း၊ ငါ​သည် ကျဉ်း​မြောင်း​ရာ​သို့ ရောက်​လေ​ပြီ​တ​ကား။ ထာ​ဝ​ရ​ဘု​ရား၏​လက်​တော်​သို့ ရောက်​ပါ​စေ။ က​ရု​ဏ​တော် ကြီး​လှ၏။ လူ​လက်​သို့ မ​ရောက်​ပါ​စေ​နှင့်​ဟု ဂဒ်​အား​ပြန်​ပြော၏။”၂ ဓမ္မ ၂၄:၁၄

သင့်ရဲ့ အမှားထက် ဘုရားရဲ့ကရုဏာက ပိုကြီးမားတယ်။ လူတွေက တစ်ခါတစ်လေ ကိုယ့်ရဲ့အမှားကပဲ ကမ္ဘာပေါ်မှာ အကြီးမားဆုံးဘယ်တော့မှ ဘယ်လိုမှ မလွတ်မြောက်နိုင်တော့တဲ့ အရာလိုထင်တတ်တယ်။ တကယ်တော့ဘုရားရဲ့ကရုဏာလောက်တော့ မကြီးတာ အမှန်ပါပဲ။ ဒါဝိဒ်က ဘုရားရှေ့မှာ အမှားလုပ်မိတဲ့အခါမှာ ဘုရားက သုံးခုရွေးခိုင်းတယ်။ ဒါဝိဒ်က တစ်ခုမှ မရွေးဘူး။ သူရွေးရင် မှားမှာ သေချာတယ်။ ကရုဏာ ကြီးမားတဲ့ ဘုရားကိုပဲရွေးခိုင်းတဲ့အခါမှာ ဘုရားက အသက်သာဆုံးကိုရွေးပေးတာတောင် မှ အဲ့ဒီထက်သက်သာစေတယ်။ ဒါဝိဒ် သိတာ တစ်ခုရှိတယ်။ ဘုရားရဲ့ကရုဏာ ဟာ သူ့အမှားထက် အဆပေါင်းများစွာပိုကြီးတယ်ဆိုတာပါပဲ။

စက်တင်ဘာလ ၂၇ ရက်နေ့

ဘုရားသခင်ရဲ့ မဟာကရုဏာ (၅)

“ထာ​ဝ​ရ​ဘု​ရား​သည်​သ​နား​တော်​မူ၍ က​ရု​ဏာ​တော်​သည် မ​ကုန်​သော​ကြောင့် ငါ​တို့​သည် ဆုံး​ရှုံး​ခြင်း​သို့ မ​ရောက်​ဘဲ​နေ​ကြ၏။ နံ​နက်​တိုင်း က​ရု​ဏာ​တော်​အ​သစ်​ကို ခံ​ရ​ကြ၏။ သ​စ္စာ​တော်​သည် ကြီး​မြတ်​ပါ၏။” ယေရမိမြည်တမ်း ၃:၂၂-၂၃

လူတွေက သင်ကျရှုံးမယ့်အချိန်ကို စောင့်နေကြတယ်။ ဘယ်တော့များ အပေါ်က နေပြုတ်ကျမလဲပေါ့။ အောင်မြင်တာလည်း ကိုယ့်အရည်အချင်းကြောင့်မဟုတ်သလို၊ နေ့စဉ် ဆက်လက်ပြီးအောင်မြင်ခြင်းထဲမှာ လျှောက်လှမ်းသွားလာဖို့ကလည်း ကိုယ်တတ်နိုင်ခြင်းကြောင့်မဟုတ်ဘူး။ ဘုရားရဲ့တစ်ဖက်သက်လုပ်ဆောင်ပေးတဲ့ ကရုဏာ သက်သက် ကြောင့်ပဲ။ ဘုရားသားသမီး တစ်ယောက်ဆုံးရှုံးမယ့်အချိန်ကိုစောင့်နေရင်တော့ မောတာပဲ အဖတ်တင်မယ်။ သူက မကုန်နိုင်တဲ့ ကရုဏာကြောင့် ဆုံးရှုံးခြင်းမရောက် သလို နေ့တိုင်း အသစ် ခံစားနေရတဲ့ ကရုဏာတော်ကြောင့် ပိုလို့တောင် ဆုံးရှုံးစရာ အကြောင်းနဲ့ဝေးသွားတယ်။

စက်တင်ဘာလ ၂၆ ရက်နေ့

ဘုရားသခင်ရဲ့ မဟာကရုဏာ (၄)

“အ​သက်​ရှင်​ခြင်း​နှင့်​စပ်​ဆိုင်​သော မျှော်​လ​င့်​ခြင်း​အ​ကြောင်း​ရှိ​စေ​ခြင်း​ငှာ၊ ဖောက်​ပြန်​ခြင်း၊ ညစ်​စွန်း​ခြင်း၊ ညှိုး​နွမ်း​ခြင်း​နှင့်​ကင်း​စင်​သော အ​မွေ​တော်​ကို ငါ​တို့​သည် ခံ​ရ​စေ​မည်​အ​ကြောင်း၊ ယေ​ရှု​ခ​ရစ်​ကို သေ​ခြင်း​မှ ထ​မြောက်​စေ​တော်​မူ​သော​အား​ဖြင့်၊ ကြီး​စွာ​သော က​ရု​ဏာ​တော်​နှင့်​အ​ညီ ငါ​တို့​ကို တစ်​ဖန် ဖြစ်​ဖွား​စေ​တော်​မူ​သော၊ ငါ​တို့​သ​ခင်​ယေ​ရှု​ခ​ရစ်၏ ခ​မည်း​တော် ဘု​ရား​သ​ခင်​သည် မင်္ဂ​လာ​ရှိ​တော်​မူ​စေ​သ​တည်း။-” ၁ပေ၁:၃

ဘုရားရဲ့မဟာကရုဏာက အသက်တာကိုဘာတွေယူဆောင်လာပေးလဲ? လူတွေက ဘုရားရဲ့ကရုဏာကို သဘောပေါက်တဲ့သူကနည်းတယ်။ တကယ်တော့ ကြီးမားတဲ့မဟာကရုဏာက ကြီးမားပြီးကောင်းတဲ့အရာတွေများစွာကိုအသက်တာထဲမှာ ယူဆောင်လာပေးတယ်။ တမန်တော်ကြီးပေတရုက ဒီလိုဆိုတယ် ကရုဏာက အသက်ရှင်ခြင်းနှင့်ဆိုင်တဲ့ မျှော်လင့်ချက်များစွာကို ယူဆောင်လာပေးတယ်။ မကောင်းတဲ့လက္ခဏာတွေနဲ့ကင်းတဲ့ ဘုရားရဲ့အမွေတော်ကိုရရှိပိုင်ဆိုင်ဖို့လည်း ဘုရားရဲ့ကရုဏာကပဲ မစလုပ်ဆောင်ပေးတယ်။ ကရုဏာက အသက်တာသစ်မှာမွေးဖွားဖို့ ကူညီဆောင်မတယ်။ ဘုရားရဲ့ ကရုဏာကြောင့်သာမဟုတ်ရင် သင်ဟာဘယ်တော့မှ အသစ်သော အရာတွေကို ပိုင်ဆိုင်ရရှိနိုင်မှာမဟုတ်ဘူး။ ကောင်းမွန်တဲ့အသစ်သောအရာများစွာကို အသက်တာထဲမှာမွေးဖွားစေတာ ဘုရားရဲ့ မဟာကရုဏာကြောင့်ပါ။

စက်တင်ဘာလ ၂၅ ရက်နေ့

ဘုရားသခင်ရဲ့ မဟာကရုဏာ (၃)

“အ​ကြောင်း​မူ​ကား၊ ကောင်း​ကင်​ဘုံ၌ ရှိ​တော်​မူ​သော သင်​တို့​အ​ဘ​သည်၊ ကောင်း​သော​သူ မ​ကောင်း​သော​သူ​တို့​အ​ပေါ်၌ ကိုယ်​တော်၏​နေ​ကို ထွက်​စေ​တော်​မူ၏။ ဖြောင့်​မတ်​သော​သူ မ​ဖြောင့်​မတ်​သော​သူ​တို့ အ​ပေါ်၌ မိုး​ကို ရွာ​စေ​တော်​မူ၏။-”ရှင်မဿဲ ၅:၄၅

ဘုရားရဲ့ ကြီးမားတဲ့ ကရုဏာက ကောင်းတဲ့သူ တွေအတွက်ပဲမဟုတ်ဘူး။ အရည်အချင်း ရှိတဲ့သူတွေအတွက်ပဲမဟုတ်ဘူး။ လူသားတိုင်းကို သူ့ရဲ့ကြီးမားတဲ့ ကရုဏာကို ခံစားစေချင်တဲ့သူပါ။ တခြားအရာကို မကြည့်နဲ့ နေပူတာ၊ မိုးရွာတာကိုပဲ ကြည့်ရင်တောင် သူ့ရဲ့ ကရုဏာကို သိမြင်နိုင်တယ်။ ကောင်းတဲ့သူတွေအတွက်သာ နေပူမိုးရွာမယ်ဆိုရင် မကောင်းတဲ့သူတွေအတွက် တော်တော်လေး ခက်ခဲဖြစ်ကြလိမ့်မယ်။ မိုးခေါင်ရေရှားခြင်းကြောင့် ငတ်မွတ်ခေါင်ပါးခြင်း ကြုံတွေ့ နိုင်သလို၊ နေရဲ့အလင်းရောင်ကို မရရင်လည်း လူတွေရှင်သန်ဖို့ခက်လိမ့်မယ်။ လူတွေကို မခက်ခဲစေချင်တဲ့ ကရုဏာရှင်ဘုရားက အခြေအနေပေါ်မှာပဲကြည့်ပြီးတော့ လုပ်ဆောင်ပေးတာမဟုတ်ပဲ။ သူ့ရဲ့သနားခြင်း ကရုဏာကြောင့် ကောင်းမြတ်ခြင်းတွေကို လူတိုင်းကို ခံစားစေတယ်။

စက်တင်ဘာလ ၂၄ ရက်နေ့

ဘုရားသခင်ရဲ့ မဟာဂရုဏာ (၂)

“အကယ်စင်စစ် အကျွန်ုပ်​အသက်ရှင်​သမျှ​ကာလ​ပတ်လုံး ကောင်းမြတ်​တော်မူ​ခြင်း​နှင့်​မေတ္တာကရုဏာ​တော်​သည် အကျွန်ုပ်​နှင့်အတူ​လိုက်ပါ​လာ​လိမ့်မည်​။ အကျွန်ုပ်​သည်​လည်း ထာဝရဘုရား​၏​အိမ်​တော်​၌ အစဉ်အမြဲ​နေ​ရ​ပါ​လိမ့်မည်​။” ဆာလံကျမ်း ၂၃:၆

ငါတစ်ယောက်တည်း၊ ငါနဲ့အတူ ဘယ်သူမှ မရှိဘူး။ လိုအပ်တဲ့ အရာတွေလည်း ငါမပိုင်ဆိုင်ဘူးလို့များ တွေးပြီးစိတ်ဓါတ်ကျမိနေသလား? တကယ်တော့ ဘုရားက ကပ်ကမ္ဘာကုန်သည့်တိုင်အောင် သင်တို့နဲ့အတူရှိမယ်လို့ ကတိပေးထားတယ်မဟုတ်လား? ဒါကြောင့် ဘုရားသားသမီးတွေအနေနဲ့ မြင်ရတဲ့ မိတ်ဆွေ သူငယ်ချင်းတွေ ဆွေမျိုးမိဘတွေ အတူမရှိနိုင်ပေမယ့် ဘုရားကတော့အမြဲတမ်းအတူရှိတယ်။ သင့်လက်ထဲမှာ ပိုင်ဆိုင်တာ ဘာတစ်ခုမှ မရှိသေးရင်တောင်မှ ဘုရားရဲ့ ကောင်းမြတ်ခြင်းနှင့် မေတ္တာကရုဏာ သည် အသက်ထက်ဆုံးသင်နဲ့အတူ ရှိနေပါသေးတယ်။ ငွေကြေးတွေထက် ပိုင်ဆိုင်မှုတွေထက် ပိုပြီးတော့ အာမခံချက်ပေးနိုင်တဲ့ ဘုရားရဲ့ မဟာကရုဏာက သင့်အသက်တာမှာ တခဏတာလေးပဲ ရရှိခံစားရတာမဟုတ်ဘူး။ အသက်ထက်ဆုံး သင်နဲ့အတူ ပါရှိပြီးတော့ သင့်ကိုလမ်းပြပို့ဆောင်နေဆဲပါ။

စက်တင်ဘာလ ၂၃ ရက်နေ့

ဘုရားသခင်ရဲ့ မဟာဂရုဏာ

“ထာ​ဝ​ရ​ဘု​ရား​သည်​သ​နား​တော်​မူ၍ က​ရု​ဏာ​တော်​သည် မ​ကုန်​သော​ကြောင့် ငါ​တို့​သည် ဆုံး​ရှုံး​ခြင်း​သို့ မ​ရောက်​ဘဲ​နေ​ကြ၏။” ယေရမိမြည်တမ်း‬ ‭၃:၂၂

ကျေးဇူးတော်က မခံသင့်မခံထိုက်တဲ့ အခွင့်အရေးကို ခံစားရခြင်း ဖြစ်ပြီးတော့ ဂရုဏာကတော့ခံသင့် ခံထိုက်တဲ့အပြစ်ဒဏ်ကနေ လွတ်ကင်းချမ်းသာခွင့်ရခြင်းပါ။ တကယ်ဆို လူသားတိုင်း အပြစ်ကြောင့်ခံရမယ့် ပြစ်ဒဏ်က သေးသေးလေးမဟုတ်ဘူး။ လွန်ကျူးမိတဲ့အတိုင်းသာ ခံစားရမယ်ဆိုရင် ဘယ်လိုမှ ဆပ်လို့ကျေမှာ မဟုတ်ဘူး။ အပြစ်ဒဏ် ဘယ်လောက်ကြီးကြီး ဘုရားဂရုဏာလောက်တော့ မကြီး တာအမှန်ပါပဲ။ ဘုရားရဲ့ဂရုဏာကို မသိတဲ့အချိန်မှာတော့ ဘယ်တော့ အပြစ်ဒဏ်ခံရမလဲဆိုပြီးတော့အောက်မေ့တတ်တယ်။ ဘုရားရဲ့ဂရုဏာကို သိရှိသဘောပေါက်ပြီးတဲ့နောက်ပိုင်းတော့ ပြစ်မှားခြင်းကြောင့်ရမယ့် အကျိုးဆက်တွေဟာ ကိုယ်နဲ့ လုံးဝ မဆိုင်တော့ဘူးဆိုတာ နားလည်လာတယ်။ မကုန်ဆုံးနိုင်တော့ဂရုဏာကြောင့် ဘယ််တော့မှ မရှုံးတဲ့ဘဝကို ပိုင်ဆိုင်ခွင့်ရရှိခြင်းပါ။

စက်တင်ဘာလ ၂၁ ရက်နေ့

အကန့်အသတ်မဲ့ ယုံကြည်ခြင်း (၆)

“ယေ​ရှု​သည် ထို​သူ​တို့၏ ယုံ​ကြည်​ခြင်း​ကို မြင်​လျှင်၊ လက်​ခြေ​သေ​သော​သူ​အား၊ ငါ့​သား၊ သင်၏​အ​ပြစ်​ကို လွတ်​စေ​ပြီ​ဟု မိန့်​တော်​မူ၏။-” ရှင်မာကု ၂:၅

မြင်လို့ ယုံတာက ယုံကြည်ခြင်းလို့မခေါ်ဘူး။ဒါပေမယ့် ယုံကြည်ခြင်းကတော့ မြင်ရတယ်။ လက်ခြေသေတဲ့သူကို ထမ်းခေါ်လာတဲ့ သူငယ်ချင်း(၄)ယောက်ကို ဘယ်အရာမှ တားလို့မရဘူး။ ပတ်လည်ဝိုင်းထားတဲ့ လူတွေကလည်း နေရာမပေးချင်ကြပေမယ့် သူတို့က ယေရှုရှေ့ရောက်အောင် မရမက နည်းလမ်းရှာခဲ့ကြတယ်။ ယုံကြည်ခြင်းရှိရင် ဘယ်လောက်ပဲ အတားအဆီးတွေများပါစေ အမြဲတမ်း နည်းလမ်းရှိတယ်။ ယုံကြည်ခြင်းမရှိတဲ့သူအတွက်တော့ အရာရာဟာ အတားအဆီးဖြစ်နေတာပါပဲ။ သူတို့ရဲ့ လက်မလျော့တဲ့ ယုံကြည်ခြင်းကိုမြင်တဲ့အခါမှာ ယေရှုက သူတို့ရဲ့သူငယ်ချင်းကို ကျန်းမာစေတယ်။

စက်တင်ဘာလ ၂၀ရက်နေ့

အကန့်အသတ်မဲ့ ယုံကြည်ခြင်း (၅)

“ကိုယ်တော်​က​လည်း“သင်​တို့​၏​မ​ယုံကြည်​မှု​ကြောင့်​ဖြစ်​၏။ သင်​တို့​အား ငါ​အမှန်​ဆို​သည်​ကား သင်​တို့​တွင် မုန်ညင်းနက်​စေ့​ခန့်မျှ ယုံကြည်​ခြင်း​ရှိ​ပါက ဤ​တောင်​ကို ‘ဤ​နေရာ​မှ ထို​နေရာ​သို့ ရွေ့​လော့’​ဟု ပြော​လျှင် ၎င်း​သည် ရွေ့သွား​လိမ့်မည်။ သင်​တို့​အတွက် မ​ဖြစ်နိုင်​သော​အရာ​လည်း တစ်စုံတစ်ခု​မျှ​ရှိ​မည်​မ​ဟုတ်။”မဿဲ ၁၇း၂၀

လောကမှာ အလုပ်လုပ်ဖို့ အခက်အခဲဆုံးသူ က အရည်အချင်းမရှိတဲ့သူမဟုတ်ဘူး။ ယုံကြည်ခြင်းမရှိတဲ့သူပဲ။ ယုံကြည်ခြင်းမရှိရင် ဘာလုပ်လုပ် အောင်မြင်မှာမဟုတ်ဘူး။ တွေးတဲ့အရာတွေလည်းမမှန်ဘူး။ ပြောတဲ့အရာတွေလည်းလွဲ။ ဘယ်တော့မှ မှန်ကန်ကောင်းမွန်တဲ့အရာတွေဖြစ်လာမှာမဟုတ်ဘူး။ ယုံကြည်ခြင်းအများကြီးတောင်မဟုတ်ဘူး မုန်ညင်းစေ့လောက်ကလေးပဲရှိရင်တောင် အပြင်မှာ ဖြစ်ပျက်လာမယ့်အရာတွေက အကြီးကြီးတွေ၊ ယုံကြည်ခြင်း မုန်ညင်းစေ့ လောက်က တောင်တွေကိုရွှေ့နိုင်တယ်ဆိုရင် ယုံကြည်ခြင်း တောင်ကြီးလောက်ရှိရင် အာကာသတစ်ခုလုံးတောင် ပြောင်းပြန်ဖြစ်သွားနိုင်တယ်။

စက်တင်ဘာလ ၁၉ရက်နေ့

အကန့်အသတ်မဲ့ ယုံကြည်ခြင်း (၄)

“ထိုအခါ ယေရှု​သည် သူ​တို့​၏​မျက်စိ​ကို​တို့​လျက်“သင်​တို့​၏​ယုံကြည်​ခြင်း​အတိုင်း သင်​တို့​၌​ဖြစ်​စေ”​ဟု မိန့်​တော်မူ​သော်” ‭‭ရှင်မဿဲခရစ်ဝင်‬ ‭၉:၂၉

အနာရောဂါတွေနဲ့ သခင်ယေရှုဆီကို လာတိုင်း ယေရှုက မေးလေ့ရှိတဲ့ မေးခွန်းရှိတယ်။ ယုံကြည်လား?ဆိုပြီးတော့။ သူဟာ ဘုရားဖြစ်ပြီးတော့အရာခပ်သိမ်းတတ်နိုင်ပေမယ့် သူတတ်နိုင်တာကို ယုံကြည်တဲ့သူတွေဆီမှာပဲ အဲ့ဒီတန်ခိုးတော်က သက်ရောက်ပြီး ထင်ရှားတယ်။ ဘုရား တတ်နိုင်ခြင်းတန်ခိုးတော်က အကန့်အသတ်မရှိပေမယ့် အဲ့ဒီတန်ခိုးတော်ကို ကန့်သတ်ထားတာက သင့်ရဲ့ယုံကြည်ခြင်းပဲ။ ယုံကြည်ခြင်းတံခါးဝကို ပိတ်ထားရင်တော့ ဘုရားတန်ခိုးတော်ကို အသက်တာမှာ မြင်ရမှာမဟုတ်ဘူး။ ယုံကြည်ခြင်းကို တိုးမြှင့် လိုက်ရင်တော့ ဘုရားတန်ခိုးတော်က အကန့်အသတ်မရှိ အသက်တာမှာဝင်ရောက်လာပါလိမ့်မယ်။

စက်တင်ဘာလ ၁၈ ရက်နေ့

အကန့်အသတ်မဲ့ ယုံကြည်ခြင်း (၃)

“တပ်​မှူး​အား သင်​သွား​လော့။ ယုံ​ကြည်​သည်​နှင့်​အ​ညီ သင်၌​ဖြစ်​စေ​ဟု မိန့်​တော်​မူ၏။ ထို​ခ​ဏ​ချင်း​တွင် သူ၏​ငယ်​သား​သည် အ​နာ​ရော​ဂါ​ကင်း၍ သက်​သာ​ခြင်း​သို့ ရောက်​လေ၏။-”ရှင်မဿဲ ၈:၁၃

လောကမှာ အခက်အခဲဆုံးအရာက မယုံနိုင်ခြင်းပဲ။ ယုံကြည်ခြင်းရှိရင် ဘာမဆို ဖြစ်နိုင်တယ်လို့ သခင်ယေရှုအကြိမ်ကြိမ်ပြောပေမယ့် ယုံကြည်ခြင်းမရှိပဲ ရှင်သန်ကြတာခက်တယ်။ ယုံကြည်ခြင်း နိယာမနှင့်ဖန်ဆင်းခြင်းခံရတဲ့ လောကကြီးထဲမှာ ယုံကြည်ခြင်းကိို အသုံးမပြုပဲ ဘယ်လိုမှ ရှင်သန်လို့မရဘူး။ ယုံကြည်ခြင်းရှိတဲ့သူအတွက် အခက်အခဲတွေက ဆီးတားလို့မရသလို၊ မဖြစ်နိုင်ခြင်းတွေက မရပ်တန့်စေနိုင်ဘူး။ သင့်ဘဝမှာ ဖြစ်ပျက်နေသမျှ အားလုံးက သင်ယုံကြည်တဲ့အတိုင်း ဖြစ်တာပါ။ ယုံကြည်ခြင်း ရှိတဲ့သူတစ်ယောက်ကို ဘယ်အရာကမှ ကန့်သတ်ဆီးတားလို့ မရနိုင်ဘူး။

စက်တင်ဘာလ ၁၇ ရက်နေ့

အကန့်အသတ်မဲ့ယုံကြည်ခြင်း (၂)

“ယေရှု​က​လည်း“တတ်နိုင်​လျှင်​ဟု​ဆို​ရ​သလော။ ယုံကြည်​သော​သူ​အတွက် အရာ​ခပ်သိမ်း​သည် ဖြစ်နိုင်​၏”​ဟု မိန့်​တော်မူ​၏။” ရှင်မာကုခရစ်ဝင်၉:၂၃

လုပ်နိုင်တဲ့သူထက် ယုံနိုင်တဲ့သူဘဝမှာ ပိုပြီး ဘုရားအမှုပြုတာကို မြင်ရတယ်။ စာတန်က လူတွေရဲ့အသက်တာမှာ တခြားနေရာမှာ အနှောင့်အယှက်မပေးဘူး။ ယုံကြည်ခြင်း စိတ်ကိုပဲ ကန့်သတ်ပြီးနှောင့်ယှက်ဖို့ကြိုးစားတယ်။ ယုံကြည် ခြင်းကို ကန့်သတ်နိုင်ပြီဆိုရင် ကျန်တဲ့အရာတွေကို ဘာမှ လုပ်စရာမလိုပဲ အလိုလို ကန့်သတ်နိင် လိမ့်မယ်ဆိုတာ သူသိတယ်။ သင့် စိတ်ထဲက ယုံကြည်ခြင်းကို ကန့်သတ်ထားတဲ့အရာတွေကို ဖယ်လိုက်ပါ။ အပြင်မှာ မြင်ရတဲ့ အကန့်အသတ် တွေအားလုံး ပြိုကျသွားပါလိမ့်မယ်။ အကန့်အသတ်မဲ့ ယုံကြည်ခြင်းရှိရင် အရာခပ်သိမ်း ဖြစ်လာပါလိမ့်မယ်။

စက်တင်ဘာလ ၁၆ရက်နေ့

အကန့် အသတ်မဲ့ ယုံကြည်ခြင်း

“သင်​တို့​ဆုတောင်း​သောအခါ​တွင်​လည်း ယုံကြည်​ခြင်း​ဖြင့် တောင်းလျှောက်​သမျှ​သော​အရာ​တို့​ကို သင်​တို့​ရ​ကြ​လိမ့်မည်”​ဟု ပြန်​၍​မိန့်​တော်မူ​၏။” ရှင်မဿဲခရစ်ဝင် ၂၁:၂၂

ဘယ်အရာက သင့်ကို ကန့်သတ်ထားတယ်လို့ ထင်သလဲ? စာတန်က သင့်ကို ကန့်သတ်လို့မရဘူး သူကိုယ်တိုင်တောင် ဘုရားက ကန့်သတ်ထားတာ။ လူတွေက သင့်ကို ကန့်သတ်လို့မရဘူး။ ပတ်ဝန်းကျင်ကလည်း သင့်ကို ကန့်သတ်လို့မရဘူး။ အခြေအနေတွေ အဖြစ်ပျက်တွေကလည်း သင့်ကို ကန့်သတ်လို့မရဘူး။ သင့်ကို ကန့်သတ်လို့ရတာ သင့်ကိုယ်တိုင်ပဲ ရှိတယ်။ ယုံကြည်ခြင်းမရှိရင် ဘဝမှာ အကန့်အသတ်တွေရှိနေလိမ့်မယ်။ ယုံကြည်ခြင်း ရှိလာရင် တော့ အကန့်အသတ်တိုင်းကို ကျော်လွန်ပြီးတော့ ရှင်သန်နိုင်လိမ့်မယ်။ ယုံကြည်ခြင်းပါပြီးတော့ လုပ်သမျှအောင်မြင်မယ်၊ တောင်းသမျှဆုတွေ ရမယ်။ ကိုယ်လုပ်မှ ကိုယ်ရမှာမဟုတ်ဘူး။ ကိုယ်ယုံမှ ကိုယ်ရမယ်။

စက်တင်ဘာလ ၁၄ ရက်နေ့

ဘုရားသခင်ရဲ့ လမ်း (၆)

“ပင်လယ်ပြင်​၌ လမ်းမ​ကို​လည်းကောင်း​၊ လှိုင်းထန်​သော​ရေပြင်​၌ လမ်း​ကို​လည်းကောင်း ဖြစ်​စေ​တော်မူ​သော​၊” ‭‭ဟေရှာယအနာဂတ္တိကျမ်း‬၄၃:၁၆

ဘုရားရဲ့လမ်းကရှိနေ၊ မြင်နေရတဲ့လမ်း ဖြစ်ချင်မှဖြစ်လိမ့်မယ်။ သိနေသွားနေကျ လမ်းဟုတ်ချင်မှ ဟုတ်လ်ိမ့်မယ်။ ဘုရားသွားစေချင်တာ သေချာတယ်ဆိုရင် ယုံကြည်ခြင်းနှင့်သွားပါ။ ဘုရားက သူ့သားသမီးတွေအတွက်အမြဲတမ်း လမ်းမရှိတဲ့အရပ်မှာ လမ်းကိုဖွင့်ပေးတဲ့သူပါ။ ရိုးရိုးနေရာမှာတောင်မဟုတ်ဘူး ။ ပင်လယ်ပြင်လိုနေရာမျိုးမှာတောင် လမ်းမကို ဖြစ်စေပြီးတော့ လှိုင်းထန်တဲ့ ရေပြင်မှာ လမ်းကိုဖြစ်စေတဲ့သူ၊ ဒါဟာ အပြောသက်သက်မဟုတ်ပဲ လက်တွေ့တကယ်ဖြစ်ပျက်ခဲ့ပြီးသားလည်းဖြစ်တယ်။ ဣသရေလ လူမျိုးတွေကို ပယ်လယ်နီအလယ်မှာ လမ်းပေါ်စေပြီး ဖြတ်သန်းသွား လာစေသလို လှိုင်းထန်တဲ့ ရေပြင်မှာလည်း ပေတရုကို ရေပေါ်လမ်းလျှောက်စေခဲ့တယ်။ သင့်ဘဝအသက်တာမှာလည်း ရှိနေတဲ့လမ်းကနေ ပို့ဆောင်ပေးမှာ မဟုတ်ဘူး။ မရှိတဲ့လမ်းကို ဖြစ်စေပြီး အကောင်းဆုံး ပြင်ဆင် ပို့ဆောင်ပေးမယ်။

စက်တင်ဘာလ ၁၃ ရက်နေ့

ဘုရားသခင်ရဲ့ လမ်း (၅)

“ထာဝရဘုရား​ကို​ကြောက်ရွံ့​သော​သူ​သည် မည်သူ​နည်း​။ ကိုယ်တော်​သည် ထို​သူ​ရွေးချယ်​ရ​မည့်​လမ်း​ကို သူ့​အား​သွန်သင်ပြသ​တော်မူ​လိမ့်မည်​။ သူ​၏​စိတ်ဝိညာဉ်​သည် ကောင်းမွန်​စွာ​နေထိုင်​ရ​၍ သူ​၏​သားစဉ်မြေးဆက်​တို့​သည် ပြည်​တော်​ကို​အမွေဆက်ခံ​ရ​ကြ​လိမ့်မည်​။” ‭‭ဆာလံကျမ်း‬ ၂၅:၁၂-၁၃

ဘယ်လမ်း သွားရမလဲ ရွေးဖို့ အခက်တွေ့နေသလား? လူတိုင်းကြုံရတတ်ပါတယ် ဘယ်လမ်းက ကိုယ်အတွက် အကောင်းဆုံးဖြစ်မလဲ? ဘယ်လမ်းကို သွားရမလဲဆိုတာ ရွေးရတဲ့ခက်တဲ့အချိန်ဆိုတာ လူတိုင်းမှာ ရှိတတ်ပါတယ်။ ဆာလံဆရာကတော့ပြောတယ် ဘုရားကိုကြောက်ရွံ့ ရိုသေတတ်တဲ့သူတွေကို ဘုရား က အမြဲတမ်း သူရွေးရမယ့်လမ်းကို သွန်သင်ပြသတယ်။ သင်ကိုယ်တိုင် ရွေးချယ်တဲ့လမ်းထက် ဘုရားရွေးပေးတဲ့လမ်းကို သိမြင်ပြီးလျောက်ချင်တယ်ဆိုရင် ဘုရားကိုကြောက်ရွံ့တဲ့စိတ်နှင့်ရှင်သန်ပါ။ ဘုရားကိုယ်တိုင်သွန်သင်ပြသပြီး ရွေးချယ်တဲ့လမ်းက သင့်တစ်ဘဝစာသာကောင်းစားမှာမဟုတ်ဘူး။ သားစဉ်မြေးဆက်တိုင်အောင် ထူးခြားပြီးကောင်းးစားမယ်။

စက်တင်ဘာလ ၁၂ ရက်နေ့

ဘုရာသခင်ရဲ့လမ်း (၄)

‘အ​ကြောင်း​မူ​ကား၊ ဖြောင့်​မတ်​သော​သူ​တို့၏​လမ်း​ကို ထာ​ဝ​ရ​ဘု​ရား​သိ​ကျွမ်း​တော်​မူ​၏။ မ​တ​ရား​သော​သူ​တို့​၏​လမ်း​သည် ဆုံး​ရှုံး​ခြင်း​သို့ ရောက်​ရ​လိမ့်​သ​တည်း။’ ဆာလံ ၁:၆

ဘုရားသိကျွမ်းတဲ့လမ်းကို လျှောက်တဲ့ သူနှင့် မတရားတဲ့သူ လျှောက်တဲ့လမ်းက မတူဘူး။ ဘုရားသခင် သင့်ကိုလမ်းပြပို့ဆောင်တဲ့လမ်းမှာ မစင်ကြယ်တဲ့သူ လျှောက်မသွားရ။ ဟေ ၃၅း၈ ကိုယ်တိုင်တော် ခရီးသွားမယ်။ ဟေ ၃၅း၈ သားရဲတကောင်မှ ရှာမတွေ့၊ ဟေ၃၅း၉ လမ်းလွဲသောသူ တစ်ယောက်မှမရှိ။ ဟေ ၃၅း၉ ငြီးတွားခြင်းနှင့် ဝမ်းနည်းခြင်း နေရာယူလို့မရ။ ဟေ ၃၅း၉ ဘယ်လောက် ကောင်းလိုက်တဲ့လမ်းလဲ? ဖြောင့်မတ်သူကတော့ ဘုရား နဲ့အတူလျှောက်ရတဲ့ လမ်းကိုပဲ လျှောက်ခွင့်ရပြီးတော့ ဆုံးရှုံးခြင်းဆိုတာ ရှာလို့တောင်မတွေ့ နိုင်ဘူး။ မတရားတဲ့သူလျှောက်တဲ့လမ်းကတော့ အဆိုးဆုံးက ဘုရားမပါခြင်းပဲ။ ရလဒ်ကတော့ အောင်မြင်ခြင်းနှင့် အလှမ်းဝေး ကွာခြင်းပါပဲ။

စက်တင်ဘာလ ၁၁ ရက်နေ့

ဘုရာသခင်ရဲ့လမ်း (၃)

‘ထာ​ဝ​ရ​ဘု​ရား​သည် ကောင်း​သော​သ​ဘော၊ ဖြောင့်​မတ်​သော​သ​ဘော​နှင့် ပြည့်​စုံ​တော်​မူ​သည်​ဖြစ်၍၊ အ​ပြစ်​ရှိ​သော​သူ​တို့​ကို လမ်း​ပြ​တော်​မူ၏။ နှိမ့်​ချ​လျက်​ရှိ​သော​သူ​တို့​ကို တ​ရား​လမ်း၌ သွေး​ဆောင်​တော်​မူ၏။ နှိမ့်​ချ​လျက်​ရှိ​သော​သူ​တို့​အား ခ​ရီး​တော်​တို့​ကို သွန်​သင်​တော်​မူ၏။ ‘ဆာလံ ၂၅:၈-၉

ဘုရားသခင်ရဲ့လမ်းကို လူတိုင်း လျှောက်ခွင့် ဘုရားက ပေးထားတယ်။ လူတွေကောင်းလို့ အရည်အချင်းရှိလို့ ဘုရားရဲ့လမ်းထဲကို လျှောက်လှမ်းခွင့်ရတာမဟုတ်ဘူး။ ဘုရားရဲ့ ကောင်းမြတ်ခြင်း နှင့် ဖြောင့်မတ်သောသဘောကြောင့်ဖြစ်တယ်။ အားနည်းချက်ရှိတဲ့သူ မပြည့်စုံတဲ့သူတွေကိုတောင် ဘုရားက မကျန်စေချင်ဘူး။ ပြည့်စုံမှ အပြစ်နဲ့ ကင်းမှ ဘုရားလမ်းကို လျှောက်လှမ်းခွင့်ပေးတာမဟုတ်ဘူး။ ဘုရားရဲ့လမ်းကို လျှောက်ရင်း သင်ဟာ ပိုပြည့်စုံလာမယ် ပိုပြီးတော့ သန့်ရှင်းခြင်းနှင့် ပြည့်ဝလာလိမ့်မယ်။ နှ်ိမ့်ခြင်းသဘော ဖြစ်တဲ့ သွန်သင်ခံခြင်လေ ဘုရားက သင့်ကို သူ့ရဲ့လမ်းကို ပိုပြီးသင်ပေးပါလိမ့်မယ်။

စက်တင်ဘာလ ၁၀ ရက်နေ့

ဘုရားသခင်ရဲ့လမ်း (၂)

“သူ​တို့​သည် အား​တိုး​တက်၍ ခ​ရီး​သွား​လျက်၊ ဇိ​အုန်​မြို့​မှာ ဘု​ရား​သ​ခင့်​ထံ​တော်၌ မျက်​နှာ​ပြ​ကြ​ပါ၏။” ‭‭ဆာလံ‬ ‭၈၄း၇

ဘုရားရဲ့လမ်းကို နေ့စဉ်လျှောက်လှမ်းတဲ့သူတွေမှာ တွေ့ရတဲ့ အရာကတော့ ဘယ်တော့မှ အားမလျော့သွားပဲပိုပြီး အားကြီးလာခြင်းပါပဲ။ ကိုယ့်စိတ်ကြိုက်လမ်းလျှောက်လှမ်းတဲ့သူတွေကတော့ ကြာရင်အားအင်ကုန်ခမ်းပြီးတော့ စိတ်ပျက်အားလျော့သွားတတ်ကြတယ်။ လူတွေက နှစ်ပေါင်း နှစ်ဆယ်ကျော် ဘုရားသခင်ရဲ့ခေါ်ခြင်း နောက်လိုက်လာပြီးတဲ့အခါမှာ ဘုရားရဲ့ လမ်းကိုလိုက်ရတာ စိတ်ပျက်တဲ့အချိန် အားကုန်သွားတဲ့အချိန်မရှိဘူးလားလို့မေး တတ်ကြတယ်။ ကျွန်တော် နှစ်ပေါင်းများစွာ ဘုရားပြတဲ့လမ်း လျှောက်လှမ်း တဲ့အခါမှာ ရှိတဲ့အားမကုန်တဲ့အပြင် အရင်ထက်ပိုပြီး အားတွေ ပိုတိုးလာတယ်။ စိတ်ဓါတ်မကျတဲ့အပြင် ပိုပြီးတော့ တက်ကြွလာသေးတယ်။ ဘုရားလျှောက်ခိုင်းတဲ့လမ်းသာမှန်ပါစေ အားတွေလျော့ သွားမှာမဟုတ်ဘူး ပိုတိုးလာတာပဲရှိပါလိမ့်မယ်။

စက်တင်ဘာလ ၉ ရက်နေ့

ဘုရာသခင်ရဲ့လမ်း

“ကိုယ်​တော်​ကို အား​ပြု​သော​သူ​သည် မင်္ဂ​လာ​ရှိ​ပါ၏။ ထို​သို့​သော​သူ​တို့​သည် လမ်း​ခ​ရီး​တော်​တို့​ကို နှ​လုံး​သွင်း​တတ်​ကြ​ပါ၏။” ဆာလံ‬ ‭၈၄:၅

နေ့တိုင်းမှာ ရွေးစရာ (၂)ခုရှိတယ်။ တစ်ခုကတော့ ကိုယ်စိတ်ကြိုက်၊ ကိုယ့်စိတ်ကူးအတိုင်း ရွေးချယ်တဲ့လမ်း။နောက်တစ်လမ်းကတော့ ဘုရားသခင် သင့်ကိုလျှောက်စေချင်တဲ့လမ်း။ ဒီလမ်းနှစ်ခုဟာ နေ့တိုင်း သင်ရွေးချယ်ရတယ်။ ဘယ်လမ်းကို သင်ရွေးသလဲဆိုတာက သင့်ဘဝရဲ့ အပြောင်းအလဲတွေကို ဆုံးဖြတ်ပေးတယ်။ ဘုရားရဲ့လမ်းအတိုင်း သွားလာတဲ့သူတွေက ကိုယ့်အားကိုယ်ကိုးပြီးရှင်သန်တဲ့သူတွေမဟုတ်ဘူး။ ကိုယ်ဉာဏ် ပေါ်မှာ ရွေးချယ်ဆုံးဖြတ်တာမဟုတ်ဘူး။ ဘုရားကို ရာနှုန်းပြည့် အားပြု ပြီးတော့ရှင်သန်တဲ့ သူတွေဖြစ်တယ်။ ဘုရားပြတဲ့ လမ်းကိုလျှောက်လှမ်းတဲ့သူတွေက ဘုရားကလွဲပြီးတော့ အားကိုးစရာ မရှိ၊ အခြားအရာတွေကိုအားပြုလို့မရပဲ ဘုရားကိုပဲ အပြည့်အဝ အားပြုထားတဲ့သူတွေပါ။​

စက်တင်ဘာလ ၇ ရက်နေ့

ဘုရားသခင့်ရဲ့နိုင်ငံတော်(၆)

‘ယေ​ရှု​က၊ ထွန်​ကိုင်း​ကို​ကိုင်​လျက် နောက်​သို့​လှည့်၍ ကြည့်​သော​သူ​မည်​သည်​ကား၊ ဘု​ရား​သ​ခင်၏ နိုင်​ငံ​တော်​နှင့် မ​ထိုက်​မ​တန်​ဟု မိန့်​တော်​မူ၏။’ ရှင်လုကာ ၉:၆၂

နောက်ပြန်လှည့်တယ်ဆိုတဲ့ စကားက ဘုရားသခင်ရဲ့နိုင်ငံတော်ထဲမှာ မရှိဘူး။ လဲကျရင် (၇) ကြိမ်ပြန်ထ ခွင့်ရှိပေမယ့် နောက်ပြန်လှည့်တဲ့အတွက်တော့ ဘုရားသခင်နိုင်ငံတော်မှာ နေရာမရှိဘူး။ ဘယ်လောက်ပဲ ဆိုးသွမ်းပါစေ၊ မကောင်းတဲ့လူဘယ်လောက်ဖြစ်ပါစေ၊ ဘုရားသခင်ရဲ့ကျေးဇူးတော်က ထိုက်တန်တဲ့ဘဝကို ပို့ဆောင်ပေးတယ်။ အားနည်းချက် ဘယ်လောက်ပဲရှိရှိ၊ ဘယ်လောက်ပဲ ပညာမတတ်တဲ့သူပဲဖြစ်ပါစေ သခင်ယေရှုအားဖြင့် ထိုက်တန်တဲ့သူဖြစ်စေတယ်။ ဒါပေမယ့် နောက်ပြန်လှည့်တဲ့ သူအတွက်တော့ ထိုက်တန်တဲ့အရာ ဘာဆိုဘာမှမရှိတော့ဘူး။ နောက်လှည့်ကြည့်တဲ့ လောတ မယားလိုဆားတိုင်အဖြစ်နဲ့ပဲ ကျန်ခဲ့လိမ့်မယ်။ ဘုရားနိုင်ငံတော်သား တစ်ယောက်အနေနဲ့ ဘယ်‌တော့မှ နောက် မလှည့်ပဲ ရှေ့မှာရှိတဲ့ ပန်းတိုင်ကို ချီတက်တဲ့ သူ ဖြစ်ပါ။ မထိုက်တန်တဲ့လုပ်ရပ်ကို ဘယ်တော့မှ မလုပ်မိစေနဲ့။

စက်တင်ဘာလ ၆ ရက်နေ့

ဘုရားသခင့်ရဲ့နိုင်ငံတော် (၅)

“ထို​ကြောင့် အ​ကြင်​သူ​သည် ဤ​သူ​ငယ်​ကဲ့​သို့ မိ​မိ​ကိုယ်​မိ​မိ နှိမ့်​ချ​အံ့၊ ထို​သူ​သည် ကောင်း​ကင်​နိုင်​ငံ​တော်၌ သာ၍ ကြီး​မြတ်​လိမ့်​မည်။-”ရှင်မဿဲ ၁၈:၄

ကြီးမြတ်သောသူရဲ့ နှလုံးသား

ကောင်းကင်နိုင်ငံဟာ လောကနိုင်ငံနဲ့ လုံးဝမတူပါ။ လောကကြီးက ကြီးမြတ်သူဖြစ်ဖို့ လုပ်ဆောင်ရမယ့် အရာတွေများစွာရှိပေမယ့် ဘုရားနိုင်ငံတော်မှာတော့ နှလုံးဟာ အဓိကကျတယ်။ လုပ်ဆောင်မှုတွေထက် နှလုံးသားကို ကြည့်တဲ့ ဘုရားပါ။ လုပ်နိုင်တဲ့ သူထက် ဘုရားနှစ်သက်တဲ့ နှလုံးသား ရှိတဲ့သူကိုပိုချီးမြှောက်တယ်။ သူငယ်တယောက်လို ပဲ ဟန်ဆောင်မှုကင်းပြီး နှိမ့်ချ တဲ့သူတွေဟာ ဘုရားနိုင်ငံတော် မှာ အမြင့်ဆုံး ချီးမြှောက်ခံရမယ့် သူတွေပဲ။ နှိမ့်ချတဲ့နှလုံးသားဟာ ဘုရားနိုင်ငံတော်မှာ အမြင့်ဆုံးချီးမြှောက်ခံရမယ့် အကြီးမြတ်ဆုံးသောတွေပဲ။

စက်တင်ဘာလ ၅ ရက်နေ့

ဘုရားသခင်ရဲ့ နိုင်ငံတော် (၄)

‘ငါ​သည် ဘု​ရား​သ​ခင်၏​ဝိ​ညာဉ်​တော်​ကို အ​မှီ​ပြု၍ နတ်​ဆိုး​တို့​ကို နှင်​ထုတ်​သည်​မှန်​လျှင်၊ အ​ကယ်​စင်​စစ် သင်​တို့၌ ဘု​ရား​သ​ခင်၏​နိုင်​ငံ​တော် တည်​ချိန်​ရောက်​လေ​ပြီ။- ‘ ရှင်မဿဲ ၁၂:၂၈

ဘုရားသခင့်ရဲ့နိုင်ငံတော် တည်ချိန်ရောက်ပြီ

အဆိုးတွေကို ဖယ်ရှားမောင်းထုတ်ခြင်း မပြုလုပ်ပဲ ဘယ်လိုကောင်းတဲ့အရာကို တည်ဆောက်မလဲ? နတ်ဆိုးတွေကို မနှင်ထုတ် မဖယ်ရှားပဲ ဘုရားရဲ့နိုင်ငံတော်ကို တည်ဆောက်ဖို့ဆိုတာ မဖြစ်နိုင်ပါဘူး။ နတ်ဆိုးနှင်ထုတ်ခြင်းက သခင်ယေရှုအမှုတော်မြတ်ရဲ့ အရေးကြီးတဲ့ နေရာမှာပါဝင်ခဲ့တယ်။ ဘာသာရေးသမားတွေကတော့ နတ်ဆိုးနှင်ထုတ် တာကို နတ်ဆိုးနှင့်ပေါင်းတယ်လို့မြင်ခဲ့တာ အခုမှမဟုတ်ဘူး။သခင်ယေရှုခေတ်ကတည်းကပဲ။ ဓမ္မဟောင်းကျမ်းတစ်ခုလုံးမှာလည်း နတ်ဆိုးမောင်းထုတ်ခဲ့တာဆိုလို့ ဒါဝိဒ်ပဲရှိခဲ့တာကိုး။သူကလည်းတကယ့် ဘုရားဘုန်းတော်နှင့်ပြည့်တဲ့ နိုင်ငံကိုတည်ဆောက်ခဲ့တဲ့သူ။ မှောင်မိုက်ခြင်းနဲ့ပြည့်နှက်တဲ့ စာတန်နိုင်ငံကို ဖယ်ရှားပြီးမှပဲ အလင်းနှင့်ပြည့်တဲ့ဘုရားနိုင်ငံတော်ကိုတည်ဆောက်နိုင်မယ်။ သန့်ရှင်းသောဝိညာဉ်တော်တန်ခိုးနှင့် နတ်ဆိုးတွေကို မောင်းထုတ်ခြင်းဟာ ဘုရားနိုင်ငံတော်ကို တည်ဆောက်ခြင်းရဲ့အခြေခံပဲ။ ဘုရားနိုင်ငံတော် တည်ဆောက်ချင်တယ်ဆိုရင် တခြားနည်းလမ်းနဲ့တော့မရဘူး။ သန့်ရှင်းသောဝိညာဉ်တော်ကို အမှီပြုပြီး နတ်ဆိုးတွေကို ဖယ်ရှားရှင်းလင်းခြင်းတော့ လုပ်ကိုလုပ်ရမယ်။

စက်တင်ဘာလ ၄ ရက်နေ့

ဘုရားသခင်ရဲ့ နိုင်ငံတော် (၃)

“အကြောင်းမူကား ဘုရားသခင်​၏​နိုင်ငံ​တော်​သည် စကား​၌​မ​တည်​ဘဲ တန်ခိုး​၌​တည်​၏။” ကောရိန္သုဩဝါဒစာပထမစောင် ၄:၂၀

အပြောပဲမဟုတ်

လူတွေက စကားလုံးလှလှလေးတွေကြားျင်တာပဲမဟုတ်သလို ဘုရားကလည်းစကားအပြောလေးတွေကြားမှာပဲ နှစ်သိမ့်ပေးတဲ့ လေထဲတိုက်အိိမ်ဆောက်တဲ့ဘဝနဲ့ပဲ သူ့ရဲ့ နိုင်ငံတော်ကိုတည်ဆောက်မှာမဟုတ်ဘူး။ ဘုရားရဲ့နိုင်ငံတော်ဟာ ပြောတာနဲ့ပဲ မပြီးသွားဘူး။ တန်ခိုးနှင့်အမြဲတမ်းသက်သေထူတယ်။ စကားလုံးတွေကြားမှာ ချောင်ပိတ်မမိစေနှင့်။ အပြောလေးတွေနဲ့ပဲ ကျေနပ်နေတဲ့ သူမဖြစ်နဲ့။ ပြောတဲ့အတိုင်းထက်တောင် ပိုပြီးတော့ဖြစ်ပေါ်လာတဲ့ ဘုရားရဲ့တန်ခိုးတော်ကို အမှီပြုပြီး ရှင်သန်ဖို့လိုတယ်။ ဘုရားနိုင်ငံသားတွေဟာ အပြောနဲ့ပဲ လုပ်တဲ့သူမဟုတ်ပဲ တန်ခိုးနှင့် သက်သေထူတဲ့သူဖြစ်ကြောင်း တစ်လောကလုံးသိဖို့အချိန်ရောက်ပြီ။ အပြောသမားများနေပြီးတော့ တန်ခိုးနှင့်ရှင်သန်တဲ့သူ နည်းနေသေးလို့ ထိရောက်သင့်သလောက် မထိရောက်သေးဘူး။

စက်တင်ဘာလ ၃ ရက်နေ့

ဘုရားသခင်ရဲ့နိုင်ငံတော် (၂)

“ဘု​ရား​သ​ခင်၏ နိုင်​ငံ​တော်​သည် အ​စား​အ​သောက်၌ မ​တည်။ ဖြောင့်​မတ်​ခြင်း၊ ငြိမ်​သက်​ခြင်း၊ သန့်​ရှင်း​သော ဝိ​ညာဉ်​တော်​အား​ဖြင့် ခံ​ရ​သော ဝမ်း​မြောက်​ခြင်း၌ တည်၏။-” ရောမ ၁၄း၁၇

နိုင်ငံတော်ရဲ့ အခြေခံအုတ်မြစ်

ဘုရားသခင်နိုင်ငံတော်ဟာ ဘယ်အပေါ်မှာ တည်ဆောက်ထားတာလဲ? လောကရဲ့ အသက်ရှင် ‌‌ေမ်းခြင်းက နေ့စဉ် စားဝတ်နေရေး ပြေလည်ခြင်း မပြေလည်ခြင်း အပေါ်မှာ တည်ဆောက်ထားပေမယ့် ဘုရားနိုင်ငံတော် ကတော့ လောကလိုမဟုတ်ဘူး။ လူတွေက စားဝတ်နေရေး အဆင်ပြေရင် တမျိုးမပြေရင်တမျိုး ပြောင်းလဲတတ်သလို၊ လူတန်းစားကိုလည်း စားဝတ်နေရေး အပေါ်မူတည်ပြီးတော့ ခွဲခြားတတ်တယ်။ စားဝတ်နေရေး ပြေလည်သူ လူချမ်းသာများနဲ့ မပြေလည်သူ လူဆင်းရဲဟူပြီးတော့ ခွဲခြားသတ်မှတ်တယ်။ ဘုရားနိုင်ငံကတော့ ဒီလိုမဟုတ်ဘူး။ သန့်ရှင်းသောဝိညာဉ်တော်ရဲ့ အသီးအပွင့်တွေ အပေါ် အခြေခံအုတ်မြစ် တည်ဆောက်ထားတယ်။ ဝိညာဉ်တော်ရဲ့ အသီးအပွင့် မရှိပဲနဲ့ ဘယ်လိုမှ ဘုရားနိုင်ငံတော်ထဲမှာ ရှင်သန်ကြီးထွားနိုင်မှာမဟုတ်ဘူး။

စက်တင်ဘာလ ၂ ရက်နေ့

ဘုရားသခင်ရဲ့နိုင်ငံတော်

‘ဘုရားသခင်​၏​နိုင်ငံ​တော်​နှင့် ကိုယ်တော်​၏​ဖြောင့်မတ်​ခြင်း​ကို ဦးစွာ​ရှာ​ကြ​လော့။ ထိုအခါ ဤ​အရာ​အားလုံး​တို့​ကို သင်​တို့​အား ထပ်လောင်း​၍​ပေး​တော်မူ​လိမ့်မည်။ ‘ ရှင်မဿဲခရစ်ဝင် ၆:၃၃

ဉီးစားပေးတာမှန်ရင်

ဘုရားသခင် နိုင်ငံတော်သားတစ်ယောက်အနေနဲ့ ဉီးစားပေးရမယ့်အရာကို မမေ့စေချင်ဘူး။ စားဝတ်နေရေးဉီးစားပေးစနစ်ကနေ နိုင်ငံတော်ဉီးစားပေးစနစ်ထဲကို မကူးပြောင်းနိုင်သရွေ့ စိုးရိမ်ခြင်းရဲ့ဖိစီးမှုအောက်မှာပဲရှိနေအုံးမယ်။ စားဝတ်နေရေး အဆင်ပြေဖို့အတွက် ဖြောင့်မတ်ခြင်း တရားကိုဘေးဖယ်ထားသရွေ့ ထပ်လောင်းပေးမယ့်အရာတွေရောက်လာဖို့ ကြန့်ကြာနေအုံးမှာပဲ။ ဘုရားနိုင်ငံတော်သာ ပထမဆိုတဲ့ မှန်ကန်တဲ့ ဉီးစားပေးတဲ့အရာ မှန်ကန်လာတယ်ဆိုရင် စိုးရိမ်နေတဲ့ စားဝတ်နေရေး အရာတွေက လိုအပ်တာထက် ပိုလျှံစွာ အသက်တာကို ရောက်လာပါလိမ့်မယ်။

ဩဂုတ်လ ၃၁ ရက်နေ့

မျက်နှာပွင့်လန်းခြင်း

“အ​လုံး​စုံ​သော ဒု​က္ခ​ဆင်း​ရဲ​ထဲ​မှ ကယ်​နုတ်၍၊ အဲ​ဂု​တ္တု​ပြည်​ကို အ​စိုး​ရ​သော ဖာ​ရော​ဘု​ရင်​ထံ၌ မျက်​နှာ​ပွင့်​လန်း​ခြင်း​နှင့် ပ​ညာ​အ​တတ်​ကို​ပေး​တော်​မူ​သ​ဖြင့်၊ ထို​မင်း​ကြီး​သည် အဲ​ဂု​တ္တု​နိုင်​ငံ​အုပ်​အ​ရာ၊ နန်း​တော်​အုပ်​အ​ရာ၌ ယော​သပ်​ကို​ခန့်​ထား​လေ၏။-” တမန်တော် ၇:၁၀

ဘုရားပေးတဲ့မျက်နှာသာက ဘယ်လောက်တောင် ကောင်းလိုက်သလဲဆိုရင် သင့်ကို အလုံးစုံသော ဒုက္ခဆင်းရဲခြင်းထဲကနေ ကယ်တင်ပြီးတော့၊ အကောင်းဆုံးသော နေရာကို ပြင်ဆင်ပို့ဆောင်ပေးတယ်။ အကိုတွေက ယောသပ်ကို အိမ်မက်ပျက်ဆီးဖို့ရန် ကျွန်အဖြစ်ရောင်းစားလိုက်ပေမယ့်၊ ပေါတိဖါဇနီးက ယောသပ်ကို သူ့အလိုမလိုက်တဲ့အတွက် ထောင်ထဲမှာ အဆုံးသတ်သွားဖို့ လုပ်ဆောင်ပေမယ့် ဘုရားရဲ့မျက်နှာသာ လူတွေပေးတဲ့ဒုက္ခဆင်းရဲအလုံးစုံကနေ လွတ်မြောက်စေပြီး အိမ်မက်ကိုပြည့်စုံစေတဲ့ဘဝကို ပို့ဆောင်ပေးတယ်။ ဘုရားပေးတဲ့မျက်နှာသာရှိတယ်ဆိုရင် ဘယ်သူမှ ဘယ်လိုမှ သင့်ကို ဒုက္ခဆင်းရဲထဲကို တွန်းမချနိုင်ဘူးဆိုတာ ယုံပါ။

ဩဂုတ်လ ၃၀ ရက်နေ့

အမြဲတည်သော မျက်နှာသာ

“For His anger is but for a moment, His favor is for life; Weeping may endure for a night, But joy comes in the morning.” Psalms‬ ‭30‬:‭5‬ ‭NKJV‬‬

ဘုရားရဲ့ အမျက်တော်ဆိုတာ ကြောက်ဖို့ကောင်းပေမယ့် အမြဲခံစားဖို့အတွက်မဟုတ်ဘူး။ အမျက်တော်ထက် မျက်နှာသာဟာ ပိုကောင်းတယ်၊ ပိုကြီးတယ်။​ မျက်နှာသာရခြင်းကတော့ အမြဲခံစားဖို့အတွက် ဖြစ်တယ်။ လူတွေက အမျက်တော် အကြောင်းကိုပဲ ပုံကြီးချဲ့ပြီးတော့ ပြောဆိုဝန်ခံနေကြတယ်။ တကယ်တော့ အမျက်တော်ထက် ပိုကောင်းတဲ့ ပိုကြီးတဲ့မျက်နှာသာတော်အကြောင်းကိုတော့ ပြောဖို့ဝန်ခံဖို့မေ့နေတတ်ကြတယ်။ အမျက်တော်ကြောင့် လူတွေဟာ ငိုကြွေးခြင်း၊ ဝမ်းနည်းခြင်းတွေ ဘယ်လောက်ပဲခံစားရခံစားရ နေ့ရက်တိုင်းမှာ အသစ်သောမျက်နှာသာ ကျေးဇူးကြောင့် ငိုကြွေးခြင်းကိုအဆုံးသတ်ပြီး သီချင်းဆိုရတဲ့အခွင့်ကို ရတယ်။ နေ့ရက်သစ်တိုင်းမှာ မျက်နှာသာရခြင်းကြောင့် ငိုကြွေးသောကရောက်ခြင်းကနေ ဝမ်းမြောက်ကခုန်ချီးမွမ်းခြင်းဘဝကို ရရှိစေတယ်။

ဩဂုတ်လ ၂၉ ရက်နေ့

သူများမရနိုင်တာ ယူဆောင်ပေးသောမျက်နှာသာ

“ဣ​သ​ရေ​လ​သည် အ​သက်​ကြီး​စဉ်​အ​ခါ သား​ယော​သပ်​ကို​ရ​သော​ကြောင့်၊ အ​ခြား​သော​သား​အ​ပေါင်း​တို့​ကို​ချစ်​သည်​ထက် ယော​သပ်​ကို​သာ၍​ချစ်၏။ အ​ဆင်း​အ​ရောင်​ထူး​ခြား​သော အင်္ကျီ​ကို​ချုပ်၍​ပေး၏။” ကမ္ဘာဦးကျမ်း ၃၇:၃

လူတွေ လွယ်လွယ်ကူကူ မရနိုင်တဲ့အရာတွေကို ဘုရားမျက်နှာသာခံစားရတဲ့သူတွေအသက်တာမှာ လွယ်လွယ်ကူကူရရှိခံစားတယ်။ ဘယ်လောက်တောင် ရသလဲ ဆိုရင် ညီအကိုချင်းတောင် မနာလိုဖြစ်ရတဲ့အထိကိုရရှိတာ။ သူများရတာပဲ သင်ရတယ်ဆိုရင် သင့်မှာ ဘုရားမျက်နှာသာလိုတယ်။ ဘုရားမျက်နှာသာက အခြားသူတွေ မရနိုင်ဘူးလို့ထင်တဲ့အရာတွေကို အလွယ်တကူ သင့်ဆီကို ရောက်လာစေတယ်။ ယောသပ်ကို သူ့ဖခင်က ချစ်တဲ့အတွက် အခြားသူတွေထက်သူဟာ မျက်နှာသာရတယ်။ အဲ့ဒီမျက်နှာသာဟာ လူတိုင်း လိုချင်မျှော်လင့်နေတဲ့ အရာတွေ၊ လူတိုင်း မရနိုင်တဲ့အရာတွေကိုယူဆောင်လာပေးတယ်။ ဘုရားက သင့်ကို ထူးခြားတဲ့မျက်နှာသာခံစားရတဲ့ သူဖြစ်စေချင်တယ်။

ဩဂုတ်လ ၂၈ ရက်နေ့

အပြောင်းအလဲများကို ယူဆောင်လာသောမျက်နှာသာ

“သူ​တို့​တောင်း​သည်​အ​တိုင်း၊ အဲ​ဂု​တ္တု​လူ​တို့​သည် ပေး​ချင်​သော​စေ​တ​နာ​စိတ်​ကို ထာ​ဝ​ရ​ဘု​ရား​ဖြစ်​စေ​တော်​မူ၏။ မော​ရှေ​သည်​လည်း၊ အဲ​ဂု​တ္တု​ပြည်​တွင် ဖာ​ရော​ဘု​ရင်၏​ကျွန်​များ၊ လူ​များ​ရှေ့၌ ကြီး​စွာ​သော​အ​သ​ရေ​ရှိ​လေ၏။” ထွက်မြောက်ရာ ၁၁း၃

အရင်က မဖြစ်ဖူး၊ မဖြစ်နိုင်ရင် နောက်မှာ မဖြစ်လာဘူးလို့တော့ မထင်လိုက်နဲ့။ ဘုရားမျက်နှာသာ သင့်ဘဝမှာ ရောက်လာရင် မဖြစ်ဖူး၊ မဖြစ်နိုင်တာတွေအားလုံးက ပြောင်းလဲသွားပြီးတော့ အခက်အခဲမရှိ ဖြစ်လာလိမ့်မယ်။ ဘယ်လောက်များ ထူးဆန်းအံ့ဩဖို့ကောင်းသလဲ? ဘုရားရဲ့မျက်နှာသာ ခံစားရတဲ့ဘဝလောက်ကောင်းတာ ဘာများရှိအုံးမလဲ? အရင်ကအထင်သေးခံရတဲ့ မောရှေက မျက်နှာသာရောက်လာတဲ့အချိန်မှာ အထင်ကြီးလေးစားခြင်းခံရတဲ့ မောရှေဖြစ်လာတယ်။ လူတွေ ရဲ့အမြင်ဟာ မျက်နှာသာ ရတဲ့အခါမှာ လုံးဝကို ပြောင်းလဲသွားတယ်။ အရင်က ဘာမှ တောင်းဆိုလို့မရတဲ့ ဣသရေလ လူမျိုးတွေအတွက် စေတနာနှင့်ပေးျင်တဲ့စိတ်ကိုလည်း ဘုရားကထည့်ပေးတယ်။ မျက်နှာသာ ခံစားတဲ့ဘဝလောက် ကောင်းတာ မရှိဘူးဆိုတာ သိစေျင်တယ်။ အရည်အချင်းရှိတိုင်းအောင်မြင်တာမဟုတ်ဘူး။ ဘုရားမျက်နှာသာ ရှိမှပဲ မမျှော်မှန်းနိုင်လောက်အောင် တိုးတက်ပြောင်းလဲမှုတွေဖြစ်ပေါ်လာပါလိမ့်မယ်။

ဩဂုတ်လ ၂၇ ရက်နေ့

မျက်နှာသာရသောအခွင့်

“ထို​လူ​မျိုး​သည် အဲ​ဂု​တ္တု​လူ​တို့​ထံ၌ မျက်​နှာ​ရ​သော​အ​ခွင့်​ကို​ငါ​ပေး၍၊ သင်​တို့​သည် ထွက်​သွား​သော​အ​ခါ လက်​ချည်း​မ​သွား​ရ​ကြ။” ထွက်မြောက်ရာ ၃:၂၁

ဘုရားထံကနေ မျက်နှာသာရခြင်းကဘယ်လောက်တောင် အသက်တာကို ပြောင်းလဲသွားစေလဲ? အရင်က ဘာတောင်းတောင်းမပေးတဲ့ အဲဂုတ္တုလူတွေက အခုတောင်းခြင်းသမျှ တောင်းလို့ရတဲ့ အထိဘုရားက ပြောင်းလဲသွားစေတယ်။ ဘုရားကို ဝတ်ပြုဖို့ သုံးရက်လေး တောင်းတာ တောင်မပေးဘူး။ အင်မတန်မှ ခေါင်းမာတဲ့ လူမျိုး၊ နှစ်ပေါင်း ၄၀၀ ကျော် အနိုင်ကျင့် ဗိုလ်ကျ စိုးမိုးထားတဲ့လူမျိုးကို စေတနာစိတ်နှင့် ပေးကမ်းတဲ့သူတွေဖြစ်လာအောင် ဘုရားထံကလာတဲ့ မျက်နှာသာက ပြောင်းလဲစေတယ်။ ဘုရားမျက်နှာသာ သင့်ဆီရောက်လာရင် အရင်က သင့်ကိုနာကျင်စေတဲ့ လူတွေက ကြင်နာမှုတွေသူတွေ ဖြစ်လာလိမ့်မယ်။

ဩဂုတ်လ ၂၆ ရက်နေ့

မျက်နှာသာ ခံစားရတဲ့အချိန်

“You will arise and have compassion on Zion, for it is time to show favor to her; the appointed time has come.” Psalms‬ ‭102‬:‭13‬ ‭NIV‬‬

ရုန်းကန်နေရတဲ့ဘဝကနေ အရာရာအဆင်ပြေပြီးတော့ အခက်အခဲဆိုတာ ဘာလဲလို့မေးရတဲ့ကာလ ဘယ်အချိန်ရောက်မှာလဲလို့ မေးရင်၊ အဖြေကတော့ ဘုရားရဲ့ မျက်နှာသာခံစားရတဲ့ အချိန်ကာလ သင့်ဘဝထဲမှာ ရောက်လာရင် အခက် အခဲတွေအားလုံးက အခွင့်အရေးဖြစ်ပြောင်းသွားလိမ့်မယ်။ နှစ်ပေါင်းများစွာ မလွတ်နိုင်တဲ့ကျွန်ဘဝကနေ ထားတွေ တုတ်တွေ မကိုင်ဆွဲပဲ၊ သွေးထွက်သံယိုမဖြစ်ပဲ လွတ်မြောက်လာတဲ့ ဣသရေလ လူမျိုးတွေ အဖြစ်ပျက်ကိုပဲကြည့်။ မျက်နှာသာရချိန်ရောက်တဲ့အခါမှာ ရန်သူတွေက ဘယ်လို ဆီးတားဆီးတား မတားနိုင်တော့ဘူး။ ဘုရား မျက်နှာသာဟာ သင့်ဘဝရဲ့ အကောင်းဆုံးတွေကို ယူဆောင်လာတယ်။မျက်နှာသာ ခံစားရတဲ့အချိန် သင့်ဘဝမှာ ရောက်ပါစေ။

ဩဂုတ်လ ၂၄ ရက်နေ့

အနာဂတ်ကိုမြင်သူ

“ရှိမုန်​၏​အပေါင်းအဖော်​များ​ဖြစ်​ကြ​သော ဇေဗေဒဲ​၏​သား ယာကုပ်​နှင့်​ယောဟန်​တို့​သည်​လည်း အံ့အားသင့်​ကြ​၏။ ယေရှု​က​လည်း“မ​ကြောက်​နှင့်။ သင်​သည် ယခု​မှစ၍ လူ​ကို​ဖမ်း​လိမ့်မည်”​ဟု ရှိမုန်​အား မိန့်​တော်မူ​၏။” ရှင်လုကာခရစ်ဝင် ၅:၁၀

လူတွေက တစ်ခုခုဆို အတိတ်ကိုကြည့်ပြီးတော့ ဆုံးဖြတ်ချက်ချကြတယ်။ အလုပ်ခန့်ရင်လည်း အတိတ်ကလုပ်ခဲ့တဲ့အရာတွေကိုကြည့်ပြီး ခန့်သင့်မခန့်သင့် ဆုံးဖြတ်ကြတယ်။ အတိတ်က ကောင်းကောင်းအသက်ရှင်ခြင်း၊ မရှင်ခြင်းက လူတစ်ယောက် အတွက် အရေးကြီးတယ်လို့သတ်မှတ်ပြီးတော့ လူတစ်ယောက်ရဲ့ ဖြစ်တည်ခြင်းကို အမြဲတမ်း အတိတ်ရဲ့ ဘောင်ထဲမှာခတ်ပြီးတော့မှ ပုံဖေါ်လေ့ရှိတယ်။ သခင်ယေရှုကတော့အဲ့လို မဟုတ်ပါဘူး။ သူဟာ လူတစ်ယောက်ကို ကြည့်တဲ့အခါမှာ အတိတ်ထက် အနာဂတ်ကိုပဲ မြင်ပေးတယ်။ သူ့ရှေ့မှာ ပြပ်ဝပ်ပြီး အပြစ်များလှပါတယ်လို့ ကြေကွဲပြီးတော့ပြောနေတဲ့ ပေတရုကို သူဘယ်လိုမှ မမျှော်မှန်းနိုင်တဲ့ နောက်တဆင့် ဘဝကို သွားရမယ်လို့ ကြေငြာပေးတယ်။ တကယ်တော့ နောက် ၃နှစ်အကြာမှာ ပေတရုက လူပေါင်းများစွာအရှေ့မှာရပ်ပြီး သက်သေခံနေတဲ့ လူများစွာကို ဘုရားနိုင်ငံတော်မှာ ခေါ်သွင်းမယ့် သူအဖြစ်ဘုရားက မြင်ပြီးတော့ ပြောတာပါ။ လက်ရှိအခြေအနေနဲ့ မဆိုင်တဲ့ ဘဝကို မြင်ပေး ပို့ဆောင် ပေးတာ သခင်ယေရှုပဲရှိတယ်။

ဩဂုတ်လ ၂၃ ရက်နေ့

ပိုကောင်းတဲ့အနာဂတ်

“ရှိမုန်​၏​အပေါင်းအဖော်​များ​ဖြစ်​ကြ​သော ဇေဗေဒဲ​၏​သား ယာကုပ်​နှင့်​ယောဟန်​တို့​သည်​လည်း အံ့အားသင့်​ကြ​၏။ ယေရှု​က​လည်း“မ​ကြောက်​နှင့်။ သင်​သည် ယခု​မှစ၍ လူ​ကို​ဖမ်း​လိမ့်မည်”​ဟု ရှိမုန်​အား မိန့်​တော်မူ​၏။” ရှင်လုကာခရစ်ဝင် ၅:၁၀

ဘုရားပြုတဲ့နိမိတ်လက္ခဏာကိုမြင်တဲ့အခါမှာ ပေတရုအထဲမှာ ခံစားရတဲ့အရာ နှစ်ခုရှိတယ်။ တစ်ခုကတော့ မထိုက်တန်ဘူးဆိုပြီး အားငယ်စိတ် ဖြစ်ပြီးတော့ နောက်တစ်ခုကတော့ ကြောက်စိတ်ပါ။ တကယ်တော့ ဒီစိတ်နှစ်ခုက အသက်တာမှာ နေရာပေးသင့်တဲ့ စိတ်မဟုတ်ဘူး။ တချို့သောသူတွေအသက်တာမှာ နိမိတ်လက္ခဏာပေါင်းများစွာ ခံစားရပေမယ့် ဘာလို့အသက်တာမှာ တိုးတက်ပြောင်းလဲမှုမဖြစ်သလဲလို့မေးရင် ဒီခံစားချက်နှစ်ခုကို လက်ညှိုးထိုးပြရမယ်။ မထိုက်တန်ဘူးလို့ ခံစားတဲ့စိတ်က ဘုရားနဲ့အဝေးကို ထွက်သွားဖို့တွန်းအားပေးတယ်။ ဘုရားက နိမိတ်လက္ခဏာကို ပြုပေးတာ ထိုက်တန်လို့မဟုတ်ဘူး။ ချစ်လို့၊ နောက်ပြီးသူ့ကို ယုံကြည်လို့။ ထိုက်တန်လို့ နိမိတ်လက္ခဏာ ခံစားနေရတဲ့သူ တစ်ယောက်မှ လောကမှာမရှိဘူး။ ဒီခံစားချက်နှစ်ကို အသက်တာထဲကနေ မောင်းထုတ်နိုင်ပြီဆိုရင် သေချာတယ် သင့်ကို ဘုရားက ပိုကောင်းတဲ့အနာဂတ်ကို ပို့ဆောင် ပေးတော့မယ်။

ဩဂုတ်လ ၂၂ ရက်နေ့

နိမိတ်လက္ခဏာကြောင့်

“ရှိ​မုန်​ပေ​တ​ရု​သည် မြင်​လျှင်၊ ယေ​ရှု၏ ပု​ဆစ်​တော်​ကို ဦး​တိုက်၍၊ သ​ခင်၊ အ​ကျွန်ုပ်​သည် အ​ပြစ်​များ​သော​သူ ဖြစ်​ပါ၏။ အ​ကျွန်ုပ်​ဆီ​မှ ကြွ​သွား​တော်​မူ​ပါ​ဟု လျှောက်​လေ၏။-”ရှင်လုကာ ၅:၈

အသက်တာမှာ ဘုရားပြုတဲ့ နိမိတ်လက္ခဏာ အံ့ဖွယ်အမှုတွေ ဘာလို့များ လိုအပ်တာလဲ? အဲ့ဒါတွေမရှိလဲ အသက်ရှင်လို့ရတာပဲလို့ လူတချို့က ထင်နေတယ်။ တချို့ နက်နဲသောဖွင့်ပြချက်တွေ၊ ဘုရားခေါ်သံတွေကို နိမိတ်လက္ခဏာ အံ့ဖွယ်သောအမှုတွေ မပါပဲ လုံးဝမသိနိုင်၊ မကြားနိုင်ဘူး။ ပေတရုလို အင်မတန်မာကြောတဲ့ သူတစ်ယောက် တုန်လှုပ်ပြီးတော့ တစ်ခါမှ​သူ့ကိုယ်သူ မမြင်ဖူးတဲ့အမြင်တွေ မြင်စေတာက ဘုရားပြုတဲ့နိမိတ်လက္ခဏာအံ့ဖွယ်အရာတွေကြောင့်ပါ။ သခင်အရှေ့မှာ ပြပ်ဝပ်ပြီးတော့ သူ့အပြစ်တွေကို ဝန်ခံခဲ့ရုံတင်မကဘူး။ သူတစ်ညလုံး ကြိုးစားရှာခဲ့တဲ့အရာတွေကို ဘာမှမဟုတ်တဲ့အရာဆိုတာ သဘောပေါက်သွားပြီးတော့ အားလုံးကိုထားခဲ့နိုင်တာလဲ ဒီအရာကြောင့်ပဲ။ သူ့ဘဝ နှစ်ပေါင်းများစွာ ပိတ်မိနေတဲ့ နေရာကနေ သာပြီးမြင့်တဲ့ နယ်ပယ်ကို တတ်လှမ်းနိုင်ခဲ့တာဟာ ဘုရားပြုတဲ့ နိမ်ိတ်လက္ခဏာ ကြောင့် သာဖြစ်တယ်။

ဩဂုတ်လ ၂၁ ရက်နေ့

အရင်က မရဖူးသော်လည်း

“ရှိ​မုန်​က​လည်း၊ သ​ခင်၊ အ​ကျွန်ုပ်​တို့​သည် တစ်​ည​လုံး​ကြိုး​စား​သော်​လည်း တစ်​ကောင်​ကို​မျှ မ​ရ​ပါ။ သို့​ရာ​တွင် အ​မိန့်​တော်​ရှိ​လျှင် ပိုက်​ကွန်​ကို ချ​ပါ​မည်​ဟု လျှောက်​လေ၏။”ရှင်လုကာ ၅:၅

အတွေ့အကြုံဆိုတာ အကောင်းဆုံးဆရာဆိုပေမယ့်လည်း တစ်ခါတစ်ရံမှာ အဆိုးဆုံး မိတ်ဆွေလည်းဖြစ်တတ်တယ်။ တစ်ချို့သောအရင်က အတွေ့အကြုံတွေကြောင့် ရှေ့ဆက်ရမယ့်ဘဝအတွက် ခြေလှမ်းမလှမ်းရဲပဲ ချော်လဲ ရောထိုင် လုပ်နေကြတဲ့သူတွေအများကြီးပဲ။ အရင်က မဖြစ်ဖူး၊ မလုပ်နိုင်ခဲ့ပေမယ့် အရင်နဲ့မတူတဲ့ အရာတွေကိုလုပ်နိုင်ဖို့ ဘုရားက အမိန့်ပေးပေမယ့် မဖြစ်ခဲ့ဖူးတာတွေကို တွေးပြီးတော့ မလုပ်ရဲတော့တဲ့သူတွေအများကြီးပဲ။ ပေတရုရဲ့အရင်က တစ်ကောင်မှ​မရတဲ့ အတွေ့အကြုံက အခု သခင်အမိန့်ပေးတဲ့အခါမှာလည်းလာပြီးတော့ ဆီးတားနေတယ်။ ဒီလိုဆီးတားခြင်းခံနေရတဲ့ သူတွေ အများကြီးရှိတယ်။ ယနေ့ သခင်အမိန့်ပေးနေတယ် ပြန်လုပ်ကြည့်ပါ။ သခင်ပြောရင် အရင်က မဖြစ်ဖူးရင်တောင် အခု ဖြစ်ရုံတင်မကပဲ ဖြစ်ချင်တာထက်ပိုနေမယ်ဆိုတာ ယုံပါ။

ဩဂုတ်လ ၂၀ ရက်နေ့

ရေနက်ရာရပ်မှ ကောင်းကြီးမင်္ဂလာ

“ယေ​ရှု​က​လည်း၊ ကြောက်​ရွံ့​ခြင်း မ​ရှိ​နှင့်။ သင်​သည်​ယ​ခု​မှ​စ၍ လူ​တို့​ကို​ဖမ်း​မိ​သော​သူ ဖြစ်​လိမ့်​မည်​ဟု မိန့်​တော်​မူ၏။-” ရှင်လုကာ ၅:၁၀

ပေတရု တညလုံးရှာနေတာ ငါးပါ။ ဘယ်လောက်ကြိုးစားကြိုးစား ရှာမတွေ့ခဲ့ဘူး။ တချို့သော ကိုယ်လိုချင်တဲ့အရာတွေ၊ ကိုယ်ရှာနေတဲ့အရာတွေက မတွေ့တာဟာ ကြိုးစားမှုမရှိလို့လဲမဟုတ်ဘူး၊ ကိုယ်မကျွမ်းကျင်လို့လဲမဟုတ်ဘူး ဘုရားမပါလို့ မတွေ့တာပါ။ လောကမှာ လုပ်နိုင်တိုင်း၊ လုပ်တတ်တိုင်း ဖြစ်လာတာမဟုတ်ဘူး။ အရာရာကိုပိုင်တဲ့ ဘုရားက လုပ်ခွင့်ပေးမှပဲဖြစ်လာတယ်ဆိုတာ ပေတရုအသက်တာအားဖြင့်တွေ့ရတယ်။ သခင်ယေရှုက တစ်ခွန်းအမိန့်ပေးတဲ့အခါမှာ ဒီအမိန့်ဟာ သူ့ကြိုးစားမှုနဲ့မရနိုင်တဲ့ အရာတွေကို တံခါးဖွင့်ပေးတယ်။ ဒါကြောင့်သူဟာ လှေနှစ်စင်း နစ်လုမတတ် ငါးတွေကို ရှာတွေ့ခဲ့တယ်။ ဘုရားအခွင့်ပေးတဲ့အခါမှာ ဘယ်လောက်တောင် အံ့ဖွယ်ကောင်းလောက်အောင် အသက်တာမှာ ကောင်းကြီးခံစားခဲ့ရသလဲ? ဒါတောင်မကပဲ ဘုရားက ပေတရုကို နောက်တဆင့် တက်လှမ်းဖို့အခွင့်ပေးတယ်။ ငါးဖမ်းတဲ့ ဘဝကနေ လူကိုဖမ်းမိတဲ့ဘဝ ကိုတက်လှမ်းဖို့ အခွင့်ပေးခဲ့တယ်။ ဘုရားအခွင့်ပေးတဲ့အခါမှာ သင်လိုချင်တဲ့အရာထက် သင်လုပ်ချင်တဲ့အရာတွေထက် ပိုပြီး ကြီးမားတဲ့အရာတွေကို လုပ်ခွင့်၊ ပိုင်ဆိုင်ခွင့်ရနိုင်တယ်။

ဩဂုတ်လ ၁၉ ရက်နေ့

ရှိတဲ့နေရာကို ရွေ့

“စ​ကား​တော်​ပြတ်​သော​အ​ခါ၊ ရေ​နက်​ရာ​အ​ရပ်​သို့ ရွေ့​ဦး​လော့။ ပိုက်​ကွန်​ကို​ချ၍ ငါး​ကို​အုပ်​စမ်း​လော့​ဟု ရှိ​မုန်​အား​မိန့်​တော်​မူ၏။-” ရှင်လုကာ‬ ‭၅း၄

ကိုယ်ရှိတဲ့နေရာနဲ့ ကိုယ်ရှာတဲ့အရာလွဲနေရင်လဲ လိုျင်တာကိုမတွေ့ရတတ်ဘူး။ လူတချို့တစ်ဘဝလုံး ရှာတာ အချိန်တွေ၊ ငွေတွေ သာကုန်သွားတယ် လိုျင်တာ မရဘူးဖြစ်နေတယ်။ သန့်ရှင်းသောဝိညာဉ်တော်ကို လိုျင်တယ်လို့ ပြောပြီးတော့ သန့်ရှင်းသောဝိညာဉ်တော်ကိုလုံးဝ လက်မခံတဲ့ပတ်ဝန်းကျင်မှာပဲ တစ်သက်လုံး ရှိနေပြီးတော့ ဘုရားက ဘာလို့များ မပေးရတာလဲလို့ စောဒက တတ်နေသလိုမျိုးပေါ့။ လိုျင်တဲ့အရာကို ရျင်တယ်ဆိုရင် ရှိတဲ့အရပ်ကို ရွေ့တတ်ဖို့လိုတယ်။ ကိုယ်လိုျင်တာနဲ့မကိုက်တဲ့ ဝန်းကျင်မှာ ရှင်သန်ပြီးတော့ ဘုရားက ကိုယ်လိုတာ မပေးဘူးလို့ တော့ အပြစ်တင်မစောပါနဲ့။ တကယ်လိုျင်တယ်ဆိုရင် ရှိတဲ့ အရပ်ကိုရွေ့ တတ်ဖို့တော့လိုတယ်။ ပေတရုက ရှာနေတဲ့ ငါးက သူရှိတဲ့ နေရာမှာ မရှိဘူး။ ဒါကြောင့်ရေနက်ရာအရပ်ကို ရွေ့ခိုင်းလိုက်တာ။ တစ်ခါတစ်လေ ဘုရားက ကိုယ်ရှိတဲ့နေရာကို ငါးကို မပို့ပေးဘူး။ ငါးရှိတဲ့နေရာကိုပဲ ကိုယ့်ကို သွားစေတယ်။ ကိုယ်ဆုတောင်းတဲ့အရာက ကိုယ့်ဆီ မရောက်လာရင် ဆုတောင်းတဲ့အဖြေရှိတဲ့နေရာကို ကိုယ်က သွားရမယ်ဆိုတာ သဘောပေါက်ပေါ့။

ဩဂုတ်လ ၁၇ ရက်နေ့

မျက်နှာသာ (၆)

“Lord, by Your favor You have made my mountain stand strong; You hid Your face, and I was troubled.” Psalms‬ ‭30‬:‭7‬ ‭NKJV‬‬

လဲပြိုဖို့ လွယ်တဲ့အကြောင်းအရာများစွာကြားမှာ မလဲပြိုသွားပဲ ပိုပြီး ခိုင်ခံ့စေတဲ့အကြောင်းအရာက တခြားအရာကြောင့်မဟုတ်ဘူး။ သတင်းတွေ ယုံကြည်ခြင်းကိုလဲပြိုသွားဖို့ တိုက်စားနေတယ်။ ကုန်စျေးနှုန်းတွေက ဆက်ရှင်သန်ချင်စိတ် မရှိအောင် လာတွန်းတိုက်ကြတယ်။ အခြေအနေတွေက မျှော်လင့်ချက်တွေကို လာပြီး တိုက်ခိုက်တဲ့အခါမှာ လဲပြိုဖို့ဆိုတာ အချိန်မရွေး နေရာမရွေးမှာဖြစ်သွားနိုင်ပေမယ့် ဘုရားရဲ့ မျက်နှာသာဟာ လဲပြိုစရာ အခြေအနေကြားထဲမှာ ပိုပြီးခိုင်ခံ့သန်မာစေတယ်။

ဒီလိုအခြေအနေမျိုးမှာ လဲမပြိုသွားဘူးဆိုတာ ကိုယ့်ရဲ့ အားထုတ်မှုလုံးဝ မဟုတ်ဘူး။ မျက်နှာသာ ကြောင့်ပါ။ ဘုရားမျက်နှာသာမရှိရင်တော့ အရာရာအားလုံး အဆင်ပြေတဲ့ကြားမှာပဲ ဆင်းရဲခြင်းသို့ရောက်ပြီ။ နေ့ရက်တိုင်း ဘုရားမျက်နှာသာနှင့်ရှင်သန်တဲ့အခါမှာ ပိုပြီး သန်မာလာတယ်၊ပိုပြီး တောက်ပလာစေတယ်။

ဩဂုတ်လ ၁၆ ရက်နေ့

မျက်နှာသာ (၅)

“For whoever finds me finds life, And obtains favor from the Lord; Proverbs 8:35 NKJV

ဘုရားရဲ့မျက်နှာသာမရှိပဲ ရှင်သန်လို့ မရဘူးဆိုတာ သဘောပေါက်လောက်ပြီလို့ထင်ပါတယ်။ မျက်နှာသာမရှိပဲ ရှင်သန်တာလောက် ခက်ခဲတာ မရှိတော့ဘူး။ ဘုရားသားသမီးဖြစ်ရုံနှင့် ကယ်တင်ခြင်းရရုံနဲ့တော့ လောက ကြီးကိုအောင်မြင်ဖို့ဆိုတာ အဝေးကြီးပဲ။ မျက်နှာသာနှင့်ရှင်သန်တဲ့သူကတော့ ကိုယ်ကြိုးစားလို့မရနိုင်တဲ့ အရာတွေကို နေ့စဉ်ခံစားရတဲ့သူဖြစ်လာတယ်။ ဒါဆိုရင်မေးခွန်းက အဲ့ဒီမျက်နှာသာကို ဘယ်မှာသွားရှာမလဲ? တခြားဘယ်နေရာမှာမှ အဲ့ဒီမျက်နှာသာ သင်ရှာလို့တွေ့မှာမဟုတ်ဘူး။ ရှောလမုန်မင်းကြီးက ဒီလိုဆိုတယ် ဘုရားကိုတွေ့တဲ့သူ ကပဲ အဲ့ဒီဘုရားရဲ့မျက်နှာကို ပါ တွေ့ရှိခံစားမယ်။ ဘုရားကို ရှာတာ အချည်းအနှီးမဟုတ်ဘူး။ ဘုရားနဲ့ဆိုင်တဲ့အရာတွေက ကျွန်တော်တို့ ဘဝမှာ အချိန်ဖြုန်းတာမဟုတ်ဘူး။ ဘုရားကိုရှာဖို့အချိန်ပေးတဲ့အခါမှာ ဘုရားရဲ့ မျက်နှာသာ လည်းအသက်တာမှာ တိုးပွားလာတယ်။ မျက်နှာသာရခြင်း တိုးလာရင် ကျန်တဲ့ကောင်းတဲ့အရာတွေလည်းတိုးတာမှာအသေချာပဲ။

ဩဂုတ်လ ၁၅ရက်နေ့

မျက်နှာသာ (၄)

“ထို​သို့​ပြု​လျှင် ဘု​ရား​သ​ခင်​ရှေ့ လူ​တို့​ရှေ့​မှာ​မျက်​နှာ​ရ၍၊ ကျေး​ဇူး​ကို​ခံ​ရ​လိမ့်​မည်။” သုတ္တံ ၃း၄

ဘုရားရဲ့ မျက်နှာသာ ရှိခြင်းရဲ့ ကောင်းကြီးမင်္ဂလာတွေကို သိရှိပြီးတဲ့အခါမှာ ထပ်သိဖို့ လိုအပ်တဲ့အရာကတော့ အဲ့ဒီမျက်နှာသာကို ဘယ်လို အသက်တာမှာ ရနိုင်မလဲ ဆိုတာပါပဲ။ ဘုရားက သူထံကနေ ဘယ်လိုမျက်နှာသာရနိုင်မလဲဆိုတာ နည်းလမ်းကို နှုတ်ကပတ်တော်ထဲမှာ အကြိမ်ဖန်များစွာ ဖေါ်ပြထားပါတယ်။ မျက်နှာသာ နှင့်နေ့စဉ်အသက်တာကို ရှင်သန်တဲ့ ဘုရားသားသမီး တစ်ယောက် ဘုရားကသင့်ကို ဖြစ်စေချင်တယ်။ ရှောလမုန်မင်းကြီး ပြောတယ် လူရှေ့ဘုရားရှေ့မှာ မျက်နှာရဖို့အတွက် ဘုရားရဲ့ တရားကိုနေ့စဉ် မမေ့ပဲ နှလုံးသားထဲမှာ နေ့စဉ်စောင့်ရှောက်ဖို့။ ဒီလို ဘုရားရဲ့တရားစကား နှင့်သာရှင်သန်ရင် ဘယ်သူမှ လွယ်လွယ်မရနိုင်တဲ့ မျက်နှာသာကို သင့်ရဲ့နေ့စဉ်အသက်တာမှာ မြင်တွေ့ရမယ်။ ဘယ်လောက်များကောင်းလိုက်သလဲ? မျက်နှာသာရဲ့ ကျေးဇူးကို ခံစားရတဲ့ သူဖြစ်ပါစေ။

ဩဂုတ်လ ၁၄ ရက်နေ့

မျက်နှာသာ(၃)

သို့သော် နောဧ​သည် ထာဝရဘုရား​ရှေ့​တော်​၌ မျက်နှာရ​သော​သူ​ဖြစ်​၏​။“ ကမ္ဘာဦးကျမ်း ၆:၈

မကြာခင် ပျက်ဆီးတော့မယ့် အခြေအနေဆိုးကြီးထဲကနေ လွတ်မြောက်ခွင့်ရမယ့်ဆိုရင် လူတိုင်းလိုချင်ကြမှာပဲ။ ဒီ အခွင့်အရေးကိုရခဲ့တဲ့ လူကတော့ နောဧပါပဲ။ ကြိုသိခွင့် ရရုံသာမကဘူး ကြိုတင် ပြင်ခွင့်လည်းရပါသေးတယ်။ တယောက်မကျန် ရင်ဆိုင်ခဲ့ရတဲ့ စီရင်ခြင်းကနေ တစ်မိသားစုသာရတဲ့ အခွင့်အရေးကို သူ ဘာကြောင့်ရတာလဲ။ အဖြေက တော့ ဘုရားရဲ့ မျက်နှာသာကြောင့်ဖြစ်တယ်။ မျက်နှာသာက သူများမရတာ ရရှိရုံသာမက သူများတွေရင်ဆိုင်ရတဲ့ ပျက်ဆီးခြင်းကနေ လွတ်မြောက် ခွင့်ရခဲ့တယ်။ အဲ့ဒီ မျက်နှာသာ သင်ရရင် တလောကလုံး မရတာ သင် ရရှိပြီးတော့ သူများ ရင်ဆိုင်ရတဲ့ ခက်ခဲမှုတွေကနေ လွတ်မြောက် လိမ့်မယ်။

ဩဂုတ်လ ၁၃ ရက်နေ့

မျက်နှာသာ (၂)

“ထို​လူ​မျိုး​သည် အဲ​ဂု​တ္တု​လူ​တို့​ထံ၌ မျက်​နှာ​ရ​သော​အ​ခွင့်​ကို​ငါ​ပေး၍၊ သင်​တို့​သည် ထွက်​သွား​သော​အ​ခါ လက်​ချည်း​မ​သွား​ရ​ကြ။”ထွက်မြောက်ရာ ၃း၂၁

မျက်နှာသာ ရတဲ့ဘဝ နှင့် မရတဲ့ ဘဝ ဘယ်လောက်တောင် ကွာခြားသလဲ? ကောင်းကင်နှင့်မြေကြီးကွာသလို ကွာတယ်။ အရင်က အဲဂုတ္တု လူတွေထံမှာ ရွှေငွေ တောင်းတာမဟုတ်ဘူး ဘုရားကိုဝတ်ပြုဖို့ သုံးရက်လေး တောင်းတာတောင်မပေးဘူး။ နှစ်ပေါင်းများစွာ ကျွန်ဖြစ်ပြီးတာတောင်မှ ဘုရားကို ကိုးကွယ်ဖို့အတွက် သုံးရက်လေးပဲ သွားဖို့ခွင့်တောင်းတာမပေးတဲ့ သူတွေက ဘုရားမျက်နှာသာရောက်လာတဲ့အခါမှာတော့ သူတို့တောင်းသမျှကို ပေးဖို့ စေတနာစိတ်ကို ဖြစ်စေတယ်။ ဣသရေ လူတွေ နှုတ်ကနေ တောင်းဆိုသမျှ အကုန်ပေးတယ်။ သင့်နှုတ်ကနေ ပြောသမျှ အားလုံးတစ်ခုမကျန်ဖြစ်လာတယ်ဆိုတာ ဘုရားမျက်နှာသာ ပါရှိခြင်း သက်သက်ကြောင့် ဖြစ်တယ်။ သင့်နှုှုကနေ ပြောဆိုသမျှ ပြည့်စုံစေတဲ့ ဖြစ်လာစေတဲ့ ဘုရားမျက်နှာသာ နေ့တိုင်းအထူးလိုအပ်တယ်။

ဩဂုတ်လ ၁၂ ရက်နေ့

မျက်နှာသာ

“ကောင်း​သော​ဉာဏ်​ရှိ​သော​သူ​သည် မျက်​နှာ​ရ​တတ်၏။ ပြစ်​မှား​သော​သူ​တို့ လမ်း​မူ​ကား၊ ခက်​သော​လမ်း​ဖြစ်၏။”သုတ္တံကျမ်း ၁၃:၁၅

ဘုရားရဲ့ မျက်နှာသာမရပဲနဲ့ စိန်ခေါ်မှုှုားပြီးတော့ ခက်ခဲ ကြမ်းတမ်းတဲ့လမ်းတွေ အပေါ်မှာ အလွယ်တကူ ဖြတ်ကျော်နိုင်မှာမဟုတ်ဘူး။ မျက်နှာသာက အခြားသူတွေ ခက်ခဲစွာ ဖြတ်ကျော်နေရတဲ့အရာတွေကို လွယ်ကူချောမွေ့စွာ ကျေးဇူးတော်ချီးမွမ်းပြီးဖြတ်ကျော်နိုင်ဖို့ ကူညီမစတယ်။ လူတိုင်းက ခက်ခဲတဲ့ လမ်းတွေကို လွယ်ကူစွာဖြတ်ကျော်ခြင်ကြပေမယ့် ဘယ်လို လူတွေကပဲ ဖြတ်ကျော်ခွင့်ရသလဲဆိုတာ မသိကြဘူး။ ဘုရားမျက်နှာသာ မပါရင် ဘယ်လိုမှ ဘယ်တော့မှ မဖြစ်နိုင်ဘူး။ ဒီအရာကို ကောင်းသောဉာဏ်ရှိသောသူကပဲ နားလည်သဘောပေါက်ပြီးတော့ မျက်နှာသာကိုရရှိဖို့ အာရုံစိုက်ကြတယ်။ ဉာဏ်မရှိတဲ့သူကတော့ ကိုယ့်ရဲ့တော်ခြင်းတတ်ခြင်း လုပ်နိုင်ခြင်းကိုပဲအာရုံစိုက်ပြီး၊ ကိုယ်လုပ်ရင် ရပါတယ်ဆိုပြီးတော့ ဘုရားကို ဂရုမစိုက်ပဲ နေျင်သလိုနေ လုပ်ျင်သလိုလုပ်ပြီးတော့ ဘုရားရဲ့မျက်နှာသာမပါပဲ ရှင်သန်ကြတယ်။ ဒါကြောင့်သူတို့သွားတဲ့လမ်းက ခက်မြဲခက်နေဆဲပါပဲ။ ဘုရား မျက်နှာသာပါတဲ့လူကတော့ သူများတွေ အတွက် ခက်ခဲပေမယ့် သူအတွက်တော့ လွယ်ကူချောမွေ့စွာ ဖြတ်သန်းခွင့် ရတယ်။

ဩဂုတ်လ ၁၀ ရက်နေ့

တန်ခိုးတော် (၆)

“ကိုယ်တော်​၏​အစွမ်းသတ္တိ​နှင့်​ပြည့်စုံ​သော တန်ခိုး​အရှိန်အဝါ​၏​လုပ်ဆောင်​မှု​အားဖြင့် ယုံကြည်​သော​ငါ​တို့​အပေါ်​သက်ရောက်​သည့် ကိုယ်တော်​၏​တန်ခိုး​သည် မည်မျှ​ထူးကဲ​ကြီးမား​သည်​ကို​လည်းကောင်း သင်​တို့​အား​သိ​စေ​မည့်​အကြောင်း တောင်းလျှောက်​၏။” ဧဖက်ဩဝါဒစာ‬ ‭၁:၁၉

တမန်တော်ကြီးရှင်ပေါလုက ဧဖက်အသင်းတော်အတွက် ဆုတောင်းပေးတယ်။ တကယ့်ကို အရေးကြီးတဲ့ ဆုတောင်းချက်ပါပဲ။ ယုံကြည်သူတွေအပေါ်မှာ ဘုရားတန်ခိုးအရှိန်အဝါဖြင့် လုပ်ဆေောင်ပေးမှုတွေ သက်ရောက်ဖို့။ ယုံကြည်သူဖြစ်ပြီးတော့ ဘုရားတန်ခိုးတော်ရဲ့လုပ်ဆောင်ပေးမှုကို သဘောမပေါက်ရင်၊ တန်ခိုးတော်မမြင်တွေ့ရရင် သာမန် လူတွေဘဝနှင့်ဘာမှ ထူးမှာမဟုတ်ဘူး။ ဘုရားတန်ခိုးတော်ရဲ့လုပ်ဆောင်ပေးမှုကသာလျှင် ယုံကြည်သူတွေရဲ့ဘဝကို များစွာ ခြားနားသွားစေတယ်။ ကိုယ်တော်ရဲ့တန်ခိုးတော် ဘယ်လောက်ကြီးမားပြီး၊ အသက်တာမှာ သက်ရောက်ရင် ထူးကဲတဲ့ ဘဝကို ရောက်စေမယ်ဆိုတာသိဖို့ ဝိညာဉ်ခေါင်းဆောင်ကြီးရှင်ပေါလုက ဆန္ဒရှိတယ်။ ဘုရားရဲ့တန်ခိုးတော် အစွမ်းသတ္တိအားဖြင့် နေ့စဉ်အသက်ရှင်ပါ။ ဘယ်သူနဲ့မှ မတူတဲ့ဘဝအသက်တာကိုမြင်တွေ့ ခံစားရမယ်။

ဩဂုတ်လ ၉ ရက်နေ့

တန်ခိုးတော် (၅)

“ငါ့​ကျေး​ဇူး​သည် သင့်​အ​ဖို့​လောက်​ပေ၏။ ငါ့​တန်​ခိုး​သည် အား​နည်း​ခြင်း​အ​ဖြစ်၌ စုံ​လင်​တတ်​သည်​ဟု မိန့်​တော်​မူ၏။ ထို​ကြောင့် ခ​ရစ်​တော်၏ တန်​ခိုး​သည် ငါ့​အ​ပေါ်၌ ကျိန်း​ဝပ်​မည်​အ​ကြောင်း ငါ့​ကိုယ်၌ အား​နည်း​ခြင်း​အ​ဖြစ်​ကို ဝမ်း​မြောက်​သော​စိတ်​နှင့် ဝါ​ကြွား​ခြင်း​ငှာ သာ၍ ငါ​အ​လို​ရှိ၏။-” ၂ ကောရိန္သု ၁၂:၉

လူတိုင်း အားနည်းချက် ကိုယ်စီရှိကြပါတယ်။ အားနည်းချက်ရှိတာ အားငယ်ဖို့ စိတ်ပျက်ဖို့မဟုတ်ပါဘူး။ ဒါပေမယ့် လူတိုင်း အားနည်းချက်ရှိတာပဲဆိုပြီး အကြောင်းပြချက်ပေးပြီးတော့ အခွင့်အရေးယူဖို့တော့မဟုတ်ဘူး။ လူ့ရဲ့ အားနည်းချက်မှာ ဘုရားရဲ့ တန်ခိုးတော် နေရာပေးတတ်ဖို့လိုတယ်။ အားနည်းချက်ကို ဒီအတိုင်း ထားဖို့မဟုတ်ဘူး။ အားနည်းခြင်းမှာ ဘုရားတန်ခိုးတော် နေရာယူလာတဲ့အခါမှာ တမန်တော်ကြီးရှင်ပေါလု လို သူများတွေမလုပ်နိုင်တာ တွေကို လုပ်နိုင်တဲ့သူ ဖြစ်လာတယ်။ သူ့မှာ အားနည်းချက်မရှိတာမဟုတ်ဘူး။ သူ့ရဲ့အားနည်းချက်နေရာမှာ ဘုရားတန်ခိုးတော် ကိုနေရာပေးထားလို့ပါ။ သင့်အသက်တာမှာလည်း ဘုရားတန်ခိုးတော် နေရာယူလာရင် တမန်တော်ကြီးရှင်ပေါလုလိုပဲ အားနည်းချက်ကိုကြည့်ပြီး စိတ်ပျက်မှာ မဟုတ်တော့ဘူး။ ဝမ်းမြောက်တတ်လာလိမ့်မယ်။

ဩဂုတ်လ ၈ ရက်နေ့

တန်ခိုးတော် (၄)

“ထို​သို့​အ​လို​ငှာ ငါ​သည် အ​မှု​ဆောင်​ရွက်၍၊ ငါ၌​တန်​ခိုး​တော် ပြု​ပြင်​အား​ထုတ်​တော်​မူ​သည်​အ​တိုင်း ကြိုး​စား​အား​ထုတ်​လေ့​ရှိ၏။”ကောလောသဲ ၁:၂၉

တန်ခိုးတော်မပါရင် အသက်တာက ဘယ်လိုဖြစ်မလဲ? ဆားမပါတဲ့ ဟင်းစားရသလိုပဲ အရသာမရှိတဲ့ ဘဝဖြစ်လိမ့်မယ်။ကြိုးစားမှုတစ်ခုကပဲ အသက်တာမှာ အောင်မြင်ဖို့အတွက် ဘယ်တော့မှ မလုံလောက်ဘူး။ ကြိုးစားနိုင်တယ်ဆိုတာကတောင်မှ ဘုရားရဲ့တန်ခိုးတော်ရဲ့လုပ်ဆောင်မှုဖြစ်တယ်။ ကိုယ့်ရဲ့အစွမ်းအစနဲ့ လုပ်ဆောင်နိုင်မှုမဟုတ်ဘူး။ တချို့က လုပ်နိုင်တာ၊ လုပ်တတ်တာက ကိုယ့်ရဲ့ တော်ခြင်းတတ်ခြင်းလို့ထင်မှတ်နေကြတယ်။ တကယ်တော့မဟုတ်ပါဘူး ဘုရားတန်ခိုးတော်က သင့်အထဲကနေ လုပ်ဆောင်ပေးနေခြင်းသက်သက်ပါ။ ဒါကိုသဘောမပေါက်တဲ့သူက အသက်တာမှာ အောင်မြင်ဖို့မလွယ်သလို အောင်မြင်ရင်လည်း ကြာကြာအောင်မြင်မှာမဟုတ်ဘူး။ ဘုရားတန်ခိုးတော်ရဲ့ လုပ်ဆောင်ပေးမှုကို သဘောပေါက် ဝန်ခံတဲ့သူပဲ အခြားသူတွေမလုပ်နိုင်တဲ့အရာတွေကို လုပ်ဆောင်နိုင်တယ်။

ဩဂုတ်လ ၇ ရက်နေ့

တန်ခိုးတော် (၃)

“ဤသည်ကား သင်​တို့​၏​ယုံကြည်​ခြင်း​သည် လူ​တို့​၏​ဉာဏ်ပညာ​၌​မ​တည်​ဘဲ ဘုရားသခင်​၏​တန်ခိုး​တော်​၌​တည်​မည့်​အကြောင်း​တည်း။” ကောရိန္သုဩဝါဒစာပထမစောင် ၂း၅

ဘုရားတန်ခိုးတော် ဘယ်လောက်အရေးကြီးသလဲ? လူ့ရဲ့ကြိုးစားမှုနဲ့ လုံးဝမရနိုင်တဲ့အရာတွေအားလုံးကို ဘုရားရဲ့တန်ခိုးတော် လုပ်ဆောင်ပေးတယ်။ ဘဝဟာ ကြိုးစားသလောက်ပဲ ရတယ်ဆိုတာ ဘုရားတန်ခိုးတော်မပါပဲ အသက်ရှင်သန်လို့ပါ။ တချို့ဆို ကြိုးစားသလောက်တောင် မရကြဘူး။ ဘုရားတန်ခိုးတော်က အသက်တာမှာ မျက်စိနဲ့မြင်လို့ရတဲ့အရာတွေပဲ ယူဆောင်လာတာမဟုတ်ဘူး။ မမြင်ရပေမယ့်အစွမ်းထက်တဲ့အရာများစွာကိုအသက်တာထဲမှာ ယူဆောင်လာပေးတယ်။ အထူးသဖြင့် ဘုရားသားသမီးတစ်ယောက်မှာလိုအပ်တဲ့ သဘာဝလွန်ယုံကြည်ခြင်းကို ဘုရားတန်ခိုးတော် အားဖြင့် ရနိုင်တယ်။ ယုံကြည်ခြင်းမရှိရင် ဘုရားစိတ်တော်နှင့်ထိတွေ့ခြင်း မရှိနိုင်သလို၊ ကြီးမားတဲ့အရာတွေ အသက်တာမှာ မြင်တွေ့ရမှာမဟုတ်ဘူး။ အစွမ်းထက်ပြီးတော့ ဘာမဆိုလုပ်နိုင် ဖြစ်နိုင်စေတဲ့ ယုံကြည်ခြင်းကို ဘုရားတန်ခိုးတော် အားဖြင့်အသက်တာမှာ တည်စေနိုင်တယ်။

ဩဂုတ်လ ၆ ရက်နေ့

တန်ခိုးတော် (၂)

“ယေရှု​က​လည်း“သင်​တို့​သည် ကျမ်းစာ​ကို​လည်းကောင်း၊ ဘုရားသခင်​၏​တန်ခိုး​တော်​ကို​လည်းကောင်း မ​သိ​၍ အယူလွဲ​နေ​ကြ​၏။” ရှင်မဿဲခရစ်ဝင် ၂၂:၂၉

မှားယွင်းတဲ့အယူလွဲတဲ့သူဆိုတာ ဘယ်လိုလူမျိုးကိုခေါ်တာလဲ? သခင်ယေရှုက ရိုးရှင်းစွာအဖြေပေးထားတယ်။ ကျမ်းစာကျောင်းတွေမှာသင်ထားတဲ့အတိုင်း မတူတဲ့ခံယူချက်၊ ဒါမှမဟုတ် ကိုယ်ခံယူတဲ့အတိုင်း ဖြစ်မနေတဲ့သူတွေကို အယူလွဲလို့ သတ်မှတ်တာပဲအမှန်မဟုတ်ဘူး။ ကျမ်းစာသိရုံနှင့်လည်း မှန်တဲ့ခံယူချက်တစ်ခုမဖြစ်လာဘူး။ ဘုရားရဲ့တန်ခိုးတော်ကိုလည်းသိကျွမ်းဖို့ အထူးလိုအပ်တယ်။ ဘုရားရဲ့တန်ခိုးတော်ကိုမသိကျွမ်း၊ နေ့စဉ်အသက်တာမှာ ဘုရားတန်ခိုးတော် နှင့်အသက်မရှင်ပဲနဲ့တော့ မှန်ကန်တယ်လို့တော့ မထင်စေချင်ဘူး။ ကျမ်းစာကိုရော ဘုရားတန်ခိုးတော်ကိုပါ သိမှပဲ ခံယူချက်မလွဲဘဲ ရှင်သန်နိုင်လိမ့်မယ်။

သြဂုတ်လ ၅ရက်နေ့

တန်ခိုးတော်

“ထာ​ဝ​ရ​ဘု​ရား​သည် သူ့​ကို​ကြည့်​ရှု၍ ယ​ခု သင်​ရ​သော​တန်​ခိုး​ကို အ​မှီ​ပြု​လျက် သွား​လော့။ သင်​သည် ဣ​သ​ရေ​လ​အ​မျိုး​ကို မိ​ဒျန်​လူ​တို့​လက်​မှ ကယ်​နုတ်​လိမ့်​မည်။ သင့်​ကို ငါ​စေ​ခိုင်း​သည် မ​ဟုတ်​လော​ဟု မိန့်​တော်​မူ၏။” တရားသူကြီး ၆း၁၄

ကိုယ့်ကိုဘာလို့ အထင်သေးပြီးတော့ တဖက်ရန်သူတွေကို ဘာကြောင့် များ အလွန်အထင်ကြီး ကြောက်ရွံ့ ရတာလဲ? အဖြေက ရှင်းပါတယ် သင့်အပေါ်မှာရှိတဲ့ ဘုရားတန်ခိုတော်ကို သေချာသဘောပေါက်နားလည်ခြင်းမရှိသေးလို့ဖြစ်တယ်။ ယုံကြည်သူ ဘုရားသားသမီးတွေက အခြားလောက သားတွေနဲ့မတူတာ တခြားအရာမဟုတ်ဘူး။ ဘုရားသခင်ရဲ့တန်ခိုးတော်ရှိခြင်းမရှိခြင်းကဘဲ အဓိက ကွာခြားတဲ့အချက်ပဲ။ ဘုရားတန်ခိုးတော်ကိုသာမသိရင် အဲ့ဒီတန်ခိုတော်ကိုသာမသုံးတတ်ရင် သင်လည်းလောက သားတွေနဲ့ ဘာမှ မထူးတဲ့သာမန်လူတွေလိုဘဲ။ ဂိဒေါင် ဘုရားရဲ့တန်ခိုးတော်ကို မသိခင်တုန်းက ကြောက်ရွံ့ခြင်းနဲ့ရှင်သန် ခဲ့ပြီးတော့ ဘုရားရဲ့တန်ခိုးတော် ကို သိကျွမ်းပြီးတဲ့နောက်မှာတော့ လူနည်းနည်းလေးနဲ့ အများကြီးလုပ်နိုင်တဲ့ သူတစ်ယောက်ဖြစ်လာတယ်။ တခြားအရာတွေမရှိလို့ မအောင်မြင်တာ မဟုတ်ဘူး ဘုရားတန်ခိုးတော်ကို မသိလို့ မအောင်မြင်တာပါ။ တန်ခိုးတော်နှင့် နေ့စဉ်ရှင်သန်သွားလာတတ်ဖို့လိုတယ်။

သြဂုတ်လ ၃ရက်နေ့

ပြင်ဆင်ထားပြီးသား (၅)

“ထို​သူ​သည် ပြင်​ဆင်​လျက်​ရှိ​သော အ​ထက်​အ​ခန်း​ကြီး​ကို ပြ​လိမ့်​မည်။ ထို​အ​ခန်း၌ ပြင်​ဆင်​ကြ​လော့​ဟု မိန့်​တော်​မူ၏။-” ရှင်လုကာ ၂၂း၁၂

သခင်ယေရှုနှင့် တပည့်တော်တွေ နောက်ဆုံး ညစာစားပွဲအတွက် နေရာကို ပြင်ဆင်ခိုင်းတဲ့အခါမှာ စိတ်ဝင်စားစရာ ကောင်းတဲ့အရာတွေကိုတွေ့ရတယ်။ ပြင်ရမယ့် အိမ်လိပ်စာတွေ နာမည်တွေကို သခင်ကမပြောဘူး။ မြို့ထဲကိုဝင်တာနဲ့ ရေအိုးဆောင်တဲ့ ယောက်ကျားကိုတွေ့လိမ့်မယ်။ သူ့နောက်လိုက်ပြီး သူ့ရဲ့အိမ်ရောက်တဲ့အခါမှာ သခင်ယေရှုနှင့်တပည်တော်တွေအတွက် အခန်းဘယ်မှာလည်းလို့မေးခိုင်းတယ်။ သူကလည်းပြင်ဆင်ပြီးသား အသင့်ရှိတဲ့အခန်းကိုပြမယ်။ ဘယ်လောက်ထူးဆန်းလဲ? အိမ်လိပ်စာတွေ လူနာမည်တွေပေးပြီးရှာခိုင်းလဲရပါတယ်။ ဒါပေမယ့် သခင်ယေရှုက မလုပ်ခိုင်းဘူး။ ကြီးမားတဲ့ဘုရားပြင်ဆင်ထားတဲ့အရာတွေကို အသက်တာမှာ မြင်တတွေ့ျင်တယ်ဆိုရင်တော့ သေချာတယ် ဘုရားရဲ့တိကျတဲ့လမ်းညွှန်မူနောက်ကိုလိုက်ဖို့လိုတယ်။ ကိုယ့်ဉီးဏှောက်အသိနဲ့ပဲ သွားလာလုပ်ဆောင်မယ်ဆိုရင် ဘယ်တော့မှ ဘုရားပြင်ဆင်တဲ့အရာတွေကို မြင်တွေ့ခံစားရမှာမဟုတ်ဘူး။ ဘုရားရဲ့တိကျတဲ့လမ်းညွှန်မူကို နာခံတဲ့သူပဲ ဘုရားပြင်ဆင်ထားတဲ့အကောင်းဆုံးသောအရာတွေကို တွေ့ရှိခံစားမယ်။

သြဂုတ်လ ၂ရက်နေ့

ပြင်ဆင်ထားပြီးသား (၄)

“ကျမ်း​စာ​လာ​သည်​နှင့်​အ​ညီ၊ ဘု​ရား​သ​ခင်​ကို ချစ်​သော​သူ​တို့​အ​ဖို့ အ​လို​ငှာ၊ ဘု​ရား​သ​ခင်​ပြင်​ဆင်​တော်​မူ​သော အ​ရာ​တို့​ကို လူ​မျက်​စိ​ဖြင့်​မ​မြင်၊ နား​ဖြင့်​မ​ကြား၊ စိတ်​နှ​လုံး​ဖြင့် မ​ကြံ​စည်​သေး။-” ၁ ကောရိန္သု ၂း၉

ဘုရားကတော့လူတိုင်းကိုချစ်ပါတယ်။ ဒါပေမယ့် လူတိုင်းကတော့ ဘုရားကို ချစ်ကြတာတော့မဟုတ်ဘူး။ လူတချို့က ဘုရားဆီကနေ အကောင်းဆုံးပြင်ဆင်ထားတဲ့ အရာတွေကို အသက်တာမှာ ရရှိခံစားခြင်တယ်။ တချို့ လူတွေအသက်တာမှာ ခံစားပြီး ကိုယ့်အသက်တာမှာ မခံစားရတဲ့ အခါမှာလည်း မေးခွန်းထုတ်ကြတယ်။ တကယ်တော့ ဘုရား ပြောထားပြီးသားပါ။ လူတိုင်းအတွက် အကောင်းဆုံးသောအရာတွေကို ပြင်ဆင်ထားတာမဟုတ်ဘူး။ သူ့ကို ချစ်တဲ့သူတွေအတွက် အခြားသူတွေ အသက်တာမှာ မကြုံဖူးမရဖူး မဖြစ်ဖူးတဲ့အရာတွေကို ခံစားစေမှာ။ ဘုရား သင့်အသက်တာမှာ အကောင်းဆုံးသောအရာတွေကို ပြင်ဆင်ထားစေျင်တယ်ဆိုရင် နှလုံးသားအကြွင်းမဲ့ ဘုရားကို ချစ်ဖို့ အာရုံစိုက်ပါ။

သြဂုတ်လ ၁ရက်နေ့

ပြင်ဆင်ထားပြီးသား (၃)

“မိမိ​အလို​တော်​နှင့်ညီသော​စေတနာ​အတိုင်း ယေရှု​ခရစ်တော်​အားဖြင့် ငါ​တို့​ကို မိမိ​၏​သားသမီး​အရာ​၌ မေတ္တာ​တော်​ဖြင့် ကြိုတင်​သတ်မှတ်​ထား​တော်မူ​၏။” ဧဖက်ဩဝါဒစာ ၁း၅

လူ့ဘက်ကနေ ကြိုတင်စီစဉ်တာတွေ မလုပ်ခဲ့ရင်တောင်မှ ဘုရားဘက်ကနေ အမြဲတမ်း ကြိုတင်ပြင်ဆင်အလုပ်လုပ်တယ်ဆိုတာ တွေ့ရတယ်။ ဘုရားက အကောင်းဆုံး ခေါင်းဆောင်မှုတွေရဲ့ စံပြပါ။ ဘယ်တော့မှ ဖြစ်လာတဲ့အခြေအနေပေါ်မှာ လိုက်ပြီးတော့အလုပ်လုပ်တဲ့ဘုရားမဟုတ်ဘူး။ သူဟာ အမြဲတမ်းကြိုတင်ပြင်ဆင်လေ့ရှိတယ်။ သင့်ဘဝရဲ့ နေ့ရက်တွေကို ဘယ်လို အကောင်းဆုံး ဖြတ်သန်းမလဲဆိုတာ သင်မသိပေမယ့်သူမှာ အဖြေရှိပြီးသားဖြစ်ရုံမကဘဲ လိုအပ်တဲ့ အရာတွေကို ကြိုတင် ပြင်ဆင်ထားပြီးသားပါ။ သခင်ယေရှုခရစ်ကို ယုံကြည်လက်ခံသူတိုင်းကို ဘုရားသားသမီးအဖြစ် ရွေးချယ်ကာ ဘုရားဘုန်းထင်ရှားစေသော အသက်တာများဖြင့်ရှင်သန်ရန် ကမ္ဘာမတည်မရှိမှီကတည်းက သူဟာ ကြိုတင် ပြင်ဆင်လုပ်ဆောင် ခဲ့တယ်။ ဒီလောက်ကြီးမားတဲ့ သားသမီး ဖြစ်ခြင်းတောင် ကြိုတင် ပြင်ဆင် လုပ်ဆောင်တဲ့ဘုရားက ကျန်တဲ့အရာတွေအတွက် မပြင်မဆင်ထားစရာ ဘာအကြောင်းရှိအုံးမှာလဲ? သူဟာ အကောင်းတကာ အကောင်းဆုံး အမြဲတမ်း ကြိုတင်ပြင်ဆင် လုပ်ဆောင်ပေးတဲ့ ဘုရား ဖြစ်တယ် ဆိုတာ ဘယ်တော့မှ မမေ့နဲ့။

ဇူလိုင်လ ၃၁ ရက်နေ့

ပြင်ဆင်ထားပြီးသား (၂)

“အာဗြဟံ​က​လည်း “​ငါ့​သား​၊ ဘုရားသခင်​ကိုယ်တော်တိုင် မီးရှို့ရာယဇ်​အတွက် သိုးသငယ်​ကို​အသင့်ပြင်ဆင်​တော်မူ​လိမ့်မည်​”​ဟု ဆို​ပြီးမှ သူ​တို့​နှစ်​ယောက်​သည် အတူတူ​ဆက်သွား​ကြ​၏​။”ကမ္ဘာဦးကျမ်း 22:8 MSBU

ဘယ်လို ဖြစ်လာမလဲ ဆိုတဲ့ အဖြေ တော့ မရှိဘူး ဒါပေမဲ့ အကောင်းဆုံး ဘုရားပြင်ဆင်ထားပေးမယ်လို့ယုံကြည်ခြင်းတော့ရှိတယ်။ ကျွန်တော်တစ်ဘဝလုံး ဘုရားနဲ့အတူလျောက်လှမ်းတဲ့အခါမှာ လူတွေကမေးတယ်။ ဘယ်လို လုပ်မလဲ ? အဲ့ဒီအတွက်တော့ တကယ် အဖြေမရှိခဲ့ဘူး။ အဖြေမရှိပေမယ့် ယုံကြည်ခြင်းတော့ရှိတယ်။ ဘုရားအကောင်းဆုံးပြင်ဆင်ထားပြီးသားဆိုတာကို။ အာဗြဟံအသက်တာမှာ လဲ သူ့သားကမေးတယ်။ ကျန်တဲ့ အရာတွေအကုန်ပါတယ် ယဇ်ကောင်ဘယ်မှာလဲ ?ဘယ်လို လုပ်မလဲ ? သူ့သားက မေးခဲ့ပေမယ့် အဖြေမရှိခဲ့ဘူး။ တချို့ကိစ္စတွေ အတွက် အဖြေရှိလို့လုပ်တာမဟုတ်ပဲ ယုံကြည်ခြင်းနှင့်လုပ်ဆောင်တယ်ဆိုတာ ဒီမှာတွေ့ရတယ်။ ဘဝမှာ အရာရာအားလုံးသိပြီးမှ လုပ်တာထက် ဘုရားကိုယုံပြီးမှ လုပ်တာ ပိုကောင်းတဲ့ရလဒ် ကို ဘုရားပြင်ဆင်ထားတာ တွေ့ရပါလိမ့်မယ်။

ဇူလိုင်လ ၃၀ရက်နေ့

ပြင်ဆင်ထားပြီးသား

“အကြောင်းမူကား ငါ​တို့​သည် ကောင်း​သော​အမှု​များ​ကို​ပြု​ရန် ခရစ်တော်​ယေရှု​၌​ဖန်ဆင်း​ခြင်း​ခံရ​သော ဘုရားသခင်​၏​လက်ရာ​တော်​ဖြစ်​ကြ​၏။ ထို​ကောင်း​သော​အမှု​များ​၌ ငါ​တို့​အသက်ရှင်​လျှောက်လှမ်း​ကြ​ရန် ဘုရားသခင်​သည် ထို​အမှု​များ​ကို ကြိုတင်​ပြင်ဆင်​ထား​တော်မူ​၏။” ဧဖက်ဩဝါဒစာ 2:10 MSBU

ယုံကြည်သူတွေ အတွက်အရေးကြီးတဲ့ နယ်ပယ်နှစ်ခုရှိတယ်။ တစ်ခုကတော့ ယုံကြည်ခြင်းနှင့် ရှင်သန်ခြင်းဖြစ်ပြီးတော့ နောက်တစ်ခုကတော့ ကောင်းသောအသက်တာ ဖြင့်ရှင်သန်ခြင်းဖြစ်တယ်။ ဒီနေရာမှာ အရေးကြီးဆုံးသောအရာက ကောင်းမွန်သော အသက်တာ နှင့်ယှဉ်သန်ခြင်းက အရင်ဆုံး မှာ ရှိရမှာမဟုတ်ဘူး။ တချို့က ဒီအရာကိုရှေ့တန်းတင်ဖို့ကြိုးစားရင် နဲ့ ကျရူံးတဲ့အခါမှာ စိတ်ပျက်ကြတယ်။ တကယ်တော့ အရာအားလုံးရဲ့ ရှေ့ဆုံးမှာ ယုံကြည်ခြင်းကို ထားဖို့လိုတယ်။ ယုံကြည်ခြင်း အရှေ့ဆုံးမှာ မရှိရင် ကျန်တဲ့အရာတွေက နောက်မှာ ရှိဖို့မသေချာဘူး။ ယုံကြည်ခြင်း ကိုရှေ့မှာထားတဲ့အခါမှာ နောက်မှာ ကောင်းတဲ့အသက်တာနှင့် ရှင်သန်နိုင်ဖို့ ခွန်အားကိုဘုရားက ပေးလာတယ်။ ယုံကြည်ခြင်း ရှိတဲ့သူအတွက် လိုအပ်တဲ့အရာမှန်သမျှကို ဘုရားက ရှေ့မှာ ပြင်ထားပြီးသားဖြစ်တယ်။

ဇူလိုင်လ ၂၉ ရက်နေ့

Never (6)

“No one will be able to stand against you all the days of your life. As I was with Moses, so I will be with you; I will never leave you nor forsake you.” Joshua 1:5 NIV

ခေါင်းဆောင် တစ်ယောက်အနေနဲ့ ဣသရေလ လူမျိုးတွေကို ဉီးဆောင်ရမယ့် ယောရူကို ဘုရားကပေးတဲ့ ကတိတော် ကဘယ်လောက်ကောင်းလိုက်သလဲ? တခြားအရာတွေထက် ဘုရားက ဘယ်တော့မှ မစွန့်ပစ်ခဲ့ဘူးဆိုတဲ့ ကတိတော် ရတာ လောက် ကောင်းတာ ဘာများရှိအုံးမလဲ? ယောရူက ခေတ်အဆက်ဆက်က ဘိုးဘေးတွေကို ပေးခဲ့တဲ့ ကတိတော်တွေကို သိမ်းပိုက်ရမယ့်သူပါ။ ဒီလို ဘယ်တုန်းက မှ မဖြစ်ဖူးတဲ့ အရာတွေကို ကိုယ့်အသက်တာမှာ ဖြစ်လာဖို့အတွက် တစ်ခုတည်းသော လိုအပ်ချက်က တခြားအရာမဟုတ်ဘူး။ ဘုရားအတူပါရှိခြင်း ပဲဖြစ်တယ်။ ဘုရားက သင့်ကို မစွန့်ပစ်ပဲ သင်နှင့်အတူရှိတယ်ဆိုရင် သေချာတယ် ဘယ်တုန်းက မှ မဖြစ်ဖူးတာ ၊မဖြစ်ခဲ့တာ အားလုံးဖြစ်လာမယ်။ တချိန်ချိန်မှာ ထားခဲ့မလားဆိုတာ ကိုလဲ စိတ်ပူစရာမလိုဘူး။သူက ဘယ်တော့မှ တစ်ယောက်ထဲမထားခဲ့ဘူးလို့ သေချာ ကတိပေးထားတယ်။ ဘယ်တော့မှ တစ်ယောက်ထဲ ဘဝ ကို ဖြတ်သန်းရမှာမဟုတ်ဘူး။ ဘုရားအတူပါရှိခြင်းနှင့် ဖြတ်သန်းရမယ်ဆိုတာ ယုံပါ။

ဇူလိုင်လ ၂၇ ရက်နေ့

Never (5)

“Most assuredly, I say to you, if anyone keeps My word he shall never see death.”John 8:51 NKJV

လူတွေ အကြောက်ဆုံးက ဘာလဲလို့မေးရင် သေခြင်း လို့ ဖြေလိမ့်မယ်ထင်တယ်။ ခန္ဓာသေတာပဲမဟုတ်ဘူး၊ စိတ်ပိုင်းဆိုင်ရာ သေဆုံးခြင်း၊ မိသားစု ပျော်စရာကောင်းတဲ့ဘဝသေဆုံးခြင်းနှင့် စီးပွါးရေးလုပ်ငန်းများသေဆုံးခြင်း စတဲ့ သေဆုံးခြင်းတွေကလည်း လူ့ဘဝကြီးကို ခြိမ်းခြောက်တဲ့အရာတွေပါပဲ။ သခင်ယေရှုကတော့ကတိပေးတယ် ငါ့စကားကိုနားထောင်တဲ့သူကတော့ ဘယ်သေဆုံးခြင်းကမှ အဆုံးသတ်သွားအောင် ဘယ်တော့မှ မလုပ်နိုင်ဘူး။ ဒီကတိစကားကတော့ တကယ့်ကို အကောင်းဆုံးကတိတော် တစ်ခုလို့ဆိုရမယ်။ ဒီဘဝမှာလဲ ဘယ်သေဆုံးခြင်းကိုမှ ကြောက်စရာမလိုသလို နောင်ဘဝအထိ သေခြင်းကို ကြောက်စရာမလိုပဲ ရှင်သန်ခွင့်ရတဲ့သူဖြစ်လာတယ်။ လူတိုင်းကြောက်တဲ့ သေခြင်းကို မကြောက်ပဲရှင်သန်ခွင့်ရတဲ့ လူသားတစ်ယောက် ဖြစ်ခွင့်ရတာဘယ်လောက်များကောင်းလိုက်သလဲ? ဘုရားစကားကို နားထောင်ပါ။ ဒီကတိစကားက သင့်အတွက်ဖြစ်လာမယ်။

ဇူလိုင်လ ၂၆ ရက်နေ့

Never (4)

“In You, O Lord, I put my trust; Let me never be ashamed; Deliver me in Your righteousness.” Psalms 31:1 NKJV

အရှက်ကွဲ အကျိုး နည်းတဲ့ဘဝကို ဘယ်သူကမှ ကြိုက်မယ်လို့မထင်ဘူး။ တချို့က ပြောတတ်တယ် အသက်နဲ့လူလုပ်တာမဟုတ်ဘူး။အရှက်နဲ့လူ လုပ်နေတာ။ အရှက်ကွဲပြီးတော့ရှင်သန်ရတဲ့ဘဝက ရှင်လျှက်နဲ့သေနေတဲ့ဘဝနှင့် မထူးပါဘူး။ ဆာလံဆရာကတော့ ဘုရားကို ယုံကြည်အားကိုးတဲ့အတွက် သူ့ဘဝမှာ ဘယ်တော့မှ အရှက်ကွဲခြင်း နဲ့မရှင်သန်ရဖို့ ယုံကြည်တယ်။ ဘယ်အရာကမှ သင့်ဘဝမှာ အရှက်ကွဲခြင်းကနေ လွတ်မြောက်ဖို့ အာမခံချက်မပေးနိုင်ဘူး။ ဘုရားတစ်ပါးတည်းသာလျှင် အရှက်တကွဲ အကျိုးနည်းခြင်းကနေ ကယ်လွှတ်နိုင်တယ်။ ယုံပါ ဘုရားသခင်ရဲ့ မစ ပို့ဆောင်မူကြောင့် သင်ဟာ အရှက်ကွဲမူအပေါင်းကနေ အမြဲလွတ်မြောက် မယ်။ဘယ်တော့မှ​သင် မကြုံခြင်တဲ့ အရှက်ကွဲခြင်းထဲ ကျရောက်မှာမဟုတ်ဘူး။

ဇူလိုင်လ ၂၅ ရက်နေ့

Never (3)

“Heaven and earth will pass away, but my words will never pass away.” Matthew 24:35 NIV

ဘယ်တော့မှ မပျောက် မပျက်ဘူးလို့ လူတွေထင်နေတဲ့အရာတွေ အားလုံးက တစ်နေ့ ပျောက်ကွယ်သွားမယ့်အရာတွေ ဖြစ်နေတတ်တယ်။ ဘယ်တော့မှ မပြည့်စုံဘူးလို့ထင်နေတဲ့ အရာတွေ ကလဲ ပြည့်စုံဖို့ နီးကပ်နေတဲ့အရာတွေ ဖြစ်နေတတ်ပြန်တယ်။ လူတွေ ထင်နေတဲ့အရာတွေ အားလုံး ဟာ မှန်တာထက် မှားတာပိုများတယ်။ ဘုရားက ဘယ်တော့မှ ပျောက်ပျက်သွားမှာမဟုတ်ဘူးလို့ ကတိပေးထားတဲ့အရာတွေထဲမှာ သူ့ရဲ့နုတ်ထွက်စကား ကထိပ်ဆုံးကပါတယ်။ကျန်တဲ့အရာတွေအကုန်ကွယ်ပျောက်သွားရင်တောင်မှ သူပြောခဲ့တဲ့စကားတွေ၊ပေးခဲ့တဲ့ကတိတွေက ဘယ်တော့မှ ပျောက်ကွယ်သွားမှာ ၊ မပြည့်စုံပဲ ဖြစ်သွားမှာ မရှိဘူး။ ဘယ်တော့မှ မဖြစ်လာဘူးလို့ထင်နေတဲ့အရာတွေ အားလုံးတောင်မှ ဘုရားစကားဖြစ်ခဲ့မယ်ဆိုရင် သေချာပေါက် ပြည့်စုံလာမှာ ဖြစ်ပျက်လာမှာပါ။

ဇူလိုင်လ ၂၄ ရက်နေ့

Never (2)

“Surely he will never be shaken; The righteous will be in everlasting remembrance.” Psalms‬ ‭112‬:‭6‬ ‭NKJV‬‬

ဘယ်တော့မှ ဖြစ်လာမှာ မဟုတ်တဲ့အရာတွေအတွက် စိုးရိမ်နေမယ့်အစား စိတ်ချမှုအပြည့်နှင့် ရှင်သန်ပါ။ ဘုရားက နှုတ်ကပတ်တော်ထဲမှာ အကြိမ်ပေါင်းများစွာ ကတိပေးထားတယ်။ ဘယ်တော့မှ ဖြစ်လာမှာ မဟုတ်ဘူးဆိုတဲ့အရာတွေက သင်ယုံမယ်ဆိုရင် သင့်အသက်တာမှာ ဘယ်တော့မှ ဘယ်လို အခြေအနေမျိုးမှာမှ ဖြစ်လာမှာမဟုတ်ဘူး။ ဆာလံဆရာက ပြောတယ် ဖြောင့်မတ်သူဟာ တုန်လှုပ် ရွေ့လျားမှာ မဟုတ်ဘူး။ ဒီအရာလေးက သိပ်အဓိပ္ပာယ်နှင့်ပြည့်စုံတယ်။ သင်ဟာ ခရစ်တော်အားဖြင့် ဖြောင့်မတ်သူဖြစ်တယ်ဆိုရင် သင့်ကို ဘုရားပေးတဲ့ကောင်းကြီးကနေ၊ ဘုရားခေါ်ထားတဲ့အရာထဲကနေ ဘယ်အရာကမှ ဘယ်သူကမှ ရွေ့လျော့အောင်၊ လှုပ်ရှားသွားအောင် လုပ်နိုင်မှာမဟုတ်ဘူး။ဖြောင့်မတ်သူဆိုတာ လူတိုင်း အမြဲတမ်းအမှတ်ရနေရတဲ့သူတွေ။ အရာရာမှာ လူတိုင်း သူတို့ကို ကြည့်ပြီး ဘုရားဘယ်လောက် ကောင်းမြတ်သလဲဆိုတာကို ထင်ရှားစေတဲ့သူတွေ။ ဘယ်လိုအခြေအနေ မျိုးရောက်ရောက် သူတို့ ကိုခြိမ်းခြောက်နိုင်တဲ့အရာ မရှိဘူး။ ဘုရားသခင်ရဲ့ကတိတော်ထဲမှာ သူတို့ဟာ လုံခြုံမှုအပြည့်၊ စိတ်ချမှုအပြည့်နဲ့ ရှင်သန်တဲ့သူတွေပါ။ သင်ယုံမယ်ဆိုရင် ဒီကောင်းကြီးက သင့်အတွက်ဘဲ။

ဇူလိုင်လ ၂၃ ရက်နေ့

Never

“And when the demon was cast out, the mute spoke. And the multitudes marveled, saying, “It was never seen like this in Israel!”Matthew‬ ‭9‬:‭33‬ ‭NKJV‬‬

ဘယ်တုန်းကမှ မဖြစ်ဖူးတဲ့အရာတွေ ဖြစ်လာဖို့ ဆန္ဒ ရှိသလား? တကယ်ဆိုရင် သခင်ယေရှုရဲ့ အမှုတော်ဆောင်ခြင်းတစ်ခုလုံးက ဘယ်တုန်းကမှ မဖြစ်ဖူးတဲ့ အရာတွေ ဖြစ်ပျက်လာခြင်းပါ။ ဘယ်ခေတ်ကာလမှာမှ မတွေ့ဖူး မမြင်ဖူး မကြားဖူးတဲ့အရာတွေအကုန်လုံး သခင်ယေရှုအသက်ရှင်တဲ့ကာလမှာ ဖြစ်ပျက်ခဲ့တယ်။ ဒါကြောင့် လူတွေကပြောတယ် ဒါမျိုး ဘယ်တုန်းကမှ မဖြစ်ဖူးဘူး။ ဖြစ်ဖူးတာတွေဘဲ သခင်ယေရှုက လောကကိုကြွလာပြီးလာလုပ်တာမဟုတ်ဘူး။ အခုလည်း သခင်ယေရှုက သင့်အထဲမှာ လာရောက်အသက်ရှင်နေတယ်။ သင့်ဘဝမှာ မဖြစ်ဖူးတာတွေ၊ မဖြစ်နိုင်တာတွေဘဲ လုပ်မယ်ဆိုတာ ယုံပါသလား? လူတွေက ပြောတယ် ဒါမျိုးဘယ်တုန်းကမှ ဘယ်သူ့ဆီမှာမှ မဖြစ်ဖူးဘူး၊ ဟုတ်ပါတယ်။ဒါပေမယ့် သခင်ယေရှုအသက်ရှင် ပေးတဲ့အခါမှာ ဘယ်တုန်းကမှ ဘယ်လိုမှ မဖြစ်နိုင်တာတွေ​အကုန်လုံးဖြစ်လာတော့တာပါဘဲ။ သခင်မရှိရင်သာ မဖြစ်နိုင်တာတွေ မဖြစ်ဖူးတာတွေ ဘယ်တော့မှ မဖြစ်လာတော့တာပါ။​

ဇူလိုင်လ ၂၂ ရက်နေ့

ဆင်ခြင်အောက်မေ့ခြင်း (၉)

“အကျွန်ုပ်​သည် စည်းစိမ်ဥစ္စာ​အလုံးစုံ​တို့​အပေါ်​၌ ရွှင်မြူး​ခြင်း​ရှိ​သကဲ့သို့ ကိုယ်တော်​၏​သက်သေခံချက်​လမ်း​၌ ရွှင်မြူး​ခြင်း​ရှိ​ပါ​၏​။ ကိုယ်တော်​၏​ဥပဒေသ​တို့​ကို ဆင်ခြင်အောက်မေ့​လျက် ကိုယ်တော်​၏​လမ်းစဉ်​တို့​ကို ကြည့်ရှုဆင်ခြင်​ပါ​မည်​။”

‭‭ဆာလံကျမ်း‬ ‭၁၁၉:၁၄-၁၅

ဘယ်သူတွေက ဝိညာဉ်ရေးရာမှာရော ၊စီးပွါးရေးမှာပါ ဝမ်းမြောက်ခြင်းအခွင့် ခံစားရသလဲ? ဒီမေးခွန်းသိပ်ကောင်းတယ်။ တချို့က ဝိညာဉ်ရေးရာမှာ ဝမ်းမြောက်စရာတွေ နှင့်ပြည့်နှက် နေတတ်ပေမဲ့ ငွေကြေးပိုင်းဆိုင်ရာမှာ ဝမ်းမြောက်စရာ မရှိပဲ ဖြစ်တတ်တယ်။ ဘုရားက သင့်ကို နယ်ပယ်နှစ်ခုလုံးမှာ ဝမ်းမြောက်စရာတွေနဲ့ ပြည့်စေခြင်တယ်။ နေရာနှစ်ခုလုံးမှာ ဝမ်းမြောက်စရာတွေနဲ့ ပြည့်နှက်နေတဲ့ ဘဝအသက်တာကို တော့ ဘုရားရဲ့ဉပဒေသ တွေကို ဆင်ခြင်အောက်မေ့ ပြီး အမြဲတမ်း ဘုရားရဲ့လမ်းစဉ်ကို ကြည့်ရူဆင်ခြင်နေတဲ့သူတွေအသက်တာမှာ မြင်တွေ့ရတယ်။ ဆင်ခြင်အောက်မေ့ခြင်း မှန်ကန်တဲ့အခါမှာ ဝိညာဉ်ရေးရာရော ၊ငွေကြေးပိုင်းရော ကောင်းကြီးမဂ်လာနှင့် ပြည့်လျှံလာတယ်။ မြစ်နားမှာစိုက်တဲ့သစ်ပင်ဆိုတာ လိုအပ်ချက်ကို မရှိသလိုပဲ ဆင်ခြင်အောက်မေ့ခြင်းမှာ ကျင်လည်တဲ့သူအသက်တာမှာ ဖြစ်လာတယ်။​

ဇူလိုင်လ ၂၀ ရက်နေ့

ဆင်ခြင်အောက်မေ့ခြင်း (၈)

“Let the words of my mouth and the meditation of my heart Be acceptable in Your sight, O Lord, my strength and my Redeemer.” Psalms‬ ‭19‬:‭14‬ ‭NKJV‬‬

ဆာလံဆရာရဲ့ ဆပ်ကပ်အပ်နှံမူကို သင်ယူမိတယ်။ သူက နုတ်ခမ်းနှင့် နှလုံးသား နှစ်ခုလုံးကိုဆပ်ကပ်တယ်။ နုတ်ခမ်းကနေထွက်လာတဲ့ စကားလုံးတိုင်း ဘုရား နှစ်သက်ပြီးလက်ခံဖို့ ဆန္ဒရှိသလို၊ စိတ်ထဲမှာ ဆင်ခြင်အောက်မေ့နေတာအားလုံးကလည်း ဘုရားနှစ်သက်တဲ့အရာတွေဖြစ်ဖို့ သူ ဆန္ဒရှိတယ်။ ဒီအချက်ကြောင့်လဲ သူဟာ ဘုရားစိတ်တော်နှင့်တွေ့တယ်လို့သတ်မှတ်ခြင်းခံရတယ်။ ဆင်ခြင်အောက်မေ့ နေတဲ့အရာတွေဟာ ဘုရားနှလုံးသားနှင့်ထပ်တူ ကျလာရင်၊ သင်ပြောတဲ့စကားလုံးတိုင်းဟာ တန်ခိုးပါလာမယ်။ ပြောတဲ့ စကားလုံးတိုင်းတန်ခိုးပါလာရင်တော့ ပြောရင် ပြောတဲ့အတိုင်း အကုန်ဖြစ်လာလိမ့်မယ်။ ပြောသမျှအကုန်ဖြစ်နေမှတော့ ဘာလိုအုံးမှာလဲ? လူတိုင်း ဖြစ်ချင်တဲ့ဘဝကို ပိုင်ဆိုင်ပြီပေါ့။

ဇူလိုင်လ ၁၉ ရက်နေ့

ဆင်ခြင်အောက်မေ့ခြင်း ()

“This Book of the Law shall not depart from your mouth, but you shall meditate in it day and night, that you may observe to do according to all that is written in it. For then you will make your way prosperous, and then you will have good success.” Joshua 1:8 NKJV

မလွဲသွားဖို့နဲ့ မမွဲသွားဖို့တွက်တော့ မှန်ကန်တဲ့ ဆင်ခြင်အောက်မေ့ခြင်းကတော့အရေးကြီးတယ်။ ဘုရားစကားအပေါ်မှာ နေ့ ညမပြတ်ဆင်ခြင်အောက်မေ့တဲ့အခါမှာ အသက်တာမှ စစ်မှန်တဲ့ ကြွယ်ဝခြင်းနှင့် အောင်မြင်ခြင်း သက်ရောက်လာတယ်။ လောကကြီးကဘယ်လိုအခြေအနေရှိရှိ ဘုရားစကားအပေါ်မှာဘဲ နက်ရှိုင်းစွာဆင်ခြင်အောက်မေ့တဲ့အခါမှာ မဖြစ်နိုင်ဘူးလို့ထင်တဲ့အရာတွေ မရနိုင်ဘူးလို့ မြင်တဲ့အရာတွေက အသက်တာကို ရောက်ရှိလာတယ်။ ယောရှုရဲ့ အောင်မြင်ခြင်း အဓိကလျှို့ဝှက်ချက်ကို ပြောပါဆို ဒီအရာကိုပြောရမယ်။ ဒီလျှို့ဝှက်ချက်ကို ဘုရား ကိုယ်တိုင်က ယောရှုကိုဖွင့်ဟခဲ့တယ်။ သင့်အသက်တာမှာလည်း ဘုရားစကားအပေါ်မှာ နေ့စဉ် ဆင်ခြင်အောက်မေ့မယ်ဆိုရင် မထူးခြားဘဲမနေပါဘူး။

ဇူလိုင်လ ၁၈ရက်နေ့

ဆင်ခြင်အောက်မေ့ခြင်း (၆)

“လူ​ဆိုး​တို့၏ လမ်း​တွင်​မ​ရပ်​မ​နေ၊ မ​ထီ​မဲ့​မြင်​ပြု​သော သူ​တို့၏ အ​စည်း​အ​ဝေး​၌​မ​ထိုင်၊ ထာ​ဝ​ရ​ဘု​ရား၏​တ​ရား​တော်​၌ မွေ့​လျော်​၍၊ တ​ရား​တော်​ကို နေ့​ည​မ​ပြတ်​ဆင်​ခြင်​အောက်​မေ့​သော​သူ​သည် မင်္ဂ​လာ​ရှိ​၏။” ဆာလံကျမ်း ၁:၂

မင်္ဂလာဆိုတာ အလိုလို ဖြစ်တာမဟုတ်ဘူး။ ယူတတ်တဲ့သူတွေဆီကိုဘဲလာတာ။ ကိုယ်ဘယ်အရာတွေမှာ မွေ့လျော်သလဲဆိုတဲ့အပေါ်မှာမူတည်ပြီးတော့ အသက်တာမှာ မင်္ဂလာ ဖြစ်တည်လာတယ်။ ဘုရားရဲ့တရားတော်မှာ မွေ့လျော်ခြင်း မင်္ဂလာရဲ့ ပထမ ကောင်းကြီးက မပေါင်းသင့်၊မသွားသင့်၊ မထိုင်သင့်တဲ့ နေရာတွေကို ရှောင်နိုင်တဲ့မင်္ဂလာ ကိုဖြစ်ပေါ်စေတယ်။ အမင်္ဂလာဖြစ်စေမယ့်အရာတွေကို ရှောင်နိုင်တယ်ဆိုတာကလည်း တကယ့်မင်္ဂလာဘဲမဟုတ်လား?နောက် တရားတော်ကို ဆင်ခြင်အောက်မေ့တဲ့ ကောင်းကြီး ကတော့ မြစ်နားမှာရှိတဲ့ သစ်ပင်လိုဘဲ အမြဲတမ်းစိမ်းလန်းပြီးတော့ သီးပွင့်ဝေဆာ နေတယ်။ အသက်တာရဲ့ ကြီးထွားတိုးတက်ပြီး ကောင်းကြီးမင်္ဂလာတွေနှင့်ပြည့်နှက်နေတဲ့ အသက်တာကို တရားတော်ကိုဆင်ခြင်အောက်မေ့ခြင်းက ယူဆောင်လာပေးတယ်။

ဇူလိုင်လ ၁၇ ရက်နေ့

ဆင်ခြင်အောက်မေ့ခြင်း (၅)

“ကောင်း​စား​သည်​ကာ​လ၌ ဝမ်း​မြောက်​လော့။ ဆင်း​ရဲ​ခံ​ရ​သည်​ကာ​လ၌ ဆင်​ခြင်​လော့။ လူ​သည် မိ​မိ​နောက်​မှာ ဖြစ်​လ​တ္တံ​သော အ​မှု​အ​ရာ​ကို​သိ​မည်​အ​ကြောင်း၊ ဘု​ရား​သ​ခင်​သည် ကောင်း​စား​ခြင်း​နှင့် ဆင်း​ရဲ​ခြင်း​ကို​လည်း အ​လှည့်​လှည့် ပေး​တော်​မူ၏။” ဒေသနာ‬ကျမ်း ၇:၁၄

လူတွေ ရောက်နေတဲ့ သင်ရောက်နေတဲ့ကာလ တူချင်မှ တူမယ်။ ဒါကြောင့် ကိုယ်ရောက်နေတဲ့ အခြေအနေအပေါ်မှာမူတည်ပြီးတော့ ဘယ်တော့မှ လူတွေကို မစီရင်မိပါစေနဲ့။ လူတိုင်း ရောက်နေတဲ့ အခြေအနေခြင်း မတူဘူးဆိုတာ သိထားဖို့လိုတယ်။ အနာဂတ်ကို အကောင်းဆုံး ကြိုတင်ပြင် ဆင်နိုင်ဖို့အတွက် လက်ရှိအခြေအနေတွေအပေါ်မှာ သင်ယူဖို့ အရေးကြီးတယ်။ ကောင်းစားတဲ့ကာလ ဟာ ဝမ်းမြောက်ဖို့ ဖြစ်တယ်။ သူများဝမ်းမြောက်နေတာကြည့်ပြီးတော့ အပြစ်တင်ဖို့ထက် သူရောက်နေတဲ့ ကာလကို သိပြီးတော့ ဝမ်းမြောက် တဲ့သူနဲ့အတူ ဝမ်းမြောက်ပေးတတ်ဖို့ သင်ယူရမယ်။ ဆင်းရဲတဲ့ကာလမှာတော့ ဆင်ခြင်ဖို့လိုတယ်။ ဘာကြောင့်များဒီလို ကြုံရသလဲဆိုတာ ဘုရားနှုတ်ကပတ်တော်အားဖြင့် လေးနက်စွာဆင်ခြင်ဖို့လိုတယ်။ အနာဂတ်မှာ ဒီအတိုင်းဆက်ပြီး မဆင်းရဲချင်ဘူး၊ ဒီဆင်းရဲခြင်းကနေလွတ်ချင်တယ်ဆိုရင် လေးနက်စွာ ဆင်ခြင်အောက်မေ့ခြင်းက သင့်ကို လွတ်မြောက်ရာလမ်းကို တွေ့စေမယ်။ ဆင်းရဲတဲ့ကာလမှာ အလိုတော်ပဲဆိုပြီးတော့ ကြိတ်မှိတ်ပြီးမနေလိုက်နဲ့။ ဘုရားက ထွက်မြောက်ရာလမ်းကို ပြင်ဆင်ထားပြီးသား၊ အဲ့ဒီလမ်းကိုတော့ နှုတ်ကပတ်တော်ကို လေးနက်စွာဆင်ခြင်တဲ့သူတွေပဲတွေ့နိုင်တယ်။

ဇူလိုင်လ ၁၆ ရက်နေ့

ဆင်ခြင်အောက်မေ့ခြင်း (၄)

“သက်​သေ​ခံ​တော်​မူ​ချက်​တို့​ကို အ​ကျွန်ုပ်​သည် ဆင်​ခြင်​အောက်​မေ့​သော​ကြောင့်၊ အ​ကျွန်ုပ်၏ ဆ​ရာ​အ​ပေါင်း​တို့​ထက် သာ၍​နား​လည်​ပါ၏။” ဆာလံကျမ်း ၁၁၉:၉၉

ဆင်ခြင်အောက်မေ့ခြင်း အကျိုးနှင့်တန်ခိုးက ပြောလို့တောင် မကုန်နိုင်ပါဘူး။ သက်သေအပေါင်းကို ဆင်ခြင်အောက်မေ့ခြင်းက ဘယ်လောက်တောင် အသက်တာကို ကောင်းမွန်တဲ့အရာတွေကို ယူဆောင်လာသလဲ? ဘုရားနှင့်သက်ဆိုင်တဲ့ အရာတွေ၊ ဘုရားပြုတဲ့ အမှုအပေါင်းကို သေချာစွာဆင်ခြင်ပါ။ အသက်တာကို ကြီးမားတဲ့အကျိုးကျေးဇူးတော်ကို ယူဆောင်လာပါတယ်။ ဆာလံဆရာက ဘာပြောလဲဆိုရင် သူ့အသက်တာမှာ သက်သေခံချက်ကို အမြဲတမ်း ဆင်ခြင်အောက်မေ့ခြင်းကြောင့် သာမန်ဘဝမဟုတ်ဘဲ သူ့ဆရာတွေထက် တောင် သာ၍​နား​လည်​တယ်လို့ဆိုတယ်။ ဆရာတွေထက် သာဖို့ဆိုတာ မလွယ်ပါဘူး။ ဒါပေမယ့် ဆရာတွေထက် သာနိုင်တဲ့ အချက်ကတော့ဆင်ခြင်အောက်မေ့ခြင်းပါ။ ဆင်ခြင် အောက်မေ့ခြင်းမရှိရင် အသက်တာမှာ ဘယ်တော့မှ ဘယ်လိုမှ ဆရာတွေထက်သာလွန်မှာမဟုတ်ပါဘူး။ သက်သေခံချက် တွေကို ဆင်ခြင်အောက်မေ့ခြင်းက ဆရာအပေါင်းထက် သာ၍​နား​လည်​စေတဲ့ လျှို့ဝှက်ချက်ပါ။

ဇူလိုင်လ ၁၅ ရက်နေ့

ဆင်ခြင်အောက်မေ့ခြင်း (၃)

“အ​ဝတ်​အ​ဖို့၌ အ​ဘယ်​ကြောင့် စိုး​ရိမ်​ရ​သ​နည်း။ တော​နှင်း​ပင်​တို့​သည် အ​ဘယ်​သို့​သော​အား​ဖြင့် ကြီး​ပွား​သည်​ကို ဆင်​ခြင်​အောက်​မေ့​ကြ​လော့။ ထို​အ​ပင်​တို့​သည် အ​လုပ်​လည်း​မ​လုပ်၊ ချည်​ဖြစ်​စေ​ခြင်း​ငှာ မ​ငင်​မ​ဝင့်။-” ရှင်မဿဲခရစ်ဝင် ၆:၂၈

လူများစွာက မေးခွန်းမေးတတ်တယ်။ စိုးရိမ် ခြင်းအသက်တာမှာ မရှိဘူးလား? လူတိုင်း စိုးရိမ်တတ်ပါတယ်။ မစိုးရိမ်တတ်တဲ့ သူဆိုတာ မရှိပါဘူး။ အထူးသဖြင့် စား၊ဝတ်၊ နေရေးအတွက်ကတော့အထူးသဖြင့် စိုးရိမ်ကြတာပါဘဲ။ ကျွန်တော်ဆီမှာလည်း ဒီစိုးရိမ်ခြင်းက မကြာခဏရောက်လာတတ်ပါတယ်။ ဒီအရာကို ဘာမှ​မလုပ်ဘဲထားလိုက်ရင်တော့ သူဟာ တဖြည်းဖြည်းနဲ့ ပိုတိုးပွါးလာတယ်။ နောက်ဆုံး ဘဝတစ်ခုလုံးကို ဝါးမြိုသွားနိုင်တယ်။ စိုးရိမ်ခြင်းကို တိုက်ဖို့ အကောင်းဆုံး လက်နက်ကို သခင်ယေရှုက ပေးခဲ့တယ်။ ဒါကတော့ ဘုရားသခင် လုပ်ဆောင်ပေးတဲ့၊ လုပ်ဆောင်ပေးနေတဲ့အရာတွေကို လေးနက်စွာ ဆင်ခြင်အောက်မေ့ခြင်း ဖြစ်တယ်။ တောနှင်းပင်တွေ၊ ငှက်တွေကို ကြည့်ရှုဆင်ခြင်ပြီးတော့ ဘုရားလုပ်ပေးတဲ့အရာတွေကို နားလည်သဘောပေါက်ခဲ့ရင် စိုးရိမ်ခြင်းက သင့်ဘဝထဲမှာ နေရာရှိတော့မှာမဟုတ်ပေ။ စိုးရိမ်ခြင်းကို တိုက်နိုင်တဲ့ အကောင်းဆုံးလက်နက်က ဘုရားနဲ့ပက်သက်ပြီးတော့ လေးနက်စွာဆင်ခြင်အောက်မေ့ခြင်းပါဘဲ။

ဇူလိုင်လ ၁၃ ရက်နေ့

ဆင်ခြင်အောက်မေ့ခြင်း (၂)

“နွား​သော်​လည်း မိ​မိ​အ​ရှင်​ကို​သိ​၏။ မြည်း​သော်​လည်း မိ​မိ​သ​ခင်​၏​မြည်း​ဇောင်း​ကို​သိ​၏။ ဣ​သ​ရေ​လ​အ​မျိုး​သား​တို့​မူ​ကား၊ ငါ့​ကို​မ​သိ​ကြ။ ငါ​၏​လူ​မျိုး​မူ​ကား၊ မ​ဆင်​ခြင်​တတ်​ပါ​တ​ကား။” ဟေရှာယအနာဂတ္တိကျမ်း ၁:၃

လူက တိရိစ္ဆာန်ထက် အရာရာမှာသာတယ်ဆိုတာ အားလုံးသိပါတယ်။ သာရတဲ့ အဓိက အကြောင်းအရင်းက ဘယ်အရာလဲဆိုတာ ဘုရားကပရောဖက်ဟေရှာယကို ပြောတယ်။ အဲ့ဒီအရာမရှိရင်တော့ တိရိစ္ဆာန်လောက်တောင် မဟုတ်တော့ဘူး။ အဲ့ဒီအရာကဘယ်အရာလဲဆိုရင် ဆင်ခြင်အောက်မေ့ခြင်းဖြစ်တယ်။ ဆင်ခြင်အောက်မေ့ခြင်းရဲ့တန်ခိုးက သေးသေးလေးမဟုတ်ဘူး။ လူတစ်ယောက်ရဲ့ဘဝကို အနိမ့်ဆုံးကနေ အမြင့်ဆုံးကို ဆွဲမသွားနိုင်သလို အဲ့ဒီမရှိရင်လည်း အမြင့်ဆုံးကနေ အနိမ့်ဆုံးကို ဆွဲချသွားနိုင်တယ်။ တိရိစ္ဆာန်တွေမှာ ဉီးဏှောက်ရှိပေမယ့် မဆင်ခြင်တတ်ခြင်းက သူတို့ဘဝကို ကန့်သတ်ထားတယ်။ အဲ့လိုပဲ လူ့ဘဝရဲ့အောင်မြင်မှု၊ ကြွယ်ဝမှုနှင့် တိုးတတ်မှုအားလုံးကို ဆင်ခြင်အောက်မေ့ခြင်းက ကန့်သတ်ထားတယ်။ ဘုရားကို မသိရခြင်း၊ ဘုရားရဲ့အလေ့အလာကို နားမလည်ရခြင်းရဲ့ အဓိက အကြောင်းကတော့ လေးနက်စွာမဆင်ခြင်မအောက်မေ့လို့ပါဘဲ။

ဇူလိုင်လ ၁၂ ရက်နေ့

ဆင်ခြင်အောက်မေ့ခြင်း

“သူ​တို့​သည် ထာဝရဘုရား​၏ လုပ်ဆောင်မှု​တို့​ကို​လည်းကောင်း​၊ ကိုယ်တော်​၏​လက်​တော်​ဖြင့်​ပြု​သော အမှု​ကို​လည်းကောင်း အလေးအနက်​ဆင်ခြင်​ခြင်း​မ​ရှိ​ကြ​သောကြောင့် ကိုယ်တော်​သည် သူ​တို့​ကို​ဖြိုဖျက်​၍ မည်သည့်​အခါ​မျှ သူ​တို့​ကို ပြန်လည်​တည်ဆောက်​တော်မူ​လိမ့်မည်​မ​ဟုတ်​။” ဆာလံကျမ်း‬ ‭၂၈:၅

တည်ဆောက်ခြင်းခံရတဲ့သူနှင့် ပြိုပျက်နေတဲ့သူတွေရဲ့အသက်တာမှာ အဓိက ခြားနားချက်ကဘယ်အရာဖြစ်မယ်လို့ထင်လဲ? အရည်အချင်းတွေရှိပေမယ့် တည်ဆောက်ခြင်း၊ တိုးတက်ခြင်းမရှိဘဲ အမြဲတမ်းပြိုလဲနေတဲ့သူတွေကို တွေ့ဖူးသလို၊ အရည်အချင်းတွေ အများကြီးမရှိပေမယ့် ကြီးမားတဲ့တည် ဆောက်ခြင်းအသက်တာကိုပိုင်ဆိုင်နေတဲ့သူတွေကိုလည်းတွေ့ဖူးတယ်။ နှုတ်ကပတ်တော်က ပြောတယ် သူတို့ရဲ့အဓိက ခြားနားချက်ကတော့ အလေးနက်ထားဆင်ခြင်အောက်မေ့ခြင်း ဘဲဖြစ်တယ်။ ဘုရားလုပ်ဆောင်ပေးတဲ့ အမှုနှင့် လက်တော်ဖြင့်ပြုခြင်းကို အလေးနက်ထား ဆင်ခြင်ပြီးရှင်သန်တဲ့သူ အသက်တာမှာ အမြဲတမ်းတည်ဆောက်ပေးခြင်း ခံရပြီးတော့ ဘယ်တော့မှ ပြိုလဲသွားမှာမဟုတ်ပါ။ တရားတော်ကိုနေ့ည မပြတ်ဆင်ခြင်အောက်မေ့တဲ့သူဟာ မြစ်နားမှာစိုက်တဲ့ သီးပွင့်ဝေဆာနေတဲ့အပင်ဖြစ်တယ်လို့ ဆာလံဆရာကဆိုတယ်မဟုတ်လား? ဘုရားပြုခဲ့ပေးတဲ့ အမှုအရာတွေ၊ တန်ခိုးကြီးတဲ့လက်တော်ရဲ့ လုပ်ဆောင်ပေးမှုကို သဘောမပေါက် မဆင်ခြင်တဲ့သူကတော့ ဘယ်တော့မှ ကောင်းမွန်တဲ့ဘဝကို တည်ဆောက် ခွင့်ရမှာမဟုတ်ဘူး။

ဇူလိုင်လ ၁၁ ရက်နေ့

ဘယ်သူ့ ဘက်ကလဲ? (၄)

“ယေ​ရှု​က၊ ထို​သူ​ကို မ​မြစ်​တား​ကြ​နှင့်။ ငါ့​နာ​မ​ကို အ​မှီ​ပြု​လျက် တန်​ခိုး​ကို​ပြ၍ ငါ့​ကို​အ​လွယ်​တ​ကူ ကဲ့​ရဲ့​နိုင်​သော​သူ တစ်​ယောက်​မျှ​မ​ရှိ။- သင်​တို့၏​ရန်​သူ​ဘက်၌ မ​ရှိ​သော​သူ​သည် သင်​တို့​ဘက်၌ ရှိ၏။-” ရှင်မာကုခရစ်ဝင် ၉:၃၉-၄၀

သခင်ယေရှုနာမကို အမှီပြုပြီးတော့ နတ်ဆိုးတွေကိုနှင်ထုတ်၊ တန်ခိုးတွေကိုပြနေတဲ့ သူတစ်ယောက်ကိုတွေ့တော့ တပည့်တော် တစ်ယောက် တားဆီးတယ်။ ငါတို့နောက်လိုက်လည်း မဟုတ်ပဲ ဘာကြောင့် ဒါတွေ လုပ်နေတာလဲ? နောက် ဒါမျိုး မလုပ်နဲ့ဆိုပြီးတော့။ ဒီအကြောင်းကို သခင်ယေရှုကြားတော့ နောက်အဲ့လို မတားဆီးဖို့ သတိပေးတယ်။ သခင်ယေရှုနာမကိုအမှိီပြုပြီး လုပ်ဆောင်တဲ့သူတွေဟာ တစ်ဘက်ထဲသားချင်းတွေဖြစ်တယ်ဆိုတာ သူတို့ကို ရှင်းပြတယ်။ ရန်သူဘက်မှာရှိတဲ့သူနဲ့ သခင်ယေရှုဘက်မှာ ရှိတဲ့သူ ဘယ်လိုကွာခြားလဲ? သခင်ယေရှုကိုအမှီပြုပြီးအသက်ရှင်တဲ့သူနှင့် မရှင်သန်တဲ့သူဒီအရာကိုကြည့်ပြီးသိနိုင်တယ်။ သခင်ယေရှုနာမတော် အားဖြင့် အသက်ရှင် လုပ်ဆောင်နေတဲ့သူတွေက လုပ်ဖေါ်ဆောင်ဖက်တွေပါ။ သူတို့က ရန်သူတွေမဟုတ်ဘူး။ အချင်းချင်း တိုက်ခိုက်ဖို့၊ တားဆီးဖို့မဟုတ်ဘူး။ မိတ်ဆွေကို မိတ်ဆွေလို့မမြင်သရွေ့ ရန်သူနဲ့မိတ်ဆွေဖွဲ့နေရအုံးမှာဘဲ။

ဇူလိုင်လ ၁၀ ရက်နေ့

ဘယ်သူ့ ဘက်ကလဲ? (၃)

“တပ်​တံ​ခါး​ဝ​မှာ​ရပ်​လျက်၊ ထာ​ဝ​ရ​ဘု​ရား​ဘက်၌ အ​ဘယ်​သူ​နေ​သ​နည်း။ ငါ့​ထံ​သို့ လာ​စေ​ဟု​ဆို​လျှင်၊ လေ​ဝိ​အ​မျိုး​သား​အ​ပေါင်း​တို့​သည် သူ့​ထံ၌​စည်း​ဝေး​ကြ၏။” ထွက်မြောက်ရာ ၃၂:၂၆

ဘုရားသခင်ဘက်မှာ ဘယ်သူရပ်မှာလဲ? တောတစ်ခုလုံး ဟိန်းသွားအောင်ပေါ်ထွက်လာတဲ့ မောရှေရဲ့အသံ။ ဣသရေလ ၁၂ မျိုးလုံး မောရှေတောင်ပေါ်တက်တုန်း နွားရုပ် လုပ်ပြီးတော့ အဲဂ္ဂုတ္တုက ကယ်တဲ့ဘုရားဆိုပြီးအကြီးအကျယ် ပွဲလုပ်နေကြတယ်။ ဘုရားနဲ့တွေ့ပြီးဆင်းလာတဲ့ မောရှေအတွက်တော့ ရင်ဝကန်ခံလိုက်ရသလိုဘဲ။ ဒီအချိန်မှာ မောရှေရဲ့ပြတ်သားတဲ့စကားသံက ဘာလဲ? ဘယ်သူ ဘုရားဘက်မှာ ရပ်မှာလဲ? လေဝိ တမျိုးထဲကဘဲ မောရှေဆီကို ချဉ်းကပ်လာတယ်။ လူမျိုးတိုင်း လာခွင့်ရှိပေမယ့် တစ်မျိုးထဲကဘဲ မောရှေဆီကို ချဉ်းကပ်ကြတယ်။ ဒီရွေးချယ်မှုကြောင့် လေဝိ သားစဉ်မြေးဆက်ဟာ ဘုရားအမှုကို ဆောင်ခွင့်ရတဲ့ တစ်မျိုးထဲသော လူမျိုးဖြစ်လာတယ်။ ဘုရားဘက်မှာ ပြတ်ပြတ်သားသားရပ်တည်တဲ့သူတွေ ဘက်မှာလည်း ဘုရားကပြတ်ပြတ်သားသားရပ်တည်တယ်။

ဇူလိုင်လ ၉ ရက်နေ့

ဘယ်သူ့ ဘက်ကလဲ? (၂)

“ယော​ရှု​သည် ယေ​ရိ​ခေါ​မြို့​အ​နား​မှာ​ရှိ​နေ​စဉ် မျှော်​ကြည့်၍၊ လူ​တစ်​ယောက်​သည် ဓား​ကို​ဓား​အိမ်​မှ ထုတ်​ကိုင်​လျက်၊ ကန့်​လန့်​ရပ်​နေ​သည်​ကို မြင်​လျှင်၊ သူ့​ထံ​သို့​သွား၍ သင်​သည် ငါ​တို့​ဘက်၌​နေ​သော​သူ​လော၊ ငါ​တို့​ရန်​သူ​ဘက်၌ နေ​သော​သူ​လော​ဟု​မေး​သော်၊” ယောရှုမှတ်စာ ၅:၁၃

သူ့ဘက် ငါ့ဘက်၊ သူ့လူ ငါ့လူ နဲ့ရန်ဖြစ်နေတဲ့ လောကကြီးမှာ တစ်ဘက်ဘက်ကို ပြတ်ပြတ်သားသားရပ်ဖို့ ဆုံးဖြတ်ဖူးတယ်။ ရပ်ပြီးမှဘဲ မကြိုက်လို့ ပြန်ပြောင်းရတာလည်းမနည်းတော့ဘူး။ တစ်ဖက်ကိုဘဲပြတ်ပြတ်သားသားရပ်ဖို့ကြတော့လည်း တကယ်ကို မှန်ကန်ဖို့ အရေးကြီးတယ်လေ။ ခက်တာက နှစ်ဖက်လုံးက အပြည့်အဝမှန်တယ်ဆိုတာကလည်း ရှားပြန်တယ်။ တစ်ဖက်စကားဘဲကြားပြီးတော့ တစ်ဖက်ကိုဘဲ လိုက်သွားလို့မရပြန်ဘူး။ ဒီနေ့လူတွေ ရဲ့အရူပ်ထွေးဆုံးကိစ္စက ဘယ်ဘက်မှာ ရပ်တည်မလဲ? တသက်လုံးကို ရှိပြီးသားဘက်က မှန်မှန်/မှားမှား ဆက်ပြီးရပ်တည်သွားရမှာလား?ဒါမှမဟုတ် မှန်တယ်လို့ထင်တဲ့ဘက်ကို ပြောင်းရင် သစ္စာဖေါက်သလို ဖြစ်သွားမလား? ရှင်းလင်းတဲ့အဖြေကို ရဖို့ နှစ်ပေါင်းများစွာရုန်းကန် နေရတဲ့သူတွေရှိတယ်။ အကောင်းဆုံးအကြံပေးချင်တယ် ဘုရားဘက်မှာပြတ်ပြတ်သားသားရပ်တည်ပါ။ ဘုရားက တော့ဘယ်တော့မှ မမှားဘူး။ လူတွေရဲ့လုပ်ရပ်နှင့် လုပ်ဆောင်မှုကတော့ အချိန်တစ်ခုအတွင်းမှာဘာမဆိုဖြစ်လာနိုင်တယ်။ ဘုရားဘက်မှာ ပြတ်ပြတ်သားသားရပ်တည်တဲ့သူတွေ ဘက်မှာလည်း ဘုရားကပြတ်ပြတ်သားသားရပ်တည်တယ်။

ဇှုလိုင်လ ၈ ရက်နေ့

ဘယ်သူ့ ဘက်ကလဲ?

“ယော​ရှု​သည် ယေ​ရိ​ခေါ​မြို့​အ​နား​မှာ​ရှိ​နေ​စဉ် မျှော်​ကြည့်၍၊ လူ​တစ်​ယောက်​သည် ဓား​ကို​ဓား​အိမ်​မှ ထုတ်​ကိုင်​လျက်၊ ကန့်​လန့်​ရပ်​နေ​သည်​ကို မြင်​လျှင်၊ သူ့​ထံ​သို့​သွား၍ သင်​သည် ငါ​တို့​ဘက်၌​နေ​သော​သူ​လော၊ ငါ​တို့​ရန်​သူ​ဘက်၌ နေ​သော​သူ​လော​ဟု​မေး​သော်၊” ယောရှုမှတ်စာ ၅:၁၃

လူတွေက သိချင်ကြတဲ့အရာ ထဲက တစ်ခုက သင်က ဘယ်သူ့ဘက်မှာ ရပ်တည်မှာလဲ? ဒီ အရာကို သိျင်တာ အခုမှ မဟုတ်ပါဘူး။ လူတွေကို မှ မဟုတ်ပါဘူး။ ဘုရားသခင် ကိုတောင်မှ ဘယ်သူ့ဘက်မှာ ပါမလဲ ဆိုတာ သိချင်ကြတာပါ။ ယောရူဆိုရင် ခါနန်ပြည် ကို သိမ်းပိုက်ခါနီးမှာ ကောင်းကင်တမန်ကို တွေ့ တော့ သူက ဒီမေးခွန်းသွားမေးပါတယ်။ ရန်သူ ဘက်ကလား ? ဒါမှ မဟုတ် ငါ တို့ဘက်ကလား? တစ်ဖက်ဖက် မှာ ပြတ်ပြတ်သားသားရပ်တည်ဖို့ အတွက်လဲ ဖိအားပေးခြင်းခံရတာလဲ အကြိမ်ပေါင်းမနည်းဘူးမဟုတ်လား? တစ်ခုခုကို ပြတ်ပြတ်သားသား ရပ်တည်ဖို့အတွက် ဆိုရင်တော့ ကောင်းကင်က ဘယ်လို ရပ်တည်သလဲဆိုတာ သိဖို့အရေးကြီးပါတယ်။ ကိုယ်ကြိုက်တဲ့ဘက် ကိုယ်သဘောကျတဲ့ဘက် ကိုယ် ရပ်တည် ရုံနဲ့ ဘုရားသခင် ရဲ့ကောင်းကင်ဘုံက လုပ်ဆောင်ခိုင်းသလား? ဒီလိုမဟုတ်ပါဘူး။ ကောင်းကင်တမန် ယောရူကို ဖြေတဲ့အဖြေက အရမ်းကို ရိုးရှင်းပြီးတော့သဘောကျစရာ ကောင်းသလို ဘုရားသားသမီးတွေ ဘယ်လိုရပ်တည် အသက်ရှင်ရမလဲ ဆိုတာ ကို ရှင်းလင်းစွာ သိစေတဲ့အရာလဲဖြစ်ပါတယ်။ လူတွေ အဖွဲ့အစည်းတွေဘက်မှာ ဘုရားားရပ်တည်ပါ။ ဘုရားက တော့ဘယ်တော့မှ မမှားဘူး။ လူတွေရဲ့လုပ်ရပ်နှင့် လုပ်ဆောင်မှုကတော့ အချိန်တစ်ခုအတွင်းမှာဘာမဆိုဖြစ်လာနိုင်တယ်။ ဘုရားဘက်မှာ ပြတ်ပြတ်သားသားရပ်တည်တဲ့သူတွေ ဘက်မှာလည်း ဘုရားကပြတ်ပြတ်သားသားရပ်တည်တယ်။

ဇူလိုင်လ ၆ ရက်နေ့

မှန်ကန်သောနှလုံးသားဖြင့်(၆)

“စ​ကား​ပြော​သော်​လည်း​ကောင်း၊ အ​မှု​ဆောင်​ရွက်​သော်​လည်း​ကောင်း၊ သ​ခင်​ယေ​ရှု၏ နာ​မ​တော်​ကို​ထောက်၍ ခပ်​သိမ်း​သော​အ​မှု​တို့​ကို ပြု​မူ​လျက်၊ ကျေး​ဇူး​တော်​ကြီး​လှ​ပါ၏​ဟု ထို​သ​ခင်​ကို အ​မှီ​ပြု၍ ခ​မည်း​တော်​ဘု​ရား​သ​ခင့်​ရှေ့၌ ဝန်​ခံ​ကြ​လော့။” ကောလောသဲ‬ဩဝါဒစာ ၃:၁၇

နှလုံးသားထားတတ်မယ်ဆိုရင် ဘယ်အရာကို လုပ်ခွင့်ရရ ကျေးဇူးတင် ဂုဏ်ယူနေမှာမလွဲဘူး။ နှလုံးသား မထားတတ်ရင်တော့ကြီးမားတဲ့အခွင့်အရေးကြီးကို လုပ်ခွင့်ရနေရင်တောင်မှ ဘယ်တော့မှ ဘယ်အရာကိုမှ ကျေးဇူးတင်တတ်နေမှာ မဟုတ်ဘူး။ လူတစ်ယောက်ရဲ့နှလုံးသားက မှန်ကန်တဲ့ ခံယူချက်ကသာ အရာရာကို ကျေးဇူးတင်တတ်တဲ့ စိတ်ကိုဖြစ်ပေါ်စေတယ်။ နှလုံးသားမှာ ရိုးရှင်းစွာခံယူရမှာက ဘာပဲလုပ်လုပ်၊ ဘယ်အရာကိုပဲလုပ်လုပ် ဘုရားနာမတော်ကိုထောက်ပြီးတော့ လုပ်ဖို့ပြောဖို့ပါ။ ကိုယ်လုပ်နေတာ ဘုရားဘုန်းတော်အတွက်ဆိုရင် အနိမ့်ဆုံး အလုပ်ဖြစ်နေရင်တောင်မှ အမြင့်ဆုံး အလုပ်ထက်ပိုပြီးတော့ ဂုဏ်ယူစွာ ကျေးဇူးသောစိတ်နှင့် လုပ်ဆောင်နိုင်မှာပါ။ ကျွန်တော်အမှုတော်ဆောင် ဖြတ်သန်းလာတဲ့ တစ်လျှောက်လုံးမှာ လုပ်ခွင့်ရတဲ့အရာတွေအားလုံးကို ဒီလို နှလုံးသားနဲဘဲ လုပ်ဆောင်ခဲ့တယ်။ တချို့လူတွေ မလုပ်ချင်တဲ့အလုပ်ကိုတောင်မှ ဘုရားနာမအတွက် ဘုရားဘုန်းတော်အတွက် ဘုရားကို ကျေးဇူးတင်တဲ့ စိတ်နဲ့လုပ်ခဲ့တဲ့အကျိုးက ရိတ်သိမ်းလို့မကုန်အောင် ခံစားခဲ့ရတယ်။ လုပ်နေတဲ့အလုပ် ပြောင်းဖို့ထက် လက်ရှိလုပ်နေတဲ့အလုပ်ကို ဘဲ နှလုံးသားပြောင်းပြီးလုပ်ကြည့်ပါ ထူးခြားလာပါလိမ့်မယ်။

ဇူလိုင်လ ၅ ရက်နေ့

မှန်ကန်သောနှလုံးသားဖြင့်(၅)

“စ​ကား​ပြော​သော်​လည်း​ကောင်း၊ အ​မှု​ဆောင်​ရွက်​သော်​လည်း​ကောင်း၊ သ​ခင်​ယေ​ရှု၏ နာ​မ​တော်​ကို​ထောက်၍ ခပ်​သိမ်း​သော​အ​မှု​တို့​ကို ပြု​မူ​လျက်၊ ကျေး​ဇူး​တော်​ကြီး​လှ​ပါ၏​ဟု ထို​သ​ခင်​ကို အ​မှီ​ပြု၍ ခ​မည်း​တော်​ဘု​ရား​သ​ခင့်​ရှေ့၌ ဝန်​ခံ​ကြ​လော့။” ကောလောသဲ‬ဩဝါဒစာ ၃:၁၇

ဘာကိုရှေ့တန်းတင်ရမလဲဆိုတာသိရင် ဘယ်လိုကိစ္စမျိုးကိုမဆိုရင်ဆိုင်အောင်မြင်ဖို့မခက်ပါဘူး။ လူတွေက ရှေ့တန်းတင်ရမယ့်အရာတွေ၊ ဉီးစားပေးရမယ့်ကိစ္စတွေ သတ်မှတ်ထားလေ့မရှိဘူး။ လုပ်သမျှမှာ မှန်ကန်သောနှလုံးသား ဖြင့် ဘုရားနှစ်သက်တဲ့ အသက်တာကိုလိုချင်တယ်ဆိုရင်တော့ အရမ်းကို ရိုးရှင်းပါတယ် ဘာပဲလုပ်လုပ် ဘုရားနာမကိုထောက်ပြီးတော့ ပြောဆိုလုပ်ဆောင်ကြပါ။ သူ့နာမအတွက် မဟုတ် ရင် ဘာမှမလုပ်နဲ့။ သူ့နာမကိုထောက်ပြီးတော့ပြုမူလုပ်ဆောင် မယ်ဆိုရင်သေချာတယ် သင်လုပ်မျှမှာ ဘုရားဘုန်းထင်ရှားမယ်။ ဘုရားနှစ်သက်တဲ့ နှလုံးသားက ဒါပဲ ဘာကြောင့်မှ သင့်နှလုံးသားကို ဘုရားအတွက် လုပ်ဆောင်မှုကနေ လမ်းမလွဲသွားစေနဲ့။

ဇူလိုင် ၄ ရက်နေ့

မှန်ကန်သော နှလုံးသားဖြင့် (၄)

လူ၏ အမှုကိုသာ ဆောင်ရွက်သကဲ့သို့ မဟုတ်၊ သခင်ဘုရား၏ အမှုတော်ကို ဆောင်ရွက်သကဲ့သို့ ပြုလေသမျှတို့၌ စေတနာစိတ်နှင့် ပြုကြလော့။ (ကောလောသဲ ၃း၂၃)

တချို့က အမှုတော်ဆောင်ချင်ပေမယ့် ဘယ်လိုစရမှန်း မသိကြဘူး။ ကြီးမြတ်တဲ့ ဘုရားအမှုတော်ကို လုပ်ဆောင်ဖို့အတွက် လက်ရှိလုပ်နေတဲ့ အလုပ်တွေကို နှလုုံးသားပြောင်းပြီးတော့ လုပ်ကြည့်ဖို့ အကြံပေးချင်တယ်။ ဘာဘဲလုပ်ခွင့်ရရ အမှုတော်ဆောင်တစ်ယောက်ရဲ့ နှလုံးသားနဲ့ လုပ်မယ်ဆိုရင် ဘုရားအမှုတော်မြတ်မှာ ပါဝင်နေတာပါပဲ။ ကြီီီီီီးမြတ််််တဲ့ ဘုရားအမှုတော်မြတ်ကို စီးပွားရေးဆန်ဆန် လုပ်နေတဲ့သူတွေ ရှိသလို လောကအလုပ်ဖြစ်ပေမယ့် ဘုရားအမှုတော်ဆောင် တစ်ယောက်ရဲ့ နှလုံးသားနဲ့ လုပ်ဆောင်နေတဲ့သူတွေလည်း ရှိပြန်တယ်။ နှလုံးသားကို ကြည့်တဲ့ ဘုရားသခင်က လူတွေမြင်သလို မမြင်ဘူး ဆိုတာ သိဖို့တော့ လိုတယ်။ ဒါဝိဒ်က ဖခင်အိမ်မှာ သိုးထိန်းရတဲ့ အလုပ်ကို လုပ်ရပေမယ့် စေတနာစိတ်နဲ့ လုပ်တယ်။ တာဝန်ကျေရင် ပြီီီီီးရော ဆိုပြီးတော့ မလုပ်ဘူး။ ဒါကြောင့်

ဘုရားက ဘုရားရဲ့ အမှုတော်ဆောင်ခွင့်ပေးတာတောင်မှ သူများနဲ့ မတူတဲ့ အခွင့်ရေးများစွာကို ခံစားခွင့်ပေးခဲ့တယ်။ လက်ရှိလုပ်နေတဲ့အလုပ်ကို ဘုရားအမှုတော်ဆောင် နှလုံးသားနဲ့ အရင်လုပ်ကြည့်ပါ။

ဇူလိုင် ၃ ရက်နေ့

မှန်ကန်သော နှလုံးသားဖြင့် (၃)

လူ၏ အမှုကိုသာ ဆောင်ရွက်သကဲ့သို့ မဟုတ်၊ သခင်ဘုရား၏ အမှုတော်ကို ဆောင်ရွက်သကဲ့သို့ ပြုလေသမျှတို့၌ စေတနာစိတ်နှင့် ပြုကြလော့။ (ကောလောသဲ ၃း၂၃)

လူတွေအတွက် လုပ်ပေးနေတယ်၊ လူတွေဆီကနေ ကိုယ်လုပ်ပေးတဲ့အရာကို ပြန်ရဖို့ မျှော်လင့်နေတယ် ဆိုရင် စိတ်ပျက်တာနဲ့ အဆိုးတွေဘဲ ပြန်ရပါလိမ့်မယ်။ တစ်ချိန်တုန်းက ကျွန်တော် ကိုယ်တိုင်လည်း ကိုယ်လုပ်ပေးခဲ့တဲ့အရာတွေအတွက် လူတွေဆီကနေ ပြန်လည် ရိတ်သိမ်းဖို့အတွက် မျှော်လင့်ခဲ့ဖူးတယ်။ စိတ်ကူးတဲ့အတိုင်း ဖြစ်မလာတော့ ဆက်ပြီး လုပ်ချင်စိတ် မရှိတော့ဘူး။ လူတွေရဲ့ အလုပ်ကို လုပ်နေရပေမယ့် သခင်ဘုရားရဲ့ အမှုတော်ကို လုပ်ဆောင်နေတယ် ဆိုတဲ့ အတွေးလေး ပြောင်းလိုက်နိုင်တာနဲ့ အလုပ်လုပ်ပုံရော ရလာဒ်​ကော အရမ်းကို ကွာသွားတယ်။ လူတွေ အသိအမှတ်မပြုရင်လည်း ဘာမှ မခံစားရသလို လူတွေဆီကနေ အကောင်းဆုံးတွေ ပြန်မရရင်လည်း စိတ်မပျက်တော့ဘူး။ ပြုသမျှမှာ စေတနာစိတ်နှင့် လုပ်ဆောင်တတ်လာတဲ့အခါမှာ လူတွေဆီက မရနိုင်တဲ့ အရာတွေ ဘုရားဆီက သက်ရောက်လာတာ ခံစားရတယ်။ လူတွေရဲ့ အလုပ်ကိုဘဲ တစ်သက်လုံး လုပ်ရတော့မလားလို့ ထင်ရတဲ့ ဘ၀ကနေ ဘုရားအတွက် သီးသန့် အစေခံခွင့်တွေလည်း ဘုရားက လမ်းဖွင့်ပေးလာတယ်။ အရာရာ ဘုရားအတွက် လုပ်တယ် ဆိုပြီးတော့ စေတနာစိတ်လေးနှင့် လုပ်တဲ့ နှလုံးသားလေး ရလာရင် အရာရာ လွယ်ကူလာပါလိမ့်မယ်။

ဇူလိုင် ၂ ရက်နေ့

မှန်ကန်သောနှလုံးသားဖြင့်(၂)

“လူ၏​အ​မှု​ကို​သာ ဆောင်​ရွက်​သ​ကဲ့​သို့​မ​ဟုတ်၊ သ​ခင်​ဘု​ရား၏ အ​မှု​တော်​ကို ဆောင်​ရွက်​သ​ကဲ့​သို့၊ ပြု​လေ​သ​မျှ​တို့၌ စေ​တ​နာ​စိတ်​နှင့် ပြု​ကြ​လော့။-” ကောလောသဲ‬ဩဝါစာ ၃:၂၃

ဘယ်သူ့အတွက်ပဲ လုပ်ပေးရလုပ်ပေးရ၊ ဘယ်လိုအရာဘဲလုပ်ပေးရလုပ်ပေးရ အကောင်းဆုံးလုပ်ပေးပါ။ သူတို့နဲ့တန်ရာတန်ရာဘဲ လုပ်ပေးမယ်ဆိုရင် သင်လည်းတန်ရာတန်ရာဘဲပြန်ရလိမ့်မယ်။ တချို့က ဒီလောက်ဘဲ ငါ့ကို လစာပေးတာ ငါဒီလောက်ဘဲလုပ်ပေးနိုင်မယ်လို့ စဉ်းစားတယ်။ သူတို့မှ​ငါ့အပေါ်မှ မကောင်းတာ ဒါကြောင့် သူတို့လိုဘဲ ငါပြန်တုန့်ပြန်မယ်ဆိုရင် ကိုယ့်ဘဝထဲကို ကောင်းတဲ့အရာ ဘယ်တော့မှ ရောက်လာတော့မှာမဟုတ်ပါဘူး။ တမန်တော်ကြီးရှင်ပေါလုက အရာရာကိုမှန်ကန်တဲ့နှလုံးသားနဲ့လုပ်ဆောင်ဖို့ သွန်သင်တယ်။ လူတွေအတွက် လုပ်ပေးနေတာမဟုတ်ဘူးဆိုတဲ့အတွေး ထည့်ထားပါ။ လူတွေဆီကနေ ပြန်လာမယ့်အရာဘဲ မမျှော်လင့်ပါနဲ့ ဘုရားထံကနေ လာမယ့် အရာကိုဘဲမျှော်လင့်ပါ။ ဘုရားက အမြဲတမ်း ကိုယ့်အသက်တာကို အကောင်းဆုံးသောအရာတွေ လုပ်ဆောင်ပေး နေတဲ့အတွက် လူတွေကိုလည်းအမြဲတမ်းကောင်းတဲ့အရာကိုဘဲလုပ်ဆောင်ပေးပါ။ ဒီနှလုံးသားမှန်ရင် ကျန်တာအကုန်မှန်လာလိမ့်မယ်။